BLUE- 20

Chapter- 20

Fiamthu angin sawi mah se a thinrim tih ka hai lo.Tu hrepin nge hetiang thlalak lo thawn ka hre lo.Bakah a landanah hian tu tan pawh ngaihdan siam awlsam lutuk a ni tlat.

Ka call leh nghala,a pick ka beisei lo.Mahse, a pick ta tlat.

‘Hello…’ zangkhai zetin a rawn ti a,ka phone ka lasawna,ka melh nghek ringawt.

‘Ka sawifiah thei…’

‘Aaaah,eng kha?” thinrim aw a awm chuang lo.

‘I Photo lo thawn kha,I ngaihdan ang kha a ni lo’ ka ti leh nghut.

‘Engmah ngaihdan ka nei hleinem,a hmuhnawm loh ka ti ringawt a’ a ti leh a.A nui hak bawk,ka then nawk thung.Engmah nuihzat tur a awm lo.

‘Anih chuan i thinrim lo tihna a ni em?” ka ti leh sup.

‘Rim nang,I sawi lawk vek kha.Ka him nan ani zawk hi mi hriatah i bialnu anih angaia.A dik em?” a rawn ti leh a.

‘Dik…’

‘Anih chuan hahdam la,ka himna tur anih phawt chuan engpawh ka pawm vek ania’ a rawn ti leha,a thinrim viau dawn emaw ka tih laia a ngaipawimawh lo leh lutuk chuan min ti hamhaih tlat,engmah thikthu nei lo niawm taka a tawng  vel lah chuan min ti thinrim teuh thung.

‘Kan chhuak dun ngeia,mahse i hmuh ang kha engmah a thleng lo’ ka ti leh hmuk.

‘A ho em mai,engpawh chu thleng se ka himna tur anih kha ka hrereng dawn a,pawi ka ti lo.Enteh,Thawnthu a ang ka ti’ a ti leh a.Mahse, tun tum chu a awah tih elna ni awm tak a lang ta thung.

‘Engmah a thleng lo,kan chhuakdun satliah mai zawk’

‘Anih chuan kha Photo kha an Edit aniang a’ ngeiawm fahranin a nui nghal hak bawk.Ka then leh nawk.Keima tihdik lohah ka tal awk dawn tih ka chiang,Zothani nen kan inkawp lai khan pawisak nei miah loin ka kawpsan fo va,mahse zankhat bak an daih ngai lo.Zothani khan a haw tak tak ngam ngai lo va,a thinrim a.A  titau fo chung khan thlem tum loin amaha a lungawi hun ka nghak mai zel zawka,mahse tunah chuan chutiang mai mai a ni dawn lo tawp tih a chiang ta kuar.

‘Ka dik lo tih ka hria’

‘Aw, I dik lo.Hmeichhia hi infiamna hmanrua kan ni lo ania’ a tichang ta fak.Tun lawka engmah ngai serious lo anga tawng kha chu a nita hauh lo.

‘Infiamna inni ka tih ka va hre lo’ ka ti hmuk.

‘Achang chuan sawi kher ngai lo a chetzia a langchhuak mai thin thil a awm ve.Engpawhnise Puitling kan ni ve ve tawha,kan inkawp leh tih pawh tuman an hre chuang lo va,tawp leh mai a harsa lo’ a rawn tita duah.

‘Min then leh i duh tihna a ni em?” ka ti hluk.

‘Duh nang,ka duh angin chet ka la ve tawh mai ang chu ka ti ’ a ti leh a.

‘A va hlimawm dawn ve’ ka ti nghut.

‘Nia,a hlimawm ngawt ang.I lo en dawn nia’ a rawn ti leh salh.

‘Min cho tihna a mi?” ka ti ve sup.

‘Aih,cho nang.A hrim hrimin engthilah nge ka cho che anga?’ a ti leh hmak.

‘Ka hre lo’

‘Anih chuan hahdam deuh khan lo awm teh,venhim ka ngai lo tih ka entir ang che.Ka himna tura i kawp reng kha a tul loh zia i hre mai ang’ a ti leh a.A aw dam thlap maiah chuan a inringtawk tih a chiang ngawih ngawih.

‘Enge tih i tum?”

‘A hlimawm viau ang’ awlsam zetin a ti leha,a nui leh hak bawk.

Muhil thei loin ka let tawn sek,Game ka khelh lahin ka khel tui thei lo,ka thi reng ringawt.Ka Phone ka dah ta nge nge.Tluangpuii nen kan inbiakna ka ngaihtuah leta,kan inkawp leh dawn khan Maria-i then turin a ngenin min ngen a,ka then lo anih chuan kan inzui a duh lo bawk a.Mahse, keimah zawkin ka chingfel ang ti siin Maria-i ka then chuang lo,Engmah tihsual a neih tlat si loh chuan then ngawt chhantur a vang lutuk tlat.Mahse, Tluangpuii ka kalsan thei chuang si lo.Maria-i hnenah chhan neiin ka kawp tih ka hrilh dawn nge ka hre lo.Ni lo,eng mah chhan a nei lo.Ka duha,ka mamawha,a thil tih tawh zawng zawng ka ngaidam thei vek zawk.Keihi keimah ka nita lo emaw ka ti rum rum mai.Hetiang em em a min chawkkual hneh hi eng hmeichhia nge maw anih hrep ni??!!!!

Ka nuin min rawn calla,peih lo zetin ka phone ka en a,nizan khan khawvar dawn lamah ka muhil ta chauh kha ania.Ka mit a kham deuh thum bawk.

‘Aw,Nu..’ ka ti sup.

‘I la tho na nge?” a rawn ti lang lang.

‘Um,tho lo..Enge?” ka ti leh a.

‘I hman chuan i lo haw phei lawk dawn mawni ka ti a’ a rawn ti a.Ka chhan hmain ka let thawk.

‘Ngatinge? Buaina i nei nge?” ka mit ka nuaia.

‘Nei animai ang chu,kan huan kha kan ri ten an duhna lai laiah an rawn teh ngawt maia,niminah ka zuk kala.Kan inhnial buai deuh alawm le’ a rawn ti a.

‘Khawi lai ber nge?” ka ti nghut.Huan hi ka pa khan a nei thina,a boral hnuah ka nu thiante ta hmun hniha mi ka leisak leh bawka.Ka nu hi Mizo nu tak,kut awl ngaithei lo zet mai a ni a.Thei leh thlai kung engemaw zat a phun a.Hralh chhuah tur a awm tan mek bawk.

‘I pa huan kha mawle,kan tlawh khat deuha.Nimin piah khan i Ni in min rawn hrilha,niminah ka zuk kala.A sawi ang tak takin an lo ti a.An mahni an lo awma,hralh an lo tum a.An duh chen chen an lo teh maia’ a rawn ti leh duah.

‘Revenue Dept lam a hranin ka lo be dawn nia,a tul chuan ka lo haw anga’ ka ti sup.

‘An mahni lam hian hmelhriat tha an lo nei anih ka ring,lo haw la ka duh.I pa ro zinga mi ania,pen khat pawh ka tawlh dawn lo reng reng’ a ti leh hmawk hmawk.Tiang khawpa ka nu lungawiloh hi ka la hre ngai lo.

‘Ramchin engkim kha Pass felfai vek kan nei khan ka hriaa’ ka ti a.

‘Nei e,mahse anni pawn an nei alawm.Amak lutuk’ a rawn ti leh hlak hlak.

‘A tha alawm,ka lo phei ang’ ka tita nge nge.

‘Nangmahin lo kal suh,Driver rawn hruai ang che’ khauh zetin a ti leh a.Ka haw apiangin keimahin ka khalh mai zela,min hau ziaha.Ka sim chuang hlei lo va.

Tho mai loin ka mu vang vang,nizana thilthleng bawkin ka ngaihtuahna a rawn luah lehnghal zat.Ka Phone ka ban leha,Tluangpuii ka wisha.Ka rin ang ngeiin a hmu a,mahse a rawn reply lo.

Tlaiah Lunglei kal turin kan chhuaka,ka nuin vawi li lai min rawn hrilh nawn avangin tun tum chu Driver ka hruai ta nge nge.Ka kal dawnah Tluangpuii ka calla,mahse a pick leh ta chuang lo fo.Msgin Lungleiah ka kal dawn tih ka hrilha.A read lo..Lunglei kan thlen thlengin engmah a rawn sawi chuang lo.Call ka tum zeta,mahse ka thulh leh ta zawk.Ka kal dawn tih a hriaa,engmah a rawn sawi lo va,min ngaipawimawh tawk lo.Biak kher tul ka ti tawh lo,ka haw hunah ka hmuh phawt loh chuan Phone atangin engmah ka tifel thei dawn lo tih ka hria.A luhlul dan a satliah lo lutuk.

Revenue Dept Offcieah ka kala,kan buaina vel sawipui turin ka hmelhriat Officer Senior pakhat ka pan ding nghal chat.A mimal tak pawha eng eng emaw ka lo tihsak zauh zauh tawh a ni a,ka haw phei changin kan inkhel ho fo bawk.Engmah beisei let ka nei ngai lo chungin ka lakah a inhawng em em reng.Officer eiru lo leh Dik zet mai a ni a,hausak lah an hausa lua lo khawp.

‘Nangmah kher lo kal lo pawn Phoneah min rawn hrilh la,kan chingfel thei tur ania’ a ti nuah nuah.

‘Pass kan insiam hnan anih hmel a,chu chu buaina a ni mah zawk’ nui chungin ka ti a,a chek tluk.

‘Ava mak awm ve,chu zawng en chian ngai anih chu.Vawiin chu ka awl viau asin,a rei ka ring lo bwka,ka lo kal ve ang’ a tita hlauh.

Kan huan thenawma huan nei ve te fapa hi Revenue Depta Officer tuai thar hlim a lo ni a.A inlek viau dawna,mahse amah aia Senior zawk angam lo nasa ,chu mai bakah dik loh hi chuan huai a lo har viau zel.Engkim nei fel thlip thlep kan ni a.Anni lamin nei an lo intih ve thil erawh a dikhlel tih mi hriat an hlauh vang nge ka hre lo.An phawrh ta hauh lo bawk.

Huan atanga kan haw hnuah Tluangpuii’n min rawn call hlawl,ka pick lo dawn zeta,mahse naupanchhiatthlak ka ti leh lawi.

‘Khawiah nge i awm?” Phone ka pick rualin Pu Dama’n a rawn ti a.

‘Lungleiah ka awm,mahse Aizawl lama phei turin ka chhuak tep’ ka ti a.Ni hnih vel lek awm tum kha ni 4 lai ka awm ta.

‘Anih chu,thil awmdan a tha lo hle ania’ thutak zetin a rawn ti a.

‘Eng thil nge? Kan tluang viau emaw ka lo ti a’ ka ti sup.

‘Um,kan Nula hmeltha lo lan hma kha chuan kan tluang chu ania,mahse hei a lo langa.Kan buai leh zo vek chu anih hi’ a rawn ti a.Ka mitthlaah Tluangpuii a lo lang nghal zat.Ramdinsanga hna kha a thawk tawh dawn lo tih a sawia,mahse tunah a thawk leh lawi tihna nge ni?

‘Tunah a lo kal leh tihna nge a hmaa mi zawk?” ka ngaihtuahna tilang lo turin ka ti hmuk.

‘Nizanah a lo thleng tih kan naute hian an rawn sawia.Tukin kha Boom-a nen  inhmuh kan tum hun ania,a rawn thulh ta chiaha’ lungawi lo ni awm takin a ti ram hmak.

‘Boom-a chu ka lo bia ang.Hmanni a bungraw chungchang kha a nih ka ringa’ ka ti nghut.Kan Partner lianber a ni a,kei aiin a upa nangin kan inkawmngeih viau thung.Thiltam takah in anna kan nei bawk.Mahse, hmeichhia a lawm dan erawh kei aia let tam fe a ni thung.

‘Be mah la eng a ang pawn ka ring lo,he nu hian min ti thinrim tam ta viau mai’ a ti leh a.A awah thinrimna engmah lang lo mah se a thinrim leh thinrim loh hretur khawpin kan inhre chiang tawk viau tawh.

‘Engmah a ti pawi lo vang,ka lo bia ang’ ka ti leh hmuk.

Phone ka off a.Boom-a number ka en a,mahse ka call hmain ka rilru ka thlak leh ta thung.

‘Hello…’ Mutchhuah hmel fein Tluangpuii’n a rawn ti a.

‘Khawiah nge i awm?” ka ti sup.

‘I hre na nge?” min rawn zawt let ve thung.Nizanah kan inbiaa,tukina min rawn wish leha,mahse a zin dawn tih engmah a sawi lo.

‘Hria ila ka zawt dawn che mi? ” ka ti hmuk.

‘Sorry,Aruata awm tawh lo mah se Rocky i la neia,ka awmna chu i hre zel ang chu ka ti a’ a ti nghauh.A la nui hak zui bawk.Ka ner nawk thung.Hman zan atang khan kan inbiak reng rengin huat hleihtheih si loh,ngeiawm zet siin min chhang ta ziah.

‘Khawiah nge i awm?” ka ti nawn leh a.Min chhaih thinrim a tum ni a ka hriat avangin ka insum hram hram bawk.

‘Ka zin mek..’ a ti nghat.

‘Khawiah?”

‘Pu Dama khan a rawn hrilh che ka lo ringa,kan inhmu tak asin’ a rawn ti leh a.A aw a dam thlap bawk.

‘Enge ka sawi kha?’ ka insum hleithei lo.

‘Eng ber? Kan sawi dun hnem tawh e’

‘Ramdinsanga hna i khawih tawh lo ang kan ti emaw ka lo ti a’

‘Ka khawih hleinem,ka sawi tawh ka bawhchhe mai mai ngai lo ania,ka intiam ve ngai lo mai zawka’ a rawn ti leh a.

‘Anih chuan khatah khan eng nge i tih?”

‘Zo…Hahdam teh,ka mimal hian eng eng emaw tihtur ka nei ve a.Kan la inneih em lo hi’ a rawn ti leh hlak.

‘A tha alawm,thil zawng zawng min hrilhturin ka ti lo che.Mahse,I zin chhuak dawn anih chuan hriat ka duh ‘ ka ti hmuk.

‘Ok.Nidangah chuan ka sawi lawk tawh dawn nia.Min ngaihtuah suh,bakah thil pakhat.Misual ang maia min enthlak reng hi bansan teh,a ninawm ania’ a ti leh nghauh.

‘ Enthlak maw?” ka ti hluk.Kan inzui leh hnuah hian vawikhat pawh ka la enthla leh lo.Ramdinsanga chungchang erawh hriattumin ka bei ngei,Mahse amah ka chhui lo.

‘Ka kalna apianga min zui thintu hi ania ka tih.Ka hne thawkhat khawp mai,thlamuang pawn ka inbual thei lo’ a rawn ti leh hmak.

‘Lawk,chutiang an lo awm tihna maw?”

‘Hriat loh der a ngai lo,ka himna i ngaipawimawh tih ka hria,chuvangin Maria-i i kawp pawh sawisel lo ka ni a,lawm pawh ka lawm.Mahse,tiang hi ka ngainat zawng a ni lo’ a ti leh duah.Eng ang pawn sawifiah tum ila min ring dawn chuang lo tih ka hria.Ka hah thlawn mai mai ang tih ka chiang,mahse tu nge nita ang??Pu Dama ka rilruah a lo lang zawk.Ka lu ka thing nawk bawk.

‘I lo haw hunah kan inhmu dawn nia,kan sawi dun angai ang ka ring’ ka tita nghut.

‘Nia,ka la chiang lo nangin naktuk zing anih loh chuan tlaiah aniang’ a rawn ti leha.A aw a dam leh thlap tawh.

Boom-a ka calla,vawihnih a ring hman tihin a rawn picka,nidang ang bawka vei nei loin ‘Hello’ a rawn ti a.Ka then suk,nupui fanau neiin a fa upa zawk pawh kun 10 a tling tawh.Mahse, hmeichhe hmeltha a kalpel thei hlawl lo.A nupui pawh hian a hai lo,mahse a hre lo der zel ni maiin ka hria.Tluangpuii nen an inkawp tur angin ka ngaituaha,ka na zawk thei.Kei ang bawk khan hman tangkai a tum ve angem? Ka lu ka thing nawk.

‘I tha maw?” ka ngaihtuahna tilang lo thei ang berin ka ti zangkhai vuh.

‘Tha lawm,nang hi engtik nge lo chhoh i tum a?” a rawn ti leh lung lung.

‘Ka hre mai lo.Lo chhuk i tum rih lo zawk nge?” ka ti ve a.

‘Aih,tunah chuan tum rih lo.Mahse thla tharah chuan ka lo chhuk ang’ a rawn ti leh a.

‘Um,lo chhuk la.Inhmuh a khat alawm’

‘Nia,Party a chak awm.Eng nge min rawn call chhan?” a rawn ti leh a.

‘Hmanni a ka rawn sawi kha,Order tihbelh ka duh ka tih kha.Enge chanchin nita?”

‘Eee,kha kha maw.Ka lo ti ang’ awlsam zetin a rawn ti a.

‘Anih chuan kan mamawh zat ka rawn sawi kha naktukah rawn lak nghal an duh dawna” ka ti leh a.

‘Kan naute ka lo bia ang.Tukin pawh kha Pu Dama nen inhmuh tum kan nia,Family thilah buaina ka nei leh a.Naktukah chuan lak hman inring phawt rawh,Pu Dama pawh naktuk zingah lo kal mai se,i lo hrilh mai dawn mi?” a rawn ti leh zut zut.Engmah dik lo awmin a lang lo.Tul miah loah Pu Dama kha a phili ti dawn ila chutiang mi a ni der si lo.

‘Ka lo hrilh ang.Naktukah la turin kan nau ka rawntir ang’ ka ti leh a.

‘Um,ka rawn hrilh leh ang che’

‘Anih phawt…’

‘Lawk,Sangkim.Thil zawh lawk duh che ka nei’ ka dah hmain a rawn ti leh a.

‘Sawi la…’ ka ti nghut.

‘Champhaia i ram lei kha i hmang ta lo em?”

‘Hmang ta rih lo,ngatinge?” ka ti a.Ka ram lei dawn khan ama min khawhhmuh a ni a,mahse enge ka tih dawn erawh engmah ka hrilh lo thung.Sumdawnna pakhata ka Partner a ni ve maia.Tunah chuan Hotel ka nei tawha,Motor Company nen inremsiamin ka sumdawnna ka zauh belh leh bawka.Chuti chiamin ka mamawh nasa tawh lo,mamawh lo tawp erawh ka ni lo.Kei chauh ni loin ani pawn ka mamawh ang chiahin min mamawh  ve tho.Ka bul tanna tak tak anga ka ngaih anih avangin ngaih erawh ka ngai hlu viau thung.

‘Tunah hian min rawn dawr an awma.I ram bul chiahah khan thil liantham zet tih an tuma.Mahse, an mahni chuan an ti hleithei lo.Ka sawi awmzia chu helamah puitu an nei tha tawk lo’ a ti leh a.

‘Anih chuan lak i tum tihna mi? eng lam nge a hriat chi em?”

‘Hriat chi tho e.Mahse, nakinah ka hrilh ang che.Ka zawh duh zawk che chu ka lo enchiang anga,I ram bul chiah tho anih avangin keima hming tho siin i la duh angem?” a rawn ti leha.Ka rilruah hmana Ramdinsanga’n ka thil ruahman fel sa vek,Tluangpuii vanga last minute a min laksak kha a rawn lang zawk.Tun thlengin hma an la la lo tih ka hre bawk.

‘Enge anih hre phawt ila,ka hnial lo maithei’ ka ti sup.

‘Ok,anih phawt.Pu Dama chu aw,ka call lo mai ang.Zingah chuan lo kal tawp mai se’ a rawn ti leh mawlh mawlh.

Pu Dama ka call lehnghala,engmah dik lo a awm loh thu leh Family Problem an neih thu ka hrilha,Naktuk zinga inhmuh a duh tih ka hrilh nghal bawk.Min hnial loin a aw ve mai bawk.Mahse, Tluangpuii thilsawi ka bengah a rawn ri nawn zat.’Ka kalna apiangah min zuia,thlamuang pawn ka inbual thei lo’ a ti anih kha.Pu Dama hian engkim Tluangpuii chanchin a hre zel emaw tihtur khawpin a buaipuia,a tih a ni angem? Ni lo hram tehse.A khawih anih chuan enge ka tihdawn ka hre chiang lutuk tlat.

Ka Office kawngkhar kik thawmah ka hawichhuak vut,lut turin ka au nghal a.Kawngkhar a rawn inhawnga,ka beisei loh zetin Ruata a rawn dak hlawl mai.

‘Ehe!! I lo haw tih ka hre hleinem’ ka ti chhuak nghal hluai.

‘Niminah ka lo haw.I zin chu i tluang maw?” rawn luh pahin a rawn ti a.A zinna lamah a che na bawk aniang alang pawr fap mai.

‘Tluang e,niminah keipawh ka haw chiah lawm.I zuk chena hle a ni maw? I dum vek ania” ka ti a.Min chhang loin ka hmaa Chair awmah a rawn thu thla te te.

‘A nuam animai.Zanin chu?” a tihzawm zat.

‘Enge zanin?” ka ti hu thung.

‘Ekhai!!! Group i en na nge?”

‘En nang,engthil nge a?” tih pahin ka phone ka en a.Kan thianho groupah ka luta, engmah a awm lo.Nizana Rinawma leh Zomawia inchhan uanna bak engmah a awm lo.

‘Engmah a awm loh hi’ tih pahin ka en a.

‘Khawi Groupah nge i en a?” a ti ve thung.

‘Kan thianho bak eng group nge ni anga?”

‘Khatah ni lo,midang nena kan awmna group zawkah khan.Kan ri chiam ang chu ka lo ti asin’ a ti leh a.A sawina groupah ka luta,ka zu hmu nghal mai.Ka thennghal suk.

‘A nuam phian ang,mahse kan thianho bak hi chu ka peih tehchiam lo’ ka ti liam puat.

‘A ho em mai,thiante vek tho alawm kan nih.Kal ila,bakah nilengin hna i thawka,zan lama chhuah thawven te hi i chak ve lo mi?” a ti leh a.

‘Chak tehchiam nang,hnathawh te chu a nuam alawm’ ka mit ka siai zauh.

‘Tenawm lo mai teh a,kal ang.Nula chhe lo zet zet an tam leh dawn ania’ a nui hak hak.

‘Nang hi a..’ ka ti hluk.

‘Enge? Nang anga Doctor lungmawl satliah bum tur ka hmu ve hleinem’ a nui leh huk huk.

‘A lungmawl meuh emawni? Hma lam pan teh,tiang ringawt hi chuan i thi vat ang’ ka ti ve thung.Dingpuii rai hnuah khati khawp khan a che nawia,thla pawh a liam hmain vei lo ang hmakin a khawsa leha,mahse a lo vei zia chu zu a in nasat tak viauah hian a  lang leh ta tho.

‘Sangkim,kan va inhmu khat ve’ mipa awin a rawn ti a.Min rawn betu ka en vut.Ramdinsanga nen kan inhmachhawn ta siah.

‘Nia,hmu khat.I tha maw?” ka ti nghut.

‘Tha lawm,nichina mi kha min hmelhriattir ve dawn em?’ a ti leha,a nui vur vur bawk.

‘I duh phawt chuan..’ ngaihsam hmel zetin ka ti liam puat.

‘Um..Duh tehreng mai’ a ti leha,a nui vun vun bawk.

‘Anih phawt.Kan inhmu leh dawn nia’ amah bawkin a ti leha.Chhang loin ka ban ka vai zauh thung.

Ka rin aiin nuam ka tita phian,Puitling vek kal khawm kan ni bawka.Tu mah rui nawi lutuk an awm lo,music a ri bur bura,a then an lam nghawng nghawng laiin a then uluk em em a lo inkuah ngawih ngawih tawk an awm bawk.Ka hawi kuala,Maria-i ka hmu mai lo,nichin khan Phone  hmang lawktur khan a kalsawna,a lo la let ta lo.Sana ka ena,haw ka duh tawh.

Balcony lam ka pana,Tukverh nawrtawlh theiha siam a lo in hawng saa,Railling nghenga Maria-i ding ka va hmu theia,mahse amaha ding loin a bulah mipa pakhat a ding ve bawk.

Ka pen chhuaka,A mipa zawk hmel ka hmu chiang thei lo.Ka pen leh tur chiah chu a Mipa zawk a ding mara,ka ding leh rih.Ka hriatthiam chiah si loin engemaw dik lo awmin ka hre tlat bawk.

‘Lut ila,kan awmbo rei lutuk chuan in pain a lo zawng tawh ang che.A theihtawpin a veng ve bawk che sia’ Mipa zawkin a ti a.A awah nuihzatna  a lang chiang ngang mai bawk.Tu nge anih ka hria….

Ramdinsanga…Darkar tam pawh a liam hma khan ka inhmelhriattir chauha,mahse tuna an awm danah hi chuan reitak lo inhre tawh niawm tak anni thung!!