ANNEM - 6

Chapter- 6

‘Accident…Ni lo,ni lo…Chutiang a ni lo vang’ ka ti nawk nawk. Ka aw a lawi vek thei hial bawk.

‘I tha em?” min ngaihtuah hmel takin a rawn ti dam thlup.

‘Ka hre lo,tha ang’ ka ti mawl tawp. Ka that leh that loh ka hre tlat lo.

‘Lo hahdam phawt rawh, tihtheih a awm chuang lo va, hriatchian ka lo tum ang’ a rawn ti leh a.

‘Nia,chanchin ka lo ngaichang ang’ ka theihtawpa pangngaiin ka ti leh halh.

Phone ka thehthlaa, khum atangin ka chhuka,ka khur zawih zawih mai. A thih vangin thih ve ka hlau lam a ni lo,min thawng lutuka,ka mumang nise ka ti ngawih ngawih a ni zawk. Diktak chuan keimah vanga thiah ka ngai nghet hmiah bawk. Min puitur khan sawm ta lo ila tunah ala dam ngei ngei ang. Mahse, awmzia a awm tawh miah si lo.

Khur hlak hlak chungin Phone ka ban leha,Ruatsaka ka call nghala.Vawikhat chauh a ring hman tihin a pick nghal mai.

‘I tho tawh em?” ka ti a.

‘Um,hei ka chhuaka..’

‘Becky ruang an chhara’ ka ti mawl tawp.

‘I lo hre tawh maw? Nakin deuhah ka rawn hrilh ang che ka lo ti a’ a rawn ti ta mai. Mak ti lutukin ka meng zau kawk.

‘I hria maw?!” ka ti ha mai.

‘Um,ka thian pakhatin min hrilha. Ruang an laksawn hmain ka thleng hman a.Tunah an in kan thleng phei deuh chiah’ a rawn ti awlsam leh et.

‘Hriat theih zawng zawng ka hre duh ang aw..’ ka ti a.

‘Tehreng mai,ka theihtawp ka lo chhuah ang’ a rawn ti leh a.

Phone ka Off a, tukverh ka pan pheia,nichhuak in a rawn chhun eng iar a, ka inrin hmain ka biang a rawn lumthla papa,ka insut zui nghal hlawp hlawp bawk. Va kalin duhtawkin va tap thei ila tun ai hian ka thawl zawk maithei,mahse a ruang hmu tur pawh huaisenna ka nei nge nei lo ka inhre ngam lo..

Ka khur hlawk hlawk aziaa,ka mittui a hul ta bawk. Mahse ka chhungril erawh a ipik ngaiin ala ipik ta reng. Ka mit ka chhinga, ka mitthlaah Becky hmel a lo langa,ka u nena an chanchin a sawi laia mitmeng eng sar maiah khan ka u a Hmangaih takzet tih ka hmu theia,hmuhnawm ti em emin ka thlir dauh dauh kha ania. Ka u tana mi hlu lutuk,theihtawpa ka u phuba lak nana ke min penpuitu leh achhungte pawh dodal ngam khawpa hmeichhe chak kha a awm ta lo,ka u nen an inhmu ngei anga,an hlim ka beisei takzet. Ka mittui a rawn hnam leh a,ka khap sak sak ringawt.

Ka thaw hak mai, ka insehruha. Engpawh a thihchhan atan sawise ka awih thei ngai dawn lo tih ka chiang. Ka u chunga an chetdan hrechiang bertu zing ami a nih tlat avangin a awm loh kha an tan a tha em em a, an farnu anih angin ka u nen inzawmna lo nei mah se an ring luia,mahse min pui tih an hrechhuak leh ta si a ni ngei anga, anni sum ringawt atchilh tan chuan nunna pakhat  lak chu engmah ni  hek lo le. An tana hmingchhiatna lian tak thlentu anih tlat avangin an kawng atangin an thianfai tih ka hai mawlh lo.  Sangkima hmel ka mitthlaah a lo langa, thinrim lutukin ka lu ka thing nawk,ka ngaihtuahna leh ka mitthlaa lo lang tur hian a tenawm lutuk.

Bathroomah reife ka awma,ka tahna avanga ka mitbui deuh lak chu ka en a. Ka nu hnenah zep loin ka sawi angai dawn. Keimah vanga thi an awm hian min ti hrehawm ngawih ngawiha,an mahni lamin min rawn tibuai anih loh chuan bansan ka duh tih pawh ka hrilh angai. Hetiang chuan engmah a tawp thei dawn tlat lo.Nunna hi infiamna hmanrua tur chuan a hlu lutuk ringawt.

Inhnuaiah ka chhukthlaa,Kitchen lama Dingi zat rat bak thawm awm loin a reh thap. Sana ka thlek zawka,ka nu thawh a hun daih tawh.

‘Ding,khawnge ka nu? Achhuak ami?” ka ti a. Ka lut thawm a hria emaw ka tih laiin a hre lo a ni chek ang chu,a phu zuk.

‘Awi,min tiphu nasa lutuk’ nui tha chungin a ti a, za miah loin ka then ve sak ringawt.

‘Ka pen ri ihria emaw ka ti,khaw nge ka nu?” ka ti nawn leh a. Tuilum ka thli a,Fridge atangin sertui ka lachhuak leha.

‘Pi teinah a kal’ awlsam deuhin a ti liam puat. Ka pi te In nen insi deuhthaw a awm kan ni a,In khat ang maiin kan inluh pawh reng reng. A lo let leh mai ringin ka thu ren rawna,mahse a lo let ta mai lo. Chawei hun dawnah a rawn let ta chauh. Ka pi nen an la rawn inzui lut zuia,engmah sawipui chi a ni lo.

‘Niminah Sakhi sarep ka leia,ipi hian a eichak ka ringa, han insem dawnin a tlem tingtang sia’ ka nuin a rawn ti lut bawrh bawrh.

‘Ka pu pawh koh tel law law awm che’ ka ti a.

‘Aaa,I puin a ei duh reng reng lo,a vir thlak a ti’ a nui zui vak vaka,ka nui ve ta ngawt. A hma chuan a ei duh thin renga,engvangin nge tunah a lo ei duh tak loh ka hre lo.

‘Mampui,I va nawm loh hmel ve’ ka Piin min ti a.

‘Nuam e, ka tho har lutuka,chuvangin ka hmel a bui anih hi ‘ nuichungin ka ti a.Pitar fing leh thil chik thei tak anih avangin ka thusawi awih loin min chilh zui chiam ka hlaua,mahse engmah a sawi zui ta lo hlauh.

Chawei kham hnu lawkah ka pi a hawa,ka nu Roomah ka zui lut vat. Khumah ka thu a, ka nu leh pa thlalak banga intar chu ka melh deuh vang vang.

‘Enge?” a ti liam puat.

‘Becky a thi a’

‘Tu Becky maw?” mak tih hmel deuhin a ti hu.

‘Ka u nena an inbiakna i ngaihthlak kha,tukinah a ruang an chhar’ ka ti leh tawp.

‘Eh! Engatinge?!” a ti hluai mai.

‘Keimah vang aniang’ ka tichhuak hlawl.

‘Enga?! A lutuk lo teh’

‘A ni tlat sia lawm..I hria em? Nimin lawka thilthlengah khan min pui a, tukinah a ruang an chhar zuia….’ Ka sawi zawh veleh a thaw hawka,a meng tal deuh tawp bawk.

‘A accident pawh a ni thei asin’ ngaipawimawh lo hmel deuhin a ti hmak.

‘A ni lo, ka chiang.Min puih avangin ama chhungte ngeiin an that tih ka hria’ ka aw a khur lehnghal dar dar mai. Min rawn pan pheia,khumah a rawn thu ve a.

‘Mawl mawl suh,a thih vangin nanga thiam loh a awm lo. Sawi nawn pawh ka duh tawh lo ania’ a ti chang fak.

‘Min puitur khan sawm lo ila chuan ala dam ang’ luhlul zetin ka ti ve thung.

‘I va han hahthlak tak,hei vang hi alawm nangmaha iti tur ka duh loh. I nem lutuka,thil hoteah i buai nghal zel a,a bul tanna chauh anih hi’ zawi fiah takin a ti a. Ka nu a nita lo emaw tiin ka melh reng ringawt. Thihna hi thil ho a ti anih chu mawle!!

‘Becky hi a nu leh pa leh unaute tan chuan a hlu ngawt ang,ka u i sun vanga i nat ang chiah khan tunah hian an na ve ang.Engtin nge thil hote itih theih zawk?” ka ti hmak. Ka aw pawh a khur tawh eih lo.

‘Ka hria,ka hria.Ka sawitum i man lo anih kha,a thi kha pawi ka ti. Mahse,I thiam loh a awm lo. Ama unaute ngeiin an dahtha emaw Accident tak tak pawh lo ni se nangma thiam loh a awm lo’ a ti leh a. Tlemin a nem ta deuh. Mahse, ka ngaihdan erawh a thlakdanglam zo tawh chuang lo.Ka bengah ‘thil hote’ tih ri kha a cham tlat tawh.

‘A tha alawm..Tunah chuan a tawk tawhin ka hria, min tibuai anih loh chuan kei chuan va chhaihkawlh ka duh tawh lo’ ka ti nghauha,ka tho nghala.Kawngkhar lam ka pan zui nghal zat bawk.

‘Ding teh’ a ti thawt.Ka pen lai ka tawpchawt bawk. Muangchangin ka hawileta, a mitmeng lian zet chu ka en a, a alh a ni hrim mai.

‘Nu,ka thei tawh lo’

‘Zonunmawi,I va huai ta ve. I nu min han hnial ngam ania,a pawi lo.Kal rawh,I tel lo pawh hian ka huphurh lo lutuk’ a aw a ring lo,mahse a chiang. A sawi ang ngeiin a ti bawk ang tih pawh ka thinlung hian a hrechiang nghal vek. Ka thaw hak mai.

‘Phuba lak hi ka pa khan a duh ngai lo a..Min ziritr thin kha’ ka ti sap.

‘I pa kha lo tho leh se chuan i awmdan vang khan kut a thlak ngei che ka ring’

‘Ka ring lo,phuba lak hi kan tih loh tur tiin min zirtir thin..’ ka ti ve tlat. Dawt ni hek lo le.

‘A va tha em..A ropui hle mai,kal rawh.Engmah itih ve angai lo vang’

‘Nang pawn ti suh..Khawngaihin’

‘Chhuak mai teh’ tih pahin lehlam min hawisan nghal hmak.

Ka roomah ka chho a, ka inkalh khum nghal hmak. Khumah ka bawk nghal thlawp bawk. Muhil vang vang ila,tuna ka awm mek dan hi mumang mai lo ni se ka ti takzet,mahse a ni miah si lo. Tue maw,Script ziaktu tha takin Moive a siam turin ziak se, ka tuipui viau maithei, Mahse, ka awm mek dan hi thawnthu vela thleng ni loin a tak a ni tlat lai hi a buaithlak ber.  Thil thleng thei lo tur  niawm tak kha ka nunnah a thleng meka,chu pawh tutan maha awih theih loh tur leh Mizo zinga thleng ngai lo tur a mawi ala ni zui.Keimah hi anchhedawng saa piang ka nih ka ring rum rum tawh.Huizz,keiin tawpsan tum engang mah ila ka nu khan a tawpsan dawn miah lo tih ka hria,mahse kan beih mek te hi mi satliah annih loh zia a hre miah lo a. Tuemaw tal chuan an hrilhfiah angai. Malsawma…Ni e,Malsawma chuan ka ngenna a ngaipawimawh ziah a.Min hrethiam em em ang.

Malsawma call ka tum laiin Ruatsaka zawkin min rawn call a, Becky chungchang a rawn sawi nghal mawlh mawlh.’ Accident ngei chu a ni. Nizanah a thiannu te inah chaw a ei a, dar 10 velah a hawa,a thiannu phei chuan a thleng daih tawh emaw a tia. Mahse, a nu ten zingah a thiannu an va calla,tah chuan a haw lo tih a hre ve chiaha.An va zawnga, an veng leh vengdang inrinna,tlema fal deuh laiah khan alo tlan liama,Eng lo ania..A thiannu nen khan zu a in nual aniang’ a rawn ti duah. 

‘A nu te chuan tinge zanah an zawn loh le? Amak ka ti deuh” ka ti nghauh.

‘Nia,kei pawn ka lo tia.Mahse, a thiannu te In atanga achhuah hian a nu a biaa,a nu hnenah chuan a thian pakhat accident a awm avangin Damdawiinah a kalpui dawn a ti a, a haw har deuh dawn thu leh a riahpui maithei tih a sawi a. Mahse, zingah call engmah a pick si loh avangin a thiannu hnenah tu nge Accident tiin an va zawt fiaha,tah chuan an buai ta nuai anih hmel e’ a rawn ti leh duah.

Sawinawi tur awm miah lo khawpin a felfai thlap..Mahse, ka chhungrilah erawh ‘Dawt,dawt vek’ tih ringawt a ri tluk tluk thung.Khawilai ber nge Dawt ka hre thei mai lo,mahse a thihchhan erawh Accident a ni lo ang tih ka chiang em em tawp.

Tihmai tur hre loin ka thu deuh ren rawna, ding takin engmah ka ngaihtuah thei lo. Ka buai vel nuai a ni ber. Khuma ka Phone dah ka lakanga,ka rilruah Ampuia a lo lang thut. Karkhat lai a zin hnuah niminah alo haw a, nizan khan lo kal a tuma,mahse tihtur ka neih thu sawiin chhan awm hawt loah khan ka hnar ta ngawt kha ania. He thihna hi a hre tawh ngeiin ka ringa,Becky nen an lo inzui hrep tawha,athihna hian a thawng ngawt ang. Ka call nghala,a ring ral rala,a pick dawn lo emaw ka tih hnuah a pick ta hram.

‘Hello..’ thaw hlawp hlawp chungin a rawn ti a.

‘I buai em? I hah hmel bawk si’ pangngai takin ka ti a.

‘Aih,Stepah ka tlanchho a,chu vang mawle..Enge nita?” a rawn ti a. A awah chuan danglam engmah a awm miah lo.

‘Ih,eng lo…Vawiin hi kal i tum em?” tim deuhin ka ti a.

‘Khawiah?”

‘Becky vuinaah khan mawle, ikal dawn chuan ka kal ve duha’

‘Kal chu ka duh tho mai. Kal ila’ a rawn ti a, a thaw deuh huai ri ka hre thei.

‘Um,ka nel lutuk lo nangin nangmah vang tal pawhin kal ve ka duha’ ka ti leh a. Dawt ka sawi ngawt chuan ka awm a tinuam chiah lo nangin kal ka duh tlat si avangin tihngaihna dang a awm lo.

‘I thinrim em?” a rawn ti leh a. Ka then nak mai,ka thinrim zia leh ka thinrim chhan erawh thildang daih anih zia sawia aukhum nghek ka chak lutuk.Mahse, ka ti ta em lo.

‘Rim nang…Thinrimna tur a awm hleinem’ ka ti dam thlap.

‘Nia, ani chu ka X animaia.Bakah,buaina min thlen ngai chuang lo va’ a rawn ti leh a. Ka inpetruh nghek,Ampuia hian kan inngaizawng emaw a ti chiang lutuk tlat. Tunah pawh min vengthawng tih hairual a ni lo.Mahse, dem ngawt thei ka ni bik miah lo tih ka hre ru kar tho.

‘Min rawn lam kual mai la,a buaithlak angem?” alangah erawh chuan pangngai takin ka ti a.

‘Aih,buaithlak nang..Ka lo kal ang’

Hmanhmawh lutuk loin ka insiama,dawr lam ka  call a,vawiin atan ka tlawh dawn lo tih ka hrilha.Pawisa pawh atuk lama chinfel turin ka ti bawk. Nikhat lek ka kal loh avangin buaina a awm dawn lo tih ka hriaa,ka ngaihtuah chiam lem lo. Manager angreng deuhin Hmeichhe fel leh Smart tak ka chhawra,ka awm loh pawhin engkim a kutah a dah tawp ngam vek.

Ampuia lo thlen laiin ka nu pawh a awma, ka inchei danah chuan ka kalna tur a hre nghal tih ka hriaa,min be lo va, ka be bik hek lo.

Becky te in hi ka la kal miah lo va, Aizawl tlak lam veng pakhatah awmin,chhungkaw khawsak nuam pangngai tak anni a. An unau zinga upa ber dawt niin a u hi Pasal a nei tawha,a nau mipa pakhat zawkin nupui a nei tawh bawka.An te ber erawh ala tlangval thung. A chanchin ziahna min pek chu ka en a, a thlalak an dah chu ka melh tha ngam lo. Keimah vanga thi ni a ka ngaihna chuan a vih hian min vit ngut nguta,ka puakkeh mai dawn niin ka hre hial.

Vuina hun an hman lai te chuan a nu niawm tak a tap rawih rawih renga, ka thaw a lo ti hah ngawih ngawih. Ampuia’n mak tih hmel deuha min melh leh zauh thin chu ka hmu ru reng nangin ka haider lui tlat thung. Nia,amak duh ngawt ang. Amah vanga inhre ve chauh kan ni a, alandanah phei chuan ka bialpa x ala ni zuia,chutih laia lo tuar viau kha thil pangngai a ni lo ve hranpa tawp. Hmeichhe Over tak te tihtawk lek a ni.

‘I tha maw?” ka hmaa rawn ding chu ka enchho vat. Ka insehruh nghal teuh mai.

‘Dam alawm..’ ka tum aia changin ka ti hmak. Kan thlen hnu lawkah a nau,hmel ngeiawm em em nen khan Gate bulah mi lo kal apiang an lo welcome lai ka hmu a. Nimin lawka mualpho taka Mizoram mipuiin an khel luih luih kha anni tih pawh an hawiherah a hriat loh.Ka ten lutuka,melh pawh ka melh nawn peih lo hrim hrim.

‘I lo kal ve pawh ka lo ring lo va, I va fel ve’ a ti leh sup.

‘Nia, ka lo lang ve hlawl anih hi’ ka ti leh nghauh. Engvanga kal nge ka nih a hre chiang lutuka,a hre lo der kual vel chuan ka thin a tirim em em ringawt. Ka hawikuala,khawiah tehhrep nge Ampuia pawh chu a kal ni?

Ka bula thutna awlah a rawn thu thlaa,tawlhsawn mai ka chak et et. Vanneihthlak lutukin Ampuia leh Nuna rawn kal phei ka va hmu a, ka thaw nghal huai mai.Kan bulah an rawn thleng chawpchilh nghala,Sangkima te nen an inbe nghal mawlh mawlh.

‘I tha em?” kan tlanchhuah hnuah Ampuia’n min ti a. Chhang loin ka bu nghat,pawnlam hawiin ka thu a, thliin ka sam chhawl leng a chhem leng dar dar mai.

‘I nawm loh hmel lutuka,chu vang mawle’ a ti leh a.

‘Ka tha,diktak chuan Becky nu kha ka khawngaih..A hrehawm dawn e, nat lawkna pawh awm bawk si lo.Khatianga fanu te han boral thut chu.Ka feel thei tlat a’ ka tita duah.Min rawn en a, hmalam a en leh mai.

‘Adik alawm,itan phei chuan i u hriatchhuahna hun a ni dawna’ a ti a. Ka phu deuh zawk.

‘Maw? ‘ ka ti vat.

‘I u mawle,I u kha a boral dan khan a thawng che u em a’ a ti leha,Ka thaw nghal huai mai. Ka u leh Becky inzawmna a hria emaw ka ti hmana..Mahse,a sawi tum dan ka lo man lo mai mai.

‘Um,Adik alawm..A hrehawm’ ka ti halh. Ka kut a rawn huma.

‘Hahdam tum hram hram rawh. Tihtheih engmah kan nei lo va, Pathian thu thu alawm’ a ti dam thlup. Nia, kan nunna hi Pathian ta a ni a, mahse ka u leh Becky kher hi chu an nunna hi misual tenawm takten infiamnan an hmang tlat thung a….

Ampuia a haw tlanga, inchhungah ka lut a. Dingi chauh a lo awm.Min lo be nghal vat bawk.

‘Ka nu a chhuak ami?” ka ti a.

‘Aih,chhuak lo..Inchungah an awm” a ti a. Ka bu nghat,tu nen nge an awm pawh ka  zawt chuang loin Room lam ka pana,Room chhungah ka luta, khumah chau zetin ka thu thla hnawk.Ka tah pawh achhuak tawh lo. Ka chawmawlh vek ti ila a dik ber ang. Ka pum a rawn ri raih raiha,zingah khan chaw ka ei mumal lo a, ka chhuah na lamah engmah ka ei leh bawk si lo nen ka pum a ruak a.Ka chil a rawn rial nghal titih bawk.

Ka inthlaka,ka inthlak zawh veleh inhnuaiah ka chhukthlaa, Thingpui ka chhuanga, chhang bawmah enge awm en tumin ka hawng nghala, ka chhang ngainat tak mai ka hmu a. Lawm zetin ka lachhuak nghal a.

Thingpui ka in laiin ka nu leh Malsawma an rawn luta, ka thil ei lai ka tawp chawt. A duh zawng titur hi chuan a nghak khawtlai khat viau thina,tunah pawh Malsawma a lo ko lehnghal chat. Keimah zawkin ka nu hrilhfiah turin ka ko ang ka ti kha ania,mahse min lo biak khalh leh ta anih hi a,Hahthlak hian a…

‘I lo hawh tawh ni maw?” awihawm loh khawpa zangkhaiin ka nuin min rawn ti a. Zing lama kan boruak nen khan a awmdan a inpersan lutuk,damdawi dik lo a ei emaw tihmai tur a ni.Nge Malsawma hian a duhzawng tihsak a lo tiam zawk ni?

‘Um,haw tawh.I lo leng animaw?” ka ngaihtuahna nena inpersan zetin Malsawma en chungin ka ti a.

‘Um,lo kal zuai.I chhuak tih ka hre lo va’ a titha ve mai.

‘Min lo call lo nih chu mawle,bakah ilo kal dawn tih ka hre lawk bik lo va’ nui chungin ka ti a.

‘Nia,kan indraw timai ang’ nelawm takin a nui a.

‘Thingpui ala awm em? Lo kal rawh,in ve leh law law rawh’ ka nuin a ti leh sawt sawt. Ka melh zawka, min en loin thingpui lam a lo buaipui hman tawh.Ka thutna ep zawngin Malsawma a rawn thu thla ve a. Ka nuin Dingi kuhva la turin a tir ve thung.

‘I nu nen kan lo inbiaa’ zawi fiah deuh takin a ti a. Ngaipawimawh lo hmel takin ka bu liam satliah ringawt.

‘Nia, kan lo inbiaa. I ngaihdan kha Malsawma pawh hian a lo thlawp che a..Duhtawk mai a tha’ ka nuin a rawn ti ve a. Thuruk,mi hriat ve atana duh loh ngawih ngawih tur thil nisiin an chawhmeh sawi vel mai mai chu ania. Ka nu hi chu mi mak danglam tak zawng a lo ni.Chumai bakah zingah khan khati khawp khan a thinrim a,nikhat em pawh aliam hmain a rilru a lo thlak leh hman vek tawh!!

‘A tha alawm’ ka ti nghauh..

‘Nia,a tha animai. Thil kal tawh chu kal liam tir mai hi a tha..Mahse, Damdawi dawr Lisence kha chu buaipui zui ila kan lo ti a. Neih theih chuan thil tha tak a ni hrim hrima..Min mamawh phawt chuan min hrilh dawn nia.Ka tangkai lutuk lo maitheia,tangkai ve tho maithei bawk’ Malsawma’n a ti leh a. Nizana ka nu hnena ka sawi khan Malsawma min sawihmuh tih ka sawi miah lo a,mahse vawiina an titi naah an lo sawichhuak tih ka hre thiam mai. Hnial tumna pawh ka nei lem lo. Huang zauh chu thil pawi tak a ni pawhin ka hre miau lo.

Ka mut hnu lawkah ka beisei loh lutukin Sangkima’n min rawn call a, Pick loin ka melh reng ringawt. A tawpa,a rawn ti nawn leha,ka pick chuang lo. Biak nachhan tur ka nei lo hrim hrim.Phone ka dahthla deuh chiah tihin msg a rawn lut leha.Ka la lehnghal vat.

‘Naktuk zanah ka hmu duh che’ tih zawng a rawn thawna,ka ner nawk.Ka reply lo,muthilh tumin ka mit ka chhing lehnghal hmak. Minute tam pawh a liam hmain msg bawk a rawn lut leha, en duh loin ka mut ngaiin ka mu a. Ka rin loh lutukin ka lo muhil zui daih bawk.Zingah a msg ka en ta chauh.

‘Becky thihna leh ka chunga phuba lak tuma i chet mekna hi sawipui che ka duh’ ka thaw hak mai,ka hmuhna hmun tur a rawn ziak lang kalh. A hmun thlan lah chu a,ka kal zen zen lohna hmun,Ngaizel pheia hmun reh lai takah ala ni zui.

Nilengin ka awm a nuam lo,Sangkima hmu turin ka kal angem tih ringawt ka ngaihtuaha, chumai bakah Becky thihna leh ka phuba lak tumna tiin a rawn sawia,eng chen chiah nge alo hriat tih ka hre duh anih chuan ka kal ngei ngei a tul..Sangkima number ka en vang vanga, hreh zetin ka call ta nge nge. Rei pawh a ring hmain a rawn pick a,’ dar 8 ah’ tih zawng ka sawia,ka off nghal hmak.

Dawr atangin ka nu ka biaa, Lawmi nen kan thiante Damlo kan tlawh dawn avangin ka haw tlai ang tih ka hrilha. Min zawt chiam loin a aw ve mai.Lawmi hnenah ka nuin a bia anih chuan kan chhuak dun dawn tih hrilh turin ka ti a, ‘ nang hi,min lo biak laiin ka bulah awm lo la,nangmah be duh se engtin nge ka tih anga?” mangang zetin a rawn ti a.

‘Lo ngaihtuah ve tawh mai rawh,I chingfel thei ang, Nakinah ka hrilhfiah ang che’ ka ti a. Min hnial chiam hmain ka off nghal daih bawk.

Dar 8 a ri tawh,Motor veivak an tlem tan tawha. Thlasik vanglai tak leh thla mang lai a lo ni lehzela,a nuam viau lo. Vawt ti zetin ka inkuangkuaha,ka lukhum ka khum tha sauh sauh bawk.Sangkima lo thleng har lutuk chuan min ti thinrim hlur tawh a,khur bauh bauh chungin phone ka phawrha, ka call hmain tawng thawm ka hriaa..Thawm awmna lam ka hawi pheia,a thim bawk nen tumah ka hmu thei lo..Rang zetin ka dinna bula hnim zingah ka tawlh lut vat.

Ka tawlh lut fel deuh chiah tihin phone light niawm tak eng va va ka va hmu a, ka Scooty an enkuala,zawite tein an tawnga, kan inhnaih bawka pahnih anni tih ka hre thei.Tlemin lo tawlhsawn har deuh ila chuan min rawn nangching hman ngei tur ania..Thim zingah thawk ka la ham ham mai.

Pakhat zawk Phone a ri a,a pick vat.’ Hello..U Sangkim,a Scooty chu a awma.Amah kan hmu lo,kan zawng kual deuh dawn nge?” a tih ri ka hriat rualin ka thisen kal lai a chawl nghal thuap ni maiin ka hria..

ROSANGKIM le(h) hetiang bawk hian nizan khan Becky kha a bum chhuak anga, a thi ta a ni ngei ang..


Note: Caption en la aw..Chuan,min lo click sak leh ula.In fel kha....