ANNEM - 12

Chapter- 12

‘Eng..I fapa maw? I sawi awmzia ka man lo’ ka ti bah nak mai. Ka hamhaih nge ka mangang zawk pawh ka hre hrang lo.

‘Aw, Ka fapa..Khawiah nge i dah?” a awpa zet chu a hlauhawm ngawih ngawih.

‘Ka tih a ni lo..Diktak chuan in zawng mek tih chiah ka hria..’  ka sawi zawh rualin ka inchhir lehnghal zat. Awmzia a nei tawh der si lo.

‘I tih anih si loh chuan engtin nge ka fapa abo tih ilo hriat si? Kan chhungkaw zingah chauh lo chuan hria an la awm si lo’ a rawn tita chat.

‘Eng lo..Ih..’

‘Khawiah nge i awm?”  nelawmna tel miah loin ka tawnglai a rawn pawtchat leh hmuk.

‘Inah..Enteh, I fapa awmna ka hre lo tak tak. Mi tuemawin min rawn hrilha’

‘Ka lo kal..’ ka thilsawi nena inmil lo lutukin a ti leh nghuta,ka chhan let lehna tur pawh nghak loin a off zui nghal hmak bawk.

Awm hle hle thei loin ka vei tawn seka,ka thu a,ka thu rei thei chuang lo. A fapa chungchanga min rawn ringhlel kha a demawm miah lo tih ka hria. Keilah khan rinhlelh tur tingin a bo tih kha ka lo hre khanglang lehnghal bawk si. Mahse, chu chu ka hlauhchhan a ni lo. A lo kal tur hi tuemaw talin hmu ta se thil a pawithui viau theia. Ka Pateate chhungkua chuan lo hmu pawh nise buaina a awm lo. Tu nge anih pawh min zawt kher lo ang. Mahse,Malsawma hi a duh hun hunah a lo kala,a sawilawk ngai bawk si lo a. Chu chuan min ti mangang zawk.

Ka Phone ka laa,hmundangah inhmu zawk mai ang tih tumin ka call nghala.Mahse, a pick lo.Ka ti nawn leha,a pick chuang lo.

Door Bell riah ka zuang tho nghal zawk. Kawngkhar lam ka pana, mahse hawng mai loin thawk ka la leh te te. Engpawh sawise mahni inringtawk taka ka hmachhawn a tul tih ka inhrilh nawn leh mawlh mawlh.

Kawngkhar ka hawnga, mahse Sangkima ni loin Malsawma zawk a lo dinga, ka thaw deuh huai mai.Mahse, a lo kal hun erawh a timing lo nasa namen lutuk,Ka hriat ve chinah tun ang hian ka la ngei ngai lo.Sangkima kha khawi atangin nge a lo kal ka hre si lo a.A lo thleng thut anih vaih chuan..Ngaihtuah pawh ka ngaihtuah zui ngam lo.

‘Min luhtir dawn nange?”

Malsawma tawngthawm chuan ka khawvel siamchawp atangin min tiharh zawk. Ka chhungril sahal mek thup tumin ka theihtawpin ka nui luia,mahse ka hlawhchham chiang bal.

Ka tawlhsawna,a rawn lut a. Tlangnel zetin Living Room Sofaah a thu thla nghala, ngei lutukin ka thlir zui tih a hre lo. Engvang tehchaiin nge tun ang hunah te a lo kal ringawt ni?

‘I lo va kal lai ve’ ka ti nghauh. Amah ep zawngin ka thu a, ka thu bet hleithei lo. Engtik hunah pawh Sangkima a lo thleng thei reng tih ka ngaihtuahnaah a khat vek.

‘Tihtur i nei tihna mi?” a ti a.

‘Aw, chhuah ka lo tum meka’

‘Aaah,anih chuan ka kal lehnghal mai ang’ tih pahin a tho a. Ka awmdan mawi lem lo lutuk chu ka ngaihtuaha,nuam ka ti lo leh thut.

‘A hmanhmawhthlak over lo a.Chhan neia lo kal i ang bawk si’ ka ti leh hnuhnawh.

Min rawn en a, a thu leh a. Sangkima alo thlen mai loh nan ka tawngtai ru lo chauh. Ka phili lutuk anih vaih chuan Malsawma hi a mi a anih miau loh avangin achhan tak hre lo mah se ka awmdanah dik lo a awm tih min ringhlel ngei ngei dawn tih ka hai miah lo.

’Um,nei tho mai. I nu hna ania,Pakhat zawk chu Sangkima Fapa a bo an ti a’ ka tum loh lutukin ka tho nghal hluai ringawt.

‘I tha em? I nawm loh hmel riau mai’ min ngaihtuah hmel deuhin a ti a. Rang zetin ka lu ka thing vat.’Thingpui i duh em?” sawitur dang ka hre mai si lo,zahzelah ka sawi ta ngawt.

‘Aih,duh lo mai. I chhuah dawn chuan ka tikhawtlai mai mai ang che’ a ti a. Ka chhungrilah hahdam tur leh fimkhur turin ka infuih leh rih. Ka thu thla leha.

‘Diktak chuan Ampuia nen problem tereuhte kan nei a’ ka tichhuak halha. Ka nui lui sak bawk. Huizz, Sangkima vang hian dawt engzat nge ka la sawi belh ngai ang ka hre lo. Ampuia hriat miah loha ka hmang tangkai erawh ka inngeia,tihngaihna dang ka hre chuang miah si lo.

‘A te vak lo a ang khawp mai’ a nui huk huk.

‘Aih, te lutuk.Mahse, Mipa hi inbuaithlak ve a’ ka then leh nak.

‘Achhan a awm anih loh chuan mipa hi kan buaithlak loh lutuk..’

‘Maithei..Engtin nge ka nu thil pawimawh chu nita?” thildang sawi tumin ka ti a. Dawt chiang lutuk sawi reng ka duh lo.Min ti hah zualin ka hre tlat.

‘Vawiinah kan inbiaa,a lo haw veleh kan bawhzui ang kan tia.Dawr pawh khawih tan nghal a fuh ka ringa.Naktukah min enpui la ka lo tia. Bakah hna pawimawhah mi ka hmu a,Sangkima fapa chungchang ka hriat avangin ka rawn kal tlang mai mai mawle.I hriat duh takin ka tia. Chhuak ila,i kalna turah chuan ka kalpui zawk dawn che mi?” a tih zawm leh duah.

‘Aih, Lawmi nen kan kal dawna,ala hman lo deuha.. Lawk,Sangkima fapa abo maw? Fapa a lo nei reng alaw?” ka theihtawpa pangngaiin ka ti a.

‘Um..Nei e,I hre turah ka lo ngai a’

‘Hre lo..Amah ngawr ngawr hi ka hria’ ka ti leh a. Ka chhui nasa tih hrilhhriat kher ka tum lo.

‘Anih chu..Um,Bo han tih lemah vawiinah School atanga an va hruai tur kha midangin an lo hruai tawha. Amak khawp mai,an School kalna hi an fimkhura, naupang hruaitu tur hian ID an neih angaia. Chu nu chuan a nei thlap an ti lehzela’ a ti a. Ka ngaihtuahna a vir deuh zawk.

‘School an nei ve reng sia, tinge an Schoolah an kaltir lo tihna mi?”

‘Um,kaltir lo. Anihna takah chuan a nu te School ania. An School hi la upa lo tak mai ania. High School pawh a awm tel lo nghe nghe a. Lar zawngah chuan a lar ve viaua,that pawh a tha thawkhat. Fees pawh ato pangngai viau bawka. Sangkima te School erawh lo ding rei tawh leh lar laklawh annih avangin tluk thu a awm lo. Chuan,School tha zawk neitu anni chungin a fapa khan a nu te Schoola kal a duh tlat anih hmel.Bakah,amah hi naupang zakzum leh ti tak a ni an ti lehzela, a Pi leh Puin an atchilh thawthanga. A duh a sawi apiang chu hnialna awm loin an tihsak pawp pawp zel tih a ni bawka’ a ti ta duah. Ka beisei phak bakin a hre chiang.

‘I va hrechiang…’ ka ti hul hak ringawt; A nui suk.

‘Hrechiang animai ang chu. A nu Pasal hi ka thianpa a nia. Thian han tih chiam tur chu a ni lo maitheia. JM Construction neitu te hi annia. Kan eizawnna lam hi a inhnaih angrenga’ a ti awlsam leh mai. Ka bu nghat nangin ka awih lem lo. Rinai hian a ngaihven tlata,a hriatkim viau ka ring sa hrim hrim zawk.

‘Anih chu a..An hmuh leh vat  turah ngai ang’ ka ti tawi leh tak ringawt.

‘Um, Kum 10 vel bawr a ni ve tawha. Bo mai mai rual chu a ni tawh chiah lo’

‘Eh,anih chuan hruai rual pawh anih tawh loh chu. A lo lengkual pawh a ni theia’ ka ti leh a.

‘Ka ring chiah lo,amah hi a hrisel vak loa,a school kalna lah a hnai lem lo bawka. A kum ngaihtuah chuan hruai kher ngai tawh lo tur ania. Mahse, a nu pasal sawi dan chuan  amahin a kal ngai lo va, a haw ngai lo bawka.Chuan,School atanga va hruaitu kha hmeichhe puitling tawh a ni an ti a. Tumsa a hruaibo an ang tlat. Ka lo ngaihtuaha…’ sawi zawm loin a tawp leh daih.

‘Lawk, anu Pasal chuan a rawn hrilh che tihna mi?” mak tih hmel deuhin ka ti sap.

‘Hrilh chiah lo,hna chungchangah kan pahnihin kan inhmu a, kan awmdun laiin a nupuiin a rawn sawia.. ’

‘Anih chu mawle.A zia lo hle mai’ ka ti leh ngial.

‘Um..Diktak chuan ka ngaituahna hi a dik em tih hre turin ka lo kala..’ a ti leh a. A sawi awmzia ka man mai lo,chik zetin min en a. Min en danah chuan ka chhungril thlenga hmuh tlang tum  a ang. Thawklehkhatah  a thilsawi awmzia ka hre fiah ta thut. Hreptak hian..Sangkima chauhin emaw min ringhlel ka tih laiin Malsawma pawh hian ka tih anih a lo ring ve tho anih chu!!

‘I sawi awmzia ka hre lo’ ka ti hmak. Ka thiltih tawh zawng zawngah khan fiahna a nei ngai lo. Ka tih angah a ngaia,ka hnial lo a,ka tih a ni tih erawh ka hrilh ngai chuang lo. Khang thil ang bawk khan tunah hian min rawn zawtfiah tur ringawtin a lo kal ania. Duh ai chuan ka mimal thilah a inrawlh tam ta tlat.

‘Takzet…? Min ring thei ania’ a ti leh a. Rin leh rin loh chu engpawhnise,tunah tak chuan ka ben pawp aia chak ka nei lo.

‘Aw,I ngaihtuahna lo hriat ngawt ngaihna a awm lo a’ ngeiawm ru zetin ka ti salh. Mahse, ka tawngkam kha deuh fak chu ngaipawimawh ang pawn a awm lo. A hrethiam ang tih erawh ka chiang.

‘Um,adik alawm. Thil thleng tawh ka ngaihtuahin i tel vena a lo nih leh nih loh ka lo ngaihtuaha’ ati a, a then suka. A mitah erawh nuihzatna ni loin ka rilru hriat tumin min zirmek tih ka hmu thei thung.

‘Ouch,ka tih a ni lo tlat. Ka damchhung chuan hetiang lam hawiah hian ka inrawlh ngai lo bawk ang’ theihtawpa insum chungin ka ti hmak. A thle buka, then zui leh suk. Engvanga nui thlazen nge maw anih le a? Ka kalsawna,Tukverh bulah ka dinga ; pawn lam ka en a,phe zeuh pawh a awm lo. Sangkima a lo thlen mai hlauhthawnna nen ,ka bula awm mek,mi ai baka fing venthawn ngai bawk; Ka hah ru hluah hluah.A rawn tho a, min rawn pan pheia. Ka bulah a rawn dinga, ka ban tawn tawnah a rawn vuana.

‘Ka ring che ania. Ka hlauhthawnpui che avangin zawhna ka siam mai chauh anih kha. I thinrim lo tiraw?” min thlem titihin a ti a.

‘Rim nang..Bakah engmah hlauhthawnna tur a awm lo’ ka ti a. Ka kalsawn zui lehnghal daih bawk. Sofaah ka thu thla leha, Ka phone ka phawrha,Lawmi msg ka thawn ta ngawt.

Tukverh biang ngheng chunga Malsawma ding chu ka en zawka, a hmel alang dam thlup.Mahse,arilru puthmang a dik lo nge keimah hi Lawmi tawngkam avangin ka dik tawk lo ka hre tawh nek lo. Tun hnaiah hian ka ngaithei lo ru fo va,diktak chuan a lo kal tawh miah lohna tura tih ka chak thut zela. Mahse, Khak fawk emaw ngeiawm taka ti ringawt turin khawilaiah ber nge a ngeiawmna pawh  hriatthiam theih a ni leh miah bawk si lo. Mawi lo taka min tihlah a nei ngai lo a, kan in lah hi kha lehchen tlangnel taka a lo kal tawhna inchhung  a ni a, a duh duh huna a lo kal hi tuna taka lo sawisel lah a dik hek lo.Ka nu tan lah fapa tha ber ang mai a ni a, amah ai pawhin a ring emaw tihmai tur ala ni zui.

Ka Phone a rawn ri a, lawm zetin ka pick vat.

‘Aw, thiannu..’ ka ti zangkhai vah.

‘Enge a awmzia? Tu nge ibulah awm a?” a rawn ti sa sa mai.

‘Lo phei la,ka hman reng alawm’ ka ti leh daih.

‘Hey,Hmeli..Enge i  sawi chiam chiam a?” mi hriat hlau hmel fahranin a rawn ti leh a.

‘OK,lo kal rawh’ ka ti leh a. Ka off zui nghal hmak.

‘Ka ti khawtlai vek chein ka hria.Ka kal teh ang’  Malsawma’n a ti vut. Ka plan chu a hlawhtling ta phawt.

‘Um,naktuk chu dar engzatah nge niang?”

‘Ka hre lo,inbe leh ila..’ a ti tha ve mai.

Pawnah ka zui chhuaka, min rinhlelh loh nan verandaah ka thu zui leh a, kal mai loin min chhui zui ta se ka che buai hle theia,fimkhur tluk a awm tlat lo.

Lawmi ka call leha,a rawn teu nghal hlar mai.Ka nui hak thung. Malsawma awm laia Sangkima a lo thlen miau loh avangin ka lawm tawk a tling hrim hrim tawh.

‘I va han che thing ve a. Enge awmzia?” a rawn ti bak hlar mai.

‘Inleng ka neia,haw tawhse ka ti sia,chuvang mawle’

‘Inhmeh thei bawk sia. Min tibuai vek alawm’ a ti leha.

‘Sorry..Hrilhfiah chiam tur chein chance a awm tlat lo va’ ka ti leh mai.

‘Anih chu a, Tunah a kal tawh mi?” a rawn ti leha.

‘Um,kal chiah..Eee,Malsawma’n kan chhuah dun leh dun loh a zawh che chuan kan kal dun lo titawp teh’

‘Eheu leh!! A va lal ta awm ve?” a thinrim tih theihnghilhin nuam ti lutukin a rawn ti phur sarh mai.

‘Chutiang lam pawh a ni lo’

‘Lawk, ka thluak ka’n hmang lawk..Aaaa,I inleng chu amah maw lo ni a?” a nui zui a. Ka ner nak thung. A duh chuan a thluak hi chak tak a ni thina.Thil han remkhawm zung zung lah ngeiawm khawpin a thiam bawk.Mahse, School kan kal lai atangin a thiamthei lo pawl a ni char char.

‘Thil pawimawhah ania a lo kal’

‘Nia…a pawimawh ngawt ang’ min chhaih nuam a ti laklawh lehpek tawh. Mahse, a Game a inhruai luh tir ka tum lo bur.

‘Engpawhnise ka hrilh ang che chuan lo sawi tawp mai teh. I fel kha’

‘Aih, ka sual lutuk. Ka sawi kha,Ampuia aiin ka duhpui zawk che’

‘Hmeli…’ ka ti hlaka. A rawng tawng leh lai takin ka off nghal hmak.Min rawn call leha,ka reject nghal daih. Mahse, a rawn tinawn leh talh tho. ‘Enge?” ka ti hmak.

‘Hey, Off tawh suh.Ka sawi tawh dawn lo’ a rawn tinghal ngawt bawk.

‘Sawi vat rawh’

‘Mondayah huanah kal ila,Ka Pain Sangha man a tia.Kan thianhoin zuk riak ila,zankhat animaia’ a rawn ti a. Ka rin loh lam a sawi takah chuan ka thaw huai mai.

‘Tum ila nimai lawm.Mahse, ka nu hna pawimawh tihtur ka nei maitheia. Inbe leh ang’

‘Um,lo tum ve rawh. Ek-i te pahnih chuan an confirm tawh ania’ a rawn ti leh a. Ka chak ve reng mai,diktak chuan sangha hi thang ka tih avangin ka ngaina vak lo va. Mahse, dil sah kher kher chu nuamti tak ka ni ringawt.

Ka thutna ngaiah ka thu deuh vang vanga, mahse Sangkima alo thleng thei chuang lo. Min lo call hun ka en a,Darkar chanve aliam tawha. A lo kal leh lo a nih ka ring ta zawk. An hmu tawh pawh a ni zawk maithei bawka. Ka mitthlaah a fapa a lo langa, thlalakah bak ka la hmu lo.Mipa naupang ria thel thawl leh inthlahrun hmel tak,ha tihrualna vuah,ngainatawm hmel tak a ni a. Sangkima nena kan intihchhiat tawn tumnaah hian ani hi chu vawikhat pawh tihnat tum zawngin ka la ngaihtuah chhin ngai lo. Tunah pawh hian hmu vat se,a chhungte bulah thlamuang takin awm se ka duhpui takzet.

Inchhungah ka lut a, Kawngkhar chhung lamah ka kalha.Zanrei la ni lo mah se inleng ka neih ka ring tawh lo ve tawp. Ka nu a awm chuan lutchhuak kan nei ve chamchi a, mahse keimah chauha ka awm bakah chhun lamah ka chhuak daih zel bawk nen ka pi te pawh an lo lut zeuh zeuh chauh.

Thil eitur siam ka tuma, mahse ka thulh leh ta zawk. Inthlak tumin Room lam ka pan chho a, Ampuia min lo biakna avang khan thawmhnaw pawh thlak loin ka la awm a,Sangkima ka nghah laiin Malsawma a lo kal zui leh bawk nen khan ka laklawh kual ta vek.

Room kawngkhar ka hawnga, Light ka on nghala,mahse Tukverh bula Sangkima lo ding ka hmu thut,insum hman loin ka rakchhuak nghal thawt mai.

‘Nang hi…Tinge a?” ka tichhuak zui that bawk.

‘A kal tawh em?” a ti bung vut. A mitmeng thim khup leh a inpetruh teuh chu ka en a. Engtin nge kan inah hian thla ang maia a duh hun hunah a lo luh theih ka ngaihtuaha,ka mangang titih tawh.

‘Enteh,I awmdan hi a dik lo. I duh hun hunah ilo lut a,I chhuak leha’ ka ti nghat,ka inkuangkuah fel than bawk.

‘Anih chuan khapa awmlai khan lo lut se minti tihna mi?” bung zetin a ti leh hluk. Malsawma a hmu tih sawi kher lo mah se achiang. Chhan leh mai dantur hre loin ka hmui ka pet nauh nauh ringawt.

A rawn kal pheia,ka tawlhhnung nghal hrat,Khumah a thu thlaa. A hmai a hup zui nghal daih.

‘Enteh..Ih,I fapa chungchang kha’

‘Engvangin nge itih a?” a ti hmuk. A aw a ring lo nangin a chiang kek kawk viau thung.

‘Ka tih a ni lo..’

‘Zonunmawi..’ a tichhuak thawt. Ka phu zawka,ka tawlh hnung leh hrat bawk. Nghet zetin ka bag hrui ka vuana,ka khup a sai dar dar a. Engvanga khur nge ka nih erawh ka inhre lo. Diktak chuan ka tih a ni lo va, hlauhchhan tur ka nei lo hrim hrim. Mahse, ka awmdan pangngaiin ka awm thei tlat si lo.

A hmai a tuai pawka,min rawn en a. A hmelpa leh chang zet mai chu a rum ula,nekluih loh finthlak tur zia chu naupang pawn an hre thei hialin ka ring. A rawn tho chhuaka,ka lo ip ru chawih ringawt. Kan awmdanah hian he room leh in hi ama ta niin; kei erawh aneitu ni loin chhiahhlawh thil tisual lai an man ka ang zawk daih ang.

‘Eng hi nge i buaina ber?” a ti hriam hruih. Ka beisei loh zawhna a ni ta.

‘Eng buaina maw? Ka tih a ni lo ka tih tawh kha’

‘Engvangin nge min tihbuaia? I pawi enge ka sawi?” a ti leh hmuk. Kei erawh thawklehkhatah ka hlauhna a bo nghal hmiah.

‘I hre lo maw? Ava mak awm ve’ inringtawk takin ka ti hmak.

‘Aih, hre miah lo mai. Ka hriat zawng chu ka dawhtheihna i tichhe tan tih zawng’ a ti leh nghut.

‘Anih chuan tlem ka pen leh hlek ala ngai dawn tihna anih chu’ ka ti salh. Za miah loin ka nui lui hak bawk.

‘Thildang chu ti rawh, ka fapa erawh i ngaihtuahnaah khan dah pawh dah chhin suh.I nghawng sang nalh zet kha ka thuaichhum chak lo ania’ ngeiawm lutukin a mit a siai zauh.

‘I fapa nunna i hlut tluk zet khan ka chhungte nunna ka hlut ve. Mahse, vanduaithlak takin i fapa ka khawih lo hlauh. Khawih tura min nawrluih erawh chuan ka hreh miah lo’ ka nui lui leh hak mai.

‘I sawi zo tawh em?” a ti vawt ruih. A hnung lamah a kut a suih leh tawha, mahni inringtawk hmel takin a ding khawng luh bawk.

‘I fapa nunna tluk zet hian ka u leh Becky fa nunna kha a hlu asin,nangin ilo tihtlaksak ringawt lai khan nun ve chakin a nu pumah a tah ka ring a. I fapa ang bawk hian duat pawh a phu ve a.Mahse, apian chhuah ve hmain i thata..Tunah i fapa a bo a,a natzia i hrethiam ve tan a. Ka rukbo ni se chuan thi turin tunah hian thu ka..’ min rawn hnaih chilh nghal rawka,ka nghawngah na zetin arawn reka.  Ka tawngzawm thei tawh lo.

‘A tawk..Ngawi rawh’  harsa tih hmel lutukin a ti chhuak hrawiha,Bangah min nawrchilha,na zetin ka hrawk a hmeta, talchhuah tumin ka bei ve thung. Mahse, a kut lianpui chu thir ang maiin a khauh tlat. A kut lehlamin ka daraha nema,lei ka rap phak lo.

A banah ka thama, ka thawk a buai zui chu a ni der.. A hmela tualthah hreh lohna chu rapthlak ti lutukin ka en tawk tawka; Diktak chuan a fapa chungchangah khan ka tawng thui mah mah tih ka hai lo. Ti thei dinhmunah pawh ding ila ka tih miah loh tur a ni tih pawh ka hre tho. A rawn hmer na leh zuala,ka mit a vai nghal ruaia,fim taka thil ngaihtuah a harsa tana, ngaihtuahna a tawi vel vek..  A hmel pawh ka hmu phe ruai ruaia. Ka thi dawn tih zawng ka hria.Mahse, thawklehkhatah ka hrawka a rehna a thlah thuta,min thing leh nawka,min thlah a. Chhuatah ka thingthi thla hnawka.Ka tha a khur a,ka khuh zui bawrh bawrh mai.

La khuh bawrh bawrh chungin ka hawichhuaka,Boruak ka hip lut kawk kawk bawk. Sangkima ka bulah ala ding emaw ka tih laiin Tukverh bulah pawn lam hawiin a lo ding leh hman daih tawh. Ka khuhna avanga ka mittui tla deuh phang chu ka kut hnunglamin ka hru a, ka kut lehlamin ka bag ka zena, ka zawn tak ka chemte ka zuk khawihfuh nghal chat. Ka mit a rawn vai leh cham chama, ngaihtuah buai miah loin chemte keng chungin ka pan phei a..

A rawn hawi let tur chiah a darah chemte tlum pawp khawpin ka vit nghal pawp. A rum nghal hrawiha, mak tih hmel lutukin min rawn en a. Ka thiltih zawh chiah chu rapthlak ti em em  Sangkima na tuar hmel chu ka en a, ka pai deuh nawk mai.Zawi zawiin ka rilru a rawn fim tial tiala,tu emaw thah tumin ka bei tih ka hriatchian takah chuan rapthlak inti lutukin ka rum chhuak nghal hawk thei hial mai!!

Min rawn en chungin adar a bana, then sawk chungin Chemte a phawia, chhuatah a rawn thehthlaa. Chemte lian tak a ni lo chungin Chhuat chang zeta a tla ri chu Bomb tluk zeta ring niin ka hre thung.  Chemte,thisen kai luai chu ka melh a, Sangkima ka en leha. A din ngaiin a la dinga, a kut lehlamin a dar a vuana. A mit thim khup mai chu ka en a, ka khur nghal dar dar mai. Ka u Phuba lak ka tumnaah hian tihtakzetin ka beia,mahse ka piantirh atanga tun thlengin midang thah tumin ka bei ang tih ka lo la ngaihtuah chhin ngai lo. Mangang zetin ka ban ka pharchhuak hliaia, tihngaihna hre loin ka thlakthla leh hnak ringawt.

‘I duhtawk em?” awihawm loh khawpin a ti dam thlup.

‘Ni lo,ka..Ka tum reng..’ka sawi zawm thei lo.

‘A pawi lo..Tikhan min rul let chiah animai’ ahma aia awihawm loh mah zawkin a nui zui suk.

‘Enteh…Aih, diktak chuan khatiang kha..’

Ka rin loh lutukin chhuatah bawkkhup zawngin a tlu thla nghal hnawk!!

🏵️🏵️🏵️🏵️🏵️🏵️🏵️🏵️🏵️🏵️🏵️🏵️

NOTE : Uluk tak khan min han click sak leh liam liam ula,ka Tarmit thar leina tur min tuakpui tihna anih kha aw. Hmelthaho..Tin,ka Edit lo lehpek...