ANNEM - 14

Chapter- 14

A hmui chhah deuh tap leh hnawng chapin ka hmui a rawn si a, awmdan tur hre loin ka dawh mawl tawp ringawt.Dimtein a rawn nawr leha,ka hmui hnuailamzei lutukin a liak leh dun duna,ka thaw a tawp mai dawnin ka hria.

Ka bekah a rawn dawma,ka hmui a rawn nawr kau zui leh zat.A lei a rawn rawlh luta, zei lutukin a chet kual tir leha,ka fawp let ve a.Ka zei dawn lo lutuk tih ka hai lo,mahse awm mai mai ka thei bik lo..

Thawh hlawp hlawin kan in en a,engmah sawi loin kan nuichhuak dun hawk mai. Ka sam karah a kut a rawn rawlha,a chalin ka chal a rawn tisia,engmah sawi loin ka kuah leta,a lungphu nghawr dat dat chu ka ngaithlaa,tawng angai lo.Kan chhungril ve ve sawi miah loin kan inhrethiam tawn vek tih ka chiang lutuk.

Dar 1rik hma hretin Malsawma nena kan inhmuhna tur hmun ka thlenga, min lo nghak reng tawh. Dawr chhung kan enkuala,a zau tha hek hawk viau. Chhuar siam dan tur vel kan sawi duna,a duhdan leh athat a rin dan a sawia,a kawk kual dun duna,ka bu liam vel mai mai. Diktak chuan ina min nghak rengtu Sangkima bakin ka rilru a luah lo hrim hrim.

‘Min kalh hnan la,ilo let leh hma chuan ka chhuak lo vang’ min kuah vang vang chunga atih kha ka bengah a ri nawn tlut tlut a, nizan lama kan pahniha kan awmdan kha kan sawichhuak nawn lo hrim hrim. Kan boruak nuam leh dam raih kha tihchhiat kan hlau ve ve tih ka hai lo.

‘Khawnge i awm daih le?” ti hmuk chungin Malsawma ka hmaah tak a rawn dinga, ka melh chho nghal vat.A hmel tur deuh takah chuan a lungawi vak lo tih alang thei bawk.

‘Heta hi..Enge?” ka nui lui sak.

‘I nawm loh viau chuan nidangah pawh kan sawi thei a’

‘Aih,ka tha..Sawi rawh,ka ngaithla alawm’ ka ti leh vat.

‘A rei lovang,I rilru lo pe hram la..’a ti leh hmuk. Vawiin chu kan inhmuh tirh phat atangin a Modd a fuh vak lo anih ka ring,a vin chiam chiam chuang lo nangin a hmel a cool a, inngaihtuah muk hmel a pu bawk. Ka ngai thutak tehchiam chuang lo,a mimalah buaina a nei pawh a ni ve ang chu.

Darkar khat vel lai kan awma,ka nu a be pah reng bawk. Ka nu lahin a lo haw huna tih atana dah mai awm tak kha karthar atanga tan a duh chung chunga, a duhtawh naah chuan engmah anghak khawtlai ngai lo tih ka hriatchian lutuk avangin mak ka ti chuang lo.Mahse, he dawr tur hi chu an puitlin ta anih pawhin telve lo turin ka rilru ka siamfel sa vek tawh.

‘I haw tlang dawn nge Dawr lamah i kal leh dawn?” a ti a.

‘Dawrah ka kal ang,chawhma lam kha ka chhuak ta miah lo va. Khawi lamah nge ikal leh dawn?” ka ti ve a. Ka helmet kilhna ka kilh mai theih loh avangin kilh tumin ka buaipuia.

‘Vawiin chu ka free,mahse karthar lam chu Siteah ka kal lawk angaih ka ringa,I nu hi a hmanhmawh bawk si nen ka lo haw hunah timai ila a that ka ring’ a ti duah.

‘Lo bia la,kei aiin i be thei zawk ang’ ka nui a. Ka helmet kilhna pelh zel chu thinrim zetin ka pawt deuh sawk.

‘Khawi ka lo ti ang,thinchhe thei reuh lutuk mai’nui chungin a ti a. Kan inhmuh tirh lama a mood fuh lo hmel kha a awm leh tawh lo. Ka chhan hmain a rawn bana,a tifuh lawk bik lo. Kan nui dun leh riha,phelh leh dawnin engtin emaw a inbat laklawh tlat tawh bawk si.

‘Adik tawh e’ a ti a. Ka khawiha,a inbat dik ta thlap.

‘Kelsa kha Curry a awm tiraw?” a ti a. Ka bu nghauh.

‘Anih chuan ka lo phei teh ang,ka pain a eichak deuh aniang.Zingah a sawia,ka nu lahin arim angaithei lo va, siam buai chiam ai chuan siamsa lak mai a awlsam’ a ti leh a. Dawr kan hawn tirh atangin kan thilsiam zawng zawngah chuan kelsa kan siam hi kan larpui lawrlak.

‘Nia,lo kal rawh’ nui chungin ka ti ve mai.Mahse, ka rilruah erawh chuan reilote dawra kala,Ina letnghal tum ka nih avangin lo kal a tum chu ka ngei lehpek tawh.

‘I rualin ka lo kal ang. Vawiin chu ka inkhalhchhuak peih ngang loa,Taxi-in ka kala’ a ti leha.

‘Anih chuan khalh rawh,mahni aia lian phurh chu a ninawm’

‘Aih,I helmet ka khum tawk lo vang’ a sawi zawh rualin ka nui nghal hak mai,a nui ve bawk. Ka u damlaiin ka Scooty-in chhuah an tuma,ka helmet a khum tawk lo a. Ta tang khan ka u hian fiamnan teh a hmang thina,kan nuihpui nasa thin.

Dawr lam panin kan inphur pheia, Traffic Jamah kan in line phei a,hman deuh kha chuan Saturday hi chuan tlemin a thawl deuh thin kha ania;Motor intlanchhawk kan tih hnu hi chuan Saturday hi vai tlan a ni taa,a tawt nileng hi a ni tawp zel.

Hotel regency bulah chet pawh che hlei theiloin kan ding thup. A khawi lam mah mah tlan thei kan awm lo. Two Wheeler khalhtu hmanhmawhfal lutuk rawn inzep leh khanglang vang a ni pakhat bawk.

‘A hneawm e’ ka ti satliah.

‘Dik chiah..Two Wheeler ho hi inni lehzual ania’ nui chungin a ti a.

‘Nang pawh bike i khalh chang chuan ini ve awm tho em mai. Mipa hoin inching zual’ ka ti leh ve zat.Min chhang loin a nui huk huk ringawt.

‘Tu nge a?” Malsawma’n rawn kun hnaih pahin a rawn ti a.

‘Tu?”  ka ti deuh ha mai.

‘Motor atanga rawn thlir reng tu che khu mawle’a ti leh a.

Kan Din loh dan zawnga Motor inline chu ka zuk en a. A hnung seatah nizana Sangkima rawn buaipuitu Doctor,Bsa kha a lo thu reng chu niin. Ka zuk hmuh veleh a ban a rawn phar zauha,n nelawm takin a nui var var bawk; ka vai ve zauha,ka nui ve sang mai. Vawikhat chauh kan la inhmu a,mahse kan inhmuh dan kha a danglam deuh vang aniang kan inhre zui nghal chat.

‘Ka hriat hnu a ang a. Tu nge?” Malsawma’n a rawn ti leh a. Ka duh aiin a rawn kun hnai mah mah zel a,tunah phei chuan Bsa’n min thlir reng tih ka hriaa,ka lo phur kher kher chu ka inchhir ta viau. Huiz,engvangin nge maw Sangkima bialnu ang hrima a hmelhriatte mitmei ka ven tak hial chu le??

‘Ka hmelhriat anih khu.Bsa “ ka ti nghat.’ Ka ti nghat.Whistle a rawn ri tuar tuara, thlanglam ading ho an tawlh nghala, ka zuk en leh khera, rawn hawi let chungin a ban a rawn phar leh zauha. Ka nui ringawt..Vanneihthlak takin keini pawh kan tlanthei ve ta mai bawk.

Dawr kan thlen hnuah a thil hawn tur ka siamtira, nidang ang bawkin kan nula te an phili lehpek.

‘Sangkima hi engtia tihzui nge i tum?” a tithut. Ka thingpui inlai ka hak teuh ngang mai.

‘Engtai tihzui maw?” pangngai thei ang berin ka ti liam puat.

‘I u chungchang velah khan i duhtawk mai a ang ka lo tia’

‘A telve ngei tih fiahna a vang a.Diktak chuan Becky pawh khan a sawi thei tlat loa’ ka ti sap.

‘Um,anih chuan i bansan mai dawn tihna mi?” a ti leh a.

‘Ka hre lo’ ka ti leh tawp.

‘Ka hrethiam che. Dan hmanga hmalak dawn pawhin finfiahna tha tawk kan mamawh a,mi a anni lo va, engmah an hnutchhiah ka ring vak lo. Mahse, ka lo try ve tawh dawn mi?” thutak zetin a ti leh a. Chhang mai loin ka hmui ka peta. Ka u chungchang ka hriattirha ka tumna leh tuna ka khawsak dan hi chu a inpersan lutuk,lei leh van ang mai a ni tawh.Mahse, bansan lam erawh ka la ngaihtuah miah lo thung.

‘Engtin nge tih i tum?” ka ti leh sap.

‘Ka ngaihtuah mek,I phalna la hmasa loa tih ka duh lo a. Rem iti anih chuan tihdan tur chu ka ngaihtuah tawh’ mahni inringtawk zetin a ti leh a. Ka thaw hak mai; ka mitthlaah Sangkima hmel a lo langa, Malsawma nen hian eizawnna hrang hlak anni a, an mizia erawh a in ang lek lek.An tihtawh lamah chuan theihtawp chhuah chi leh luhlul em em anni ve ve a. Keiin ka tihbuai na aia nasa fein a tibuai thei ang tih ka chiang. Mahse, tinge? Ka u a thianpa anih vang nge thildang a awm?  

‘Thil ka zawt duh che’

‘Um,sawi la..’

‘Ti nge Sangkima hi beih i duh?’

‘I hre lo maw?”  a ti fan ruih.Tawng loin ka bu nghauha,ka mitah tak a en a, mitmu buang thak,fin hmel zet chu ka melh let ve ran bawk.

‘I u kha ka thian niloin ka unaupa a ni a, achhungte chu ka chhungte anni a,ka chhungte pawh achhungte. A boral danah khan dik lo a awm anih chuan hriatchhuah hi ka mawhphurhna a ni a, amah an tih ang chiaha tihlet ve pawh ka bat tlat a ni.Amah pawh khan keima chunga thleng nise a ti ve tho bawk ang.Mahse, Ka duhdana chet pawp pawp erawh ka tum lo. Ka sawi tawh ang khan i remtihna ka nghak’ a ti nghet charh. Sawi leh mai tur hre loin ka kut ka elh nauh nauha, Malsawma leh ka u inzawmna zawng zawng hrechiangtu ka nih tlat avangin a thilsawi kha hnialna lai tur ka hmu lo hrim hrim.

‘Remti hram la ka duh,nangmah a i beih ai chuan ka tangkai viau lo anih pawhin pahnih kan nih chuan kan chak zawk ang’ ati leh supa.A awah chuan ngenna alang thei bawk.

‘Ka…Ka hrethiam rih lo,ka lo ngaihtuah ang.Diktak chuan kan chhungkaw buainaa midang hnuhluh ka duh lo’ inringtawk lo zetin ka ti a. Ka chhungril erawh chuan chiang takin ka hlauhthawn chhan a hria. Sangkima hi Malsawma nen an inhmachhawn anih chuan kei ang mai mai a ni dawn lo chianga,Sangkima tan ka hlauthawng lo thei lo. Hmmm….Mi mak tak zawng ka lo ni e.

‘Um,ka hrethiam che. Mahse, lo ngaihtuah tha leh la. Chan che ka duh miah lo ania’ a nui zui suk.

‘Chan maw? Engtizawngin maw?” ka tum aiin ka aw achang lam hret. A ta ang hrima min sawi chu ka duh bau lo.

‘I u a awm loh hnua a thisen zawmpui, ka neihchhun liau liau inih vangin’ a ti leh a.  Ka thaw halha,za miah loin ka nui lui sak bawk. Hetianga ngaihbel theih lek lek,hnial ngaihna awm leh miah si lo hian a tawng leh zauh thina,khak fawk tum pawhin tihngaihna avang leh tlat thin.

‘Ampuia nen chuan intha leh tawh em?” amah bawkin a ti leh daih. A thusawi ka man lo thelha,mahse nizan khan chhuanlamah ka hmang ngawt tih ka hrechhuak lehnghal vat.

‘Tha nimai…’ ka ti tawitak.

‘A that chu..A fel hmel khawpin ka hria’ a ti leh a.

‘Nia,a fel ve reng’ ka ti leh mai.

A thil hawntur an siam zawh hnuah an inah ka thlah kual leha, an ina lut kawi turin min sawm nangin ka hnial thung. Inah Sangkima a awm a,a lo na lehzual palh thei renga. Diktak chuan ka rilru a hmanhmawh zek zek tawh zawk.

 In ka thlen veleh ka beisei loh deuhin ka Pi a rawn lut ve nghala, ka rilru nena inmil lo em emin a titi siam siama,ka nu te angaihtuah thu a sawi tamber.Thingpui ka lum saka, a in zawh hnuah pawh kal mai loin inchunga thlai chin tur vel chungchang a sawi zui liam.

Ka pi kal veleh kawngkhar chhunglamah ka kalha,hmanhmawh fein inchung lamah ka tlanchho a, Room kawngkhar ka kik nghal dat dat. Mahse, chhanna a awm lo. Ka kik nawn leha, a reh vang vang tho. A muhil anih ringin dimtein kawngkhar ka nem hawnga, mahse khum lo ruak hiau chu ka hmuh takah chuan ka ding khawng nghal lah mai.

Tukin ang bawk kha anih leh ringin Bathroom lam ka melh vata, pawn lam atangin a lo in lock vek. Khum inthlep fel than mai chu ka pan pheia,mutna hnuhma takngial pawh a awm lo.

Khumah ka thu thla hnawka,  tunah chuan hairual lohin tum dang ang bawk khan alo chhuak leh hman tawh tih inhrilh nawn ka ngai lo. Thawklehkhatah ka rilruah hlauhthawnna a rawn lut thut,’ I lo haw hma chuan ka lo kal lo vang’ atih kha ka bengah a rawn ri nawn leh nghal zat bawk.

Ka Phone ka phawrha,ka call nghala. A ring reng,mahse a pick thei lo. Ka tinawn leha,a pick chuang lo. Hmanhmawh lutukin a last seen ka checka,minute kha chauh ala liam.Chuti anih chuan ka call hma chiah khan phone ala khawih tihna.. ‘Khawiah nge i awm?” tih ka thawna,a rawn Online zawka,mahse ka msg a en lo. A offline lehnghal daih.

Thinrim zetin ka phone ka thehthlaa, engmah sawi loin a kal leh ngawt chu ka ngaithiam bau lo. A awmdan hi inngaihpawimawh lohna lian tak a ni. Ka inngaihtuaha,min chhaih kual mai mai niin ka hre ta thut. Mahse, kan pahniha kan inhriatsak tawn,kan chhungrila induhtawnna hi thil mai mai ni chuan ka hre thei lawi si lo.A duh hunah a lo kala,a duh hunah a chhuak leh daih a. Khawi atangin nge a lo kal ka hriat angai.Anih loh chuan a dik dawn miah lo.

Inhnuaiah ka chhuk thlaa, ka pa Libraryah ka lut tlang nghala, tukverh leh Bar ka check leh vek. Angai ang bawkin khawih chet mai mai theih a ni lo. Ventilation ka en chho a, chu pawh Bar a awm tho. Bakah,heta tanga lutchhuak tur chuan bar awm lo mah se a zim lutuk mah mah.A ni thei lo tawp ang.

Inhnuai lam Bathroomah ka lut leha, Tukverh tereuhte,sei zet zawt bak a awm lo. Luh ngaihna a awm lo hrim hrim. Room pakhat ka hrechhuak thut,hmanhmawh zetin ka pan phei nghala,ka hawnga..A chhung a lo inrem fel thlap. Store room a ni a, luhna chhan tur ka nei ngai lo a,ka lut ngai lo tluk a ni. Ka hawi kuala,Ventilation a awma, Bar a awm leh tho. Ka lawn kanga, ka sawi chhina,a nghet vek.Hetah pawh luhna tur a awm chuang lo cheu. Beidawng ru zetin ka chhuaka, Ka nu te Room leh Dingi Room ka check leh vek hnuah pawh luh mai theihna tur chi engmah ka hmu  chuang lo. Huizz,amah a inti te thei anih ngawt loh chuan a theih tawh loh. Mahse, mihring ania, engvangmahin a inti te thei dawn der si lo.

Thil ei ka peih bawk si lo,haw ka hmanhmawh chhan ber Sangkima lah a lo awm leh tawh bawk si lo. Ka pi te in lamah ka phei ta ngawt. Ka Patea leh a fanu upa ber an lo awm lo va, abak zawng chu an awm thung.

‘I van lo kal khat em em” Patea fanu teberin min lo ti var.

‘Nangpawh..Tak takin zanah ka muhil thei lo thina,zingah ka mu vak zela.Chhunah lah ka chhuak leh daih zel bawk sia,lo kalna hun a awm lo alawm’ nui chungin ka ti a.

‘Ni ve tho mai. Engtik nge Anu Mami chu alo haw dawna?” a ti leh a.

‘Ala hriat theih loh..Karleh tawp lam emaw lehpek tir lam pawh nimaithei’

‘Tunlai chu hrileng vel vang hian phai lam an chiai ve deuh aniang,ka thiante pawh PG an khar dawna,lo haw tur an awm nual mai’ a ti leh a.

‘E..Vawiin khan  i thianpa a lo kal tak asin’ amah bawkin a ti leh a.

‘Tu ka thianpa?” ka ti deuh hu. Ampuia tukinah Apa nen an chhungte thihna lamah an zinchhuaka,Mondayah a lo haw dawn chauha,Malsawma ti dawn ila a ni thei bawk si lo.

‘Ka hre lo..Palian deuh ania,ahming pawh ka zawt lo reng reng’ a ti awlsam leh mai.

‘Tu nge mawni le? Tumah lo kal tum sawi lawk an awm si lova’ ka ti niah niah.

‘Lala-i nen kawta kan awm laiin ka hmu thuta,a lo kal tih pawh ka hre lo va. Ih,a chhe lo rap mai. Tlemin a hang deuha,a mitmeng kha a bawn tawp..A dress pawh ka enchiang rap mai. Jacket dum leh T-shirt hringduk…’ a sawi zawm mawlh mawlh nangin ka ngaihven zui tawh lo. Tu nge anih ka hrechiang lutuk ringawt.

‘Dar engzat velah nge?” a tawng laklawh laiin ka ti a.

‘Naa,ka hre lo. Dar 2 emaw vel aniang’ a titha ve mai. Ka thaw ru hak,Sangkima’n kan inchhuahsan a tum a,kawta Mite-i lo awm a hmuh takah chuan a rinhlelh loh nan ka awm leh awm loh a zawt tih ka man thiam nghal vek. Mite-in a hresual anih loh chuan ka chhuah atanga darkar khat velah achhuak ve nghal tihna ania. Ka ngaihtuah leta, Zarkawt pheia Bsa te nen kan inhmuh hunk ha dar 2 leh achanve vel bawr a ni maithei. Mahse, Motorah khan Sangkima ka hmuh awm ka hre miah lo..

Tv ka en a, entur ber hre loin ka hmetkual sek ringawt.Khua a thim tawha, ka ril atam loh avangin chaw pawh ka ei ta lo. Ka ngaihtuahna lah a buai vel nuaiha,atirah Sangkima chungah thil tha lo a thleng anih ka ringa;mahse a hnua Mite-i sawi hmang khan ama thu ngeia chhuak a ni tih alang leh a..Huizz, he mihring hian min ti a zo vek tawh. Ka u phatsantu ni a ka inhriatna phei hi chu ngaihtuah loh law law ka duh zawk.

Ka Phone a ri a, hmanhmawh lo zetin lakanga,ka en a; Ka nu…

‘Aw..’ Hello pawh ka ti khawmawi lem lo.

‘I pi chu naktukah an zai dawn anih chu. Karthar kha Malsawma azin dawn hmela,a lo haw hunah kan tan mai dawn nia’ a rawn ti zung zung.

‘A tha alawm..Dawr pawh a hmunhma a that hmel khawp kha’ phur lo zetin ka ti nghat.

‘Tha e le..A phurawm dawn lutuk; Dingi hian a rawn bia che em?” a rawn ti leh daih.

‘Be nang..’

‘He nu hilhel hi chu..Lo let a tum rih lo aniang. A haw leh khat tawh khawp ang,sawi angin awm ngai reng reng lo mai’ a ti leh chiam.

‘A ho em mai. An buai aniang chu,hetah tihtur a awm vak loh hi a’ ka ti leh hlak.

‘Tihtur a awm emaw awm lo emaw a buaithlak alawm. A sawi anga a awm thin lo lai hi ania ka ngei. A,ka sawi theihnghilh. Mondayah i nu Zothani hnenah thlai chi lo va la ang che. I pi lo pe la,inchungah khan aching duha.Theihnghilh lo la’ a ti leh mawlh mawlh.

Ka mutui lai tihahrtu awm ang maiin ka harh zawk,ka mengchhuak nghala. Sangkima’n  indawmkang chungin min lo thlir reng tawh. Bang lamah ka tawlh phei nghal vat.

Bang nghengin ka thuchhuak nghala,ka chevel chu min tibuai miah loin Sangkima’n min en vung vung ringawt.

‘Chhuak rawh..’

‘Aih..’ a mu thla zui nghal daih.

‘Enteh,I awmdan hi inzah lohna liantak a ni..I duh hunah ilo kala,I duh hunah i chhuak leha..Ka phone i pick duh lo va, Online reng siin msg i en duh bawk lo va’ ka tawngdan chu pasalte chunga thinrim ang mai ka ni tih ka ngaihtuah chhuak thut.Mahse, ka sawi zo vek tawh.

‘Sorry…’ a ti sup.

‘A pawi lo..Ka lo beisei sang che kha ka thiam loh anih kha’ ka ti leh hmak.

‘Ka sawifiah theia, I ngaihthlak duh chuan…’

‘Duh lo…’

‘Ok..I thu alawm.I duh loh zawnga tihluih che ka tum lo’ a ti leh sup. Chhang loin ka melh reng ringawt. Tukin zing leh tuna kan awmdan hi a inletling chiang em em lutuk. Chu pawh ka mawl vang mai mai lenghal in..Intihchhiat tum reng renga ka inbeih pui hi at so in ka lo ngaihven em em ringawt chu ania.

‘Malsawma kha ka duh zawng a ni lo..’ ka beisei loh lutukin a ti leh hmuk.

‘I hria em? Ka duh zawng a ni lo..’ a ti nawn leh hmuk. Min rawn en a,a hmelpa zetah chuan thinrimna niawm tak alang thei bawk. Ka inngaihtuah harh thut..

‘I duhzawng ngaipawimawh turin ka enge inih a?” ka ti chang fak. Khum atangin ka chhuka,Sofa lam ka pan nghal daih bawk.

‘I enge ka nih leh ka enge inih chu ka sawi ngai loin i thinlung khan a hrilh ang che’ a ti vawt ruih.

‘Enteh..Min fiamkual hi duhtawk tawh rawh. Nang nen hian kan chhungril chu engpawh lo ni se dahbo ang. Tun hi ilo kal tawp nise,hmuh leh che ka duh tawh lo ang’ ka ti leh hmak. Ka sawi zawh rualin a thaw hawk ri ka hre nghal zat.

I Duhdan a ni tak tak em?” reife angawih hnuah a ti hmuk.

‘Aw.. Kal rawh,hmelma ka ni a, chu chu kan nih reng dan tur a ni.Nangpawn chiang takin i hriat kha’ ka ti leh salh. A rawn tho a, na nei hmel pawh a pu tawh lo. Khum tlangah a thu a, a hmai a tuai pawk. Min rawn en a, hawisawn duh loin ka melh ve ran mai.

‘I ring emaw ring lo emaw i u leh Becky naute kha ka that lo..’

‘Sawi suh,engmah sawi suh…’ ka ti tawk.

‘Thil pakhat ka hre duh. Engvangin nge i hmelma ka lo nih ngawt hi ka hre duh tlat” a ti leh nghut.

‘I hre lo amaw?” ngeiawm zetin ka nui lui nghek.

‘Aw. Hre miah lo..’

‘Ka u hi LALRINAWMA a ni tih ihria tiraw? Chuan ani kha kanghlum angin lang mah se halhlum anih kha..’

‘Chuan…?” a ti hmuk..

‘I sumdawnna ang ka u in a neih ve dawn avangin i duh lo tih chu nangpawn i pha thei lo vang.Chuan,Becky vangin ka u nen in inhmuthiam lo tih pawh..’ ka aw a khur dar dar mai. A hmelpa zet chu hawisawn duh loin ka en ngar bawk.

‘Ka pawm ve ve..’ a ti leh hluk..

‘Chuan,chuan…Nang hian i thata…Mi pahnih inhmangaih em em bakah an fa pawh,I hmingchhiat lohna tur leh i sum duh vangin…..’ ka mittui a rawn tlaa,Sangkima hmela maktihna lang chu ka hmu phe ruai bawk.

NOTE: Chawlh lak ka chak thei em maia..😣