EVERGLOW BOOK 3 (Chapter 28-30)

Chapter- 28

“Enge nita?” Zoi’n a rawn ti vata, ka phone thlauh a chhar nghal bawk,engmah sawina chang ka hre lo, ka mawl vek.

“Hello..tu nge a? a Off daih bawk si” a ti a, Zohlima a rawn tap chhuaka, ka harh zawk,ka muhil chuang miah lo tih erawh ka chiang.

“Zo, enteh, tunah ka chhuah nghal angai, Mampuia hi lo bual zui mai teh, aaa, i duh leh bual lo la...” tih pahin a kutah Zohlima ka pe a, ka bag dahna a sling bag ka ah chhuah mai thin chu ka phihthlaa.

“Enge thil awmzia tal sawi la...’ min rawn um zui pahin a ti leh a, nidawn tak e.

“Zorina a tha lo thut an ti a, Zomuani ania min lo be tu kha,kal pahin ka nu te ka phone mai ang..Lo enkawl tha rawh aw...” ka ti a, Zohlima biangah ka fawp a, min chhan lehna pawh nghak hman loin ka tlanchhuak zui nghal dawr dawr bawk.

Jordana Hotel kan thlen hmain Zomuani bawkin min rawn call leh a, Hospital panin an chhuak chiah tih min rawn hrilh a, amah pawh a harh leh tawh tih a rawn sawi bawk, ka thaw huai mai.Ka nu ka call lah kha a pick thei miah lo a, Landline ah lah ka call tlang thei bawk hek lo.

Hospital kan pan ding lehnghala, ka rilru tih thawhven tumin ka mit ka chhing tlata,ka phili lutuk hian engmah sawtna a nei lo tih ka hria a, chu ai chuan fim taka ngaihtuah ka ngai,engmah na a neih ka hre tawh lo a, a lu na hi chu awmreng tur anih thu Doctor khan a sawi avangin thil danglam han thlen tu turah ka ngai lem lo.Ka Phone a rawn ri a,hlauhthawnna avangin ka lungphu a rang lehnghal dawt dawt mai.Ka en a, Zorina nu a lo ni a.

“Hello...”

“Min lo call animaw?”

“Aw,Nu,Zorina chanchin kha i lo hre tawh em?”

“Aih, ngatinge? Engtin nge a awm?”

“Nichin deuh khan nikhawhrelo in a tlu an ti a, hei Damdawiin kan pan mek” ka ti a, ka awah ka hlauthawn zia a lang thei,thup tum teh mahila ka thei hlawl lo.

“Ehe!! khawi Hospitalah nge? Ka lo kal nghal ang...” a ti hmawk hmawka,an kalpuina Hospital hming ka hrilh a, Ka pa a ko thawm ka hre thei bawk.

Hospital kawtah Zomuani leh Moses-a an lo awma, min hmuh veleh Zomuani’n min rawn kuah nghal vat bawk, a awmdan chuan ka awm a ti nuam lo zual sauh bawk.

“Khawiah nge a awm?” ka aw a lawi rat mai.

“An buaipui mek e, hlauthawng suh, amah pawh a harh leh tawh ania”

“Ka hmu duh”

‘Aih, an phal rih lo...” a ti ta tlat.Pawna thutna awmah kan thu a,an pahnihin a tluk thut dan vel min hrilh a, ka ngaithla liam vel mai mai.

“Noel-i khawnge?” ka rilruah a lo lang thut.

“A awm ve lo, ngatinge Noel-i a awm anga?”

“Ka...ka...” Moses-an ka kutah a rawn vuana, ka ena a mitah chuan engmah sawi lo turin min duh tih ka hmu thei.

“A tha leh vat ang,engpawh nise tunah chuan nghah bak tih theih kan nei rih lo a, ti hian nghak phawt mai ang u” dam thlap hian a ti a, Hotela ka hmuh bak kha tun hi ka hmuh leh hmasak berna a ni a, khami tuk atang khan Zorina a lo haw ta bawk si lo nen a lo kal ngai lo.

“Mos, lo lut ula...” Philipa’n a rawn ti a, engtia rei nge kan thut ka hre lo, ka nu te an lo la thleng ta lo cheu.Rang fe hian ka dingchhuaka, kan thu rei deuh bawk nen ka lu a haia, ka pai nawk mai, mahse, ka tluk hmain tuemaw hian ka banah a rawn vuana,ka tlu ta em lo hlauh.

“I tha em?” min rawn vuan tu chuan a ti a,ka en vata, ka beisei loh tawpin Hriata a lo ni a, rang lutukin ka kut  a vawnna ka thingthlaa, tawngka a chhang loin ka bu nghat bawk.

“Ward ah kan dah dawna, tunah Cabin a awm rih si lo a, puih kan ngai maithei ania” Philipa bawkin a ti leh a, Moses-a kal chu ka zui a,ka lut huphurh hluah hluah.

Khumah a mu a, a landan maiah chuan engmah na nei hmel a pu lo,tui taka muhil a ang mah zawk.A chalah ka zuk khawih a, khawsik a awm lo.

“A muhil rih anih kha,darkar chanve hnuah a harh leh mai ang” zawi deuh hian Philipa’n a rawn ti a, ka bu ringawt.

Wardah dah tuma an buaipui laiin vanneihthlak lutukin Cabin pakhat awl a awm dawn tih an rawn sawi ta hlauh,kan nghak leh riha, amah ber lah a muhil a, engmah na nei hmel a pu lawi si lo, engtia awm tur nge ka hrethiam lo,Inthen a duh vanga In chhuahsan a ni a, mahse,engmah thu tlukna ka la hrilh  loh avangin Nupui nihna ka la nei tho.Mahse, amah hi harh ta se ka enkawl a duh angem ka hre lo.Noel-i kha...Moses-a khan zep a nei tlatin ka hre leh hnuhnawh.

Darkar khat a liam leh chuan Cabinah kan insawn lut fel vek tawh,Darkar chanve velah a harh ang atih lah kha tun ah pawh a la harh ta lo fo. Zomuani leh Hriata an haw tawha, ka nu leh Ka pa bakah Mala an la awma, Mama a awm bawk.Moses-a erawh Philipa nen an inzui chhuak kha a lo la let ta lo, a haw ve nghal pawh a nimahna.

“Engtik atangin nge hetiang natna a nei tih hi i hriat?” Ka hmaa pa thau lam deuh thu chuan a tarmit chunglam  atanga min melh kuau pahin a ti a,a sawi awmzia ka hre chiah lo.

“Eng natna?’

“Eh...i pasal natna hi mawle, nge midang chungchang ka sawiah i lo ngai tih na mi?” a hnar tum dut pahin a ti leh a, a sual leh a fel lam ka hre lo, hre turin ka hmuh vawikhatna chauh.Mahse, a nelawm lo takzet tih erawh ka hmuh tirh khan ka hrethei mai thung.

“Aih, engmah ka hre lo..” ka lu ka thinga.

“I hre lo maw? Tikhawp hian a serious tawh chu ania,a hrilh lo  che nge i ngaihven lo?” a ti leh hluk a.

“Hrilh lo,ka hriat chin chu lu na benvawn a nei tih chauh hi animai”

“Amak hle mai, tuna ka hmuh danah hi chuan Inah pawh engmah hre mumal mang lo a a tluk tawp chang a awm ngei ang,chubakah a ke a hman theih loh vanga a thawh mai theih loh tum pawh a awm ang “ ka ka a ro nghal vek,chil lem ka tuma, ka beidawng titih bawk.

“Eng ...engmah ka hre lo.chutiang a awm ngai lo..” ka aw a lawi a, ka hrawk ro lutuk vangin ka khuh khauh bawk.

A chal a ti chuara, MRI result chu uluk zet hian a thlek nawn leh a, a tarmit a nawr chho a, hnai zawkah a keng a, a en a, a lek hla leh a,a lu a thing zui nawk nawk bawk.Thawk pawh ka thaw ngam lo,engmah a sawi ang a thleng ngai lo a, ka hmuh loh hnuah a lo thleng anih pawhin a la rei lo,karkhat erh awrh chauh a la ni bawk.

“A theih loh hulhual, a thluak chanve tawp hi a function lo tluk ania...a theih loh” min bia pawh a ang chiah lo.

“Ka...” ka ti hman chauha, Kawngkhar kik ri a awm tak avangin ka ngawi leh rih.

“Lo lut rawh” a awki nelawm lo zet chuan a ti hlur mai,hetiang chuan engtin nge Damlo te tan pan a chakawm ang ka hrethiam pha hlawl lo.Doctor pawh a ang hek lo.

“Sir, min lo hrethiam lawk aw” Hmeichhe aw hian a rawn ti a, ka hawi let vata, ka beisei loh lutukin Noel-i a lo ni a, zei zeta a rawn kal phei chu ka en mawl tawp ringawt.

“Aw, thu rawh” nelawm na tel miah lo bawk hian a ti leh a.Ka bula chair awlah a rawn thu thla ve a, min rawn ena, min nuih saka, Doctor lam a hawi zui leh mai bawk.

“Enge i duh?” bak zet hian a ti leh a.

“Noel-i ka nia, tuna i Damlo enkawl thar chiah Zorinsanga chungchang kha rawn sawifiah ka tum a” ka melh tlawk tlawk ringawt.Enge ani hian kei aia a lo hriat zawk thil leh a lo hriat ve chu ni ta ang?

“A tunge inih? A nupui chu i ni lo a, a nau nge?”

“A nupui hlui ka ni e.”

“Eheu!! A tha e, enge i sawi duh?”

“Zorina natna chungchangah hian kan pahnih chauha kan hriat a awm nual a, kan Doctor pan lai hian nangma hnena kal turin min ti a, a thluak hi kan inneih lai atanga Problem awm tawh a ni a, a tir chuan a lian tham lo a, Phai lamah te kan in enkawl a, a tha vek tawh ni a kan ngaih laiin nikum hmasa lam khan a rawn lang leh a, chutah pawh chuan Treatment te a la leh a, a tha vek tih an sawia,chuan a lu na hi a neih leh takah khan kan zuk kal leh a, tah chuan a thluak chanve hi a function lo thut thei reng tih min lo hrilh a..” ka kut ka hum kawp ngat ngat ringawt.Ka hriat ve loh thil hi engtia lo dawnsawn tur nge ka hrethiam hlawl lo.A natna pawh hian min ti chau tawk tawh lutuk, mahse, tuna Noel-i thilsawi leh khan natna sawithiam si loh min pe tha leh a, ka thidang mai dawnin ka hre hial mai.

“Chuan....” a ti boha, tlem chuan a aw a dam ta deuh.

“Thla hmasa khan a natna tuna mi ang hi a rawn chhuak tana, a lu na a chhuah rual hian a hriatna a hloh tel titih thin a, mahse, darkar hnih hnuah te a tha ve leh mai zel a, a nitelin a hriatna hi a hloh nasa tial tiala, a khawhmuh a fiah loh tum a tam ta em em bawk” a ti leh dap dap a,mi a ang maiin ka thu ngawi tlawk tlawk a, ka Pasal ni siin kei aiin a nupui hluiin a chanchin sawi tur a hre hnem zawk a, mualphothlak mai piah lamah nep ka inti ngawih ngawih.

“Anih chuan vawiin a ka lo hmuh dan hi a dik anih dawn chu,in duhna damdawiinah pawh refer che u mahila awmzia a neih ka ring tawh lo” hul zet hian a ti huk a, ka tum loh tawpin ka rum chhuak hawk mai.

“Chuti tawp lo deuh chuan tlem tal beiseina min pe thei angem?” a ti leh a.

“Aih, Damlo te hnenah dawt hmanga Hope neih tir ka duh lo,a thih leh dam ka sawi thei lo.Pathian thu thu a ni zawk,mahse, theihtawp chhuahin ka enkawl thung ang, ka beisei na tlemte awm erawh chu a nunna hi kan chhan thei anih hlauh chuan a tha, mahse, a ke hi a hmang thei in ka ring tawh lo a, a mit a del em lo anih chuan a lawmawm ang,tin, a hriatna a hloh then anih pawhin thil awm lo a ni lo thung ang”  ka khawng vek.Mumang nise tiin ka mit ka chhinga, ka meng leha, engkim a ngai vek.Beidawnna sawifiah thiam loh khawpa nasa hian min tuam a, khuarkhurum mawng nei lo a tla nen ka intehkhin ber.

Khuma a mu chu ngaihtuahna fim pawh pu hleithei loin ka melh tlawk tlawka,vawiin hi kan luhni atang khan ni 5 na chiah a ni a,  ka beidawng hluah hluah tawh, ka riluah zawhna ngai hlir a ri tlut tlut a,chhanna erawh ka hmu chuang hauh lo, engvangin nge a natna min hrilh loh? Ka pasal a ni a, a nupui ka ni bawka, eng anga dinhmun hniam leh zahthlakah pawh ding se a bula ding turin ka intiam tawha, a kut ka chelh anga, ani pawn min chelh ang chu,mahse, a ni ta si lo, kei aiin a nupui hmasa zawk kut chelh a thlanga, engvangin nge tiang hian a tih? Ka rilruah zawhna a rawn lut zel a, a chhanna min pe thei awmchhun erawh a muhil a, a harh chhunah pawh a lu na avangin an nachhawkna in an jection a, a muhil zawm leh zel bawk si.A enkawltu Doctor in zai tul a ti lo a,a mu chawrh chawrh a ni mai.Engpawhnise Noel-i lo kal leh ta miah lo vang ngawt pawh hian tlem chuan ka zia deuh lawi.Amah ka hmuh phei chuan ka thawpik a zual takzet.Zohlima pawh ka ngaihtuah hleithei lo a, mahse Nautei a riak phei a, Zorina nu a riak phei bawka,an kutah a awm tawp a,ka ngaihtuah lutuk lo thung.

“Nu...” a rawn che a, ka thu mar zawt bawk.

“Keimah, i harh em?” a hmai bulah ka zuk kun a, min rawn en a, a mit a chhing leh daih bawk

“Khawnge ka nu?” zawi sup hian a rawn ti leh a.

“Inah a awm rih tunah chuan, tui i in duh em?”

“Ka lawm khawp ang chu” chau aw deuh hian a ti leh sup a, Tui ka ban vata, Noah ka thlit chhuahsaka,rawn thawhkan  tuma a inbengkang chu rang zet hian ka nem mu leh a.A rum hawk bawk.

“Tho duh suh, i khum hi ka lo herh sang ang” tih pahin No ka dah leh a, khum mawng lama a adjust na awm chu ka pana, a sang zawngin ka herh a, thu mu deuh in ka kam sang a, khum lam ka pan leh a, mit khap miah lo hian min en ngura, a mitmeng dum fiah zetah chuan nidang ang bawkin enge a ngaihtuah ang tih rin hriat theih a ni lo,a mitmeng a a lo a, hriatna hloh hmel a pu hek lo.

Tui ka pe a, a in nghal khawlh khawlh bawk,” a tui hle mai, ka lawm e” tih pahin no min pe leta, ka nuih lui var var thung.

“Na i nei em tunah khan?”

“Aih, ka lu a hai deuh mai chauh..” a ti supa, zawn nei niawm tak hian a hawi kual leh a.

“Ka nu i hmu duh tihna mi?”

“Aaaah,ngatinge i nu ka hmuh ang?” ka khawng deuh lah mai,mahse, ka inthlah dul leh thuai bawk.

“Ka sawi mai mai,eitur lam i mamawh em?”

“Ka ril a tam lo, i theih chuan ka nu min lo call sak la, chuan ka thianpa Moses-a ka be duh bawk ania” a ti a, chau hmel zet hian a thaw hawka, a mit a chhing zui vang vang bawk.Rei vak lo chu tih mai tur hre loin ka din ngaiin ka ding ren rawn,Doctor sawi kha a thleng dik tihna a ni angem? A hriatna a hloh tak tak tih a ni mai angem? Ka khup a sai nghal dar dar mai.

Ka nu ka call a, hlauthawg reng renga nun hmang ani rih bawka, a pick rang lam mah a ni e,Zorina a harh tawh a,a hmu duh tih ka hrilh a, a thaw hak ri ka hrethei.Moses-a lo hruai tel turin ka hrilh bawk.

“An lo kal dawn e, Doctor koh i duh em?” a khum bula thut leh pahin ka ti a, a chal a ti chuar deuh a, a hmui a pet sawi zauh bawk.

“Duh lo,chu ai chuan Naute tu nge awmpui ka hre duh zawk?” a hriatna chu a tha tihna a ni leh lawi si em?!

“Nautei leh Ka nu an awma,ngaihtuah suh..”

“Anih chuan khawiah nge a nu a awm a?” a tawng dan hian awmzia a nei hlawl lo.

“Oh, Zorin..min hria em?” ka insum hman lo.Doctor khan a harh chian a a tawng peih hunah engpawh sawise engmah zawt chiam chiam lo turin min ti anih kha.Mahse, a tawng chhuak in persan lutuk hian min ti hamhaih lutuk.

“Hre chiah lo, mahse, ka hmuh hnu i ni tih ka hria” na zetin Bedsheet ka tham a, a rilru tibuai zual tura tawng lo turin ka rilruin ka tawngtai mawlh mawlh bawk.

“Ok, ngaihtuah buai duh suh, min la hre chiang leh mai ang, i damlo ka lo awmpui che anih hi” ka awah ka manganna tilang lo turin ka insum nasa viau.

“Nia, hre mai ang,min hrethiam la, chawlh ka duh,min be tawh rih suh” a ti leh hmuk a, ka bu ringawt.

Kanu te lo thlen hnuah a harh leh ta lawk lo a, mahse, Doctor sawi dan chuan a muhil satliah a ti a, kan inbiakna vel ka hrilh a,Ka nu beidawng hmel chuan ka na sa a belhchhah lo thei lo.

“Thil tam tam theihnghilh mahse nang chu a hriat leh vat che ka beisei tlat, Naute a hria anih chuan a hre em em ang che, mahse, nawr hmanhmawh suh ang che “ tiin Doctor pawn min thlamuan ve bawka, a tawngkam a nem lo a, a hmel a nelawm lo chung chunga Doctor tha a ni thei kha a tir khan mak ka ti a, mahse, karkhat dawn min enkawl takah chuan Doctor tha leh rintlak anih zia ka hrechiang hman hle tawh zawk.Tawngkam nem diai leh hmel nelawm tak,chhungril kha hle si an awm laiin tawngkam nem lo, thinchhe tak te hi an chhungril misual an awm ngai lo tih hi ka pawm ve ta thlap mai.

Ka samah tu emaw hian a rawn khawiha, Damdawiinah ka la riah char char avangin ka chau tawngkhawng khum bawhin ka lo muthlu hman.Ka thu mara ka mit ka nuai chat chat bawk,Zorina lam ka en a, uluk zet hian min lo melh ngur bawk.

“Morning...” a then suk bawk.

“Morning,mahse, tun hi zing a ni ami?” ka ti leh hnuhnawh a.

“Ni e,lo mu la..” tih pahin a mutna sir a beng thuka.Ka mengphawk vak thung, a harh chian hnu pawh khan min hre lo ta tlat kha ania,thil tamtak a theihnghilh rualin Naute leh midang a hre vek a, mahse,mak takin kei kher chu a theihnghilh zingah ka tel ta tlat lawi,chu aia la mak lehzual chu Noel-i a hre lo hlawm tawp bawk,chumai bakah tun kum hi kum 2018 a ni a, a rilru erawh 2016 ah a la cheng tlat a, mahse, thil lawmawm lam a awm ve tho bawk,a ke a hmang zui thei a,a mit a tha vek bawk. A kawng a chin hnuailam a zeng maithei tih Doctorin a sawi avang khan ka hlauthawng a, mahse, chutiang a thleng ta lo.

“Aih, a chep em mai..” ka zi mar ar ar bawk.

“Chep lo, a hma pawh khan hei aia tawtah kan mut dun tho kha..” ka mit ka chhing sawk mai.

“Khawiah maw?” amah en pahin ka ti fan raih bawk.

“Ka room Sofa kha mawle, i va theihnghilh hma ve, nimin piah lawk a ni sia” ka kut ka hum ruh a,lawm tur nge tah tur pawh ka hre tawh lo.

“Ni dawn tak...” ka ti sepa, ka la chesawn ta chuang lo fo.

“Anih chuan i lo lawn dawn nge dawn lo?”

“I chau zual ang tih ka hlau alawm”

“Huh...vat,ka dam lo min duat loh chuan i damloh ve hunah i hre dawn ania aw” a nui hawk bawk.

Ka lawn ta nge nge, amah si lo turin amah hlat thei ang berah mut ka duh a, mahse, khum a te lutuk lam mah a ni e, a ban a rawn dah pheia, a sir zawngin ka mu a, ka kawngah a rawn kuaha, a lungphu ri dat dat ka hre leh ta bawk.

“Nizan khan mumang mak deuh ka nei a” zawi zup hian a ti a, ka mit ka chhing daih bawk.

“Engtin?”

“Kan lo  innei a, mahse, ka lo khawih dawn chea, i lo bo daih zela,kum lah kha 2018ah a lo in sawn daih bawka” ka ip chawih mai.

“Anih chu mawle...mahse, mumang ania”

“Um,ka harh khan i lo muhil a,chan che ka duh lo tawp tih ka hrechiang”

“Kei pawh..”

“Thil ka sawi anga, mahse, i thinrim lo ang tih min tiam angai ang” ka bengah a rawn seh zauh bawk.

“Aih, sawi phawt la..”

“Nimina ka tluk hma khan ka natna hi ka hresa alawm, mahse, tih mangan che ka duh lo a,ka thluak ah hian bawk a awma, zai chi a ni lo tih kan confirm tawha..Ka lu na a awm reng bawka”engkim mai hi nimin ang chiahin a hre leh ta tlat chu ania..a va han hahthlak in a va beidawnthlak si em.

“Chuan..” ka ti sepa, a dang sawi tur ka hre lo.

“Buaipui ngai ka nih chuan min kalsan ka hlau a,a chhanchu ka hmangaih miau che a..”

“Aih, kalsan dawn lo” ka tum aiin ka aw a chang hret.

“I thinrim maw?” ngaihthat lohna a awah a lang thei.

“Thinrim,mahse, nasa loin..i tan enge ka nih chiah ka ngaihtuah a, i that lai chauha i bula awm tur tawk lekah min ngai hi na ka ti alawm” ka tum loh tawpin ka mittui a rawn tla a, ka insut zui hraih bawk.

“Shh...min en teh..” amah en thei turin min kuai her a.mahse, a awmah ka hmai ka phum daih thung.Min rawn kuai daka, ka mitah a rawn fawp vang vang bawk.

“Ni lo e...Noel-i pawh khan hei vang hian min kalsana, ka nau lakah a uire asin” nghet zet hian ka kuah ta nge nge.Tunah Noel-i a hre leh ta lawi.

“Kei chu ani nen min tehkhin suh”

“Teuh lo mai, ka tan chuan mi danglam i ni zawk, kha zan hun kan hman hmasak ber zan atang khan ka nei ngei ngei ang che tiin ka tiama, mahse, tunah ka natna a lo chhuak leh a, min kalsan i duh ka ring a..”

“Min kal tir talh pawh tum la ka kal lo ang..”

“Um, tiang chiah khan Noel-i pawn a sawi asin,ka nau nen an mudun tih hi ka hria tih an hre kher lo ang, ka natna vanga kal turin ka nawr a, a kal ta anih kha..Mahse, ka thi ta mai lo a, ka tha leh ta si a, nang ka nunah i lo lut ta bawka,a mangangin a tibuai che a, kan In a i lo kal tuma kan awmdan te kha a lo record ta vel a..” a ti leh  duah, mak ka ti tih piahlam a ni thung.A chhungril hi  a tha hauh lo ang tih ka hre nangin hetiang em a tenawm anih ka lo ring tak tak ngai lo.Mahse, tunah hian Zorina hi a harhfim lo,kan khawvel dik takah zawk kha chuan kei ni loin Noel-i bawk anih kha a thlan leh tak zawk.

Kawngkhar kik thawmah ka harh a, kan pahnihin khum chep zetah kan lo la muhil dun a, tih harh hlau zet hian ka tho a, Doctor ward Visit tur a lo ni a,kan that leh that loh te min zawta, Zorina a rawn harh zui ve mai bawk.Kan record a enkual zung zunga, kan chhuah theih tur thu a sawi a, ka lawm rualin ka hlauthawng tel bawk.Tunah hian eng lai nge a rawn hriat leh ang tih ngaihtuah reng renga hun hman la ngai dawn ta cheu.

“A dam chhuaka, a ke leh mit a hmang zui thei ngawt pawh hi Pathian kut bak engmah mawhpuh tur ka hre lo,a hriatna hi chu nitin a phak tawk zel a hman mai bak hi chu chunglam kut tho a ni a, hmanhmawh suh ang che u” tiin min thlah thlap bawk.

Thla khat lai inah kan awm leh tawha, a hriatna lam erawh hmasawnna hmuhtur a awm meuh lo,Zohlima lah Mala te fa emaw a ti tlat a, mahse, mak takin kan inneih leh neih loh lam kan sawi ri lo a, a nupui angin min pawm fel hmak lawi.Hna lam pawh Moses-a nen an sawi dun chamchi a, engmah danglamna awm lo niawm takin hriat hmaih a nei mang lo,kum zat erawh 2016 tiin a ziak a, a sawi vek bawk, Ina kan calendar kawl lai ka dah bo tir veka, 2016 calendar Moses-an min rawn pe a, kan tar ta zawk.

Thil tla ri burah ka muhil ka harh zawka, thinthi hian ka mu ta meuh lo,ka tho vata, khum chunga light eng dul deuh chu ka on nghala, ka hriatthiam chiah si loh hian ka chhungrilah min man tlat bawk,Zorina mutna lam ka ena, a awm lo...thaw ri deuh hrawih ka hria,rang zetin a mutna lamah ka bawk pheia, khum bul ka en nghala, Zorina a lo mu a, thawh tumin a lo bei mek bawk.

“Ngatinge? I tha em?”

“Aw,mahse,Hon..ka ke lam hi a che thei tlat lo..”

“Oh, khawi ka lo pui ang che,ka kut hi rawn vuan la...” ka ti a, a rawn phar a, mahse, ka kut rawn vuan loin a phar chhuak du ringawt.

“Khawi..” ka ti leh a.

“Vawn chu ka duh alawm, mahse, i kut ka hmu tlat lo...Light kha on teh” ka che deuh dawt mai, Light ka on hi a eng a dul deuh nangin  engmah hmuh loh tur a awm lo.

Chapter- 29

A kutah ka zuk vawn saka, ka pawt tho ve mai.Mahse, a khup a tawm dawna a thei lo..

“Ka ke hi ka ti che thei miah lo..” hul zet hian a ti a.Ka chhuk sawk sawka,a kawngah ka kuaha, ka pawm tho dawna ka ti hleithei lo,Mizoah chuan a lian pawl a ni ve a, kei lah ka sang lem lo bawk.

“Lawk,Zoi ka zuk ko lawk mai ang” ka ti ta thlawt.

“Ngai lo,vawikhat chiah try leh ang..Ngatinge ti hian ka awm ngawt ni?” a ti leh sup a.

Thawk ka la te te a, a kawngah ka kuah leh a, Bedsheet a pawt ve bawk,”Vawikhat chiah min nem leh la...” a ti a, ka nem kang leha, khumah kan let kai dun hlawl bawk..Hah lutuk avangin ka thaw hlawp hlawpa,chet pawh che peih loin a chungah ka bawk zawi thlar mai.

“Ka tibuai nasa hle mai che” ka sam karah a kut zungtang a rawn rawlh a.

“Aih, tibuai lo..na i nei em ka hre duh zawk?” ka hawi chhuaka, a awmah ka khabe ka nghata, a hmelpa zet chu ka ena, a khabehmul zuah kual vek thin kha tunah chuan a met fai vek tawha, hmul to tur a awm siar siara,a hmui chhah deuh tap mai chu a chip hmak bawk.

“Nei lo, na neih lam ai chuan ka kawng hnuailam che thei miah lo hi ka ngaihtuah tlat, chuan, Light on tawh teh” ka mit ka chhing sawk mai.

“Ngai lo, muhil leh zawk ang, Dar 4 vel chauh a la ni ania” ka ti ta ngawt.

“Yeap,i thu ber alawm..mahse, ka ke lam bawk hi..”a ti leh a.

“Kha chu zing lamah i Doctor kan be zawk dawn nia” a khabeah ka fawp zauh bawk.

A darah ka lu ka nghata, a kawngah ka kuah bawk,a muhil thaw ri sak sak mai chu ka ngaithlaa,min hnemtu ni thin,a changa natna min thlen tu,mahse, ka nunna tluka pawimawh ni si kha tunah chuan mahni pawh in saseng thei lo khawpin a sawp chhe ve ta chu ania, mihring hian hmalam hun kan va han hre lo tehlul em.

Zanin a awmdan avang khan Damdawiin pan rum rum tur niawm tak ka ni a, mahse, a Doctor khan eng hunah pawh a taksa lamah hetiang a tawk thut anih pawhin hmanhmawha phili chuk awmzia a awm dawn lo a, darkar thum tal nghak thin turin min ti anih kha, a chhanchu ahma pawhin a awm zauh zauh tawh tih Noel-i khan a sawi a,Darkar hnih khat hnuah a pangngai leh mai thin a ti kha ania, kan Doctor pawh khan chutiang chu thil thleng thei a ni tih a sawi bawk.

Peih lo zetin ka mengchhuaka, Tukverh atanga ni eng lo lut chuan ka hmai a rawn chhun a, ka mit ka chhing leh a, nizan thil thleng kha...Ka thuchhuak hlawl mai,mahse,..Zorina a awm lo, Zohlima khum lam ka en leh a, a awm chuang lo..Ka muthla leh a, nizan ami kha ka mangchhia mai a ni hauh lo tih ka chiang, mahse, Noel-i sawi ang bawk khan darkar a liama,a tha leh ta si tihna a ni em? Engtia rei nge tiang hian hun ka hman ang? Zawhna tawp thei lo,chhanna awm chuang bawk si lo.

Inhnuaiah ka chhuk thla a, a lo reh thiap a, Pawn lam ka pan a, ka thil hmuh chuan min ti ding leh rih,Thira siam thutna then theiah an pafa in an lo awma, Zorina malchungah a thu a, Zorina Phoneah thil hmuhnawm a awm niawm tak hian an pahnihin uluk zetin an en dun bawk.A lian ve tial tiala, a pa a ang tual tual bawk,thla tharah kum khat a tling ve tawh dawna, thil thar a zir zela,a thiam thar apiang hi ka lawmna thlentu anih rualin ka tahna thlentu a ni tal zel bawk.Ka nu leh ka pa an lo kal awl lo a, mahse, a hma ang bawk khan Mala te nupa erawh ka la pawh thei ta chuang lo cheu, thil pawimawh bik anih lem loh chuan kal pawh an lo kal ve zen zen hek lo.

“Morning...” min rawn en a, ka ngaihtuahna atangin ka harh deuh zawk bawk.Ka pan phei a,ka fapa pawn min lo melh kar bawk,Zorina buaipui angaih tum atam avangin ka duh loh dan berin ka khawsa ta fo,Zohlima pawh a awmtu nu kutah ka dah tam ta, mahse, nu ka nih angin a chaw pek te,a damdawi eitur te engkim ka kutah ka dah lui hram hram thung.

“Morning...min thawh khalha” ka ti a, a bulah ka thu thla ve a, Zohlima’n min lo ban a..

“Nizan khan i mu tha lo tih ka hria lawm,i mu nileng mai ang chu ka lo ti a..” a nui a.

“Chi nang, Mipa pahnih, pawimawh em em te hi ka mut san reng chuan midang an lo zawng mai ang tih ka hlau alawm” ka nui a,a nui ve hauh lo thung,Uluk zet hian min en a, kan thutna hnung lamah a ban a phar duai bawk.

“Ngatinge Mala te hian an fapa hi an ngaihven miah loh?” zawi sup hian a ti hmuk a.

“Aaah, keiman ka awmpui duh alawm”

“Ka hria, mahse, keimah chauh min en la ka duh laiin i rilru chanve Zohlima lamah a awm zel tih ka hria alawm,chu chu ka duh lo” ka hmui ka pet a.

“Aih, chutiang a ni lo..’’

“Ni e,mahse, i hlimpui phawt chuan sawisel ka tum lo.Fa ka nei thei dawn em pawh ka hre lo a” a ti leh supa, a awah na tuar a ang viau bawk.

“Nei thei ang, chutiang ngaihtuah suh”

“Noel-i kha i hria em? Ani nen khan fa kan nei miah si lo a,nangmah nen neih ka duh a..mahse, ka confi tlat lo”

“Thil dang sawi ila...vawiin chu Doctor kan pan dawn mi niang?”

“Kan kalni a ni em? Anih loh chuan tlaiah Party kalna tur kan neih kha..”phawk zet hian ka melh a, khawi Party mah kalna tur kan neih ka hre lo.

“Eng party nge?”

“Nimin khan ka hrilh vek che kha, vawiin hi ka Pi piancham a ni a, CAKEWALKERS staff te zawng zawng in tel vek angaia,chumai bakah nang phei chu ka tan mi pawimawh i ni a,i thulh thiang lo bur” a rawn thle buka, ka samah a hmai a rawn phum zui vang vang bawk.Beidawnna sawifiahthiam loh khawpa nasa hian min fan nghal rawih rawih mai.Engtin nge ka tih tak ang? Ka nu emaw ka pa pawh ka biak vat an ngai.

“Ka lo hre leh tawh lo a, mahse, i hresual anih ka van ring ve, vawiin hi chu Saturday ania, ka pi piancham kha chu next week lam a ni zawk lo maw?” ka ti ta ngawt.

“Aih, vawiin hi Saturday pawh nise a ni zat angai reng, a kum 90 na a ni bawka” a ti leh a, ka chil ka lem khalh ringawt, engmah a sawisual tlat lo.

“Ih,diktak chuan eng party mah kan sawi ka hre lo tak tak ania” a mitah tak ka en a, Zohlima lah thuawih zetin ka mal chungah a thu tawm kak bawk.

“Aaah, nimin khan kan sawi alawm,ni lo, i hre ve lo tak..Noel-i zawk animaw kan sawi laia awm kha..” a ti leh a,nimin khan a chhuak ngeia, mahse, rei a chhuak lo, Darkar khat aia a rei pawn a reina a tam lo ang.Officeah a kal a, Moses-a leh Jordana te nen an hna chungchang ah sign tur a awm avangin an inhmukhawm tih ka hria,engpawh chu ka pa te nen lo sawi tehreng pawh nise kei hi CAKEWALKERS staff ka ni tawh lo tih a hre tlat lo hi a dik thei chuang lo.

“Ok, a tha alawm, thil i ei tawh em?” ka ti leh daih, Topic ngai reng kan sawi hian a buai zual phah ni in ka hre fo tlat.

“Ei nang, ka lo nghak che..khawi Mampuia chu ka lo la dawn mi?” tih pahin a rawn bana,a thawhpui nghala, inchhung lam an pan chu an hnungah ka zui a, a Pa dar kar atangin min rawn en kar a, ka hmangaih hluah hluah,kal pahin step bula Zohlima Walker awm chu a la a, awlsam zet hian a khai kang lawp bawk.Nizan kha chuan a mit in engmah a hmu lo a, a kawng chin hnuailam a hmang thei hek lo..

Thil kan ei zawh hnuah Doctor ka be ta chauh.

“Nanun, enge ni ta?” nidang ang bawkin a aw a nem leh pek lo,mahse, ka hlau eih tawh lo thung.

“Nizan khan a tha lo thut ti ila a mit a hmang thei lo a, a kawngchin hnuailam a che thei lo bawka,mahse, zingah chuan a tha leh vek lawia”

“Um,amah a harh tihna mi?”

“Aw, harh ee..lo kalpui ka duh a..”

“Um,lo kalpui rawh, tlaiah nise aw..test hun kha vawiin a ni lo nangin vawiinah kan timai dawn nia” a rawn ti leh a, thlatin vawikhat tal a thluak lam an check leh ziah a, a Damdawiin a control that leh that loh an check tlangpui.

“Ok, ka lawm e..” ka ti a, ka dah a, tukverh lam ka hawi a, kan room Balcony bula Kuhvarah kung lian zet ding,thliin a chhem phet dar dar chu ka en a, nun hian awmzia a nei pawn ka hre lo ta fo chu anih hi a.Mahse, tunah ai hian Zorina hian min la mamawh nasa ngai lo a, ka beidawng hmel a hmuh a thiang lo bur zawk.

“Tu nge i biak kha?” Zorina aw in a rawn ti thuta, ka phu zawk bawk, rang zet hian ka hawi let a, kekawr ipte zen tut chungin kan room kawngkhar a nghenga, a lo kal lai ka hre miah lo.

“I Doctor,vawiinah In check-up a hun tawha”

“Aih, naktuk zawk anih kha..”

“Mahse, naktuk chu Sunday a ni sia lawm, vawiina kal a lo remti hlauh a,a tlai lam ai chuan a hma hret a pawi lo, Monday nghah leh kher tul ka ti lo” ka ti a, ka thutna tangin ka tho a, a la chesawn chuang lo, uluk zet hian min melh ngur a, engmah a hmelah a ngaihtuahawm ka hre thei lo.

“Nizan vang khan a ni em?” khum bula Zohlima toys tla ka chhar a.

“Aih...”

“Anih chuan ka kal lo ang,engmah that lohna ka nei lo,nizan ang kha chuan ka awm fo tih i hriat kha..” a ti leh a’ka hre ngai lo’ tih khum nghek ka chak zek zek, kei ni loin Noel-i zawk in a ni hre thin ni..

“Mahse, i in check-up a hun tho alawm...”

“Ka kal dawn lo ka tih kha..” fiak zet hian a ti thawta, ka hawi let rang kher bawk.

“Ngatinge? Enge dik lo awm?” ka ding zum zat mai.A mit meng thim raihah chuan engmah pawisak nei lo tih hai theih a ni lo.

“Ngatinge nitin min nawr luih reng a? Keimah hian min awmtir mai teh,bakah..Nangpawh khawih i duh ngai lo a,mutnaah takngial pawh kuah ringawt bak che engmah ka ti thei hek lo...Ngatinge?”  

“I thei alawm..” Ka aw a dam thlap bawk.

“Aih, i inpeih hma chuan ka khawih lo ang che ka tih kha, mahse, kha mitenawm Hriata vang a i tap ka hmuh leh chuan ka that hreh dawn lo che ania” min rawn pan hnaia, ka tawlh hnung hrat thung.Enge sawi a tum ka hrethiam hlawl lo.

“Hriata...” zawi sep in ka ti nawn ve sap a, ka inrin hman hmain ka bul a rawn thleng hman der.Hlauhna avangin ka khur zui dar dar mai,a hmel inpetruh teuhah chuan nidang a ka la hmuh ngai hauh loin Kut thawh chakna a lang thei a, engemaw hlekah kut min thlak hreh dawn miah lo tih ka hre thei tlat bawk.

“Ti suh...” ka sawi zo hman tawk, amah si chetin min pawt hnai dawrha, ka tukhum samah a rawn thama, min pawt daka a hmui chhap tap maiin ka hmui a rawn si a, dimna lam a lang eih lo,ka thlesawn tur chu ka samah a tham beh tlat avangin ka tan nasat poh leh ka luvun a na ting mai bawk.

Dim lo zetin a rawn nawr kaua,a awmah ka nema, thleksawn leh ka tum chu ka hmui a thip zawka, ka ka chhungah a lum lut nghal pawp bawk.Mahse, hreawm pawn a awm chuang lo,min rawn fawp buan buana, engtinmah ka danglam lo, hlauhna leh rapthlak tihna bak engmah ka ngaihtuah thei lo.Ka tha tawpin a awmah ka nem leh a, ka beisei loh zetin min thlah zui ve mai, ka pai deuh data, mahse, ka tlu em lo,ka hmui ka hup nghal vat bawk.

“Ti khan ka duh chu a chhanna ka hmu mai alawm” a ti hmuka, Khumah a thu thlaa, a vang zawngin a mu zui zat bawk.

“Engmaw i hmuh?” ka aw khur hrep pawh chu a.

“Tu nge i duh tak tak zawk mawle,nang pawh hi Noel-i ang bawk i nih hi”

“Aih, ni miah lo...”

“Anih chuan fiahna ka duh...” beidawng lutukin ka thaw hawk mai.

“Eng fiahna nge ka pek ang che?”

“I duh duh, min neih i duh thu i sawi theia, fa min pe thei bawk a” ka en tlawk tlawk ringawt.

“Zorin...”

“Um...sawi rawh..i duh zawk zawk i thlang thei,i thlang lo thei bawk” a rawn inlet thuka, min rawn en a.

“Eng fiahna mah ka mamawh lo...” a mitah tak ka en lui ve ngar bawk.

“Ouch, a va tha ve..chuti anih chuan i haw nghal thei..”

“Khawiahmah ka kal lo ang”

“Takzet...” a awah tihelna a lang chiang viau.

“A chhanchu maw,kei hi i nupui ka ni a, chuan, kan pahniha kan fa tunah hian ka pawm mek bawk, chumi pahnih chu a ni lawmni fiahna atan i duh kha” a hmel danglam zawk chu ka hmuh hmaih hauh lo.A hmui a petsawi zauha ,ka besei loh tawpin a nui chhuak hawk bawk.

“Kan inneih lai ka hre miah lo asin, bakah engtin nge thlahnih lekah Naute i neih ngawt theih? Hriata fa zawk i pai tihna nge? Aaa, a ni lo ang,i inzuar tak alawm, a pa ber pawh i hre lo ang...”

Engmah ka sawi thei lo, ka tum loh lutukin ka biang a rawn lum thla pap a, ka hmai ka hupa, ka dinna chhuatah ka thu sawp thla a, ka taksa a khur zui hlawk hlawk bawk, tap ri lo turin ka theihtawp ka chhuaha,mahse, ka hlawhchham..A hriatna a hloh hma atangin rilru natna min siamsaka, inthen a duha, ka natna pawh a reh fel hma hauhin amah ka buaipui leh a, mahni inkhawngaihna avang in ka chau ve thin, mahse, ka pasal anih tlat avangin ka chau thiang lo..Khang zawng zawng te kha tunah hian a vaiin ka tah chhuah pui ta nge nge.Beidawnna vawrtawp,nun hian awmzia a neih miah lohna hi keimahah hian a awm kim vek.Ka lo insum tang tangna leh ka tawrh hram hramna kha a kehchhe ta vek.

A rawn thu sawp thla ve a, min rawn kuaha, a awmah ka hmai ka phum zui kak bawk,ka samah a rawn fawpa, ka hnungah a tih fo thin danin a chul hauh hauh bawk.Keilah ka tah ban a hnekin a chhuak zual sauh thung.

“Sorry....khatiang ka sawi leh tawh ngai lo ang” tham tuak hian a ti sup bawk.

Ka tahchhuak zualpui a reh meuh chuan a kawr awm a huh dap tawh,nghet zetin min kuah beta,khum a nghenga, a kapkarah ka thua,amah ka ngheng ve thung.

“A zia lo hle mai..” inlakhran tumin ka che a, mahse, min kuahna a thlahdul eih lo..

“A pawi lo, i tawrh nasat zia hi ka hria alawm, i tap har ka ti zawk asin” dam thlup hian a ti a, mak ti zetin ka en chho nghal vat bawk.A tawng danah khan atna nei hmel a pu tlat lo.

“Maw?” mak tihna ka awah a lang thei.

“Ka hriatna ka hloh tih hi keipawn ka inhria asin,Damdawiin kan chhuahsan dawn ni khan i mut hlanin engkim Noel-in min hrilh vek,min enkawl a duh bawk a, mahse, mak deuhin ka chhungril hian nangmah zawk a thlang tlat che.Eng ber nge ka hloh erawh ka hre lo thung,keimah vanga i tawrhna erawh ka hmuh hmaih ngai lo, a tir te atangin ka hmu vek,tap chunga i tawngtai lai te hian che ngam loin ka muhil der thin a,ka hriat loh thil hriattum in ka buai thin,ka nu hnenah ka nupui i nih leh nih loh ka zawt a, i lo ni ngei bawk,mahse, hetiang ngawta i hun i hmang tur ka duh loh avangin min kalsan la ka duha, enkawl harsa leh ka bula awm nuam lo rawk khawpa siam che ka tum thin bawk, mahse, i beidawng suh si lo..Diktak chuan ka chhungril hian kal turin ka duh miah lo che, ka nupui inih lai hre lo mahila ka tan chuan BEISEINA ENG  i ni tlat a..Ka nunna thil pawimawh lutuk,ka taksa peng pakhat ang mai hian ka ngai tawh bawk che...”

“Ka kalsan dawn lo che ka tih kha..”

“Ka hria alawm, mahse, engtik niah emaw chuan ka la zeng anga, ka mit a del bawk ang, chutih hunah chuan i hloh tamzia i ngaihtuah anga, i tlai hmain kal la ka duh zawk..”

“Sawi tawh suh,ka Hmangaihna che hi a nuam chin a ni lo..”

“Ka lawm e, ka Hmangaih ve che em tih ka la hrechhuak  mai thei rih lo..mahse, ka sawi kha, ka Beiseina neihchhun, dam chak na nei tura min nawr kaltu awmchhun i ni tih hi chu ka chiang” a ti leh a, engmah sawi loin a lungphu ri dat dat chu ka ngaithla a,engmah a ni lo a, mi chanve, a hriatna tam zawk hman thei lo ani chung hian ka tan chuan Pasal, ka In..ka inhumhimna a ni tho tho.

Nitin kan nun a ngaiin kan hmanga, Zorina awmdan a danglam tum a tam tial tiala, amah leh amah in hriatchhuah tumin a bei nasa em em bawk.Naktuk hi kan Fapa kumkhat tlin cham a ni a, a lawmna tur lam ka nu te pahnihin an buaipui a, Zorina khan a Pa nen inzawmna neiin sawi leh mahse engmah a lo awm hauh lo. Chu chu Zorina nu pawh hian a hrechiang tawha, Zorina damloh lai leh a hnu thleng pawhin kan inhmu tam tial tiala, ‘Nu’ na na na chu ‘ Nu ‘ an lo ni a, ka chhungrila huatna ka lo pai te kha nitin ka paih then hret hret a tunah chuan kan inpawhna te duhthusam ni rih lo mahse hmuh te, biak te hi pawi ka ti tawh lo.

“Mambawih, hei hi Joe-a khan hman a ti a, engtin nge niang?” rawn kal hnaih pahin a ti a, a phone a rawn lek hnaia, Naupang in awmlemna atan chuan  duhthusam a ni ringawt.

“Ehe..a va nalh ve, mahse, nikhat atan chauh a ni dawn sia” ka ti a, a senso lamah ka buai hran lo.

“Nia, chu chu Joe-a pawh ka hrilh a, mahse..a harsa lo a ti a, pump puar chi a hmang dawn a ti a”

“Ok,a that chu..lo enpui mai ula..Zorina vawiin chu a nuam lo deuha, ka han ngaihven lawk ang” ka ti a.

Room lam ka pana, zing atangin a lu na a sawi a,engmah a ei mumal lo bawk.Dimtein Room kawngkhar ka hawnga, bawkkhupin a lo mu a, darkar khat hmalam khan Damdawi ka pe tawha, a muthilh theih hlauh chuan a zia.Nidangah a lu na a chhuah tum chuan amah chauhin Roomah ka kalsan tawp zel a, Zohlima hmuh atan phei chuan ka duh lo bur.

Khumah ka thu thlaa, a chal ka khawih a, a lum lem lo..Chhuahsan leh mai tumin a chalah ka zuk fawpa, mahse, a dik lo...a thaw lo in ka hre tlat.Ka zuk kun hnai leh a,engmah a awm lo...

Chapter- 30(last chapter)

“Zorin...”a luah ka sawia,mahse, awmzia a awm lo.Mangang phili lutukin ka tlanchhuaka, ka nu ka ko tuar tuar bawk.

Ka pa a rawn thleng chho hmasa bera, Khumah a lawn chilh nghala, na zetin a awmah a nem a, a kaah a ham bawk..Engmah tihtur ka hre lo,ka khup a zawi a, bang nghengin ka ding thei tawk tawk a ni ber.

“Mama,Bawiha..” ka pa au ri te chu mumang ang mai hian ka hria riai ruai a, ka mittui avangin ka khawhmuh a phe vek bawk.

“LALPA, a thaw a rawn awm e”  Ka pa aw a lawmna chu ka hriat hmaih lo,mahse, khum lam ka la pan ngam chuang lo, ka nuin min kuah bet a,ani erawh a tap ve lo thung.

“Tuemaw khan Motor lo la chhuak ru..Ka rawn pawm ang” Ka pa aw bawkin a ti leh a, ka nu dar kar atangin ka va en a, Mala leh Ka pain an lo chawi kang dawn mek a, Zorina erawh chu engmah a hre lo tih hriat zet hian a zawi vek a, an khawih ang angin a awm bawk.

Damdawiin kan thlen lai pawh engmah ka hre mumal lo,ka mang hriat ruai vek zawk, ka mal chungah a lu a awma, ka pa a ke lamah a thu thung, a kut ka vuana, nunna nei lo nimaiawm tak hian a vawt thlur bawk.

Darkar tam a liam tawh, mahse, a la harh ta lo fo,mangan dan tur pawh ka hrethiam tawh lo.

“Darkhar khat lek pawn lo tlai ula chuan a thaw a tawp hlen ang” Phillipa’n a ti anih kha,ka han hmuh lai khan a thaw a awm tawh lo hrim hrim a, ka pa khan vanneihthil thu takmeuhin a thawk tir a ni ber.

“Tih theih kan neih zawng zawng chu kan ti veka, mahse, Pathian kut nghah ngat ngat mai loh chu engmah tihtur dang a awm chuang lo,i nghak phawt mai ang u” ti tu a Doctor chu ka ena, amah a ka in nghah tluk zetin ani hi Pathianah a in nghat ve thung.A tawngkam a lo bungin biak a lo nuam lo deuh pawh nise amahah hian kei chuan Pathian hmel ka hmu thei a,a tawngkam tinrengah Pathian hming lam ve sek lo mahse a nun hian a nun chhuahpui takzet tih ka hre bawk.

Nithum lai engmah hreloin a mu ta,Zohlima birth day lawm kan tumna lam pawh engmah sawizui a awm tawh lo,Zorina vawikhatmah ka kalsan hek lo.A mu chawrh chawrh a, a taksa a kham kan hlauh avangin kan let kuala, kan hmet a,a delh pilh loh nan a delh nasat lam bik awm lo turin kan uluk em em bawk.Nitin beiseina nen ka tho a, Pathian hnenah tap chunga ka dil lah a tam lutuka ka hre seng tawh lo hial zawk.

“Enge vawiin lam in an le?” Ka nuin min rawn call a.

“Kan ngaireng animai.Nu..lo tawngtai ve rawh aw” ka hmui ka peta, ka nu hi ka haw thin,huat satliah mai pawh ni loin Thi se ka ti hial thin,mahse, kei,sualna nei lo a in ngai ai hian a nun inlet hi a ropui zawk,amah ah hian hahdamna ka hmu a, kan unau min enkawl loh laia kan hrehawmna zawng zawng te kha rulh let tumin a beia, ka natna chu a natna a ni a, kan hlimna pawh a hlimna a ni tawh bawk.Kan inah a awm lut tawpa,Zohlima pawh a kutah a awm chawta, Damdawiin lamah Zorina nu a rawn tap ve chawt thung.

“Tehreng mai, i mittui te hi Pathian hian a thlawnin a luan tir lo ang, Bawihte, chhel takin awm la, i tuar theih tawk bak hi engmah a tuar tir lo che tih hrereng ang che” dam thlap hian a rawn ti leh a, ka mit ka chhinga, ka mittui ka biangah a rawn luangthla a, hruk pawh ka tum buai peih lo.

Nilengin engmah hmasawnna nei loin ka awm tluan leh ta nge nge, a changin a bulah ka muhil a, a changin lehkhabu ka chhiarsak bawk.Hun rei tak ka lo ngaihven tawh ngai miah loh kha ka ti thar leh a, thinlung tim leh inthlahrung tak chungin BIBLE pawh ka bih veleh ta.Kan hlim lai leh kan nupa nun tluang taka a kal lai khan keimahni a kan neih ve theih reng emaw tiin Pathian thu lam ka ngaihsak lo,tawngtai te pawh ka tawngtai ve ngei,mahse, chhungril thleng phak si lo tawngtaina, a langa mawi mai zawk a lo nih zia hi ka inhrechiang em em tawh zawk.

Ka nu leh ka pa bakah Mala an lo kal a, haw turin tih takmeuhin min rawn nawr rawn ta tlat,hnial ngaihna an awm lo.

“Keimah ka riak dawna, engmah ngaihtuahna tur a awm lo.I hah rimtawng lutuk tawh” ka nuin a ti a.

“Aih, haw mah ila ka hahdam chuang lo ang, ka muhil theiin ka ring chuang lo” nui chungin ka ti a.

“Ka hria alawm, mahse, i fapa pawh ngaihtuah tel la, i nu awm mahse i fapa hian nu a mamawh ve tho ania” ka mitah tak a en ran bawk,a sawi dik tih ka hria.Zohlima hian min mamawh takzet, chutiang bawkin Ka pasal pawh hian a nu a mamawh ve tho bawk.

“Anih chuan naktukah zing karah ka lo phei leh mai ang, engpawh thil danglam deuh bik a thlen chuan min hrilh ngei ngei rawh aw” ka ti ta nge nge.A bu nghata, ka bag ka ak a. Zorina ka pan hnaia, engmah hre lo a a muhil chu ka thlir a, a hmel engmah danglam a awm lo,a khabehmul a to tan a, a hmui nalh zet erawh a dang deuh bai thung.A sam hi a zual hmasak zawk khan a thluak lam an check duh avangin an met kawng vek a, tunah chuan a to leh vek tawha, a dum hlapa, a hnawk deuh niaih bawk.Ka kun hniama,a chalah ka fawp a..’Ka hmangaih che’ zawi tein ka ti sep bawk.

Zohlima’n min lo ngai viau mai,ka nu in inchhung khawsak engkim a lo enkawl veka,Zoi a awm bawk a, engmah ngaihtuah hah a ngai lo.Moses-a leh Zomuani mai bakah Hriata thleng pawn ka tan an tangkai ta vek.Zorina natna vanga ka hriat chian tak em em mai chu Midang huatna thinlung kan pai hian keimahni kan lo hah a, kan lo hrehawm mai mai zawk a lo ni tih hi.

Ka inbual zawh veleh khumah ka bawk thlawpa, ka mutchhuakin min zem nghal chiai chiai bawk, Damdawiinah khan ka muhil thei vek nangin engtin emaw a awm hlauhna avangin mut tak takin ka mu ngam ngai lo.Ka mit ka chhinga, mahse, Mala thilsawi lam kha ka bengah a rawn ri nawn leh ta zawk.

“Ka u hian a Hmangaih takzet che, a nunna tluk zetin a hmangaih che,engmah i hriat ve loh chhan pawh hi a tel loin i nun hman zir la a duh vang a ni a, engtik ni ah emaw chuan tiang hian a awmsan dawn che tih a hrechiang a, mahse, i kalsan duh dawn lo tih a hriat avangin na taka siam mai che kha kawng awmchhun niin a hria a, Noel-i nen inkawp ang maiin a rinluih tir che a...amah leh amah a indem tum hi a tam asin,kei leh Noel-i inzawmna te hi a hrereng chungin vawikhatmah a sawi chhuak ngai lo a, mualpho hauh loin a then fel mai zawk.Chutih rual chuan in inzui hnu lawk khan he natna hi a damchhung atan a ni tih a hrechhuaka, kan hnenah i rawn thawh hnu lawk tihna anih chu,chuvangin  nangpawh kha hlat che a duh a..Hei kher hi chu a hlawhchham ta thak thung” a ti anih kha, ka ngaihtuah leta, a sawi dik ang..An dawra ka thawh hnu lawk khan na taka min siamin an dawr atangin min pet chhuaka, chumi hnuah ama Mimal sumdawnnaah min nawrlut lui leh lawi si anih kha..

Ka beisei loh tawpin ka mu tha ta phian,ka harh leh chuan Room chhungah ni a lo lut raih tawh,ka zi mar ar ara, Zorina mutna lam ka en a, a lukham delh loh tih hriat taka a awm ngaia awm chu ka chul dan dana, ka let phei a, a lukhamah ka hmai ka phum ta nge nge.Ka va han mamawh ngawih ngawih tak em..Damchhunga enkawl ngai tur anih pawhin pawi ka ti lo.A fapa hian a pa en chunga a thanlen a tul takzet si a.

Ka phone a ri a, rang fe hian ka bana, ka hlauthawng nghal ringawt bawk.

‘Hello..”

“Nanun,i lo phei dawn tawh em?” ka nu in Damthlapin min rawn ti a.

“Phei tep, thil tha lo a awm em?”

“Aih, a lawmawm lam mah zawk..tunah khan Doctor a lo kal zo chiaha,A kut hi a ti che thei ta tlat a”Lawm lutukin ka au chhuak that mai.Ka insum hman lo.

“Maw?!” awih lohna leh lawmna a inpawlh vek.

“Um, zingah khan a kut hi che tlatin ka hria a,Doctor ka va ko a, a lo ti che tak taka” a rawn tah nuih titih.

Damdawiin ka thlen phei chuan test dang la turin an lo buatsaih fel vek tawha,ka thlen hnu lawkah an nawr lut zui nghal mai bawk.Pawnah kan lo nghaka, eng ber nge an test dawn ka hre lo.Darkar khat dawn an en hnuah an rawn nawr chhuaka,a mut dan ngai bawkin a mu a, tui taka muhil a ang ber.

“Enge result le?” Ka pain Doctor hnenah a ti a.Khuma a mu chu uluk fe hian a melh vung vung bawk.

“A harh,ti ila engkim a hre vek” ka ang pham mai.

“Ka sawi awmzia chu amah hian in sawi leh in tih engkim kha a hre vek ka tihna anih chu”a ti leh a, rang lutukin Zorina ka en a, ka hmui ka hup tlat bawk.

“Damdawiin awm in la duh chuan in thu a ni a, in chhuak duh anih pawn in thu tho..amah hi a pawimawh ber tawh” a ti leh a.

“Hmundangah kan inbe lawk mai dawn ami?” ka pain Zorina en chungin Doctor hnenah a ti a.

“Aih, ngai chuang lo, tunah tak chuan a muhil rih a,Damdawi kan pek khan a hneh deuh ang” a ti leh a.A kut a tih chet avanga ka lawm na kha tunah chuan a hma aia Beidawn lehzual naah a inthlak vek tawh.

“Engtin nge a harh leh harh loh kan hriat ang?” beidawnna avangin ka aw a lawi rat mai.

“Kha chu khawl kan vuah atangin i hrethei mai ang, mahse khawl hi Damdawiin hian kan hman lai chauh kan nei a,kan chahsak thei ang che u” a ti leh a.Engmah ka la hrethiam chuang lo.

“Kan mamawh ang tih chu sawi ngai loin a chiang mai a,mahse, Nurse pawh kan mamawh dawn anih chu,tuemaw min biaksak tur i hria em?” Ka pa bawkin a ti leh a.

“Ka hriain ka ring,hei hi en ula..” tih pahin a lu a kawka, a luah leh a nghawng hnunglam deuhah pipe niawm tak,mahse, phek vek lawisi, kutzungte aia te hret tur hi a invuaha, a taksaah an char bet ti ila a dik zawk ang.Chu chu a lu bula khawl phek thlir thler,1ft bial vel monitor ah a inzawma,  a hringin line hnih a kal phei raih bawk.

“He tah hian a harh leh harh loh engkim a lang thei vek ang, chuan, a kut hi a hmang thei dawna, tunah a la hmang tam thei lo nangin a kutzungtang hi exercise pek that chuan a hmantlak maiin ka ring” a ti leh a.Sawi ve tur reng reng ka hre lo.

“Anih chuan he khawl hi chahve ta ila engtik nge a lo thlen ang?”

“Naktuk anih loh chuan tuklehah a lo thleng thei mai ang, tunah hian kan Doctor pakhat hi Delhiah a awm mek a, midang chah kual loin amah zawk chu ka zuk bia ang, naktuka lo haw turin a insawia, a rawn hawn thei ang” a ti leh a.

Ka pain lawmthu a sawia, nurse pawh min zawnsak a tum thu a sawi leh a, tlai lamah min hrilh leh turin kan inchah a, Zorina khawl tur pawh a hmandan kimchang zawk min zirtir a inhuam thlap bawk.Khuma a mu chu ka ena,midangin min hawsan zo tawha,beidawnna sawiphak loh khawpa nasa hian a tuamin min tuam hlup hlup a ni ber.Enkawl hi ka hnein ka ring lo,mahse, ama tan hian hetiang ngawta dam hi enge thlakhlelh na tur awm ang? Keimah ka in ngaihtuaha, ka thlah theih loh luat vangin a kal thei lo mai zawk a ni angem? Beidawng lutukin ka rum chhuak hak mai,zawhna chhan theih loh tawp chuang si lo hi engtikah tak a chhanna hmu ang i maw?

“Nangmahin alaw i awm?” Philipa’n rawn thut ve pahin a rawn ti a.

“Nia, an haw zo tawh..i duty hun a zo tawh mi?”

“Zo chiah, haw hmain ka lo tlawh kual zuai che u.A harh tawh em?” tih pahin Zorina kut a vawnsaka, a kut zungtanga karah a kut a rawlha,a hum vang vang bawk.

“Ka hre lo,Doctor a lo kal leh phawt loh chuan a khawl hi ka hre ve thiam chiah lo a” ka ti a, a lu bula Monitor lam a en a, min rawn en leh a.

“A harh..kan bia ang” tih pahin a tho a, a beng bulah a zuk kun a.

“Hey..Dude..i tha em? I that chuan i kut ka vawn hi i rawn hum dawn nia aw” a ti a, a kut rang fe hian ka en a, mahse, a che eih lo.Ka beisei sang lutuk zawk nge ka hrethiam hek lo.

“Ok, i duh loh pawn a pawi lo, ka ti lui lo che,ka hawsan dawn che a, hahdam deuhin i lo awm dawn nia” a ti leh a,a kut a vawnna a thlaha, dimtein a dah dan ngaiin a dahsak leh a.A thutna ngaiah a rawn thu leh a.

“Beidawng suh, nangmah vanga a fight nasat zia ka hmu tawha, ka la hmu zel ang, dik tak chuan vawiin a a kut che thei a ala awm te hi Pathian hnathawh anih rualin i Hmangaihna avanga a nun tuma a fight na vek kei chuan ka ti lo thei lo.Mahse, kan tawngtai anga,engpawh a lo thleng se a remruatah lawm turin kan inpeih angai ania.I chak hian ani pawh a chak tih hrereng ang che” a ti a, ka tawngka a chhang loin ka bu nghat ringawt,dik tak chuan tawng pawh tum ila ka tawngchhuak zo kher lo ang.

Philipa haw hnuah tumah lo kal an awm leh ta lo, khawl atanga ri rawn chhuak keuh keuh bak engmah thawm awm loin a reh thiap a, Khumah ka thu kai ve a,a darah ka lu ka nghata, engmah hre lo mahse amah kuaha mut ka duh tho.Doctor khan min chhang lo mahse be reng turin min ti a, a rilru ti buai thei engmah sawi lo turin min chah ngun viau bawk,a beng bulah ka hmui ka daha, zawi te tein ka biaa,kan pahnih a kan inzui tan tirh lam te, kan intawn dan te,Zohlima chanchin te ka hrilh a, min chhang thei lo tih pawh ngaihtuah loin ka sawi zela, ka muthilh lai pawh ka hre lo.

“Moma...a Pi bulah ka kal duh” ka kekawrah Zohlima’n a rawn pawt a.Ka melh thla a, kum hnih a tling ve tawh.

“Aih, kal lo mai rawh, vawiin chu Papa Birth Day ania, kal chhuah a rem lo tlat” ka ti a, a nur nang mai..A pa a ang takzet.

“Papa ka dil ang..” khumah thei leh theiloin a lawn kanga,a pa beng bulah a zuk kun a,a chevel chu ka en reng ringawt.

“Papa,a pi bulah ka kal thei em?’ a ti a, rang fe hian a kut bul lamah a tawlh thla zui lehnghal bawk.Nitin hetiang ringawt hmu hian a thang liana, atan a pa biak dan hi thil thar a ni tawh lo.

“Hon..enteh, Mambawiha hian kal chhuah min dila, i Birth day a ni ka tih pawn a awih duh lo a,engtin nge ka tih ang? Ka kal tir dawn em?” a beng bulah ka zuk kun a, a kutah ka vuan bawka,na vak lo hian a rawn hum a, kal turin a duh tih ka hria.’Aw’ tia min chhan nan hian na vak loin kut a rawn hmer a, ‘Aih’ tih nan erawh a hmer na thin thung,kum khat tal tawp ka enkawl tawh chung hian nikhatmah lo thi zawk se tih ni ka la nei lo a, ka la inchhir chhin eih lo bawk.

Eizawnna lamah Moses-a leh Jordan-an an kep veka, a awm ve lai ang chiahin engkimah an telh vek bawk.Pawisa lamah chuan ama mimal Ac leh ka Ac ah pawisa a lo dah a tam thama, amah enkawl nan hian Ka pa in pawisa a tum vek bawk.Dawr atanga a share pawh a tlem chhe zawk zawk lo bawka, harsatna kan la tawk lo.Ka nu kan bulah a la khawsa ta zela, Damdawiin kan chhuahsan hlim khan Nurse kan ruaia, mahse, thla 4 kan chhawr hnuah tul ka ti ta lo a, Ka pi enkawlturin Ka pa te in lamah an la phei ta zawk.Kan hnena a awm chhung khan chhungkua ang mai kan ni hmana, tun thlengin kan tan chuan thian tha tak a ni zui ta zel.

“Roomah ami a awm?” Moses-a tawng lawng lawng ri ka hrethei a, Zohlima lah Moses-a aw a hriat rualin hlim zetin a khek raih bawk.Apa hian a infiampui thei lo a, biak lah a be thei hek lo,Moses-a hian a khat tawkin a rawn tlawh renga, Zohlima tan chuan pa tluk a nimai, a ngai em em a, a chang chuan hruai haw daih tum a nei bawk.Moses-a bula awm anih phawt chuan ka ngaihtuah eih lo bawk.

“Helamah kan awm” a rawn luh hmain ka lo au a, Inchung leh inhnuai kar tawn sek aiin a Office sir chiaha Room awl kan siam thaa, kan awm ta zawk.

“Hello...Naute..enge i tih a?” kawngkhar rawn hawn pahin zangkhai vah hian a rawn ti a.Mambawiha lah phur lutukin khumah atangin a zuangthla nghal thauh bawk.

“Uncle, vawiin hi Papa piancham a ni asin,cake i lo keng em?” a fing lutuk mah mah ka ti thin.

“Noo...Papa hian hman atangin cake a duh ngai reng reng lo aw,thil dang ka lo kenga, Motorah a awm a..” a hnarah a piai a.

“Yay,ka va la ang,min hruai la..” a ti a, a tawng hi a la fiah em em lo nangin a sawi tum erawh a hriattheih vek tawh thung.

“Lawk, a Pi nen va la ula,api ka hrilh lawk ang,chuan, Moma hi ka be duh a” a ti a,a pawmchhuaka, pawna ka nu a be lawng lawng thawm ka hre zui nghal zat bawk.A chang hi chuan ka inthlahrung thin,Nautei nen an inzui ve nasa a, mi hriat laih khawpin an inzui ve tawh, Inneih lam ka sawipui apiangin Zorina harh hun a nghak tih sawiin min hnial fithla thak thak zel a,’a harh hun kan hre si lo a, beiseina mai chauhin kan en a, chutiang te chuan i lengtar mai ang” ka tih pawn a nui mai mai.Eng huah mah a ngai lo.

Rei vakloah a rawn lut leh a,Khumah a thu kai a,

“Vawiin lam enge a an a..oh..a meng ania” rang zet hian a tho leh nghala, ka kang awk bawk.

“Maw?!’ Zorina lam ka hnaih nghal ruak bawk.A meng tak tak,a hmai bulah ka zuk kuna.

“Hon...i tha em?” min rawn en a, a bek pawng tawlh tawlh chuan tawng a tum a ni tih min hriattir thei tlat bawk.

“Aih, tawng duh suh..” a kutah ka vuana, a chalah ka fawp zui vang vang bawk.

Darkar khat a liam leh meuh chuan kan chhungkua kan awm kim vek tawh.Amah enkawltu Doctor pawh a lo thleng nghal thuai bawk.

“Amak tih bak engmah sawi tur ka hre lo,engtin nge he thil hi a nih theih ka hrethiam phak lo..” Mak ti lutukin ani pawn a ti ve thlawt.

“Ni e, mihring lama kan beidawn naah hian chunglam a lo che thina, chu pawh kan rinngam chauhin..” ka nu in a lo ti ve thuaia, Zorina nu zawk erawh engmah a sawi thei lo,Ka pi lah a tap reng bawk.

“Kum 30 chuang Doctor hna ka thawh chhung hian thilmak leh ropui tak tak ka tawng tawh, mahse, chung zingah chuan Zorina anga mak hi ka la tawng lo,diktak chuan amahah hian beiseina them pawh ka nei lo a,nitin a rawih tial tial anga, a la ral mai ang tih chiah hi ka zir thiamna atanga ka hmuh dan a ni a, mahse. A ni ta hauh lo..tunah chuan a mit a meng tawha, a khawhmuh a buai hek lo.A step dawt leh tur chu tawng a ni anga, abak chu kal a ni tawh mai..” a hnuk a ulha, sawi zawm thei loin a ngawi vang vang mai.

“Ka lawm e..” ka kutah ka pain a rawn vuana.Mak ti deuh hian ka melh chho ha bawk.

“Ngatinge?”

“Nangmah vanga ka fapa hian beiseina eng nei a ni tih ka hria asin, amah a chhel tluk zetin nang hi i chhel zawk bawka,nang aia tum ruh hmeichhia hi ka la hmu ngai lo.I pasal i enkawl danah hian engmah lungawi lohna kan nei lo,beidawngin chhuahsan la, mipa dang pawh nei mahla ka dem lo ang che.Mahse, nitin hlim hmel takin a bulah i awma, chhanna a pe thei lo che tih i hrereng chungin beidawng miah loin i biaa,i fapa tan lah a pa engmah ni lo hi Pa ropuiah i ngaihtir thei bawk..” ka tum loh tawpin ka mittui a rawn baw zawih a, ka insut zui hraih mai,ka nuin min rawn kuah a..Tun tum zawng kan vaiin lungngaihna mittui ni loin lawmna vang zawin kan mittui a tla ve ta thung.

After 2 year’s

“Vawiin chu i nalh takzet ania..’ ka kawngah a rawn kuaha, ka darah a hmui lum thar tharin a rawn nawr nghal zat bawk.

Ka hma a Darthlalang lianpui, Taksa pum lan theihna awm ah chuan tu nge min kuah tu ka hmu theia, ani pawh ka mitah chuan Mipa nalh leh tha ber a ni ve tho.

“I nalh zawk daih alawm” a luah ka khawih zauha. A rawn hawi chhuaka,a sam chhip lam buk deuh bik chu uluk zet hian a khuih pial veka,a a bek lam a kawng vek thung.A kamiz hak chungah Blazer pawl duk a ha a,kekawr Grey rawng a ha thung.

Vawiin hi Moses-a te inneihni a ni a, Moses-an thianah hman a tum ruh hle nangin a hnial ta zawk, amah lamah engmah insawiselna nei tawh lo mahse engemaw palh thleng thei lakah inven a la mamawh a, rei tak inthununna hnuaia awm a la harsat bawk.

“Ka Hmangaih che..’ ka bengah a rawn fawp thawi thuak bawk.Ka ngheng zui nghal ar ar mai.

‘Kei pawh..”

“Um, ka hria alawm, tu nge ka nih lam ai hian tu nge i nih hi ka hrechiang zawka, beiseina nei leh tur leh Dam chakna nei tura min nawr kal tu hi ka hrechiang che..”

“Avai khan ka tih ni loin Chunglam kut zawk a ni tih i hria alawm”

“Ka pawm thlap e,kan lo tihsual tawh te avanga min hremna leh harhchhuak tura hun tha min pe leh tu Pathian hi kan nupa tan leh ka fapa tan hian a hlu chuang bik a, chumai bakah hei nen pawh hian..” ka dulah a rawn chula..Ni e..Thla li a liam leh chuan kan fa pahnihna tur hmel kan hmu leh tawh ngei ang..

A mit a men ni atang khan tawng chhuak turin kum chanve tehmeuh hun a mamawh leh a,a tawng hmasak ber tum chuan fiah mang lo zetin ka hming a lam bawk.Vawi tamtak a thluak an en nawn leh pawn dik lo an hmu ta hauh lo,’MAK’ tih bak engmah sawifiahna dang a awm lo.

“Nan...min en teh..ka ke hi a che thei ania” Room ka tihfel laiin a rawn ti a, mak ti zet hian ka hawi leta, a ke zungtang a lo ti che tial tial chu ka va hmu a,ka thil ken lai ka thlauh tawp bawk.Nitin hmasawnna hmu lo mah ila a beidawng ngai lo,kei pawh ka beidawng hek lo.A din theih hmasak ber ni chuan a thlan fim in a bual huh vek.

Mi pangngai chunglam hret chhungkua a piang a ni a, a chanchin lah mi ngaihven a lo ni bawk,a dam leh dan hre chakin vawi tamtak an rawn kawm tawha, chanchinbu mi te pawh an lo kal bawk,tu pawh lo kal se a chhanna a ngai reng.

“Pathian hnathawh liau liau a ni a, a dawt lehah chuan ka nupui hi a ni bawk”

A dar khamin ka mu a, kan inkarah Zohlima mu kak bawk,an pafain mut hma atangin an in chhaih te tawha, ka tan chuan a aia hmuhnawm dang a awm hek lo.Zohlima muhil thaw sek sek chu ka en a, Zorin lam ka en leh a,a hmui a che a, enge a sawi ka hrethei lo, a hma ang bawk khan a dik lo leh ta emaw tiin ka inbengkang vat a, mahse, ka ban rekah a rawn vuan a.Muangchang hian a rawn menga, ka mitah tak chiang zetin min en run bawk.

“Mi hian ISUA an hmu ve em ka hre lo, kei chuan ka hmu asin...Chu pawh nangmah ah khan..” mittui nen ka thlira, keimahah Isua a hmuh vanga lawm ka ni lo, ISUA hmu thei tur khawpa tlawma a nun sawisak anihna a pawm vanga tap ka ni zawk.

THE END.

He story lo pian chhuahna tura min nawr tu,ka hla duh em em mai Coldplay ho hla EVERGLOW hi a thunawn lai te ka lo dah tel hram teh ang.

                                                ‘But when i’m cold,cold’

                                                ‘When i’m cold,cold’

                                                ‘There’s a light that you give me’

                                                ‘When i’m in shadow’

                                                ‘There’s a feeling within me,an EVERGLOW’

                                                ‘When i’m cold,cold’

                                                ‘In water rolled,salt’

                                                ‘I know you’re always with me’

                                                ‘And the way you will show’

                                                ‘And you’re with me wherever i go’

                                                ‘Cause you give me this feelings,this EVERGLOW’