ENTEH,KUM A THAR ASIN

ENTEH,KUM A THAR ASIN

      (Short Story)

                Maengi Ralte

Kan naupan lai atanga kan tih thin danin kum thar hlim,dar 12 a rik chiah hian kan chhungkua in hun kan hmang thina, atir chuan kan chhungkua chauh kan ni thina,hun a kal zela,kan thiante leh kan thenawmte min hmanpuitu kan neih belh ta zela. Inkhawm ban veleh eitur siamin kan buai nghal char chara,zanlai inkhawmh min hmanpuitu zawng zawngte nen kan ei ho thina. Kumthar hmuah tinuamtu ber niin ka hre thin.

‘Ngatinge Phone i pick loh?” thinrim tak tak lo tih hriat takin ka Bialpa Zo-an a rawn ti dut dut. Hun kan hman lai khan vawi 10 zet min lo call hman tawh. Ka ngaih a tha lo titih.

‘Zanlai inkhawm kan hmang alawm’ ka ti a.

‘Biakin ah maw?” a rawn ti leh a.

‘Aih, Inah..Ka hrilh che kha,kan naupanlai atangin zanlai inkhawm kan hmang ziaha,kan ngaipawimawh lutuk’

‘Ok,a va tha si em’

‘Ti nge min lo call a? a tlai tawh si’ ka ti a.

‘Ka nu hian a sawi thina, kumthar hlima kan biak hmasakber hi kan duhsak ber leh hlim tura kan duh te anni thina,anihna takah chuan kan Hmangaih te tan a ni a’

‘Wow,a va Romantic dawn si ve’ ka ti leh halh.

Ka mit ka chhinga, akhabe phir thaih leh a hnar sang deuh vah bakah a mitmeng nalh zet ka mitthlaah a lo lang iar iar. A pa nu hi hnamdang anih avangin an hnar leh mitah an la chhun ta zela,Mizo Pure aiin an unau hi an mitmeng leh hnar a nalh zawka.An hmel ti thatu a ni ka ti lo thei lo.Kum khat dawn kan inzui ve tawha, kan khawsak dan a in ang lo viau lawi.Kei Champhai khua  ka nih laiin ani erawh chu Aizawl khua a ni thung. Hna tha tak a neia,u hmeichhia pakhat a neia, pasal a nei tawh thung.A nu leh pa nen an pathumin an chenga,an khawsak a harsa lem lo. Lab Technician ka ni a,ka u mipa in kan Motor a khalha,Rental changtlung tak pakhat hi a thianpa ta niin,chutah chuan a dah a.Amah a Smart bakah Motor a uluka, hmangtu a hmu thei viaua, Inah a awm hman meuh lo.Kumin kumtirah kan inluah lai an thiah avangin an inhnuaiah kan insawn luta. Ka u Motor hmangtu te zingah an Dept hi a hmang ngun pawl anni nghe nghe. Chuta tanga inhria chu anni bawk.Thian anga bul tanin tunah chuan ka nunna mi pawimawh ber te zinga mi a nita a. Kei ang bawkin ani pawn min ngaipawimawh em em bawk.

‘Rose,I ngaithla em?” a rawn ti a. Ka nui sak. Rosalyn-i tih hi mi tam zawk min koh dan a ni a. Ani hi chuan ‘Rose’ ti hlirin min ko thung.

‘Aw, ngaithla e..’

‘Um,kumthar chibai aw..Diktak chuan kumtharah hian i aw hriat hmasak ber ka duha,be hmasabertu che nih ka duh bawk.Tunah mai a ni lo a, kan damchhungin chu chu a ni reng ang’ a rawn ti leh duah.

‘I chhungte aw i hre hmasa anga,Next ka ni zawk anga,Ih,anih loh chuan kum thar dawn zanah dar 12 nghakin mi awm ve miah loh naah kan awm ziah angai dawn asin’ ka nui a.

‘I chhungte aia pawimawh nih ka duh ngai lo anga,ka chhungte aia pawimawh pawh an awm thei ngai lo ang.Mahse, a hmasaber nih erawh ka tum zel ang’ thutak em em in a rawn ti leh a. A sawi tum ka hai lo.

‘Ka hrethiam alawm’ ka ti sap.

‘Min la wish ve miah lo a’

‘Oh,Sorry..Kumthar chibai le’

‘Ka ngai tawh che,lo chhuk vat rawh’

‘Ka lo chhuk huntur ihria alawm’

‘Um,chuan ka Hmangaih che’

‘Kei pawh…’

Hlimna zawng zawng hi ka ta niberin ka hria. Kei aiin kum 5 laiin a upa zawka, amah a puitlinga,arintlak em em bawk. Kei,unau zinga duat rawn leh tlaw em em mai pawh hi min dawh peih em em a.Ka tana thatur a ngaihtuah fo a. Min tihsak theih zawng zawng min tihsak vek ti ila a dik ber ang. A sawi ang ngeiin kan inkawp hnuah kumthar vawi 5 kan hmang ta a,Kumthar hlimah min lo call a theihnghilh ngai lo.

‘Zo,I hnar a thi ania’ ka ti a. A khawih vat.

‘Cotton min lo pe lawk mai,in nei em?”

‘Aw,ka lo la ang’tih pahin ka tho a. Rooma ka dah ka va la sawk sawk.Ka let lehin a lo hupa,a dak bawk. Ka thil ken ka pawtthlaa.Ka pe a,a hnarah a hnawha.A thi tam lem lo.

‘A va mak teh ngawt ve,a hma khan a thi thin pawh ka hre si lo a’ ka ti a.

‘Ka naupan laiin a thi nasa thin,mahse a reh vang vang tawha,tunlai chu a rawn thi leh zauh zauh tawha,a reh leh mai ang’ a ti liam puat.

‘Tunlai tih chu a  rei tawh em?” ka ti a. Ka melh chhuk ran mai.

‘Aih,karhnih vel aniang.Nitin a thi in ka hria’ a ti awlsam leh mai.Ka ngaihdan a ni ve miah lo.

‘Naktukah Labah lo kal la,thisen test ang.Ngaih hoh lutuk tur a ni lo’ ka ti nghauh.A nui a.

‘I tih te chuan…’ka kut a rawn vuana.A hum zui zat.

‘Doctor ka lo bia ang. E,tunah Diki ka’n be lawk ang.Naktukah midang luh hmain ilut thei ang.In check-up law law la’ ka ti leh a.A thle bak.

‘Ka peih lo…’ a ti tawi tuk.

‘Aih, a theih loh.Peih angai’ luhlul chhuahin ka ti ve thung. Min en vang vanga,a nui ta suk.

‘Ok, kan kal ang.I lal teh e’ min chhaih zui a. Ka lei ka chhuah zauh ringawt.

‘Inneih hmain thi ta thut ila engtin nge i tih ang?” a ti leh thut.

‘Zohmangaih…’ ka ti hmak. A nui a.

‘Min chhang reng reng teh,engtin nge i awm ang?” a ti leh talh. Kum 5 kan inzui hnuah kan inneihna tur nizan hmasaah kan tifel a. Christmas leh kumthar inkar nise tiin kan rel fel a.Zoa te hna lamah an buai zual lai anih bakah Christmas hunpui hmang hmasa tur kan nih avangin inbuatsaihna hun thawl awm thei turin fan deuh takin an ruata,thla hnih zen zawn hun kan la nei.

‘I ninawm…’ ka ti leh that.

‘Sawi rawh…’

‘I thi dawn lo,ka phal lo’ ka ti mawl tawp.

‘Kan thu a ni si lo a’ a nui leh a. Ka thinrim teuh tawh.

‘Sawi tawh suh,hetiang zawnga thu lak a tha lo’ ka ti hmak. Engmah sawi loin a mal chungah min pawt thu a. Ka khabeah a rawn dawma.Amah en thei turin min kuai dak nghal zat. A hmeltha leh nelawm tak chu ka en a. Vawikhat pawh thi turin ka la ngaihtuah chhin ngai lo.

‘Kalsan che ka duh lo tih ihria alawm..Ka fiam che anih kha. I tel lo a ka awm thei lo ang bawkin ka tel loin i awm thei bik kher lo ang.Kan dam anga, Pathianin rem atih chuan fa kan la nei anga. Chhungkua kan la din dun dawn alawm’ a ti duah. A darah ka lu ka nghata,a nghawngah ka kuah bawk.

‘Ka hmangaih che’

‘Nang aia nasa in..’ a ti sup. Inneih hmaa Sex hman kan duh loh avangin kan insum nasaa.Kei aiin a insum nasa zawk. Achang chuan inven zawh loh lek lek tum kan nei ve tho a, chutiang hun a lo thlen apiangin Tawngtai a rawt vat thin. Ruihtheihthil engmah ti lo,hriselna ngaipawimawh leh inzo tak a ni a. A tan insum harsat tur zia ka hriatthiampui zo lo zawk hial ang.

‘Thiannu..Hei aw’ tih pahin ka hmaah Zo-a test report a rawn daha.Ka en vat. Engmah hlauhthawntur a awm lo tih ka hmuh rualin ka thaw nghal huai mai. Zo-a ka hrilh a.Doctor hnenah test result kan entir leha, ka hre vek lo nangin ka rin ang ngeiin Doctor pawn dik lo engmah a awm lo tih alo confirm ve leh bawk.

‘Ka hria alawm,dik lo a awm lo ang. Mahse, I rilru nawm nan ka testa, ka fel em?” a ti duh lek.

Inneih inbuatsaihna a kal zela, rin aiin thil buaipui a lo hautak a. Tum ang ngawtin a khawsak theih der loh. Aizawl leh Champhai kan kar tawn seka,Motor ka chuang ning hlui tawh.Fanu neihchhun ka ni a, kan harsa em em lo bawk nen ka nu leh pa bakah ka unaupa ten kan phak tawka a tha thei ang ber an duha,kei aiin ngaihpawimawh an ngah mah zawk emaw tihmai tur a ni.

‘Mambawih,Zoa te chu an lo chhuak tawh em?” Ka pain a ti a.

‘Ka hre lo,ka la be lo’ ka ti liam puat.Naktuk hi man hlanni atana kan ruat a ni a. Ka pi hi inneihnaa kal ve chi anih loh avangin Zoa hmuh ve a duha,chumai bakah Man hlanna leh thlahna ni pahfawma hun hmang tur kan nih avangin Zoa te lam an lo tel ve a tul hrim hrim bawk.

‘Be teh, an muangchang lutuk ange’ a ti leha. Ka phone ka phawrha,ka calla,a tlang lo.

‘A tlang lo.An lo chhuak tawh anga, Signal awm lohna laiah an lo tlan aniang’ ka ti a. Engmah a sawi zui lo.

Inbual ka tum lai takin min rawn call leta.

‘Min lo biak itum em?” a rawn ti zangkhai vuh.

‘Aw, in lo chhuahna a rei tawh em tih ka hre duha’

‘Um,Kawlkulhah kan awm meka, kan lo thleng har lutuk lo ang’ a rawn ti dam thlup.

‘Ok,Fimkhur ula..Muangchangin lo tlan ru.Hetah chaw in ei dawn kha aw’ ka ti leh a.

‘Uum..Ka ngai tawh che a,ka tlan muang vak lo’ a nui huk huk.

‘I ninawm.Uang reng lo teh,tu nen nge in lo kal?” ka ti leh a.

‘Mamawia nen,ka pa leh ka nu bakah midang Motor hranin an kal bawka’ a ti a.

‘Ok, in thlen chin lo sawi zel la,ka inbual lawk dawn’

‘A vawh vawh nen,I bal lutuk’a nui leh huk.

‘Blehh,min ngai anih kha…’ ka ti let ve thung.

Ka inbual zawh hnu lawkah Zo-a ka call leha,Khawzawl an la thleng lo deuh tih a rawn sawia. Rei be loin ka dah lehnghal mai. Ka Cousin nula senior pakhat leh ka thiantur nen ka thil kentur kan enfel leh a. Man eitu ho in enge an rawn ken dawn a hriat si loh avangin insiam dan thiam a har rih viau.

‘I Phone hi,Zo-an a rawn call ania’ Ka Cousin in a ti a.

‘Lo Pick lawk mai, ka thil ken a rit lutuk’ ka ti a. Khawzawl an thleng tih min rawn hrilh a tum a ni ngei ang.

‘Maw?” Ka Cousin in a ti vak. Ka hawi pheia,a chhan ka hriat si lohin ka lungphu a rang nghal dawt dawt. Ka cousin hmui hup chunga ding chu ka en a, a hmelah manganna chiang takin a lang thei.

‘Enge?” ka aw a khur a.

‘Ate, ka pu zuk ko teh,vatin’ ka thiannu en chungin a ti that. Ka khup a sai dar dara,engvanga thlaphang em em nge anih ka hre lo.Mahse, ka chhungril hian dik lo a awm tih min hriattir vek.

‘U,enge?” ka ti leh a. Ka ding ngil hleithei lo.

‘Zo-a te an Accidenta’

‘Maw?” ka ti vak. Ka pa leh ka u Roomah an rawn tlan luta. Ka cousin in thilawmzia a hriat ang ang a hrilh lai chu chiang lo ruaiin ka en a. Ate-in min rawn kuah thung.

‘Pa, enge a awmzia? In fiamthu a ni em?” ka ti tuar.

‘Lo hahdam rawh, kan call ange. An tha ang’ ka pa in a ti a. Ka u leh ka Cousin in min rawn kuah ve bawk.

Ka pa chhuak chu ka en a,  midang Accident an awm anga,an hresual a ni ngei ang. Engkim a tha vek tih an rawn sawi ngei ngei ang.

‘Mambawih, a va pawi em’ ka nuin min rawn kuah chungin a ti a. A tap zui hlawp hlawp.

‘Zo-a te Khawzawl luh dawnah Motor lian nen an impel tur awngthlangah an tla a. A hmunah Zo-a a boral nghala,Mamawia erawh chu Khawzawl Damdawiinah an daha….’ A thim mup,Engmah hriatzui ka nei tawh lo.

Ka khawvel a tawpa, Zo-a nen kan inneih ni tur kha kan vui liam hun a nita zawk bawk, engmah mumala hriat ka nei lo. Hriat lah ka duh hek lo.

Kumkhat tal tap mi ang ang maiin nun ka hmanga, Roomah ka inkhung tlawk tlawka,ka khawvel chu ka room zimte a ni mai. Ka ngaihtuahnaah Zo-a ka kawma,kan pahniha kan inbiakna te,kan thlalak te nena nileng hun hman ka duh ber.Kum hnih naah erawh ka harhfim ta. Mahse, harhfim miah lo ila ka duh zawk.  Mi zawng zawng in min khawngaihna mita min en hi ka huaa. Ka chunga Pathian rorel naah ka lawm hek lo.Tun thleng hian a thatna lai ka la man fuh chuang hek lo. Zo-a nu  nen kan inbiak apiangin kan tap dun ziaha, kan anniversary leh a piancham a lo thlen hian ka sun thar leh zel bawk.

Sana ka en a. Dar 12 ri kan minute 5 chauh a awm tawh, Zo-a thih cham vawi hnihna nimin piah lawkah kan hmanga, tunah a roomah,a khumah ka mu a. A pyjama ka haa,a kawrlum ka ha bawk. Muthilh ka tum buai lo law law. Ka thuchhuaka, khum bula tukverh lam ka pana. Ka hawnga, thla eng dul ruih mai chuan ka lung a ti leng vawng vawng. Ka mit ka chhinga,ka biang a rawn lum pap..

‘Kum a thar e’ ti a au ri ka hriaa. Ka mengchhuaka, van lam ka thlira. Tunah chuan kum 5 chhung,kum thar tir apianga ka dawn thin Zo-a call ka dawng leh tawh ngai dawn lo tih ka hria..

‘Zo…I reh vang vang thawm rin zia hi i hria em? Enteh,Kum thar kan thleng asin..Vanah khan phone a awm anih chuan vawikhat tal min lo call ta che’

🖤🖤🖤🖤🖤🖤🖤🖤🖤🖤🖤🖤🖤🖤🖤

Note: True Story hi a harsa thin😣,Chuan a ziaktu hi ka Tap😪😪😪