SWEET DECEMBER BOOK 5 (Chapter 31-33)

Chapter- 31

Ka thaw kawka,ka thuchhuak nghal hlawl. Mahse, ka lu hai lutuk vangin ka mit ka chhing lehnghal vat.Muangchangin ka mu thla leha,ka mu vir deuh pup pup nimaiin ka hria.Che loin ka mu vang vanga, thawm a awm em tih ka ngaithla paha, ri eih awm loin a reh thiap mai.

Muangchangin ka mengchhuak leha,ka sana en ka tuma,ka bun miah lo. Ceiling  lam ka en a. Ka mitvai emaw tiin ka mit ka nuaia,mahse angai reng. Kan room a ni lo tawp mai. Peih lo chung chungin ka thuchhuak leha,ka hawikuala. Sana awm reng reng a awm lo.Diktak chuan ka awmna hmun hi angaihna ka hre lo, ka hriat zawng chu kan inchhungah hetiang room kan nei miah lo..Ti deuh dakin ka hawikual leha,Room liam lem lo tak a ni a, chhuat phah atan Floor tile var an hmanga, khum piah deuhah thawmhnaw dahna atana hman tur niawm tak Wardrobe lian vak lo a inhunga,a bulah chair pakhat leh dawhkan lian lo tak bawk a awma,achungah tui bottle leh no a awm bawk. Khum ka en a, a lian chuang lo,mipakhat mutna tawk lek a ni a. Khum bul chiahah Side Table mawlmang tak pakhat a awm a. Tv,lian lem lo tak bawk bangah khum atanga en nuam tawk turin a awma.Abak eng mah awm a awm lo. Tukverh pakhat a awm leh a. Hotelah ka awm nge Damdawiinah ka awm zawk ni? 

Ka lu ka dawma,thil thlen dan ka ngaihtuah leta, ka thaw nghal kawk mai. Kha Doctor tenawm lutuk khan ka nghawngah khan damdawi a rawn kap lut tih ka hria,ahnuah khan eng mah ka hre zui ta lo kha ania. Anih chuan ka a tak tak anga ngaiin helaiah hian min khung tihna a ni mai angem? Ni lo,ni lo..Hriatpuia ka biak angai. Ramsanga leh Doctorin an phiarrua,a hnung lamah an bei tih ahriat ngei ngei angai.

Khum atangin ka chhuk nghala,Kawngkhar lam ka pana. Pawh hawn mai ka tuma, a theih ta tlat lo!!! Ka pawt nawn leha,mahse a nghet tlat.Pawn lamah an kalh tih achiang. Ka kekawr ka dapa,ka Phone ka zawnga,a awm miah lo. Khum lamah ka let phei leha,ka phone zawngin ka en kuala,a awm chuang der lo. Kawngkhar lam bawk ka pan leha,ka aua,ka nem a, ka tlawh bawk. Hriatpuia ka au a,mahse keima aw thangkhawk bak hriattur awm loin a reh vawng vawng thung.Dik lo a awm chiang lutuk tlat. Khawiah pawh awm ila Hriatpuia hian min kalsan tur a ni miah lo..Ka au nawn leha,mahse channa a awm chuang lo..

‘Tu nge awm che u?” ka ti chuai leh raih. Ka rin ang ngeiin chhanna awm loin a reh ngaiin a reh tlawk tlawk.

Tukverh lam ka pan pheia,Curtain chhah zet an zar ka pawthlima,Bar a lo awm vek. Nawrtawlh chi asiam a ni a, ka nawr tawlha. Mahse,pawn lam ka hmuh rualin ka thaw nghal hawk,In hlir hmuh ka inrin laiin ramhnuai vek!! Khaw awmdan atang ringawt chuan eng hun nge anih ang ka hre thiam mai lo. Ka hriat hnuhnun ber kha chuan khua a thim dawn hnai tawh kha ania,tunah chuan khua a eng at. Mahse, eng hun nge tih erawh ngaihdan ka siam thiam lo..Pawn lam ka hmuh phak chin ka thlir kual leha, beidawng thinrim lutukin ka thaw leh hak. Khawi laiah nge ka awm tak ang?

Kawngkhar lam bawk ka pan phei leha, ka hawngthei dawn lo tih inhre mah ila hawn tumin ka herh leh talh. Beidawng zetin ka thaw hak. Khum lamah ka let phei leha, ka thu thla chawrh. Inngaihtuah fim hram hram tumin ka hmui ka pet a,ka mit ka chhing tlat bawk. Ka mitthlaah Ramsanga hmel a lo langa.Ka ten ngawih ngawih lutuk,eng tin nge a peng lehlam ang maia ngaitu a bum theih zawk? Inring hman loin ka uak nghal pawp.

Ka hawikuala, Room kil lama kawngkhar lian vak lo awm ka va hmu a. Nichin khan ka enkual vek sia, ka hmu miah lo.Ka tho a, ka pan phei nghal vat. Ka hawng de de a, ka rin ang ngeiin Bathroom a lo ni a, European type inthiarna a awm tel bawk. Bathroom lian lo tak a ni a, room lam ang bawkin  a fai tha viau tho. Ka luakchhuakin min rawn hnawh leha,ka uak lehnghal pawp pawp mai.

Ka mu meng kara.Ceiling lam hmu miah loin ka melh reng bawk. Amal te tein thil kal tawh ka ngaihtuah angai.Helaia ka awm chhan hi chu ngaihtuah ka peih rih lo.Kawngkhar a ri raka,ka thuchhuak nghal zawk. Tu emaw chuan lo luh an tum a ni phawt mai. Hriatpuia nge Ramsanga zawk ni ang? Ka thaw deuh halh,tu pawh lo lut rawhse. Mihring annih chuan a tawk reng.

Kawngkhar a rawn inhawnga, ka la hmuh ngai loh hmeichhe hmel fel zet a rawn langa. Khap miah loin ka en ngar mai. Tray chawi chungin a rawn luta, ka lo thu fel at mai chu min rawn hmu nghala, a nui sak. Kei erawh nuihna chhan tur reng reng ka hre lo thung.

‘I lo harh tawh maw?” a rawn ti a. Kawngkhar khar leh loin inhawng sain a kalsan a. Kawngkhar lam ka melh zauh.

‘Pawnah hian tlangval pakhat adinga,eng  thil atthlak mah ti lo la ka duhpui che’ ka ngaihtuahna hria niawm takin a ti leh a. A aw a ring lem lo nangin a khauh tha fer fawr viau thung.

‘I ril atam tawh ka ringa’ a ti leh a, Ka chhang lo. Dawhkanah a tray chawi a daha. A dahfel hnuah khum lam a rawn pan pheia. Nu lian tak a ni lo,a hmeltha viau han tihtur a ni lo nangin a chhe chuang lo.Kei aia a upa anih pawhin a upatna a tamin ka ring lo.

‘Sangtei ka nia..Nurse,nangmah enkawltu tur che’ a ti leh a. Min deng deuh dawt,khung hran ngai,nurse enkawl ngai angin maw min lantir dawn a?

‘Nurse ka mamawh lo’

‘Mamawh kan neih hi kan hre lo fo ania’ ati duh lek.

‘Ka pasal ka hmu duh’ ka ti leh hmiah. A thle deuh baka,a nui sawng bawk.

‘A lo kal mek ang ka ring. Mamawh i neih engpawh min hrilh thei ania’ a ti leh a. A awmdan chu ka hmuh vawikhatna mah nise ka huat zawng a ni nghal tawp.

‘Ka awmna hi khawi lai nge?” ka ti leh hmak.

‘I Pasalin hmun him atihna hmun anih hi..’

‘Khawi lai nge ka tia lawm?” ka tichang leh fak.Ka insum theihna a bo lo chauh tawh.

‘Ka chhang thei lo che,enkawl che ka hna ania.Zawhna chhang tur ni loin’ a la nui ta sawng reng.

‘Chhuak rawh’ chang lutukin ka ti a. Sawitur dang ka hre tawh lo,biak zawmzel chakna lah ka nei hek lo. Mahse, ka tawngkam nem lo leh thupe lutuk pawhin a nui hmel a tireh zo miah lo!!

‘Hahdam rawh,I taksa a chak lo a’ inringtawk zetin a ti leh duh lek.

‘Ka sawi i hria em? Chhuak rawh’ ka au a ni ber.

‘Enteh,nangmah ang ho enkawl hi ka hna a ni a, nang aia harsa pawh ka enkawl fo mai. Tlemin nang erawh i pasal vangin ka beisei sang deuh che a.Mahse, awmzia a awm lo. Midang ang tho ini’  a ti leha. Mi a hmuhin min hmu tih ka hre thiam.

‘Eng maw i sawi kha?” ka ti a, ka aw a khur titih.Mahse ka biakna  hre lo ang hmiahin Dawhkan lam apana,a tray dah alaa.Ka awmna lamah a rawn phei puia,ka melh reng ringawt.Khum bulah a rawn ding leha,a tray chawi a melh zauh.A chetdan min tham lo lutuk chu ka thin a sa lehnghal phat,mahse mi a anga min ngaihna nemnghet tura mi a awmdan anga awm lo turin ka insum hram hram angai.

‘Dahsawn rawh,ka ei duh lo’ ka theihtawpa pangngaiin ka ti  a.

‘I rilru tur ka hre thiam alawm,mahse khawngaihin ei rawh’ a ti leh a. A hmelah chuan khawngaih indil ni loin,min tih kual vel nuam ti ngawih ngawih hmel a pu zawk. Ka sa lehnghal phat mai. Mawlmang lutuka chet mai hlauin khum atangin ka chhuk ta zawk. Mahse, ka chhuk fel deuh awrh chauh tihin ka rin loh lutukin Trayin min rawn nawra,ka pai deuh nawk. Ka tluk hlau invai velin a tray ken ka vai palha,chhuatah a tla ri nghal bawla,eitur a darh nghal nuai bawk.

Rapthlak ti zetin ka en a,ka bula ding ka en leha. A mitmeng sen ram maiah chuan min huatna chiang tak ka hmu thei. Engvanga min hua nge anih erawh ka hre lo. ‘Mi a nu’ a tih ri chuan min deng dawt thei.

‘Chhuak rawh’ ka ti tuar. A mitah tak ka en a,min en ve ran mai. ‘I beng a ngawng loin ka hria,ka sawi nawn leh ang,Chhuak rawh’ ka tinawn leh a.Ka aw a dam ta thlap,mahse ka sawi hre lo ang hmiahin chhuata eitur baw nuaih mai chu a en a, ka tum dan ka thlak ta zawk. Ani chhuah nghah ngai loin keimah ka chhuak mai ang chu.

‘U Sangte,ka lo luh angai em?” ka kal hmain kawngkhar lam atangin mipa awin a rawn ti a,ka hawiphei vat. Thluak aia thahrui hmang thiam zawk tur tih hriat tak,palian leh at hmel zet alo ding reng tawh.

‘Ngai lo’ a ti awlsam mai, a rawn be tu pawh a kalsawn ve nghal mai bawk. Kei erawh kawngkhar lam ka pan ve nghal zat thung.

Thui pawh ka kal hmain ka rin loh lutukin ka ban vei lam a rawn man thuta,hnung lamah a la kuala,a herh zui vak ,ka rak thawt thei.A chetdan tehthut chuan min ti hamhaih deuh bawk nen chet lak mai nachang ka hre lo.

A rawn herh na leh salh,ka hamhaih lutuk  kha a reh duaka,ka harh deuh hawk.Rang zetin ka inhera,ka ban a vawnna ka thing ngheka,a tlah a. A thlah rual deuhthawin asamah ka tham nghal chat. Ka theihtawpa nain ka phih zui ngheka,a rak nghal vak bawk.

‘Eng vangin nge khatiang khan min tih a?” ka ti tuara,ka insum hram hramna kha tunah chuan vawmbo ang hmiah a ni tawh. Engtin ka ti pawh nihlei lo,khatianga min ti ringawt kha ka ngaihthiam zawng a ni lo bur.A lo luh tirh phat atangin min deu zawng hlirin a khawsa bawk. Ka thinrim tawpkhawka ka nih thin danin ka mit a thim deuh salha, ka bula ding hmel ka hmu phe vek. Hetiang hian awm loh ka duh thin,a pawi zawh vek hnuah ka harhchhuak leh chauh thin miaua, Mahse tun tum chu insum ka tum buai peih ta lo law law…

Ka hnung lam atangin tu emawin min rawn pawm kang lawpa,min chawisawn deuh nawlh bawk. Talchhuah tumin ka theihtawpin ka bei ve thung. Ka hnungzang a na zawka,eng hmanrua nge a hman ka hre lo, sawifiah ngaihna awm lo khawpa nain ka taksa a fanchhuak nghal vek,ka zal nghal rawih rawih thei hial bawk!! Vawilehkhatah a ri deuh chawrha,min kuahtuin min thlah nghala.Min thlah rualin chhuatah ka thingthi thla rawp thung. Ka taksa hik chum chum mai chuan ka kawchhung thlengin a luh vek niin ka hre bawk.

‘Ka nupui hi i kut hmawr pawn ilo khawih leh anih chuan i thi ang’ Hriatpuia aw ka hriat rualin thei leh thei loin ka hawichhuaka, a hmelpa zetah chuan tualthah pawh a hreh dawn lo tih alang thei vek.

Ka piaha khabe dawm chunga tho tuah tuah chu ka en leha,a bulah hmeichhia zawk chu hnar thi hnuang chungin a thu a,rapthlak ti zetin ka melh a.Mipa zawk chu Hriatpuia khan kut a rawn thlak tih ka hre thiam. Hmeichhia zawk erawh keima khawih tih ka hria,engtin chiah nge ka khawih erawh ka hre lo. Hriatpuia koh ka tuma,ka aw a richhuak thei lo. Engtin emaw ka taksa a awma,na em em siin chet asak veka. Ka kut ka lekkang tur pawh ka hlawhchham thak.

‘Chhuak rawh u,tunah’ Hriatpuia’n a ti vawt leh ruih.A aw ring lo mah se mi a let tawp tan lo chuan awm luihna chi a ni lo. Eng mah sawi buai loin hmanhmawh zetin an chhuak nghal rawk rawk mai.

Min rawn pana,a rawn thu hniam nghal zat.’I tha em?” a ti dam thlup. Tun lawka tualthah pawh hreh lotu Mipa kha a ni ta lo emaw tihmai turin a hmela thinrimna kha a bo fel leh vek tawh. Min rawn bana,che thei si loin ka en ringawt. Ka awmdan hrethiam niawm takin min rawn pawmkang ta zawk. Khum lam min panpuia,khumah min nghata, puan min sintira,khumah a rawn thu thlaa. A rawn kun hniama,ka chalah a rawn fawp vang vang.Ka mit ka chhinga, ka mittui a rawn tlaa,ka bekah a luangthlaa,ka mittui hru tur pawn ka kut ka lekkang zo lo. Beidawng thinrim bawk siin ka khur hlawk hlawk ringawt.

‘Shh…Shh..A tawk e,tawng tum duh suh.I chau lutuk ang. Khang mi tenawm ho khan an khawih nawn tawh lo ang che’ a ti dam thluama. Ka beka ka mittui luangthla a rawn fawp leh vang vang.

Ka tawng dawna..Ka hrawkah min hnawh tlat tu a awma,chumai bakah ka lei a chhah tuala,ka tawng thei tlat lo.Ka samah a rawn Chula,dimtein ka hmai a khawih kual leh dun duna,tihtheih ka nei lo lutuk mangang bawk si nen ka mittui a tla zung zung ringawt. Ka nun pumpuiah hian hetiang khawpa beidawn tum hi ka la nei ngai pawn ka hre lo.

‘Mi ka va be lawk anga, ka rei lo ang’ a ti leh supa. Kal lo tura tih ka tuma,mahse ka aw richhuak hleithei loin awmze nei loin a ri hrawih hrawih ringawt.A rawn kun leha,ka chalah a rawn fawp leh vang vanga.A tho a,kawngkhar lam pana a kal chu thei leh thei loin ka enzui tawk tawka,ka mittui avangin ka hmu phe ruai bawk.

A lo let leh mai ka rin laiin a lo let ta mai lo.Chet tum tawh loin ka mut ngaiin ka mu mar ata,ka mittui tla a reh tawh bawk. Nichina thil thleng kha ka ngaihtuah let a..’I pasalin hmun him atihna hmun’ tiin khanu khan a sawia,anih si chuan heta ka awm hi Hriatpuia remtihna a ni tihna ania..Ani pawn ka a emaw ati tihna animai angem? Ka chet dan ka ngaihtuah leta,kha Doctor ka beih lai kha min rawn thelha,tunah Nurse thisenchhuak khawpin ka bei leha,chu pawh a rawn hmu leha. Kan inneih hnu leh hmaah pawh hetiang hi ka la ni ngai lo va,ka chetphung inthlakdanglam nasa lutuk hi a en a,mi a angin min ngai ve tho tihna a ni mai angem? Thilthleng lah kha sawifiah theiin ka awm lo ve ve a,ka beihte erawh chu duhtawka insawifiah turin an zalen ve ve lawi si….

Engtizawng pawn ka hrilhfiah angai dawn..A chaklohna ka nih tlat avangin amah tihchhiat tumtu ten amah bei loin keimah zawk min bei a,a beitu pawh midang niloin Ramsanga a ni bawka.Kan inneih hnuah Hriatpuia sumdawnna peng pakhata Ramsanga nen an thawhdunna Account pawh ka khawih tel saka. Hriatpuia’n amah tluk zetin Ramsanga aring tih pawh ka hria..Engtin nge Ramsanga hi misual a ni tih ka awihtir ang? A nupui ka ni tehmeuh chungin Ramsanga a rinna ka tihchhiatsak zoin ka ring lo.

Chet ka tum leh chhina, ka na leh zawk zawk nain ka che thei ta hlauh. Mahse, beihfe erawh angai thung. Harsa lutukin ka thuchhuaka,ka thlanfimin min bual huh deuh hlap. Ka lei ka ti che a,a la chhah deuh tual nangin a zia ta deuh. Kawngkhar a ri rak raka,a inhawnga, Hriatpuia leh Pa upa lam pakhat an rawn inzui luta,ka hmuh awm ka la hre lo.Min en loin chhuata thil tla hnawk deuh nuaih mai chu a en a, a then nghal suk.Min rawn en a,a hmel tumtlang zet chu a nelawm viau lo.

Khumah Hriatpuia a rawn thu thlaa,ka kut a rawn vuana,ahum zui nghal vang vang.’Rpa anih hi,ka thian anih rualin ka u pawh a ni tho bawka’ Hriatpuia’n a ti a. Chhang loin a lo luhpui pa ka en a,a ha rual nalh lo zet langin a then suk. ‘I tha em?” min rawn ti a. A aw chu ka hriathnu a ang,ka ngaihtuah a.Nia,nikhawhreloa ka tluk tuma Hriatpuia nena inbia kha a ni.

‘I taksa ala na em?” a ti leh a. Ka bu ringawt. Diktak chuan Hriatpuia hmelhriat tumah ka ring zo tawh lo.

A jacket ipte atangin Syringe a rawn phawrhchhuaka, ka tim nghal chawih. Hriatpuia’n ka awmdan danglam chu hria niawm takin min rawn en nghal vut bawk.

‘Ka….Ka..’ ka sawizawm thei lo,ka hrawk a ro vek.

‘Ok,ok..Hlauhthawn tur a awm lo’ a ti dam thlupa.Min rawn kuaha,a awmah ka hmai ka phum nghal kak a,ka samah a chul hauh hauh thung.

‘I taksa na hi a zia deuh nan nachhawkna akap lut dawna’ min thlem titihin a ti a,mahse ka lu ka thing vak thung.

‘Min hrethiam la,min kalsan lawk thei angem?” Hriatpuia’n khauh zetin a ti a. Kan bula ding mek a bia tih ka hrethiam. Hriatthiam dil a ni nangin a awah erawh thupek zawm ngei ngei ngai a ni thung.

‘Tehreng mai,ka lo va chhuak ang’ a ti vut. A kalsawn thawm ka ngaithla kara,kawngkhar a hawnga.Dimtein a rawn khar ri leh khapa. Ka hahdam nghal huai huai thei.

‘A kal tawh e,hahdam tawh la’ a ti sup. Ka chhang lo,hawichhuak chuang loin a kawrkilh ka kheuh niap niap ringawt.

‘Haw ka duh’ kan ngawih deuh vang vang hnuah ka tichhuak sep. Ring deuh pawn tawng duh ila ka thei lo hrim hrim. Mahse, ka lei erawh phuar ang maia khawng leh chhah tual kha a ni tawh lo.

‘Mate…Helai hmun hi ka U te Farm House a ni a, Boruak thar i dawn theihnan i awm rih angai dawna’

‘Ka duh lo,I bulah ka awm duh’

‘Ka hria alawm,keipawn ka duha. Ka lo kal reng dawn alawm’ nghet churhin a ti leh a.

‘Ka a si lova,engvangin nge hetah ka awm angaih ang? Mi a ang maia khunghran enge ka ngaihna?” ka ti a, ka sawi zawng pawn ka tah achhuak ut ut.

‘Hetah hian i hahdam deuh thei ang ka tih kha’ a ti nghut.

‘Min la Hmangaih reng em?” ka tichhuak phawng, Engvanga zawt ngawt nge ka nih ka inhre bik lo.

‘Ka thihni thlengin ka Hmangaihna che a danglam ngai lo vang’ a awki nghet cherh chawrh lutukah chuan rinhlelh tur reng reng a awm lo.

‘Anih chuan min hruai haw rawh,hetah ka awm duh lo’ ka ti leha. Min chhang loin min kuahna a thlaha,ka khabeah a rawn dawma.Amah en thei turin min kuai daka,a mit thim raih mai chu ka en a.

‘Hetah hian i awm a tula,mahse rei a ni lo vang,Doctor kha ka thian ka tih kha.Chuan,nurse leh Guard awm kha ka thlaktir tawh bawka..’

‘Ka a lo’ a sawi zawh pawh nghak loin ka ti vak. Ka au ring thei ta deuh bawk. Ani erawh beidawn hmel zetin a thaw nghal hawk mai.

‘Ka hria…Ka sawi ngaithla phawt la’ a ti leh sup. Ka thlesawna,harsa tiru zetin khum atangin chhuk ka tuma. Min rawn vuan nghal vat,mahse a kut ka vai per lawp thung.Chair awmna lam ka pan pheia,ka pen zawnga ka taksa na deuh zawk zawk chu ala tawrhtham pangngai tak zet. Mahse, ka insehruha,Chair awmna ka thleng pheia,ka hnungah Hriatpuia’n min zui zel tih ka hawilet lo nangin ka hre theia.Ka ngaipawimawh duh lo. Chair awmna leh khum inkar a hlat loh tehreng nen ka thut fel meuh chuan ka tha a khur zawih zawih thei tho mai. Eng thil fakau nge maw kha pa khan ka chungah a tih ni?

Thawk ka la te te a,muangchangin ka bula ding Hriatpuia ka en chho a, a kekawr ipte zenin a dinga, a inpetruh teuh bawk.

‘Engvangin nge hetianga ka awm i ngaihtuah ngai em? Ka hria..Achhan hriat tumna tak tak inei ngai lo’ ka aw a khur dar dar mai. Ka thaw leh hak bawk..Hawisawn duhloin a mitah tak ka en ran a..A hmelpa zetah chuan chau hmel ka hmu theia,mahse ka sawiduh ka sawi hma chuan kaltir ka tum bau lo.

‘A vai hian i thianpa leh i peng pakhat Ramsanga tih anih hi….’ Ka ti leha. Ben sawk ang maiin a pai deuh nawka,mahse a din dan pangngaiin a ding leh vut.A awmdan chuan min thawng zawk thei.

‘Engvanga bei che nge anih ka hre lo,mahse i chaklohna ni a min ngaih avangin keimah zawk min beia.A ngam dawn lo che tih ahriat vang pawh a niang’ ka ti leh a. Ka sawichhuah takah chuan ka inrintawkna chhe tawh a rawn nung leh tan nimaiin ka hria. Eng mah sawi loin min en a,a hmelah enge angaihtuah ang ka hre thiam lo. Ka thusawi a awih nge awih lo pawh ka hre chuang hek lo.

‘Thil thleng zawng zawngah khan tum nei ranin min beia,Thenzawlahte,ka inluahahte khan min umzui zela,tu nge a thurualpui chu ka hre lo. Kan inchhunga thlengah kha chuan Ramsanga khan Sanjana-i a control a.Engkim kha a thlentir a. Thil thleng hi ka lo ngaihtuah dan chuan i u tih anih ka lo ringa, mahse kha Doctor kha…’ ka sawi zawh hmain a ban a phar hluai. Angaihna hre lo lutukin ka ngawi nghal hmak thung.

‘Nakinah thilsawina hun chu ala awm tam dawna,tunah chuan hahdam la, thil ei zawhah nachhawkna an pe leh che anga.I muhil leh vang vanga,I harh leh chuan i taksa na kha a lo zia vek mai ang’ Ka thilsawi lai nena inzawmna nei reng reng lo a sawichhuah rualin ka na nghal vawng vawng thei.Ka lo rin lawk ang ngeiin Ramsanga a rinna ka tichhe zo lo tih ka hre thiam.

‘Min ring nge ring lo?” ka ti zawi sap. A mitah tak ka en ngar bawk. A thle deuh buka,a dar a tichhing uk a.

‘Ka rin loh che chuan tunge ka rin ang?” a ti sup.

‘Anih si chuan Ramsanga chet dan hi ka hriaa..’

‘Ok…Ka ring che ka tih kha, tunah chuan hahdam phawt la..Room hi tifai se la..’ a ti leh a. Hnial tumin ka ang ziaua,mahse ka chip leh ta zawk. Eng ang pawn sawifiah tum ila ka sawifiah zo chuang dawn lo tih ka chiang. A duh anih chuan ka sawi atang khan fiahna zawng ve tawh rawhse.Chuan,min lachhuak duh lo anih pawhin keiman chhuahdan ka zawng ve mai ang. Remruata ka biak angai leh dawn tih pawh ka chhungrilah achiang nghal vek. Mahse, engtin nge ka biak pawh ang ka hre lo thung.

Hmeichhe pakhat,la upa hmel vak lo hian room a rawn tifaia,atihfai zawhah eitur a rawn daha. Ka eichak miah lo chungin chakna ka mamawh tih ka hriaa.Tlem tal ka ei angai..Min Jection laiin ka kut vuanin Hriatpuia ka bulah a thu a,jection hlau em em ka ni chungin hlau angin ka lang duh eih lo.

‘Ka lo let leh vat ang’ a ti a.Ka chalah a rawn fawp leh vang vanga.A ding mara,ka sam a rawn tuai leh zauh.

Kawngkhar lam panin a kala..’ Lo let leh tawh suh ang che,ka hua che’ ka ti sep a. Beidawn luat avangin ka mittui a rawn hnam leha,mahse ka kut hnung lamin ka hru nghal tawk thung. Ka ngaihdanah chuan Mittui hi chaklohna entirtu anih tlat avangin ka tap nawn leh tawh lo vang.

Rooma min khung hran atangin ka chhuta,kar a liam tawh. Ka awmtirh lam ni 3 chhung kha chu ka awmdan ka tuar thiam loh avangin mumal ka nei lo let tawp. Nitin Hriatpuia a lo kal ziaha,min lachhuak tur leh ka a lo tih sawiin ka lo ngen ziaha,ka sawi pawm vek anga lang siin min lakchhuah tumna erawh a nei lo tih ka hre thiam tawh. Ka sawi pawm nise chuan khunghran ka ni lo ang tih pawh ka hria. A sawi anga Boruak dang dawn ka mamawh anih chuan he room zimte hi ka khawvel anih tir hauh lo ang tih pawh ka chiang.

Hriatpuia bak tumah min tlawh turin an lo kal ngai lo,Machhuani emaw Remruata pawh an lo lang eih lo. Ka awm loh vang vang vang leh phone pawh ka hman ngai loh avangin an ngaih atha lo angem tih ka ngaihtuah fo bawk.Nitina ka hmuh thin,ka eitur min petu leh ka awmna room tifai thintu Tei chauh lo chu mihring dang reng reng ka hmu lo tawp..Tihtur engmah a awm si lo,Tv en a ni deuh tawpa,Phone ka kawl bawk si lo.. Ka hun tam zawk chu Tukverh bula thu chungin pawn lam thlir nan ka hmang a nita ber. Ka thut tlaivar thak thak tum a awm bawk.

Room kawngkhar a ri raka,ka hawilet chuang lo, Midang ni loin Te-i a ni tih ka hria. Nimin khan Hriatpuia khan nihnih vel a zin dawn avangin a lo kal dawn lo tih a sawia.A lo kal lo ang tih ka hria,bakah lo kal pawh nise awmzia a awm chuang lo.Ka ngai em em a,ka mamawh em em bawka.Mahse,min rinlohna avanga ka natna hian amah ka mamawhna a hliah hneh lutuka. A lo kal pawhin min biakna ka chhang ngai tawh lo. Mi a angin min ngaia,ka a der law law mai ang chu.

‘U Mam,damdawi leh Apple ka dah aw..’ ka rin ang ngeiin Te-in a ti a.Ka che eih lo. Ka thut ngaiin ka thu a, pawn lam ka thlira, thli thawin thingkung a chhem chet siau siau leh Sava eng tereuhte thingzara fu chu mitkhap mang loin ka thlira, ka tan chuan thingkung leh Sava te hi ka thiante anni mai. Achhuak thawm erawh ngaihven lo anga lang siin ka ngaithla ru kar thung.

A pen thawm rehfel veleh ka tho chhuaka,Dawhkan ka pan pheia,a sawi ang ngeiin Dawhkanah Apple leh Damdawi a lo awm ngat. Damdawi ka laa,ka tihfo danin Bathroom ka pana,ka lut a. Toiletah ka thlaka.Ka flash hnan leh nghal hmak. Atir phat atangin min Jection anih loh chuan eng damdawi mah ei ka tum lo bur,chaw pawh ka tam tawpkhawk anih loh chuan ka ei ngai lo.Hriatpuia’n eitur min rawn ken thin pawh tukverhah ka paihchhuak anih loh chuan Dustbinah ka dah mai zel.Thei lam erawh an dah apiang ka ei zo vek ziah thung.

Tukverh bulah bawk ka thu leh a, ni tla turin thingkung a chhun en chu ka thlir leh ta veng veng. Kawngkhar a ri leh raka. Tei niturah ka ngai mai,Damdawi ka ei leh ei loh rawn en a tum a ni ngei ang.A tihfo dan a nimiaua.

‘Hey…Ka lo kala’ ka aw hriat than em emin a rawn ti a, rang lutukin ka inher nghal zawk. Kawngkhar bulah Remruata a lo dinga,ka hmuh veleh ka tum loh tawpin ka mittui a tla nghal a,ka insut zui hraih bawk.

Chapter- 32

‘Remruat…’ ka ti chhuak sap. A thle baka,a hmel zaidamnaa khat chu ka en a, ka mittui vangin ka hmu phe deuh ruaia.Bakah,ka mitvai anih leh nih loh ka chiang ngam rih lo. Helai hmunah hian rei pawh la awm lo mah ila mihring nihna bo thakin min sawisa tawha. Mihring nih dan ka hloh then nasa tawh lutuk.

A dinna ngaiah a dinga,a hmai a tuai puat ‘I tha em?” min ti leh a.

‘I ni tak tak em?” ka tahnuih titih..

‘Um…Ka ni e’ a ban a phar a,a nui a..Amah a ni,ka mitvai a ni miah lo..Mahse, kei ang bawkin a hamhaih ve niin ka hria.

‘ I lo va kal har ve’ ka ti leha..

‘Sorry…Mahse, hei ka lo kal tawh alawm’ ati a, a nui leh a. Tap lo turin ka hmui ka pet fan fan chungin ka tap chhuak ta tho.Min rawn pan pheia,mittui nen ka en ve thung. Ka bulah a rawn dinga,a ban pharchhuah at maiah chuan ka tlu lut nghal rawk rawk a ni ber. Mittui hi chaklohna entirtu anga ngaiin tah leh ka inring tawh lo kha ania…Mahse, chhuak lutukin ka tap zui lehnghal hlawp hlawp. Tuikhuah sah huk hi ka intehkhin ber..Eng mah sawi loin min kuaha,ka hnungah min hnem tumin a beng thak thak bawk.

Reife ka tah hnuah ka tahchhuak zualpui a reha,ka tahna avanga ka taksa khur hlawk hlawk a reh tial tiala,ka mittui tla pawh a reh ta bawk. Ka hawichhuaka,a mit sen ve ramah chuan min khawngaih vangin a mittui  a tla ve pawh a nimahna.

‘Thu ang,lo kal rawh’ a ti a. Khum lam min panphei puia. Ngawirengin min kaih ang angin ka zui ve nghal mai bawk.

Khumah kan thu duna,naupang tap nasa lutuk,an tah zawh hnu pawha an la insut ang maiin ka insut leh hraih. Remruata ka en a, zawhna zawh tur ka ngah lutuka,ka thluakah hian a inlumlet tup tup a ni ber. Zawh tur ngah em em siin eng ber nge ka zawh hmasak dawn ka hre lawi lo!!

‘Harsatna i nei em? I taksaah emaw thildang hrim hrim?” a ti a. Chik zetin min thlek kual dan dan mai.

‘Ka tha..Eng mah na ka nei lo’ ka mittui a rawn hnai lehnghal kuara, ka insut leh rih. Ka kut hnunglamin ka mit ka nuai leh zauh bawk.

‘Tu nge hetah hian dah che?” a ti a. Ka ang ziaua,mahse eng mah sawi loin ka chip leh daih.

‘U Hriatpuia tiraw?’ amah bawkin a ti leh a, eng mah sawi loin ka bu nghat ringawt.A hming sawi ringawt pawh ka duh lo.

‘Tenawm…’ zawitein a ti a, ka hre phak tho. A thilsawi ka pawmpui thlap bawk.

‘ Engtin nge hetianga atih theih che le?” a ti leh hap. Ka dar ka ti chhing ak ringawt. Sawi kher lo mah se min awmtir dan hi mak a ti tih ka hre theia,chiang taka lang leh ta chu ka hahdam theih nana Boruak danglam min dawntir tum anni lo.Ka chhungrila mi a ang maia min hmuhdan zawng zawng min pawmtir tan mek pawm harsa ka tihsi kha, tuna a sawi khan a nemnghet leh chiah.

‘Mi zawng zawngin i a pawh lo tise a nupui i nih tlat avangin ani chuan i a lo tih a ringngam tur a nia,ka sawi awmzia chu ilo buai deuh anih pawhin a tanpui che anga, I bulah a awm tur a nia’ a ti leh duah. Ka pawm leh thlap,ka ngaihtuah dan chiahin ani pawh hian a lo ngaihtuah ve tho tih ka hria.Mahse..

‘Ka a tih miin an sawi tihna a ni em?”

‘Teuh lo,teuh lo lutuk ringawt’ uar zetin a ti chiam.

‘Anih chuan engtin nge khatiang kha i sawi si a?” ka ti leh khauh.

‘Hmm,midang niloin chhungkua kan nih hi. I pasal nen hmunkhatah kan thawk dun bawka.Mahse, hlauthawng suh.I pasal hi i Pasal anih chhung chuan i awmdan dik tawk lo leh i chanchin mawi lo zawng eng pawh sawi tur hria an lo awm anih pawhin an sawi ngam ring suh’ a ti leh duah. Ka khap sak sak a,Hriatpuia eizawnna ka hriat ve chin leh a thiltih engkim mai hi dan hnuaiah vek a ni a. Mahse, ka lo hriat ve loh a mize dang hi la awmin chu mize neitu pawh chu ka pasal taksa pu,mihring dang nisi a ni mai angem? Hetiang khawpa a naute pawn an hlau hi thil pangngai a ni thei tlat lo. A hma kha chuan an zah niin ka hre thina,mahse tunah chuan an hlau tih ka hre thiam tawh.

‘Anih nangin min ring em? Ka sawi awmzia chu ka a miah lo ti ta ila..’ ka ngaihtuahna tilang loin ka ti a. A mitah tak ka en ran bawk.

‘Zep loah chuan ka chiang lo. Mahse, khung hran ngai khawpa chiang lo erawh ini lo’ a ti a. Zep emaw han thluaithlum  vel pawh a awm lem lo.

‘A tha alawm..Diktak chuan engkim hi amak vel vek asin,tum nei rana ka chunga thlentir anni a’ ka ti sep.

‘Tu? U Hriatpuia’n maw?” hre thiam lo zetin a ti deuh hu.

‘Aih, Ramsanga…’ ka ti sap. Kawngkhar lam ka en pheia. A inkhar tha thlapa,pawn lamah awm an awm em ka hre lo thung.

‘Lawk,I sawi tum ka man lo’ a ti a.

‘Mi hmuh dana mi ang lo anga ka lan theih nan tu emawin infiamnan min hmanga..’ ka ti chang fak.

‘Oh..Mahse,Ramsanga berkher maw?! I hre sual em?” a hmelah chuan awih lohna chiang tak alang theia. Ka thaw halh mai,Ramsanga a ni ngei tih hre mah ila eng fiahna mah ka pek theih si loh avangin sawifiah ka tum luatah ka sawi awihawm lo zo vek thei a..Thil ka hre chhuak zawk..

‘Doctor kha. Engtik atangin nge i hriat?” ka ti nghala.

‘Ka kalpuina che kha maw?”

‘Aw…Amah kha’

‘Um,ka hriatna a rei ve tawh tho mai. Doctor tha leh lar pangngai tak a ni a, diktak chuan ka Pitei atanga hria ka nimah zawk.Pitei pawh hian a pan thina’ a ti a. Ka sawi ang nge sawi lo ang tih ka ngaihtuaha,helaiah hian Te-i bak tunge awm ve ka hre lova,mahse bangte pawh hian beng annei tih ang deuh khan fimkhur tluk a awm chuang lo. Tuna pawimawh ber chu heta tang hian chhuah ka ngai. Ka chhuah hnuah hmalak zel dantur ka la ngaihtuah chawp zawk ang..Remruata ka en leha,amah hian min pui thei angem? Hriatpuia hmachhawn angam meuh angem? Kei ni ila ka thil chak loh ber zinga pakhat a ni ngei ngei ang. Mahse, ani hian min pui anih si loh chuan tu nge min pui ang? Ka tum chhin phawt thei ang chu.

‘Heta tang hian min hruaichhuak thei angem?” ka ti sap. Phawk zetin min rawn en vat.’Khawngaihin..’ ka ti leh sep. A tawng thei lo emaw tihmai turin ngawirengin min en vang vang ringawt. Kei erawh ka beidawng leh hman hluah hluah.

‘I duh chuan..?” reife min en vang vang hnuah a tichhuak hlawl. A ngawirei lutuk kha min hnial dawn emaw ka lo ti hmana,mahse min chhanna chuan min ti nui ta sak.

‘Ka duh,mahse engtin nge kan tih ang?” ka ti vat.

‘Kan ngaihtuah angai dawn tihna animai..’ a ti leh mai. Ka ngaihtuahnaah engtin nge hetah ka awm tih a hriat tih zawhna a lo lang thut.

‘Nimin piah khan u Hriatpuia phone hmang lai ka hre ru a, I awmna lai tak chu a sawi lo thunga.I dam tha lo tih leh inentir turin i kal tih a sawia,diktak chuan ka be thei miah lo che a,I online ngai lova,call a tlang thei bawk lova.Dik lo a awm anih ringin ka lo ngaihven ru reng tawh a. A sawi anga inentir tura kal chu ni la ka hriat ka ring ve tawp. Keiin ka hre lo anih pawhin Machhuani tal chuan a hria ang tih hi ka ngaihdan a ni a.Mahse,kan hre ilo ve ve.Thinrim suh,kei leh Chhuani hi i chhungkua kan ni miaua. Ka ngaihtuaha,dik lo awm nia ka hriat kha hre chhuak turin ka nuna a vawikhatnan ka zah em em ka unaupa ka chhui ta a..Helaia lo luh erawh thil awlsam a ni lo chiang’ a sawi zawh rualin a thaw hak mai. Hriatpuia an Cousin hoin an zahzia ka ngaihtuah leha,han chhui vel chu khawvela thil chakawm lo ber pawl a ni ngei ang.Chumai bakah hetah a lo la kal leh ta zela,a lu a zuar a ni hrim mai.Mahse, ka lawmna erawh a fawnin a fawn hlup hlup thung.

‘Min ngaihtuah vangin ka lawm e aw..’ ka ti sap.

‘Lawmthu sawi vel kha a…’a nui a.Kei erawh ka hlauthawng deuh thut.

‘Inah hian engtin nge ilo luh theiha? Vengtu an awm renga, Chuan hmeichhe pakhat a awm bawka’ ka ti a.

‘Um,awm..Mahse, tihdan a awm ve alawm..Bakah,I thianpa hi ka puitling tawh’ a ti leh a. A kut a tipira,a sawi tum ka hre thiam mai. Nia, pawisa a awm chuan tihtheih loh hi a awm meuh tawh lo.

‘Pawisa i pe tihna maw?” ka ti halh.

‘Ahh..I dilchhut em mai. Tunah chuan i awmna ka hre tawha,pawimawh ta chu u Hriatpuia lo haw hmain i lo chhuah hman angai dawna’ a tih zawm leh daih..Ka chil ka lem a,ka rilruah chhuah nghal rum rum ka duhna leh Remruata tana him lo awm thei tur a inbuk tawna,bakah khawiah nge ka kal ang? Pasal ka neih hnuah in ka luah tawh si lo. Ka nu ka ngaihtuah chhuak a,ka lu ka thing nawk.Ni lo,ni lul lo mai..

‘I tan hlauhawm a ni angem?” ka ti halh. Kalna tura ka buai zia erawh ka tilang duh lo.

‘Buaina,maithei..Mahse, nunah hian tihsual tamtak a awm thina,chung zingah chuan hriatreng tlak thiltha tihchang pawh awm ve se a tha alawm’ a ti awlsam leh mai. A tho chhuaka,khawngkhar lam a pan pheia. A hawnga,chhuak loin pawn lam a bih a. A ding mara,a khar lehnghal mai.

A rawn kal phei leha,a rawn thu leh a. A kekawr ipte atangin phone tereuhte a rawn phawrhchhuaka.Ka kutah a rawn hmehbel chawt chawt.

‘Hei hi lo kawl rawh,thil thleng danglam deuh a awm anih chuan min lo call la..Anih loh pawn msg pawh a pawi lo.Mahse fimkhur la..Naktukah engkim tihfel ka lo tum ang’ zawitein a ti a. Ka hrawk ro halh tihnawng turin ka chil ka lem a. Ka lungphu ri dut dut chu Remruata pawn a hre thei hialin ka ring. Eng mah sawi loin min kuah leh vang vanga, ka kuah let ve bawk.

‘Lo hahdam tum la,atthlak zawnga chet tum miah lo bawk la..Naktukah chuan engpawh thleng rawhse, ka thi anih loh chuan heta tang hian ka rawn hruaichhuak ang che’ a ti leh a.. Tawngkaa chhang loin ka bu nghat ringawt..Hriatpuia lo haw hmaa tihfel angai tih keiin ka hriat ang bawkin a hriaa,anih loh chuan Hriatpuia a awm anih chuan kawng a ping leh tihna animai. Min lachhuak thei tak tak dawn em tih hi ka ring emaw ring lo emaw hei bak beiseina dang ka nei lo va,lo thei ta lo pawh nise a tum tal dawn tih ka chiang..

Nidang aia tlai feah eitur Te-in min rawn pe a. Nidangah chuan khua a thim fel tihin chaw a rawn dah lut mai zela,vawiin erawh a tlai viau.

‘Ka tihpalh lutuk,I ril a lo tam tawh viau em?” a ti bawrh bawrh.

‘A pawi lo..Eng mah tih tur ka nei chuang lo’ ka ti a. A phu nghek thung.Ka dem lem lo,diktak chuan min biakna ka chhan hmasak ber tum a ni hialin ka hria.

‘Awi,U Mam..’ a ti hluai..Ka melh zawka,ka tihngai miah loin ka nuih sak. A ang pham mai,mahse a incontrol leh vat.

‘Ka lo muhil a,rapthlak khawpin ka mut a chhuaka,ka harhin khua a lo thim tawha ’ A ti leh bawrh bawrh.Ka chhang lo,ka ngaihtuah naah Remruata a lo langa. Lehlam hawiin ka then leh sak mai. Heta lo lut tur khan eng hmanrua emaw chu a hmang tih ka hriaa,enge anih erawh ka hre lo. Mahse,tuna Te-in a mutchhuah zia a sawi khan enge a hman ka hrethiam chiah. Ka thianpa hi a lo puitling tak zet tawh anih hi a..

Tukverh bulah ka thu a,pawn lam thim mup mai ka thlira,ka thaw halh. Ka kekawr ipte atangin Remruata phone min pek ka lachhuaka. Ka en vang vanga,Hriatpuia number ka chhu leh ta nge nge.Mahse, call loin ka delete leh mai. Remruata kal hnuah vawi engzat nge Hriatpuia number ka chhutchhuah hman ka hre seng tawh lo. Ka hua tih ka theihnghilh ta a ni lo,ka huatzia ka hriatchhuah rualin ka hmangaih zia ka hre chhuak ve zel a ni zawk. ‘Ti nge?” tih zawhna,chhangtu tur awm si lo inzawt bawkin ka tawp leh thin..

Ka en leh vang vanga..A hma ang bawkin Hriatpuia number ka hmetchhuak leha, ka kut hian number dang a hmet thiam ngang lo nimaiin ka hria..Thaw dep dep chungin ka call a,a tawp nan a aw vawikhat tal hriat ka duh..Ni lo,naktukah ka chhuak thei kher angem ka hre lo…Mahse,ka chhuak thei anih chuan ka hmu leh tawh ngaiin ka ring lo.

‘Hello…’ a awpa leh thawp sutin a rawn ti a. Ka che lo,ka awm ngaiin ka awm a..Ka lungphu rang lutuk chu a thlawkchhuak ang tih a hlauhawm zawk.

‘Hello…’ a rawn ti nawn leha..Ka beng bul atangin ka lasawna,ka off ta zawk. Ka mit ka chhinga, ka biang a rawn lum thla nghal pap mai.  

Khawvar thlengin Tukverh bulah ka thu ta reng. Ka mut achhuak hlawl lo ti ila a dik ber ang. Ka helhhawlh nge ka hlauthawng zawk ka hre hek lo.Sava hram nak nak ka ngaithlaa,pawn lama Motor tlan thawm ka hriaa. Ka kang deuh awk thei. Hriatpuia Car ri a ni tlat. Ka hmu thei lo chungin ka hre sual lo ang tih ka chiang.A tum lawk dank ha chuan vawiin pawh la zin tur a ni a,mahse hetah a Motor a lo kal tlat si!! Chu pawh zing karah lehnghal..

Hmanhmawh zetin ka che nghal phat. Bathroomah ka lut a.Ka Phone dahthatna tur ka zawnga,Dustbin in ka mit ala nghal chat. Dustbin lian vak lo awm chu ka pan nghala,Garbage bag ka pawtchhuaka,Dustbin mawngah Phone ka daha,angai ang bawkin Garbage bag ka dah hnan leha..Ka kut ka sil faia,ka hmai ka phih leh a..Darthlalanga ka hmel lo lang chu ka en vang vang. Helaia ka awm hnuah mumal taka ka inen lehna hmasa ber a ni a. Ka landan nalh lem lo tak, ka hmel pawr leh dang lap mai chu ka rin ai tak chuan azia.

Tukverh bulah ka thu fel leh hman awrh tihin Kawngkhar a rawn inhawnga,mahse ngaihven angin ka awm duh eih lo. Ka thu ngaiin ka thu a, ka khupah ka khabe ka nghata,pawn lam ka thlir vang vang bawk.

Pen thawm rawn hnai zel chu en lo pawhin tu nge anih ka hre thei tho. Ka thutna bulah a tawp chata, mahse ka hawichhuak chuang lo.

‘Mate…’ a ti sup. Ka che eih lo. Kawngkhar lamah pen thawm a rawn awm leha,Tei niturah ka ngai mai.

‘Sir…Phone’ Mipa awin a rawn ti a. Eng nge maw thleng ta le? Ka phone kawl kha sawi a tum tihna nge ni anga nimina Remruata lo kal kha an hre chhuak zawk?Ka awmna Pindanah hi chuan CCTV an dah lo tih ka chianga, mahse pawn lamah dah an lo nei tihna a ni angem? Ka lungphu a rang nghal zaih zaih thei.Mahse, ka awmdan danglam tilang lo turin ka awmdan pangngaiin ka awm lui tlat.Hriatpuia bulah kher hi chuan fimkhur tluk a awm lo tih tumah hrilh ka ngai lo.

‘Tu nge?” Hriatpuia’n a ti hmuk. Ka thaw deuh huai thei. Ka phone kawl lam ni loin a phoneah call a dawng zawk tih ka hre thiam.

‘Pi Rosy…’ min deng dawt thei. Rosy chuan anghak rei lo hle mai,Ahh…Rosy chauh niloin Hriatpuia zawk pawh mawle..Tenawm hlawm hian a….

‘Nakinah ka be mai ang,Ka rei lo ang’ Hriatpuia’n nelawmna tel map loin a ti hmuk.

Chhuak thawm ka hriaa,kawngkhar a rawn khar ri khap bawk. Thawm awmloin a reh leh tlawk tlawk tawh. Ka thut ngaiin ka thu a, pawnlam bawk hmuhnawm em em hmu ang maiin ka la melh lui ta tlat.

‘Mate’ a ti leh sup,che lo turin ka insum tang tanga,ka hmu thei lo nangin min rawn hnaih lehzual tih ka hria..Ka inrin hmain a rawn kun hniama,ka biang tawn tawnah a rawn vuana,amah en thei turin min kuai her nghal zat. Ka tihfo danin hnial miahloin min khawih ang angin ka awm tawp. A hmelpa leh hriam hraih,lang pawr deuh fap mai chu ka en a..Nizan khan a aw ka hriat tawpna leh ka hmuh leh ka inrin loh vangin atawp nan a aw hre chakin ka bia kha ania.Mahse, tunah chuan ka bulah a awm leh ta lawi si..A rawn kun hniama,ka chalah a hmui chhah tapin a rawn ti sia,thawk a la zui vang vang..

‘Nangmaha ka  dah che angaih avangin ka tihpalh aw…Mahse, lo nghak hram hram rawh.A tawp tep tawh ania..Ka hmangaih che tih hrereng la’ a ti leh sup….Ka chalah a rawn fawp leh a,a kutzungpuiin ka hmui a tuaia,a thaw leh hawk bawk.

A awmdan chuan ka chhungril thlengin a fan rawih rawih thei.Diktak chuan helaia ka awm hnuah tun ang hian ala awm ngai tlat lo..A lo kal apiangin min Hmangaih tih min hrilh ziaha,thil thar a ni tawh lo.Mahse, heta ka awm avangin thupha ala chawi ngai lova,vawikhatmah nghak tur leh a tawp hun ahnai tih min la hrilh ngai miah lo bawk.

A chhuah hnuah thawm ngaithlain ka awm ngaiin ka awm deuh vang vanga, thawm eng mah a awm tak loah chuan Bathroom ka pana,ka phone dah that ka lachhuaka,muangchang loin Remruata ka call nghal vat. Nidang ang anih chuan Tei lo kal a hun hnai tawh..

‘Ka lo kal mek e’ a pick veleh a rawn tinghal tawp.

‘A lo kal zo chiaha’ zawitein ka ti a.

‘Tu,u Hriatpuia maw?!” a rawn ti a.

‘Aw…’ ka ti tawi leh tak..

‘A la zin turah ka ngai asin le…Mahse, lo hlauthawng suh.Vawiinah chuan a fel vek ang’ pangngai takin a rawn ti leh a. Min hmu thei lo tih hrereng chungin ka bu nghauh tho. Diktak chuan ka beiseina neihchhun a thamral leh tan mek tih ka inhria.

Tei’n chaw leh damdawi a rawn daha,hlim takin min be bawrh bawrh.Mahse, ka chhang eih lo thung. Eitur a rawn dah atanga darkar khat vel a liam leh hnuah Remruata a rawn lang a. Ka thaw nghal huai thei.

‘Kan tilui ngam dawn em ni?” ka ti sap.

‘Hmmm….Kal ang,eng mah ken chhuah tur a awm lo tiraw?” awlsam deuhin a ti a. A awmdan thawveng lutuk chu ka hre thiam chiah lo zawk.Karkhat zen zawn ka lo khawsakna Room chhung zimte chu ka en kuala,ngaihna reng reng ka nei lo. Ka tan chuan Jail a ni a,hmun rapthlak em em a ni bawk.

Room atangin min kaichhuaka, thutkhawmna pindan lian vak lo,fel thlap a lo awma, Tumah an awm lo. Pawn lam pan turin kawngkhar lam min panpuia,ka mumang a ni lo tih ka inhrilh nawn angai hial..Ka beiseina thamral mek kha tunah chuan beiseina mai ni tawk loin atak ram achang ta chu ania…

Car lo dingah min nawr lut a,a rawn lut ve a.  Kan tlanchhuak zui chu a ni mai..Engkim mai kha a thleng rang lutuka,ka la inringhlel rum rum bawk.Pawn lam ka thlira, ka dakchhuaka,thawk ka la vang vanga. Hetiang khawp hian zalenna hi a hlu thei ang tih ka lo hre thiam phak ngai lo.

‘I zalen tawh e’ Remruata’n zangkhai takin min ti a. Ka hawileta, nui chungin min lo en a, ka nuih let ve var var mai. Hahdam takin seat hnung lam ka nghenga,ka zi mar ar ar.Mahse,ka ngaihtuah naah enge ka tih leh ang tih a lo lang zawk.

‘Ka zalen…Mahse, enge ka tih leh tak ang?” ka ti chhuak halh.

‘Ngaihtuah duh suh,kan thlen hunah i hre mai ang’ a ti awlsam leh mai. A mood tha leh lutuk chu mak ti zetin ka en a, min rawn hruaichhuah tirh atang khan hlauhthawnna a nei miah lo. Hriatpuia a lo kal ka tih pawh khan hlauthawng awmin a awm chuang miah lo bawk.

Khawpui chhung kan tlan tlanga,kan tlan zela, khawpui hmar lam,tlema dai pawn deuhah kan dinga,kan dinna bula inlian leh chul deuh rup chu ka en a. Remruata ka en leha,a bu nghat.

‘Chhuk ila…’ a ti a.

‘Lawk,hetah hian enge kan tih ang?” ka ti a.

‘I inthar tur..Thil a danglam hma chuan hetah hian i awm rih ang’ thutak zetin a ti a. Thilsawi tumin ka ang ziaua,mahse ka chip leh ta zawk.

Motor atangin ka chhuka,Building hlui rup mai luhna Gateah kan lut a..Kawngkhar lian zet a lo awma. Remruata’n kik pawh kik lem loin a hawnga, ka zui lut ve zel bawk.Inchung panna stepah kan inzui chho a, chhawng thumna kan thlenin a ding ta chut. A kekawr ipte atangin chahbi a phawrha,kan dinna bula kawngkhar a hawng nghal zat.

‘Lut la…’ nui chungin a ti a, ka luhna turin a tawlhsawna..Tim deuh daiin ka pen luta,room chhung ka thlek kual nghal dan dana. Building pawn lam nena inmilna reng reng a nei lo.

‘Eitur vel ka va lei anga,ka lo let leh vat ang’ a ti a. Ka bu nghat..A kal hnuah kawngkhar ka kalha,inchhung ka enkuala. Bed Room lian pangngai tak pakhat leh,tlema te deuh pakhat a awma.Bathroom zau tha hem hawm pakhat a awm bawk.

Thawmhnaw eng mah ka keng miah lo,inbual ngei ngei ka duh..Remruata call tumin ka phone ah lai ka lachhuak dawna,mahse ka ak miah lo…Ka ngaihtuah leta,roomah khan ka thlauh nge Motorah zawk ni ang?

Kawngkhar an rawn kika,ka phu vak. Huizz,engvanga han phu chiam nge maw ka nih le a? helaiah hi chuan eng mah hlauh tur a awm lo tawp ang. Remruata bak a ni lo tawp bawk ang. Kawngkhar lam ka pana,zimtein ka hawnga.Pawna lo ding ka hmuh takah chuan ka thaw nghal hawk mai..

Chapter- 33

‘Thiannu…’ ka ti fan raih mai. Kawngkhar ka hawng zaua,a rawn lut a..Ka tawng hre lo ang maiin chik zetin min en a.Ka kut a rawn vuana. Ka biangah a rawn khawih leh dan dan..

‘I tha tiraw? Engtinmah an ti lo che tiraw?” a ti nghal mawlh mawlh.

‘I hmuh ang hian ka tha vek e’ nui chungin ka ti a.Mahse, ka tah achhuak ru et et thung.

‘Tukinah Remruata’n min rawn calla,ka a lo chauh..Awi, khawvel hi a mak ka ti em mai’ a ti leh a. A sawi zawh rualin a mittui a rawn tlaa,a insut zui nghal hraih.

‘Hei ka him tawh alawm’ ka ti leha,mahse ahmai hup chunga atap chuan amah ka hmuh ruala ka tahchhuak ngawih ngawih,ka insum hram hramna kha a tichhe ta nge nge.

Inkuah chungin kan tap dun ta hlawp hlawp. Reife kan tah dun hnuah thutthlengah kan thu duna, thil thlen dan zawng zawng ka hrilha,achang leh thinrim hmel a pu a, achang leh min khawngaih hmel a pu bawka. Ka hrilh chhung zawng a hmel landan a thlak kual sek.

‘Hriatpuia chuan min rawn hmu a’ a ti a. Ka mar deuh awk thei.

‘Maw? Tinge a?” ka ti ha mai.Machhuani lo hmuh nachhan tur aneih ka hre lo hrim hrim.

‘I damthat loh vangin hun eng emaw chen enkawl turin i awmbo rih dawn tih a sawia..Awi,asawi danah kha chuan ngaihtuah em em che ang chiahin alanga’ a tih zawm leh halh.

‘Pawnlam landan chu mi pangngai chuan kan duh duhin kan ti danglam thei vek ang chu’ ka ti hmak.

‘Nia,dik chiah..Mahse, athianpa thiltih hi eng mah a hre lo pawh a ni theia,Doctor tenawm nen khan an tangrual miau sia’ a ti leh nghauh.

‘Hriat a tum loh chuan a hre thei lo ang. Nupui pawh ring zo lo khan athianpa aring a’  ka ti hmak.Ka sawi zawng pawn ka thinrim et et thei.

‘A tihsual man ala hmu dawn alawm,tunah pawh abuai mek maithei asin’ a ti ve nghat. Nia,buai maithei. Kan chhuah lai khan tumah an awm miah lova,tunah chuan Te-i Damdawi min pek tumin a lut tawh ngei anga,ka awm lo tih a hre tawh ang.Hriatpuia hnenah a hrilh ngei ngei angai dawn bawka..

‘A thawveng hawk zawk maithei’

‘Maw?” a ti vat..Ka ngaihtuahna ka lo sawichhuak tih ka hre chiah.

‘A lo thawveng zawk maithei’ ka ti nawn leh a.

‘Ka ring lo..Thildang chu engpawhnise a Hmangaih che tih hi chu ka ngaihdan ngai reng ala ni’ a tita tlat.

‘Kan Hmangaih anih chuan kan Hmangaihte chu kan ringngam tur a ni dawn lawmni?” ka ti ve khauh.

‘Nia,a dika..Mahse,nangpawn…’ sawi zawm loin angawi leh daih.

‘Sawi zawm la…’

‘A ho lutuk..A tel lo pawn i awm thei dawn chiang em mai,kha lehchen i awm thei alawm..Ka awma, Remruata kan neih bawk chhung chuan a tha vek alawm..A ni em?” thle deuh ha chungin a ti a, ka bu nghat.Ni e,Remruata leh Machhuani an awm anih chuan kawng a awm leh mai ang.

‘Nangmah hi chu i tha tiraw?” ati leh daih.

‘Aw…Tha lutuk,thil ka ei that loh vang aniang.Tlemin ka chau deuha,chuzawng chu animai’ ka ti tha ve mai.

‘Um..Aniang,Ek-a pawh chu a va lo let har si ve’ a ti leh daih.

‘A lo let leh tep ang ka ring,Eee…Biak ka ngai tak asin,thawmhnaw ka mamawh’ ka ti a.

‘Ka call dawn mi?” a ti a.

‘Um,phone ka thlauh nge mawni?” ka ti niah niah. Call ta mai loin phawk fein min rawn en a.

‘Phone i kawl maw?”

‘Aw,aaaa,kawl tih lemah niminah Remruata’n Torch Light support ang kha min pe a, mahse hei ka tihbona pawh ka hriat si loh hi’ ka ti leh a. A dar a tichhing ak thung.

Remruata a call a, thatchhe zetin ka thu a, Ceilingah hmuhnawm a awm emaw tih mai turin khap mang loin ka en vang vang.Ka bula Machhuani tawng mawlh mawlh chu ka ngaithlaa,Remruata nen an invin lawng lawng,ka then sak mai. Tunah chuan ka tana mi tha em emte bulah ka awm ta chu ania. Anni hi chuan mi a angin min ngai ve lo va, ka sawi apiang rinhlelhna awm loin an pawm fai vek bawk. Ka neihchhun liau liau te tih loh theih anni lo..Mahse,hahdam taka awm tur ka nih laiin ka tang ru teuh reng lawia,Hriatpuia’n ka awm lo tih a hre tawh angem? hre tawh ta se min zawng angem? nge a lo hahdam huai anga, Rosy nen nun bul an tan tha zawk ang? Ka ngaihtuah zawng ringawt pawn ka awm a nuam lo,ka luak achhuak deuh hlui thei.

‘Roomah khan en se a ti..Ee,phone chu Motorah i thlauha ’ ka dara rawn khawih pahin a ti a. Ka phu deuh zawka, a sawi awmzia hre loin ka lu ka thing ngawt bawk.

‘Phone chu Motorah a awm’ a ti leh a.

‘Phone lam a ni lo,Rooma entur zawk chu mawle’ ka ti ve thung.

‘Ka hrethiam bik lo,en phawt ila..’ a ti a.

Ka tho a, room lam ka pana.Nichin khan ka enkual thuak thuak tawha,thawmhnaw dahna lam reng reng ka lo ngaihven lo.Bed Roomah ka luta, ka hnungah Machhuani’n min rawn zui ve bawk.Thawmhnaw dahna tura bang rinchhanna an siam ka hawnga, ka thaw nghal hak mai.Ka hawileta, Machhuani ka en a.

‘Enge a? Ehe,a awmsa vek alaw?” a ti nghal hluai. Awmze nei lo zetin ka nui ringawt. Ka hawilet leha, Thawmhnaw bawma ka thawmhnaw lo inkhai dal mai chu mak ti lutukin ka en leh a. Ka hmusual lo tih lah ka chiang.

‘Ka thawmhnaw vek anih hi..’ ka ti fan raih.

‘Maw? Awi,a lo awm hrim hrim kha mak ka lo ti tawha. I ta sa vek maw?” a ti leh chiam. Tawngkaa chhang loin ka bu nghat ringawt.

He in hi tuta nge ni ang? Remruata thian hnai tak nge luah hawh atana siam a hmufuh palh ni ang? Lo hmufuh pawh nise engtin nge ka thawmhnaw hetah a awm theih? Zawhna hlir..

‘Remruata lo thlen hunah achiang mai ang.Tunah chuan inbual phawt rawh’ a ti a. Ka bu leh ringawt,ani nghah vanga lo inbual loh ngawt ai chuan lo inbual mai ila,a lo thlen hunah kan hre mai ang chu.

Tuilum pep pepin ka taksa a phuh huh rualin ka hahdam nghal sawng sawngin ka hre hial mai. Muangchangin ka inbuala,Ka inbual laiin Remruata a lo thleng tawh tih an tawng lawng lawng thawmah ka hre thei.Kitchen leh Living room inkara Daidanna atana an siam,Partition ho lam angreng tak nghengin ka dinga, Machhuani leh Remruata eisiam chu hmuhnawm ti em emin ka thlir a. Ka inluah ka sawn zana ka ina ei an siam dun kha ka mitthlaah alang nghal iar iar bawk. Kan inkawm hnuah hian hlimna leh harsatna ka nuna a lo thlen apiangin anni pahnih hi ka bulah an awm ziaha,min ngaihtuahna hi khawvela sum zawng zawng pawh hian lei min dil se ka phal ngaiin ka ring lo. Sum hi a hlua,sum tel lo chuan nun khawchhuah pawh a harsaa,mahse mihring nunah hian sum hi ENGKIM erawh a ni lawi lo tih ka chiang em em tlat.

‘Kal rual ila,min thlah loh chuan…” chaw kan ei kham hnuah Machhuani’n a ti a.

‘Um,thlah dawn e’ a titha ve mai. Min rawn en a,’I ngaihtuahawm angem? ka rawn riak thei reng a’ Machhuani bawkin a ti leh a.Ka thle bak,pasal nei tawh a ni a. A pasal chhungte an fel em em a,atul chuan a nu leh pa pawn an hau mai thina,ani pawn huatah ala ngai lo.Mahse,a chhungte fel vang ngawta duh duha lo pawhphar ka duh bau lo thung. Remruata ka en a, meizial zu chungin a phone a en a. ‘In inah ka lut ru alawm.I thawmhnaw ru chhuak tur ringawtin’ nui chunga a tih kha ka bengah a rawn ri nawn leha, chutiang ngawta awlsamin engtin nge a luh ruk theih tih ka ngaihtuah zawm leh zat. Mahse, ka lu ka thing leh nak,ka lo ngaihtuah chiam a tulna a awm miah lo. Tunah chuan ka thawmhnaw a awma,eitur lah a awm rih bawka. Ka awmna hi kan in ni lo mah se ahma anga khungbeh ka ni tawh lova,hahdam takin ka awm mai a tha zawk. Nakin chu nakinin a hril mai ang chu.

‘Hei,chahbi aw’ an kal dawnah Remruata’n a ti a. A chahbi dahna a kawk zauh.

‘Um,engtikah nge inlo kal leh ang?” ka ti a.

‘Ka hre lo,vawiin chu chawlh ka la a,mahse buaina deuh an nei a. Ka kal angai dawna’ a ti a.

‘Min mamawh chuan min lo call mai rawh’ amah bawkin ka chhan hmain a ti leh a.

‘A tha alawm’ ka titha ve mai.

An kal hnuah Kawngkhar ka kalha,Bed Room lian zawkah ka luta,Khum bula Tukverh awm ka hawnga, hnuai lam ka en a.A sang tha ngang mai,ka awm mekna in hi kham chhawrdawh chunga sak a ni tih ka hre thiam nghal mai bawk.Tla palh vaih ila chuan damchhuahna chance a awm eih lo hrim hrim. Khar leh tawh loin khumah ka lawna,puan sin loin ka mu a, ka mit ka chhing nghal vang vang.

Kawngkhar kik riin min tiharha,tho mai loin ka mut ngaiin ka mu a, ka awmna ka hai thelh.Mahse, he laiah hian Remruata’n min hruai tih ka hre chhuak lehnghal mai tho. Ka thuchhuaka,ni a lo tla fel tawha,khua a thim deuh chhulh tawha,Ka mu tha takzet.Kawngkhar an rawn kik leh a, ka phu deuh zawk.

Khum atangin ka chhuka, kawngkhar bula Switch pahnih awm ka hmet rual thawiha,a eng nghal iar mai. Ka chhuak pheia,chhunah khan Switch kha kawngkhar bulah bawk a awm tih ka hmu a, ka pan pheia. Ka hmet rual leh thawiha,a eng lehnghal pup. Kawngkhar kik ri leh dat datah chuan hlauhthawnna ka nei zawka, Hriatpuia emaw Ramsanga lo nita se? Ka tawlh hla hrata,mahse ka tawlh hlat rual deuhthawa Remruata min ko ri ka hriat takah chuan ka thaw huai mai.

Kawngkhar ka hawnga,nin hmel zetin a lo ding reng. ‘Ka lo muhil a’ ka ti a. Ka nuih a, a nui ve lo.A lo ding rei viau hman pek nge mawni?

‘Ka rindan chiah anih chu’ a ti hmak. Ka hawngzaua,a kalna tur kianin ka ding sawn deuha, mahse a lo lut mai ta tlat lo.A hawileta, a tawlhsawn zui zat. A tawlhsawn rualin Ramsanga a rawn langa. Angaihna ka hre lo.Remruata ka en leha,nui chungin Ramsanga lamah a thle nghal zuka, Ka khawng nghal vek…An pahnihin an inthurual tihna maw? Ni lo,ni lo..Ka harhchhuak zawka,rang lutukin kawngkhar pawhkhar ka tuma,mahse a kein a rawn dal hman a,hneh zetin arawn phih hawng lawp mai.A rawn lut zui nghala,a hmel nui thu mai chu rapthlak ti lutukin ka en a, ka khur zawih zawih bawk.

‘Hello…Min lo ngai em?” ngeiawm lutukin a ti a. Ka tawlh let nghal rawk thung. Ka inher thuta,Room lam pana tlan ka tuma,mahse ka hminga min ko riah ka inher leha,inchhunga lo lut mek, Sammy-a chu ka en a. Ka thi nge ka dam pawh ka hre chiang ngam lo hial..

‘Mami, kan hlauhawm lo ania.Min hlau duh mah ta che’ lo kal hnaih pahin a ti a. Ka melh tlawk tlawk ringawt. Remruata ka en a, a hmelah chuan ka thian,ka engkim lo ni thin kha ala ni reng. Mahse, fiahna engmah nei lo chung pawhin ka chhungril hian min bum tih min hriattir fel nghal vek tho.

‘Thu rawh,sawiduh kan neia,ka sawi anga. I pawm nghal chuan kan kal leh mai dawna’ a ti a. Pawisak nei lo hmel chu ka rap lutuk ringawt. Darkar 24 pawh ral hma hian engkim hi a letling nghal vek..

‘Remruat…’ ka ti lawi rat mai.

‘Thu phawt rawh’ nui chungin a ti a.Mahse, a nui hmelah chuan nidanga ka hriat thin Remruata kha a ni lo. Zawm mai turin a mitmeng tur zet chuan min mitmei zui leh zat.A hmel erawh nui hmel tho ala ni. Ka thian,ka engkim ni a ka lo hriat thin kha ka tana hmelma lianber maw lo ni a?!! ka la awih thei lo,mahse ka awm mek dan hi dawt a ni der si lo…

Remruata’n kawngkhar a kalha,Sammy-a leh Ramsanga an thu tawh .Kei erawh ka dinna ngaiah ka la ding ta reng.

‘Thu rawh’ min ti leh a. Ka che chuang eih lo.

‘A tha alawm,I peih chen chen ding mai rawh,ka sawi tur ka sawi anga,ngaihtuahna fim hmang ang che,I a lo tih kan hre vek ania’ nui thu chungin Ramsanga’n a ti a.Sawi tur hlawl ka hre lo.

‘Kalbo rawh..Anih loh chuan …’ a ngawi zui leh hmuk.

‘Hrilhfiah teh,a bo em mai’ Sammy-an tiel zetin a lo ti nghut.

‘I vanneih vanga pasal tha tak nei ini lo ania,diktak chuan Hriatpuia te nena kan Plan lawk vek zawk a ni a. Mahse, I Pasal thuduh zet mai hian chintawk awm lo lekin a atchilh ta che hi i vanduai pui anih hi’ thupui fun zetin a ti chhuak leha.

‘I pasal eizawnna hi tu hmingin nge a awm i hria em? Hre lo maw? Nangmah kha mawle’ min rawn kawka..Ka ip chawih thei. Hriatpuia ta emaw ka tih kha keima ta maw lo ni? Document engkimah khan keima hming ni loin Hriatpuia hming vek khan a inziak a,engtin nge ka hming a lo nih ngawt ang?

‘Thenzawla kan han tihthaih kual che kha Game nuam tak a ni.Khang lai kha chuan kei chauh niloin i Pasal pawh a bang bik lo a, mahse atir lamah chauh. Min phatsana,nang venhim che kha hnaah a nei zui a,a thian thaber hi min phatsana’ a ti leh a.

‘Ni lo…ni lo’ ka ti sep ringawt.

‘Vanduaithlak takin adik tlat..Khawih luih che ka tum avanga thaha min vau kha ka theihnghilh thei miah lo. I accident te,I hlauh em em i su emaw tia i bula tlu rengte kha,a vaiin plan lawk vek anih kha..I su reng reng lo. I vannei thei hrep a,I eitura tur kan pawlh lah kha i damchhuahpui leh hlauha.Ee,I naute kan that kha chu ka inthiam chiah lo,a ni lawmi?” Sammy-a en chungin a ti a. Ang pham chungin ka melh tawn seka,an hmelah chuan pawi tihna lam alang lo hrim hrim. Nuam ti em em zawk hmel a ni ka hmuh ni. Ka rai ngeia,mahse tur pek ka lo ni bawka. Hriatpuia khan a awih miah lo a,mahse a lo dik.

‘Mi tenawm’ ka au chhuak nghal thawt,ka zuan nghal pawpa,mahse hneh zetin ka kawngah Remruata’n a rawn mana. Min pawt let nawka,Chairah min nem thu nghal hnawk bawk.’Ka fa an that’ awmze nei lo zetin ka ti chhuak leh sap.

‘Kan tihpalh kan tih kha. Hriatpuia khan hriatchhuah tumin a chhui nasa a,a hailip hneh khawp mai..Mahse, hei Sammy hian min pui hlauha.. Eee..Chuan,in ina lo kal thin,duh duh huna bo lehzel kha maw Sanjana-i roomah khan kan thukru thina alawm.A bo leh daih zel kha’ a ti leh a..Ka tho lehnghal phat.Mahse, ka thawh rual deuhthawin Remruata’n min nem thu lehnghal hnawk thung.

‘Mi a anga lantir nan che khan bei hah ve viau mai.Mi i su nia i hriat avang khan i Depress nasa a,kan han tihthaih zui che a,mahse buaithlak lehpek chu i pasal khan tuemaw remruat tih a hre tlat kha ania. Kei chu min ringhlel lo. Tu nge a rinhlelh i hria em? a u mawle ’ a ti leh a, a nui leh huah huah.

‘Eng damdawi mah kan pe lo che,akhat tawka mutna damdawi Sanjana-in a pe zeuh che tih loh chu Damdawi kan hmang lo,nangmah kha i depress nasat avangin i buai saa,khatak kha Mutna damdawi ei tam luat khan a tichau leh zual che a.I Pasal i sawipui hleihtheih loh chhan kha i hria em? I pasal hian a hmangaihna che a atpui tih mai loh chu ka hriat tawha mifing ber pawl a ni a, I a lova,I hmusual lo bawk tih a hriaa.Venhim che kha a thupui animai..Mahse, nang lah chuan Remruata ilo ring em em a. Kan duh angin i buai ta lawk si lo a. Nikhawhreloa i tluk tum khan mutna Damdawi kha  i Dose let 2 kan pe che..Aah,I eiturah ni loin i tui inah zawk kan pawlhtir aw..I pasalin Sanjana-i a khawih mai kan hlauh avangin nangmah hlau che anga langin tunah chuan haw leh tawh lo turin a kalbo daih tawh. I pasal pawh a fimkhura,kan hmuh mai lohna turah a dahbo che a.Mahse, misual vanneihna san zia chu maw,I pasal aiin Remruata ilo ring leh hlauh peka’ a ti leh zuah zuah..

Thil kal tawh zawng zawng ka ngaihtuah leta,ka mitthlaah a lo lang zut zuta,ka Pasal aia midang ka rin zawknain a hrinchhuah chhiat zia ka ngaihtuah ngam lo hial zawk..Machhuani thil sawi,a sawi tluan duh loh kha ka hre thiam ta chiah bawk..

‘Engatinge?” ka ti chhuak sep. A kut a hmetri khauha,a nui leh vur vur.

‘Zawhna tha tak a ni..I pasal hian a u te eizawnna a leichhawn sak dawn khan Remruata pa hian a be ve tho,mahse i Pasal hnenah zawk an hralh. Chu pawh a nupui nau anih vang mai mai. Kan sumdawnna hi diktak chuan kan bul tanna a thianghlim bik lo,Hna atang khan nawrchhuah che kan tuma,Account khawihtu dang kan mamawh a,mahse i Pasal duhtak hi ilo dawi a ta veka..Sammy-a pawh hian nang dahbo duh chhan che a nei ve tho a’ a ti leh duah.

‘Ka chantur thil min chan khalh vek,nangmah pawh tel in” Remruata’n a ti a. Ka melh nghek.Pawisak nei lo zetin a dar a tisang uk duh lek chauh. Hei hi maw ka lo rin em em mihring kha? Ka awih thei lo zawk.

‘Kan pahniha kan sumdawn naah khan Zama aruka ka tihtir kha i Pasal ilo hmuhtir avangin engzat nge ka paihral i ngaihtuah phak lo zawk ang” Ramsanga bawkin a ti leh a.

‘Engatinge?” ka ti nawn leh sap.

‘Aww..Zawhna tha tak a ni,i pasal hi ka eizawnna atan ka mamawh takzet.A tel lo chuan ka kal thei lo tluk a ni. Mahse ani hian nangmah,I damchhung chuan ke kan pen dun thei tawh dawn lo..I awm loh angai, a chaklohna inih ang bawkin achakna ini a. I awm loh chuan ani hian ngai a awh leh tawh lo vang’ a ti leh a. Ka hrawk a ro nghal vek.

‘Thil pakhat leh chiah..I Scooty chhia a rawn siamsak tum che khan pui tur che ni loin,a u in thahtir che a tuma,a rawn chhanhim  che a’ a ti leh a. An lo kal tirh atangin min deng dawt dawt thei thilmak hlir ka la hriaa,tuna ka hriat zawh chiah phei kha chuan min deng satliah lo…Ka kehsawm vek nimaiin ka hria.

‘Thil dang ala awm,sumdawnna mai piah lamah chhungkaw thil..I awm loh thatna pakhat leh chu  i Pasal hian ka thian leh Sammy-a nau a nei anga. Sammy-a pawh a hlim anga, kei pawh ka hlim ang..Oh,Sammy nau i hre lo tak..Rosy..Nu pakhat hrin anni e’ a ti leh a. Min hualveltu,misual pathum chu ka en kuala,thawklehkhatah ka hlauhna a reh duak mai.

‘Ka tel lova ngai a awh dawn si loh chuan enge ka awm loh a tulna tur?” ka ti leh a.

‘Amah ni loin a thil neih a ni kan duh ni…A chiang em? I kalbo angai’

‘Kalbo duh lo ila engtin nge i tih ang?” inringtawk lutukin ka ti dam leh thlap mai.

‘Kan that ang che.Easy…’ a dar a tisang uk.. Ka thaw ham hama,a mitah tak ka en a.Ka dak deuh vah…

‘Ti ta che…’ ka ti hul hak.

‘Aaaah,keiniah hian engkim a tawp emaw ti lo la, Engkim bulpui i hre duh em? ‘ a ti leh a. Ka melh reng ringawt.

‘A vai hian Hriatpuia u a phenah a awm vek aw’ a ti leh a. Ka lo ringhlel tawh lo zawk kha ania,mahse a bulpui chu a lo ni reng!!!!

Engvangin nge min thahtir a tum ang? Hriatpuia a lo hua anih pawhin keichu mihrang daih ka ni a,an hnuaiah ka thawk tih mai loh chu inzawmna hran eng mah kan nei hek lo. Kan inneih hnuah Hriatpuia nupui ka nih avangin min hua nise ka la hre thiam thei. Mahse, an sawi hmangin ahma lam thil daih a ni lawi si..

‘I kalbo mai angai anih chu’ Ramsanga’n inti thupui fun fahranin a ti leh a, ka rilru buai nuai nuai tihfim tumin thawk ka la nghek thung.

‘A teuh lo mai’ ka induhtawkna tlem la neih tek tek sawmkhawmin zam lo awm takin ka ti hmak.

‘Ahh,han thah ngawt che chu a nunrawnthlak kan lo tia sin..Kan fel ka lo tih nen’ ngeiawm zetin a kiai leh vun vun.

‘Min that zawk maiteh’ ka ti chhuak vak.

‘Tha lutuk,kan pawisawitu ni lo mah la khawihnat che hi ka hreh lem lo viau ania’ a ti a, a tho vuta. Min rawn pan pheia,hawisawn duh loin ka melh ngar mai.

Ka bulah a rawn dinga,ka samah a rawn thama,min kuai dak nghal awrh a,ka nghawng ruh a na nghal zawk thei. Mahse, na ti awma lan ka duh lo bur.  A mitah tak ka en ran bawk.

‘I huaisen reuh hi mawle..Zana kan tihthaih lai che khan i thidang mai sia.I dawih viau turah ka lo ngai che a’ a ti leh a, Sammy-a leh Remruata za zetin an lo nui a. An nui ri chu ka bengah a ri ring lutuk mah mah.Min pawt dak zual sauha,a rawn kun hniama..A hmaiah chil ka chhak nghal thawt.

‘Zawngi le(h)..I va huai ve’ a ti nghal tuara,ka hmai a ri zui nghal thuaia.Ka thle lawng mai,mahse ka thu mar lehnghal auha. A mitah tak ka en leha,pawisak nei lo ang maiin ka nui chhuak hak bawk. .Engvanga nui ngawt nge ka nih erawh ka hre lo.

Min rawn khawih leh dawn emaw ka tih laiin a diingmara,a kekawr ipte atangin Romol a phawrhchhuaka,a hmai a hru nghala,a hru zo a. A kekawr ipte a zen leha,phone a rawn phawrh a..Angaihna hre lo lutukin ka en ngaiin ka en ngar ringawt.

‘Sam,tihdan thlak ila thain ka hria..U Mathani kan be lawk ang’ hawichhuak chuang loin a ti a.

‘I tihdan dan le…’ Sammy-an ngaipawimawh lo zetin a ti a, Phone a en daih bawk. Ramsanga a kalsawna,Tukverh bulah a va dinga. Ka thutna bul chiahah Remruata a ding thung. Kawngkhar lam ka melh zauha,a inkalh tha thlap. Inkalh lo ta pawh nitehreng se tlanchhuah tum chu thil atthlak lutuk a ni tih ka chiang.

‘Kan kutah a awm meka,hei kan hrilhfiaha,thu a awih lem vak lo’ Ramsanga tawngri chuan ka beng a verh zak mai. Mahse, ngaihven angin ka awm duh lo.Ka thut ngaiin ka thu lui ngar mai.

‘Ka lo ngaihtuaha,ani hian min hnial zel dawn anih chuan i nau duhtak kha kan dahtha zawk mai dawn mi niang? ‘ a ti leha, ka hawichhuak nghal zawk. Ramsanga ka en a, min lo en reng. Ngeiawm zetin mit a rawn siai zauha.That thei ila ka ti ngawih ngawih.Lehlam tawng ngaithlain a ngawi vung vunga. Hawisawn loin ka en a, a sawi lehtur nghakin ka thaw tha ngam lo.

‘Ok..I kut a bal miah lovang tih ka tiam che. I hria alawm,i kut tel loin mi kan dahthat fo kha’ a ti leha. Ka thaw hawka,mahse ka thaw zawm lehtur ka hrawkah min hnawhtu a awm tlat. Ka awm ka dawma,thawk tumin ka beia. A harsa lutuk..

A phone a off a, a kekawr ipteah a thuna,min rawn pan pheia..Ka hma zawnah tak a rawn dinga,min enchhuk run mai. A hmel tenawm lutuk,rultur hlauhawm ber chi pai ang maia chhungril chhe bawk si chu huatna nen ka en a.A hmelchhe zual sawtin ka hre hial..Kha lehchen kha Remruata ka rin angin Hriatpuia pawn a lo ring ve a.. Kan tana tha ber leh,keimahni chanve ang hiala ngaiin kan lo ringa.Kei phei chuan midang rinchhan harsa ti em em ka nihna dahthain ka thuruk zawng zawng he Sihal hi ka kawltir zui bawka.. Inchhir tih tawngkam hian ka awmdan a sawifiah zo lo,tunah lah awmzia a awm tawh der si lo…

‘Sammy,Jerry-a kha call la,zaninah sa pelh tur kan nei a.Khawvar hmain lo tifel rawhse’ min en chungin a ti a. A sawi awmzia ka hai lo..

‘Ti suh’ ka ti chhuak hrawih.

‘Maw? Eng maw i sawi? Ka beng hi a tha vak lo a’ a ngeiawm zia chu a rapthlak zawk.

‘Ti suh,kaltir rawh’ ka au a ni mah zawk.

‘Oh,enteh u..Hmeichhe tha tih takah hei a pasal katir turin min ngen anih chu’ ati a. An pathumin an nui vek. Ka enkual dan dana,Mihring ni loin Ramhuai awmkhawm an lo ni.

‘Anih chuan kan thu zawmin ikal bo dawn tihna a ni em?” Sammy-an min rawn ti a.Ka duh emaw duh lo emaw,ka at lutuk vanga Hriatpuia thahtir ka phal ngai dawn lo. Keichu ka nih nih ka nimai ang. Mahse, Hriatpuia erawh adam angai,ka tel loin harsa ati anih pawhin kum a vei anga,ngai a awh leh thuai mai ang.

‘Aw nge aih?” Sammy-a bawkin a ti leh a. Tawng loin ka mit ka chhinga, ka biang a rawn lum thla papa..Ka bu zui ta nge nge.

‘Good Girl..Anih chuan kan inrem tihna anih chu.Ruata,kan thil mamawh tur kha i keng em?’ Ramsanga’n a ti leha. Enge an sawi ka man lova, man tumna ka nei hek lo.Ka hriat zawng chu nung reng chungin ka thi mek tih zawng a nimai.

‘Keng e..A fel sa vek’ Remruata’n a tih ri chu ka hriaa,ka bul atangin a kalsawna. A bag atangin Envelope lian tha zet a rawn phawrhchhuaka. Ramsanga a pe a. .Ramsanga’n a hawnga,achhunga thil awm a lachhuaka,a en nuap nuapa..Tha tih hriat zetin a bu nghut.

‘Kan inremnaah chuan i damchhungin ilo let leh tawh ngai tur a ni lo. A awmzia chu Mizoramah leh Hriatpuia nunah..I nu lakah chuan harsatna a awm lo ang.In inpawh ngai miah lo tih kan hai lo ania.Chuan,keini pawn kan thu i zawm chhung chu Hriatpuia kan khawih bik lo vang’ inti thunei em emin a ti churh churh. Ka ngaithla liam vel mai mai.

‘Hei hi inihna thar tur a ni a. I hming hi en la,kan rawn lem lo nang chein nalh ka lo ti reuh lutuk’ a ti leh a. Ka mal chungah ID a rawn thehthlaa,ka en vat. Ka thlalak a awma,mahse hming erawh LALRINAWMI niloin LALSANGPUII a ni a, ka Address pawh Shillong a ni bawk.Ka mit ka chhing leha,ka chunga thil thleng mek hi harhchhuahsan thei ila ka ti ngawih ngawih.

‘Thil pakhat leh chiah,I inluaha an rawn tihthaih thin lai che a ka lo kal tum kha ila hria em? Kawngkhar rawn kik tu kha keimah tho ka nia,Actor tha deuh niin ka inhre ta deuh asin’ a ti leh a. Ka beng ka hup ta ngawt. Eng mah hriat belh leh chuan tur ka nei lova, ka mamawh hek lo. Vawiin atan hian thil rapthlak ka hre hnem tawh lutuk…

‘Ka sawi hmaih, zaninah inchhuak nghal ang.I thiannu laktlak loh zet khan tunah chuan Hriatpuia biak nachang ala hre lo maitheia,mahse naktukah chuan a hre tawh dawna.Chuvangin hetah i awm rei kan phal lo. Chuan,kan sual viau pawh a lo nimaitheia.Mahse,ka thianpa nupui leh Remruata hmeichhe Hmangaih thin inih avangin i inenkawl zuina tur sum i ac tharah kan dah lawk vek tawha,hetah hian Passbook leh cheque a awma.I lachhuak thei ang. Kan nau pakhatin a hruaichhuak che anga,I awmna tur hmunah a dah ang che. In lian tak a ni lo nangin nuamsa pangngai tak chuan i cheng thei ang. Kal kawngah thil atthlak tih tum lo la,kan nau kha nunna a hlut tehchiam lo ania..Hrereng rawh,Hriatpuia i bia emaw dik lo awm ni a ka hriat rual rualin ka dahtha ang..A tawp nan i thi tawh…Achiang em? I thi tawh’ a ti leh duah..Nie,ka thi tawha,ka awm ve tawh lo..

An kal dawnah phone min kawltir kha min laksaka,Remruata a rawn kun hniama..’ Pi Mathani hian a huatchhan che chu maw ka Pu khan a duhsak lutuk mah mah che a,ban tir che tumin vawitamtak i tihsual lai achanga, mahse i tisual duh si lova..Mi nupui lan anih avangin a Pasalin hmeichhia angainat apiang chu atan hmelma anni mai. Angela-i keruh tliak te kha ila hria em? Kha pawh a kalna turah khan Grease an tat alawm..Chuan maw,a huat zual chhan che pakhat leh chu a pasal i hnaih lutuk vanga thahtir che tuma mi a tirh lai khan a nau ngeiin a lo dal leh chat a,a induhtawkna i tichhiaa.Ani ang hmeichhe tan chuan tlawmna nasa tak a ni..Ih maw,kei ni loa LALHRIATPUIA i thlang hi i tisual aw..Kei ni ila chuan tunah hian hetiang hian buaina ka siamsak dawn miah si lo che a’ a ti su su..Eng mah sawi loin a hmaiah chil ka chhak leh thawt..

‘Ka piang nawn leh anih pawhin nang niloin amah bawk ka thlang leh ang’ ka ti chang fak.

‘I thu le’ pawisak nei lo zetin a ti a, a hmaia ka chil kai luai a hru fai nawk nawk.

Ka khawvel a tawpa,kei pawh mithi ka ni tawh..LALRINAWMI kha a bo fel tawha,tunah chuan LALSANGPUII zawk chauh a awm tawh.

Shiilong ka thlenthlak atangin hun a kal teuh tawh. Thlasik a intan tawha,khua a vawt tha ver vawr viau.Ka thinlung erawha sahala,tun thlengin ngai ka la awh thei lo. Vawi tamtak Hriatpuia biak chaknain ka khat thina,mahse achunga an tihtur ka ngaihtuah chhuah zel avangin ka be ngam ngai lo.Machhuani pawh ka be pawp ngam chuang lo.Tumah ka biak pawh loh avangin Hriatpuia khawsak zui zel dan pawh hriat ka nei hek lo.

Ka tihfo danin Fba ka awmna News group pakhatah ka lut leh ta nge nge..

‘Mizote sumdawnna huangah kan thang zela, chung zinga thangchak em em pakhat,kum pawh la tam lo tak LALHRIATPUIA nupui LALRINAWMI tukin khan a borala. Vawiinah vuiliam a ni ang’

Ka va han chhiarchhuak ngun tawh tak. Thla liam teuh tawh mah se ka chhiar apiangin ngai ka awh thei ngai lo. Hriatpuia nena kan thlalak an dah tela. Comment naah lah inti hre em em a ka chungchang dik miah lo sawina a tlar thla puta,min lainat tak leh min fak em em tu an awm ve zeuh zeuh chauh. Ka nihna miah lo an sawi peih zia chu hmu reng mah ila ka ngaipawimawh eih lo thung. Adik emaw dik lo emaw ngaihtuah miah lova mi chanchin hre ber anga sawi hi Mizo zia anih tlat avangin han huat viauna tur a awm lo. Bakah,tunah phei chuan ka thi daih tawh… Engtin nge ka ruangtur keimah lem an zawn ang ka hre lo,Ramhuaisual awmkhawm ho khan an tifel leh thliam ta ve ang.

December thla tantir a ni a, Bazarah mamawh lamkhawmin ka chhuaka,ka mamawh ka lei zawhah ka let lehnghal vat. Mizo tamna hmun anih avangin mi in min hriat ka duh lova,Mizo tumah ka be pawp hek lo. Misual hoin in min tihfelsak saah ka la awm ta reng. Shillong khaw daifemah a ni a. Mizo tamna khawpui nimahse ka awmna vengah erawh Mizo an awm ka hre lo.Mahse, kumtharah erawh ka chhuahsan dawna,ka tifel thuak tawh. An sawi lawk ang ngei khan Pawisa ka dawng lawih. An pawisa leh an In min pek thlengin ka ten a, mahse enge ka tihtheih chuan? An pawisa hmanga lo nawmsak chu a pawina a awm lo tiin ka ngaihtuaha,tunah chuan pawi tihna ka nei tawh lo..

Khang Ramhuai sual ho kha,an duhtawkin nuam chu lo leng rawhse..Tunah chuan Hriatpuia’n eng emaw tal atih ka beiseina kha a bo titih tawha,ka thi tih kha pawm duh loin thil thleng a chhui anga,misual ho lakah eng emaw tal a tih ka beisei renga, Mahse, a reh vung vung. Min Hmangaih an tih pawh kha ka ring ngam tawh hek lo. Phuba lak chaknain ka sahala,an duham lutuk avanga kei tihsual nei lo min tichhe vek hi an tuar angai tih bak ka ngaihtuah thei lo. Mahse, phuba lak tuma ka rilru ka siam fel rualin ka chak ta sawt tih erawh ka pawm thlap. Ka mittui a hula,Hriatpuia pawh ka ngaihtuah lo thei tan ta viau bawk.

Ka phone a rawn ri a,ka ngaihtuahna atangin ka harhchhuak nghal zawk,min rawn calltu ka en a. Machhuani..Ani hi thla hmasa khan ka be pawp ta nge nge a, ka biak pawp hnuah Hriatpuia chanchin pawh ka hreta chauh kha ania. Mahse, ka rin ang ngeiin min zawng lova, Machhuani a be pawp miah lo bawka..’I ruang ka hmu a, mahse hmel hmuhtlak alawi a awm loh avangin ka en rei ngam lo asin.Kha kha tunge ni ang?” tap chungin a rawn ti a..’Ka hre bik lo’ tihbak chhanna ka nei lo..Ka chunga thilthleng tlangpui lehkhathawnin ka hrilha..Phone atang chuan ka sawi ngam lo.Tuemaw berin an lo hriat ruk ka hlau a. Mahse,a pasal lakah pawh sawi miah lo turin intiamkamna tamtak ka neih tir mai bakah keiman tum lian zawk ka neih avangin thi anga ka lan atul tih ka hrilhsa vek. A rawn tap hlawp hlawpa,ka tap ve bawk.Mahse Ramsanga’n a khat tawka min vau reng avangin manchhuah ka nih loh nan ka fimkhur theihtawp a,ka be zen zen lo.

‘Aw,Thiannu…’ Hello pawh ti lem loin ka ti a. Tukverh lam ka pan nghal bawk.Pawn lam ka thlira, kawmthlangte inchunga Geranium pangpar par chuk mai chu ka thlir vang vang.

‘I lo hre tawh em?” a ti nghal thawr.

‘Hre lo aniang’ ka nui hak..

‘Remruata a thi’ a ti a, a thaw zui hap..Ka khawng deuh lah mai.

‘Chutia law?” ngaipawimawh lo zetin ka ti a.

‘Aw, tunah khan ka hre chiaha,A inawkhlum an ti’ a rawn ti leh a, tlem chuan min khawih ve ta deuh.

‘Ava zia lo ve..’ ka ti hul hak. Zia lo ka ti tak tak em ka hre lo,ka ngaihtuah zawk chu engvangin nge a inawhhlum ngawt? Khawvel nuam a tih hlarh hlarh nen.

‘Nia,mahse pawi pawh ka ti lo..Awi,kan pain min lo call.Ka lo be leh ang che’ a rawn ti leh mawlh mawlha, Phone ka off a, tukverh biang nghengin ka dinga. Ka mitthlaah Remruata hmel a lo langa,ka luak a tichhuak. Ka mit ka chhinga, ka thiltum pakhat chu chunglamin min tihkhalh taa. Tunah chuan pathum ka la bak.

Remruata thih thu ka hriat atanga ni 4 chauh aliam tihin Machhuani hnen atang bawkin thilmak tak ka hre leh ta nawlh ‘ Sammy-a kha a thawhna Hospital building chung atangin a tlaa..A luruh a keh vek’

Che miah loin ka mu a,chung lam ka en a..Pakhat chu chunglamin min khawih khalh lehta…Tunah Ramsanga leh Hriatpuia u chauh an bang ta,mahse Plan felfai tak ka la nei hleithei lo. Diktak chuan Ramsanga leh Hriatpuia u hi chu harsa tura ka rin kha anni a, sum an nei tawka,an tan tihtheih loh tak tak a awm meuh lo.An pahnih hian min umzuia,chhum lo chat lova min vau zuitu te anni bawk.

Christmas thlen nan karkhat chauh a awm tawh,ka rilru erawh Christmas lam a hawi eih lo thung. Ka inluah thar tur enin ka chhuaka, Shillong khawchhungah a ni a. Hmun lun lai,mahse fianrial ru tlat lawi si a ni a, lian lutuk lo mah se a nuam takzet.In ka thlenin khua a tlai lam tawha,chau zetin thutthlengah ka thu zawi der.

Ka phone a ri kauha,ka en a, Machhuani msg a lo ni a. Ka open vat.

‘Tun lawk khan Ramsanga ruang an chhara,Car accident anih hmel..Chuan maw,niminah khan Hriatpuia u kha intihhlum atuma,a inhal vak bawka’ mak ti lutukin ka thu mar zawt,ka ang pham mai. Machhuani ka call nghal vat.

‘Aw..’ a rawn ti a.

‘A va mak ve’ ka ti ve ngawt bawk.

‘Nia,mak tak a ni. Mahse, an sual man an hmu ka timai asin’ zawitein a ti se se. Nia,keipawn chutiang chuan ka ngai..Mahse, ka kut ngeia tihhrehawm ka chak asin.

Phone ka dah deuh chiah tihin msg a rawn lut leha. Ka en vat,Machhuani bawk emaw ka tih laiin number ka save loh atangin a lo ni a..’ A tawp tawh e’ tih zawng…Angaihna hre lo zetin ka en a, mahse thawklehkhatah ka thluak a vir zawk…

‘Hriatpuia’ ka tichhuak nghal sap bawk..Ni e, Hriatpuia a ni….

Hriatpuia number ka chhu nghala,mahse call loin ka delete leh ta zawk. Eng nge ka sawi ang ka hre tlat lo..Bakah,ama tih a lo ni kher angem? min zawng miah lova,ka thi tih pawmfel nghal hmak thei kha ania,atih a ni lo tawp ang. Engpawhnise,tunah chuan ka hrehawmna tamtak siama min sawisa kualtute an tawp hun a thleng ve ta..Hahdam em emin ka mu zangthala,awmze nei miah loin ka nui ta hawk hawk.

Ni 24 zan a ni a,Tukverh bulah ka thu a, ka khua a har vawng vawng. Nikum urlawk zan kha chuan Hriatpuia bulah ka hmanga, tunah chuan mel tamtak danah kan awm a,min ngaihtuah angem ka hre lo..Khua vawt em em mah se Tukverh khar duh loin pawn lam ka thlira, Shillong khawpui chuan hnuai lam,eng pe tuar mai chu ka thlir dauh dauh.

Door bell a rawn ri thuta, ka phu zawk..Sana ka en zauha,dar 8 ala ri lo deuha. Ka inhnuaia awm Khasi nu a ni ngei ang.

Kawngkhar ka hawnga, bang nghenga lo ding ka hmuh rualin ka phone ka thlauh bawl mai. Ka hmuh hnuhnun ber lai ai khan alang hang ta deuha,a lang cher deuh zawk bawk.Mahse, mi a hipna leh a induhtawk lutukte,a hawiher engkim mai chu ala ngai vek..

‘Ka lo lut thei angem?” a awpa zet chuan min fan rawih rawih thei. Ka chhanna pawh nghak loin a rawn luta,kawngkhar a pawt khara,a kalh nghal hmak..

‘Ngatinge?” awmze nei miah loin ka ti chhuak thei hram.

‘Ka nupui ka ngai tawh..Ka hmu lo rei tawh lutuka’ cool zetin a ti a, ka ang ziaua,mahse ka tawngchhuak zo lo..Min rawn bana,min pawt hnaia,nghet lutukin min kuah bet nghal chawt.Kuah let ve loin ka din ngaiin ka ding mawl tawp.

‘Mate…ka lo kal har avangin min ngaidam rawh’ harsa tih hmel lutukin a tichhuak hrawih. Ka harh chhuak deuh zawk thung. Ka tal phata, min thlah ve mai bawk.

‘Enge i duh?” ka ti hmak.

‘Ka be duh che,ngaihdam dil tur chein..’

‘Ka mamawh lo,chuan i nupui a thi tawh..’

‘Mate…’

‘Chhuak rawh’ ka ti dam leh thlap..Kawngkhar ka hawnga. Tawng loin kawngkhar lamah ka thle bak.

A rawn kal pheia,Kawngkhar a pawtkhara,a kalh zui nghal hmak.

‘Enge itiha?” ka ti that.

‘Zawn hmuh che harsat zia ka hriaa. Kalsan leh che ka tum tawh lo’ a ti dam thlup.Ka phone chhuata tla a chhara,a kekawr ipteah a hnawhlut zui nghal daih bawk.

‘Min zawng lo,ka thi tih i hriat khan i lawm lutuk hialin ka ring asin’ ngeiawm lutukin ka ti leh a.

‘Mate, Khawngaihin…Duhtawkin min hau la,mahse kal turin min ti lui suh’

‘I nupui ka ni tawh lo,I vui liam tawh..’

‘Ka duh ka tih nan Game mai anih kha,I duh phawt chuan Machhuani i zawt thei ang’ a ti leh nghut. Ka thaw hak mai,Machhuani khan ka thi tih Hriatpuia’n a pawm hmak ang khan a sawi anih kha…

‘Ka hria,I pawm hmiaha.Phili pawh i phili buai lova,Machhuani i be pawp lo hrim hrim’ ka ti leh hmak.

‘Nang ang bawk khan intiamkamna tamtak Machhuani kha ka neihtir ve a…Ani pawn i be thin tih a sawi bik hleinem’ a ti leh a..Ka hre thiam ta kuar mai. Misual ho an thih apiang khan a lo phur em em zel anih kha…

‘I tih vek a ni em?” ka ti leh a.Ka chhungril nem tan mek chu ka awchhuak chang fakin ka hliah tir hmiah.

‘Eng kha? “satliah zetin a ti a, a kekawr ipte zenin a ding mar ut bawk. Kan inlenhleih bawk nen ka en chho ha mai.

‘Anni ho kha i that em?” ka ti leh hmak.

‘Chung lam zawk mawle’ a ti a, a thle buk..Mahse,a hmelpa leh ngeng lutuk bakah a sawi laia amitmeng hlauhawm lutukah khan amah ngei a ni tih ka chiang vek.

‘Anni khan min hrilha, Game an khelh naah khan i telve a’ ka ti leh hmak.

‘Ka thu thei angem? keimahin ka rawn inkhalh thleng a, ka chau ve viaua’ ka thusawi hre lo ang maiin a ti a. Ka thaw hak mai. Tawng loin thutthleng lam ka kawk zauh ringawt. A kal pheia,thutthlengah a thu thlaa,hnunglamah a ban a daha,a bawp sei thlurh chu a thluang nghal duai bawk.

Ka phei ve a, amah ep zawngin ka thu thla ve a, ral atanga min hmu tu chu awmse nupa ni loin inleng inkawm satliah emaw min ti ngei ang.

‘I duh duh min zawt thei a’ a ti leh sup.

‘Ka zawh che kha,min chhang hleinem’ ka ti hmak.

‘Ka u hian a hua che a,a pasal vangin..Thahtir che a tum lai khan chhan che ka duh ve thunga’ a ti hmuk.

‘Engvangin maw?”

‘Ka hmangaih vang che in…Ka u in ka hnena i chungchang a rawn sawi tan phat atangin hriatchian che tumin ka chhui che a,ka hmangaih che tih la hre lo mah ila an khawih che ka phal ngai dawn lo tih ka inhria. Mahse, ka u ka hriatchian avangin a Game khelh laia a teammate angin ka lang ve a,anihna takah chuan i tan ka khel..Nia,ka pawm thlap. Thenzawlah te,I inah te,vauna i dawnte,avai khan ka hriatpui..Ka u khan i mangang phili vel kha hmuh nuam a ti tlata,a khawih nat che ka hlauh avangin alam tang angin ka lang der mai anih kha. Ka hmangaih che tih leh ka nei duh che tih kha ka u ka hrilha,an tih mangan che bansan tur leh tihsual i nei lo tih chiang takin ka hrilh bawka,kan unau kan indo zui ta a…’ a tita duah..

‘Enge ka tihsual a? Ramsanga te,Sammy,Remruata pawh..An vaiin keimah min tibuaia.Enge a tulna?”ka ti leha.

‘Engmah i tisual lo,mahse ka u hi chuan a rilru pek tawhna lam a bansan duh ngai lo. Dik lo atih chu dik lo a ni kumkhua mai.Hrilhfiah tum awmzia a awm lo. A bansan emaw ka tih laiin ka thil neih avanga min lawmpui aia min itsiktu ka thiante khan ka CHAKLOHNA ber inih tlat avangin nangmah tibuai tur che a ka u plan kha an lo pawmpuia..Ni lo,ahmaa  ka uin a tihthaih kual vel naah che pawh khan Ramsanga chu hretu zinga pakhat a ni ve hrim hrim. Ka neih hnu che kha chuan ka thian anih angin a duhtawk mai turah ka lo ngaia,ka u laka venhim che pawh a duh turah ka ngaia. Mahse, ka lo ringsual..Ka u te eizawnna lianber ka leisaka,ka nupui inih hnuah engpawh tawk thei ka nih avangin i hmingin ka thlaka…Ka awm loh pawn i ta anih zui zelna turin,mahse kha tak kha ka tihsual lian ber a ni zui ta a…Remruata khan i hmingin a awm tih a lo hriaa,I rilru hneha,a lam tangah siam che a tuma’ a ti leh a…A thaw hawka,a hmai a hup zui vang vang.Engkim mai hi a mak vel vek…Ka rinphak bak thil a lo inphum ru nasa lutuk,mahse chiang taka lang chu SUM hi buaina a lo ni…

‘Ka buai em em lai khan ka buaina min ngaithla duh ngai lova’ ka ti sap.

‘A dik…Mahse, venhim che tumin theihtawp ka chhuah..Tawk erawh a lo la tawk zo lova,ka venghim zo lo che a’ a ti zuai ruih..Diktak chuan amah ka dem em em laiin keimah zawk pawh hi ka dik lo tih ka inhmuchiang lutuk tlat.

‘Mi a angin min ngai ve emaw ka ti a’ ka ti leh halh.A then nghal nawk..

‘Mi zawng zawng tan mi a let tawp pawh ni la ka tan chuan MAMI i nia,ka nupui ini bawka.A bak a awm ngai lo vang’ nghet churhin a ti leh a.Eng emaw sawi tumin ka ang ziaua,mahse a ban a vai zauh.

‘Zawhna chu nakin atan dah tawh ila..Tunah chuan kuah che ka chak lutuk’ a ti sup. A ha rual nalh zet langin a then zui suk bawk..

‘Ka thi an tih kha i awih em?” a sawi haiderin ka ti leh a..

‘Ka mitin i ruang ka hmu a,I inhal an tih avangin i ruang an tih kha hmuh tlak alawi a awm lo.Mahse,ka chhungril hian i thi lo tih a hria..Tu ruamhmanna nge tih leh Ramsanga bakah tu nge awm ka en duh avangin anih ang angin ka kal tlangtir anih kha..Ka nupui hi a thi tak tak anih chuan ka chhungril leh ka hriatna thazam te hian an hre dawn lo em ni?” a ti leh a.Ka melh tlawk tlawk…

‘Min vaua,ka kalbo loh chuan an that ang che an ti a’ ka ti leh sap..Eng mah sawi loin a tho a, min rawn pan pheia,ka hmaah a rawn thingthia..’Ka hria e..Mahse, khang ho khan engtik lai mahin min hneh ngai lo vang,kei min bei nise ka kalsual palh maithei.Mahse,keimah ni lo,ka khawvel hi an bei che a,an tisual anih kha..’ a ti vawt leh ruih…A hmelpa leh ngeng lutuk,nula tamtak te duhzawng mipa,hausa leh thluak tha bawk si chu ka en a..A mitmeng thim khap maiah chuan min HMANGAIHNA  chiang takin ka zuk hmu theia…A biang tawn tawnah ka vuana,ka kun hniam a..A hmui chhah tap leh fawh nuam zet,vawitamtak ka lo mangphan thin chu ka zuk si a…Ani erawh a rumchhuak hawk thung…

Ka pasal aia rinzawk hi ka nei leh tawh ngai lo vanga,min ngaithla lo ni a hriain ka rilru thawven nan midang ka pan leh tawh hek lo vang..Min ngaihven lo emaw ka tih lai pawhin min lo ngaihven renga,nitin min hrilh loh avangin min HMANGAIH ta lo tihna lah a ni hek lo…

Kum 2020,December ni 12ah kan fa hmasaber tur mipa,apa ang em em mai ka nei a…Ka neih tuk chiahah Hriatpuia u a boral ve thung..Ka nunah hian he DECEMBER thla hian nasa takin hmun pawimawh achanga. LAL ISUA piancham lo thlengtur,hun pawimawh em em anih mai piah lamah ka tan chuan damchhunga theihnghilh tawh loh tur hun ropui ber ber zinga mi hi DECEMBER thlaa thleng anni a…DECEMBER  a ni satliah lo a,a SWEET ngawih ngawih a.SWEET DECEMBER  tiin kan damchhung chuan kan nupain kan hrereng tawh ang..