ANNEM- 13

Chapter- 13

Ka hamhaih chhung a rei lo. Ka thuhniam ve nghal rawka. A luah ka khawiha

‘I harh em? I tha tiraw?” ka tinghala,min chhang loin a rum hawk. A rawn hawichhuaka,a hmai adang deuh lapa;Chau tihhriat zetin min rawn en a.

‘I tha em? Engtin nge i awm?” ka ti leh a. Min chhang lo. A lu ka mal chungah ka daha,a biang tawn tawnah ka vuana..Ka sawi leha,a rawn mengchhuak leh a.

‘Ka chau..A vawt bawk’ zawitein a ti sup.

‘Khumah hian ka dahchho ang che.  Chuan,tanpuitu tur ka zawng anga,Tlem talin ilo tang ve thei angem?” ka ti leh a. A mitin min chhanga.Thei leh thei loin tun thawh ka tuma,ka banah a vuana,keiin a kawngah ka kuah ve thung. Kan inlenhleih bawk si nen a harsa tih piahlam a ni.

Thlansa phat phat chungin ka dahkai thei ta hram. Hmanhmawh lutukin a Jacket hak ka phelhsaka,a bawkkhup zawngin ka awmtira, a T-shirt ka phelhsak leha. Mahse,a dara ka vihna atangin thisen tharlam leh lar zet a rawn chhuak tuam tuam ka hmuh rualin ka tawlhhnung deuh dawrh.Mahse, zam vanga phili buai hun a ni lo tih ka ngaihtuah chhuak nghal zawka. Ka Dressing table hnuaia First –aid Box la turin ka tlan vat.

A kak lai ka tihfai vek hnuah damdawi ka hnawih a,ka thiam ang angin ka tuam ve tawp. Ka khawih chhung zawngin vawikhatmah a tawng lo. Mithi ang maiin a mut ngaiin a mu zawi tawp ringawt.

A sirah ka thingthi a, ka ngaihtuahna buai lutuk tihfim tumin thawk ka la vang vang mai. Atir kha chuan tuemaw tal min puitu tur ka zawng ang ka ti a,mahse ka zawng ta lo. Hetianga a awm chhan hi sawifiah angaih dawn tlat avangin midang ka ko ngam ta lo hrim hrim. Mahse,hetianga  ka dah ringawt chuan Thil tha lo zawk a thleng thei reng tih ka hriaa,chumai bakah a kak thui lutuk lo nangin chemte atanga chhutin a thuk ve deuh maitheia.Tunah hian a thisen chhuak tawp rih mah se engchen nge  ka tihtawp lailawk ang ka hre hek lo. Damdawiinah hruai dawn ila keimahin ka hruai thei dawn loh tih ka chianga. Atira ka ngaihtuah ang khan tu emaw tal ka pun angai ang. Ka Pateate ka ngaihtuaha, mahse ani pawn tu nge anih leh engvang nge tih min zawt dawn chiang lutuk. A hming hrilh thei mah ila a awmdan erawh ka sawi ngam dawn lo chiang bal. Malsawma leh Ampuia ... Ka lu ka thing nawk,tumah mah ka duh lo ve ve. An zawhna min zawhtur erawh a in ang dawn lo tih ka chiang. Beidawng lutukin ka lu ka dawma,Sangkima bawkkhup zawnga mu chu ka en a,ka chawmawlh vek nimaiin ka hria.

Bawkkhup zawnga muttir reng ringawt dikin ka hre lo va, dimtein ka kuai leta, a dar na lam delh lo turin ka saisir tira, ka dah ang angin a awm mawl tawp.

Thil vawt deuh thlur ka khawihfuh rualin ka en vat. LALPA,thisen vek..Ka tawlh deuh dawrh thei.Engtin nge hetah thisen a lo awm daih? A dar awmna zawn nen a inmil der si lo…Muhil harh thut ang maiin ka che nghal thuta. Sangkima ka kuai let leha,a nak veilama inzaina hnu niawm tak chu a lo thi tuam tuam mai.

Ka ngaihtuahnaa lo lang hmasaber zawmin khum atangin ka zuangthla nghala,Kawngkhar lam ka pana.Inhnuaiah pheikhawk pawh bun loin ka tlan thla nghal a,Step a mal mala rap loin ka zuankan thla deuh titih.Thaw hlawp hlawpin Kawngka ka hawnga. Mahse, pawna chhuak loin min dangtu awm ang maiin ka tawp leh chawt thung.

Rang lutukin Kawngkhar ka pawt khar leha, inchung lamah ka tlanchho leha. Sangkima a mut dan ngaia lo la mu chu ka en zawk.Ka Phone ka zawng nghala,ka hmu mai lo. Ka bagah ka dah anih ka ringa, ka bag ka hai leha, ka hmu chuang lo. Khumah ka dah ka hre lo nangin khum lamah a lo awm tak mialin tiin ka pan pheia. Sangkima lu bulah a lo let bal mai. Ka chetbuai lai vel khan ka thlauh a ni ngei ang.

Lawmi number ka zawnga, ka phili lutuk vang aniang ka duh ang pawhin phone ka khawih hleithei lo. Ka call theih veleh ka beng bulah ka phone ka dahcho nghala.mahse,Ka rin loh lutukin Sangkima’n ka banrekah a rawn vuan thuta, insum hman loin ka rakchhuak thawt mai. Phawk lutukin ka en thlaa. A mitmeng dul raih maiah chuan na a tuar tih alanga,a chauh hmel ngawih ngawih bawk. Kei erawh ka lungphu rang lutuk Control tumin ka awm ngaiin ka awm mawl tawp thung.

‘Ti suh…’ a ti zawi sup.

‘Ti suh,ka Phone lo la rawh.Ka thianpa call la,a lo kal ang’ a ti leha, a sawi zawh rualin na tuar tihhriat takin a then leh sawka. Ka awmdan hrechhuak zawkin ka Phone ka off nghal vat.

‘Khawiah nge Phone chu?” ka ti a.

‘Ka Jacketah khan..’

A Jacket thuthlenga ka dah chu ka pan phei vat. A sawi ang ngeiin a ipteah a phone a lo awm a. Khum lamah ka kengpheia,a kutah ka hmehbela,a la ve mai bawk. Thutchhuah a tum chu ka pui nghal vata.A dar lam ai chuan a nak chu na a tihhmel zawk mah.Mahse, ka thaw ru huai thung. Ka vihna kha na lo chu a ni miah lo anga, mahse tlukpui khawp chu a ni lo maitheia. Diktak chuan hliam dang a nei tih ka hriat rualin ka thiltih kha ka inthiamchawp a ni mah zawk.

‘Be rawh,a lo kalna hmuh tur hrilh bawk la’ min rawn pek pahin a ti leh sup. Hnial buai loin a phone ka la ve nghal mai.

‘Aw,Boss’ Mipa aw hian a rawn ti damthlap. 

‘Hello..Anuni ka nia.Ih,englo ania. Sangkima hi a inhliama.Thisen a hloh nuala.Ih,Buaipui vak dan ka hre lo a’ ka ti nawi nak mai. Sangkima lam ka hawia,a lo maimitchhing leh hman tawh.

‘Lawk,khawiah nge tunah a awm?” damthlap bawkin a rawn ti leh a. A tawng danah chuan thil thleng tur hre lawk ang mai a ni.

‘Kan inah..I lo kal theih chuan ka lawm ngawt ang’ ka tihzawm leh a.

‘Ok,Ok,ka lo kal ang. In awmna lai lo sawi la aw..E,amah kha muhil lo turin ka duh a,a theih angem?’a rawn ti leh a. ‘Ka lo tum ang’ ka ti a; Kan awmna lai ka hrilha,a rawn hriat mai theih tur thu a sawia. A lo thlen huna min lo call leh tur thu a sawi bawk. A awki dam dap mai chuan ka hmuh hma hauhin min ti thlamuang sawng sawng thei hial mai!

Geyser ka on a. Ka theih ang angin Sangkima nak atanga thi rawn chhuak chu ka tifaia, ka be pah mawlh mawlha, ‘um’ tih bakin min chhang let lo. Mahse, a muhil lo thung. Thisen chhuahna lai chu ka tehkhin dan ber chuan inzaina la dam chiang lo a ang. Ka hmuh hnuhnun ber kha  tukin zingah a ni a, ka Roomah a lo thu a,kan inhnial bawka. Mahse, khatah khan na nei hmel a pu miah si lo. A chet danah pawh khan engmah khawr a awm hek lo. Vawiin hian engthil chiah nge thleng ang? A fapa a bo bakah amah hi midang nen an intibuai bawk tihna a ni mai angem? ka thaw halh mai. Zanina ka rooma a lo awm khan na nei hmel a put leh put loh ka ngaihtuaha, a pu lo. Nidang ang bawkin inringtawk takin a lo awm tih ka chiang.

Sangkima thianpa nena kan inbiak atanga minute 20 vel liam hnuah Sangkima Phoneah a rawn calla,ka pick vat. Kan Gate bulah a awm tih a rawn sawia.

A sawi ang ngeiin Gate bulah a lo dinga, Pa lian lutuk lo,tlema thau deuh lam a ni a. A hmel  a nelawm mai bakah alang thianghlim sar bawk.’Bsa ka nia’ nelawm takin a ti a. Ka hming ka hrilh ve a, ‘ka hria alawm’ a ti awlsam et. Mak ti ru zetin ka mengphar awk thung.Roomah kan inzui chho nghala, Sangkima inhliam dan engmah min zawt loa,ka chhungte awm loh pawh hre lawk ang maiin a awm bawka; kan ina a awm ngawt chu mak ti awm pawhin a awm hek lo. A awmdan chu tlem chuan mak ka ti deuh. Mahse, zawhna min zawt duah lo chuan minti thawveng deuh hawk thung.

Ka beisei phak bakin a rawn inkeng kim. Thisen a hloh nual ka tih vang khan a thawhna Hospitalah Thisen ava la kawi leh tih a sawia, ka bu liam satliah ringawt. Thisen a rawn ken chu a khai nghala. A buaipui vel danah chuan tun chauh lo pawh hi a buaipui fo tawh anih rinna ka nei ve tawp. Mahse, ka rilrua awm engmah sawichhuak loin,a mamawh a sawi apiang pe thei turin ka lo inring ve ran ringawt.

‘Thil pakhat ka ngen duh che..’ a ti a.. Tawng loin ka bu nghauh ringawt.

‘Hetah hian zanin a awm thei angem? tihian muhil vang vang thei se ka duha.Mahse, harsatna ineih chuan ka tilui lo che a’ inthlahrun hmel zetin a ti a.

‘Harsa lo e. Ka nu a zin lai ania,a awm thei ang’

‘Awle,anih chuan a lawmawm. Tihian muhil vang vang se,naktukah chuan a harh tha mai ang’ Sangkima en vang vang chungin a ti leha.

‘Ka lo ngaihtuaha, Damdawiin lamah dah a tha lo mi?”

‘Aih,angai lo.A nak hi a thuk lo va. A thuina a peh vang mai ania. A dar hi tlemin a thuk deuha,mahse hei pawh a hlauhthawnawm loh. A Bp hniam leh thisen hloh kha a chauhpui deuh a.A zia leh mai ang’ awlsam deuh takin a ti leh mai. A sana a en zauha,a dingchhuak nghal zat bawk.

‘A tlai mai dawn sia,ka kalsan ang che u.Harsatna engpawh a awm chuan min lo be dawn nia’ nelawm takin a ti leh a. Sangkima Fapa chungchang ka rilruah a lo lang thuta, zawh mai tumin ka ang hman ziaua,mahse tu nge anih ka hre ngai lo va,lo zawh ngawt chi niin ka hre leh lo a. Ka zawt ta lo.A kal hunah Ampuia ka zawt zawk mai ang chu.

Sofaah ka mu a, Light On chungin ka mu ngai lo va, mahse Sangkima  vangin zanin chu ka off ngam lo. Ka muhil thei angem ka hre lo..Sangkima lam ka va en a,Hahdam hmel takin a muhila;mahse achang chuan a inleta,a na lam a delh apiangin a zangthal lehnghal vat zela, a harh mai ka lo hlau thina,vanneihthlak takin aharh phah lo hlauh zel.

Ka Phone ka en hman veleh Lawmi msg ka hmu a,miss call a lo awm bawka. Mahse, thil pawimawh ni loin ka call kha a lo tlang hman a, chu chu min lo call back a lo ni a. Call tawh loin msgin ka be ta zawk. Ka hmetsual tiin ka hrilha, Emoji hmai sen tawk a rawn thawn let teuh.

‘Jump ila…’ ka va ti a, rang zetin ‘nia’ a rawn ti let nghala.Ka then sak thung.Mihring ka hriatah chuan a thinrim rei thei lo lawrlak. Mahse, a thin erawh chhe tak a ni thung. Ka rilruah Ampuia a lo lang leh zawka,min nghak turin ka ti leh riha.

‘An hmu tawh alawm. Dar 7 vel khan ania,amahin a lo haw tawp an ti.Han sawi tur vak pawh a hre lo a’ Ampuia tawng chu ka bengah a ri ring lutuk. Sangkima nena kan inhauh buai lai khan Dar 7 a pel daih tawh. Anih chuan Sangkima khan ka tih a ni lo tih a hre sa reng a,mahse min puh lui tlat tho si kha enge a awmzia nita ang? Min thah mai pawh hreh lo khawpin a che a, kei lahin ka damchhunga ka inchhir reng tawhna tur thil ka tih phah bawk. Hreptaka…Ka ngaihtuah leta, a lo thlen hnuah a chhungte call a dawn pawh ka la hre lo. A Phone a silent loh miau avangin lo call se chuan ka hria ang.Anih chuan a lo kal hmain a fapa chu inah a awm hman vek tawh tihna a ni..Khum lamah ke lawngin ka kal pheia,a zangthal zawnga a mu chu ka en a, eng hi nge a duh chiah ni ang le???

Lawmi’n min rawn call leha, inkhelh kan tum tih ka ngaihtuahchhuak leh chiah. Ka lut fel deuh chiah tihin Ampuia a rawn lut veleh bawka. Hunawlah chuan kan khel ho ve deuh ziaha,hna thulh erawh chuan tuman kan khel lo vek thung.Ka rilru kaptu a awm vang nge ka hre lo,ka khel hleithei lo. Ka luh ngun leh ka thi ngun animai. Mahse, an la tui laklawh si avangin tui lo zet chungin ka khel ve ta zel tho.

Kan khelh laklawh laiin Malsawma’n min rawn calla, ka ner nak. A hma tawh lem lo bawka, ka pick lo. Ka muhil tawh tihna animai. Bakah,tun ang huna rawn call ngai khawpa pawimawh a awm ka ring lo. ‘Mu tawh ang u’ an tih meuh chuan zinglam dar 3 a ri tawh. Tui vak lo chunga khel ka ni nangin ka rilru a lapenga,a tha viau tho mai.

 Muthilh tumin ka mit ka chhing vang vanga, mahse ka harh tulh tulh thung. Muthilh ka tum buai peih ta lo law law zawk. Thil eng eng emaw ka ngaihtuah kuala, Mahse, a tawpah Sangkima ah bawk ka kual lut lehzel. Thil thlen dan ka hriat chin chin ka ngaihtuaha,a fapa haw leh ringawt te, kan pahniha kan inbiakna te…Hmmmppp…Engmah ka ngaihtuah chhuak hrep lo.

Inchung melh kar chungin Bsa kha ka ngaihtuah leta, Sangkima enge anih ka hre lo. A thian hnai nge a Cousin anih ka hre hek lo. Doctor a mamawh apianga a koh thin pawh a ni mahna le. A awmdan inringtawk tak kha ka ngaihtuah a.Sangkima naka hliam kha a lo hresa maitheia, adara ka vihna lehzel pawh min zawt lo hrim hrim kha amak ka la ti cheu mai. Hetiang hian an inbuaipui ngun tawh lutuka,ngaiah a nei zawk pawh a ni thei tho mai.

Door Bell riah thawhphan pawh nei loin ka harha. Ka thuchhuak nghal vat. Khum lam ka hawi pheia, Sangkima ala mu tih ka va hmu a, ka thaw deuh huai mai. Ka tho a,mahse nizan lama ka mut tlem lutuk vang nge ka hre lo,ka lu a haia,ka pai deuh data. Che loin ka ding leh ren rawn phawt.

‘I nuin a rawn phone che a, I phone ila thei lo a’ Patea’n kawngkhar ka hawn veleh min lo ti a.

‘Ka hre lo reng reng.Door Bell riah ka harh chauh,phone pawh chu ka en chuang lo va’ ka ti niah niah. Inchhungah a lo lut ang tih ka hlau nghal ngawt pek. Vanneihthlak lutukin lut loin Verandaah a thu ta hlauh.Ka thaw huai maia, Sangkima a lo harh thut anih pawhin inhnuai lamah at so turin a lo chhuk lo turah ka ngaia.Chu lamah chuan ka hlauthawng hran lo.

‘I la tho lo anih ka ring renga, I nu te lah chu rinai takin an awmrei hmel sia. Tunlai hrileng vel vang hian  inngaihtuah ana tan riaua.I piin a sawi a sawi maia,tihtheih tak tak awm mang bawk si lo’ a ti leh a.

‘Nia,mahse kartawp lamah chuan an lo haw hman tawh maitheia. Flight ticket lam hi a buaithlak viau angem ka hre loa’ ka ti ve a. Veranda hungna ka bawha.  Kawta ka pi te ui tlan kual puat puat chu ka thlir pah bawk.

‘Buaithlak maithei a ni. Hripui vang hian phai lama awm hi lo haw tum an tam chuan thil a sukuk viau ang.Vawiinah Tesen-i bia la. I nu te awmdan tur nen achian theih chuan Ticket chu en a tha ang’ a ti leh a. Tesen-i hi kan chhungte hla deuh tawh a ni a, kan chhungkua leh Pate ate chhungkua pawh,phailama kan zin apianga Ticket lama buaina kan neih chuan kan pun ber a ni a. Tunah pawh Ticket chan a harsa dawn anih chuan ama kuta dah mai a tha zawk ang.

‘Um,ka nu chu ka be phawt anga’ ka ti a.

‘Be rawh. Hriatchian vat a tul ania’ a ti leh a. A tho a, engmah sawi leh tawh loin an in lamah a phei a. A kal hnuah pawnah reilote ka ding leh riha,a hnuah ka lut ta chauh.

Room kawngkhar dimtein ka hawnga. Curtain engmah ka la hlim hman loa,mahse light ka on avangin a thim lem lo. Saisir zawngin Sangkima a lo mu a, ka kal phei tham thama,khum bulah ka dinga. Tui zetin ala muhil a,a hahdam hmel lutuk chuan a hmel landan a tidanglam titih.

Light ka Off a, ka Phone nen ka chhuak leha, dimtein kawngkhar ka khara. Inhnuai lamah ka chhuk thla leha,inhnuai atangin ka nu ka be ta chauh.

‘I tho chauh elaw? Thawh hma ve tur che alawm’ a rawn ti nghal bawrh bawrh.

‘Ka lu ana alawm,bakah tihtur hmanhmawhthlak pawh a awm hleinem’ ka ti nghauh. Ka lu ana lo va, zanah Sangkima vangin ka muhil mang lo a, tunah pawh ka Roomah ala mu tih hria se chuan a rawn thlawk haw nghal duh ngei ang. Mahse, hei hi chu ka thuruk a ni a, ani emaw midang pawhin an hriat ka duh ngai lo ang tih ka chiang.

‘Thawh hma hrim hrim hi a tha. Vawiinah Malsawma nen inchhuak dawn em ni?” a rawn tihzawm leha. Nizana Malsawma nen chhuah kan tum kha ka hrechhuak zawk.

‘Nizanah chuan a sawia,Mahse, vawiin chu ka chhuah peih pawh ka ring lo’

‘Vawiinah inva en anga, siam dan tur pawh a hriat ruak ang chu ka ti asin. Damdawi ei la,tlai lamah tal va kal rawh’ a rawn ti leh lawng lawng.

‘Nia,ka lo tum ang’ ka ti nghat.Hnial chiam awmzia a awm lo tih ka hriaa,ka kal mai khan a fel animai.

‘Ka pi chu engtin nge nita?” ka ti leh a.

‘Vawiinah test pakhat kan ti leh anga, chumi result azir chuan an zai ang. Zai zawhah Problem a awm loh chuan karleh tawp lamah emaw a karleh tirah chuan kan lo haw ang’ a rawn ti a. Ka thaw deuh huai mai. Ka pi,tar ve tawh tak mai kha test eng eng emaw tiin an hruai kual sek dawn chu ania.

‘Anih chuan tihchian theih veleh Ticket en angaih ka ring. Hrileng vang khan lo haw tum an awm nual maitheia’ ka ti a.

‘Engmah la hriatchian theih hek loh mawle,mahse karleh tawp leh a lehpek tir lam chu beisei phawt ang. Tesen-i hi chu biak lawk hrim hrim atha anga. Lo be lawk nghe nghe rawh’ a rawn ti leh duah.

‘Aw, ka lo bia ang.Chuan, hunawl ineih leh ka pi bia la.Angaihtuah che u a,Patea’n a sawi reng mai a ti ania’ ka ti leha.

‘Nichinah lawkah ka bia alawm. Ngaihtuah ngai kan ni lo,inrin ai khan kan la thlamuang lutuk’ a ti awlsam leh mai.

Tuilum ka On a, Sangkima harh hunah a ei theih takin tiin soup ka siam paha. Ka siam laiin ka rilruah Malsawma a lo lang thut.Nizana min lo call kha ka pick lo va, pawimawh a awm lo chu a ni chek anga.

Soup ka off hnuah Malsawma ka biaa, Dawr tur en chungchang ka zawta, ‘Dar 1 velah ka rawn sawm ang che. I nu khan ilu a nuam lo a ti a’ a rawn ti a, thinrim ru zetin ka ner nghek.

‘Na lutuk pawh a ni lo,Damdawi ka ei anga. Ka chhuak ang,Dar 1 velah chuan ka lo kal mai dawnnia.A hmun ka hre tho va’ thinrim lo awm takin tha takin ka ti a. Diktak chuan ama chungah aiin ka nu chungah ka thinrim zawk fe. Kan inbe zo chauha,engkim lo va hrilh nghal kha ka haw tlat. Mahse, ka nu anih tlat avangin midang bulah ka sawichhe thiang lo tih erawh ka hre kara. Midangin ka nu fel lohna lai sawise ka haw dawn lutuk tih pawh ka chiang reng.

‘A tha alawm. Nizan khan ka lo call che a’

‘Nia,ka lo muhil tawha. A tlai tawh bawk sia,a va pawimawh awm ve’

‘Pawimawh tehchiam lo.Sangkima fapa an hmuh tawh thu lo hrilh che ka tuma’ ka hmui ka peta, engvangin nge a lo ngaihven chiam le? Min hrilh zel kher pawh a tulna enge awm ni a?

‘Chutia law? Ava lawmawm ve’ ka ngaihtuahna nena inmil lo lutukin ka ti halh.

‘Nia,a lawmawm.Anih chuan kan inhmu dawn nia’

‘Ok..Bye’

Room kawngkhar ka hawn rualin khum lam ka en a,Sangkima a awm lo. Ang pham chungin Khum hnawk deuh niaih chu ka melh reng ringawt. Ka rilruah ‘ angaite bawkin’ tih zawitein a rawn ri a. Awmze nei lo zetin ka nuichhuak nghal hak mai.

‘Enge nuihzahthlak awm a?” Sangkima aw ka hriat rualin Bathroom lam ka melh nghal vata,Bathroom kawngka biang nghengin a lo ding reng tawh. Khum ruak ringawt ka en avangin Bathroom lam reng reng ka ngaihtuahnaah alang pha tawh lo. Ka awmdan mawl hmel lutuk chu inhrechhuak thutin ka insiamtha vat.

‘I kal tawh emaw ka tia’ ka ti chhuak nghat.

‘Kal ka tum rih lo..’ a ti hluka.A rawn kal pheia,a nak leh adar hliam lai belna, nizana  Bsa-an Bandage chhah tawk athlep Plaster-in char hnah leh kha. A vun uk kharh maiah chuan alang sar lam mah a ni.Khumah alawn leha, lukham nghengin thu mu titihin a awm a. Nizan nen kha chuan a hmel pawh hmuh a inhahdam hleih ta.

‘I zia deuh em?” ka ti nghauh.

‘Um,chuan ka lawm’ a awki hriam hruih maiah chuan lawm tak tak nge tiel zawk engmah ahriat theih loh.

‘Soup ka siama,I ei duh chuan…?” ka ti leh a.

‘Aih,duh rih lo..’ a ti tawi leh tuk.

‘Ok..Tu emaw tal biak tur i nei em? Ka sawi hreh viau nangin chhuah ka ngaia.A awmzia chu hetah ilo awm chuan..’ ka ngawi leh daih.

‘Ka dar tuamna hi a phelha,min rawn tihthatsak lawk thei em?” ka thilsawi nena inmil lo zetin a ti sup.  Ka hmui ka peta, diktak chuan ka thiltih rapthlak tak kha hmuh nawn leh ka chak lo.Mahse, ka bu nghata, ka pan phei ta zawk.

A dar tuamna tlema kau deuh chu ka en a, ka Tibet leh mai dawna,thisen lo hnam deuh chu ka hmu a. Bandage dangin ka thlaksak ta zawk.

‘A zo e’ ka ti sap. Ka tho zui nghala,mahse ka kalsawn tur chiah ka ban rekah a rawn vuana,min pawt leta,amah delh titihin ka tlu thlaa,a nak na lai tihfuh hlau bawk siin ka bawh deuh rawk rawk mai.

Ka inbengkanga, khumah min pawt kaia, a awmah ka lu a nembet leh nghal hmak. A lungphu ri dat dat ka hre theia,thawmhnaw a inbel bawk si lo nen a taksa lumna-in min ur ham ham bawk.

‘Nizana ka chetdan vang khan pawi ka ti’ a ti sup. Chhan maid an tur hre loin ka awm ngaiin ka awm a,ka insangmar teuh ringawt.

‘Min enteh’ a ti leh sup.

Muangchangin ka hawichhuaka, a mitmeng dum fiah leh tak zetah chuan ka en a, ka khur ru dar dar mai.

‘Ka harh veleh ka bulah ilo awm loh hlauin nizan khan ka mumangah pawh ka kuah reng che a.Tunah hian ka mumang ni loin atak ini tih ka hria..Mahse, I bo leh maitheia’  Dimtein ka hmuiah a rawn khawiha,a kutzungpuiin ka hmui hnuai lam a rawn tuaia,awmdan tur hre loin ka mit ka chhing ta ngawt.

🏵️🏵️🏵️🏵️🏵️🏵️🏵️🏵️🏵️🏵️🏵️🏵️

NOTE- Mood lo nasa PARIAT..Hnathawh paha type ruk zeuh zeuh ania,zanin episode chu zankhat leh zing lamah a zo vek. Chaweitui vek u,Eitur ka la siam dawn chauh.