SWEET DECEMBER- 8

Chapter- 8

‘I hre ve em?” kan ngawih vang vang hnuah ka tichhuak sep.

‘Muthilh tum rawh..Zingah kan sawi dawn nia’

‘Hmeichhe au ri ka hriaa’

‘Shhh…I hre sual aniang,Muhil rawh’ a ti dam leh thlup. Ka samah a kut zungtang a rawn rawlh luta,ka chhip samah a rawn fawp zui nghal vang vang. Nawmna danglam leh thlamuanna mak takin min fan chiai chiaia.Ka mit ka chhinga,a lungphu ri dat dat ka ngaithla a.Nichin lawka ka thlaphanna kha chu a thlawkbo  zo vek tawh. Mahse, a bulah riah ka duh.Keimaha awm ka duh lo a ni tawp mai.

‘Merry Christmas’ a ti leh sup. Ka thaw hak,ka hriattheih china Christmas urlawk zan ka hman mak ber tum a ni.

Ka mengchhuaka, ka awmna ka hai thelh. Ka mit ka chhing leha,nizan thil thleng ka ngaihtuahnaah a rawn lang nghal zat. Ka khur zui lehnghal titih ringawt. Nizan khan zah pawh dawn zo loin Hriatpuia bulah ka mu ta kha ania,ka ngaihtuah zawng pawn ka hmai a sa nghal hat hat. Engtin nge min ngaih ang ka ngaihtuah duh lo law law rih.A tho tawh nge ka bulah hian ala mu pawh ka hre lo a,en tura inleh ka ngam chuang der lo bawk. Ka ngaihtuah naah ka thil hlauh em em kha a lo lang leh thut.Tuman an hre ve lo tak tak nge ka mangchhia ka hlau zawk ni ang? Bakah, Hriatpuia roomah khan ka lo riak tak tak lo thei bawk.Ka lu hai leh ka mit vai ruai mai khan ka hriatna a tibuai pawh a ni maithei…

Ka thuchhuak nghal a, mahse Khum bul Chaira Hriatpuia lo thu ka hmuh rualin ka tim leh chawih. A bawp sei thlurh a khawkherha,ngaihtuah muk hmel zetin min lo en reng chu niin..Ka landan nalh lem loh tur zia ka ngaihtuaha,make-up hmang nasa tak ni lo mah ila tunah tak phei chuan ka hmel a da dawn lutuk. Ka sam ka tuai zauh ringawt,awmzia phei chu a nei miah lo tih ka hre tho.

‘Morning..’a ti sup. A ha rual leh var nalh zet langin a then suk bawk.

‘Morning..Ih,eng lo…A zia lo’  tihngaihna hre loin ka kut ka lekkang zauha.A nuih leh tak sukah chuan beidawng ru zetin ka dahthla leh hnak.

‘Ka bialnu nena room intawm hi pawi ka ti lo viaua’ a sawi sual emaw tiin ka melh vat.A hmelpa leh thutak fahranah chuan thu ho mai mai sawi a ni lo tih a lang reng.

‘Enteh..’

‘Sawifiah duh suh..Ka hria’

‘Maw? I hre ve maw?!” ka ti halh.

 ‘Um..Hria,mahse  a tha vek e’ a ti leh sup.

‘Thil tha lo thleng a awm em? Diktak chuan ka hlau…’

‘Ka hria,kalsan miah lo tur che ka nia’ thutak lutukin a ti leh a. Ka mengphak awk. Kha thil khan kei nen enge inzawmna a neih ang ka hre miah lo.

‘Midang tuman an hre ve lo kha mak ka ti..Bakah,nizan khan ka lu a hai veka.Engmah Drinks lam ka ti si lo’ ka ti a.

‘I ril a tam em?” ka thilsawi nen a inpersan lulai lutuk, mahse a hmelpa leh ngeng fahranah chuan sawi zawm a duh lo tih ka ringthiam ve tawp. Mahse, engvangin nge a duh loh ngawt ang?

Ka tho chhuak duh,mahse nizan khan engmah bun lo a tlanchhuak ka ni a. Tunah hian ke lawnga inhnuai ka pan thla anih chuan tu emaw tal pawn min hmu se zawhna chhan tur ka insiam nghal dawn tih ka hria.Mahse, enge ka tih chuan ang?

‘I slipper ka hawh thei angem?” hreh zetin ka tita nge nge.

‘Aih…’ a ti bul hmuk. A va han uikawm mai mai tak.

‘Diktak chuan midang hian ngaihdan dik lo an neih ka duh lo a’

‘Ka hria..’ a ti awlsam leh mai. A mood cool ruih reng hi thilthar a ni lo. Hna kan thawk ho a, kan inhmu nitin bawka,mah se ka la hre thiam thei chuang reng reng lo.

‘Anih chuan enge i phal si loh a? a uikawm thlak em mai’ ka ngaihtuahna nena inpersan zetin ka ti hlak. Ka puansin ka thehhlim a. Khum atangin ka chhuka,ka beisei loh lutukin khum bulah ka Slipper a lo awm reng!!

‘I lo zuk la maw?” ka ti halh. Min chhang loin a thle buk ringawt.

Ka bun nghal sawk sawka,rang fahranin Kawngkhar lam ka pana. Hawng mai loin thawm ngaithlain ka dinga.Kawngkharah ka beng ka ti si a. Thawm engmah awm loin a reh thap. Dimtein ka hawng de de a. Ka dakchhuaka,mahse ka inrin hmain ka hnunglam atangin ka kawngah a rawn kuah thuta. Min pawt let nghala. Kawngkhar a pawtkhara,a kalh zui nghal hmak.

‘Eng? Ngatinge?” ka ti bah nak. Nizan kha chuan hlauh vang leh mangan vangin keimah zawkin ka pan kha ania. Tunah chuan khatiang titurin ka huaisen tawk tawh lo a. Thil tihchi anih loh zia ka hming ka hriatchian tlukin ka hre chiang.

Engmah sawi loin amah en thei turin min kuai hera. Hnial nachang hre loin min kawihher ang angin thuawih fahranin ka inher ve mai bawk. A kutzung tang sei thlurhin ka biang tawn tawnah a rawn vuana.Amah en thei turin min kuaidak nghal a. A mitmeng vawt leh chiang zetah ka en siah. Hawisawn mai lo turin ka infuih ru mawlh mawlh.

‘Min nei rawh…’ a ti sup. Kei erawh angaihna hre lo zetin ka dinga, ka hrawk ro halh ti hnawng turin ka chil ka lem a. Ka chiai lohna turin ka infuih pah mawlh mawlh bawk.

‘Khawngaihin…’ ni lo…Ngenna aw a ni. Mahse, Rosy…Ka hriatchhuah rualin ka tal nghal laih. Min thlah ve mai bawk.Mahse, kalsawn chuang loin a dinna ngaiah a dinga,min en chhuk run bawk.

‘Min fiamkual hi i duhtawk thei em?” ka tichang fak.

‘Ka fiamkual che angah ilo ngai amaw?” a ti hluk.

‘Aw, eng angin nge min ngaih chu ka hre lo.Mahse, min fiamkual nana hun i khawhral hi a tul lo ania’ ka ti leh nghauh. A mitah tak ka en a. Ka nui lui sak.

‘Anih phawt.Nizan vang khan thupha ka chawia.Chuan,ka lawm bawk’ ka ti zangkhai leh vah. Ka inher nghala.Kawngkhar hawnna tur ka vuan nghal chat. Mahse, ka duh loh dan bawkin a thleng leh ta tlat. Ka hnunglam atangin ka kawngah a rawn kuaha.Ka darah a hmai a rawn phum zui nghal zat. A awmdan engkim mai chuan min fan rawih rawiha. Ka induhtawkna che laih mah se amah duhna vanga che a ni ta tlat a.Hei pawh ka duhdan a ni leh ta hauh lo.

‘Kal suh..Rosy vanga buaina ineih chuan ka nunhlui ami a ni ka tih kha’ a aw a hniam sat. Ka beng bul a thawkkhum zawnga lum ham ham chuan min fana. Ka inpetruh tlat bawk.  Ka nunah Mipa tamtak an lo awm ve tawha,mahse tumah ka hnaih tak tak ngai lo..Tuna ka awmdan leh Hriatpuia ka hnaih apianga keimaha danglamna thleng hi Mipa hi ka la hnaih tam loh vanga thleng a ni lo tih erawh ka chiang. Ka tan a danglam,ka pawm angai.

‘I sawi apiang ka awih anga? Uite angin maw?” ka chhungril nem leh tuiral mek thup nan ka aw a hriam hraih.

‘Aih,Mipa leh Hmeichhia,induhtawnna vang zawka thleng tur hi. Min nei la,venhim che ka duh’

‘Aih, tu lakah mah ven ka mamawh lo’

‘Ka duh che a..’ a ti leh hmiah.

Ka mit ka chhinga, kei hian ka duh tih ka pawm angai. Ka hriattheih chinah ka chhungril zawng zawng atanga ka duh awmchhun mipa tih hi ka pawm anga,a sawmna ka pawm ang nge ka hnar ang? Ka hnar anih chuan ka damchhungin ka nei tawh kher lo ang…

‘Rosy….’ Ka ti leh halh. Ka aw erawh ahma ang tawh loin a khur lek lek.

‘Ka nunhlui ami a ni ka tih kha..Nangpawn nunhlui inei ang bawkin ka nei ve a’ a ti leh sup. Ka pawm thlap.

‘Min thlah phawt rawh’ ka ti leh sap. Diktak chuan talchhuah tum ila chuan ka talchhuak thei reng ang. Mahse, nuam ka ti tlat.

‘Min nei dawn em?” a ti leh nghut. Namnul mai mai chi a ni hauh lo.

‘Ka hre lo…’

‘Anih chuan min neih hma chuan ka tibuai dawn che tih i hria a’ a ti leh hmuk.

‘Nang misual…’ ka nghawng a hmui lum thar thara a rawn fawh takah chuan ka tawp chawp. Ka tum loh tawpin ka ngheng nghal rawk.

Kawngkhar kik thawmah ka harh zawk. Ka kawnga min kuahna ka phelhsaka.Ka inlahrang nghal vat.Mahse,a hmel ka en ngam lo.A hmel en thei lo zawngin ka dinga,Ka hmai sa hat hatah hian a sen nasa dawn lutuk tih ka chiang vek.

‘U Hriatpui,Remruata ka nia’ pawn lam atangin Remruata awin a rawn ti a. Ka insehruh nghal nghek.Tun ang hunah hetah min hmu anih chuan engtin nge angaih ang?

‘Hawng rih suh’ Hriatpuia kawngka hawn tum mek hnenah ka ti sep. A ding chuta, min rawn en a. A mitmeng fiah zetah chuan ka ngaihtuahna a hmutlang vek nimaiin ka hria. A mitah tak ka en a, mahse ka enrei ngam lo.

‘I ngaih ang kha kan inkarah engmah a awm lo.Ih,ka sawi tum chu Remruata nen thian bak inzawmna kan nei lo a…Mahse,engtin nge min hmuh ang ka hre lo a…’ ka ti halh.  Engvanga insawifiah ngawt nge ka nih ka hre lo. A then suk ka hmuh rualin atthlak lutukin ka thawveng hawk zui.

Min rawn hnaih leh a,ka insangmar lehnghal teuh ringawt. A rawn kun hniama,tihngaihna hre loin ka mit ka chhing nghal vat.A hmui lum thar tharin ka chal a rawn si a.Rei erawh a ni lo.

‘Hlauthawng suh,I inpeih hma chuan tumah ka hriattir lo ang’ a ti sup.A tawngkam chhuak nghet churh maiah chuan rinngam a ni ang tih ka chiang ve tawp.

‘Khumah sawn lo va thu la..’ tih pahin khum lamah a thle zauha,engmah sawi loin ka bu nghata.Thuawih zetin khum lam ka pan nghal vat bawk.

‘Ka rawn tiharh che em? Mahse, a pawimawh..Ehe!! Mami,nang hetah maw?!”min rawn en chungin a tihzawm zat.A awah leh a hmelah mak tihna a lang kawp ve ve.A demawm miah lo tih ka lo ngaihtuah daih thung.

‘Ka ko a..Thu la’ danglamna awm map loin Hriatpuia’n a ti sup. Remruata a rawn kal pheia, ka hmelah engemaw hriat tumin min en uluk ngang mai.Mahse, ka then lui sak.

‘I mu thei maw?” zangkhai vahin ka ti a. Keimah pawn ka tawngkam zangkhai lutuk chu ka awih lo rum rum.

‘Um,tha..Nang?” rawn thutthlak pahin a ti a. Ka bu nghauh.

‘Sawi la…’ Hriatpuia’n a ti leh nghut. Chairah a thu ve thung. Room neitu zawk ang maia khuma kan thu chu a mawi lo tih ka ngaihtuaha,mahse tihvak ngaihna a awm chuang lo.

‘Eng lo ania, Nizanah kan Hnathawk thenkhatin buaina an tawka’ a ti a. Ka hawiphawk nghal hra mai.Kan Showroom Building chhawng hnuai ber hi Staff Quarter a ni a. Abik takin mizo aiin hnamdang awm an tam zawk.

‘Chuan..?” a ti nghut.

‘Mizo thenkhat,Urlawk zan hmang na fal deuh te nen an intibuai a.An veng YMA president nen kan inbe tawha.An fel viaua,an mahni zawkin min rawn biaa. Hliam na lutuk tuar an awm lo a, Ajit-a bungrua an suamsam deuh niawm a ni’ a ti duah.

‘An vengchhung mi te anni em?” a ti vawt ruih.

‘Ni lo an ti,An vengchhung tlangval lo awmhnai zual khan an zuk chhan zawka..Police lamah FIR pawh an thehlut nghala’ a ti leh a.

‘Anih chu,Khawi PS huamchhungah nge an awm?” a ti leh hmuk. Remruata’n a sawia. Hriatpuia a bu nghuta,a phone a phawrha.Police zingah hmelhriat a nei anih ka ring ve tawp.

‘Kan chhuk dawn mi? nge in la sawi zo lo zawk?” Remruata’n min rawn en pahin a ti a. Ka chil ka lem a,engtin nge ka chhan dawn ka hre lo.

‘Lo zuk chhuk ru.Mami,Nakinah kan sawi zawm dawn nia’ Hriatpuia’n a rawn tita hlauh.

‘Nia..Chhuk ila,thil ei zawhah chhuah nghal an ti in ka hria’ a ti leh a. A ding nghal hluai.Hriatpuia ka melh zawka,min lo en run. Ka ngaihbel nge ka hre lo,a hmelah thinrimna niawm tak alanga,mahse engvanga thinrim nge anih ka hre lo. Remruata thil rawn sawi lah hmanhmawhthlak leh chinfel theih loh khawp engmah a awm si lo.

Stepah kan inzui thlaa. Nidang ang bawkin a tawng leh mawlh mawlh,nizan lama thil thleng kha engmah a sawi bik miah lo.Hriatpuia kha ka sawipui dawn pawh khan a haider tlat kha ania. An lo hre lo vek tak tak nge keimah kha ka dik lo zawk ni ta ang?!  Mahse, ka hriat kha a chiang lutuk,vawikhat mai pawh a ni hek lo.

‘Kan intifai lawk ang’ ka room awmna Floor kan thlen veleh ka ti a.

‘Um,lawk..Intifai hman lo khawpin maw a koh chhoh che?”

‘Aw..Min rawn call harh chawpa’ dawtchiang lutuk ka sawi ta ngawt.

‘Em em bawka,I Roomah lo kal mai tur lawm’ a ti hmuk.

‘Naaa,Boss zawk ania.Lo zuk kal la,kan intifai lawk ang.Ka rei lo ang’ ka ti leh a. Ka ban ka vai zauha,Ka then lui sak bawk. Hmanhmawh zetin ka kalsana,Zawhna dang chhan leh ka peih tawh lo.Dawtbak engmah sawitur dang ka hre dawn chuang si lo.

‘Merry Christmas’ min hmuh veleh an lo ti sap sap. Dinning Table lianpui kilin an lo thu thap tawh. Ka wish let ve nghala, Remruata bula thutna awl ka pana. Midang erawh an titi ngaiin an titi zawm leh mam mam tawh.

‘Christmas pawh a ang lo’ Remruata’n a ti satliah.Ka pawm thlap,ka pa damlai leh keimaha ka awm hnuah pawh Christmas ni kher hi chu inkhawm ka thulh ngai lo. Vawiin erawh chu ka thulh a,kei chauh ni loin kan vai maiin tuman inkhawm lam ngaihven kan awm lo.

‘In va inpeih tawh awm ve’ Hriatpuia awin a rawn ti a. Ka en vat,kan kalsan laia a hmelchang zet kha ni tawh loin a lang dam thlup. A rawn kal pheia,ka bulah a rawn thu thla ve a. Ka awm a nuam lo leh ringawt tawh.Hahthlak, hetianga ka awm zel chuan engtin nge kan inkawp tak tak hunah ka awm ang ni?

‘Nizan kha, ka mumang nge pawh ka hre lo.Au vak ri ka hriaa’ an Cousin zinga nu te fel rawn rawn Zampuii’n a tithut.Ka thil ei lai ka hak titih.

‘I mangchhia anih chu a’ Pakhatin a ti a, an nui zui dar dar. Ka nuih a za ve miah lo.

‘Nia,ka mangchhia anih ka ring.Mahse, achiang asin aw,atak ang mai a ni’ a ti leh niah niah. Ka mal chungah Hriatpuia’n a kut a rawn daha,ka kut lehlam ka mal chunga ka dah a hum zui leh nghal chat. Ka en vata,a then suk. A mitmeng thim raih leh fing zetah chuan enge a ngaihtuah ka hre thei lo. Mahse, thil pakhat erawh ka hre thei tlat.Ka thil hriat kha dawt ni loin atak a ni.

Thil kan ei zo fel vel deuh chiah tihin Police pahnih Dinning Roomah an rawn luta, ka thaw hak.Midang pawh an ngawi nghal thap bawk. Hriatpuia ka en vat..

‘Nizan kha..’ ka ti sep.

‘A tha vek ang..Min ring la’ a ti supa.Ka kut a hum nghet salh.Enge tha leh tur ka hre lo.Mahse, nizana Hmeichhe aw kha mangang au aw a ni. Hriatpuia hian a hre chiang lutuk tlat.

‘I tha em?” rawn kal phei pahin a rawn ti a. Ka bula thu Hriatpuia a en bawk. Ka lo hlauthawng zual sauh.

‘Tha alawm..Helamah ilo awm reng animaw?” dinchhuah  vut pahin a ti ve a.

‘Nia,Aug thla khan ka pheia. .Helamah daih daihte enge i rawn tih?” a ti leha.

‘Kan unau hoin Christmas kan rawn hmanga’ a ti a. An ding duna,Hriatpuia ai chuan a tawi hret zawka,an kum erawh an inrual tlang hmel viau.

‘Kal dawn ang u.Ka bag lak leh ka la ngai’ Remruata’n a ti a. Midang pawh an tho nghal sang sang,ka tho ve a. Hriatpuia te lam ka en zauh. Kan piah deuha Tukverh lian leh sang zet bulah an ding duna, An tawng ka hre phak lo. Mahse,nizana ka hriat kha mangchhia ni loin atak a ni ngei ang tih ka rinnghet zual sauh bawk.

‘U Hriatpuia Motorah inhnawh ila,Adin-a Motor leh Remruata Motor a awm bawk chuan a tawk reng ang’ an Zampuii’n a ti a. Zampuii hi a upa lam ni a. A thu hi an Cousin ho zingah chuan a tlang angreng viau . Ngeiawm khawpa inti thu erawh a ni miah lo thung.

‘Zorama khan khalh se,ka khalh peih lo ‘ Remruata’n a ti a.

‘Amak thei. Anih chuan Zo-a khalh mai rawh,I u hi nizan a thle deuh aniang’ a ti a. An nui dar dar.Za lo zetin Remruata pawh a nui ve thu.

‘Boss, I Motor kan ring ania’ ka hnung lam en chungin a ti leh lar lar. Ka hnungah tu nge ding en kher ngai loin ka rin hriat thei mai.

‘Ok,Boss berin i tih tlat chuan ka keng mai ang chu.Lo thu ula,Roomah ka han let leh lawk ang’ pangngai takin Hriatpuia’n a ti a. Min rawn kal pela. Kan riahna Building lam pana a kal chu ka en a. Jacket a mal thleng vela sei a haa. Cargo,a dum a hak chu a boot bun chhungah a tlang a ti lut bawka.A inchei lo va, ramvahna tur chi inbel ni mah se a lang nalh zuih tho.Ka rin loh lutukin a ding chuta, a rawn hawilet vut,ka lo enreng min rawn hmu nghal a.Kan mit a intawng siah.A then suka,tihngaihna hre loin ka nui ve ta ngawt.

‘Zampui,Mami kha ka Motorah kal se..Hna thilah biak lawk duhna ka neia’ ngenna a ni lo.Thupe aw a ni,mahse ka haw miah lo.Nuam ka titlat zawk.

Hriatpuia leh keimah bakah mipa tleirawl lam pahnih an chuang ve a. A motor an keng tho nangin kan bulah Remruata a lo chuang tel ve bawk. A ruala kal ka nih avangin a mawhphurhna angin min ngai tih ka hria. Hna chungchang kan sawi ta luam,mahse thil thar leh pawimawh ,sawi ngei ngei ngai erawh a ni lo. A bula kal turin min duha,chhuanlam atan hna a hmang angin ka ngaihtuaha,atthlak lutukin ka chhungril a hlim veng veng!!

Kan kalna hmun a nuam takzet.Mahse, Hriatpuia mitmeng hriam hraih in min enzui reng tih ka hriat avangin ka inthlahdul tak tak thei lo. Dar 3 pelh hretah kan riahna hmunah kan let leha. Ka ril a tam rawih rawih thei. Ka beisei loh zetin zing lama ka hmuh te bawk kha an lo awm leha, lo kal satliah mai zawng anni thei tawh lo.

Kan intihfai hmain chaw kan ei a. Chaweikhamah erawh intifai turin mahni room theuh kan pan ta dial. Khumah ka thu a, ka awm a nuam lo.Enge ka hlauh ka hre lo.Mahse, zana mahni chauha riah ka huphurh ngawih ngawih. Remruata riak ve turin sawm ta ila Hriatpuia ngaihdan a ni miah lo ang tih ka chiang. Mahse, engtin nge ka tih chuan ang? Kan riahna hmuna hnathawktu ka hmuh ho kha chik takin ka en zela,nizan khan thil tha lo thleng se chuan an hmelah engemaw tal dik lo a awm ang.Mahse, chutiang hmel tuman an pu si lo.

Hallah kan thukhawma..An titi mam mama,a thenin Card an deng bawk. Mikhual thleng ve dang an awm pawh ka hre lo.Hunpui lai a ni a,a mak lem lo. Nizana ka thil hriat bawk ka rilruah a lo langa,kan zinga hmeichhia tumah na nei hmel pu an awm lo. Awm chu sawi loh ka thilhriat kha hre ve awmchhun pawhin a mangchhia emaw a ti mai mai.

‘Dik lo a awm em?’ ka beng bulah Hriatpuia’n a rawn ti sup. Ka thu mar zawt thung.Engtik laiin nge a rawn thut ve ka hre miah lo.

‘Aw..Aih,engmah chutiang a awm lo’ ka ti bah nawk. A then suka,mahse a mitmeng vawt ruih leh fing zet chuan ka ngaihtuahna hriat tum niawm takin min en chik lam hret.

Tihpalh niawm takin a rawn kun zawka,a hmui chhah tapin ka beng a fawp thawi thuak.’ Ka ngai tawh che’ a ti sup.Mahse, midang tan pawha mak tih hman loh khawpa rangin a thu tha leh vut.

A awmdan tehthut chuan min ti hamhaih lutuka,chhan mai dan tur hre loin ka thu ngil auh ringawt.Thatchhe zetin a thu awna, ka Shawl lianpui a rawn zena,ka kawngah a rawn kuah nghal zat. Ka en vata,a mit a siai zauha. A then zui suk bawk. Kei erawh ka insangmar nghal teuh thung. Insiamrem niawm takin a thu thaa,min rawn hnaih lehzual ta zawk. Min rawn en a,’Hahdam rawh’ nghal zetin a ti leh a. Min chhaih tih ka hria.Mahse, ka inthlahdul phah chuang eih lo..Tihngaihna hre loin ka ner khum nak.. Zawitein a nui hawk thung.

Ka mu fel deuh chiah tihin ka phone a rawn ri a. Ka en vat,Hriatpuia..

‘Hello..’

‘I hlau em?”a rawn ti mawl tawp.

‘Aih..’

‘I duh chuan ka lo riak thei a…’

‘Ka hlau lo..’

‘Midangin an hre lo ang’ ka sawi a haider hmiah.

‘Angai lo..Ka tha’ ka ti nghauh. Ka rilru erawh chuan ‘ ka hlau’ ka ti ve thung. Mahse, ka induhtawkna hian dawihzep tak angin min lantir thei lo.

‘Takzet?”

‘Um…’

‘Engemaw dik lo a awm emaw i hlau anih chuan min rawn call vat la..’ a ti leh sup.

‘Um…’ ka ti tawi leh tak.

‘Good night’ a ti dam leh thlupa,ka mangtha ve a. Ka chhungril erawh chuan abula riah a duh ngawih ngawih thung.

Chiang lutukin ka harh a. Ka thuchhuak vat,ka awmna room chhung ka enkuala. Engmah dik lo a awm lo. Ka phone ka bana,sana ka en a. Dar 1 a pel tawh. Thawm engmah awm loin a reh vawng vawng. Mahse, a reh lutuk chuan ka awm a tinuam lo zual sauh thung. Remruata riahpui atana ka sawm lo ka inchhir tha leh vang vang. Mahse, Hriatpuia hnenah khan ka hlau lo ka ti khanglanga.Remruata lo riahpui ngawt turin eng chhuanlam mah a awm si lo.

Ri rek ka hriat rualin ka hriatna lam ka hawi nghal vat. Muangchanga Kawngkhar herhna che tial tial ka va hmu a, tu emaw chuan Pawnlam atangin hawn an tum tih achiang.Ka hrawk a ro nghal vek..


Note: Naktuk hi ka nau(Ka u fanu,Building khatah kan Cheng) pasal neih ni a ni a.Ka chawl chiang leh hle ang😂😁..