ANNEM - 3

Chapter- 3

‘Hello..’ zangkhai lutukin phone a pick veleh Mipa aw thum lam hian a rawn ti a, ka then sak. Amah hi Rasky-in ka enge anih hriatchian a duh,chhanna ka pek tak loh kha a ni a. Ampuia…

 College kan kal laiin kan Senior thin a ni a, a piannalh lutuk leh infiamna engpawh a tihtheih thin avang khan a lar thei takzet. Rasky te nen chhungkaw thian anni a, kan inbe ve zauh zauh thin a. Thian han tih em tur kan ni lo. Hmelhriat satliah kan ni mai.College achhuahsan hnu khan kan inhmu ta lo vang vanga, nikumah kan College –in Function an neihnaah kan inhmu leh hlawla. Ka number Rasky a lo dila, inngaizawng tih dawna sawitur awm miah lo,mahse inbe satliah tih dawna nichiah chuang lo kan ni ta deuh ber. Chanchin kan inshare nasaa. A  tuina ber Fitness lamah a lo kal zui zel a lo ni a. Mizorama kan hmuh phak china Gym changkang ber,Aizawlah nei mekin amah Instructor a ni zui bawk.

‘I buai em?” ka ti a.

‘Aih, sawi la…’

‘Gym hi in full viau em?”

‘Full over lo e..Ti nge?”

‘Ka lo kal ve duh deuha’

‘Yeap…Kan tawt viau anih pawhin ilo kal duh anih phawt chuan thenkhat chu fee kan return leh mai angai tihna anih chu’ a nui zui huk huk.

‘Over thin sia maw..Tak takin naktuk zingah ka lo kal chhin anga,mahse ka fit lo nasa tawp’ ka ti leh a.

‘Fit turin alawm ilo kal dawn. Anih chuan naktuk chu Sunday dressin nge ka kal anga kawr ha loin ka lo awm zawk dawn?” a ti leha,a nui leh hawk. Insum hman loin ka nui chhuak ve hak mai.

‘I nasa lutuk.Ka lo kal leh lo mai ang’

‘I sawi lawk tawh,a theih loh bur’ a ti leh sup. Ka then leh sak,ka  thisen zawmpui ni lo Mipa,Mipa nihdan tura ka lo beisei thin kha Ampuia miziaah hian a awm vek.Hmeichhia ka nih angin min Care thiama, mipa tamtak anga mitmeng lerh leh nawmchen nan chauha Hmeichhia te en thin kha a ni lo. Mahse,Ka ngaizawng tihna erawh a ni chuang lo. Ka kawmngeih a, inhmu a inzui chawt kan ni lo chungin ka mamawhna apiangah a tlanchhe ngai lo va,a sawitawh chu hlen ngei ngei chi a ni bawk. Mahse, a Gymah hian engvanga kal tur nge ka nih ka inhrechiang lutuk,Ampuia vanga kal tur ka ni  lo va, Rosangkima a kal ve vang a ni zawk. A chanchin ka hriatbelh theih ang ang ka hriatbelh hnuah Gymah hian a kal tih ka hriaa,Ampuia ta alo ni hlauh bawk nen a remchang ta vel veka,ngaihtuah buai eih loin Ampuia ka be nghal rum rum.  Engtin chiah nge bul ka tan ang hre lo mah ila ka hnaiha,ka hmelhriat nihtir theih hmasak a tul ber ka ring ve tawp.

Ka room kawngkhar chhunglamah ka kalha, inbual tumin ka inhlip a. Engmah inbel loin Dressing Table hmaah ka dinga, ka taksa khuhtu awm lo va ruak kang mai chu ka thlir vang vang.

Pian nalh lutuk tihtur ka ni lo tih ka hria,nalh lo Over pawh ka ni chuang lo. Mahse ka vun no leh nung sar bawk chu ka hmuhmaih hauh lo. Ka mawng a chhing laha,ka kawng a fek viau lawi. Ka mawng hi duh aiin a len bakah a er lutuk niin ka hre thina,mahse tunlaia mawnglian leh er nalh tihna khawvelah hi chuan pawi ka tita lem lo.  Ka hnute lian lam lek lek,kawh lah chu ka taksa a chhuan tur ka neih tlemte zinga chhuanawm ve lai a ni ngei bawk ang. Ka thaw halh mai..

’Eng hmanrua pawh hmang rawh,Puitiling ini a,pawi tur chinah chuan i inveng thei tur a ni. I tumah chiang la,I u nunna la tu hi na tawpkhawk a tuar lai hmuh ka duh’ ka nuin hnial chi hauh lo khawpa khauh leh chianga a sawi lai kha ka bengah a rawn ri nawn lehnghal zat bawk. Diktak chuan fiahna engmah kan nei hauh lo. Mahse,ka nuin a tihtawh chu a tihtawh a nimai.Sawi nawi a sawtna a awm lo.

Ka hmai ka tuai pawk, ka hmel darthlalanga lo lang chu ka en a,Nula ka ni a, engtikah emaw chuan Pasal pawh ka la nei ve maithei,mahse tunah rih chuan kan chhungkaw phuba lak ka ngaia. Ka future lam aiin ka chhungkua a pawimawh hmasa zawk tih ka inhrilh nawn leha. Ka rilru lehlamah erawh chuan ka inkhawngaih tih ka hria. Englaimaha duat hlawh ngai lo ka ni a,tunah pawh chhungkaw phuba la tura ka nunna thap angai leha, mahse mi tana ti ni loin ka thisen zawmpui te tana pen tur ka ni a, ka duh loh dana nawrkal ka nihna hi nat phah nana hmang lo turin ka infuih hle angai ngei ngei dawn tih ka chiang,ka hnungtawlh anih vaih chuan enge thleng tur ka hre chiang lutuk tlat.

Ka alarm riin min tiharha,thawhphan pawh awm loin ka tho vat. Zing karah Rosangkima a kal thin avangin zingkarah ka kal ve angai. A timing a thlak tawh anih hlauh pawhin ka thlak veleh mai ang. Ka thawmhnaw haktur ka dahchhuah sa ka haa,ka sam ka phiara, make-up engmah ka hmang lo. Thlan atla anga,ka lang tawp mai mai zawk ang tih ka hlau.

Gym piaha Parkingah Scooty ka daha,Gym lam ka pan pheia,ka beisei loh deuhin Ampuia a lo ding vung tawh. Min rawn hmuh veleh ban a rawn vai zauha,a nui nghal suk bawk.

‘Good Morning’ ka ti a.

‘Morning…Thawh i hai em lo maw?” a ti zangkhai vuh.

‘Hai nang,ka helhhawlh deuh a..’ ka titha ve mai.

‘Ka ring,lut ila’ a ti leh a, ka bu nghauh. Chhawng chung  berah Gym a awma, Stepah kan kal chho duna,thil ho mai mai sawiin kan inbe chho hlut.

Gym chhung nuam leh dai raih mai,cool zet bawk si chu ka enkual dan dana,a neitupa ang bawka Cool leh ngainatawm a ni tawp mai.

‘Tukin chu kan titi mai mai zawk dawn mi?’ nui chungin a ti a, ka thle bak. A taksa tihlum tumin a ban a vai kual pah bawk.

‘Engber nge ka khawih hmasak dawn?”

‘I taksa tilum phawt la..Minute 10 vel lo tlan hmasa lawk rawh’ a ti a. Treadmill bulah kan ding duna,a set nghal mawlh mawlh. Diktak chuan inah pawh kan nei ve renga, ka u leh ka pain fitness an ngaihpawimawh avangin hmanrua eng eng emaw chu kan kawl ve nial. Mahse, buaipui ngai lo ka nih thu sawi kher tul ka ti lo.

Ka lo inthlahdah rei tawh deuh bawka ka rin aiin ka inzo lo nasa. Ka tlan zawh meuh chuan ka thlan a tla nasa hman ngang mai bawk. Thaw hlawp hlawp chungin chhuatah ka thu sawpa.Midang pahnih an lo kalbelh tawha, innel takin Ampuia te nen an titi bawrh bawrh.Ka nghah ber Rosangkima erawh a lo la lang ta miah lo.

‘Eheu!! I va chau awm der der ve’ ka thutna bula rawn din hnaih pahin Ampuia’n min rawn ti a. Chhang loin ka bu nghat,a then leh suk.

‘I kal tam tial tial anga,I la zia vat mai ang. Le,tunah chuan thildang ti ila…’

‘Tukin atan chuan duhtawk mai ka duh’ ka ti halh..

‘Ooo,Come on..Chutiang ngawt chu a theih loh ania’ a mit a siai zauh. Ka ner khum nak thung. Ni e, ka kal chhan chu engpawhnise,ka kal ta sa sa a,keima tan pawha tha law law turin ka bei ve tur a ni hrim hrim.

Ka zuan lauh lauh laiin ka mitsirin tuemaw lo lut ka va hmu a, ka zuanglai tawp chuang loin ka hawilet zauh. Amah ngei a lo ni a,ka thensak mai.Ampuia nena an inbe thawm chu ka ngaihven ru kar mai. An inbiak danah an inpawh thawkhat tih a hriat theih a. Ka then leh sak.

Ka Jacket ka phelha,ka kawngah ka suih a,a hnuaia ka hak,tlema pan deuh chu ka taksaah a bet thlara,ka ngaipawimawh duh lem lo.

‘Boss,ka zo a..Eng a dawt leh tur?” an bulah ka dinga, ka tawng thawmah an rawn hawi rual thawt. Rosangkima ka en a, ka nui lui saka,ngaipawimawh lo hmel thei ang berin ka dak deuh vaha,Ampuia lam ka hawisan lehnghal mai bawk.

‘I va rang leh si ve..Tukin atan chuan duhtawk phawt ang..Eeee,hei hi ka thianpa Sangkima anih hi.Chuan,ani hi Anun-i…’  ka tum aiin ka hmelhriat hma dawn ta tlat. Mahse, Gym kal ve satliah mai emaw ka tih laiin Ampuia nen thian an lo ni tih erawh ka hre lawk tlat lo.

Muangchangin Rosangkima lam ka hawia,Ampuia ka en leh a. Mizo Mipa zinga chhe lo zual thlang dawn ila an pahnih hian hmaih chi anni lo tawp ang. An landan erawh chhim leh hmar ang hlauh a ni lawi. An lian ve ve a, an pian a nalh em em bawk tih bak chu inanna reng reng an nei lo.

Chik zetin min en a, ka hnute zawnah a mit a fu chat. Ka tum loh lutukin ka ip deuh chawih bawk. Hrep tak hian a…Ka awmdan dik lo thup tumin ka dak deuh vaha,ka nui lui leh sak bawk. Khatianga melh hleka ka zam dawn anih chuan eng ka ang dawn hauh lo. Ka inhau ru nghal mawlh mawlh mai.

A kut a rawn pharchhuaka,ka pharchhuak ve nghal vat. A kutzungtang sei thlurh chuan ka kut zungtang sin sel sawl chu a humbo hneh lam mah a ni. Nghet fahranin a hum a. Ka mitah tak a en a, hawisawn duh loin ka en ve ngar bawk.

‘New Comer,chu pawh a hlimawm lam anih ka beisei’ a ti nghal sup. A aw pa leh thupe aw zet chu ei lo ru zetin ka hmui ka petsawi zauh.

‘Ka tibuai viau maithei che u ania.Mahse, Ampuia ai chuan min dim deuh ka beisei thei ang chu maw?” nui chungin ka ti a.

‘Het, chutiang tur chuan phalna lak i mamawh ang.Thenkhatte hi an hlauhawm thei viau ania’ Ampuia’n nui huk huk chungin a rawn ti a. Rosangkima mitmeng danglam zawk chu reilote chauh nimahse ka hmuh hmaih lo chiang viau.

Ka kut ka lasawna, Ampuia ka en a,’ Tu lakah ber nge lak tur? Nangmah maw?” hrethiam lo tak tak angin ka ti deuh ha.

‘Ahh, ni tho anga. Ni lo bawk ang chu’ Rosangkima lam en chungin a ti a. A nui leh huk huk.

‘Anih chuan hlauhtur kan ngah nghal viau dawn ava nih hmel ve’ nui chung bawkin ka ti leh salh. Rosangkima ka en duh lo lui tlat bawk.

‘Kan ngah loh hram ka beisei’ Rosangkima awpa leh chang zetin a ti hmuk. Inring hman loin ka ner leh nawk mai.A rilru chhiat ang bawkin a chapo tel tih alang thei nghal ruak.

‘Tihtur ka nei tawh rih loh chuan ka haw mai dawn asin’ Ampuia hnenah ka ti a.

‘Um,tukin atan chuan a tawk reng. Naktuk zing erawh rawn thulh miah lo la’ a titha ve mai. Chhang loin ka bu nghata, ka Bag dahna lam ka pana. Kal pahin ka Jacket ka ha a,zipper phui thei ang berin ka pawt chip nghal vek bawk.

Karkhat lai ka kal ve ta reng. Tuktin Rosangkima nen kan inhmu ta ziaha, mahse atir lama ka beisei ang erawh a thleng zui tlat lo. Ka kal hmasakber tum khan kan innel hma dawn viau khan ka hre ngawt a, a teuh ta lo tawp. Ka kal hmasak emaw a lo kal hmasak zawk tum a awm anih pawhin kan innuih emaw ‘hello,tha maw?” tih bak hmasawnna engmah a awm lo hrim hrim.

‘Dawr chu engtik nge i hawn theih ang?” Ampuia’n a ti a.

‘Karthar lamah hian kan zawhfel theih ka beisei a. Thlathar tir teah aniang’ ka ti a ,ka thlan ka hru paha.

‘A that chu,hunpui a thleng chho thuai tawh dawna. Mi zawng zawng hi hlimna zawngin kan teikual leh dawn chiang reng. Kan restaurant neihsa te hi tha hlawm viau mah se a tawk zo lo lutuk. I hawn hma theih a tha viau ang’ a ti leh duah. Ka pawm thlap,hunpui lo thlen hmaa hawn hman tumin ka virbuai viau reng bawka.

‘Sangkima hi enge ihmuh dan?” a ti leh thut.

‘Engtizawngin maw?” pangngai takin ka ti a.

‘Ka sawithiam chiah lo,ka rin aiin in inkawmngeih lo a’ a tita khauh.

‘Aaaa,inkawmngeih viauna tur kan nei lo alawm’

‘Um,a dik tho. A mizia hi a nelawm lo ve bawka.Mahse, mi tha tak a ni’ a ti leh a. Inring hman loin ka tui in lai ka haka,ka khuh zui nghal bawrh bawrh mai. A rawn tho vata, ka hnungah na vak loin a rawn chum nghal dat dat. Ka khuh leh nghek nghek hnuah tlem chuan ka khuh chhuak zualpui a reh a, ka mittui a tla phung thei.

‘I zia deuh em?” a ti a.

‘Um,zia…’ ka sawi zawh hmain ka khuh leh khauh. A nui nghal suk thung.

‘Zanin kha i theihnghilh ange’ ati leh a.

‘Theihnghilh nang,mahse ka zam deuh. Hriat ka nei vak dawn si lo va’ ka ti a. Ampuia Cousin Birthday a ni a, kalpui atan min sawma,ka hnial dawn uka,mahse Rosangkima a kal ve dawn tih ka hriat rualin ngaihtuah buai miah loin ka aw lehnghal hmak.

‘A ho lutuk,keimah ka awm dawna. Midang chu i hre chawp vek mai ang. Tam pawh kan nih ka ring lo’ a ti awlsam leh mai.

‘A tha alawm,dar engzatah nge min lo lam ang?”

‘Dar 7 velah animai.Tlai tak tak a awm chaung lo”

Nilengin dawr lamah ka awma, achhung kan khawih zo titih tawha, Balcony zau tha hem hawm zet a awma, hei pawh hi Customerte duhzawng thei turin ka khawih danglam tir mek bawk. Ka thlir kual vang vanga, ka lung a awi thawkhat. Ka Cousin hi ala senior lutuk lo nangin ahna a tuipuia,Idea a nei tha bawk si nen,sawiselna lai tur a awm meuh lo.

In ka thlen veleh ka nu hnenah zanah kalna tur ka nei tih ka hrilha, ka kalna tur min zawt lem lo. Muangchangin ka inbuala,ka inbual zawhah ka hmai ka chei lehnghal vek,Make-up uar tak ka ni lem lo va, ka hmang thiam hran lo bawka.Mahse zanin erawh chu  tlemin ka hmang na ve deuh thung.

Kawr dum,tight leh nghawng zau lam mah ka haa, ka sam tam zet thlah loin ka chhipah ka tawn khawma,ka bengbeh beh lai ka hlipa, Gold,kual lian tha zet ka beh ta zawk. Ka kawr hak chuan ka hnute ati lang kawh lehzual. Mahse, Coat zangkhai tak ka hak hnan leh avangin ka kawrnghawng zau lutuk pawh a langsar ta vak lo thung.Jeans kekawr, thawl deuha hak chi ka haa, ka kawr a kawngah ka bilh luta, kawnghren lian vak lo ka hreng leha, ka kekawr tlang ka thlep leta. Ka pheikhawk bawm ka hawnga, Pheikhawk a awm tlar thut. Pencil heel sang tha zet leh nalh thlarh mai chu ka en vang vanga,ka ngaihtuaha, Pencil heel hi ka bun thiam lo ni loin Puan nen lo chuan ka confi tak tak thei thin lo. Ka tum loh dan deuhin ka che buai palh thei tlat.Wedge heel, a chung khuhna lian vak lo pakhat kalphei,pawlduk nalh zet,sang pangngai ka bun ta zawk. A rawng thim lam chuan ka kezungtang a tilang sar ngang mai.

Ka room kawngkhar a ri raka,ka inher vat. Ka nu a rawn luta,’Enge?” ka ti satliah. Ka hawileta, ka hmui tlema pherh deuh ka siamtha malh malh.

‘A kalve dawn em?” ahming sawi loin a ti a. Tu nge a sawi ka hre thiam.

‘Kal ang ka ring’

‘A that chu. Malsawma khan i mamawh phawt chuan be tur chein min ti a, I sawipui tawh em?” a ti leh a, ka thaw halh mai.

‘La be lo…’ alangah erawh pangngai takin ka ti a. Ka bag dahna lam ka pana,ka hawnga. Bag awm tlar dal zinga pakhat ka lachhuak nghal bawk.

‘Tanpui tur chein a inhuam reng ania’ a ti leh a.

‘Aih, ka mamawh lo’

‘I chiang em?” a ti leh kher.

‘Chiang..Nu,diktak chuan midang tel ve lo se ka duh’ ka tita nge nge.

‘Engvangin maw? Pakhat ai chuan pahnih chu a tha zawk daih ang chu’ a ti leh hmak.

‘Nia, tha zawk maithei.Mahse, keimahin theihtawp chhuah phawt ka duh.Bakah,midangin kan chhungkaw chungchanga tel ve na an neih ka duh miah lo bawka’ ka tita duah. A mitko hmul a tisang ak. Min hnial ka rin tehreng nen engmah sawi loin a bu ta nghat.

Dar 7 rik hma hretin Ampuia a lo thlenga, alang nalh leh zuih tawh. Inchhungah a rawn lut a, ka nu nen an inbe luam.

‘Ka mit lak tum ngar ngar inih ka beisei’ kan tlanchhuah hnuah a ti sup.

‘Maw?” ka ti vat.

‘I nalh tih sawi ka tumna anih kha’ a ti leha,a nui zui hawk.

‘Naaah,ka lawm e ka ti mai ang aw’ ka ti a. Ka nui ve hak hak bawk.

‘Nia, timai rawh’ a ti leh a. Intiamrual ang hrimin kan nui chhuak nghal hawk hawk.

Kan kalna tur hmun kan thlenin an lo awm nual tawh. Ampuia Cousin-in min lo dawngsawng vat,nu lian over lo,hmeltha leh hawiher zangkhai tak mai a ni a. Ka vawikhat hmuhna a ni chungin lo inkawm hrep tawh ang maiin min be nghal bawrh bawrha, kei pawh ka tlangnel nghal sawt bawk.

‘Anun,lo thu hahdam ru aw..Midang lo thleng thar an awma,nuam intih dan dan kha animai’ ati a, a ban a vai zauha. Ampuia nen thutna awl lam kan pan a, Light hnim deuh ruai chuan ka mit a tivai lek lek.

‘Enge i induh ang?” Ampuia’n min ti a.

‘Coke emaw Juice awm se..’

‘Ah,chu aia Strong zawk i duh em?” a then suk.

‘Duh lo mai. Ka nawi lutuk palh ang’ ka nui a,a thle bak.

‘Ok,a tha alawm. Ka va la ang’ tih pahin a kalsawna,music ri dam raih chuan min fan raih raiha, Boruak a nuam takzet bawk.Ka hawikuala,Rosangkima hmel ka hmu lo. Light a eng lutuk lo nangin hmel hmuhtheih loh khawp a ni lo va, hmun dangah a awm anih loh chuan alo la thleng lo pawh a ni mahna.

Ampuia a rawn let leha, Beer a rawn lek va va. Ka inturin Coca Cola a rawn keng thung. Ka bulah a rawn thu thla ve nghal a.

Darkar chanve lai kan thut hnuah pawh Rosangkima hmel ka la hmu ta chuang miah lo. Cake an zaia,cake an zai zawhah Party tak tak an tan ta chauh. Mizo zaithiam lar tak pakhat a tel ve a,Live Band an awm bawk. A hmaa Boruak hahdam tak kha thawm bengchheng leh ri luih luihin a thlak ta thung.

‘Lalpa le(h)’ Ampuia’n a tih sup thawmah a hawina lam ka hawi ve vat. Hmeichhe pakhat nalh zet mai lo kal phei chu ka va hmu a, Ampuia ka en leha, a hmelah danglam engmah a awm lo.

‘Tu nge?” ka ti sap.

‘Ka x..’ a sawi zo hman tawk tihin kan thutna a rawn thleng chawpchilh nghal chu animai.

‘Ampui,I tha maw?” aw tham nalh zetin a rawn ti a, chik zetin ka en a. A hmelthat chu thuhran nise,Make-up a hmang thiam lulai lutuk.

‘Tha alawm,nang zawk?” pangngai takin Ampuia’n a ti a. Dinchhuah tum awmin a awm lo.

‘Tha..I thiannu hi..’ min rawn en a, a nui sak. A hmel a nelawm a,mi tha tak anih ka ring nghal ngawt bawk.

‘Anun-i..Chuan,hei hi Becky’ a ti tawi tuk. Kan inbiak viau hnuah hian thil tamtak kan inshare tawna,mahse he nu chungchang hi min hrilh ka la hre lo. Becky lam ka hawia,ka bu nghata,ka nui var var mai.

‘Min hrethiam la, Ampuia hi thil pawimawh sawipui lawk ka duha..’ tim deuhin a ti a.

‘Aw,aw…Lutuk. Wash room kal lawk ka lo tum sa a’ rang zetin ka ti a. Tur zeta Ampuia’n min en chu ka mitsirin ka hmu ru kar,ka nuih a za viaua,mahse nuih erawh ka nuichhuak em lo.

Wash roomah ka kal zuaia, ka let leha,kan thutnaa Ampuia leh Becky thudun ka va hmu a, muk hmel fahranin an lo la titi a. Tihbuai ka duh loh avangin Balcony lam ka pan ta zawk.

Balcony lian lem lo tak a ni a, a hungna bawhin ka dinga,ral lehlam ka thlir vang vang.Thawm ka hriat rualin ka inher vat,ka rin loh lutukin Rosangkima nen kan inhmachhawn ta ran mai.

‘Nang maw?” A lo kal ve dawn tih hre lawk lo ang maiin ka ti a,diktak chuan ka beisei tawh loh hnua hmu ka ni a, min thawng ve det. Ka ngaihtuahna tilang loin ka nui lui var var mai.

‘Um,nang pawh ka beisei chiah lo che a’ a ti ve nghut. A rawn kalpheia,ka sirah a rawn dinga. A kekawr ipte a zen a,hmalam a thlir nghal vung vung.

‘Nia, Ampuia nen kan kala’ ka ti tha ve mai. Ka hnaih deuha a awm apianga ka hahdam thei ngai miah lo mai hi engtia han tihchi nge maw ka nih dawn ni?

‘Ka hmu che u alawm..’ a ti bung leh vut. Tuktin Gym lamah inhmu mah ila innel han tihtur kan ni lova,sawizawm mai tur ka haihchham nghal ngawt.

‘Naktuk i kal dawn em?” ka rilru a lo lang hmasaber ka sawi nghal thawr.

‘Kal lo ang. Party hian min Shock viau zela’ a nui a. A nui ka hriat vawikhatna a ni hial in ka hria. Sawi leh mai tur hre loin ka ngawi ta rauh rauh.

‘I la lut dawn lo mi?” amah zawkin a ti leh sup.

‘Ka hre lo,tlemin Boruak ka zo lo deuh a’

‘Kei pawh..Mahse, tu emaw chuan a zawng viau che anih hmel’ a ti leh a. Ka en vat,min en loin inchhung lam a lo en a, min rawn en a. A thle zauh. A thlekna lam ka hawi ve nghala,Ampuia ka va hmu a. A lo hawikual vel mek chu niin..Becky erawh ka hmu tawh lo.

‘Anih dawn saw a..Ka va kal ange,anih phawt’ zangkhai takin ka ti a. Min chhang loin a bu nghut.

Ka kalpela,mahse ka inrin hmain ka pheikhawk ka rapleka,ka te nghal thawt. Ka tlu thla chawrh dawn emaw ka tih laiin ka kawngah a rawn vuana,amah si chetin min pawthnai nghal rawk bawk. A kawrah ka vuana,a awmah ka hmai ka phum kak mai. Ka kawngah a kuaha,kan inhnaih leh lutuk chuan a taksa lumna ka feel theia,Ka hlauhthawn vanga ka lungphi ri dat dat chu a hre thei hialin ka ring bawk.

Note: Thinlung hi Story lam aiin Tunlai Kan buaipui COVID-19 ah hian a awm tam zawk lo thei si lo va,angaihnawm lo anih pawhin min hre thiam mai teh u.Tin,kan phaktawkah i fimkhur em em ang u aw..