BLUE-24

Chapter- 24

‘Engthil nge?” pangngai thei ang berin ka ti sup.

‘Phone a sawi loh ka duh zawk,I remchan chuan zanah inhmu ila’ a rawn ti leha.Zanah Tluangpuii te inah kal tum ka ni a,mahse kal ngei ngei ngai erawh a ni lo.

‘Ok,ka lo kal ang.Khawiah nge niang?”

‘Inah lo kal mai la,pawi itih loh chuan?’

‘Ti nang,ka lo kal ang’ ka ti sup.Rocky tluka thil la lap thei an awm lo,a hnaah thil mak pui pui a tawng nasa bawk.Engkim mai hi ho lam deuh ang maiin a sawi thei ziah.Mahse ani pawn rapthlak a ti anih chuan thil mai mai a ni dawn lo chiang sa.

Chaw kan eikham veleh Rocky hmuturin ka inkhalh chhuaka,Tluangpuii hnenah hnalam pawimawh a awm tih msgin ka hrilha.Ruata ka hrilh bawk.

‘Roomah chho ila…’ Rocky-an a ti a.A chhungte nen kan inbe luam.Ka kal ngun lutuk lo nangin a chhungte nen kan inhre tha thawkhat viau tho.A roomah kan inzui chho a,a Room hi inchhung atanga kal ni loin pawn atanga luh a ni a.Midang Room a awm ve lo bawk nen kan kal chuan kan inkawmna hmun a ni ziah hrim hrim.

‘Thu la..’ a ti a.A Computer Table lam a pana,a bula thut tumin Plastic chair ka la ve thung.Computer a on a.Game chungchang a sawi mawlh mawlh,mahse ka bu liam vel mai mai thung.

‘Vawiinah Aruata nuin min rawn biaa.Ka thiltur an kawl a rawn ti a.Ka va kala,hei hi min lo pe a’ tih pahin Envelope a rawn phawrhchhuaka,min rawn pe a.Ka laa,Envelope kawma Rocky hming inziak ka hmu nghala.A kutziak kawi chhe zetah chuan Aruata ziah a ni tih ka hre thei mai bawk.

‘Pendrive a daha.Ka lachhuak tawh’ ka rilru hria niawm takin a ti leh a.Ka bu nghut.Dawhkanah Envelope ka daha.A thil min hrilhtur lo zawh chung chung awmzia a awm lo tih ka hria.

‘Eng eng emaw a lo dah nuala.Mahse, chungthil chu nangma tana pawimawh lutuk a awm vak lo.Hei zawk hi’ tih pahin a click a.Video a rawn in play nghal zat.

Khum a rawn langa,a phe leh zawk zawka,a awmzia ka hre eih lo.

‘Eng…?” ka ti hman.Engmah sawi loin Monitor a kawk zauh ringawt.A kawhna lam ka en leha,mahse ka tum loh lutuk ka hmuh takah chuan ka hit deuh mup a ni ber.

Ruak deuh thawin khumah Tluangpuii a mu a,a chungah amah thlawp deuh titihin Mipa pakhat a bawk a,enge an tih hrilhfiah kher ka ngai lo.

‘Kha kha….’ Rocky-an a ti sup.Monitor ka melh ngawt ngawt.Mahse, engmah alang tawh lo thung.

‘Off suh,a vaiin ka en duh’ ka ti sup.

‘Kha zawng kha,abak a awm lo…’

‘Maw?” ka ti leh hu.Ka mawl hmel khawp ang le.

‘Kha zawng kha,a sei lem lo.Minute khat lek tak tak.Mahse, leakout ta se hmeichhe tan khan mualphona tawpkhawk a ni thung’ a ti dam leh thlap.Ka lu ka thing nawk,ka rilru tihfim tumin ka mit ka chhing leh sawk a,mahse ka mit ka chhin rual rualin tun lawka mi kha ka mitthlaah a lo lang ve ta thung.

‘Mipa kha tu nge?” ka ti leh a.A thle bak.

‘Ka hre lo..’

‘Ok..A pawi lo,engtin nge Aruata’n a neih le?” ka ti leh sup.

‘Ngaihdan ka nei lo.Kan hna a in anga,keichu Sawrkarin ka kut phuarchin a neia.Ani kha chu a zalen.Chu zawng chu kan danglamna a ni a,ka hriatchhuah atan a lo dah a ni thei.Emaw,khami zan khan a thi dawn tih a hre lawk a ni thei’ a tita duah.Ka ngaihtuahna a vir zawk.Ni lo…A ni thei lo hlawl.

‘Chuan,thil pakhat.He video hi Tluangpuii hian Aruata kutah a awm tih a hre maithei,emaw midang hre ve an lo awm anga.Chu chuan a that a ni thei’ ka ngaihtuahna nen in ang lo mah se a inhlat lo.Kei chuan Aruata thih dawn zana Tluangpuii nen an inhmuh kha ka lo ngaihtuah daih.Engkim hre sa vekin a that a ni thei.Ka ngaihtuahna duh loin ka lu ka thing nawk.Tenawm em em pawh nise ama kut ngeiin tumah a that lo vang.

‘Tluangpuii chuan hria se a that ang i tihna maw?” ka ti ro hulh.  

‘Ni lo,chutiang lam sawi ka tum lo.Amah pawh hian a hre lo ve thei tho bawka.Ka sawi awmzia zawk chu a hria anih chuan thup hlentheih loh hun ala awm theia,a hrilh che ka ringa’ a ti leh a.Ka thaw hawk.

‘Ka la Virgin’ atih ri ka bengah a rawn ri nghal zat.Kha thil kha hmana thleng tawh a ni a,tunah chuan Nula Virgin awmin awm mah se ka hre lo ang maw?! Mi a ka ni hauh lo.

‘Hahdam tum teh,I awmdantur ka hrethiam che ania.Mahse, he thil hi Tluangpuii nen sawidun ula a tha ang’ a ti leh a.Ka bu leh ringawt.Enge ka sawipui ang ka hre lo.Ramdinsanga a ni angem? Mahse a blackmail bak engmah inzawmna annei lo tih a sawi anih kha.Ni lo,he thil pawh hi a zep zawk thei,a hre lo tak tak kher lo ang.

‘Phoneah min lo dahsak lawk mai teh’ ka ti nghut.

‘Aih…’ ka melh nghek.

‘Min hrethiam rawh.Vanduai vangin I phone tibo palh ta la….’ A ti leha,a sawitum ka hria.

‘Dah rawh’ ka ti leh hmuk.Ka Phone ka pe a,lak tum awmin a awm lo.Dawhkanah ka daha,keimah zawkin Mouse ka bana,mahse ,min rawn chhuh leh vat.

‘I inringtawk em?” a ti leh a.

‘Tehreng mai,ka Normal tih erawh ka sawi lo law law mai ang’ ka ti leh a.Ka then lui suk bawk.Mahse,ka thisen zawng zawng an khang vek niin ka hre zawk.

‘Ka ring che,ka hrechiang tawk bawk che a.Mahse, atthlak takin Tluangpuii bulah che suh,ka sawi ang khan he thil hi a hre miah lo a ni thei’ a ti leh duah.Chhang loin ka bu leh nghut.Min en vang vanga,min ringngam dawn nge dawn lo a zir chiang a nih ka ring ve ngawt. A hna lam anih avangin a fimkhur hi a demawm lo.Mahse, engvangin nge kei ni loin Rocky zawk Aruata’n a pek ka hrethiam lo.

Rocky te In ka chhuahsan hnuah kalnatur hre loin ka tlankual ka tlankuala,engtin nge Tluangpuii hnenah ka sawi ang ka hre thiam lo.Ka nupui anihna lah karhnih bakin a dang tawh lo.Mahse, engtin nge he thil hi sawi loin ka pair eng theih ang? Ka thei dawn lo chiang.

Falkland ka pan ta ngawt.Sana ka en a,dar 10 a ri tawh.Mahse,Rocky thil min entir atanga ka ipikna erawh pakhat tepawh a la kiang eih lo.Motor pahnih lo ding sa ka tlanpela.A awl laiah ka ding a,chhuk chuang loin Aizawl khawpui pe un mai ka thlira,vawitamtak hmuhnawm titakin ka lo thlir tawh thina.Mahse, zanin atan chuan a hmuhnawm leh a nalh lam engmah ka rilruah a lut lo.

Ka phone a nghawt dat,peih lo zetin ka en a.Tluangpuii msg a lo ni a,Open loin ka phone ka Switch Off ta zawk.Tunah chuan tha takin ka be thei dawn lo tih ka chiang tawh.Tul lo tawpa inhauh chiam lah ka duh hek lo.

In ka thlenin dar 12 a ri thelh,ka beisei loh zetin ka nuin amahin Tv a lo la en.

‘I la meng maw?” ka ti a.

‘Aw,ka thil en hi ka duhzawng tak ania,bakah ka lo nghak pah che a’ a ti a.A tarmit a nawr chho zauh bawk.

‘Min nghah angai hleinem,ka haw chintur hriat lawk a harsa thina.A tawp dawn tawh em?” ka tih zawm leh a.Thu ve loin a thutna bulah ka ding thung.

‘A ho em mai,zantin ka nghak che pawh ni hleilo’ a ti awlsam leh mai.A tho a,a zi mar ar ar bawk.

‘A tawp tawh mi?” ka tinawn leh sup.

‘Aw,I rawn tlanluh lai khan a tawp ve chiaha,a timing khawp mai’ a nui a.Ka then ve suk.

‘Anih chuan mu ila’ ka ti leh nghut.

‘Mu dawn.Eee,Mama,naktuk kha hetah eitur kan siam ang ka lo ti a’ a ti leh a.Ka kal tawhtur ka ding leh a.Naktuk hi ka nu thiante leh chhungte thenkhatin chaw an rawn ei dawna.Tluangpuii leh Zartei bakah Ambie-a leh Ruata kan sawm tel a,mahse tuna ka Moodah hi chuan engtihmah ka duh lo.

‘Nu,thulh chi a ni lo nangin ka tel hman lo maithei’ ka ti sup.

‘Enga?! ‘ mak ti zetin a ti a.

‘Hnaah bawk mawle.Inneih hmaa ka chinfel ngei ngei ngai ania’

‘Akhai aw…I tel si loh chuan Tluangpuii te bakah Ruata tan pawh a nuam si nang.A va buaithlak mai mai e aw’ a ti vang vang.Ka hnaa ka thawhrim zia leh a pawimawhzia ka nu hian hre phak vek lo mah se min hnial zawngin engmah a ti ngai lo.

‘Ka tel lovang ka ti chuang lo.Ka hman lo maithei ka ti zawka’ ka ti leh hmuk.

‘Anih chuan titlang ang aw.I hman theih hlauh leh a tha animaia.Mu tawh rawh,zingah Ringa nen kan lo bazar ang.I u a kal peih loh pawn Buati a awm tho a’ a ti leh mawlh mawlh.

Ka muhil dawn chuang lo tih ka chiang,ka mu buai peih lo law law.Inchung roomah ka chho a,Tukverh bulah thutmut theiha siam Chair ka pawt pheia,Tukverh ka hawng vek bawk.

Ka Phone ka phawrha,ka On ta chauh.Msg a rawn lut nghal pawp pawp.A vawiin Tluangpuii vek.Ka chhang lo dawn zeta,mahse min lo ngaihtuah viau thei tih ka ngaihtuaha.’Inah ka awm tawh’ tih ka thawn leta,Flight Modeah ka dah lehnghal daih.

Ka ngaihtuahna buai nuaih nuaih tihfim tumin che loin ka thu vang vanga,mahse engmah ka ang chuang lo.Kha thil khan min thawng satliah lo,ka na vel vek.Thuruk ka hriat ve loh kha min hrilha,engmah a awm tawh lo turah ka lo ngaia.Mahse, thuruk zawng zawnga pawimawhber a lo la awm ta fo.Khawvar dawn hnaiah ka Roomah ka let thlaa.Khumah ka bawkthlawp.

‘Mam,ka lo lut ania’ Ka uin ka room pawn atangin a rawn ti lang lang.Chhang loin ka mut ngaiin ka mu a,chunglam ka melh vang vang bawk.

‘I la harh lo mi?” kawngkhar rawn hawn pahin a rawn ti leh a.Ka let thawk.

‘Harh,enge?” ka ti sup.

‘Tluangpui’n a call tlang thei lo che aniang.A be duh che a’ tih pahin Khumah a rawn thu a.Ka ner nawk thung.Ka hua nge ka ten ka hre lo.

‘Ka sawi i hria em?” tih pahin ka luah a rawn sawi leha.

‘Ka Phone Battery low  niang,nakinah ka be mai ang’ ka ti  sup.Lukham pakhat ka laa,ka lu chungah ka dah nghal zat bawk.

‘Ok,a lo call leh dawna.Ka lo hrilh ang,nizanah i va haw har awm em em ve’ a tihzawm leh a.

‘Haw har,kal teh.Ka mut ala chhuak ania’ ka ti leh hmuk.

‘Naaa,a tha lawm.Mahse,I hriat ve mai mai atan,tunah hian dar 11 a pel tawh aw’ chimawm zetin a ti leh a.A tho a,a nui zui hak hak bawk.Ka muthilh pawh ka beisei lo kha ania,ka lo muhil rei phian anih chu a.

Dar 12 rik hmain ka chhuaka,ka chhuah dawnah Ka nuin hman hram turin min ti leha,ka bu liam satliah ringawt.Ka hman leh hman loh chu ka duh leh duh loah a innghat tih ka chiang miaua.Sawitur a awm lo.

‘Hello…’ Office kawngkhar ka hawn rualin Tluangpuii’n min lo ti a,ka phu nghek bawk.Ka beisei loh dan chu pui tak a ni ringawt.Ka chairah hahdam hmel zetin a thu pil kak bawk.

‘Hetah enge i tih a?” Luh pahin ka ti nghut.Tu mah ka awm loh laiin an lut ngai lo,amah hi a thawh lai khan ka kal hmain a tifel vek thina.Mahse, a awm tak loh hnuah tu mah ka phalna loin an lut ngai tawh lo.Tunah erawh chuan Hotela Staff zawng zawngin kan innei dawn tih an hre vek tawha,an lo luhtir pawh a mak lo.

‘Aw,keimah..’ a nui sang mai.

Dawhkan lam pan loin Sofaah ka thu ta zawk.A rawn tho a,min rawn pana.A hmeltha leh fiah zetah chuan sualna nei hmel a pu lo.Nia,a hre lo tak tak maithei..Mahse, an la tih hre lo pawh ni se khatiang khan engvangin nge a khawsak kher? Ka hriathma anih chuan a pawi ka ti lo tih sawi mah ila ataka han hmuh meuh chuan pawi ti tak ka ni.Hmu lo law law ila ka ngaipawimawh lo zawk ngei ang le.

 A rawn thu thla ve a,min rawn ngheng deuh titih bawk.

‘I buai lutuk vangin min be hman lo tak tak em tih ka rawn en dawna’ amah bawkin a ti leha,ka ka khabe hnuai atangin pawisawi lo zetin min en ran bawk.

‘I hmuh ang hian tunah ka rawn thleng chiaha’ ka ti sup.

‘Um..Tunah chuan ka hlauhthawn lutuk pawh a zia awm tawh’ a nui var var.

‘A tha lawm,engmah hlauhthawntur a awm lo’

‘Dik chiah,ka chan ang che tih hlauh vang mawle’ a hmai a sen deuh tan tan mai.

‘Maithei….’ Ka ti hmuk.

‘Maw?”

‘Min chan maithei…’ ka sawi zawh rualin ka nui hawk bawk.A hmel buai deuh nakah chuan maktihna alang thei a.A mengphawr deuh hra bawk.

‘Ka fiam che nih kha…’ a hnarah ka tuai zauh.

‘I va han sual tak…’ a ti hlak.Ka banah a chum taih bawk.

‘Engemaw pawimawh deuh min hrilhtur i nei em?” ka ti leh nghut.

‘Eng thil pawimawh nge?” a ti vat.

‘Ka hriat atana I duh loh,midangin an hriat ruk si…’

‘Aih, chutiang engmah a awm lo.Ka sawi awmzia chu keimahah hian hriat loh i nei lo tihna’ a ti leh a.Ka bu nghut.Ka tho a,Tukverh lam ka pan nghal daih bawk.

‘Engemaw dik lo a awm em?” amah bawkin a ti leh halh.Tukverh ka nawr tawlha,hnuailam ka en a.Nidang ang bawkin Motor an tawlh leh dul dul tawh.

‘Zo…Ka awm a nuam lo ania’

‘Engvangin maw?” muangchangin ka inhera,ka kekawr ipte ka zen tut bawk.

‘Ka hre lo.Mahse, keimahah hian dik lo a awm niin ka hria.Enge anih ka hre lo’ a ti leh hliai.

Anih chuan hlauhthawntur a awm lo anih chu’ ka ti leh hluk.Engvanga sawi hreh leh si nge ka nih ka inhre lo.

‘Mahse…’

‘Engmah dik lo a awm lo..’ ka ti tuar.Ka awmdan chu a beisei lo lutuk tih hriat zetin a phu zawk bawk.

(Zawm ang aw......)

 ‘Ngatinge?” a titham tiak.

‘Sorry…’ ka ti sup.

‘A pawi lo,ka kal phawt ang.Ka hriat ve tur anih chuan min hrilh theih hunah min hrilh mai dawn nia’ a ti leh sap.A tho a,Dawhkana a Bag dah a laa,hmanhmawh zetin Kawngkhar lam a pan leha.Kal lo tura tih ka duh,tul lo lutuka ka vin avangin achhan hrilh pawh ka duh.Mahse, engtin nge ka sawi ang? Inngaizawnnaah hian thuruk atam lutuk chuan engmah a fel thei lo,nupa nimai tur tan lehlek phei chuan thuruk a awm thiang lo.Mahse, hei kher hi chu engtin nge ka sawichhuah ang ka hre lo.

Ka thu thla chawrh,ka thinrim hlur bawk.Eng ber khan nge min tithinrim erawh ka hre lawi lo.Ka nuin min rawn Phone a,ka pick hmain Sana ka en hmasa a.Dar 3 a ri tep tawh.Tluangpuii chhuah hnuah ka la che sawn leh ta miah lo.

‘Aw,Nu..’ Hello ti loin ka ti sup.Ka mood chhe lutuk tilang lo turin ka insum nasat angai viau thung.

‘I lo haw thei dawn ta em? hei an lo thleng khawma,an lam nak nak mai che a’ a rawn ti a.

Engmah tihtur hmanhmawhthlak ka nei lo,mahse ka Mood leh midang zinga awm a inmil miah lo.Ka mit ka chhing a,ka nu hmel a rawn langa.Engpawh sawi ila a sawisel lo ang.Nu dang ang bawkin a fapa ka nih tlat avangin ka thusawi a pawm ziaha,tunah pawh hian engpawh sawi ila a pawm ang.Mahse ka free reng tih keiman ka inhriaa,ka inthiam chuang lo ang tih ka chiang.

‘Ka lo haw thei ang.Mahse, ka hma lutuk thei lo anga’ ka tita sup.

‘Aw le,I lo haw theih chuan a tha hlauh anih chu.Tluangpuii hi i rawn lam nghal dawn nge?” hlim zetin a rawn ti leh a.Ka thaw hawk.

‘Amah ka lo bia ang,ka tlai viau dawn chuan Ringa khan lo va lam mai se’ ka ti leh sup.

‘Nia,chutiang chuan a tha ang.Hmanhmawh suh’ a rawn ti leh a.

Tluangpuii Call loin Ruata ka Calla,ka buai deuh thu leh Tluangpuii leh Zartei a lo lam thei em tih ka zawta,a thei ang tih a rawn sawi awlsam et.

‘Anih chuan nangman lo be mai la,ka la buai deuh dawna’ ka ti a.

‘Tehreng, ka lo bia ang’ zangkhai fahranin a rawn ti leh zung zung.

In ka thlenin Dar 4 a pel tawh.Ka nu chhungte bakah a thiante an lo thleng tawh hlawma.Verandaah Tluangpuii leh Zartei an thu a.Ruata ka hmu lo thung.

‘Ka rin aiin i lo thleng hma’ Zartei’n min lo ti a.

‘Nia,ka hmanhmawh lawm.In thlenna a rei tawh em?” ka ti let ve a.Tluangpuii ka melh zawka,min en loin a Phone a en ngar thung.Zartei hnenah thil thleng kha a hrilh angem ka hre lo.

‘Rei ve tawh tho mai.Darkar khat vel kan awm tawh ang’ Zartei bawkin a ti leh a.

Ka nu a rawn chhuaka,Apron a haa.Amah kherin eirawngbawl a duh leh tih ka hrethei mai.Ei siam nuam a ti em em a.Thiam lah a thiam,ka u erawh ka nu chhun em em siin helamah hi chuan an in letling hlauh thung.

A rawn ri hlut.Min biaa,Tluangpuii leh Zartei a be zawm lehnghal mawlh mawlh.A bulah hian tu mah an thinrim rei theih ka ring ngai lo.Ka nu anih vanga chhuang ka nih rualin Nu nih tlin em em anih zia hi amah hre chiang ten a chanchin an sawi dan a ni ve hrim hrim.

Lunglei khua ka ni a,Aizawlah In neiin ka eizawnna hmun leh hun ka hman tamna hmun leh ka thiante tamzawk Aizawl mi nimahse, Lungleia kan Inah nupui nei turah ka inngaia.Tluangpuii pawn tha min tihpui bawk.Mahse, ka beisei loh tawpin, ka tum dan tha ti em em chung siin ka nuin a hnial ta tlat.Ka hnial fe chung pawn hnial hneh mai mai theih a ni lo.Mize nem leh dam tak emaw ka tih kha a lo ni vek lo.Ka pa luhlulna  emaw ka chhun ka lo ti thina,a lo ni vek lo tih ka hriatchhuah phah uar uar bawk.A duhdan ang ngeiin Aizawlah nei turin kan tifel ta nge nge.

Ruata leh Zartei an haw tawha,keiin Tluangpuii ka thlah dawn thunga.Zartei pawh ka thlah tel thei tho nangin Tluangpuii biak ka duh avangin Ruata thlah turin ka ti a.A aw ve mai bawk.A haw kawng tur tho anih avangin a harsa lem lo bawk hrim hrim.

Ngawirengin Motorah kan chuang duna,Ina kan awm lai pawh khan kan inbe meuh lo.Ka nu leh ka nutei te bakah midang bulah chuan a tawng bawrh bawrha,mahse ka bulah erawh a tim dai thung.Ka awmdan vang kha a ni tih ka hai lo.Dik lo awm ni a a hriat min zawt kha a thiam loh a ni hek lo.Kei lahin sawi mai loin ka vin a,atan chuan rilru nuam taka awm a harsa ang tih ka hria.Rocky khan tha taka saw dun turin min ti a,mahse a harsa hlawl.Chawhmeh tui leh tui loh ang ngawta thilsawi awlsam a ni hek lo.

‘Khawiah nge kan kal dawn?” a ti chhuak sap.Ka chhang lo,kan kalna tur ka hre bik tlat lo.Ka tlan zel anga,a remchan hunah ka ding mai ang chu.

‘Khawiah nge kan kal dawn?” a ti nawn leh a.A awah hlauhthawnna a hriat tel theih ta bawk.

‘Kan thleng tep’ ka ti hmuk.Thui vak lo ka tlan leha,kawngsir zau laiah ka ding a.Ka din fel veleh chahbi ka phawia,engmah eng a awm lo bawk nen a thim nghal khup.Kan dinna lai lah Motor kal tlemna lai a ni zui bawk nen a reh ruih bawk.

‘Ngatinge?’a ti leh hliai.Thup a tum hle nangin a mangang tih ka hre thei tho.

‘Vawiina ka zawhna bawk kha’

‘Eng kha?” rang lutukin a ti vat.

‘Enge ka hriat loh tura zep i neih?’ ka ti hmuk.

‘Ni lo,engmah chutiang ka nei lo’

‘Takzet….’ Ka ti hluk.

‘Aw,Zeptur ka nei hek lo.Ka pasal i ni mai dawna,thuruk pawimawh pawh lo nei tehreng ila engvangin nge ka zep ang? I hriat vek ka duh dawn lo a mi?” a tita duah.A tawng danah lemchang a ang lo.Motor chhung a thim vek avangin a hmel ka hmu thei lo thung.

Engmah sawi loin ka Phone ka phawrha,a hmuh theihturin ka lek pheia.Mak tih hmel zetin a thaw hak.

‘Enge?”

‘En rawh..I en zawh hunah min chhang zawk dawn nia’ ka ti leh hluk.Ka kut atangin ka Phone a rawn laa.Motor chahbi ka vuaha,head light ka on a.A thim lutuk a zia ta deuh.

Ka banah a rawn vuan chawt .‘Hei hi…Ni lo,engmah ka hrethiam lo…’ a ti nghal nawk nawk bawk.Phone ka laksaka.Ka ak zui nghal daih.

‘Kha kha chhanna ka duh.Ka nuna i lo lan hma a ni a, mahse i sawi ang khan a hmuhnawm loh ve tho ania’ ka ti hluk.Za miah loin ka nui hawk bawk.Ka kut a vawnna ka phelhsak nghal zat.

‘Aih,engmah ka hre lo..Ka ti tak tak,engmah ka hre lo’ a ti leh a.A aw a khur hlak hlak bawk.

‘Anih chuan a lem tihna mi?” ka ti leh hluk.

‘Ka hre lo,mahse engmah ka hre lo’

‘I ni lo aniang,engmah i hriat loh chuan’ ka nui leh a.

‘Engmah ka hre thiam lo.Khawi atanga i neih nge?”

‘Ngaihtuah suh,ka nei ve tawp.Tu nge kha pa kha?” ka ti leh hmuk.

‘Ka hre lo.Ka hre lo takzet.Pathian hmingin,engmah khatiang ka ti lo’ beidawn hmel lutukin a thaw hawk.

‘I zep chhung chuan engtikah mah nupa hlim kan ni ngai lo vang.Tun chiah ka zawt leh ang che.Tu nge anih? Engtika thleng nge?” ka ti leh a.

‘Innei lo mai ang’ ka beisei loh lutuk a sawi takah chuan ka insehruh nghek.Motor chhung light ka on a,head light ka off thung.

‘I chiang em?” ka ti nghut.

‘Aw,engmah ka hre lo.Mahse, min ring lo anih chuan inneih loh mai a tha zawk’ a ti leh nghat.

‘Ka ring lo che ka ti lo.Sawifiah turin ka duh mai zawk che,midangin an nei em tih pawh kan hre lova.I mualpho zau hle thei’ ka ti leh hmuk.

‘Ramdinsanga…’ a ti sap.

‘Maw?” ka ti hluk.

‘Ramdinsanga tih a ni ngei ngei ang’ a ti leh nghat.

‘Anih chuan Mipa kha amah tihna a mi?”

‘Ka hre lo,mahse ama tih a nih loh chuan khatiang titur an awm lo’ a ti leh hmak.

‘Enge i sawi awmzia?” ka ti ve thung.Hnaih tawh lo turin ka ti a,ka nupui a ni dawn tih pawh chiang takin a hria.A sumdawnna pakhata Gold tawlhruk chungchang ka hria tih a hre tawh lehnghala,engmah a tih ngam ka ring tawh lo.

‘Khatiang tur khan chance i pe em?’

‘Eng chance? Ani nen chuan min hmang tangkai tihmai loh chu khatiang lam hawia inzawmna kan nei lo’ a ti leh a.A hmui hnuai lam a pet fan bawk.

‘Ok,anih chuan engmah hre lo khawpa i ruih laia thleng nita se’

‘Lawk…’ ka banah a rawn vuan leha.A mengphawk hra bawk.

‘Eng?” ka ti sup.

‘A ni thei lo’ a lu a thinga.Sawi hreh niawm takin a hmui a pet leh rih.

‘Ka lo en nawn leh lawk’ amah bawkin a ti leh a.Ka Phone ka phawrh leha,min rawn laksak vat.A en a,a thaw halh.Min rawn en leha.Sawi duh nei,sawi hreh si a ang viau

‘Sawi la…’ ka ti sup.

‘Ka chiang lo nangin mipa hi..Eng lo,kha ka..Ka thianpa,Sanngzuala kha niin ka hria’ a ti bah nawk nawk mai.

‘Sangzuala ‘ ka tinawn ve sup.

‘Aw,amah kha.Mahse, engvangin hetiang a tih kher ang?” a ti leh a.A hmai dang lap maiah chuan ka thinrim leh rilru na ai khan a thawng na fe zawk tih ka hmu theia,ka inthiam lo vang vang bawk.

‘Ka hre lo’ a ti leh sap.Seat hnung lam a nghenga,a mit a chhing zui daih bawk.

‘Ruih vanga engmah hriat loh i nei em?”

‘Ka hre mai lo,Ih…Ka rilru hah zual lai kha chuan engmah hre lo a ruih chhum hmawk duh chang ka nei a,ka in zauh zauh reng bawka’ a ti leh a.

‘Eng ang pawn rui ila,ka harh veleh engemaw thleng awm se chuan ka hria ang ka ring’ reife angawih vang vang hnuah a ti chhuak leh sap.

‘In thianho a Party emaw Picnic tih vel innei em?” ka ti sup.

‘Kan nei fo mai,mahse khatiang kha a thlen ka hre lo’ a ti leh ta tlat.

‘Ok…’ ka ti sup.Sawi mai tur ka hre tlat lo.

‘I thinrim viau ang tiraw?” min rawn en pahin a ti a.

‘Aw…’ ka ti leh tawp.

‘Ka hrethiam che..’ a ti leh sap.

‘I hrethiam kher lo vang’ ka ti leh hmuk.A hmui a peta,tim daiin ka kut a rawn vuan leha.Thinthlak pawh tum chuang loin ka thut ngaiin  ka thu ngur thung.

‘Um,a thawng ngawt ang che.Kei pawh ni ila min thawng na dawn lutuk..Ih,eng lo..I duh phawt chuan i fiah thei reng ania’ a ti leh sep.

‘Eng chu maw?’

‘Kha thil kha.A landanah kha chuan Sex hmang kan ni ngeia,mahse ka chiang lutuk.Engmah a thleng lo.I duh phawt chuan i fiah thei’ a ti leh sap.Ka en a,a mitmeng lian kel kawlah chuan thudik a sawi ang tih ka ring hmiah.Ka hmuh tirh kha chuan ka thinrim mai pawh a ni lo,min Shock lutuk kha ka puakkeh lo chauh,mahse Rocky thurawn ang ngeiin tha takin kan sawi duna,tunah chuan a hun hmaa lo fiah emaw tumna ka nei lo.

‘Aih,engmah fiah ka mamawh lo.Ka ring che’ ka ti sup.A kut karah ka kutzungtang ka rawlh luta,ka lakangah,ka fawp nghal vang vang bawk.

‘Ka lawm e aw’ a ti leh sap.

‘Engmah lawmthusawina tur a awm lo.Mahse, kha thil kha engvanga ti nge anih erawh hriat ka duh,min puih ngei angai bawk anga.Anih loh chuan i tan a him lo.I him leh him loh erawh ka mawhphurhna a ni a,tu pawn an lo tina che anih chuan keimah ka indem zel ang’ ka ti leh sup.Min chhang loin a bu nghauh.A rawn tawlhhnaia,ka kawngah a rawn kuaha.Ka awmah a hmai a rawn phum a.’Ka hmangaih che’ a ti sap..

‘Kei pawh…’ ka ti sup.A samah ka fawp nghal vang vang bawk.

Kan pahnihin Rocky-a hmu turin kan kala.Engmah hriat a nei lo tih a sawia.Min chhuisak turin ka ngena,a pawm zawng tak a lo ni hlauh bawk.

‘Ka rilru chiah,mahse i rilru tur ka hrethiama.Ka sawi lang lo mai zawk anih kha’ Tluangpuii Motora a luh hnuah Rocky-an a ti sup.

‘Engtizawngin?” ka ti ve thung.

‘Engmah a hriat ka ring chiah lo.A lem anih leh nih loh ka check vek tawha.A lem chu a ni lo.Mahse, Tluangpuii kha en uluk deuh la,a harh miah lo niin alang tlata’ a ti leh a.

‘Um..’ ka ti nghut ringawt.

‘Hahdam rawh.Tu tih nge kan hre rih lo nangin Tluangpuii’n Hint min pe tha tawka.Rei tak min nghah ka ngaih loh ka beisei.Aruata’n i kutah aiin ka kutah a him a ring anih hmela.Achhan niawma lang chu he thil hi a titu a hriaa,thi thut thei reng a ni tih a hre bawka.Engpawh thleng se ka chhuichhuahsak theih ringin ka ta turin a dah anih ka ring.Eizawnna in ang kan ni a,keipawh tiang hi ka chungah thleng ve ta se Aruata aia rin tur chuang ka hre lo.Ka theihtawp ka chhuah ngei ngei dawn a.Tunah chuan Inneih ni tur thlir tawh zawk ang’ ka dara rawn vawn pahin a ti a.Ka bu nghut.

‘Mama,hmanhmawh rawh.Tlai chi a ni lo ania’ ka u in a ti lang lang.Ka necktie ka pawt ngila.Darthlalangah ka in en a.Vawiin hi kan inneih ni a ni tawha.Engmah thil tha lo a thlen loh nan ka tawngtai ve ta hial bawk.Engkim mai hi chung lam puiha a ni tih ka pawm rualin ka beih nasat vanga ka hlawhchhuah ka ti ve tlat.Kohhranah ka inhmang ngai lo bawka,ka hna bak engmah ngaihtuah tak tak ka nei hek lo.Mahse,ka nu leh ka u erawh kei ang lo takin tawngtai mi anni a.Ka nu phei chu kan tleirawl chhuah hlim atangin Kohhran Hmeichhiaah a inhmang tana.A theihtawp a chhuah takmeuh tih ka hria.Ka hlawhtlinna pawh hi ka beih nasat vang leh a tawngtai rah a ni mahna.

Chau hmel zetin Khumah Tluangpuii a mu zawi nana,a bulah Zartei a mu ve bawk.An demawm loh,mi kal an thathnem mai bakah nilengin Pheikhawk sang an buna.Khawlum bawk nen,Mipa zawk pawh ka chau ania.Hmeichhe tan phei chuan chauhna tham tak a ni ringawt.

‘Kan kal dawn mi?” Ruata’n rawn luh ve pahin a rawn ti a.Zartei peih lo hmel fahranin a tho taih taih.

‘Kal ila…Achangtunu hi a muthilh hmain inbual a mamawh ka ring’a nui a.Ngei hmel zetin Tluangpuii a ner nak thung.

‘I chhe lutuka,kal ru.Ka lo thlah ang che u’ thawh ve pahin a ti a.Min rawn en a,ka then ve suk.

Inhnuaiah kan inzui thlaa.An lo reh deuh duak tawh.An tlanliam thlengin kan thlir dun a.Chhun lama khua a lum nen tunah chuan ruahsur tur intham ang maiin thli a thaw vuk vuk thung.

‘Lut ila…’ ka ti a.A bu nghat.A kutah ka vuana,ka hmer nghal vang vang bawk.

‘Inbual ka duh.Ka ban vek’ room kan luh veleh a ti nang nang.Chhuatah a thawmhnaw rawn kenna Bag thenkhat an let phung mai.Thatchhe zetin Sofaah ka thu thluang a,hnunglam ka ngheng bawk.’Kan inbual dawn nia’ ka ti sup.Rang zetin a rawn hawi vat.Ka lo en reng chu zak niawm takin a sen nghal tan tan mai.

‘Ka fiam che anih kha’ ka nui hak..

‘I nghal em maia’ a ti hlak.

A inher a.Zawn nei niawm takin a thawmhnaw dahna bag pakhat a hawnga,a hmu lo a ni ngei ang.A khara, adang hawn tumin a pan leh a.Muangchangin ka tho chhuaka.Ka Pan hnaia, hnung lam atangin ka en a.A thawmhnaw hak chuan a pian nalh zet khuhbo a hnekin a tilang sar zual mah zawk.A ding mara, adang hawn leh tuma a pentur chiah chu hnung lam atangin a kawngah ka kuaha,a phu zawk mai.

‘Enge i zawn?” ka ti sup.A beng kawm ka fawp zauh bawk.

‘Ka thawmhnaw haktur mawle…’ a ti hlak.Thup a tum hle chungin a nervous tih ka hre thei tho.

‘Zawng duh suh.Hakna hun a awm chuang lo ang’ ka ti leh sup.A bengkawm hnuai lam ka fawp thla leh dun dun bawk.

‘Kalsawn phawt teh’ a ti leh a.

‘Aih,inbual ila..Mut ka duh’

‘Ka ruala inbual i tum lo tiraw?’

‘Aih,tum ‘ ka ti leh sup.

‘Mahse….Nichin khan i uang i tih kha ’

‘Ok,ok..I duh loh chuan ka tilui lovang che.Zanin mai lo,damchhung hunk an nei alawm.Ka hmanhmawh lo.Lo inbual la, Motorah thil ka theihnghilh a,ka zuk la ang’ ka tita zawk.Ka kuahna ka phelh nghal bawk.

‘Bathroomah khan Mutthlu suh ang che’ kal pahin ka ti leh a.A nui hak mai.Chhuah pahin ka then ve suk bawk.

‘Tluangpui,inhman dawn tawh em?” Room kawngkhar pawn atangin ka u in a rawn au a.

‘Hman e,ka lo chhuk ang’ Tluangpui’n a ti a.Vawiinah ka nu te an haw phei dawna.Keini pawh thlah pahin, karkhat vel awm turin kan phei ve dawn bawk.Zing atangin Tluangpuii kan thil kentur siamin a buaia.Chaw kan eikham hnuah insiam peih sa vekin khumah a vang zawngin ka mu a.Tluangpuii erawh chuan theihnghilh kan neih leh neih loh a en fel leh mek.

‘Ka lo zuk chhuk ang aw’ min rawn en pahin a ti a.Kekawr vutbuak rawng a haa,T-shirt dum,nghawng zau lam hret a ha bawk.Slipper dum a buna,a sam tawn loin a thlaha,Hanky niawm tak a luah a vet a,a chal sir lamah a suih a.Tarmit a vuah bawk.A lang naupang zual sawt.A rawn kal pheia,lukhama a phone dah a rawn laa,a kun zawngin a hnute a lang phir thaih mai.Ka ngaihtuahna a dik lo nghal pang bawk.

‘Hey…Enge a? “ ka mit bulah a kut a rawn vaia,ka en chho a,a mitmeiin zawhna min zawt ve thung.

Engmah sawi loin a banrekah ka vuana,ka pawt hnai nghala,min rawn bawh titih.A te nghal that bawk.

‘Enge i tih a?” a ti a.A tawng ring lo.

‘Kal hmain thildang tih ka duh’ ka mit ka siai zauh.A ner nak thung.

‘Hun lo em mai a’ a ti hlak.Thawh tumin a inbengkanga,mahse a kawngah ka kuah tlat avangin a tho mai thei lo.

‘A rei lo ang’ ka ti leh sup.A hmui ka kutzungpuiin ka tuaia,a thaw hak.

‘Aih,kal phawt ang.Ka nu ten min nghak rei tawh’ a ti leh a.Mahse, a mitmeng nalh zetah chuan ka ngaihtuah ang tho angaihtuah ve tih ka hria.

‘Tho teh’ amah bawkin a ti leh a.Ka kuahna ka thlaha,a tho nghal vat.A insum theih zia hi mak tak a ni.

Tho ve loin chung lam enin ka mu a.Engkim mai hi atak ngei a ni tih inhrilh nawn ka la ngai ta fo.Hmangaihna kan chen hmasakber ka mitthlaah a lo langa,na a tih avangin a hmui a pet tlat.Kan zawh meuh chuan nuam tih vangin a rum ve hak tho.Mahse, ka hnung a ham pilh phung thung..Ka nui chhuak hawk..Ka tho chhuaka,mak tih hmel lutuka min lo en reng chu ka va hmu a,ka mit ka siai leh zauh.

‘I a deuh niin ka hria’ a ti nghat.

‘Dik chiah,ka hlim vangin ka a deuh chu nih hi a’ ka ti sup.A lei min rawn chhuahkhum zauh.A hmai a sen tan tan bawk.

Note: Vawiin chu hunawl tlem ka neia,ka ziah hman ang ang ka ziak e.Mahse,naktuk hi kan buai leh dawna,ka dah hman angem ka hre lo aw..