BLUE- BOOK 5

Chapter- 26-30

Chapter- 26

Ka rilrua lang hmasaber ka tinghal vat.Msg rawn thawntu number ka ena,ka phoneah ka save nghal zat.Naktukah tu nge anih ka hriat angai.Tluangpuii hmel hmu chiang thei turin ka phone light ka On a,a sir zawngin a mu a.A mithmul sei sel sawl,er nalh zet leh a hnar te lam deuh,sang nalh zet te..A sam lukhamah a darh deuh niaih bawk.Sawifiah dan awlsam ber chu a HMELTHA..Ka hmangaih bawk.Rinhlelh leh ka duh tawh hek lo.A lo tih tawh zawng zawng kha a duh vanga ti ni loin tihluihtir a ni a.Tunah chuan engmah hlauhtur a nei tawh lo.Mahse,msg kha..Thuruk niawm takin alang lawi si..

Ka harh lehin khua a lo eng uar tawh.Tukdang ang bawkin Tluangpuii a lo tho leh daih tawh bawk.Kan inneih tirh atangin a tho tlai ngai miah lo.Tu mitmei mah ventur a awm lo chungin a tho hma ziah tho.

Ka rin lawk ang ngeiin ka lu a na a,ka mit a thip thum bawk.Mahse, nizana Tluangpuii rawn be tu kha ka hriat angai.Ka tho a.Ka inbual zawh veleh nachhawkna ka ei a.Darkar pawh tling loah a zia mai ang tih ka hria.Nizan khan Tluangpuii khan zu ka in tih a hre renga,mahse a sawisel miah lo.Kan inhau miah lo chungin kan boruak kha a tang ru at tih kan hre ru ve ve.

 Insiamsain Inhnuaiah ka chhuk thlaa,Living Room a lo ruak a.Mahse,Kitchen lamah Buati a tawng lawng lawnga,an awmdun tih ka hrethiam mai.

‘Buati,Thingpui min lo siam lawk’ luh pahin ka ti a.Ka tawng thawmah rang zetin an rawn hawi rual thawt.

‘Aw.Thildang angai em?” Buati’n a ti vat.

‘Aih,Thingpui kha a tawk’ ka ti leh nghut.Fridge ka pana,tui bottle ka lachhuaka.Ka innghal pawp pawp bawk.

‘I chhuak nghal dawn mi?” ka thut fel hnuah Tluangpui’n a ti a.Nizan lama kan boruak rit lutuk kha a theihnghilh leh vek tawh emaw tihmai turin engmah a ti lang lo.Min biak danah pawh dik lo awmin alang hek lo.

‘Aw..’ ka ti sup.Ka Phone ka en daih bawk.

‘Anih chuan thimgpui lo thildang i ei hmasak a va tha’ a ti leh a.

‘Aih,ei lo ang.Ka zin dawna,ka riak thut thei bawka’ ka ti leh hmuk.Diktak chuan khawiahmah zin ka tum lo.Ka rilruah a lo langa,ka sawi mai zawk.

‘Khawiah? Engmah i sawi lawk si lo a’ a ti leha.Ka rin lawk dan anih avangin mak ka ti chuang lo.

‘Serchhipah..Ka kal a tul thut maithei tih chauh’ ka ti leh hmuk.Ka tawngkam bung lutuk hi chu Buati tan pawh thilthar a ni lo.

‘Um..I kal dawn chuan lo sawi hma la’ a ti leh a.Ka chhang lo.

Hotel ka pan ding nghala.Ka thlen veleh Rocky-a ka biaa.Number pakhat min lo ensak turin ka ti a.Hna pawimawhah zing atangin an chhuak tih a rawn sawia.Mahse,Office lama an thawhpui te a entir theih tho thu leh thawnturin min rawn ti a.Kan inbiak zawh veleh ka thawn nghala.Computer ka On a.Vawiin ka tihtur pawimawh zual ka en a.Chawhma lama tih theih vek.

‘Hello…’ Phone a pick veleh Buati’n a rawn ti a.

‘Tluangpuii a awm em?” ka tinghut.

‘Aw,I be duh mi?”

‘Aih.A kalchhuah hunah min rawn hrilh ang che.A kalna tur nen’ ka ti leh hmuk.

‘Eng?..Ka va hre thiam lo’ a ti leh a.

‘Engmah hriatthiam lohtur a awm lo.Surprise ka tuma’

‘Aaaa,a va tha tak..Anih chuan ka lo hrilh vat ang che’ Phur zetin a rawn ti leh a.Kan inchhawr rei tawh bawka.Awmpui leh a chhawrtu ang pawn kan in en meuh tawh lo.

‘Engmah hre lo se’ ka ti leh nghut.

‘Tehreng..’ a ti leh a,a nui hak hak.

‘Nakin deuhah Motor check tutur a lo kal dawna,an khawih rei deuh maithei’ ka ti leh a.

‘Aw le’ zangkhai zetin a rawn ti leh vat.

Computer a ka thil dahthat ka en a.Ka duh ka hmuh veleh ka Play nghala,mahse ka beisei ang engmah ka hmu lo.Hotel a kangmei a chhuah zan khan Tluangpuii khan a tih a ni lo tih a sawia,anih chuan pawn lam mi anni dawn lo.Ka Hotelah hian hmelma ka kawl anih ka ring tawh zawk.Staff List ka en leh a.An rawn thawh tan hun nen,ka enthla dun duna.Ka duh ka hmu ta chiah.Kangmei chhuah hma deuh khan Cook thar kan nei.Tunah ala thawk em ka en leha.A thawk tawh lo.Thla hmasa khan a bansan tawh.Cook thar kan mamawh tih Julie khan a sawia,kan Cook neihsa pakhat khan a hmelhriat hnamdang a chaha.Kan chhawr fel nghal kha ania.Kha Cook kha a ban chhan engmah a inziak lo.A address ka en a.Ka then suk.Zawn chhuah harsa tak a ni dawn lo phawt.

Msg tone a ri a,ka en vut.Rocky-a a lo ni a.Phone number ka pek neitu hming a rawn thawna.Ka hriat ngai  a ni tlat lo.A address a inziak vek bawk.A buai ka ring nangin ka call ta tho.

‘I thil lo thawn ka lo hmu a’ ka ti sup.

‘Tu nge anih a?” a rawn ti a.

‘Ka hre mai lo,ka zawng dawn tan chiaha’ ka ti leh sup.

‘Ok..Engmah zawt rih lo che ila a fuh hmel hle mai’ a nui a.

‘Dik chiah,tak takin ka rawn call chhan che chu Sawrkar hnuaia mi ni lo.Pvt a ka chhawr theihtur i hre mial em?”

‘Eng? Aruata ang chi kha maw?” a ti deuh hu.Ka ner nawk,a fin tehlul nen hian achang chuan thil chiangsa reng min zawt leh talh zel.

‘Aw,Aruata ang chi kha’ ka tinawn ve sup.Za zetin a nui nghal hawk hawk.

‘Rui reng mai pakhat chu ka hria’

‘Enga?!” ka ti vak.

‘Rui reng mawle.Mahse, a ruih reng vang tak khan a tha’ a rawn ti leh a.Ta deuh deuh chuan a.

‘Rui reng chuan hna a thawk thei dawn tihna mi?’ ka awah ka awih loh zia a lang thei hial ta ve ang.

‘Thei,Aruata ai khan a that lohna chu a mu nileng theia.A rui thei hle bawka’ a nui leh a.Insum hman loin ka nui ve hawk bawk.

‘Anih chuan a number min lo thawn la.Ka lo bia ang’ ka tita nge nge.

‘Aih,keiman ka lo bia ang’ a ti leh ta tlat.

‘Enge i awmzia hi?” hul zetin ka ti hluk.

‘A mizia a buaithlak alawm. Ka be hmasa phawt anga, ka rawn biaktir ang che.Chuan, I hmuh hunah i nuih loh hram ka beisei ang’ a rawn ti leh duah.Eng mi tak chu ni maw?!

Julie lo kal tawh leh tawh loh ka en a.A lo thu tawh.Ka tho a,a thutna lamah sawipui a awlsam zawk in ka ring.

‘Morning Sir’ min hmuh veleh a lo ti vat.

‘Morning…Staff List ka lo en thei angem?” ka tihzawm zat.

‘Aw..Lawk,ka rawn pe ang che’ a ti a.Ka bu nghut.

Ka thu fel deuh chiah tihin a rawn lut ve a,ka dawhkanah file a rawn daha.

‘Mamawh dang i la nei em?” a ti leh a.

‘Maithei,thu la..Thil zawh tur che ka nei’ ka ti leha.A bu nghat.Min ep zawnga Chair awmah a thu thlaa.Tluangpuii nen an rawn lut ruala.An inkawmngeih fal hle bawk.Mahse, mimal thil an in share em tih erawh ka hre lo.

‘Kan Cook thin,hmanni a bang ta kha.I hrechiang em?”

‘Hre chiang lem lo,tinge?” a ti a.

‘Eng ni lo.Amah kha a tha pangngai viau khan ka hriaa.A hlawh pawh a chhe lo.Thlaleh hi a hlawh up huntur a ni tawh bawka.Mahse, a bang a.Enge a banchhan ka hre duh a’ ka ti duah.

‘Ka va hre mai lo.Banna a rawn theh luhah kha chuan Family Problem a ti a.Mahse, Kitchen lam Staff thenkhat sawi dan chuan Jamal-a nen an inmil lo an ti a’ a ti a.Ka hriatduh tak ka hre dawn a ang.

‘Ok,anih chuan an intithiam lo lai hmu an awm em?” ka ti leh a.

‘Ka hre chiah lo’

‘Um.A pawi lo,a Address hi a dik ang chu maw?” ka ti leh a.

‘Dik turah ka ngai,ka lo be chiang dawn em?” a ti leh a.

‘Ngai lo mai.Ka lawm’ ka ti a.Ka then suk bawk.

Julie kal veleh Jamal-a hmu turin ka chhuk ve nghala.Jamal-a hi Ruata min kawhhmuh a ni a.Hotel ka neih atanga kumkhatah a rawn thawk tana,Staff zingah a senior ber tawha.A eisiam thiam mai bakah a rintlaka.Kitchen lam zawng a kutah a awm vek.Engvanga inhmuthiam lo nge annih ang ka ngaihtuah thiam chiah lo.

Min hmuh rualin an reh nghal thap.Jamal-an min rawn pan vat.

‘Morning ,Sir’ a ti a.Ka wish let ve a,Staff dangin min wish ve nghal sap sap bawk.Rocky thusawi ka hrechhuak zawk.Tun hnaiah hna hi ka thawk lap sawt tih Kitchena ka luh khat zia ka ngaihtuah chhuah rualin ka hre vang vang mai.Office atangin ka vila,thilpawi tak ni lo mah se Office atang ngawt lo a viltur ka ni tih ka inhria.

‘I laklawh em?” ka ti a.

‘Aih,laklawh lo e’ zangkhai fein a ti a.

A lo thawhtirh chuan mizo tawng a hmang thei lo tluk a ni a.A inzir mi bawka,tunah chuan a thiam nal tawh ngang mai.Kitchena thawk te Mizo deuh vek anni bawk nen thiam duh tak tak tan chuan thil harsa a ni lo.Bakah,Mizo leh hnamdang ten Danglamna kan neih len em em mai chu anni chuan an awmna ram tawng thiam an duh em em zela.Mizo erawh chu kum 4 atanga kum 5 vel lai vairama awm pawn Hindi kan thiam hleithei lo.Thiam loh hi intihtheihnaah kan ngai deuh niin ka hre thin.

‘Ka be lawk duh che a’ ka ti a.A bu nghauh.Kan inzui chhuaka,Kitchen bul Corridorah kan ding duna.

‘Hmannia Cook bang ta kha…’ ka ti a.

‘Aw,ngatinge?” a ti vat.

‘Eng ni lo e.A banchhan kha family lam thil tiin a sawia.Mahse, ka lo hriat leh danin in inhmu thiam vak lo a ni awma’ ka ti a.A hmelah danglam a awm em tih ka en uluk viau bawk.Mahse, engmah a awm lo.

‘Nia,inhmuthiam lo tih lemah ka haua.Ka hau ngun khawp,vawikhat mai pawh a ni lo’ a ti a.

‘Engvanga hauh ngai nge?”

‘A tam mai,amah kha a ngeng khawp mai.Staff dang lo awm tawhte nen pawh an inmil chuang lo,an Sawisel reng maia.Ka khap dai hram hram thina,a rei hnu kha chuan ka ti hleithei ta lova.I bula sawiah ka vaua.Ka vau tukah a chhuak nghala’ a tita duah.

‘Eng thilah nge hauh angaih thin?” ka ti leh sup.

‘A mizia a ngeng mai bakah,eng lo….’ Sawi zo loin a ngawi leh daih.

‘Sawi la..’ ka ti nghut.

‘Cook a ang lo’

‘Maw? A awmzia ka hre chiah lo’ ka ti a.

‘Cook a ang lo,engkim Certificate chu a nei vek anga.Mahse,ka sawithiam chiah si lohin Cook a ang tlat lo’ a ti leh a.Ka bu nghut.

‘Ok,anih chu’ ka ti sup.

‘Mi thilsawi hriatchaknain a khata,bakah ka sawi ngam chiah lo nangin Hotela kangmei a chhuah zan kha a duty zan a ni a.Kitchen bak ka chhuahsan lo a ti a.Mahse,kan nau pakhat khan dar 11 velah uniform ha loin kawngkhar hnung lam atanga a lut lai a hmu a.Hall atanga lo chhuak tih erawh a sawi ngam lo thunga’ a ti leh ta duah.Ka thaw deuh hawk.CCTVah khan engmah a lang lo.Mahse, kha paah khan dik lo a awm niin alang ta tlat.

Office ka lut chiah tihin ka Phone a rawn ri ve chiah,ka en a.Buati a lo ni a.Ka pick vat.

‘A kal chiaha’ a rawn ti a.Ka thiltum hre lo zetin a nui kar kar bawk.

‘Ok,khawiah nge a kal dawn?” ka ti a.

‘A hrilh lo che mi?”

‘Hrilh nang’ ka ti hmuk.

‘Eh,a hrilh che maw ka tia.A pute inah kal a tuma..’ a rawn ti a.Ka then suk.

‘Scooty nge Car?” ka ti leh nghut.

‘Scooty..’ a ti leh a.Car emaw Scooty pawh nise engmah a danglam chuang lo.Motor check tupa khan Motor bakah Scooty pawh a check tel vek.Ka Phone ka Off veleh ka enduh ka en nghala.Ka thensuk,ka rin ang ngeiin a Pute in lamah a kal lo chiang viau bawk.

Ka inkhalhchhuak nghala,Julie hnenah ka zin dawn tih ka hrilha.Ka let huntur ka hre lo tih ka hrilhnghal bawk.Tluangpui’n a zawt maitheia,ani pawh bum tel a fuh ber.

MC parkingah ka Motor ka daha,Ka kawr haklai ka phelha,Jacket ka ha a.Lukhum hmathlawk ka khum bawk.Two wheeler Taxi ka ko a,Ka kal duhna ka hrilha.Tu nge a hmuh anga,eng thil nge an sawi dawn hriat ka duh tlat.

In hlui lam deuh kawtah kan dinga,ka Phone ka en a.Kan awmna piah lawkah a awm tih ka hria.Ka Taxi hman hnenah min nghak turin ka hrilha,ke in ka kal pheia,inhmuhtir ka duh hauh lo.

Kawngkawi ka chhuak chiah tihin Tluangpuii leh Mipa pakhat ding dun ka va hmu a.Ka back vat.Ka dinna bula thing kung tawi laih mai phenah ka tawlh luta,Mipa hmel ka hmu chiang thei lo.Ka Phone ka phawrha,thla ka laa.Mahse, mipa zawk hmel ka hmuchiang thei chuang tlat lo.Ka dinna a hla deuh bawk nen an tawng ka hre phak lo.

Thil fun niawm tak Tluangpuii a pe a,Tluangpui’n Envelope niawm tak a pe let ve thung.Engthil nge ka hre lo,mahse thil pangngai nise Tluangpuii hian ka laka zep tur a ni lo.Hetiang thil tihruk hi ala ching zel tih rin ka duh lo.Mahse, ka mit ngeiin ka hmu a.Ka awih lo thiang lo.

Scooty a start a.Ka thu hniama,ka Lukhum ka pawt kun leh sauh.A in-turna,ka awma lam kawngah a rawn tlan leta,Mipa hmel ka va en leh khera.Ka phu deuh zawk.Amah kha a ni.Cook ngei kha !!! Hotel kangah khan a inhnamhnawih lo tih a sawi ngeia,mahse tuna a biak mek kha kangmeichhuaka rinhlelh kai thar mek a ni thung.

Ka Phone a nghawr data,ka ngaihtuahna atangin ka harh zawk.Mipa zawk dinna lam ka va hawia,a lo awm tawh lo.Khawi lamah nge a kal pawh ka hre hek lo.Hahthlak hian a.

Ka Phone ka en leha,Tluangpuii kalna lam ka en a.Zartei te In lam a pan dawn anih hmel,anih chuan kal ve kher a tulna a awm lo.Tunah chuan Rokcy biak ka mamawh.Rocky ka call a.A pick thei lo.Taxi min nghahna lam ka pan pheia,thlamuang em emin Meizial a lo zu vang vang.Kan tlan hmain Rocky-an min rawn call back leh lawi.

‘I lo call lai ka hre lova’ Phone ka pick rualin a rawn ti nghal zat.

‘Pawi lo,I zurui biak chu ka rawn ngaihven mawle’ ka ti a.A nui hak.

‘Ka be tawh,nizanah a tlaivara.Nakinah min lo call back ang,I mamawhna chu ka hrilh tawha.A theih ang,mahse naktukah abiak fel theih chauh ang’ a rawn ti a.Ka then nawk.Eng mihring nge maw anih hrep ni?

‘Midang an awm lo mi?” ka ti hluk.

‘Awm e,mahse ani hi Aruata tih loah chuan a tha ber sia lawm’ a rawn ti leh a.

‘Ok,mahse hmanhmawh nen a inmil lo hle a ni’ ka ti leh hmuk.

‘Zan a ni tep tawha,zan khat chauh alawm i nghah dawn,naktukah chuan a fel nghal duak ang.Ka tiam che’ a ti leh a.

‘A tha lawm,ka ring che’

‘Ka lawm e’ Polite zetin a rawn ti a,ka nui chhuak hawk mai.

MCah ka indrop tira,Motorah khua ka nghak thim mai ang chu.

‘Sangkim…’ Hmeichhe awin a rawn ti a,Ka hawi vut.Maria-i a lo ni a.Kan inneihni khan a lo kal ve tlat.Kha bak kha ka hmuh leh pawh ka hre tawh lo.

‘Hey,I tha maw?” pangngai thei ang berin ka ti a.

‘Tha lawm…’ a nui var var mai.A cher ta deuh tih loh chu ala nalh thlarh.A hmelthat ngaiin ala tha reng bawk.

‘Khawiah nge i kal dawn?” ka ti leh a.

‘Ka haw tawh dawna’

‘Ok…’ ka ti leh sup.

‘Ka thiannu ka nghaka,a lo thleng har tawh khawp mai’ a ti leh a.Ka thluak a vir zawk.

‘Ka thlah mai dawn che mi?” ka ti sup.Motora awm ngat ngat aiin a nuam zawk ang.

‘Ngai lo,ka nghak thei lawm.A lo thleng tep ang’ a ti leh a.A nui sak.

‘Ho lutuk,ka hman alawm.Lo kal la’ ka ti leha.Min hnial dawn lo tih ka chiang ve tawp bawk.

‘Mahse,a lo thlen hunah min hmuh loh chuan a thinrim dawna’ a ti leh a.

‘Ho lutuk,I call mai dawn lawm’ ka ti leh a.Inngaituah niawm takin min chhang mai lo,ka hmelah enge lang zir niawm takin min en ran bawk.

‘Ok..Mahse,innu hi a lo thinrim ange” a nui a.

‘Teuh nang,min hrechiang alawm’ awlsam zetin ka ti leh a.Ka dar ka tisang uk bawk.Diktak chuan Maria-i ka Drop tih hria se chuan a lawm lem lo maithei.Mahse, enge ni vak? Ka kissa,ka mutpui pawh ni hlei lo.

Motor lam pana kan kal pahin a thiannu a calla,ka ngaithla lem lo.Kan tlanchhuak deuh chiah tihin Amal-in a rawn calla,eng eng emaw sawiin an titi luam.

‘I u nen kan inhmu a,hei min drop a’ a tihri ka hriat rualin ka melh zawk.Min en lo in hma lam a en thung.Amal-i hian Maria-i nen kan inkawp hma khan Tluangpuii amil lo ngai lo,mahse tunah chuan Maria-i vangin englai mahin a mil tak tak thei tawh lo,chuvang takin eng eng emaw chu a hrilh mahna le.Mahse, tunah tak hi chuan engpawh hria se pawi tihna ka nei lo.Engthil nge a zep kha ka hre hauh lo nangin a ruka thiltih hi ka huaa.Pasal ka nih angin tlang takin engkim min sawipui theih laia a zep tlat hian nikhat thilthu lekah kan inkar a tidanglam ta vek bawk.

Thim hnuah Hotelah ka let ta chauh.Ka Room hi duh chuan riah mai theih tura ka duan a ni a,harsatna a awm lo.Tluangpuii msg ka thawna,ka zin tih ka hrilha.Naktukah ka let ang tih ka hrilh nghal bawk.

Ka Phone riin min tiharha,nizan khan eng eng emaw ka enkual leh fe hnuah ka mu ta chauh.Ka mengchhuaka,min rawn calltu ka en a.Number ka save lo.

‘Hello..’ ka tinghut.

‘Sangkima maw?” Mipa aw nisi nem hlai lawi si hian a rawn ti a.

‘Aw,Min hrethiam la.Ka hre mai lo che’

‘Nia,min hre lo vang.Rocky nen kan inbiaa.Hmu tur chein min ti a’ a rawn ti nem leh hlai.Ka chhing sawk.

‘Ok,khawiah nge ka rawn hmuh ang che?” ka ngaihtuahna letling thawkin ka tita tho.Rocky-an tha a tih tlat avangin ka hmuh ngei ngei a fuh ang.

Inhmuhna hmuntur a rawn sawia,Phone ka off rualin Rocky call nghal ka tum zeta.Mahse, ka thulh leh ta zawk.Min hrilh lawk lo pawh a ni lova.Amah hmuh hma a lo va tihbuai leh chung tul ka ti leh lo.

Amah tak ka hmuh takah phei chuan Rocky sawi kha a dik tih ka hrethiam nghal vek.Thau lam a ni a,a tawi mai bakah a kaldan pawh hmeichhia nen danglamna awm lo khawpin a intheh no!!! ‘Ka lawm e’ tih paha kalsan mai ka chak rum rum.Mahse, vawitamtak kei pawn ka sawi thin.’Pawn lam landanah tumah teh loh tur’

Ka mamawhna ka hrilha,uluk zetin angaithla kar.Ka sawi zawh hnuah a mamawh a sawi ve thung,a mamawh tam lo.Nihnih hun a duh ang tih a sawi bawk.Aruata nen an pian leh an mizia a letling thawk,mahse in anna pakhat an nei.Ka thusawi angaihthlak chhung zawng khan a muthlu emaw tihmai turin a awm tlat.Aruata pawh khatiang chiah kha..

In ka thlenin Tluangpui’n gate min rawn hawnsaka.Buati haw ala hun lo.Roomah ka chho tlanga,ka hnunga a pen thawmah min rawn zui chho ve tih ka hria.Ka ngaihven lo lui tlat thung.Ka bag Sofaah ka thehthlaa.Ka pheikhawk ka hlipa,ka thawmhnaw ka hlip leha,ka hlihna hmunah ka kalsan tawp. Muangchangin ka inbuala,ka hmanhmawh lo lui a nimah zawk.Rooma ka let lehin ka thawmhnaw kalsan ho a dahnatur ah a lo dah fel vek tawh.Khumah ka thawmhnaw haktur a lo dahchhuaka,ka en vang vang.A dang ka ha ta zawk.Inhnuaia ka chhuk in khua a thim tawh.Buati ka hmu chuang lo.A haw tawh a nimahna.

‘Haw hma min dila’ ka ngaihtuahna hria niawm takin Tluangpui’n a ti nghauh.Ka bu nghut.

‘Eitur i duh em?” a ti dam leh thlap.

‘Duh tho mai’ ka ti nghut.

Ngawirengin thil kan ei duna,a thial chip hman dawn emawni tihturin a ei hmawk hmawk.

 ‘Enge dik lo awm a?” ka ti hmuk.Min rawn melh zawk,mahse min chhang loin a thil ei lai a eizawm leh daih.

‘I beng a ngawng thut tihna mi?” ka ti leh hmuk.A thil ei a tawp chawt,na zetin Spoon a dahthla chawrh.Engvanga mood fuh lo ve ngawt nge maw anih hrep ni?

‘Ngawng lo…’ a ti dam thlap.

‘Anih chuan ka zawhna kha chhang la,nge chhanna i nei lo zawk?”

‘I zinnaah Maria-i khan enge a tih ve?” ka zawhna haiderin a ti leh hmak.

‘A lo kal ve lo hlauh…’

‘Huh,a va ropui ve’ a ti leh nghauh,a awah tih elna alang chiang ngang mai thung.

‘Ropui,nia..Engmah hi ka zep ve vak lo.Ka nupui bulah lek phei chuan’ ka ti leh hmuk.

‘Maw? A va ropui ve’ a ti leh chiam.Ka rin ang ngeiin Amal-in eng eng emaw a lo hrilh a ni ngei ang.

‘Ropui deuh asin.Nang angin engmah ka zep ve tit tet hleinem’ ka ti leh a.Min rawn ena,a mitmeng lian kel kawlah chuan ka la hmuh ngai loh huatna alang chiang ngang mai bawk.

‘Engvangin nge min neih?” ka rin loh lutuk a sawi ta daih.

‘Eng maw i sawi?” ka ti sup bawk.

‘Min neihchhan ka hre duh’

‘I lo hre miah lo maw? Lemchan bawk tihna mi?”

‘Kei aia lemchang thiam zawk ka lo tawng che hi ka vanduai tihbak sawitur ka hre lo.Enge keimahah hian i duh a? Phuba maw?’ a ti leh duah.Maria-i vanga lawmlo pawh nise hetiang chiama thinrim a tulna ka hre lo.

‘Phuba lakna tur ka neih ka hre hleinem’ ka ti nghut.

‘Nia,dik chiah.I nei lo’ a ti leh hmak.

‘I thilbuaipui mek,ka hriat hlaua dawt i sawi vang hian thinrimtur chu nang ni loin keimah emaw  ka lo ti a’ ka ti leh hmuk.Min chhang lo.

‘Tun chiah ka sawi ang.Ka nupui i ni a,I pasal ka ni bawka.Thil te tham zawng zawng nen min hrilh rawh ka ti lo che,mahse hetianga a ruk a rala chet hi i ching zawm zel dawn anih chuan Nupui nihna i hlenchhuak lo ang..Nimina i hmuh kha hmana Hotel haltu kha a ni a,I hmuh tawh loh a tha ang.Tu nge ka nih i hriat kha.Min neklui anih chuan ka nupui i nihna ka theihnghilh mai ang’  ka ti leh duah.Min chhang chuang lo,a che lo hrim hrim zawk.Ka thawhsan ta zawk.

‘Thuruk hi kei chauh ni loin nang hian i zep hnem zawk hle tih i theihnghilh anih ka ring’ Kitchen ka chhuahsan hman tep tihin a rawn tichhuak sap.Ka ding leh rih,muangchangin ka hawi leta.

‘I nihna ang bawk hi ka nihna anga chhal tum hlek suh’ ka ti vawt ruih.Mahse, ka beisei loh lutukin a then sak.Eng chu nge maw nuihzat tur awm hrep ni??

‘Anih chuan ka u i that tih engtikah nge min hrilh ang?” a ti vawt raih.Ka hresual emaw tiin ka melh hrawk.Mahse, a hmela huatna leh natna langchhuak chuan ka hre sual lo tih a tichiang ngang mai thung.

‘Maw?” ka ti sup.

‘Accident emaw tiin na ti em emin ka tuar dam lui hram hrama,mahse i thiltih tenawm em em a hriat fuh palh vanga, tihluihnaa Accident a ni tih ka hriat tirh khan thih ve mai ka duh zawk asin’ a ti dam leh thlap.

Chapter- 27

‘I u ka that maw?” ka ti ro hulh.

‘Min zawh ngai loin i hriat kha’ a ti leh a.A rawn dingchhuaka,a mit sen ram maiah chuan na a tuar tih alang thei vek.

‘Aih,ka hre miah lo.Engvangin nge i u ka thah ang?” ka ti leh hmuk.

‘Sumdawnna langsar tak i kalpuina phenah hian thil tenawm em em i ti tih an sawi thin,chu thil ten awm lutuk chu tihpalh thilthuin ka u khan a lo hriaa.Thah a tul ta a’ a aw a khur dar dar mai.

‘Anih chuan ka that ngei tih fiahna ka hmu duh’ ka ti leh nghut.

‘Fiahna…Nia,fiahna.Kei pawn chu chu ka nghak mek,mahse i hmelah khan fiahna dang ka mamawh tawh lo tih ka chiang’ a ti leh a.Ka hmelah engmah a lang lo tawp ang…

‘He thil hi maw ka hriat loh tura i lo buaipui a?” ka ti leh sup.A lu a thing nawk.

‘Ni lo,he thil hi chu tihpalh thil a ka hriat a ni’ a ti leh nghauh.

‘Anih chuan enge ka hriat loh tura i tih hi?”

‘Hrilh che ka tuma,mahse ka hriatchian hunah ka lo ti a.Ni lo,tunah chuan ka hmelma ber chu nang hi i ni tih ka hre tawha.Ka pasal i ni emaw ni lo emaw ka hrilh che a tulna ka hre tawh lo’ a ti leh nghat.

‘Hmelma maw?” ka ti leh sup.

‘Aw, I u hi that ve ta ila hmelma tih pawh sawirik ka nih hmain nang hian min that ang’ a ti leh hmak.A sawi dik.Ka that ngei ang tih ka chiang.

‘I sawi dik,mahse i u hi thah nachhantur ka nei tlat lo’ ka ti leh hmuk.A dar a tichhing zauh.

‘Miin tualthah pawh hreh lo khawpa sum duh niin an sawi thin chea,mahse ka awih ngai lo.Ka hmangaih che avangin engkim ka hmuh hmaih thin.Mahse,pawm duh lo mahila ka pasalin mi a thata,athah zingah chuan ka u a tel ve tih hriat hi a namai lo asin’ a ti leha,na tuar tih hriat takin a aw a zuai raih bawk.Ka lu ka thing nawk.Eng ang pawn sawifiah tum mah ila a awih dawn lo tih ka chiang.

‘Ka that lo…’ ka ti leh hluk.

‘Nia,I kut chuan that lo.I kuta tualthat duhtur khawpin i mawl hleinem’ a ti leha,a mitmeng lian kel kawlah chuan Huatna alang chiang em em bawk.

‘Anih si chuan engtin nge i u ka thah ang?” ka ti leh hmuk.

‘I aia mi thattur tamtak an awm alawm.Mi a ka ni bik lo’

‘Ok…Enge sawitura min duh?” ka ti ta ngawt.

‘Engmah..Ka sawi anga,I ngaithla ang’ huatna a khatin a ti chang fak.

‘A tha lawm’ ka ti leh hmuk.

‘I laka mawi lo taka ka chet avang khan hrehawm ka ti,hei chu sawi nawn ngai loin nang pawn i hria.Engkim min tihsaka,kan Loan rulh theih loh tur i rul veka,ka nu boral naah engkim min ngaihtuahsak bawka.Khang vang pawh khan mahni inthiam lohna nen hun ka hmang thin.Min hmangaih tak tak emaw ka lo ti a.Engkim ka hriatchhuah takah chuan Hmangaihna ni loin ka u thihna avanga i ba rulhna lek a lo ni a..Engmah lawmna tur leh inthlahrunna tur a lo awm miah si lo.Enteh,mi tenawm.Pasal te laka thuruk tamtak zep tu niin min ngaia,mahse kei aia tenawm zawk chu nang hi..Mahni u thattu Pasala nei hi tunge midang awm ve ang? Ka inten ngawih ngawih asin’ a tita duah.Engmah sawitur ka hre lo.A thusawi zawng zawng zingah khan dik aiin dik lo a tam zawk.Mahse, enge ka tih chuan ang? Hmeichhe rilru let tawh vek vek chu thlaksak mai mai an harsa tih ka hre ve. Ani ngat phei chu a rilru a thlakin ka ring tawh lo.

‘Enge i duh?” reife ka ngawih hnuah ka tichhuak sup.

‘Eng maw?” a awah mak tihna a lang thei.

‘Inthen i duh emaw thildang pawh nise sawi hreh suh’ ka ti leh hmuk.A rilru nat tur zia ka hrethiam vek,inthen lo sawitur ka ni em ka hre lo.Mahse engmah tihsual ka nei lo miaua,pawitihna tur emaw inthiam lohna tur engmah ka nei lo.  

‘Inthen maw?” a ti chang fak.

‘Um..I duh phawt chuan hnialna ka nei lo’ ka ti leh sup.Nupui hi then leh mai mai turin ka nei hauh lo,mahse hetiang dinhmunah chuan inthen a duh ngei ang chu.

‘Aih, duh lo’ ka mengphar deuh awk.

‘Teh tlat chuan’ ka hriattawk lekin ka ti sup.

‘Kan inthen aiin kan chendun hian ka tihrehawm thei zawk ang che’ inringtawk lutukin a ti hmak.

‘A nuam khawp ang chu’ ka ti hmuk.Ngaipawimawh lo niawm takin ka dar ka tisang leh uk bawk.A tawng leh hun pawh nghak loin ka kalsan ta zawk.Nupa hlimtak kha,thilhriatsual vangin nikhat thilthu lekah hmelma kan nita der mai chu ania.Mahse, kha thil kha tuin nge hrilh ang? Bakah a u kha hriat pawh ka hre ngai hek lo.Engvangmahin thah nachhan tur ka nei lo.

Inchung roomah reife ka awma,ka chhukin a lo mu tawh.Ka en vang vanga,angaihdan tehhrep avang khan khum khata mut a harsa ang.Min sawipui hmasak pawh awm loin angaihdan a siam fel hmak thei kha ka ngaihdan a ni hek lo.Ka rinna chanve pawh min rinna a nei lo.Puansin tur ka laa,Sofaah ka mu ta zawk.Naktuk zanah chuan duh leh inhnuai lam Room emaw inchung roomah pawh ka awmchhuak law law thei ang chu.

Officeah ka thu a,ka ngaihtuahnaah Tluangpuii thilsawi a rawn lang leh zat.A u kha accident a ni a,athih hun ka ngaihtuaha.Kei nen inzawmna a neih ka hrechhuak zo lo.Pu Dama ka rilruah a rawn lang zawk.

‘Aw,Sangkim…’ thatchhe aw zetin a rawn ti a.

‘Thil zawh lawk duh che ka nei’ ka ti nghut.

‘Ka hria alawm,thil min zawt tur loin min be ngai hleinem’ a ti a.A nui huau huau bawk.A nuihna phena a tawngkam ngeiawm zet ka hre lo der hmiah thung.

‘SX tana hnawksak,dahthat tak kan nei em?” ka ti hmuk.SX bak midang nena inzawmna nei sumdawnna engmah ka khawih tlat lo.

‘Enge sawi i tum?” a ti nghut.

‘Ka sawi tum i hria,mi kutthlak emaw thihna emaw thlensak kan nei em?” ka sawi zawh rualin a thaw hulh ri ka hre nghal zat.

‘A va mak tehbawl bawk ve’ a ti leh a.

‘Nia’ ka ti mawl tawp.

‘Han vau emaw han tihthaih deuh chu kan nei mahna’ a ti nghauh.

‘Ok,a tha’ ka ti hmuk.

‘Enge dik lo awm?”

‘Engmah.Ka lo ngaihtuaha,thil hnawksak leh thil fel lo ti,hnawksak bik kan pawl zingah an lo awma,I thehchhuak anih chuan thuhran ni se.Anih loh chuan kan sumdawnna vanga midang kutthlak kan mamawh lo tih ka hria.Hman atanga tunthlengin’ ka ti leh hmuk.

‘Anih chuan kut ka thlak i tihna mi?” lawm lo aw a hriattheih.

‘Ti lo,fimkhur nan ka sawi mai ania’ ka ti leh nghut.A thaw ri leh huk ka hre thei.

‘Adik alawm’ a ti ve ta nge nge.

SX hian mi nazawng tihtheih miah loh,sawrkar tan kan supply a.Mizoram sawrkar chauh ni lo.State dang pahnih kan pe bawk.Engmah dan phal loh thil a ni lo.Mahse, mi tamzawkin he kan Supply ken pah hian Damdawi leh thildang tawlh ru tel angin min ngai tih ka hai hauh lo.Ka thawhrimna hmu si loin ka hausak thutna chhan an zawnga,’ mi hian tum engang mah se hetianga hausa tur chuan kum 10 tal angai’ tih hi an sawi tam ber a ni a.Ka pawm thlap,ka beihna zawng zawng bakah ka tlukchhiat atanga ka thawhleh kum zawng zawng hi avaiin kum 10 aiin a tam fe zawk.Hausa thut erawh ka ni lul lo.

Ka Phone a rawn ri a,ka en a.Ruata..Kan inneih hnu lawkah sumdawnna thar beiin a buaia.Kan inhmu lohna pawh thla a tling tawh.

‘Hey,Dude..’ ka ti sup.Chair hnung ka ngheng a,ka zi mar ur ur bawk.

‘Kan va inbe khat ve’ zangkhai fahranin a rawn ti lauh lauh.

‘Adik..Lo kal la’

‘Khawnge i awm?” a rawn ti leha.Ka then suk.

‘Hotelah zawk..I lo kal dawn mi?” ka tinghal zat.

‘Aih,zanin chu chhuak ila..Hna ringawt hi a ninawm riau mai’ a rawn ti leh a.Ka nupui neih hnuah Party tihvel engmah ka kal leh lo.Thianho thiltih pawh ka kal anih pawhin Tluangpuii nen a ni zela.Rinawma Nupui neih hnuah,nupui hlau tiin ka chhaih nasa thina,tunah chuan amah zawkin min fiam ta thung.

‘I la ngaithla em?” a rawn ti leh a.Ka ngaihtuahnaah ka lo awmsan leh daih pek.

‘Um,sawi zel rawh’ ka ti ve ngawt.

‘Zaninah dar 8 ah..A hmuntur ka rawn thawn ang che’ phur hurhin a rawn ti leh a.

‘Um..Tu Party nge?”

‘Keimah…Kan thian ho kan inhmukhawm khat lutuk’ a rawn ti leh a.

‘Ok..A tha ang’ ka ti a,ka thensuk.

Sana ka en a,Dar 1 a pel hret.Ka michhawrpa khan nihnih vel nghak turin min ti kha ania,anih chuan engmah ti lova lo nghah ngar ngar bak tihtheih ka nei miah lo.Ka ngaihtuah naah thil pakhat a rawn lut zawk.Tluangpuii u boral hun leh kan Bungraw load hun a inmil em?

Ka Macbook ka phawrha,ka On nghala.Office Computerah SX kaihhnawih engmah ka dah ngai lo hrim hrim.Tluangpuii u boral hun ka ngaihtuaha,ka confi lo.Tluangpuii ka zawt thei lo.Anih chuan Ambie-a animai.

Ambie-a ka calla,a pick vat.A u boral ni ka zawta,ngaihtuah buai map loin a rawn sawi nghal zat thei.Ka hriatduh chhan min zawt miah lo thung.

Ka enkual dun duna,ka duh ka hmuh takah chuan ka thaw hawk.A boral hma zanah Load nen an chhuaka,an vaiin him takin an thleng vek bawk.Ngaihtuahchhuah tur ka neih takin tiin ka mit ka chhing vang vang.Engvangin nge an thah kher ang? Angaihna ka hre lo.Ka thluak a vir zawk,Ramdinsanga anih loh chuan nimina mi khan a hre ngei ngei tur a ni.

Ka inkhalhchhuak a,a Address ka neih lam ka pana,nimina Tluangpuii nen an inhmuhna hmun kha chu a Address ka neih nen inpersan tak a ni.An veng ka thlenga,mi ka zawt a.An hre lo.Dawr lian angreng fe min kawhhmuha,ka zawt a.A pa hming ka sawia,a thlalak ka entir pawn an hre chuang lo.

Nimina Tluangpuii nen an inhmuhna kha,ni e.Kha vengah khan an khawsa pawh a ni thei,nihna thupa thawk anih tak tak chuan amah hriatchhuah theihna chi engmah a duh dawn miah lo.

Nimin lama ka kalna ka pan leh ta zawk.Tluangpuii nen an inhmuhna bula Dawrte awmah ka zawta,a thlalak ka entir nghal bawka.Chal tichuar meuhin a en vang vang.Ka beisei ruk ang ngeiin a hre ta hlauh.An awmna pawh an dawr atanga hla vak loah a lo ni a,mahse amah hi a awm ngai meuh loh avangin a hre bel vak lo tih a sawi tel bawk.

Door Bell ka hmeta,reivak loah hmeichhe pakhatin min rawn hawn saka,A rai kawh luah.Enge ka duh min zawta,nelawm takin a nui seng bawk.

‘Zira a awm em?” ka ti a.A bu nghat.Lut turin min ti a,ka zui luta.An inchhung a zau lem lo.Naupang pakhat a lo awma.Hmuhnawm tihhmel zetin TV a lo en dauh dauh.

‘Lo nghak lawk rawh,a inbuala’ a ti a.Thutna min kawhhmuhah ka thu a,eng ber nge ka tih dawn ka inhre lo.Mahse, ani hian eng emaw tal chu a hre ngei ngei in ka ring tlat.Minute sawm vel ka nghah hnuah a rawn chhuak a,min hmuh rualin a mengphar awk.Mahse,a in control leh vat.

‘Pu Sangkima tehhlawl chu.Enge i rawn tih dawn teh miala’ pangngai takin a ti a.Mahse, min hmuh ruala a hmel buai nak maiah khan ka kal chhan awm a hrechiang sa vek tih ka lo ngaihtuah daih thung.

‘Nia,ka rawn hmu lawk dawn che a.Hun i neih chuan?” ka ti sup.

‘Aw,nei e.Ka hman alawm.Nu-i,Bawiha hi Roomah lo va awmpui lawk ta che.Pu Sangkima nen hian kan han inkawm lawk ang’ tih pahin kawngkhar min rawn hawnsaktu hnenah a ti a.Nupui a nei tawh tih ka hre ve chiah.Anih chuan engvangin nge Inah a awm khat ang ka hre thiam ta lo tawp.A fapa lah kum 4 vel lai anih hmel tawh bawk si.

‘Le,enge min rawn hmuh duh chhan?” a nupui te awm loh hnuah a ti fan raih.

‘I rinhriat maithei.Hotelah khan Jamal-a nen in inhmu thiam vak lo niawmin ka lo hriaa’

‘Nia,mahse kha chu ka ban chhan a ni lo.Family lam zawk hi ania,I hmuh ang khan kan nu hian thlaleh lawkah nau a nei dawna’ a ti a.A nui zui hak hak bawk.Jamal-a thilsawi ka hrechhuak nghal zawk.Cook satliah a ang lo a ti anih kha.Nia,a ni lo tawp ang.Address dik lo min pek atang ngawt pawh khan engemaw thup tum a nei tih achiang.

‘Ok..Ka hrethiam.Ka rawn kal chhan erawh thildang’

‘Ka va hre thiam lo ve’ a ti a.

‘Ka nupui hian engvangin nge a rawn hmuh thin che?” ka ti nghut.A hriat reng thilsawitur ka nih avangin vehthlem chiam ka peih lo.A hmelah danglam a awm em tih uluk zetina ka en a.Min rawn en zawka,ka mitah tak en ngam loin hmundang a melh leh daih.Chu chuan ka kalchhan a hre ngei tih ka nemnghet zual sauh.

‘Ka hrethiam chiah lo…’ a ti ban charh.

‘Ok..Nimin khan a rawn hmu che a,chu bakah Phoneah vawi tamtak in inbe bawka.Engthil nge in buaipui ka hre duh.A chiang tawh ang chu maw?” ka ti leh a.Thinrima nawr ka tum lo.

‘Eng lo..I rin ang kha a ni lo’ mangan hmel zetin a ti bah nak.

‘Engmah rindan ka nei lo.Ka zawhna zawk chu engthil nge tih ka hre duh’ ka ti leh hmuk.Ngaihtuahna buai hmel zetin a hmui a pet a,a thaw deuh huai bawk.

Muangchangin Office lam panin ka tlana,ka bengah Zira thusawi a rawn ri nawn leh a.Steering wheel ka hmer nghet zual sauh.’Ramdinsanga tana thawk thin ka ni a,ka duh vanga thawk erawh ka ni lo.Tluangpuii ang bawk hian ka tang ve a.Tunah erawh chuan engmah buaina ka nei tawh lo.Chu erawh Tluangpuii min puihna vang liau liau a ni thung.Ka tihtur nimiah lo mah se Tluangpuii min ngen angin Ramdinsanga file pawimawh ka rukchhuahsaka.Nangma tana pawi thei thil a awma.Chu erawh amah nen sawi dun thei ula ka ti.Ka hriat zawng chu Tluangpuii hian humhim che a tum thina,a theihtawpin’ a ti anih kha..

Nizan khan Tluangpuii khan a sawi ngei bawka,engmah zep nei lova sawipui min tuma,mahse a u ka that anga a hriat leh tak avangin engmah min hrilh a tum lo a ti anih kha.Zira khan a u chungchang engmah a hriatpui lo tih a sawia.A hmelah khan dawtsawi hmel a pu lo.

‘I hman dawn tawh em?” Phone ka pick rualin Ruata’n a rawn ti a.

‘Hman tep’ ka ti tawi tuk.

‘Ok,a tha lawm.Innu i rawn hruai dawn em?” a rawn ti leh a.

‘Aih…’

‘Ahh…A tha,Rinawma ang maia nupui hlau nih hi a tha lo’ a ti a.A nui zui hawk hawk.Ka then ve suk ringawt.

Phone Dawhkanah ka dah a,Hotel ka thlen hnuah ka thutna atangin ka la thochhuak leh ta miah lo,Room chhung a thim khup bawk.Ka ngaihtuah dan kha chuan engkim Tluangpuii ka sawipui ang ka ti a,mahse ka Call a pick lo.Buati hnenah a awm leh awm loh ka zawta,a lo awm lo ngei.Scooty a keng lova.Ina Motor hmantur awm lah a hmang hek lo.Zanin atan chuan biak pawh tum ila awmzia a nei dawn lo tih a chiang.

Partyna tur lam panin ka inkhalhchhuaka,phurna pakhatmah ka nei lo.Ka ngaihtuah naah Tluangpuii bak engmah a lang lo.Engvanga venhim ngai anga min ngai nge anih? Keimah leh keimah ka inveng thei vek tih a hrechiang lutuk.Ka tihtheih chin pawh a hrechiang lutuk.Bakah a lo inrawlh ngai loin ka tana hlauhawm a awm anih chuan a hriat rualin min hrilh thei,mahse a ti lo.

Zothani nen kan inkawp lai khan hna chungchang engmah a sawi ve ka duh ngai lo.Maria-i pawh chuti tho.Mahse, Tluangpuii hi chu a danglama,ka hna thawk thintu anih tlat avangin hnaah inrawlhtir lo mah ila thil tamtak a hriat ve tho avangin tel vena tur lai a lo hre chat zel tihna a ni a.Dan tum pawh ni ila ka tana thatur ni a a hriatah chuan dan chi a ni lo tawp tih a chiang.Mahse, lawmna tur ka hmu lo.A pasal ka ni a,min rin mai hi a tihtur a nih laiin amah zawkin lo tih a tum tlat hi a lawmawm loh,Mipa nep zet angin min lantir niberin ka hria.

‘Sangkim….I dam maw?” ka thlen veleh ka beisei loh lutukin Remruati’n min lo ti a.Ka hawihai titih. Ka hawi kuala,Zothani ka va hmu leh a.Min hmu ve lo thung.Ruata khan kan thianho bik a ti khan ka hriaa.Mahse, Remruati leh Zothani mai bakah hmeichhe dang an awm tel nual bawk.

‘Dam alawm, I tha maw?” Zangkhai thei ang berin ka ti let ve a.

‘Ka tha, Oh.. kan tha…’ a nui hak hak.A sawitum ka hria.Mahse, ka haider lui hmiah.

‘A lawmawm..Hna lam i tluang maw?” ka ti leh a.Waiter rawn kal phei ka hui zauh.

‘Um.Tluang alawm,innu i rawn hruai ve kan hlau a….’ mei nei zetin a ti leh a.Ka then suk.Chhang loin Waiter no rawn chawi phei zinga pakhat ka laa,ka thawkkhat nghal pawp.Ka daha,no dang ka la lehnghal zat.

‘Phei ila…Thu ang,kan titi khat tawh si’ amah bawkin a ti leh a,ka bu nghut.Ka zui pheia,Zothani te thutna lam kan pana.Mahse, ka thlen hmain Zomawia’n min lo ko ta hlauh.

‘Hey,kan Lulianpa hian engthil nge maw tih a tum ni? I kal dawn tih a hrerenga,Zothani te a sawma.En la..Ivy a tel bawka’ a ti su su.Ivy hi Rinawma bialnu hlui a ni a,an inkawp lai khan an inkawp nasa bawka.Nupui a neih hnuah pawh an la buai phah zauh zauh.Zomawia kawhna lam ka hawia,Ivy lo nui bawk bawk ka va hmu a.A bulah Rinawma a thu ve bawk.

‘In nupuite tan chuan engmah tisual lo mah ula a thlamuanthlak miah lo ang aw’ a ti leh a.A sawi dik,kan mi a pa hian engthil nge maw tih a tum hrep ni??

‘Kan thianho chauh a ti emaw ka ti a’ ka ti ve sup.

‘Um,keipawh tiang chuan min hrilh..Mahse, hei a mak ta riau’ a ti leh nang nang.

‘Hah…Engmah pawi a thleng nang,hmanah kha chuan kan thianhoah an tel ve vek kha titawh mai ang’ ngaihsam zetin ka ti liam puat.Ka nui zui hawk bawk.

‘Uh…Nia,nitawh mai’ a then ve suk.

In ka thlenin In a lo thim thuap.Current a awm lo ti dawn ila thenawmte an eng vek.Motor ka hung fela,Gate ka kalha.Inah ka lut mai dawna,pawn lamah a lo inkalh..Ka lu a hai chhu bawk nen ka thin a rim deuh hlur bawk.Ka chahbi bawr zinga kan In chahbi awmin ka hawnga,tun ang hunah khawiah hrep nge maw a kal ni?

Thawmhnaw pawh hlip loin khumah ka lehtthla hnawk,ka phone ka phawrha,Tluangpuii ka calla,mahse a pick lo.Ka call nawn leha,a reject nghal daih.Ka call nawn leh a,a reject leh hmak.Call leh ka tum chiah tihin a msg a rawn thleng a.Ka open vat.‘Zanin chu kan Inah ka riak lawk mai,naktukah ka lo haw ang’ Hreptaka..An inah a riak lo tawp ang,a duh naah chuan riak mawlh tehse.

Ka phone ka mutna sirah ka thehthla a.Ka mit ka chhinga,ka thil in ka inhnem deuh bawk nen ka lu a hai chhu.Ka mitthlaah Tluangpuii a lo langa.Hetiang em em a hriatthiam harsa hi ka nunah ka la tawng ngai lo va,ka tawng nawn leh pawn ka ring lo.Ka nupui a ni a,lungawi lohna tur engmah min siamsak ngai lo.Ka lawmna tur hlir tih a tum thin zawka,mahse tunah erawh a thil hriat dik tawk lo avangin kan inkar a danglam ta hlawk.Hrilhfiah tum a sawt dawn loh miau avangin min puhna ka pha zui hek lo.Nakinah a fiahna nen thlap ka la pe mai ang.

Nupa kan ni a,engtik niah emaw chuan kan la inhau ve ang tih ka hria,mahse tun ang buaina erawh ka beisei loh ber a nithung.Nizanah kan mu hrang a,zaninah tha taka kan mutdun ka beisei hauh lo nangin a lo riakchhuah kher ka beisei lo.Hmmm…Angaih danah chuan a u thattu ka nih avangin, min hmu peih ngang lo ni hmiang..Hahthlak..A duh duhin khawsa tehse.Mahse, min hum tuma a chet zui loh nan ka hrilhfiah angai,keimah ka inveng thei tawk tih entir ka duh…Ka ngaihtuahna atthlak lutuk vangin ka nui chhuak nghek,tunah chuan min veng loin min that duh in a buai zawk ang chu le.A mitmeng nalh zetah khan huatna bak engmah a lang tawh lo anih kha….

Enge min tiharhtu pawh hriat lohin ka harh zawk.Ka thuchhuak nghal zawka,mahse ka lu na lutuk vangin ka letthla leh hlawl.Nizan khan Party naa ka in mai bakah inah ka inbelh leh nghek,khum ka pan lai pawh ka hre lo hrim hrim.

Ka Phone nghawr dar darin min tiharh leha,che loin a tawp hun ka nghaka,ka beisei ang ngeiin a tawp leh mai.Mahse, a rawn ri nawn leh zat,thinrim zetin anchhia ka lawh hluk.Tu tak ni maw? Mut nilen ka duh tehreng nen..

‘Hello?” ka ti hmuk.

‘Vawiinah rawn biak che ka tuma,mahse phone i  pick thei lo va’ ka mi chhawr thar pain a rawn ti no hlawi.Nihnih a tia,engvangin nge tunah min lo phone ni? Thuthar a nei pawh a ni ang,mahse vawiin atan chuan engmah ti lo va mut nilen ka duh.Mahse, ka tana pawimawh hi ka hnar ngawt thiang lo tih ka chiang.

‘Tlaiah inhmu ila…’ ka tita nge nge.

‘Tlai a?? Dar engzatah?” a ti leh hlawi.Hetiang mize mak leh lutuk hi a…

‘Dar 4 vel ni se’ ka sawi zawh rualin a thaw deuh hak.

‘Tunah tlai dar 5 a pel deuh chiaha’ a ti hlai.Chhang loin ka Phone sana ka en leh rih,a sawi dik..Dar 5 a pel..LALPA le(h)!!!

‘Sorry,ka nuam lo deuha.Ka harh deuh chiaha’ nuam ti lo zetin ka ti sup..

‘A pawi lo,zanah pawh animai’ a rawn ti leha.

‘Naktuk nise a pawi em? Zanin chu ka chhuah theih ka ring chiah lo’ ka ti leh a.A ngawi deuh vang vang.

‘Ni e.A tha,Lawk..Zartei hi in enge?” min chhang dawn lo emaw ka tih hnuah a rawn ti leh a.Min rawn zawh Berkher lah chu a !!!

Chapter- 28

‘Zartei maw?” ka ti deuh hu.

‘Aw..In enge?” a tinawn leha.

‘Ka nupui thiannu.Ngatinge?” ka ti leh sup.

‘Eng ni lo e,ka hre duh mai mai mawle.Naktukah chuan i hman hun min lo hrilh mai la,ka lo kal ang’ a rawn tih zawm leh a.

‘Ok..’ ka ti hmuk.

Che loin ka mu deuh vang vang,engvangin nge Zartei berkher min zawh ang ka ngaihtuah thiam eih lo.Tluangpuii Bestfriend a ni a,kan inneih niah a dinpui bawka.Hmeichhe fel leh Smart tak,a bula awm nuam leh ngainatawm tak a ni bawk.

Peih lo zetin ka thochhuaka,ka beisei loh lutukin Khum bul Chaira Tluangpuii lo thu ka hmu nghal zat,a khup a tawm chho a,a khupah a lu a nghat a,a che miah lo bawk.A muhil a ang mah zawk.Engchen nge a thut tawh ang rinchhin ngaihna ka hre lo.

Ka pan hnaia,ka thawm a hre lo nge ka hre lo.A che chuang lo.Dimtein a luah ka khawiha,a phu zawk.Kei pawh ka phu ve deuh zawk bawk.Ka kut ka la let vuta,ka kekawr ipte ka zen nghal daih bawk.Min rawn en chho a,a mit sen ram maiah chuan a tap nasa emaw nizanah a muhil miah lo a ni ngei ang.

‘I tho thei maw?” a ti sapa.A then sak bawk.A awkiah engmah ngeiawm lam a awm lo.

‘Aw..Khumah mu rawh’ ka ti sup.Min chhang loin khum lam a melh zawka,hnuai lam a en lehnghal daih.

‘Nizanah i awm loh vangin ka lo mu anih kha,ka mu nawn tawh lo ang.Room dang ka hmang dawn nia,I duh leh Bed Sheet thlak mai la’ ka ti leh hmuk.Ka mutna hnuah a mu hreh anih ka ring a,a sawi kher nghak lo va sawi mai a finthlak.

‘Aih,chutiang a ni lo….’ Min rawn en pahin a ti leh a.A aw a zawi hle nangin ka hre thei vek tho.

‘A ho lutuk,I ngaihtuahna ka hria.Buati hriat i hlau anih chuan ka lo chingfel mai ang’ ka ti leh a.Min chhan tumin a ang ziaua,mahse a chip leh ta daih.

‘Ka thawmhnaw hi chu lakchhuah kher tul ka ti lo.I lo paihchhuah em loh ka beisei ang.Mahse,  ka lut dawn anih pawhin i awm loh laiin ka lut ang’ ka ti leh nghut.Min chhang dawn lo tih ka hria.

Ka thawmhnaw dahna ka hawnga,kekawrbul leh T-shirt ka lachhuaka,ka bag ka zawnga.Ka hmu mai lo,nizan khan Motorah ka kalsan pawh a ni mahna.Nakinah ka zuk en mai ang.Kawngkhar ka hawnga,ka chhuaka.Dimtein ka nemkhar leha.Kal mai loin ka ding deuh vang vang.Kan awmdan hi mumang ni lo mah se mumang a ang rum rumin ka hria.

Ka inbual zawh veleh Damdawi ka ei a,a hma ang em em kha chuan a na tawh lo thung.Inhnuaiah ka chhuk a.Buati, Kitchen lamah a ri rak rak.Motorah ka bag a awm leh awm loh en tumin ka pan pheia.Ka rin ang ngeiin a hnung seatah ka lo dah.Nizan khan Party na a ka kal dawn khan ka dah tih ka hrechhuak leh lawi.

Inchung Rooma awm loin inhnuai Libraryah ka lut a,Library a ni tak nangin ka hnathawhna pakhat a ni a,Mikhual ngah deuh chuan riahnan an hmang tho bawk.Mail ka hawng a,Julie-in thil pawimawh min rawn thawn nual.Hna ka kal loh tuma a tihdan thin a ni ve hrim hrim.Engmah hmanhmawhthlak awm lo mah se ka hriat tur chi anih chuan pelh miah loin a rawn thawn zat zat.Tluangpuii awm loh hnuah Accountant thar kan neia,a fel a.A rintlak,mahse thil tamzawk chu Julie kutah a awm ta thung.Showroom lam thil hralh ka en leh zawr zawra,Order ngai Lalnuna hnen atangin ka dawng bawka.Sale pawh a chhe hran lo..

‘Hello…’ ka ti sup.Ka hmaa Monitor lamah ka ngaihtuahna a awm daih thung.

‘Bawiha, ka thil hriat hi a va mak ve’ Ruata’n a rawn ti a.Engchu nge maw sawi a tum ni?

‘Eng maw?” ka ti liam puat.

‘Rinawma te an inthen anih hmel’ a rawn ti leh a,a thaw hawk bawk.

‘Enga?” ka ti deuh vak.

‘Nizan khan Rinawma a haw lo peka,Ivy nen an lo riakdun nge mawni? An nu-in a mana’ a ti leha.

‘Eheu!! A va che mak ve’ ka ti hluk.

‘Ka beisei loh lutuk a ni peka.Annu in min rawn biaa,keima Party anih avang khan kan thianho bil chauh tur angin Rinawma khan a lo sawia.Mahse, a haw ta bawk si lo.Min rawn calla,ka lo pick thei lo bawk nen Rinawma a call leh kha Ivy-in a pick pek aniang’ a rawn ti leh duah.Ka chek tlak mai.A nupuiin a thik zia hrereng chungin engtin nge a lo riahpui theih ni?! Bakah Nupui nei a ni a,hmeichhe dang laka tenawm taka khawsa tur a ni lo.

‘Engvangin nge i lo sawm tel reng reng a?” ka ngaihtuahnaa lang hmasa ber ka sawichhuak nghal hmuk.

‘Chhunah kan inhmu a,kan titi velah khan zana kan Party tur ka sawichhuaka.Sawm ve a phut aaa.Chuvang mawle,Zothani leh Remruati pawh ka sawm tho a,nang te chu i che ho ve chuang hleinem’ mahni inthiam tum zetin a rawn ti leh a,ka ner nawk.

‘Zothani…Nia, I timak tho mai’ ka ti leh nghut.

‘Mak lo,kan thian ve tho anni a.A pawina a awm lo’ a ti leh tlat.

‘Ok..Ok,a tha lawm..A hlimawm lo zawk zawk lo ania’ ka nui a.

‘Um..Mipa pangngai a hriat timai ang’ a ti leh kher.

‘A pangngai lo chuang nang,ruih tawh hi chuan ngaihtuahna a tawi duh em alawm.Kei pawh ka chebuai tep in ka hria’ ka nui leh hawk..

‘Nang khan i nupui bak i ngaihtuah nek lo e..Beisei theih pawn i awm tawp loh kha’ a ti bai bai.Ka then leh suk.

‘Rinawma nupui chu i kohsak dawn nge?” ka ti leh a.

‘Ka hre lo,ka mawhphurhna a ni em ka hre chiah lo a..’

‘I Party ania,I palai zak zak ang chu ‘

‘Tenawm lo teh a,nangman be zawk la a tha ang.Angaipawimawh zawk ang che’ a ti leh a.

‘Teuh lo,a pasal in a bialnu hlui a mutpui tih hrereng chungin a nupui laka ngaihdam dilsak ka duh lo bur.A rilru tur ka hre lo chungin na a ti ve viau theia.An nupa in chingfel zawk rawh se’ ka ti leh nghut.

‘Um..Nia,a tha lawm.Mahse,nuam  ka ti lo chu anih hi ‘ a ti leh hulh. A nuam lo hle ta ve ag.Engvangin nge maw a sawm tel ngawt tehreng ni a..

Ka zi mar a,Sana ka en zauh.Dar 7 a hnai thuak tawh.Ka ril a tam rawih rawiha,ka mut nilen thak avangin engmah ka ei lo.Tam viau a hun thawkhat.

Ka chhuaka,Living Room a lo ruak vek.Kitchen lam ka pan tlanga,chu pawh a ruak.Buati’n eitur a siam vek tawh ka ring tho.Ka rin ang ngeiin a lo siam vek tawh.Tluangpuii nen kan inneih hnuah keimaha ka awm laia ka chawei nghak ziah thin kha a nghak ngai ta lo.Awmpui lakbelh ka rawta,in a awmtur ni lo,langa kaltur tho.Mahse,Tluangpui’n ‘ kan mamawh rih lo ‘tih zawnga min hnial tlat avangin ka lakbelh ta lo.Tunah chuan Buati a haw tawh a,anih chuan ka ruala chawei pawh a peih dawn lo.Keimaha ka ei mai angai..Pawi ka ti em ka hre lo..

Ka eikham deuh chiah tihin Kitchenah a rawn lut thawm ka hriaa,mahse ka hawilet chuang lo.Ka thil eina sil loin ka kalsan a,ka hnunga Tluangpuii lo ding ngawi reng chu en loin ka kal pela,biak tumna ka nei lo.A luak pawh a lo chhuak viau thei..

Motor chahbi ka laa.Kalna tur pawh hre chuang loin ka inkhalh chhuak mawl tawp.Ka thawpik lutuk a zia phah leh a tha.Naktukah chuan ka hriat tur ang ang ka hre hman tawh anga.Buaina zawng zawng hi a tawp tawh ka beisei takzet.Nitin khawsak naa han buai phat hi chu a awm ve vek.Mahse, Tluangpuii nen inzawmna kan siam hmasak zawk atang khan ka nun hi tluang taka a kal pawh ka hre leh tawh lo.Kan hlim ve anih pawhin rei a daih hek lo.Ka Hmangaih ang bawkin min Hmangaih tih hi ka pawm thlap.Mahse, kan inrem thei chuang si lo lai hi thilmak tak zawng a ni chiang.A pasal ka nichung pawha min ring  thei lo hi buaina lianber zinga mi a ni ngei bawk ang.

Dar 11 pelh hnuah in lam ka pan ta chauh.Motor thawm a hria angem ka hre lo,a lo riakchhuak leh zawk maithei bawk.Motor ka dahfel hnuah In lam ka pana,mahse a lo inkalh lo.Anih chuan Inah a riak tihna.Thawm nei mang loin inchungah ka chho a,a mutna room pan loin ka riahna tur Room ka pan ding nghal a.Engvangmahin ka ngaih zia tihlana,nep taka lan ka tum lo.

‘Vawiinah Zartei ten dil an sah dawna.Kal ve ila a pawi em?” chaw kan ei laiin Tluangpui’n a ti a.Kan nupa kar boruak chhe lutuk engmah a lang lo.Buati a awm ve miaua,a mak hek lo.

‘Um..Kal rawh’ ka ti sup.Ka thil ei lai ka ei zawm mawlh mawlh bawk.

‘Riah angai maithei bawka.Zing atangin tui an paih kang tan chauha,a lian bawk sia..Mahse, kan lo haw maithei tho bawka’ a ti leh duah.

‘Ok,a tha lawm.In riah dawn chuan lo sawi hma la’ ka ti leh nghut.Min chhang loin a bu nghat thung.

Inhnuaia a awm laiin ka insiama,ka sawi lawk tawh ang ngeiin a awm laiin Roomah ka lut lo.Ka insiam zawh hnuah ka chhuk thlaa.Stepah a rawn chho ve chiah thung.

‘Ka kal aw,in kal dawnah min rawn hrilh la’ pangngai thei ang berin ka ti leh sup.

‘Eng lo,riah kher pawh angai lo maithei’ a ti leh a.

‘Um..Engpawhnise fimkhur ula’ ka ti leh a.Ka mit ka siai zauh.Nidangah chuan ka chhuah dawnin min insiampui vek zela.Ka kal hmain ka kuah emaw ka fawp emaw ziah bawk….Mahse, tunah chuan engmah ka tih kher a tul lo.

Showroom ka pan hmasaa.Lalnuna nen Order ngai kan sawi dun leha,an mamawh thildang min hrilh nual bawk.Beisei aia engkim a kaltluan lehzual bakah kan Sale a chak em em a,Stock a awm hman mang lo.Motor hralhchhuahtur apiangah kan awmna atanga Petrol Pump hnaiber an thlen theihna tal Petrol thun lawksak vek an ngaia,kan Dawr Motor hmanbik tur pakhat leh Bike pakhat a awm tel bawka.Oil vang thut thut thei reng anih bawk avangin inven lawk nana Coupon leilawk turin ka ti a.Thlakhat atan erawh bithliah chin ka nei thung.

Hotel ka thlen hnu lawkah ka Mi chhawrtharin min rawn calla.Ka hmuh theih leh theih loh min rawn zawta,ka awmna ka hrilha,a tul chuan ka pan thei tih ka hrilhnghal zat.Mahse,amah zawkin a lo kal dawn tih a rawn sawi a.A la rei lo viau nangin Aruata nen in anna dang an neih ka hmuchhuak leh hman tawh tho.Aruata ang bawk khan a dawhthei lutuk ringawt.

Phone ka dah rualin msg tone a ri kauh,ka Open a.Tluangpuii a lo ni a,an kal chiah tih min rawn hrilh a.An riah a rin thu a rawn sawi bawk.Ka sawi kha Buati awm lai anih vanga sawi mai ka ni a,min rawn hrilh erawh ka ring lo.Mahse, ka beisei loh zetin min rawn hrilh ta tho.Ka thensuk,darkar reiloteah chuan engkim ka nei tawh anga.Kan nupa inkar pawh a tha tawh ngei ang..

‘Nihnih ka ti nangin ka rin aiin ka tluanga’ a ti a,a nui sawng bawk.Ka insehruh nghek thung,engtikah tak a mizia hi ngaiah nei ang i maw?

‘Ok,a tha hlauh anih chu’ pangngai thei ang berin ka ti sup.

‘Nia,ka vannei.Hei hi en la..’ tih pahin Note bu min pe a,a Note bu chuan tul lo lutukin Tluangpuii min hriatchhuahtir zawk..Ka hriat duh ho a lo ziak tlar dal.

‘Thil zawng zawng bul hi mi pakhat ni loin pahnih anni a’ thutak fahranin a ti a.Ka bu nghut.Ka rilruah Ramdinsanga a lo lang nghal a.Mahse, tu nge pakhat chu.CHOP ho Boss,Hugo a ni angem? Ani nen inhuatna kan nei miah lo.Mahse, a cousin a ni a.Tel ve na a nei lo ang tih a sawi theih loh.

‘Pakhat chu Ramdinsanga a ni a,hei hi chu i hre lawk maithei’ a ti leh a,ka bu leh nghut.

‘Min bei nasa,engvang nge tih erawh ka hre lo’ ka ti hmuk.

‘Engvang nge chu kei pawn ka la hre lo,mahse tihchhiat che hi a tum ber niin alang.Engpawhnise,pakhat zawk hi a pawimawh mah maithei’ a ti leh a.

‘Tu nge ?” ka ti sup.Tui Bottle ka bana,in tumin ka hawng nghal zat.

‘I thianpa Ruata…’ ka tui in ka hak titih.

‘Eng maw?” ka tum aiin ka au ring mah.Awm ang lo lutuk.

‘Ruata,I best a ni tih ka lo hriaa.Mahse, thil thenkhatah hian Ruata tel ve na a awm’ a ti leh a.Ka melh nghek,mahse a mitmeng fim leh fing zetah chuan a hnaah a chian zia ka hmu thei.Rocky sawi kha a dik tih chawplehchilhin ka hrethiam nghal kuar bawk.

‘Ruata hi sumdawng a ni a,Mahse, kan thawkdun ngai lo.Ka tana tha lo tur phei chu a tih ka ring lo’ ka ti leh hluk.Titi phungleng satliah kan sawi tumin hna hi kan sawi zauh zauha,mahse min pui tur emawin ka la sawm ngai lo.Ka mamawh hek lo.Ani pawn min mamawh hek lo.

‘Wine Shop sawrkarin a ti tawp tih i hriaa’ a ti leh a.Nia,ka hria.Chuvang takin tunah sumdawnna thar a bei mek tih pawh ka hria.

‘Thil zawng zawng chu ka hre lo,mahse ka hna ka thawh reng rengin tu nge an mahni hnaih bertu tih hi ka en hmasa ber zela.Ka tisual mang lo.Tunah pawh hmelma tih vel ai chuan tu nge hnaih tu che tih ka ngaihven hmasaa.Ruata hi i best anih angin i sumdawnna pawh hre tura ngaih a ni a,Mihring rilru hi a chhe em ema.Kan thiantha berte pawh itsik a,lawmpui hleithei lo kan ni deuh vek.Chu vangin ka en hmasak ber a ni a.Tunah chuan ka la hre chiah lo nangin fimkhur thei la ka duh’ a ti leh duah.

‘Ka sumdawnna chungchangah tu mah ka share ngai lo.Hnathawka ka chhawrte erawh chuan engemawchen an hriat a tul avangin an hre ve chauh.Chuan,Ruata hian min tihchhiat duhna chhan tur a nei lo tih ka chiang’ ka ti leh bawl.

‘Nia,a dik maithei.Mahse, Showrooma i rinrawl pakhat hi Ruata Cousin niin ka lo hriaa,Hotela i Accountant hi Ruata chhungte niin ka lo hre bawka’ a ti leh zel.A sawi dik ve ve.Mahse, ani chuan min tichhe thei ngai hauh lo ang.

‘I sumdawnna chungchang i share emaw share lo emaw,ani hi chuan tamtak a hre dawn tih a chiang’ amah bawkin a ti leh a.

‘Fiahna i neih hunah kan sawidun leh dawn nia.Ka nupui u boral chungchang kha’ ka ti leh a.

‘Aw,kha thil kha..Ka la hre chiang thei lo a,Police lam lah hian an thil hriat hi an ui thei khawpa’ a ti a.Chhan awm miah loin a nui hek hek.

‘Kha kha ka ngaipawimawh hle ania’ ka ti hmuk.Nichin kha chuan engkim ka hre vek ang tih ka lo ngaihtuah kha ania,hriat vek chu sawi loh tul lo lutukin Ruata ringhlel turin min la tita zaw mah..

‘Nimin khan i nupui leh i thianpa chu an inhmu a’  tih pahin a phone a rawn lek hnaia.Ka en a,Ka insangmar nghal tawlh tawlh.Tluangpuii leh Ruata an thu duna,a darah Tluangpui’n a nghenga,Ruata’n a kuah thung. Sawifiah thiam loh khawpa thikna in min rawn tuam nghal hlup.Ni lo,thinrimna zawk pawh a ni mahna..

‘Hei hi nimina ka neih a ni a’ a ti leh a.

‘Khawi hmun nge?” ka ti hmuk.A sawia,thildang a sawi zawm mawlh mawlh.Mi tenawmpa mai mai chu.Niminah min rawn biaa.Party nei turin thawveng lutukin min rawn sawma.Nizanah lah tihpalh ni awm takin Zothani a sawm tel bawk.Tluangpuii nen an inhmu tih tawngkam khat mahin a sawi chhuak hek lo.Eng chu nge maw thup a tum tehchai ni??

‘I duh ang zawng zawng kha chu ka la nei lo nangin i lo fimkhur theih nan hmuh hmasak phawt che duh ka nia,ni rei vak loah chuan ka confirm thei mai in ka ring’ din chhuah pahin a ti a.Ka tho ve nghala,a thil rawn sawi ho hi ka tana tangkai lo pakhatmah a awm lo.

‘Khawiah nge i awm?” Phone a pick rualin ka ti nghal hmuk.

‘Ka chhuaka,ka haw dawn mek..Enge a?” thawveng fahranin a rawn ti lawng lawng.Ka kut ka humruh tlat thung.

‘Inhmu lawk ang’ ka ti leh hluk.

‘Nah..Ka hman lo sin’ a rawn ti a.

‘A rei lo vang’ ngaipawimawh duh loin ka ti leh nghut.

‘Rinawma te chungchang anih chuan…’

‘Ni lo…’ a sawi zawh hmain ka ti hmuk.

‘Hey,I va thutak ve a’ a rawn ti leh a.

‘Khawiah nge tunah i awm mek,ka lo kal ang’ ka ti leh sup.Min hnial a sawt loh zia ani aia hrechiang an awm lo.A awmna a rawn sawi ta nge nge.

‘A va pawimawh awm ve a’ min hmuh veleh a lo tinghala.Ka ngaihtuahna hre lo zetin a nui hak hak bawk.

‘ Pawimawh…’ ka ti hmuk.

‘Engthil nge?”

‘Niminah Tluangpui’n a rawn hmu che a’ ka ti sup.A hmel danglam zawk chu rei ni lo mah se ka hmu hman tho.

‘Hmu e’ a ti tawi tak.

‘Min hrilh lo,engvangin nge a rawn hmuh che?’ ka ti leh sup.

‘Lawk,nang hi? I nupui nen sawidun zawk teh u’ a ti leh hluk.

‘Sawipui dawn e,ka hriat duh zawk chu ka thianpa hian min phiarru ni a hriatna ka nei tlat’ ka ti leh a.Hnunglam ka ngheng a.Hahdam hmel zetin  chairah ka ban ka dah kang bawk.

‘Buaina a neia.Oh…Engvanga sawichhuak kher nge maw ka nih le?” mahni inthiam lo ni awm takin a ti hmuk.

‘Ka hre duh’ ka ti leh hmuk.A hmel chiai zetah chuan ka hriatthin Ruata ngei kha a ni a.Thil engemaw zep a nei tih ka hre thiam vek bawk.

In ka thlenin dar 7 a pel tawh.Buati a lo la awm.Tluangpuii awm loh vang a ni ngei ang.

‘I va haw har ve’ ka ti a.

‘Nia,Tluangpuii a awm si lo a..Bakah,a la tlai chhe hleinem’ a ti leh a.

‘Haw rawh,ka inbuaipui thei’ ka ti leh sup.

‘Akhai,angai lo.Ka haw tlai khat tawh em mai’ a ti leh tlat.

‘Anih chuan eitur min lo chhawpsak la,ka intifai zuai anga.Ka rawn ei dawn nia’ ka tita zawk.

Shower hnuaiah ka dinga,Ruata thusawi ka bengah a rawn ri nawn nghal zat.Sumdawnna chungchanga amah rinhlelh theihna erawh ka mi chhawr berin fimkhur tura min tih avangin ka sawichhuak lo.Ka mit ka chhing vang vang.

’ A unaupa i thahsak tih a hriat avangin rilru mangang lutukin a rawn kala,I tih anih ka rin loh thu ka lo hrilha,ani pawn i tih anih a ring bik lo..Mahse, a hrilhtu hian a hrilh chiang lutuka,phat ngaihna awm lo khawpin a chiang a ti thung.I thiantha ber ka ni a,I nupui i hmangaih zia leh i nupuiin a hmangaih zia che ka hria..Chuvangin ka tihtur ka ti a,I nupui min ngenna angin engmah ka sawi ta lo anih kha’

Bang ka chum nghek,tu nge hrilh ang? Engthil nge ka tih anih chianna chu? A u a dam emaw a thi emaw ka tan engmah a danglam lo..

Buati haw hnuah kawngkhar ka kalh fela,Tluangpuii biak ka duh,eng ang pawn a u thattuah min ngai mahse min Hmangaih tho..Ka calla,a tlang thei lo.Vawi li aia tam ka try hnuah pawh a tlang thei chuang lo.Zartei ka call leha,ani pawh a tlang thei chuang lo.Midang kal ve ka hre si lo,Ambie-a ka call ta ngawt.

‘Hello,u Sangkim…’ a pick veleh a rawn ti a.

‘I u te hi ka be tlang thei lo a,midang kal ve i hria em?” ka ti sup.

‘Khawiah nge an kala?” ni dawn tak.Tluangpui’n a hrilh kher lo ang tih ka lo ngaihtuah miah lo.Zartei te dil sah naah an kal tih ka hrilh a,Zartei te chhungkaw zinga mi tu emaw ber number a neih leh neih loh ka zawt nghal a.Vanneihthlak zetin Zartei u number a lo nei hlauh.A number min rawn thawn nghala,a la tlai lem lo bawka,biak a pawi ka ring lem lo.

Ka Calla,a pick dawn lo emaw ka tih hnuah a pick ta hram.Tu nge ka nih ka insawi a,min lo hre nghal mai.An inah vawikhat chaw kan ei tawh a,an chhungkua kha awmkhawm chi annih avangin an awm duah duaha,tuna ka biak pawh hi tu ber kha nge anih ka hre chiang lo thung.Ka biak duh chhan ka sawi a,a chek tlak ri ka hre thei.

‘Huan khu signal a chhe angrenga.Huanpu lah an chhungte dam lo vangin a lo haw daih bawk si.Midang kal ve an awm bawk si lo’ a rawn ti a.Min thawng deuh dawt.Dil sah turin an kal dawn a ti a.Mahse, engtin nge an pahnihin dil an sah theih ang? Dik lo a awm…Mahse, dik lo ber chu enge ni ang?

Tluangpuii ka call leha,a tlang ta hlauh..Ka thaw nghal huai bawk.

‘Hello…’ a rawn ti sap.

‘I tha em?” ka ti nghal tawng.Eng vanga zawt nge ka nih ka hre bik lo.

‘Aw, tha e..Ngatinge?” a ti leh sep.A awah dik lo a awm em tih ka ngaithlaa,ngaihbel luih ngial ka tum pawn engmah chutiang a awm lo.

‘Ka ngaihtuah che a,in pahnih chauhin in kal bawk si’ ka ti sup.A thaw nghal hak..

‘I hria maw?” mak tih hmel zetin a rawn ti a.

‘Um,ka call tlang thei lo che u a.Zartei u ka biaa’ ka ti leh sup.Ka ngaihtuah a ni tih tihlan hi engvanga hreh ta lo nge ka nih ka inhre lo.

‘Anih chu,Min ngaihtuah suh,kan tha reng’ a ti leh halh.

‘Um..Thil engemaw pangngai lo a awm chuan min rawn call nghal ang che’ ka ti leh a.

‘Aih..’

‘Min hnial suh..Khawngaihin…’ ka chapo na zawng zawng a bo vek.

‘Mahse,Zo..Engmah hlauhthawntur a awm hleinem,Zartei nen kan ni tih i hriat kha’ a ti leh a.

‘Ok..A hmun kha khawi lai tak nge kha(h)?” ka ti leh a.A rawn sawia,kal ve mai ka duh rum rum.

‘Min lo call ang che’ ka ti leh sup.Engmah hlauhthawntur awm lo ka hlauthawng niin ka hria,mahse ka rilru a nuam lawi si lo.Ka then suk.Hmeichhia ang mai…

Ka Phone riin min tiharha,ka thuchhuak nghal zawk.Ka ban vat,min rawn call tu ka en a.Ka contact list a mi a ni lo..Hrep taka,tun ang zanah lehnghal.Reject ka tuma,mahse ka ngaihtuah naah thildang a lo lang nghal zawk.Tluangpuii chungchang a ni thei…

‘Hello…’ ka ti sup.

‘Pu Sangkim,keimah…’ ka michhawrpa aw nem zet ka hriat rualin ka thaw hawk.Chhe lutuk…

‘Ngatinge number dang?”Tun ang hunah lehnghal’ ka aw a nem lo satliah pawh a ni lo.Mi a nileng lo tan chuan biak zui ka chak awm lo hle ang.

‘Number dang dang ka hmang thin,hei hi ka number pakhat..Ka lo call chan chu i nupui hi khawiah nge?” a rawn ti a.Ani leh ni lo ang takin inthlahrung a ang ve..Teh tlat a..

‘Ka nupui maw?” at hmel zetin ka ti hu.

‘Aw…A thiannu bulah a awm loh hram ka beisei’ a rawn ti a.

‘Maw?”! ka ti vak.

‘Zartei kha..Thil thenkhat hian amah a kawk a,a thian anih avangin a sawi engkim a pawm mai dawna’ a rawn ti leh a.Ka tek chhawk a ni ber.

‘Ka hre thiam lo’ ka ti mawl tawp.

‘Sawifiah a harsa,tunah chuan amah hi lo hrilhfiah phawt rawh’ a ti leh a.

‘Ok…’ ka phone ka Off a,Tluangpuii call tumin a number ka zawnga,mahse Ruata’n min rawn call ve chiah.

‘Ruat,kan kal angai’ ka ti mawl tawp.

‘Khawiah? I lo hre sa ami?” mak tih hmel lutukin a rawn ti ve thung.

‘Tluangpuii dinhmun a tha lo’ ka ti tuar..

‘Aw,chu chu..Nangmah hum a tum luatah thih hlauhawmah a ding mek’ ka bing mup thei.

‘Ka kal dawn,min rawn zui dawn em?” ka ti hmuk.

‘Aw,zui ang..A thah hma ngeiin kan chhan hman ang’ a ti leh a.

‘Tu in maw that ang?” ka ti leh tuar.Ka in control na ka hlauh vek tawh.

‘Tu nge ni ang? Ramdinsanga mawle’

Ramdinsanga..Zartei nen an lo tang dun reng a maw? Ni lo…Ni lo..,an kut hmawr pawha an lo khawih anih chuan ka chansawm vek duh ngei ang tih ka chiang.

Chapter- 29

Hmanhmawh lutukin Motor lam ka pana,ka tlanchhuah veleh Tluangpuii ka call nghala,a tlang thei lo..Hreptak hian..Rocky ka call leha,vawikhat chauh a ring hman tihin a pick ta hlauh.

‘Sangkim,ka rawn be dawn chiah che a’ Hello tih pawh awm loin a rawn ti a.Ka mengphawk nghek.

‘Tluangpuii hi Zartei te huanah a riaka,Zartei nen..Mahse,a him lo.Ka kal mek’ ka ti nghal hmuk.

‘Ok..Ka hria,chu vangin ka rawn be dawn chiah che.Keini pawn kan pan mek’ a rawn ti a.Ka thaw deuh huai.Keimah min hrilh hmain Rocky engkim a hrilh hmasa a ni ngei ang.

‘A tha.Kan inhmu dawn nia,Tluangpuii hi ka call tlang thei lo’ ka ti leh a.

‘Lo try char char rawh’

‘Ok…’

‘Lawk,Ruata kal ve turin i ti lo tiraw?” a rawn ti leh rih.

‘A lo kal mek…’

‘Ekhai!! Ruata pawh hi a tel ve’

‘Maw?!!” ka au vak..Vawiin khan Ruata ringhlel turin min ti a.Mahse, zanina min rawn biak khan amah rinhlelhna tur ka neih lam ka lo hre chang tawh lo.

‘Hahdam tum rawh,Ruata’n a rawn bia che anih pawhin tha takin chhang ang che.Amah kha kan man a tul ania’ a rawn ti leh a.Ka lu ka thing nawk,ka thil hriat te vang hian ka lu a keh mai dawn in ka hre hial bawk.

Ka theih tawpa chak in ka tlana,Tluangpuii ka call pah a.A tlang thei lo.Mahse, ka beidawng duh lo..An huan peng niawm tak ka tlanpela,ka back leh zat.Tluangpuii sawi dan nen khan a in an hmel viau.Ka tlan luta,Metal loh a ni a,mahse a fai that bakah kawng zawh ngun tihhriat takin a bel tha hle bawk.

Minute 15 vel ka tlan hnuah ka hma lama eng ka va hmu a,ka ding chawt.Motor thawm an lo hriat chuan an lo ralkhel anga,tum loh tawpin ka chan palh thei.Kawngsir deuhah Motor ka hunga,ke in ka pan pheia.Ka hnaih tawh viau emaw ka tih kha ke a kal takah chuan a lo la hla hrep.

Ka thleng tep tihin Ruata’n min rawn call a.Ka ding leh rih.

‘I thleng tawh em?” a rawn ti a.Enge a duh ang he Mi tenawm hian..

‘Aih,hei an huan peng ber ka hre lo a’ Pangngai thei ang berin ka ti a.

‘Ok,anih chuan kei hi an huan pengah ka awm meka.Ka lo nghak ang che’ a rawn ti a.Ka ner nawk,min nghak chhuak lul lo  ang.

‘Ok,a tha lawm..Min lo nghak rawh,ka lo thleng tep’ ka ngaihtuahna nena inpersan lutukin ka ti sup.

‘Eng em a thleng hman lo turah ngai ang,fimkhur la’ a rawn ti leha.Ka bulah awm se engtin nge ka chet ang ka ngaihtuah peih lo zawk.

Ka kal leh hmain Rocky-a ka call leh a,a pick vat.Huan pengah Ruata a awm tih ka hrilha,a thaw hawk ri ka hre thei.

‘A awm lo,tunah peng atangin kan rawn kal mek.I awmna atangin thlam ala hla em?” a rawn ti a.Ka insehruh nghek.

‘Ka hmu phak reng,peng atang khan minute 15 vel lo tlan leh ula..Ka Motor in hmuh na atang khan ke in rawn pan rawh u’ ka ti sup.

‘Aw le,lawk..Min lo nghak zawk rawh,kan rei lo vang.Bike-in alawm kan lo kal,kan hnungah kan thiante Motor in min zui a’ a rawn ti leh mawlh mawlh.

‘Ni lo,ka nghah leh che u chuan thil tha lo a thleng hman thei’ ka ti nghut.

‘Aih,thleng lo ang.Ka ngen takzet che,engmah lo ti suh.Tluangpuii tan a him lo zawk ang’ a rawn ti leha.Ka kut ka humruh ngawt ngawt.

Tihtheih ka nei lo,nghah a tul.Sana ka en sek.Rocky-a leh a thianpa,Pa te leh fip zet an rawn thlenga,ka thawveng deuh huai..Sana ka en leh zawka,minute 10 vel bak a ni lo.Mahse, darkar tam ka nghak hmanin ka inhre thung.

Thawm nei lo thei ang berin thlam kan pana,thlam kawt kan thlen rualin Hmeichhe aw ka hriaa.Enge a sawi erawh ka hre thei lo.Hmanhmawh lutukin thlam Verandaah lawnkai tumin ka pana,mahse Rocky-an min rawn kal khalh vat.Pistol a hum a,kah mai a inring tih a chiang.

Kawngkhar a tlawh hawng thuaia,ka zuang lut nghal zawk.Min beisei lo tih hriat lutukin an rawn hawi rual thawt.Rocky-an Ruata huan pengah a awm lo a tih kha a chhanna ka hmu nghal chiah bawk.

‘Che suh u.Anih loh chuan ka kap ang che u’ Rocky-a thianpa zawkin a ti fiak thak.Tluangpuii ka zawnga,ka hmu tlat lo..Ramdinsanga pawh ka hmu chuang lo.

‘Khawnge a awm?” Ruata en pahin ka ti thawt.

‘Thianpa,I tlai…A tawp hman vek tawh’ ngeiawm lutukin a nui nghek.

‘Khawiah nge a awm?” ka ti leh a.Ka aw a ring tawh lo. Ka pan hnai nghala,Ruata piaha Zartei mangan hmel zeta ding tlawn at mai chu ka melh zawk.Min rawn en ve zawka,mahse rang lutukin hnuai lam a melh leh vat.

‘Khawiah nge?” ka ti leh a.A hmela hmuhsitna leh deuhsawhna lang chu hmuh hmaih theih a ni lo.

‘A thi tawh…’

Ka kut a phe zawka,a ri nghal chawrh.Ka insum theihna a bo a,insum a tulna ka hre hek lo. A rawn hawi chhuaka..’I duhtawkin min khawih rawh,mahse i chhan hman chuang lovang’ a ti leh a. A mitsen rum maiah chuan huatna ka hmu chiang ngang mai bawk.Ka rilru ka thlak ta zawk.

Zartei ka pan pheia,min en ngam loin hnuai lam a bih tlat.

‘Khawiah nge?” ka ti dam thlup.Min rawn en a,Ruata a en leh a.

‘I ka kha chip hmak rawh,anih loh chuan i tan a pawi zia i hriat kha’ Ruata’n a rawn ti thawt.A sawi zawh rualin a ri no chawk.Ka hawi pheia,Ruata chhuata tlu thla hnawk chu ka va hmu a.Rocky-a thianpa zawkin min rawn en pahin a Pistol a lekkang zauh.A pistolin a chhu anih hmel.

‘Lo muhil lawk rawhse,chuan kan Thiani khan a sawi mai ang ‘ a ti awlsam et.

‘Sawi rawh le…’ ka ti leh hmuk..A hmai dang lap maiah chuan nunna nei lo a ang zawk.Ka rilru hmanhmawh nen thin nawk nawk ka chak ber.

‘Sawi rawh’ ka ti leh tuar.A phu zawk bawk.

‘Eng lo…Ih…khu tah…’ a sawi hleithei lo.

‘Khawi khu tah?” ka ti leh thawt.A phu leh dawrh.Mipa pathumin hmeichhe pakhat,engmah hmanraw nei lo lehnghal kan vau bet angin a ngaihtheih ang chu.Mahse, enge ka tih ang? Tluangpuii nunna aia pawimawh engmah a awm lo.

‘Dilah….’

Engmah ka ngaihtuah hman lo,ka virchhuak zawk.Kawngka bula mipakhat lo ding ka su her lawp.Tu nge anih ka hre lo..Dil lam panin ka tlana,ka hnungah tu emaw a rawn tlan ve a.Light eng tha zet a keng bawk..

Dil kamah ka dinga,che awm loin a tling khat put ringawt,khawiah nge a awm ang? Ka hawikuala..Dil chhak lam kila kawr niawm tak lang chu ka han hmu a,ka tlanchho a,engmah ngaihtuah loin ka zuang lut nghal pawp..Ka ring sual lo,sam ka zuk khawih fuha.Ka thama,ka pawtkanga..Mahse, a sak tlat..Ka dakchhuaka,Boruak duhthawh zetin ka hip luta,ka liluh leha.A ngal rekah hruiin lung an lo thlunga..Hleuhchhuahpui ngaihna a awm lo..

Dil kamah ka pawmchhuaka,a zawi vek..A hnar bulah ka kut ka daha,engmah a awm lo.

‘Thianpa.Kan nau hian tirawhse..Ani hi helamah chuan kan chhuanvawr anih hi’ ka Dara rawn vawn pahin Rockya’n a rawn ti a.Hnial ai chuan tihtir mai a finthlak zawk..Ka tawlhsawna,ka nunah a vawikhat nan hlauhthawnna avangin ka khur ve ta hial bawk….

Reife a beih hnuah a phu deuh zawka,a rawn khuh a.A ka leh a hnar atangin tui a rawn chhuak nghal bawrh bawrh..Ka thu hniam rawk rawka,ka pawmkanga,mahse nunna nei lo niawm takin a zawi veka,a taksa a vawt mai pawh ni loin a hit vek bawk.

‘Tuemaw khan puan rawn la rawh u’Rocky-an a ti a.Engmah ka ngaihtuah thei lo,ka kuahbet a.Ka taksa lumnain a tihziawm deuh ka beisei bawka.Reivak loah Puan an rawn laa.Khawi atanga an rawn lak nge ka hre lo.Mahse, a thawmhnaw hak huh vek nena tuam ai chuan ruakin tuam ila a lum hma zawk ang.Min din hliaha,a thawmhnaw huh ka phelhsak veka.Puan hlangin ka tuama.Ka Jacket ka hlip ve bawk.

Rocky-an ka Car a khalha,A hnungah Tluangpuii ka thutpui thung.Kal pahin Rocky-an tuemaw a call a.Damdawiin lam lo ready turin a hrilha.Tu nge anih ka ngaihven lo.Tu pawh niin eng Damdawiin pawh nirawhse.Tluangpuii damna tur anih chuan a tawk.

‘Kan tlai teuh ngei mai’ Rocky-an a ti sup.Chhang loin ka bu nghut.

‘Tlaiah khan i nau thar khan min rawn hmu a.Ruata chungchang a rawn sawia.Ka lo hamhaih letling zawk,mahse ka beisei aia hmain chhanna ka hmu ta thung’ a ti leh boh.

‘Ramdinsanga hi man a ni tawh em?” ka ti sup.

‘Aih,kan man lo vang’

‘Engmaw? An inthurual vek sia’ ka ti hmuk.

‘Ni lo,Ramdinsanga a tel vena engmah kan la hmu tlat lo.Tunah rih chuan Sangzuala kan la tawha,an Pathum bak chu nakinah an inpuanna atangin a hriatbelh theih chauh ang’ a ti leh a.

‘Anih chuan Ruata leh Zartei ruahmanna vek a ni maw? Awih a har hle mai’ ka ti leh a.Ka hmai ka tuai pawk bawk.

‘Ni e,keipawh hian ka lo hmuhhmaih ve tho mai.Rin chhin ngaihna reng reng ka hre lo zawk.Hei hi Aruata khan chiang takin a hriaa.Mahse,a hria tih an hriat rualin an dahtha ta mai anih hmel’ a ti leh a.Ka bu leh nghut.

‘Ruata chungchang hi newsah emaw khawiahmah puanzar ni rih lo se ka duh.A harsa angem?” ka ti leh a.A chal a ti chuar tap.

‘Maithei,a Case hi a nep dawn miah lo.Tuahthah tuma puhna hi a langsar ber chu nimahse Aruata kha a that tih kan inpuantir angai hmasa.Zartei hi engvanga lo inrawlh nge tihte pawh.Theihtawp ka lo chhuah anga,a hun hmaa puanzar a ni lo ang’ a ti leh a. Ka bu lehnghut.A ti ngei ang tih ka chiang.

‘Ka kutah a awm a,min ring tawp turin ka duh che.Bakah tunah hian Tluangpuii hian a mamawh dawn che a’ ati leha,a nui a.Ka then ve suk.Ni e,min mamawh..A harh huntur engmah ala hriattheih loh.

ICUah a awma,a bulah awm theih a ni lo.Mahse, ka michhawr pa kha a tangkai zet mai.Damdawiin lam a lo be fel vek.Rinawma a tangkai lehpek bawk.Cabin kan mamawh tih ka hrilh a,rei nghah ngai loin min hmuhsak a.Ka nu leh ka u an rawn thleng tawha,Tluangpuii Nutei leh Ambie-a an awm ve chawt bawk.Nihnih pumhlum harh mumal nei loa a mut chawrh chawrh hnuah a harh ta hram.ICU atangin Cabinah an sawn lut ta bawk..

‘A  taksa chak lo lutuk hi tuia a awmrei vang ni loin thildang vanga thleng ania.Ka sawi awmzia chu a thisenah Damdawi chikhat kan hmu a’ Rinawma’n a ti a.Min thawng dawt thei.

‘Damdawi maw?” ka ti ro hulh.

‘Aw,taksa che thei loin a siama,rilru harh vek siin an che thei lo thin.Tuia a tlak hma lawka an eitir anih hmela.Tuiah khan ama duhthua lut a ni dawn lo a,mahse a taksa che thei lova a khawng vek avangin awlsam takin an paih thei ang.A keah lung an tawn bet vang khan a pil nghal tihna a ni a’ a ti leh duah.

‘Awih harsa ka la ti cheu mai’ ka ti sup.

‘Kei pawh.Mahse,Party naa Ivy leh Zothani a lo sawm kha atir khan mak tih nachang ka hre lo.Tunah chuan engkim a chiang vek tawha’ a ti leh a.Nia,kha kha tihpalh thil a ni lo.Tum lawk a nei.Tluangpuii khan engkim a hmu anga,a hre vek bawk ang.Mahse,engvanga ti nge anih ang?? Amah ka hmuh hunah tha takin ka zawt thei angem ka hre lo..

Khum che datah ka thu mar nghal zawt,Tluangpuii ka en vat.Harsa tihhmel zetin thawh a lo tum mek chu niin..Min kaitho thei renga.Luhlul leh lutuk mai.

‘Mu la..I mamawh sawi mai rawh,ka lo la ang’ tih pahin ka vuana,min rawn en a.A hmai la dang deuh mah se a mitmeng lian kel kawl leh nalh zetah chuan a pangngai tan tawh tih a lang thei thung.

‘Toiletah ka kal duh…’ a ti sap.

A tho tur ka puia,toilet lamah ka kuah pheia,kal thei lo a ni lo.Mahse, a taksaa damdawi hnathawh khan a nerve lam a khawih tel avangin hun engemawchen chu kal a harsat ang tih Rinawma khan a sawi a.A tluk thut pawha veng reng turin ka awm ang tih ka hria.

‘Lo mu ve la…’ a puansin ka siamthat sak laiin a tisep.

‘Aih,khum a te em mai,I tla palh ang’ ka ti sup.A nui a….

‘Ka tla lo vang…’ a ti leh sap.Hnial loin khumah ka lawn ve a,zangthalin ka mu a,ka darah a lu a rawn nghata.Ka awmah a hmai a phum nghal kak bawk.Engmah sawi loin a samah ka chul a,a thih mai hlaua ka manganna zawng zawng kha tunah chuan a reh tan tawha,tiang khawpa hlauhthawnna kha ka nunah ka la tawng ngai lo.

‘Zo…’ a muhil tawh emaw ka tih hnuah a rawn tichhuak sep.

‘Um…’

‘Titi ila..’

‘Aih, muhil zawk rawh.Naktukah i chhuak thei dawn tih Rinawma khan a sawia,Inah kan titi zawk dawn nia.Tunah chuan mut tam i mamawh’ ka ti duah.

‘Mahse, tunah sawi ka duh alawm’ luhlul zetin a ti leh sap.

‘Ok..A tha lawm’ ka ti sup.

‘I la thinrim em?” a ti leh a.A che sat sat,a rawn hawichhuaka,hetiang khawpa hmeltha hian ka la hmu ngai lo.

‘Aw….’ Ka ti nghut.

‘Sorry…Diktak chuan engmah ka hrilh thei si lo che a,bakah engtin nge khatiang khan ka rin theih che ka hre lo’ a sawi tawp lam a zuih ral titih..

‘A pawi lo,I tan a harsat tur zia ka hria alawm..’ ka ti sup.

‘I thinrim tawh lo tihna mi?” a ti leh a,a mit nalh zetin min melh kiau bawk.

‘Aw…Bakah engmah thinrimnatur ka nei hleinem’ ka ti sup.Ka kun hniama,a chalah ka fawp vang vang bawk.Ka awmah a kut a rawn daha.

‘Tuia ka pil khan ka rilru a harh vek a,ka ruang i hmuh hunah chuan i nui dawn lo tih ka hria,ka tel loin engtin nge i nun i hman ang tih ka ngaihtuaha..’

‘Sawi tawh suh…I tel lo a nun hman hi ka tum ngai reng reng lo,engtikahmah ka tum lo vang’ ka ti sup.

‘Ka hria,ka Hmangaihna che aia nasain min hmangaih tih pawh ka hria..Mahse,ka duh vanga khatianga awm ka ni lo’ a ti leh a.

‘Ka hria alawm..Kan thiam lo ve ve,kan inrintawn lohna remchanga hmangin kan thiantha berte ve vein min buma’ ka ti hmuk..Ruata hming hi pangngai taka sawichhuah theih ka inring rih lo..

‘Kan inah ka riak dawn ka tih zan khan ka mu miah lo,ka lo hawin i lo la mu a..I tih anih ka ring lo tih kha hrilh che ka tuma,mahse kan inbiak khan ka chungah i lawm lo tih ka hriaa..Sawi ka tum pawh ka thulh leh ’ a ti leh sep.

‘Min ringtur i ni asin’ ka ti sup.Ka tum aiin ka aw a chang lam hret bawk.

‘Ka hria alawm,mahse khang zawng zawng kha min hrilhtu chu Zartei a ni a.Ka thiantha ber a ni a,mak tih loh a har asin..Voice Reord engkim a neih theih a rinthu a sawi leh a.Ka mangang lutukin Ruata ka pana,ani pawn i tih anih a rin loh thu bawk a lo sawi leh a.Nangmah ring tawp turin min ti bawka.Nia,ka rilru ka siam fel nghal hmiah,Nang hian tumah i that thei lo ang tih ka ngaihtuaha,ka rinchhiat lutuk che avangin ka inthiam lo bawka.Zanah khan Zartei’n min rawn biaa..Voice Record  kha min hmuhsaka,mahse a neitu khan pawisa a phut tih a sawia.I tih anih ka rin loh thu ka lo hrilha,mahse nangman tana mualphona thlen thei thil anih vangin lak ngei ngei ka duha.Pawisa ka kawl laiin a daih loh avangin…Eng lo,ih…’ sawi zawm loin a ngawi leh daih.

‘Chuan…..’ ka ti sup..

‘Kan In lei letna tur atana ka Ac a pawisa i dah kha…Ih,thinrim suh..Ka hman loh chuan adang ka nei lo.Nangmah chhan che ka duh a’  ka thaw hawk..Dimtein a khabeah ka dawma,ka kuai daka..A mit hnawng chap maiah chuan a mittui a tla tih ka hrethei….

‘Ka lawm e,chuan Ka hmangaih bawk che.Mahse, min chhan i duh vangin engmah lo ti tawh suh.I himna aia ngaihpawimawh ka nei lo.Anih loh chuan chhuak thei loin ka phuar bet tawh ang che’ ka ti hmuk.A kut a rawn lekkanga,ka khabeah a rawn khawih de de a.A mitnalh leh zahawm zetah chuan hlimna mai bakah Hmangaihna pawh ka hmu tel thei..

‘Ka ti tawh lo vang,ka nunna aiin ka Hmangaih zawk che a,tunah pawh khan thi ta ila nangmah i him chuan pawi ka ti lo..Ka inchhir miah lo ang…’

‘Shhh…A tawk..I tel lo nun ka hmang anih chuan chu aia hremna nasa zawk a awm lo..Dam ang che’

‘Nangpawh..Hmeithai nih ka duh lo,chuan keimah mai ni loin kan naute hian Pa a mamawh dawn a’

‘Maw?!”

‘Aw,Naute…Vawiin khan Rinawma khan hrilh che a tuma,mahse keiman hrilh che ka duha..Pathian thil rel dan hi a mak asin,khati khawpa ka taksaah damdawiin hna a thawk chung khan Naute erawh a tla lo….’ A tah nuih a…Ka hamhaih vek..

‘Naute..Pa ka ni dawn tihna maw?” ka ti lai rut..Ka khabe ruh a chul kual zai zaia.A then leh sak.

‘Aw…Ka fel loh zia ka ngaihtuaha,mahse chunglam hian min Hmangaih bik asin..Damdawi mum khat lek pawn nau a titla thina,mahse kei chu a tla ve lo..’a ti leh tiau.

‘Engtikah nge i hriat?” ka titham tuak.

‘Ka u i that tih ka hriat hma ni khan,hlim em emin hrilh che ka tuma.Mahse,ka hlimna chhilhbo vek khawpa thu lian tham khan min rawn denga…Mahse, engtin nge ka lo rintheih? Min ngaidam rawh,mahni pasal pawh ring zo lo..’ Engmah ka sawi zawmtir thei lo.Ka kuna,a hmui vawtthlerah ka zuk fawpa.A ngik faih,min rawn chhang let ve nghal zat..

Tunah chuan Inah kan awm ta,Tluangpuii a rai tih ka nu leh ka u kan hrilh tawha,a chhungte kan hrilh bawk.Hmanni lawka manganna kha lawmna in a thlaka,kan ri chel chul a ni ber.Tluangpuii ka en ning thei lo.Min rin loh vanga ka thinrim chet dan kha ka ngaihtuahchhuah apiangin ka inthiam lo zual ziah thung.Rin turin ka awm bik lo va,thlem ai chuan hlatsan ka thlang zawk anih kha….

Ka Dawhkana Intercom riah ka phu zawk..Ka ban nghal vut.

‘’Sir, be duh che an awma’ Julie-in a rawn ti a.

‘Rawn zawm la’ ka ti nghut. A ri rak raka,hahdam zetin ka chair hnunglam ka ngheng ur ur bawk.

‘Hello…’ Hmeichhe aw hniam lam hian a rawn ti a.

‘Tu nge aw?” ka ti hmuk.

‘Diktei ka nia,Zartei nau kha…’ a rawn titham chal mai.

‘Enge nita?” ka ti hmuk. Zartei leh Ruata chetdan engkim kha a theih ang anga thup a ni a,mahse Family tan hriat loh theih a ni lo.

‘I ta tur thil ka kawla’ tim deuh ni awm takin a rawn ti leh a.

‘Eng thil?” ka ti leh sup.

‘Ka u min pek ania,I tana tangkai tur a ti a’ a aw a zawi hle bawk.

‘Ka rawn lamtir dawn nia’ ka ti hmuk.

‘Aw le,Inah ka awma.In lo thlen hunah min lo call mai dawn nia’ a rawn ti leh a.

‘Ok…’

Engthil nge anih ang ngaihdan ka siamthiam lo,Ruata nen Jailah an awm meka,Sangzuala erawh Bail phalsak anih avangin Bailin a chhuak mek thung.Zartei te Inah Driver ka tira,darkar khat dawn a thang hnuah a rawn let ta chauh.

Envelope chhah tha lenglawng leh Note bu a ni a.Envelope ka hawnga,a chhungah thlalak chi hrang hrang a lo awm teuh,Pendrive pahnih a awm tel bawk.Thlalak ho ka en a,Tluangpuii leh Sangzuala thlalak deuh vek.Kha video tenawm lutuk an siam zana mi kha a ni tih ka hre thei..Anih chuan kha thil kha Zartei tih hi maw lo ni?! Kha thil thlen dan ngaihtuah tura ka tih khan Tluangpuii khan Zartei a lo ringhlel ru reng maithei,mahse a thiatha ber anih avangin chutiang titurin a ring phal lo thung anga. A sawi lo pawh a ni mahna.

Pendrive ka vit luta,ka Open a.Ka mengphar awk thei,engkim mai a lang fiah fai vel vek.Ruata hian engtin nge tiang khawp hian min lo kher theih ka hrethiam pha lo.Tluangpuii u Accident zana min rawn hrilhtu kha Ruata a ni a,Tluangpuii chanchin engpawh kei aiin a hre hmasa zat zat emaw tihtur a ni thin.A lo kal chang khan ka bulah awm loin Tluangpuii a thutchilh fo va,mahse kan inkawp tak hnuah erawh a zia a thlak ta chauh anih kha..

Engmah sawi loin Jail lam ka pana,amah hmuh ka duh..An rawn hruai chhuaka,a hmuihmul a met lo va,a sam a ther huang bawk.Ni tam ala liam lo,mahse a lang danglam hman vek thung.A rawn kal pheia,a kun deuh chal..

‘Enge i duh?” a ti zawi raih,min en loin hnuai lam a bih tlat bawk.

‘Engvangin nge hetiang hi i tih?’ pangngai thei ang berin ka ti sup.Min chhan tum awmin a awm lo….

‘Engkim i nei a,chu chu engpawhnise ka best i ni a’ ka ti leh sup.Muangchangin a rawn hawichhuaka,a mita huatna langchhuak chu hmuhhmaih chi a ni lo..

‘Ka hua che,engkim min laksak vangin…’ a ti chang fuk..

‘Ka laksak che maw?! “ Ka ti hmuk.

‘Sammy hnenah a Company tlachhe tur kha enkawl ka dila,mahse nangmah zawk a thlang che a.Ka la ngaithiam thei.Boom-a kha sumdawnna lama minpui turin ka be leha,mahse nangmah be tur chein min ti leh a.Em em ka ti ve tawh.Mahse, ka la ngawi thei..A pawimawh ber chu Tluangpuii min chhuhsak kha…’ a aw a ring lo,mahse a chiang..Ka awih thei lo zawk….

‘Avai khan ka tihvek anih kha,Tluangpuii hnenah a u i thahsak tih pawh kha Zartei ka hrilhtir anih kha,avai khan ka tihvek..I luhlul lutuk vangin ka kawng a awlsam sawta,I best ka la nizui bawka’ a nui a..Ka kut ka humruh tlat thung..

‘Aruata pawh kha..Engkim hrilh che a tum avangin..Mahse, engtin nge i fiah tak ang? Fiahna zawng zawng halral vek a ni tawh  miaua ’ rawn kun hnaih pahin a ti leh a.A hmela hnehtu intihna lang chu ka en a.Ka nui suk.

Gate pawnah ka ding a,thlanglam ram lang ruih chu ka thlira,ka kamiz kilhna ka khawih zauh,ka nui suk…Ni e,tunah chuan engkim ama sawi ngei ka nei ta a.Talchhuah pawh tum se talchhuah ngaihna a awm tawh lo vang…

Chapter- 30(Last Chapter)

‘Vawiin chu min kalpui hman loh pawn a pawi lo ania aw’ ka insiam mawlh mawlh laiin Tluangpui’n a ti a.

‘Hman ka tum ang,Lunch inah ka rawn ei anga,kan kal dawn nia’ ka ti a.Ka kamiz ka kilh pah mawlh mawlh.

‘Um,mahse hun i neih loh chuan tum lui duh suh,in check-up satliah ania.Keimah pawn ka kal thei reng ’ a ti leh a.Ka chhang lo,ka inhera,ka kawrnghawng ka kawk zauh.A rawn kal hnaia,ka neck-tie a kenga.

‘Khawi,keiman ka lo ti ang’ tih pahin laksak ka tuma.A thle bak.Min rawn din hnaih nghala,zaizirin kun turin min tinghal zat.Ka thle buk.

‘Kun mai mai teh..’ a ti hlak.Ka then suk.Ka kuna,ka neck-tie min awrhtira,dingdihlip ak ak chungin a siamrema,a kawngah ka vuana.A dul a puar lian tawha,thlahnih chauhin a neih hun a dang tawh.

‘I tihtheih loh chuan titur dang ka zawng mai dawna’ ka mit ka siai zauh.

‘Yes,zawng la…’ a ti nghat.

‘Tak tak?”

‘Um,mahse min hmu tawh ngai lo vang’ a ti leh hlak.Ka nuichhuak hawk,a hnar te lam deuh,nalh zetah ka piai zauh..A ner nak thung.

‘Tum chhin la,khawiah mah ka hmuh lohtura bihrukna hmun a awm lo’ ka ti leh sup.Ka pawt hnaia,a dulin min rawn do a,a nui nghal hak mai.A nui ri tluka hriat nuam hi ka bengah a awm theiin ka ring lo hial thin..Sumdawnna thilah ka nui fo va,mahse chhungril atanga nui ni loin midang tihlawm natur a ni thina,Tluangpuii nui hi chu chutiang a ni ve lo,a taka..Hlim taka nuih dan min zirtir ka ti lo thei lo.

‘Kal tawh rawh le..’ a ti sap.

‘Aih,vawiin chu ka chawl anga..Chuan,nizana mi kha tihzawm leh ka duha’ ka ti sup.A mawng er nalh zetah ka tham zauh..

‘A hrehawm thin ang tiraw?” a ti sap..

‘Eng chu maw?”

‘I duh ang ka pe thei lo che a..’

‘Ahhh,min pe tih i hria.Mahse,sex hi nupa inzawmna ber a ni lo.Ka bula i mut a,I taksa ka sik ringawt pawh hi ka lawm tawk’ ka ti leh sup.A dul lian tial tial avangin Hmangaihna kan chen khat tial tiala,a nalh lo tual tual bawk.Mahse, ka mitah chuan engmah a la danglam lo a,min hipna ala ngai reng.

‘Um,mahse ka khawngaih thin che a’ a ti leh sap.Ka samah a rawn khawiha,a hmai vun no nalh zet chu ka en a.Ka kutzungpuiin ka tuai hauh hauh bawk.Hmeichhe tamtak angin Make-up a uar ve lo va,hmang lo tawp erawh a ni lo…Amahah hian engmah a lem a awm lo ti ila a dik ber ang.

‘Kal tawh rawh’ a ti leha.A kawng ka kuahna min lakthlak sak tumin a rawn vuana.Mahse, ka kuah nghet sauh.Ka kuna ka tihtum hriain a mit a chhing nghal chial.A hmui nem leh fawh nuam zet ka zuk si a.Ka fawp nghal vang vang.

Hotel ka kal hmasaa,hna ka en thuak thuaka.Thla tawp dawn anih avangin buai lutuk natur a awm lo.Kan buai zual hun hi thlathar hlim atanga ni 10 vel thleng a ni thina.Kan Accountant kha Ruata nau a ni a.Thilsual liantham engmah tih a nei lo chungin Account zawng zawng Tluangpui’n a khawih ta vek.Ka hnial buai duh lo law law,ani aia hna thiam an awm hek lo.A neitunu a ni a,a him em em bawk ang.Kan Accountant erawh kan ban chuang lo a,mahse Tluangpuii kal theih lohna hmuna kaltur atan leh Office thutchilh atan bak ka hmang ta lo.

Showroom ka pan laiin Rinawma’n min rawn calla.Andy-a lo haw thu leh naktuk zana Dinner ei chhuah an rawt tih min rawn hrilh a.

‘Ok,a tha alawm’ hnial loin ka ti a.Ruata chet dan maksak lutuk kha tuman kan sawichhuak ngai tawh lo..Kan vaiin na takin min thawng a,atuartu ka nih vang anih rualin ka thiantha ber anih tlat avangin min khawih na zual bik lo thei lo.Zomawia leh Rinawma hi inkawm zingah pawh inkawm bik anni a.Chutiang bawkin kei leh Ruata kan inkawmbik a.Andy erawh Mizoramah a awm tam lo bawka,a lo haw chang pawn kawmbik a nei lo.

‘Inneih inkhawm kha Dar engzatah nge ?” Lalnuna hnenah ka ti a.

‘Dar 1 ’ a ti a.

‘Ok,anih chuan kan kal hmain Malsawma leh Arini ko la,reilote inbe lawk ang u’ ka ti a.A bu nghat.

Staff thar lakbelh leh Servicing kan tihna tur building kan sak mek chungchang sawi ngai a awm avangin kan sawi ho a.Arini hi kan Accountant a ni a.Malsawma erawh Manager a ni thung.A hma khan Ruata Cousin khan min enkawl sak thina,mahse ani pawh kan boruak vel avang khan nuam a ti lo a.Engmah a tisual lo chungin a bang ta tho.Hna a thiam zia ka hriaa,ui pawh ka ui.Mahse, bang duh na na  na chu ui beh viau tul ka ti lem lo.A ban hnuah Malsawma hi a rawn lut veleha,ka ni fapa a ni a,ka ni diktak ni lo mah se ka pa Cousin te zinga ka ngainat ber leh ka ni tak tak anga ka en a ni a.Malsawma hi ala naupang deuh nangin hna a zir peiha,Family zing a chhiar tel theih a lo ni bawk nen thanhnem angaia,a kutah engkim a dah ngam titih tawh.Mahse, ka bul tan atanga tun thlengin midang kuta innghah hi ka tum ngai lo..Ka ta a ni a,keiman engkim hriat ve vek ka duh.

Darkhatah kan Staff zinga pakhatin nupui a nei dawna,chu mi nang hmantur chuan kan kal ta diak.Inneih inkhawm zawh veleh in lam ka pan nghala,Tluangpuii hnenah, inah Lunch ka ei dawn ka tih avangin min lo nghak ngei ngei dawn tih ka chiang.

‘Enge maw i tih thin le?” ka ti hmuk.Min rawn en a,a thil chawi lai a daha,min tlawn tumin a nui var var bawk.

‘Hei hi, helamah hian hun ka tuma,a rit lo..’ a tinghal zat.

‘Vawi engzat nge ka sawi tawh a? ‘ ka ti hmuk.A thil dahsawn tumna lam a sawiah a bawm ken ka dahsaka,chet a harsat tawh mai bakah indim angaia,mahse ka awm loh laiin engkim a ti ve vek ziah tih ka hria.Ka sawisel ngun hle chungin awmzia a awm tak tak chuang lo.

Buati leh kan nula thar an rawn chhuak ve a,Kan nula thar hi lang tura kan lak a ni a.Mahse, a awmna te nen an inmil vak lo tih Tluangpuii hnenah a lo sawia.Awmchilh turin kan ti a.Inah thla hnih lai a rawn awm ve tawh.

‘Buati leh Sangtei ka tihtir vek alawm.Inchungah an dahchhoh laiin ka lo ti ve mai mai anih kha’ ka thawmhnaw ka phelh mawlh mawlh laiin a ti a.Ka chhang lo,ka thinrim viau hek lo.Mahse, ka thu a awih lo ziah hi ka lawm lo,engemaw thleng palh ta se..

‘Ka ti tak tak…’

‘A tha lawm’ ka ti nghut.

‘Sorry….’ Ka hnung lam atangin ka kawngah a rawn kuaha,a dulin min ro do a.Ka thiltihlai ka tawp chawt.

‘Min ngaihtuah tih ka hria alawm,mahse ka ning ve thina’ a ti leh sap.Ka darah a rawn fawp nghal dan dan bawk.

‘A pawilo..’ ka ti leh sup.

‘Inbual ila….’ a ti leh sep.

‘Tunah maw?” ka ti nghut..

‘Um,tunah..Chuan,kan inbual zawhah thil kan ei anga’ a ti leh a. Ka hnial lo..

Bath-tub lian tha zetah kan inchiah duna,min rawn nghenga,hnung lam atangin ka kuaha.Ka kut lehlamin a dul ka dawma,lehlamin a hnute ka khal thung..Ka darah a lu a nghata,a thawk danah hrehawm a ti lo tih ka hria..A nghawng sir lamah ka fawpa,a hnute hmur bial leh kawh ve lah chu ka kutzungtangin ka chep hruala.A rum nghal hak..Ka kut ka tawlhthlak tira,a mal karah ka zena…A  bengkawmah ka fawp lehnghal dun dun bawk..

‘Zo….’

‘Kan tithei em?” ka ti ve thung.Nizanah ka chetpui a,tunah kan ti leh anih chuan a taksaah harsatna a neih ka hlau.

‘Aw…Ka ring,kan thei ang’ a ti bah nak..

‘Min khawngaih suh’ ka ti leh sup..

‘Aih,khawngaih vang a ni lo.Ka mamawh che a’ a ti leh a….

‘Kei pawh..Mahse, min ngaihtuah vanga harsatna i neih ka duh lo..’ ka ti leh talh..A insiamrem sat sata,min hmachhawn zawngin a rawn thu a,engmah sawi loin amah zawkin min rawn zawma.Ka mitah tak a en rana,a nuam ti hmel chu hmuhnawm ti zetin ka thlir ve thung

Dimtein ka che a,a rum hawk..Ka darah a nema,a mit a chhinga.A hmui hnuai lam a pet tlat,ka chet zawngin a hnute mum nalh zet chu a che tel ve zel bawk…

Dar li rik dawnah In atangin kan chhuak ta chauh,a sam a chhipah a bawk khawma.Kawrfual var,thawl hnakin a haa..Chapal sinte a kaih  a bun bawk..A inhmeh vel vek..A kut a vung deuha,kan inneih zungbun bun loin thiah a awrh tel a.Kan inneih hlim atangin vawikhatmah ka la phelh miah lo thung.

‘Tluangpui…’ Mipa awin a rawn ti a.Ka hawi vut.Nau pawm chungin Mipa pakhat a lo dinga,Ka hai thelh.Mahse, Hotela Cook anga rawn thawk,Zira kha a ni tih ka hre chhuak leh mai thung.

‘In tha maw? ‘ Tlaungpui’n a ti a.A bula hmeichhe ding chu ka en a.A nupui kha a ni.

‘Aw,tha…Nang ni zawk?” min rawn en a.Ka bu nghut.

Tluangpuii bula thutna awlah an thu ve a.Tluangpuii leh a nupui inbiak danah an inhre tha tih a chiang.Nia,Ramdinsanga laka talawk ve ve anni a.Harsatna in ang annih tlat avangin an inkawmngeih lo thei lo.

In kan thlen in dar 7 a ri tep.Tluangpuii pu te kan tlawh leh avanga tlai kan ni bawk. Tluangpuii pa inhmun,a pa unaute’n an chhuhsak tak kha ka leilet sak vek tawha.Ambie-a hmingin a awm tawh bawk.Ambie-an min rulh leh ngei ngei a tiama,mahse ka nui mai.Ama tana ti ka nih rualin engkim hi Tluangpuii vanga ti ka ni zawk.Min rul emaw rul lo emaw ka ngaipawimawh lo,ka nupuiin neih let a duh em em kha ka pe leta.Ka lawm tawk viau. Tluangpuii pute kan tlawh apiangin Tluangpuii puin Lawmthu a sawi reng mai erawh nuam ka ti lo va,lawmna vang nimahse ka aia upa fe zawkin lawmthu min hrilh hian ka inthlahrung nge pawh ka hre lo.Nuam ka ti thin lo..

‘Zira kha engtik atangin nge i hriat?” ka ti sup.Thu mu chungin Tv ka en a,ani erawh Dressing table hmaah a thu thung.

‘A rei tawh mai,tinge?” pangngai takin a ti a..

‘Hman deuh khan engemaw tihsak che a nei a..Keima tan niawm tak ania..’ ka ti leh a.Thil kal tawh hi sawichhuah ka duh ngai lo.Ruata leh Zartei’n a chunga an tih rapthlak lutuk avanga a tawrhna hi belhchhahsak ka duh lo.Theihnghilh a duh a,mahse mangchhiain a tibuai a..A muhil lai,khur zawih zawih leh te chunga a harhchhuah tum a tam lutuk.Mahse, a khat ta tial tial…

‘Um…Nia,eng lo..Ramdinsanga tana ka thawh lai khan nangma tana tha lo ti ila,Hotel sum chevel leh i thilneih tlangpui tihlanna Chart kha Ramdinsanga ka pe a.Kha thil kha engtik niah emaw chuan ala hmang tangkai thei tih hriain ka rukchhuah tir a’ a sawi zawh rualin a thaw hak..

‘Um…’ ka ti sup ringawt.Min rawn en a,angaihna hre lo niawm takin a dar a tichhing ak..A then sak..

‘Ka lo suala,ka lo a ngawt mai tiraw? Ka dawihzep bawka…’ a ti leh sap..

‘Lo mu la…’ ka tita zawk.Ka mutna bul ka beng thuk..A ban a phar hliaia,muangchangin a dahthla leh a..Thil tul lo tawp ka zawt tih ka hria..

‘Lo kal rawh le…’ ka ti leh sup…

Khumah a rawn lawna,Tv ka Off a.Light ka off leh a, Fur lai ang maiin pawn lamah ruah a sur bur bura,tukverh a rawn theh thawt thawt bawk..Thlasik a intan tawh bawk nen ruah a sur leh chuan khua a ti vawt zual..Min hnungchhawn zawngin a mu a,a kawngah ka kuaha.Ka ban a kham thung..

‘Zartei kha….’ Reife kan ngawih hnuah a rawn tichhuak sap..

‘Shh…Muhil zawk la’ ka ti sup.A samah ka fawp nghal vang vang bawk.

‘Ni lo,min ngaihtuah vangin engmah sawichhuah i duh lo tih ka hria,mahse ka hmachhawn a hun tawh’ a ti leh a.

‘Engmah hmachhawntur a awm lo..Thu awih la..’ thlem pahin ka ti a.A thaw hak ri ka hre thei.

‘Zartei leh Ramdinsanga kha an inngaizawng miah lo,mahse duh hun hunah Ramdinsanga’n sex a hmanpui thei..Hei hi chu a hnu daiha ka hriat ania.Amak asin,Zartei kha chuan a lo duh viau pawh a ni theia.Ramdinsanga hnena ka talawkna kha, ka thiannu anih rualin Zartei Cousin a ni a..’ a ti leh a.Sawi ve tur hre loin a dul ka chul hauh hauh ringawt.

‘Zartei khan Ramdinsanga nen kan inkawp emaw a lo ti a.Mahse, kan inkawp lo..Ramdinsanga khan a bialnu angin min lo sawia,Zartei tan khan a lo na aniang..Mahse, engvangin nge Ruata a thurualpui ka hre thiam lo.Ramdinsanga vanga ti anih chuan Ramdinsanga berin min tibuai tawh si lo…’ a ti leh a..A dik,engvangin nge Ruata a thurualpui ngawt?Thurualpui siin Ruata tana pawithei Document ka kutah a nau tan a lo dah leh lawi bawka…

‘Tunah chuan Jail-ah an hun an hmang tawh alawm,kan tan thilpawi an ti leh tawh ngai lo vang’ ka ti sup..

‘Hotela kangmei chhuak kha ,Ramdinsanga tih ni turah ka ngaia,mahse Zira khan a tihtir lo a ti a..Ruata tih ani tih ka hriat khan mak ka ti ’ a ti leh sap.

‘Theihnghilh tawh ang’

‘Nia,mahse ka thiantha ber a ni a’ a ti leh sap.

‘Kei pawh…’

 Kan ngawi dun ta vang vang…

Hna pawimawh ka khawih mawlh mawlh laiin Pu Dama’n min rawn call a,ka then suk.

‘Hello..’ zangkhai vuhin ka ti a.

‘I buai em?” a rawn ti dam thluam..

‘Buai lo..Enge nita?” ka ti a.Ka thil tihlai ka tihzawm mawlh mawlh,Phone awm hi chu a tha mang e.Mi be chungin hna kan thawk thei miau a….

‘ Vawiinah ka lo chhuk a,hei Khawzawlah kan awm mek a’ a rawn ti a.

‘Um,Family lam thil nge?” ka ti satliah.Kan hna lamah chuan Aizawl lam hi chu ka kuta awm a ni a,a hranpa in a rawn buaipui ngai lem lo.

‘Aw,Family ti ila,kan nau a rawn haw dawna.Ka lo hmuak ang chu ka ti a’ a ti leh a.A awah a hlim hle anih hmel.

‘Ok,anih chuan zanin chu In lamah rawn riak la,nge Hotelah zawk?” ka ti a.Ama pualin in a luah tho nangin a lo kal tum chuan kan in lamah a awm fo.

‘Aih,tun tum chu ka thian pakhatin min beisei a’ a ti leh a.

‘Um..Chaw i rawn ei ang chu’ ka ti leh a.

‘Nia,Tluangpuii pawh hmuh a chakawm alawm’ a ti leh a.Ka thensuk,Tluangpuii angaina ta viau.

Tluangpuii hnenah Andy lo haw thu leh Dinner kan eichhuak dawn tih ka hrilha,a bu nghat.Inah amah chauha awm tur a ni lo bawka,ka ngaihtuah lutuk lo bawk.

Kan chaweina tur hmun ka thlenin an lo thleng kim tawh.Nidang anga hlim taka rik bawrh bawrh a harsa viau,mahse Mipa vek kan ni a.Engmah kan ti lang lo,sawizui ka duh loh zia an hriaa.Tu man sawi talh an tum lo.Kan in hnem tual tuala,kan boruak pawh a zia tual tual bawk.Kan haw meuh chuan dar 11 a ri tawh.

Ka tlanchhuak deuh chiah tihin Rocky-an min rawn calla,ka inhnem ve deuh bawk nen ka lu a hai deuh chhu a.Ka thing nawk..

‘Aw….’ Hello ti loin ka ti sup.

‘Khawnge i awm? I buai em? ” a rawn ti a. Kha tiang thil thlen hnu khan tunhma zawng aiin kan inpawh zual ta zawk.

‘Ka haw meka,sawi la..’ ka ti zangkhai vuh..

‘Bad news…Vawiinah Zartei a chhuak…’

‘Eng a?!” ka ti vak..

‘Zartei jail atangin a chhuak,Aruata thahnaah khan engmah inhnamhnawihna a nei lo an ti a.Video siam chungchang lah kha Ruata tih angin a kal vek bawka.Mahse, amak khawp mai..’ a rawn ti leh duah..Enge mak a tih ber pawh ka hre lo.Ka thinrim hlur thung.

‘Ruata hi…?” ka ti hmuk..

‘Ani chu chhuak lo,a chhuak lo vang.Engkim amah an burbun fai vek ’ a ti mawl leh tawp.Ka thaw hawk.

‘Ok…Chanchin min rawn hrilha,ka lawm’ pangngai thei ang berin ka ti sup.Mahse, Tluangpui’n a hriat hunah engtin nge a awm ang ka hre lo..Hre lo tawp se ka duh ber,mahse a hre lo ngawt thei dawn si lo.

‘Thildang ka rawn thawn ang che…’ a rawn ti leh a.

‘Eng?”

‘I lo en dawn nia,kei aiin ngaihdan i siam thiam zawk ang’ a ti leh a.

‘Um,a tha lawm..Ka lo en ang’ ka ti leh sup.

Phone ka Off a,kawngsir remchang laiah ka dinga,na zetin Steering wheel ka chum nghek…Damchhung tanna khawp a ni lo tih ka hria,mahse engtin nge kum em pawh anih hmaa achhuah ngawt theih ka hre thiam lo.

Rocky msg a lo thenga,ka open vat..A thil min rawn thawn ka hmuh rualin ka nghing lawih..Ka awih thei lo.Pu Dama biak tumin ka dial nghala,Switch Off…Ka call leha,angai bawk..Switch Off….

Seat hnung lam ka ngheng chawrh,ka mit ka chhing vang vang bawk. Ka phone a rawn ri a,rang lutukin ka en vat.Tluangpuii..Eng chen nge hetah hian ka thut tawh pawh ka hre lo..

‘Aw,Mate..’ pangngai thei ang berin ka ti dam thlup.

‘I lo thleng dawn tawh em?” a rawn ti a.A awah thlabarna a lang thei.

‘Ka lo thleng tep,I tha em?” kha thil tha lo thlen zan ang chiah khan mak lutukin hlauhthawnna in min rawn fan leh ta tlat bawk..

‘Aw,tha…Mahse, lo haw vat rawh aw..Poppy hi nichin atang khan a bauh ngat ngat tawha,ka chhuak ngam lo..Enge anih ka hre lo,mahse ka hlau ’ a sawi zawh rual deuhthawin Darthlalang keh thawm niawm tak ka hre nghal zat.Tluangpuii a rak thawt bawk..

‘Mate…’ ka ti tuar..Mahse, Phone a in off nghal hmak..

Motor ka Start a,chak lutukin kan in lam panin ka tlana..Ka mitthlaah Pu Dama leh Zartei thudun lai a rawn langa,an bulah Ramdinsanga a thu tel bawk…..Mi tenawm,an pathumin maw lo tang ho zawk ni??  Ruata tal awhna tur thil Zartein min pek chhan ka hre thiam ta vek..Ani chu an la chhuak maia,mahse Ruata erawh damchhungin a tang ang..Itsikna avangin a mit a dela,kei ang bawkin BUM a tawk ve ….

Ka Phone a rawn ri leh a,ka en vat.Tluangpuii..

‘Mate,I tha em?” ka ti nghal tuar.Ka insum theihna a bo vek tawh..

‘Keimah, Deal siam turin ka lo nghak reng che,I nupui pawh ka lo enkawl tha ang…’ Pu Dama’n a rawn ti dam dap..Ngeiawm lutukin a nui ri hek hek bawk..

(Chhiartu Duhtak,thilthleng zel tur hi i ngaihtuah zui atan i kutah ka hlan e…)