WHY (Chapter 1-3)

WHY???

Maengi ralte.

‘Ka ning em mai,hei hi khatah khan lo dah teh. Awi,Staff chefel lo deuh neih hi ka hne lutuk’ tih pahin chak tak takin a vei kual thuak thuak. He nu zet hi chu aw. A ang hrat lutuk hi sim then se la chuan Pasal a hmu daih tawh ang.Ka ngaihtuahna vangin ka then sak.

‘Enge? Enge nuihtur awm a? kan nau te hi han hrawn ve teh. Nitin i nui thei bik lo ang.Mai mai che hian’ min rawn en a, thinrim deuhin a tum hmaka. A nu lian vak bik si lo nen a ding peu al mai.

‘Tui i in duh em?”

‘Enga?!! ‘ a ti vak. Mahse, ka sawi awmzia a ngaihtuah chhuak tih hriat takin a nui ve ta hak. A an buan buan tawh hi chuan ngawirengin tui ka pe thina. A nui tawp zel.

‘Huizzz,ka hah..Eeee, dar engzatah maw i kal dawn?” a tih zawm leh zat. A thu hnawka,a thaw deuh ham ham bawk.

‘Dar 3..Ka peih lo’ka ti sap. Ka phone ka tuai nauh nauh.

‘Ka peih loh pui che.Mahse,hahdam la. Thil hi chu thlentir tawp mai ila,kan hahdam zel mai ania’ a ti leh zat zat.

‘Nia..Ka hahdam zel ang’ ka then sak. Ka chhungril erawh chuan ka sawi loh dan ang chiah angaihtuah thung.Zawhna tawp thei lo,chhanna awm chuang si lo hi engtikah nge ka bansan ang ka hre hek lo. Nunhluiah ka let leh ta vang vang…..

Ka mutui lai ka harh hlawl.Thawhphan pawh awm loin ka thu chhuak nghal a. Ka lu ka dawm vang vang. Khum bula tui ka dah ka bana,ka hrawk ro halh tih reh nan ka lem khalh. Ka phone ka hmet enga, Dar 11 a lo pel tawh. Asanga msg a lo awm a. Ka opena,a tihziah danin min rawn Mangtha na a lo ni a, ka thensak. Office lamah kan buai lutuk thin avangin ka lu leh lukham a insik rualin ka muhil a ni nghal deuh zela, min mangtha na msg hi zing lamah ka chhan tum a tam lutuka,min fiam phah fo.

Vawiin hi Dami birthday anih avangin Office ban hnuah kan thian hoin chaw kan eichhuaka.Kan thianho tih lemah kan bialpa te theuh kan hruai ve bawk. College kan kal lai atanga inkawm khawm kan ni a,Hmeichhe panga,mize in ang lo em em kan ni chungin kan inkawmngeih loh phah chuang lo. Abik takin Dami phei chu ka kawm nasa zuala,ani pawn midang aiin min pawh bik bawk. Hmun khatah kan thawk dun bawk.Ka bialpa nen hian kum 6 lai kan inzui ve tawha, kan thiante leh kan chhungte ve ve paw’n min hriatpui thlap tawh. Inah min drop a. Tihtur a neih avangin lo leng loin a let lehnghala. Kei erawh ka dan pangngai pel rawk khawpin ka mut achhuak a. Ka thawmhnaw ka  thlak sawk sawka,ka mu nghal hmak.

Pawl 12 ka pass hnuah Aizawlah ka zirzawma. Kan chhungte bel loin ka pain Hostelah min daha,Ka nu te hi Aizawl khua anni bawka,ka pi te bulah ka riakchhuak zauh zauh bawk.Thingtlang khaw lian pangngai taka piang leh seilian ka ni a. Sawrkar hnathawk kan chhungkuaah awm lo mah se huan kan neih that avangin kan khawsak a harsa lo. Leilet kan nei bawka,buh pawh kan eikhawp kan nei ziah. Ka pa leh ka u in huan leh leilet an enkawla, Ka nuin dawr muk tha zet a nei bawka.Kan upa ber hmeichhia nen hian kum 15 laiin kan inthlaua. A fa en in min en mah. Ka u chiah Mipa pawn min nau chei tehchiam chuang lo. Duat rawn ka ni a. Kan mipa neihchhun nupui pawh hian min hmuhmawh eih lo.Ka u in pasal a neihna a rei tawh bawk nen mo ang ni loin laizawn angin ka en mai.

College ka zawh hnuah Coaching class te ka kal ve leh lawp lawpa,vanneihthlak zetin Bankah hna ka hmu ta hlauh. In ka luaha, ka sum thawhchhuah ka chhungten an mamawh lo bawka,keima tan ka hmang fai vek. Mahse, Ka pa min hrilh thin angin Sum erawh thlatin ka khawl ve ziah thung. Ka fel chiam lo nangin kohhran erawh ka bel fa lua lo. Mahni a awmhrang rei tawh ka nih avang erawh chuan engkim ka duh uluka,tih deuh thlap thlap ka duh bawk nen midang nena chenho ka harsata.Pasal ka nei dawn anih phei chuan ka insiamrem fe a tul tawh ang tih ka chiang. Ka nuin a khat tawkin min rawn awmpui thin a. Mahse, Chenpui neih chuan ka inthlahdul thei meuh thin lo. Ka ngaithei lo tihna erawh a ni chuang lo.

Asanga hi kan thawhna hmuna kan pu a ni a, kei aiin kum 5 in a upa zawka, an chhungkua pawh harsa anni lem lo. Kohhran a bel bik chiam lo a,sual erawh a sual lo. Weekendah chuan zu a in ve zauh zauh bawka, ngaimawh tham lutuk niin ka hre lo bawka,ka sawisel ngai lem lo. Kan inkawp atanga kum 3 naah kan chesuala,khata tang khan nupa ni si loin nupa nun erawh kan hmang ta fo. Insum athat thu ka sawi fo a, mahse keimah chauha awm ka nih avang leh duh leh duh intawng lo nih bawk si chuan kan insum zo lo leh nge nge thin. Sexah chauh niloin Pasalin nupui a treat dantur anga ka lo dream thin ang hi min pe veka. Kan chengdun lo tih mai chauh a ni. Ka inhriat dan ber chuan Pasal nei ka ni.Ka chhungril ka hrechianga,pawn lama mawina zawng tura Kohhrana inhman ka tum bau lo. Ani pawh keimah ang bawk a ni ve. Kan inmil em em a,inhauh chang nei thin mah ila kan thinrim rei tak tak ngai lo . Ka thian a ni a, ka khawvel,ka engkim a ni tawp mai. Thian ho zingah ai chuan a bula awm nuam ka ti a, engkim hr eve turin ka duh bawk. Inneih chungchang a sawi leh zauh thina,mahse inneih kan tum kumah tak ka u fapa a boral thuta,kan sawi nawn leh ta rih lo.

Muhil leh mai loin thil eng eng emaw ka ngaihtuah kuala,ka naupanlai atanga tun thleng hian ka nunnah Harsatna tih tham ka la tawng ngai lo, ka u fapa thihna pawh khan min thawng teh nangin kan thu neihna piahlam a nih avangin kum a vei meuh chuan kan tuar dan a zia leh maia. Mi tawrh ve loh lah a ni hek lo.Thingthlang mi ni mah ila kan harsa ngai lo a,chhungkuaah Problem kan nei ngai hek lo. Pathian zarah ka hriselna a tha a, tlang hrileng satliah bakin min tibuai ngai meuh lo.Ka pian tirh atanga tun thlengin Hospital a luh ngai khawp in ka la awm ngai lo. Mutchhuakin min rawn zem chiai chiaia, ka harh leh chuan khua a lo var tawh.

Ka tho nghala,ka inphihfai thuak thuaka,Inkhel turin ka chhuak zui nghala. Hna hi kal tlai ka duh ngai loh avangin hunbi nei thlapin engkim ka tihram hram zel.Hall ka thlen chuan an lo awm nual tawh.

‘Morning..Tukin chu tang dun ila’ min hmuh veleh Zomuana,tlangval lian leh inzo tak,reitak ka hriat tawhin min lo tinghal a. Nelawm takin a nui bawk.

‘Tehreng,mahse dim deuh ka ngai ang aw’ nui chungin ka ti let ve a.

‘Ehe,nimin ami kha ana ta viau elaw?” a ti hluai.

‘Nia,rin aiin a thutak.Mahse, a zia leh mai ang.Warm-up mang lo a khelh hi chu buaithlak’ ka ti nang nang.

‘Adik,intilum hmasa phawt ila.Tun ang khawvawt tanah phei hi chuan a buaithlak lehzual’ a ti a. Ka chhanna pawh nghak chuang loin a taksa tihlum tumin a ban a vai kuala. Ka bag ka daha,ka ban nimin lamah ka tihnat deuh avangin ka chet a khawr a. Mahse, ka khelh loh lai chuan chutia na erawh a ni lo.

In ka thlenin dar 8 a ni a. Ka inbual nghala, zingah hian chaw ka ei meuh lo a,Juice leh thei lam ka ei tlangpui.Mahse, Officeah tiffin ka pai ziaha,chhunah chaw ka ei thung. Ka inbual zawh veleh chaw ka chhuanga.Chawhmeh hi chu kan Office canteen atangin ka la mai thina,hun ka neih dan azirin ka siam thin tho bawk.

Ka insiam laiin Asanga’n min rawn calla. Nui sang chungin ka pick vat.

‘Zeee, ka zin dawn a’ a rawn ti nghal tawng. Ka mengphar awk ringawt.

‘Hmanhmawhin Training an ko a. Engmah hriat lawk awm bawk si lo,buaithlak khawp mai’ a rawn ti leh sup.

‘Um,anih chu..Engtikah nge inchhuah dawn?”ka ti leta. Ka thinrim chuang lo a, ka lawm chuang lo bawk.

‘Office ka rawn tlawh zuai anga,chawhnu lamah Silcharah kan chhuk anga.Naktukah ka thlawk mai ang.Aizawl atangin Ticket lak ngaihna a awm tawh si lo a’ a ti leh a.

‘Ok…A tha alawm, kal ve tur an awm em?” ka ti leh a.

‘Aw,Dami kalturin kan ti a’ ka thaw hak.

‘I thinrim em?” a rawn ti leh vut.

‘Naaah,tinge ka thinrim anga?” ka ti nghauh.

‘Ka hre chiah lo. Nangmah nen kal theih ka duh laiin ka awm loh chuan i awm ngei ngei angai sia.Cashier pakhat kal turah Dami kal turin kan ti ta anih kha’ a rawn ti leh a. Ka hrethiam. Asanga hnuai chiaha awm ka ni a. Kan pahniha awm loh rual hi a theih loh tluk a ni.

‘A tha alawm. Officeah kan inhmu dawn nia’

‘Ok..Bye’

Ka insiam zawma,kan hnaah hi chuan hetianga hmanhmawha inkoh thut thut hi a awm leh zauh thina,mahse tam erawh a ni lo. Training engpawh awm dawnse hriat lawk vek a ni tlangpui zawk.

Office ka thlen hnu lawkah Asanga a rawn thlenga, Office a thawk ve te hian kan inkawp tih an hre vek chungin hna piah lamah kan mimal thil a ni a. Officeah chuan kan pahnih inzawmna hian kawngro a su vak lo.

Nilengin hnaah ka buai zui a. Asanga’n a kal dawna min rawn biak bak chu biak zawm leh pawh a awm ta lo. Motor ruih a chin avangin Motor khalh laia biakbuai hi chu ka duh vak lo thin hrim hrim. In ka thlen meuh chuan ka chau viau. Zawi zetin ka thu a. Tv ka On a,entur ber hre loin ka hmetkual sek. Ka Phone a ri a, ka en a. Mamawii a lo ni a. Ani kan thianho 5 zinga pakhat a ni a.Kan thian hoah chuan a upa bera, pasal nei mai tur a ni bawk.

‘Hello,Thiannu…’ thatchhe zetin ka ti a.

‘I buai em?” nidang ang bawkin thluk nei lo zetin a rawn ti mar at.

‘Buai lutuk,zawi thei ang berin ka thu a.Cartoon ka en’ ka nuia. A nui ve hak.

‘Chhe vel e a. Asanga hi khawnge?” a rawn ti a.

‘Azin,ti nge?”

‘Eng ni lo e. Laldami pawh hi hna thilah ka zin atia..An zin rual nge?” a rawn ti leh a.

‘Um..Training hmanhmawthlak a awma. Asanga leh Dami an kala’ ka ti leh mai.

‘Um,anih chu….’ A ti halh. A awmdanah chuan engemaw dik lo awm tlatin ka hria.

‘Thil engemaw thup nei iva ang’ ka ti satliah.

‘George-an min rawn calla,Dami nen an inthen aniang’

‘Maw?!” makti lutukin ka ti halh.

Nizanah pawh a Birthday lawmnaah an la rawn kal duna, engmah dik lo thleng awm in an awm der si lo. A hrim hrimin Dami’n engmah min hrilh lo reng reng. George-a hian a duh viaua,an inkawpna pawh kum 2 a ni ve tawh. Mahse, Dami zawk hi nula lu zo veh vawh leh chhe lo tak mai,mahni inhai veng em em mai a ni a. Kei ang lo takin Ngaihzawng nghet a nei chung hian mipa thian angaha, biak that a nei deuh reng thei. Mahse, inthen phah nana an hman pawh ka la hre lo.

‘Nizanah pawh khan engmah dik lo awm in alang si lo a’ ka ti leh a.

‘Nia,keipawn mak ka ti lutuka. Dami hian a lo hrilh tawh tak chein ka ti mai mai’ a rawn ti a. Dami nen kan inkawmbik zual tih an hre vek.

‘Hrilh miah lo,ka zawt tawp dawn mi?”

‘Ka hre bik lo. An lo inthen chiah si loh chuan min ngei vek ka hlaua, Bakah George nen an buai phah ka hlau deuha’ a sawi laklawh laiin call a rawn kala. Ka en a. George-a..

‘Enteh,Tunah George-an min lo call chiah.Ka’n be lawk ang’ ka ti a.

‘Maw? Be chhin la…’ a ti a.

‘Ka rawn be leh ang che…’ ka ti ve a. Ka off a,George-a ka call nghal a. Vawikhat chauha ring hman tihin a pick nghal vat.

‘Hello’ zangkhai thei ang berin ka ti a.

‘Ka rawn tibuai che em? Ka rawn call lai khan Busy a’ inthlahrung aw deuhin a rawn ti a. Pa ti zawk zawk lo tak a ni ve hrim hrim.

 ‘Aih, enge nita?”

‘Dami nen kan inthena’ tehtawpa.

‘Ehe!! Ava mak awm ve’ la hre lo niawm takin ka ti hliai.

‘Nia,mak khawp mai..Mahse, kan inkar khi hi a rei tawh hrim hrima’ a ti leh halh. Mak ka ti tawlh tawlh mai. An inhmeha,an inmil viau in ka lo hria asin le..

‘In tha leh mai ang’ ka ti dam thlap.

‘Ka ring lo..’

‘Midang an awm tihna mi?” nuam ti chiah loin ka ti a. Diktak chuan hetiang hi chu George ni loin amah Dami zawk nen kan sawidun tur a ni a. Mahse, Dami hnen atangin engmah ka hre si lo.

‘Aw…’ a ti bul hmak.

‘Ka hre miah lo..Enteh,I hresual ve thei tho ania’ beisei nei takin ka ti a.

‘Hresual ila ka ti khawp mai. Mahse, ka hresual lo’ chang fakin a ti leh a.

‘Ka lo be dawn em?” sawitur dang vak ka hre lo.

‘Awmzia a awm ka ring lo.A tawngthei em mai,a insawi thiam vek tho ang’ a rawn ti leh a.

A aw dul raih chuan na a tihzia a tilang theia. Bakah,a sawi dik lo hauh lo. Dami hi chu achang chuan keipawn ka ei lo zauh zauh. Ka thiantha ber a ni chung hian midang mit lak nan leh midang en bik nih nana dawtsawi mai te a ching a. Engkimah ama thiamna a hre thei em em bawk. Mahse, amaha tha lo lam a ni maia,a mize tha lam a tam zawk a ni a, ka huat phah lo a, ka kawmngeih loh phah chuang lo. Engemaw chang chuan a ze mak lutuk hi Asanga ka hrilh zauh zauha. Mipa tih takah a nui liam mai mai zel.

‘Ok,I duhdan anih chuan le..Mahse, a sawi hun ala awm tho ang’ dam takin ka ti leh a.

‘Um,ala sawi ang. Mahse, keima thiam lohna lam bak a sawi lo ang. Thikthu chhia leh rilru te angin min chhuah ngei ngei bawk ang’ a ti leh hmak.

‘A bialpa oh a biakpa chu khawi lam mi nge?”

‘X tiin a save a. A speed Dialah pawh a awm bawka. An msgah chuan an inbe nasa thawkhat tih a chianga,achhan chu an inhrechiang lutuk. Chuan,tu nge anih ka hre lo nangin pawmlai nei a ang’ ta deuh deuh chuan a!!!

‘I zawt em?” mak ka tihna ka thup hram hram. Ka best hi pawmlai nei kawp duhtur khawpa hniamah ka lo ngai ngai lo.

‘A hma pawn ka zawt tawha,a thian hnai tak a ni a. An inkawmngeih hle tih zawng a sawi’

‘Chutiang chu ni hram tehse’

‘Haaa.Nia,engpawhnise keimah lam hlir ka sawia.. Asanga a lo leng em?” a rawn ti a.

‘Aih, a zin a..Hna thilah Training a nei a’ ka sawi zawh rualin a thaw hak.

‘Chuti law?’ a ti fan raih..

‘Um, a kal deuh thuta..’ ka ti a.

‘Ka hre lo..Ni lo,Zopui..Dik lo a awm..Mahse, ni lo hram tehse’ a rawn ti buh nuaih..A awmzia reng reng ka hre lo.

Chapter- 2

‘A va mak nawk nawk ve’ ka ti a. A thaw ri leh hak.

‘Nia, ka ngaihtuahnaah thil dang a lo awm vang anih kha.Anih phawt aw,ka chhuak lawk dawna’ nichina a tawng dan nen kha chuan a dang hlak.

‘Ok..Dami chu biak ka lo tum hrim hrim ang’

‘I thu thu le’ a ti hmuk.

Che loin ka thut ngaiin ka thu deuh vang vanga.Dami mizia ka ngaihtuaha, mipa biak that nei zul mai,ngaihzawng nghet nei chung pawha tu tan pawh zuamawm tho ang chi hi a ni tlata.Asanga laka ka nghehzia leh midang mamawh miah lo a ka awm te,pasal nei ang maia ka khawsa te hi a sawisel fo reng bawk. Mahse, eng huah ka ngai lo. A mizia keipawn ka ei lo ve tho. Puitling  ve ve,mahni tha tih anga nun hmang ve ve kan ni a. Insawisel avanga danglam tur kan ni tawh lo.

Ka Phone a ri a, Asanga a lo ni a. Ka pick vat.

‘Hei kan thleng fel chiaha’ a rawn ti dam thlup. Pa thinchhe ve tak leh thuduh tak mai a ni ve thina. Mahse, tunah chuan azia a thlak nasa ve tawh.

‘Um,ka lo bia ang che ka lo ti meka. Hotelah in lut tawh em?”

‘Aw,Roomah ka awm. Inbual hmain ka rawn call hmasa che’

‘A tha lawm’ ka ti sap.

‘Hey,enge dik lo awm? I damtha em?” min ngaihtuah hmel zetin a rawn ti a. Ka mit ka chhinga, Dami leh George vangin ka mood a inthlaka,mahse ka tilang pawn ka hre si lo.

‘Ka tha…Vawiin chu Customer chhechi kha a lo kal leha,ka chau vek’ ka nui lui hak.

‘Ahh,ka awm lo chu ava pawi ve’ a ti sup.

‘Nia, ka tuar hram hram..Inbual phawt la’ ka ti leh daih. Dami biak ka duh tlat.

‘Um,inbual dawn..Zeee,I tha lo niin ka hria’ a ti leh talh. Hei tak hi amah ka duhna tizualtu a ni tih ka chiang, min hmu lo chung pawhin ka awmdan danglam a hrethei thina. Ka mood inthlak pawh ka thup hle chungin a hai ngai lo. Min hrechiang em em a, keipawn ka hrechiang bawk.

‘Ka chau ka tih kha…Dami nen in Hotel a in ang em?” thildang sawi tumin ka ti a.

‘Aw, Branch dang atanga kal ve hmeichhe pakhat nen room an intawm a’ a ti tha ve mai.

‘Ook,kan bia ange. Thil zawh duh ka nei a’

‘Um…Ka inbual zawhah ka rawn bia ang che’ a ti leh nghut.

Ka thutna atangin ka tho a. Ka pum ri rawk rawk chuan ka riltam zia min hriatchhuahtir ta chauh. Fridge ka hawnga, salad siamsa ka dah ka phawrha, dawhkanah ka chhawp chhuaka, Sorazo ka chawk sawk sawka,ka ei zui nghal mawlh mawlh. Hei hi tlai lama ka thil ei tam ber a ni a. Fats a tlema, ka puar thei tho bawk si a. Atir lamah chuan tha ka tih vangin ka eia,tunah chuan tui ka ti tawh takzet.

Asanga’n min rawn call leh hmain Dami biak ka duh,mahse riahpui a neih chuan George-a nen an chungchang chu sawi a remchang lo maithei.

‘Hello’ phone a pick veleh a rawn ti lawng lawng.

‘I biak hman em?”

‘Hman,hman…Inthlahrung kual vel lo teh a’ vei nei lo em emin a rawn ti a. Nidang ang chu nise engahmah ka ngai lo ang. Mahse, tunah chuan George-an an inthen tih a sawia, arilru a nat em em laiin hetiang khawpa a thawveng thei hi thilmak a ni.

‘George-an min rawn call’ ka ti hmak.

‘Ka hria…’ a ti nghauh.

‘Enge a awmzia? A sawi kha a dik tihna mi?”

‘I awih a mi? I thiannu hi nge i rin anga ani kha?” a rawn tita khauh. Chhan mai dantur ka hre lo. George –a aiin ani hi ka hriatna a rei tawh ngeia. Rin pawh ringtur zawk ka ni .Mahse, engvangin nge George-an dawt a sawi ngawt ang? A awmdan kha lemchan mai chu a ni miah si lo.

‘Enteh, diktak chuan George-a sawi kha thildik nise chuan asawi hma khan keiman ka lo hrilh ang che. A ni em?” amah bawkin a rawn ti leh a.

‘Nia,mahse…Aaa,ka hrethiam’ ka ti halh.

‘Hriatthiam lohtur a awm lo. A thikthu chhe lutukin Peka a thik pek anih kha’ a rawn ti hmak. Peka hi kan College kal laia Dami bialpa thin a ni a. An inzui rei ve angrenga,Dami pawh hian a duh ve viau. Mahse,Kohhranah buaina an nei ta tlata. An inthen hnuah George-a hi a bialpa 2na a ni leh tawh. Nupui a nei tawh nghe nghe.Mahse, kan la inkawm veka,regular tak ni lo mah se Dami nen pawh hian an inbe fo tih ka hria. Mahse,ahma zawng pawn athik lo a,tuna thik thar thut chu thildang a awm anih ka ring,nge tul uk loah a lo thik zawk? Ka hrethiam lo.

‘Ok..Anih chuan azia alawm’ awmze nei lo zetin ka ti a.

‘A hma zawng pawn a thik lo a,tunah a thik a’ ka ngaihtuahna ang chiah a rawn sawi leh chat.

‘Um..In inbiak danah thiktur a awm aniang’ ka nui lui a.

‘Teuh lo…hman atangin X ti hlirin ka save a,tunah chung mai mai chu a haw leha’ a ti leh hlak hlak. Ka thaw huai.. Ka thiannu hi ka lo ring chhe lutuk deuh aniang tih ka ngaihtuaha,ka inthiam chiah lo.

‘Anih leh amah hrilhfiah itum em?” ka ti leh a.

‘Tum peih tawh lo,ka sawi ngun em mai. Amahin a lungawi leh mai ang’ a ti awlsam mai. Ni tehse,an fel theih leh a tha. Ka lo buai natur a awm lo.

Kar aliama, Asanga te an lo hawa,hnaah kan inhmuh mai bakah In lamah kan in awm leh deuh chawt tawh. Kan awmdan a dik lo tih lam ka ngaihtuah buai peih lo law law, thlak danglam tur chuang loin engmah ngaihtuah hah vak vak ka peih lo. Dami leh George-a chanchin tumah mahin an sawi nawn leh ta lo. An tha nimai turah ka ngaia, ka thiantha ber pawh nise lo buaipui hluai ka duh lo. Tul an tih hunah min hrilh mai ang chu.

Ka tuikhawihna Pipe chiang lo min siamsaka, siamthiam ka ko mai ang ka ti a,mahse  ’ naktuk Sunday ania,kan hman dawn tho’ atih avangin ka ko ta lo.

‘I Phone a ri ania’ Asanga ka au a. Kei eitur siamin ka buaia,ani a inbual thung.

‘Tu nge?” a rawn ti a.

‘Ka hre lo..Ka en lo,ka lo pick dawn em?” ka ti let a.

‘Lo en la..’

A phone dahna lam ka pana,a rawn calltu ka en a. Number ringawt.’ I contact list ami a ni lo,ka pick dawn em?” Bathroom kawngkhar bulah ka dinga.

‘Pick lo mai rawh, A lo call nawn leh mai ang’ a ti awlsam mai.

Dawhkanah ka daha,mahse ka dah chiah tihin msg a rawn luta, ka en zawk. ..Ka en nawn leh ngat. Nidangah pawh a phone ka khawih fo hrim hrim.Ka phone pawh a khawih tho bawk. Ka lungphu arang nghal dawt dawt.

‘Pick teh, a pawimawh ania’ tih ania. Tu nge anih ka hre lo,mahse ka awmdan adik lo,thil tha lo thleng tur engtin emaw ka hre lawk thei thin,chutiang chiah chuan tunah hian ka awm tlat.

Lock ka hawnga, whatsapp ka en leha, tuna rawn call tu nena an inbiakna a lo awm a. An msg ka en a, a dik miah lo.Ni lo,enge dik lo ka hre lo. Huat tur a awm lo hrim hrim zawk.Mahse, an inbe nasa lulai lutuk,Dp engmah a dah lo a.A tawng danah erawh hmeichhia a ni tih ka hria.  Tunah a pawimawh tih a rawn sawi leha,a number save lo mah se a hrechiang tih alang reng. Kan inkawp tirh lamah khan vawikhat chu ka ringhlel ve tawha,mahse tun hnuah vawikhatmah rinhlelh tur ka hmu leh tawh ngai lo.

Door bell riah ka phu zawka Msg rawn thawn ka Open tlat avangin ka Delete nghal daih. Lo en ru anga min ngaih ka duh lo. Dawhkanah Phone ka daha, kawngkhar lam ka pan ta zawk.

Ka inluah neitu nu a lo ni a. Rawn lut loin eng eng emaw a sawi luama,a kal leh ta mai. Ani pawh hian Asanga nen kan inzui nasat zia a hria. Nupa ang maiin kan khawsa tih erawh an hriat loh hram ka beisei.

‘I hman veleh a ei theih ania’ pangngai thei ang berin ka ti a. A mitah en loin ka hawisawn lehnghal daih. Thilsual ti ang hrimin ka tim daia, achhan erawh ka hre si lo.

‘I inbual duh chuan inbual hmasa la’ a ti a.

‘Aih,I kal hunah animai’

‘Zanin chu kal pawh ka tum vak lo a’ a ti a. Ka hnung lam atangin ka kawngah a rawn kuaha,ka darah a hmaiin a rawn nawr a. Ka in lekkhawng nghal lah mai. Ka awmdan dik lo tihreh tumin ka thaw hak. A kut ka phelhsaka, ka inhera,  vun hang lam lek lek chu a Towel var chuan a ti langsar lehzual. A paliana,a liansatliah lo,a pian a nalh. Amah pawn a inhria..Mi tan chuan mipa satliah ve mai pawh a ni ang. Ka tan chuan ka dream thin,ka duhthusam neitu a ni tlat. Ka hmangaih bawk.

‘Va inha phawt rawh. Eitur ka lo chhawp ang.Eee,I phone kha’ ka ti zui zat. Vei nei lo anga lan ka duh.

‘Yes,Boss..Ka ril atam ‘ a thle buk..A sam huh a tuai leh zauh.

‘I ei zo vek dawn nia’ ka nui a. A then suk,a rawn kuna,ka bekah a rawn fawp zauh.

Chaw kan ei laiin thil eng eng emaw mai mai kan sawia, ka rilru tinuam lo tu pawh englaiin nge a bo ka hre lo. Thleng ka sila,ka sil zawh hnu lawkah Dami’n min rawn call a.

‘Thiannu,inpa a awm em?” a rawn ti lar lar. Ka mengphar ak.

‘Um,awm e..Ti nge?” ka ti a.

‘Ka lo be lawk mai ang.  Ka nite Loan chungchang kha ania. Sunday mah nise’ a rawn ti a.

‘Ok,lo nghak lawk..’

Living roomah ka pheia,thatchhe zeta thu chungin a phoneah Games a lo khel a.

‘Dami’n a be duh che a’ ka ti a. Phone ka pe a.

‘Lawk,a laklawh lutuk.Nakinah ka be mai ang’ min en loin a ti a. Kan Pahnih hian Hunawlah chuan PUBG kan khel ve thin a,mahse thalai tamtak anga hna bera nei erawh kan ni lo.

‘A hmanhmawh hmel asin’ ka ti leh talh tho.

‘Aaaah, Zeee..A zo tep.. ‘ min en lo..Achang hi chuan naupang ang mai ve tho a ni. Hna lamah kan pu niin, zah kai leh thutak em em thin mah se achhungril hi chu inhmuam up reng ning tak a ni ve tho.

‘Thiannu,a inkhel a..A thi tep’ ka nui a.

‘Awi,mipa ho tak hi chu a..Han thi phawt se’ a nui zui vak vak.

Kitchen lamah ka let phei leha,ka tihfel zawh loh ka tifel leh vek. ‘Dami kha enge a rawn sawia?” ka Panty ho ka enkual dan dan laiin Roomah a rawn lut a.

‘A nite Loan chungchang a ti. A pawimawh aniang. Chuan,nichina lo be tu che pawh kha ila call back lo ania’ ka ti a. Khumah a ban khamin avang zawngin a mu a.

‘Ka hre leh tawh lo..Ka mut achhuak’ a ti leh daih.

‘Dami chu…’

‘Sunday hi chuan hna lam sawi hi ka peih lo tih i hriat kha’ a ti leh a. A mit achhing nghal daih. Ka hrethiam lutuk, Bank a thawk rau rauah pawh dinhmun sang apiang hi an buaia, nitin zan dar 7 aia hmaa haw hi an nei mang lo. Sundayah lehzel chuan engmah ngaihtuah lo a awm der der a chakawm.

Muangchangin ka inbuala, vawilehkhatah ka rilru a rawn nuam lo leh thut, ka awmdan ka hrethiam lo. Che loin Shower hnuaiah ka ding deuh vang vang.

‘Zeee,ka kal dawn ania’ Kawngkhar rawn kik pahin a rawn ti a. Ka phu zawk.

‘Ngatinge? I riak dawn maw ka tia’ ka ti let a. Shower ka off a.

‘Ka pu a tha vak lo an tia..’

 ‘Maw? Min lo nghak la…’ ka au leta. Kan inkawp tih an hriat vek avangin an chhungkaw thil tih naah ka tel ve chamchi tawha. Zahthlakah pawh ka ngai lem lo.

‘Aih,chuti lutuka serious a ni lo ang. Chanchin ka rawn hrilh ang che.Ka kal aw’ a rawn ti leh a.

Ka hritlan ka hlauh avangin ka sam ka chhemro leh te te. Ka mu fel deuh chiah tihin Asanga’n min rawn call a..A ziawm deuha,mahse zanin chu Damdawiinah riak phawtse an ti tih min rawn hrilha.A Patea fanuin a riahpui dawn tih a sawi bawk.

‘Min ngai viau em? Min ngaih viau chuan ka lo phei leh anga’ a ti sup.

‘Aih,angai lo. Hahdam rawh. Naktukah kan inhmu dawn nia’ ka ti vat.

‘Um..I inkhel dawn em?”

‘Ka tum,rawn khel la.. In vengah khelhpui tur an awm mang loh kha’

‘Ka hre lo..Ka lo kal thut maithei..Mahse, khatah pawh khan Zomuana tih vel bak khelhpui tur an awm chuang ami?’ a ti hmuk. Zomuana nen hian an College kal lai atanga inhria anni a. Mahse, inkawmngeih tihtur anni lo. An sawi lo ve ve nangin an inmil lo niin ka hria.

‘Awm chuang lo e. Mahse, in veng ai chuan an khelh tlak ang’ ka ti leha.

‘Haaa,Zomuana hi i ngaisang hrim hrim’ a nui huk.

‘Nia,ka la nei ang’

‘Tum chhin la….’ Ka nui hak hak mai.

‘Zopui…’ min ko tu lam ka hawia. George-a a lo ni a. Ka hmu khat viau,Dami nen an tha leh tawha,mahse hna lamah kan buai hlawm avangin hun engemaw bikah lo chuan kan inhmukhawm hleithei lo.

‘Hey, kan va inhmu khat ve’ nui chungin ka ti leta. Min rawn pan pheia, helmet ka khum paha.

‘Nia,inhmu khat..Mamawii chu engtik maw an inneih ni tur kha?” a ti a.

‘Karleh Friday..’

‘Eh,a lo va hnai tawh si ve.Kan par hle anga nimai’ a nui a.

‘Nia,par ang..In tha zel tiraw?’

‘Ka beisei…’ a hmel danglam zawk chu rei lo mah se ka hmu hman tho.

‘Nia, ka kal dawn…Karleh chu kan inhmu dawn nia,bakah tihtur neuh neuh an ngah tana. I hman chuan puih theih reng,ka lo sawmsak ve hmiah teh ang’ ka ti leh a. A bu nghat.

In ka thlen hnu lawkah Asanga a lo thleng ve a. Tun hnai hi ka hrethiam chiah lo,kan inhlat deuh du a. Min ngai lo riau in ka hre thina,mahse engmah rinhlelh tur ka hrechuang si lo. A pu damlohna vel vangin an buaia, a lo kal khat.Chu lah hlauhthawntur a awm si lo.

Toilet a awm laiin a phone a ri kauh. Ka bul mai a dah anih avangin ka bana, ka en a. Engmah ka hmu lo,ka hawng dawna,ka hawng thei lo. Englaimahin lock hi ka hawng thei lo ngai miah lo.

‘Ngatinge ka Phone kha?” a rawn ti thut. Ka en vat,a hmelah chuan lawm lohna niawm tak alang zauh. A rei lo mai pawha.

‘Lock hi ka hawng thei miah lo a’ satliah deuhin ka ti a.

‘Hawng thei lo ang. Ka thlak anih kha’

‘Maw?”

‘Hmanniah ka siamtir ka tih kha.Tah khan engkim Settings ka khawih tha vek,khawi..Ka lo hawng ang. I dah leh dawn nia’

Ngawirengin phone ka pe a. Ka tho nghal daih.Phone a siamtir tih ka hria,mahse a siamtir hnuah pawh kan inhmu leh daih tawh. Tunah khawih ka tum avangin ka hre chauha. Hei hi thil pangngai a ni miah lo.

‘Khawi,I kut’ a ti a. Ka che lo.

‘Angai lo,bakah i phone ania’ ka ti a. Ka thensak.

‘Enge thinrim natur awm a? ka chau ania’ a ti hmuk. Keimah zawk thinrim tur ka nih laia a thinrim zawk mah chuan min shock viau.

‘Rim lo e..Ngai ka ti lo mai zawk mawle.Thingpui i duh em?” zangkhai thei ang berin ka ti a.

‘Um..’ a ti hmuk. Nidang ang lo takin ka mood danglam a ngaihven lo. A chau viau anih pawhin engkim a hre thin kha ania.

‘Inthen ta ila amak angem?” thingpui kan in laiin ka ti chhuak thut, Engvanga sawi nge ka nih ka inhre lo. Diktak chuan kan inthen leh ka ring ngai lo hrim hrim zawk.Min rawn en a,a hmel thutak ngul maiah chuan angaihtuahna ka hre thei lo.

‘Enge chutiang sawi a tulna?” ka zawhna achhang lo.

‘Ka zawt mai mai che,a mak duh dawn em a’ awlsam zetin ka ti liam puat.

‘Naupangchhia deuh hian awm thin lo teh,diktak chuan tunlai ka buai lutuk tih i hriaa,ka lo kal khat bawka. Mahse, ka ngaihven lo che tihna a ni lo ania’ a tita duah.

‘Ka hria alawm’ ka ti a. Ka no tlang ka tuai hauh hauh.

‘Ka ngaihtuah lo che tih ka hriaa. Mahse, ka theihtawp chu ka chhuah ania’ tlemin a aw a dam ta deuh.

‘A dik alawm,mahse…’ ka sawi zawh hmain a ding ta hluai.

‘Ka kal mai dawn,naktukah kan inhmu dawn nia. Ka nu lam kual angai tak alawm’ a ti zui nghal zat. Ka bu ringawt,engmah ka sawi lo.

Muhil mai loin ka let ka leta, ngaihtuah loh ka tum pawn ka thei lo. Sawi thiam si loin kan inkar a fel lo. Kan inhlat du a,kan inkarah engemaw tlazep a awm. Ka ngaihtuah leta, inngaizawng siin kan inhmuh pawn inkuah emaw in kiss pawh a awm mang ngai ta lo. Inngaizawng ni loin thian inkawngeih em em kan ang zawk. Mahse, enge dik lo ang? Hmeichhe dang awm ta se..Ni lo,an awm lo ang,awm se chuan ka hria ang. Diktak chuan kan inzui rei tawha,ngaiah kan innei ve tan pawh a ni thei.

Ka Phone riin min tiharha,ka bana. Mamawii a lo ni a.

‘Aw…’ thophang aw zetin ka ti sap.

‘Ehe,nang hi tun ang hunah ila mu alaw?” a rawn ti a. Ka inleta, sana ka en a. Dar 7 a pel tawh. Nizan khan ka tlaivar ta thaka,khawvar hnuah ka muhil chauh atin ni.

‘Ka lu ana deuh khanglanga, enge nita?” ka ti a.

‘Zanah lo kal la,I hman angem?”

‘Tihtur a awm tihna mi?” ka ti a.

‘Aw, awm nual mai. Zanin phei chu eng eng emaw enfel tur a awm a” a rawn ti leh a.

‘Ok,ka lo kal dawn nia, mahse kan bang hma lo thei sia’

‘Office atangin lo tlang mai la..Hetah chaw rawn ei rawh.A tha em?” hrechhuak tha intih hmel zetin a rawn ti a.

‘Aaaa,a buaithlak’ ka ti sap.

‘Buaithlak loh..Ka lo ring ang che,ka dah’ a off zui nghal daih.

Asanga msg a lo awm a, nidang ang bawkin min rawn wish a. Mahse, dik lo a awm leh tawh. A hma kha chuan kan pahnih Photo kha Dpah a hmang thin,tunah chuan a ui a hmang ta daih..Kum 3 kalta atang khan a Dp a change anih pawhin kan pahnih photo hlir a ni thina,tunah a ui ahmang daiha..Ka thuchhuaka,ka lu ka dawm vang vang,ka awmdan a dik lo. Ngaihtuahna tha lo pui pui hlir ka neia,ka ngaihtuahna hian min hruai khaw lo zo vek dawn chu anih hi a.

Office ka thlenin Asanga a lo thleng tawh, ka thlen hnu lawk atangin kan buai ta char char. Ka lu na nen ka chau hluah hluah. Ka hna hi nuam ka ti thina,ka thawh tirh atangin vawiin ang em em hian ka la ning ngai lo. Kan thawhpui pakhatin nuih der a nin zia a sawi thin kha ka hrethiam ve ta chiah.

‘Lunch ei ila…’ Dami’n a rawn ti a. Ka bu ringawt,engmah ka ei chak lo.

Ka dawhkan bulah a rawn dinga, nidang ang bawkin a nalha. A hmelthat sa nak laiin make-up a hmang thiam lehzel hi a vannei takzet.

‘Toiletah kan kal leh lawk’ tih pahin ka dawhkanah a purse leh a phone daha,hmanhmawh zetin Toilet lam a pan nghala.Ka thensak.

A kal liam deuh chiah tihin a phone a ri a, tu nge rawn call ka en satliah,mahse X tih ka hmuh rualin hman deuha George-a sawi kha ka hrechhuak thut. Dami khan Peka anih thu a sawi a. Ani reng em ka hre duh thut.Ka lakanga,ka pick nghal zat.Toilet lam ka hawi pah bawk.

‘Ka nghak che ania’ mipa aw hian a rawn ti a. Phone ka thlauh lo chauh. Ka khur nghal hlawk hlawk.

Chapter- 3(Last Chapter)

 Ka off nghala, tihber tur hre loin ka tho nghal a. Ka hnaih ber Tukverh bulah ka zuk ding ringawt. Pawn lam chu hmu miah loin ka en tlawk tlawk. Ka bulah khan Peka tiin a sawia,George-a pawh chutiang tho chuan a hrilh.Mahse,khawilamah mah Peka a ni lo..

‘Kal ila..’ ka darah a rawn khawiha,ka vawt nghal rawih rawih. Ka thiantha ber leh ka bialpa hian engchen nge min lo bum kual tawh ang? Ka luak arawn chhuak nghal up up.

‘Lo zuk kal mai rawh,ka awm a nuam chiah lo’ ka ti thei hram. Hmanhmawh zetin Toilet lam ka pana,ka inkalhkhum sawk sawka. Ka uak zui nghal pawp pawp,mittuiin a rawn zuia, ka na em ka la hrethiam lo. Mahse, min thawng tih hian ala sawifiah zo lo.Ka awmdan sawifiahtur chuan tawngkam thar hlak awmse a fiah maithei.

Office anih miau avangin tawmreng chi a ni lo. Ka chhuaka, wash room lian lo te awmah chuan ka dinga,Wash Basin chunga Darthlalang awmah ka in en a. Ka hmai a dang vek,ka mittui a tlak avangin ka mit a sen rama, tun minute reilote chhung khan ka lang upa nghal sawt in ka hria. Tukverh bulah ka dinga, ka Phone ka phawrha,ka ngaihtuahnaa lo lang hmasaber ka ti nghal chat. Tunah ka ti anih loh chuan nakinah chuan ka huaisenna a bo vek tawh ang. Diktak chuan thilsualti tu zawk ang hrimin ka hlauthawng a, ka beidawng ngawih ngawih bawk.

‘Hello….’ A aw ka hriat rualin ka biang a lum lehnghal pap. Ka tawng rualin ka tap dawn tih ka hriat avangin ka insehruh ngat ngat.

‘Zeee,ka tawng i hrethei em?” nidang ang bawkin a aw adam thlap. Mahse, avai hian bumtu aw a ni. Ka mittui ka hru tawk. Helai hmunah hian ka mualpho ngawt thiang lo.

‘Hna hi ka enfel nual tawha,Hmanhmawhthlak lutuk a awm tawh lo a. Ka haw hma thei angem?” ka beisei aiin ka aw a pangngai.

‘Tinge? Thil thleng a awm em?” a rawn ti a.

‘Ka cousin kan khua atangin an rawn phur thlaa, Damdawiin an thleng tawha.Ka va hmu ang chu ka ti a. A theih loh chuan a pawi lo a’ ka ti a.

‘Aaah,theih e. Mahse,I Cousin chu eng na nge? A hma khan i sawi si lo a’ a rawn ti leh a.

‘I buai em a,ka sawi ta lo mai. I lo let leh har dawn em?” ka ti zawm zat.

‘Maithei,Main Branchah ka kal dawna’ ten lutukin ka ner nawk. ‘Ka’ti loin ‘Kan’ ti zawk tur a nia.

‘Anih chuan ka kal mai ange,ka lawm e’ ka ti leh nghauh.

‘Khawi Hospitalah nge?”

‘Ka la hre lo..Anih phawt’ ka off nghal hmak.

Ka in en leh vang vanga,ka mit hnawih pherh deuh chu ka tuaifaia. Staff tamzawk Lunch lai anih avangin a ruak deuh huai. Ka hna ka tifela, Peon hnenah ka haw dawn tih ka hrilha. Nu upa lam,dilchhut ve tak mai a ni a. Ka dam that leh that loh min zawt var,ka damthu sawiin Asanga hnena ka sawi ang bawk ka sawi leh mai. Dawt hian Ke nei hek lo,mi pakhat bulah ka sawi anih chuan midang bulah a din theih nan dawt bawk sawi leh angai zel,midangin min zawt anih pawhin ka sawi leh mai dawn tihna animai. Mahse, tunah chuan helai hmun hi tlansan vang vanga, keimaha duhtawka ka tah thawl theihna hmuntur ka mamawh ber.

Khumah ka bawk thlawp,engtin nge ka inkhalh thlen pawh ka hre mumal lo. Ka hai chhu a, a hmaa George-a rawn sawi khan Peka emaw mipa dang turah ka lo ngai kha ania. Mahse, Asanga berkher!!! Tu nge ka biak ang ka hre lo.Fiahna engmah ka nei lo a. Mahse, tun hnaia keimaha dik lo awm khan tuna thleng mek hi chhanna a ni tih min pawmtir lo thei lo. Asanga rawn calltu leh regular taka abiak thin kha ka ngaihtuaha, ka ngaihtuah chhuak thei lo nangin Dami number a ni lo tih ka chiang. Fiahna tel si loin kei hi ka lo phili lutuk a ni thei angem? Chu pawh thil awm thei tho a ni. Puitling taka sawipui nge tha ang ka chhui ang? Engmah ka duh lo ve ve. Lo ni tak tak ta se ka tuarchhuak zo lo ang tih ka chiang lutuk,anih chuan ka haider mai dawn tihna ami? Ni chuang lo….Keimahah hian kawng a awm a,khawi ber nge ka zawh ang hre loin pengthuam laiah ka ding anih hi a.

Ka Phone nghawr dar dar ka en a. Mamawii a lo ni a, ka pick lo. A rawn tinawn leha, ka pick loh chuan ka awmna Asanga a zawt ngei dawn si,chu aia duh loh zawk ka nei lo.

‘Hello, thiannu’

‘Hey,I lo thleng dawn tawh em?” ka mood nena inmil na reng reng nei lo khawpa thawvengin a rawn ti a.

‘Min hriatthiam angai..’

‘Aih, I thi anih loh chuan a theih loh bur’ ka thi chu anih ber hi ka ti rilrua.Mahse, engmah fiahna la awm si lo sawichhuah ka duh lo bur. Chu pawh midang ni loin Asanga leh Dami chungchang ala nizui.

‘Ok,ka lo kal ang. Tunah chuan ka la buai lawka,ka rei tawh lo ang’ ka ngaihtuahna nena inmil miah loin ka ti a. Lawm zetin a khek raih.

Ka thuchhuaka,khua a lo thim vek tawh, In ka thlen veleh inthlak pawh inthlak loin khum ka pana,ka bawk ta vang vang kha ania. Mahse, ka tum angin ka tap ta hauh lo. Thil tamtak ka ngaihtuah kuala, Dami’n X ti a a save avang khan ka danglama,anghak tih a rawn sawi leh engmah min hrilh lo khan min shocka,mahse thil tamtak min ngaihtuah tir thung. Tun hnaiah a chhuah dawn apiangin Dami deuh hlir a kalpuia,ka thiannu anih avangin ngaih loh lamah ka ngai ngai lo.Mahse, ka lo ngaihthlah mah mah a ni maithei.

Muangchangin Mamawii te in lam ka pana, ka hmelah dik lo a awm anih chuan aman ngei ngei dawn,Dami ang em chuan ka pawh lo chungin thian tak tak kan ni a. Kan thianho zingah a upa ber leh puitling ber anih avangin tute pawn kan ngainaa,u enin kan en thum hrim hrim.

Min hmuh veleh eng eng emaw a sawi nghal siam siam,a nu leh pain min lo be luam bawk. An chhungkua hi kan chhungkua ang tho a inkawmngeih ve an ni a. An bula awm a nuama,a unau te nen pawh kan inpawh tha vek. Family lam chanchin kan titi tui ber a ni fo. Mahse, Dami hi chu a hrang hlak,a tawngkamah chuan a unaute a ngaihven viaua.Mahse,an unau an inngeih loh avang leh a nu a lal lutuk avangin an buai leh phat thina,ka inah pawh vawitam a rawn tlan tau tawha. A rawn kal apiangin athiamna hlir a sawi ziah. Mahse, a naute sawidan nen a in ang lo fo. Ama him nan leh mi mit lak nana dawtsawi mai hreh lo a ni tih ka hriat avangin a thiamthu sawi hi chu ka ‘aw’ liampui mai mai chang a tam zawk. Ka tan chuan ka Best a ni a, an Family thilah lo inrawlh ve ka duh lo.

‘I Phone a rik kha mawle’ khuma rawn thut thlak ve pahin Mamawii’n a ti a. Ka phone ka en vat.Asanga a lo ni a. Ka che lo.

‘Pick ta che,enge a?” Mamawii bawkin a ti leh a.

‘Nakinah animai. Ka kalna ka hrilh lo a’ ngaihsam hmel fein ka ti a. Chik zetin min en ru kar tih ka hria.

‘Chu pawh nise pick la,I hrilh mai ang chu’ a ti leh talh. Ka thle bak.

‘Nakinah ka call back mai ang.A pawimawh lo,Bakah Bialpa te hnena in report reng pawh a ninawm ve alawm’ ka ti leh a, Ka nui lui sak.

‘Ok,ok,a tha alawm’ min hnial loin a ti a. A tihfo dan a ni hrim hrim,ka luhlul ve tawk tih a hriaa,ka chhungril a nem em em tho tih pawh a hria.

‘Dar engzatah nge kan kal ang?” ka ti a. Sana a en zauh.

‘8 velah thleng hman chuan tawk mai..Inah hian let tawh loin i haw tlang anga’ a ti a. Ka bu nghat. A kawr haktur a fuh loh avangin abul atangin an siamtha leha,inneih hun a hnai tawh bawk sin en a thuitu hian a bei ngawrh ngang mai. Zanin pawh en turin a rawn ko a, dik lo a lo awm leh palh chuan siamthat nghal angai leh dawn a. Muangchan chi a ni lo.

A kawr kan en zawh hnuah haw turin kan chhuaka,mahse Chanmari pheia kawngsir dawrah thil ei a rawt a, ka peih lo hle nangin mahni a awm ai chuan tiin ka hnial duh lo. Kan inzui pheia, a lo hnai ber bulah adinga. Ka ding ve a. Mahse, a Start leh lawi.

‘Kal ang, ka ei leh peih lo’ ka chhanna pawh nghak loin a inher nghal pawp.

‘Eng nge a?” ka ti that. Mahse a tlan zui daih. He nu hi chu aw, Senior thlak lutuk.

Chaltlang lamah atlan chho a. Kan haw na tur lam a ni lo ve ve,enge tih a tum ka hre lo reng reng. A tlan zela,In awmna tawp ber chhaka kual zau laiah a ding a. Ka ding ve dawt.

‘Enge a? mi a ang maia i tlan vak vaka?’ ka ti hlar mai.

‘Engmah…Helai atang hian khua thlir ang’ a ti awlsam et.

Lungawi vak loin ka ding ve ta tho,chhuk loin Scootyah ka thu a, Mamawii Scooty nghenga ding chu ka en vang vang. Hmalam ding takin a en a. Hmuhnawm tha deuh en ang mai…

‘I hmu ve em?” a ti thut.

‘Eng maw?” hrethiam lo zetin ka ti ha mai.

‘A that chu’ awmze nei miah loin a ti leh a.

‘I ninawm em mai,I awmdan amak lutuka min tihlau vek’ ka ti nang nang. A nui hak hak.

‘Chhaih kual vel i nuam alawm.Kan kal dawn mi?” a ti leh a.

‘Kal ang, haw a mut ka chak tawh’

‘Nia,keipawh pasal ka neih hmain mut vak vak ka duh,mi inah chuan ka murei ngam dawn si lo’ a ti a. A nui vak vak.

‘Asanga nen in tha em?” a ti leh thut.

‘Aw,ti nge?” ka chhang rang lu deuh hret.

‘Ka zawt mai mai che,George-a te hi an inthen leh tawh mawni?” a ti zui a.

‘Niminah kan inhmu a, inthen pawh a sawi lo’

‘Um..Kan Dami hi a harsa ve ang, achang hi chuan ka pen lawlh lawlh chak thin.Dawtsawi mai lah a hreh mang si lo’ ati leh halh. Ka hrethiam,ka en liam mai mai laiin Mamawii hi chuan angaithei lo fo. Mahse, hmeichhe zia pakhat ve a ni a. An inhuat phah chuang lo.

‘Kal ang..’ ka ti leh a, a bu nghat.

Tul miah loin Asanga ka hel ta zar zar. Ka tlanchhia chu ka inti duh lo nangin ka chhungril hian thudik hrechhuak turin chakna a nei lo tih ka chiang. Kan inhmu fo a, inah pawh a lo kal lo chuang lo.Mahse, a pu dam lohna vang leh a nau dam lohna avangin a buaia,a lo kal tam thei lo hrim hrim. Ka ngai em em a, inthen ta ila engtin nge ka awm ang tih mai mai ngaihtuaha tah muthilh tum ka ngah.

‘Kan chhuak lawk dawn mi?” a rooma ka luh veleh a lo ti a. Kha thil thlen hnu atang khan ka sawi lo nangin amah ka hmuhdan hi a danglam tan tih ka hai lo. Ka chan mai dawn ni a hriatchang lah ka ngah.

‘Khawiah?” ka ti a. A dawhkanah ka lehkha ken ka daha.

‘Heng ho hi Main Branchah va dah angaia’ tih pahin a hmaa File a kawka.

‘Midang tirh chi a ni lo mi?” ka ti satliah.

‘Chi chiah lo,keiman ka ken angaia. Sawifiah ngai a awm bawka.Mahse, tlai lamah…’ a ti awlsam leh mai.

‘Dami nen kal mai ula…’ ka inring hman lo.

‘Ngati? Nangmah alawm ka sawm che,min kalpui duh lo nge?” a ti hmuk.

‘Aaa,duh lo chuang lo e. Tun lai chu amah nen hlir inchhuak a.Amah nen kal leh ula ka ti mawle’ ka ti leh a. Ka thinrimna ka thunun zo lo teuh ngang mai bawk.

‘Anih chuan kan kal dun thin chu i duh lo tihna nge? ‘ a ti leh a.

‘Aih, chutiang lam ka sawi lo.Ka thiannu ania. Office staff hmeichhe dang nena in inzui dawn anih rau rau chuan ka thiannu nena in inzui chu a him ber ang chu’ ka ti leh salh. A mitah tak ka en a. Min en zawka,a Computer lam a en leh vat.

‘A dik alawm’ a ti sup.

‘Dami bawk chu kalpui leh mai rawh,zanah kan inkhel dawna.A pawi em?” ngaipawimawh lo hmel fein ka ti leh a.

‘Kalpui ka mamawh hran lo,hna bakah chhungkaw lamah ka buai deuh avangin hun kan nei khata,chuvangin ibula awm ka duha,nangmah ka sawm mai zawk che’ a ti leh hmuk.Nia,hun kan nei tlem.Mahse, a pu damlohna leh a nau hi chhuanlam mai mai niin ka hre tlat tawh.

‘Ka hrethiam alawm,mahse Tournament ania..Kan khelh zan a ni dawn sia,pawi ka ti lutuk’ ka ti a. A hma ang bawk khan ka la ngaia,ka mamawh ngawih ngawih bawk.Hnial pawh ka hnial ngai lo a,min mamawhna a nei anih phawt chuan chhiahhlawh ang maiin ka inpe zo a,Nupuiin pasal a tihsak tur ka tihsak ang maiin ka inngai thin.Mahse, a vawikhat nan zanin chu ka hnial ve chak ta tlat. Ngaihsak loh natzia hre ve tehse.

‘A tha alawm ‘ a ti sup.

Zanah ka inkhela,Zothana nena Mix Doubleah kan tang duna,kan chak hlauh zui. In ka thlenin dar 9 a ri tawh.Ka inbual sawk sawka, ka mu ta than. A vawikhat nan Asanga ka be ta lo.

Sunday zanah a rawn kala,pangngai takin ka lo welcome a. Kan inkar hlat sawt zia hi a hria angem tih ka ngaihtuah nauh nauh.

‘Thingpui i duh em?” pangngai takin ka ti a. A bu mai.Thingpui lum turin ka lut pheia,ka ngaihtuahnaah thildang a awm thei lo. Ka rinhlelh atangin thla aliam tawh. Ngaihbel tur engmah ka hmu zui lo,mahse ka rilru hian engemaw dik lo awm hi a haider thei lo. Min ngai ta miah lo te hi amak a, Mipa hrisel pangngai tak ni siin Sex lah mamawh hmel a pu lo.Sex ka mamawh ni loin hetiang taka a insuma,a danglam thei ta hi mak tih loh a harsa em em zawk.

‘Kan awmdan hi sawi that deuh a tul in ka hria’ ka tita nge nge.

‘Eng lai ber?”  a ti satliah.

‘A vaiin,kan inhlat in i hre ve em? Inngaizawng ni loin thian kan ang ka ti’ ka ti bawl.

‘Chutia mi? I ngaihdan mai mai anih ka ring’ a ti awlsam mai. Min chhandan chuan min ti lawm lo zual sauh.

‘Ka ngaihdan mai mai a ni lo.Nangpawn i hria,mahse i haider niin ka hmu che’ ka ti leh hmak.

‘Enge i duh?”

‘In then dawn chuan inthen,dawn loh chuan insiamthat’

‘Enge i duh zawk?” a ti leh a.Engmah hi a ngaipawmawh lo niin ka hria.

‘I duh duh…’

‘Ka duh lo ve ve,diktak chuan kan pahnihin hun kan hmang dun khata,chuvangin i ngaihtuahna a dik lo anih kha.Engmah chutiang a awm lo’ nghet churhin a ti a.

‘A ni em? Nge thildang?” amah bawkin a ti leh a.

‘Ka hre lo,kan inkar hi a tha lo tihzawng ka hria,kan inngai lo a. Kan awm awmin kan awma,ih..Diktak chuan min mamawh lo i ang’ ka ti halh.

‘Mamawh lutuk,ka nunah nang aia mamawh ka nei anih pawhin ka nu leh pa chauh an ni ang. Mahse,Sex hi chu insum kan ngai a,Invenna hman reng ngai hi nakinah fa kan neih theih loh phah theia. Nangmah ka ngaihtuah vang zawk che ania’ a ti leh a. Ka kut a rawn vuana, sawitur ka hre lo.

‘Hun neih hram hram ka lo tum dawn nia. Chuan,mamawh i neih engpawh sawi la.Ka buai vangin nidang angin ka ngaihsak tawk lo che a.Ka hrat si lohin i rilru ka tina ang tih ka hlau ania’ a ti leh a.

‘Dami nen hian ka duh aiin in inkawm nasa’ ka ti sap.

‘Aaaah,I thian ania..A ni lo mi?’

‘Ka hria…’ ka ti hmak.

‘Ok,nangmah khan i sawi sia. Hna thilah pawh midang ka chhuahpui ai chuan amah nen kan chhuah khan i ngaih atha iti sia, chuvang ania ka chhuahpui thin. Min enteh’ a ti zui a. Muangchangin ka en a.

‘I thian anih vangin ka thian angin ka ngai maia,I duh loh chuan harsatna ka nei lo. I rilru a lo nuam lo anih chuan ka kawm lo thei reng’ a nui a. Kha lehchen rinhlelhna ka lo neih kha a veng deuh hawk. Ahma khan lo sawi ila chuan an inzui dawn miah lo a lo ni reng sia. A rawn kuna,dimtein min rawn fawpa. Ka mit ka chhing chial.Kan infawh lohna a rei tawh lutuk..Ka lo ngaih zia leh ka lo thlakhlelh zia ka hrechhuak thar uar uar.

‘Ka hmangaih che’ ka ti sep.

‘Kei pawh..’ a ti ve sup.

Tunah chuan ka thlamuang leh ta. Nun hi a nuam leh ta halh, a hma a ngem em kha chu ni lo mah se Asanga pawn min ngaihsak leh ta deuha,kei pawn abuai zia hriain ka tihbuai loh nan ka in veng ve nasa. Sex chungchang pawh a sawi kha ka tana tha tur anih avangin ka beisei ngai lo.Ka lawm em em zawk.

‘Zpui,ka phone kha lo pick  lawk mai teh’ Dami’n min rawn ti a.A bag atangin a phone ka phawrha, rawn calltu ka hmuh rualin ka lungphu a rang lehnghal dawt dawt.

‘Tu nge?” a rawn ti leh lar lar. Ka chhan hmain ka aw ka thian te te.

‘X a inti…’ ka ti ban chat.

‘Pick rawh,I bialpa anih kha. A mood fuh lo den thei lutuk vangin tikhan ka save anih kha’ thawveng zetin a rawn ti leh a. George-a ka en a. A mitko a ti sang ak.

‘Hello…’ ka ti sap.

‘Zeeee,tinge iphoneah ka call tlang theih loh che a?” a rawn ti nghal chat.

‘Maw? Ava mak ve’ tih pahin ka phone ka phawrha,a lo thi chu niin,ka thawnghal huai.

‘A thi anih hi..I lo la thleng dawn lo mi?” ka ti a,

‘Thleng tep, I thil chah kha ka lamkuala,I hmingin tiraw?” a rawn ti a.

‘Um,ka hmingin..2999/- aniang’

‘Ok…Kan en leh lawk ang. Anih phawt’

Dami a rawn thu a, George-a a nek talh talh. Thla thar atangin Thingtlangah a awm tawh dawna, thlah nan zanin hian kan thianhoin Dinner kan eichhuaka. Mamawii erawh a rawn tel ve lo thung.

‘Ka va han peih lo tak, ahrim hrimin Zopuii hi i vannei  ka ti.Boss chan nih vang maia,Transfer hian i che tel ve ngai lo reng reng’ a ti a. Ka nui a,a sawi sual lem lo. Ka thawhhlim atanga ka zawmna hmunah ka la awm ta reng.

Kan chawei boruak a hlimawm takzet, kan thianho hi mize in ang lo em em kan ni a, kei hi ka thutak em em a. Zu ka in ngai lo,ruih lam chi ka ti meuh lo,ka thiante hi chuan Beer an in vek,mahse kan awmkhawm chuan in ve hawt si loin anni aiin ka rui ber zel thung.

Fur  a in tana,hna lamah pawh kan buai dan ala ngai ta reng, Mamawii pasal neih hnu atangin inhmuhkhawm kan harsat ta deuh sawt bawk,Dami lo awm lo lehzel bawk nen. Tunhnaiah Asanga’n zan lam zu in zauh zauh aching chho a. A hma kha chuan weekend chauh a ni tlangpuia,tunah chuan zantin deuhthaw a in ta. Tam erawh a in ngai lo. Ka sawisel ta zauh zauh.

‘Zeee,tunah ka zin lawk dawna’ ka in atanga a haw hnu lawkah a rawn ti a.

‘Tunah maw? Enge a awmzia?” mak ti deuhin ka ti ha.

‘Family,nakinah ka hrilhfiah ang che’ a ti a. Ka thaw hak.

‘Zingah akal theih loh mi? tunah a tlai tawh si’ ka ti leh a.

‘Aih, theih loh.A pawimawh lutuka..A theih anga ranga lo let ka duha’ a ti leh a.

‘Midang nen ami? I nu leh pa an kal ve dawn nge?” ka ti leh a.

‘Keimahin…Ka nu leh pa hriat ka la duh lo a..’ a ti a.A kalna tur a rawn sawia,fimkhur turin ka ti a. A fimkhur ang tih a sawi ve bawk.

A khat tawkin ka call a,a thlen chin ka zawt chamchi. Nidangah chuan Motor khalh laia biakbuai ka duh lo thina,mahse zanin chu zan rei tawh lam anih avangin ka ngaihtuah takzet.

A thlen veleh msgin min rawn hrilha,a buai rih deuh ang tih a sawi nghal bawk. Ka thlamuang ta huai. A tuk tlai lamah a rawn haw lehnghala. A lo thlen hunah min hrilhfiah a tum tho avangin engmah ka zawt nawn lem lo.

‘I chau em?” ka ti a. Thatchhe zetin thutthlengah a thu awn duai.

‘Chau ve deuh. Chaw ka ei dawn lo ania aw’ a tih zawma.

‘Ok, inah haw hma la a tha alawm..Engthil chiah nge?” ka ti a.

‘Hre rih lo phawt rawh, I rin loh lam a ni dawna..’ a tita tlat.

‘A tha alawm. Inbual la,nge ikal nghal duh?” ka ti leh a.

‘Ka kal nghal mai ang.Min kuah phawt teh ‘ a ti a. Thuawih fein ka tho a, amalchungah ka thu a, ka kuaha,ka awmah a hmai a rawn phuma.Ka kawngah a kuah bawk.

‘Chan che ka duh lo. Engpawh thlengse min kalsan lo ang tih min tiam la’ a ti sup.Ka nui hak.

‘Engtin nge ka kalsan theih ang che? Ka hmangaih che a,I hria alawm. Min kalsan dawn pawh ni la ka zui zel tho ang che’ ka ti duah.

‘Ka nu leh nang aia min hrethiam thintu an awm lo a,I hriat kha. Ka tan chuan i hlu lutuk’ a ti leh a.

‘Ka hria alawm..Nangpawn min hrethiam alawm’ ka ti a.Min chhang loin min kuah nghet leh sauh.

Hna ka thawh mawlh mawlh laiin Mamawii’n min rawn call hlawl. Ka buai deuh avangin ka pick lo.A rawn tinawn leha. Ka reject ta tho. Meeting kan nei zui leha,ka buai ta viau bawk nen Mamawii lam pawh ka lo ngaihven leh ta lo. In ka thleng deuh chiah tihin min rawn call leha,ka hrechhuak ta chauh.

‘Sorry lutuk..Kan Meeting alawm le’ ka ti nghal mawlh mawlh.

‘Khawnge i awm?”a aw a dik miah lo.

‘Inah..I va that loh hmel ve’ ka ti a.

‘Tha,ka lo kal mek.Ka lo thleng har lo ang,tumah inleng lo nei suh. Thil ka sawipui duh che’ a rawn ti a. A awmdan ka hrethiam lo chungin ka ‘aw’ ta tho.

Ka inthlak fel hnu lawkah a rawn thlenga,zaninah Asanga’n tihtur a neih avangin a lo leng dawn lo a,tumah inleng dang ka neih ka ring lo.

‘Thu teh’ a ti a.Ka thu ve mai,ka bulah a rawn thu thla ve a. Ka kut a hum vang vang. Ka awm a tinuam hlawl lo,mahse engmah ka sawi lo. A tawng hun ka nghak mawl tawp.

‘Ka khawngaih lutuk che’ engmah a sawi zawm lo. A mittui a tla a. Ka ka hau mai.

‘Keimah min khawngaih maw? Enge achhan?” ka ti ha..

‘Dami a raia’ a ti leh tawp.A va han inpersan si ve.Ni lo…A theih miah lo,Dami araia,kei min khawngaih..

‘Ni lo…Engmah sawi miah suh’ ka ti thawt.

‘Min ngaidam rawh,ka ringhlel reng chunga engmah ka hrilh lo che hi ka dik lo’ a tap leh.Ka mitsulh. Min rawn kuaha,a tap zui nghal hlawp hlawp. Engmah ka sawi thei lo. Mi a ang maiin ka nui chhuak ta nghek.

‘Fiamthuah pawh chintawk nei la..’ ka ti a. Mittui kar atangin min en a. A hmelah fiamthu anih loh chian zia ka hmu thei, mahse ka hmu duh lo.

‘Intihhlum a tuma.. Zanah la la Asanga a tlanchho a….’ ka hit mup..Mi a ka lo nih hi,..’Kan inneih dawna kawr en tura kan chhuah zan khan Chanmariah khan an pahnihin ka hmu a. I hmuh ve hlauin ka tlanchhiatpui che a…’ engmah a sawi ka hre zui tawh lo..

Ka harh lehin khum bulah Mamawii leh a Pasal an lo thu a. Ka chet veleh min rawn en rual thawt.

‘I tha em?” a ti vat.

‘Ka tha,a va zia lo ve’ ka nui lui thei hram. ‘A lo kala,ka hawtir ta anih kha’ ati leh sap. Ka thle bak ringawt.

‘Haw tawh rawh u,ka tha’ ka ti a.

‘Luhlul suh,kan riak mai ang.Nangmaha awm turin ka duh lo che’ a ti a. Keiin kal turin ka nawr ve thung. Darkar chanve lai kan innawr hnuah an kal ta hram.

Ka mut a chhuak lo a, ka ril atam hek lo. Ka mang vek. Khawvar thlengin khumah ka thu a. Asanga’n min rawn call nasat avangin phone ka off hmak. Pawn lamah min kalh hnan tura ka tih avangin Inah pawh lo kal se min hmu dawn lo.

Ka hnaah ka damlohna chhuanlamah hmangin chawlh ka laa. Rei loteah an la hre thuai dawn tho tih ka hria.Ka ngaihtuah peih lo law law. Ka zak nge ka na ka hre hek lo.Mi a ang maiin ka khawsa a. Ni a liama, kar aliama,thla pawh a chanve a kal ta. Ka inah ka inkhung tlawk tlawka,ka thiante dang pawh ka awmna  ka hrilh lo. Ka nu hnenah training ka nei dawn tih ka hrilha,biak ka harsat dawn thu ka sawi bawk..Mahse, zantin msg talin ka tha tih ka hrilh ziah. A hnuah ka off mai zel. Ka on apiangin Asanga min rawn call tumna msg a lo thleng ngei ngei.Mamawii a khat tawkin a rawn kala,min ngaihtuah tih ka hria. Mahse, tunah chuan ka tawrh mek hi anat leh nat loh ka la hre lo.Mihringin thil an feel ang hi ka feel pha lo.Nilengin che mang lo ten ka mu a. Chaw ka ei mumal loh avangin ka rihna a tlahniam nasa bawk.

Zawhna awmze nei lo ka inzawta, engtin nge anih theih? Midang ni loin ka thian tha ber a ni a. Engtin nge hetiang ka chungah a thlen tir theih? Sex a mamawh ta miah lo kha keimah min ngaihtuah vanga insum ni loin midangah hlimna a lo hmu zawk reng a. Anih chuan engtin nge ka kalsan ala hlauh tho si? Zawhna…Zawhna,tawpchin a nei lo.

‘Khawiah emaw kal i duh em?” Mamawii’n a ti a. Ka at chhu kha a reh tan tawha,ka rilru pawh a fim tan tawh.

‘Duh lo..Hnaah kal ka mamawh tawh,vawiin hi ka chawlh hun tawp ania’ ka ti a.

‘Um,ni tak…Enteh,I duh em ka hre lo nangin transfer ka lo dil ve mawp maia.Ih,Branch dangah an sawn che a’ nuam ti lo hmel a pu. Ngawirengin ka tawlh hnaia,ka kuah ringawt.

Ka inbuala,ka inbual laiin eitur min lo siamsak ve thung.Thla khat dawn engmah ei mumal lo ka ni bawka,ka ei tha ngang mai. Ka phone ka on a..Msg a rawn lut pawp pawp.Asanga Msg ka en vang vang,Open loin ka delete tawp zela,mahse ngaituahna thar ka nei. Ka open a.

‘Zeee,biak che ka duh, ka tihsual man ka tawrh mek rapthlak zia hi sawi ka tum lo. I dam em tih chauh ka hre duh’ ka ner nawk.

‘Engtin nge itih theih?” tih zawng ka thawn leta,ka nunah a vawikhat nan ka block ta hmak. Mi block hi ka tlawmngai thina,mi dawihzep tihtur ka lo ti thin.Mahse, tunah chuan Block aia tha tihtur dang ka hre lo.

Ka na hi ala reh dawn lo,mahse ka tlansan rei poh leh ka tlawm tihna a ni ang. A kalsan tak Hmangaihtu thinlung hlutzia ahriat ve hunah chuan kei chu ka nui tawh mahna le..Mahse, ka ngaihtuahna hi zawhna in a luah khat renga, ka mu ka harh hlawl pawhin ‘ Engatinge? Engtin nge a thlen theih?” he zawhna bak hian ka ngaihtuahna a luah ngai lo.. Chhanna hre tura biak pawh erawh ka tum lo hulhual. Sawifiah tur engmah a awm lo a, thiamthu emaw thupha pawh ka mamawh hek lo..

Ka nunah hian tihsual tamtak ka nei tih ka hria,Chung zinga ka tihsual lian ber chu Asanga ka tawng leh ka Hmangaih kha ni loin,Nupa kar chauha thlengtur Sex ka hmang kha ka tihsual lianber a ni. Sex kha lo hmang lo ila chuan ka na hi hei ai hian azia ngei ang.Hlutna ka nei tih huai takin ka sawi ngam anga,na chung pawhin Hmalam ka panna a awlsam deuh tur ania.Tunah chuan midang nena inzawmna nei leh turin ka inringtawk tawh lo a, hmalam pan chakna ka nei miah lo.Pasal nei ang maia ka lo awm kha mahni inbum ka lo ni. ‘Ang’ chu atak a ni thei ngai si lo.

‘Hey…I tha em?” ka hmai bulah Mamawii’n a kut a rawn hmet ri khap. Ka phu zawk. Tei ka en a, a lo nui var var. Mamawii lo luh lai ka hre miah lo.Tei an hlawk hlawk hnu khan nunhluiah ka lo let vang vang a lo ni.

‘Tha…Awi, ka va ngai che ‘ ka ti hliai.

‘In ninawm,kal rawh.I tlai dawn ania’ Tei-in a lo ti hlur.

‘Ka kal dawn,Eeee.Ka ticket chu a fel tiraw?” ka ti leh rih.

‘Fel vek, kal rawh..Chawei turin ka lo nghak ang che’ a ti leh a.

‘Zopui..’ Mamawi’n min koh vangin ka ding dat. Min rawn pan pheia,Tei-i a rawn kal hnai ve bawk. Ka kut a rawn vuana,Min en vang vang.

‘Hlim ang che, Chuan,I  natna hi tlangsang laiah khan hnutchhiah la,hlimna chauh neiturin lo let leh ang che’ a ti sap.

‘Ni e..Ka ti ngei ang,chuan ka peng pawimawh inni a,in tel lo chuan nun hi ka zuam lo ania’ ka nui a. An nui dun var var.

Ka zin anga,ka thiantha berte min duhsakna leh min chah ang ngeiin Mipa rinawmlo ber natna min pek hi ka zinna hmunah ka hnutchhiah anga, nun thar nen bul ka tan tawh ang. Pathian hnenah lawmthu sawiin ka rilru in ka tawngtaia,min venna leh min hruaina zawng zawng bakah Mi tha lo laka min chhanhim avangin….

A TAWP TA...