ANNEM - 9

Chapter- 9

 Ngaihtuah buai miah loin ka pan hnai nghala,ka ṭhuhniama. Ka zuk khawiha,a che eih lo. Minute khat em pawh aliam hman angem tih turah kha chuan kan inhnial kha ania,mahse tunah erawh mithi ang maiin che loin a mut ngaiin a mu zawi tawp. Ka rilruah a tider anih rinna a rawn awm thuta,ka tho a. Ka tawlhsawn nghal daih bawk. Mahse,achet tak miah si lohah chuan ka pan hnai leha,tim deuhin ka ṭhu hniam leh a.

‘Hey,I harh em?” tih pahin ka sawia,min chhang lo.

‘Sangkim,ka ṭawng i hria em? Engtin nge i awm?” ka ti leh a, chhan chu sawi loh,a che eih lo hrim hrim.Kaihthawh tumin a Coatah ka pawt a, a zawi vek bawk si nen a rit ngang mai. Harsa zetin ka malchungah a lu ka nghat thei ta hram,meng loin ka dah ang angin a awm zawi tawp.

‘Sangkim…’ ka ti leha.A biangah zawitein ka benga,a rum deuh hawka.Mahse, a che zui chuang lo.A dik dawn lo tawp.Min pui tur ka zawn angai. Ka hawikuala,che zeuh pawh hmuh tur awm loin a reh ṭhuap ringawt. An Hotel Parking hi Building hnuai ber a awm a ni a, hnung lamah ala ni zui bawk nen eng emaw titakin a fal deuh tlat bawk.

‘Tu nge awm? Min lo pui thei em?” ka au ta ngawta,chhanna awm loin a reh tlawk tlawk.Dimtein ka malchung aṭangin ka dahthlaa,tu emaw tal min pui tu tur koh loh chuan kalsan ngawt chi a ni miah lo.

Ka thochhuak chiah tihin a rawn rum leh hawka,ka en vat.Mahse, a che zui chuang miah lo. Gate lamah ka pheia,Gate tawntirhah Security a lo ṭhu a, Phone a lo bih ngar ngar.

‘Thianpa..’ ka ti a. Ka aw a hriat veleh phawk zetin a rawn hawi nghal vut.

‘Enge ni?” amah nena inhmeh loh zetin a titham chal.

‘Ilo kal lawk thei em? Saw laiah sawn damlo an awma’ ka ti a. A mengphawk vak ringawt.

‘Khawiah maw?” a ti a. A rawn tho a.

‘Min lo zui la..’Ka ti a, min chhan pawh nghak loin Sangkima awmna lam ka pan pheia,a rawn pen ri hlawk hlawk ka hriat chuan min rawn zui tih hrilh hranpa ka ngai lo.

A mut ngaiin a lo la mu a, Security-in tunge anih a hmuh rualin a ri nghal hlut mai.’Ehe!! Sir,I harh em? Enge a awmzia?” a ti nghal a.

‘Ka hre bik lo.Ka hmuh chuan tikhan a lo mu a’ ka ti a.

‘Hotel neitupa hi ania. Tihzia lutuk,ala thaw hlauh mai’ a ti leh a. Phone a phawrha, thawm nei lo thei ang berin ka tawlh let zal zal thung.

Hotel piaha Motor bulah ka dinga. Reivak loah Hotel atangin Motor a rawn tlanchhuaka,Emergency light a pawt eng va va. Ka thaw deuh huai mai.Muangchangin ka piah deuha Taxi ka pan pheia. Ka ṭhu lut nghala..Ka kal duhna ka hrilh hnuah hnunglam ka nghenga,ka mit ka chhing zui nghal vang vang.

In ka thlen veleh ka lu nat thu sawiin room lam ka pan chho nghala,ka inhlip sawk sawka,khumah ka inthawlh nghal hmak. Sangkima awmdan mak lutuk kha ka ngaituah chhuak lehnghal zat bawk. Engvangin nge khatiang khan a awm thut? Kan inbiak aṭanga nikhawhre lova a tluk hun kha a inkar a hnaih tluk zetin a awmdan a inhlat thung.Ka inbiak lai khan na nei hmel a pu der bawk si lo.Chu aia mak lehzual pakhat ala awm cheu..Nia,engvangin nge that duh khawpa haw si khan a nunna chhanhim turin ṭanpuitu ka koh leh si?! Khalaiah khan thi turin kalsan pawh ni ila ka dik lohna a awm dawn miah si lo. Min vaua,ka nu thlenga khawih duh khawpa pawisak nei lo a ni tih hrereng chung siin ka kalsan miah si lo chu anih kha.Huiz,ka a ta anih ngei dawn hi a.

Mitthial urh khawpa muthilh ka tum nasat hnuah khawvar dawn hnaiah ka muhil ta chauh.Chutah pawh ka mangchhia-in min tibuai zui leh a.Sangkima natuar tlu reng kha ka hmu a,hmai thi hnuangin min lo kawka,’nangmah vang anih hi,ka that dawn che’ tiin min lo um a,Hlauhlawpin ka harh leh a. Thlan fimin min lo bual huh vek. Muhil ngam tawh loin ka mengtlang ta thak.

‘Nizanah khawnge ikal a? Malsawma’n anghak reng che a’ ka nuin min hmuh veleh a lo ti hmawk hmawk.

‘Hna pawimawhah ka chhuak dawn ka tih kha’ ka ti awlsam mai.

‘Phone Switch Off kher kher angai hleinem.Tun angah phei chuan inngaihtuah anat tehreng nen’ a ti leh a. A sawi dik,Police lamin min veh reng laia Sangkima hmu tura ka lo va kal kha a finthlak viau lem lo. Mahse, Ruatsaka hnen aṭangin a clear vek tih ka hriat hnuah chauh ka chhuaka,engmah hlauhthawn tur a awm lo.

‘Enge Malsawma chu min nghaha?” ka ti a. Tuilum ka thli chhuak paha.

‘Angaihtuah che mawle aw. I normal lo tih a hriaa’ ati leh a. Ka tum loh deuhin ka ner nawk.Kha lehchen ka u ṭhianpa a lo ni tawha,ka thil hmachhawn mek hi a nep lo viau bawk nen min ngaihtuah hi a mak lo.Mahse, Lawmi’n min ngaizawng ni a a hriat thu a sawi kha ka tum reng vang ni loin ka hrechhuak zing ta malh malh viau mai. Engmah sawi lo mah se min ngaihven dan hi thisen zawmpui lo tan chuan a chuangliam tihna chen ka nei ṭan miaua.

Ka nu leh Patea Damdawiinah lamah an kala. Dar 10 velah Ampuia leh Lawmi an lo kala,chawhnu lamah Rasky leh Zohmingi an lo kal leh bawk.Tlai chaw ei nghal turin ka ti a, min hnial loin an vaiin an ‘aw’ nghal dial.Ka nu leh Patea an lo thlen hnu lawkah Malsawma a lo thleng veleha,Ka nuin chawei nghal turin a ti a. Ka ṭhiante nena hunthawl neih ka chak tehreng nen,ka nu ka ngei ru deuh ṭun thei.

‘Naktuk zanah ka lo riak ang.Zanin chu tihtur ka nei laklawh em mai’ midang kal vek hnuah thawhchhuah pahin Lawmi’n a ti a.

‘Ngei ngei aw’

‘Ka tum phawt anga..Enteh..’ sawizawm loin angawi leh daih.

‘Sawi la…Khatiang kha ka ngei chi tak’ ka ti hlak.

‘Aah,a ho lutuk.Ngai leh lo mai’ a ti leh tlat. Hetianga thilsawi leh duh loh hi a chin ṭhan a ni a, ka ngeizawng tak a ni tih a hai lo.

‘Ninawm’ ka ti hmak.

‘A ho ka ti leh sia,ih..Malsawma hian a ngaizawng chiang lutuk che ania’ zawi deuhin a ti a. Ka melh vak thung.Za lo zetin a nui a.

‘I ninawm e..I ngaihbel laklawh anih kha’ ngaipawimawh lo hmel deuhin ka ti liam puat.

‘Teuh lo mai,ka tum vang pawh ni loin ka lo mitmei char chara,a endan che kha a pangngai lo reng reng.I ngaihven loh vangin i hre lo mai mai anih kha’ a ti leh a.

‘Shh..A hre reu reu ange.Awm ang lo lutuk’ ka ti vat.

‘Hre mai mai rawhse a. Dawt pawh a ni hleinem.Bakah,Ampuia ai chuan ṭha ka ti zawk fe’ a ti leh talh.

‘I ninawm zia hi..’

‘Min ning lo chiang em mai,min ning la chuan naktuk zan riak turin min sawm ṭawng ṭawng lo vang.Ka ti tak tak alawm,amah hi a Mature tawh si.A rintlak bakah a pawimawh ber zinga pakhat chu a chhe lem lo viau lehzela’ nghal zetin a hmui a tipawrha. Engmah sawi loin Lukhamin ka vawm a.A nui zui ar ar..

‘A Care zia che hi aw. Engkim a tihsak vek che ania,tunah pawh a kutah dah tawp la,a fel vek ang’ a ti leh zat zat.

‘Duhtawk teh,minti chau zual.Ka ipik ania’ ka ti leh a. Min rawn en a,ka hmelah sawizawm ka duh loh zia a hmu aniang.Nuamti lo hmel a pu a. Ka khawngaih angreng.

‘Sorry…Ka sawi tawh lo vang.Eee,ka hrechhuak chiah.Nizanah Sangkima a Hotel Parkingah nikhawhreloin an chhar an tia sin. I lo hre tawh em?” hrechhuak thut niawm takin a ti a.

‘Hre nang,ava mak ve a’ ngaihven lo thei ang berin ka ti a.

‘Nia,tukinah Gymah an sawi a. Mak ka lo ti rap mai.Mahse, tunah chuan a ngaihtuahawm loh an ti a’ a ti leh a.

‘A ṭhat nasat chu’ ka ti liam leh puat.

‘Ka kal dawn,pawn thleng min lo thlah la’ a ti leh hluai.

Inhnuai lamah kan inzui thlaa,Ka nu leh Malsawma an lo titi mawlh mawlh. A haw daih tawh emaw ka lo tia.

Lawmi kal hnuah lut leh mai loin pawnah ka ding deuh vang vanga, kan Gate aṭanga langthei kawng lam ka thlira, a eng phei deuh ruih. Ka mitthlaah Sangkima’n min rawn thlir lai kha a rawn lang thuta.Ngatinge khami tlai khan min zui ngawt ni? Kan in a hriat duh vang ti dawn ila ka ring chiah si lo.

Ka let leh lamah ka Cousin Dawr kaltur nen kan intawka,ka ṭhat leh ṭhat loh min zawt luam. Ka Nutei hi nu zawiawi tak,ṭawngkam vin nei mang lo a ni a, mahse kan naupanlai atangin chhungril tak hian ka pawh thei miah lo.Kan inbechhe ngai lo va,ka nu nen pawh harsatna an neih ka hre ngai chuang lo. A sualna sawi dawna sawitur awm miah si lo,mahse midang tana pawh harsa tlat lawi si a ni a, ka Cousin te pawh hian an chhun vek. Kan inhnaih em em a, Gate pakhat chhungah kan cheng bawka.Mahse,kan inhnaih tehlul nen hian kan inkawmngeih viau lutuk hran miah lo.

 ‘Enge Damdawiin lam chanchin?” ṭhut thlak ve pahin ka ti a. An lo hawh tirh khan ka zawt tawha,’ an tha tawh lutuk’ tihbak a sawi lo va. Midang awm ve te kha ka ṭhiante vek nimahse a chipchiar an hriat a duh lo tih ka hre thiama,ka zawt lui lo.

‘An tha,I Pa Junior thin,Sangthana kha enkawltu a lo ni hlauha.A sawi dan chuan an thil eiah khan thil inhal ve reng a awm bakah an chhungkaw ho khan chawhmeh zinga pakhatah khan Allergy an lo nei atia.Naktuk lamah chuan an chhuah theih mai a ringa’ hlim zetin ka nuin a ti duah.

‘A va lawmawm. Police lam hian min rawn be leh miah lo va, mahse Dawrah chuan an kal nawn leha,an thilei pawh kha an en nawna’ ka ti a. Malsawma’n min en reng tih ka mitsirin ka hmu ru kara, Lawmi thilsawi kha ngaihtuah loh hram hram ka tum tlat bawk.

‘Damlo te ber an ziaawm chuan thil pawi lutuk a thleng lo turah ngai ang.Naktukah ka ṭhianpa ka lo bia anga, tihfel dan ka lo ngaihtuah dawn nia’ Malsawma’n a ti a.A sawi zawh rualin a tho a, tukverh lamah a kal pheia. Pawn lam a thlir vung vung. Hnung lam aṭangin ka en a,Palian lam a ni a, lian Over tihtur erawh a ni lo. A hmelchhe lo va,a hausak bakah a rintlak lehzela. Luck lo zawk zawk a ni lo..Atthlak lutukin Sangkima nen ka khaikhin zauh pek.

‘Nia,lo bia la.I biak fel theih phei chuan a lawmawm viau ang. E,Mala,Dawr pawh hi hawn leh maitheih anih ka lo beisei deuh asin’ ka nuin a ti a. A rawn inhera,a rawn kal pheia.A hmaa a ṭhutna lam pan loin ka ṭhutna ṭhutthlengah a rawn ṭhu thla ve a.

‘Nia,hawn leh theih thuai beisei ila.Mahse, eng emaw chenah chuan Customer erawh in chan ve nual hmela.Pawi ti lutuk lo la’ ka kut a rawn vuana. Ka phu deuh zawk. Rang zetin a lasawn veleh mai.

‘Ka hre thiam alawm.Min buaipui nasa sia,ka lawm ‘ ka tiṭha ve mai.

‘I u ka nia, ka tihtur alawm.A ni lo mi?” nui chungin min en a.

‘A dik..’ ka nui ve var var. Mahse, a mitmeng buang deuh thak maiah chuan a sawirik loh thildang daih ka hmu tlat thung.Ka hmusual em phei chu ka hre lo.

Ka mu meng kar mai,ka ngaihtuah naah ka nu thilsawi kha a lo langa. Khami te chhungkua khan Allergy an lo neih avanga damlo rual thup anni kha thil pangngai tak angin lang mah se thil pangngai niin ka hre thei tlat lo. Kan hawntirh atangin mi tamtakin an thil ei ang kha an ei tawha,anni chhungkaw ho, chhungkaw ho tih lemah a nupui chhungte pawh an tel ve tlat avangin thil ei huat rual ṭhup kha a awihawm loh lutuk.

Atir khan tu tu nge Kitchen lamah lut ka zawta, kan Staff zinga mi ni lo tumah kal an awm miah lo. Anih si chuan kan Staff zinga tu emaw berin Sangkima hna a thawhsak tihna a ni. Ka thuchhuak zawk mai. Tu ber nge ka zawnchhuaha,ka thehchhuah vat loh chuan tun aia pawi zawk ala thleng leh dawn chiang lutuk tlat.

Ka Phoneah Msg a rawn lut a, ka ban vat.Malsawma a lo ni a, ka thaw hak mai.

‘I muhil thei em?” tih zawng.Reply loh ka tum zeta, atthlak ka ti leh hnuhnawh.

‘Aw, muhil thei ang’

‘Ok..I muthilh theih loh chuan min rawn call dawn nia’ ka ner nak ringawt.

Thil duhawm lo em em kha nireiloteah a inthlak danglam leh ta thut. Damlo ho inenkawlna senso kan tumsak veka. Tunah chuan an vaiin an chhuak vek tawha.Ngaihtuah zui ngai pawh an awm lem lo.Dawr pawh hawn min phalsak leh tawha. Malsawma sawi ang ngei khan Customer erawh an kiam deuh duak. An thilei sual kha an mahni lam dik loh zawk tih sawiin insawithiam leh chiam mah ila kan hmingchhiatna ala rei loh miau avangin awmzia a neih ka ring lo va. Ka tita miah lo reng bawk. Kan mamawh chu "hun" a ni tih chiang takin ka hria.

Ruatsaka hnen aṭangin Sangkima’n Damdawiin a chhuahsan tawh tih ka hriaa. Ka thaw deuh huaia. Mahse,Damdawiinah Amber-in a awmpui deuh chawt tih ka hriatna chuan ka awm a tinuam lo leh ringawt tawh thung.

‘Naktuk tuklehah i pi chu kan  zuk kalpui ang.Vawiinah Ticket pawh kan la fel tawha’ chawei laiin ka nuin a ti a.

‘Ehe! Ava chawpchilh leh si ve’ ka ti vat.

‘Nia,Hripui leng hi zia lam a pan anih si loh chuan tun hi kal hun lai tak a nih ka ringa. Nimina an inentir leh khan kal theih chuan kalpui mai a pawi lo tih an lo sawi leh a. Refer pangngai angin kan kalpui ang’ a ti leh duah.

‘Nia,a hunlai tak aniang. Tu nen nge in kalpui ang?”

‘I Putea nen. Dingi awm lo mah se i ngaihtuahawm lo ang chu ka timaia’ ati leh a. Niminah Dingi an chhunghnai pakhat  Boral zuiin an khuaah a haw a. Karthar lam law law a lo chhuk turin ka nu a rawn biaa. Ka nu pawhin a lo 'aw' ve mai bawk.

‘Ngaihtuahawm loh ang. Duh leh Lawmi pawh riak turin ka sawm thei alawm’ ka ti a.

‘Nia,lo riak se a tha tak ang.Kan zin chhung chu lo awmpui che sela.Nakinah a nu ka va bia ang’ a ti leh a.

‘Ngai lo.Keiman ka lo be mai ang’ ka ti vat. Diktak chuan lo riak lo mah se pawi tihna ka nei lem lo. Mahni a awm hi ka hlau hran loa.Achang phei chuan mahni a awm hi nuam ka ti zawk mah zel.

Ka nu te Airpotah ka zuk thlaha,ka haw hnuah Dawrah ka kal leha. Rei awm loin ka haw a. Eirawng ka bawl chawpa, siam duah loin thil ho mai mai ka siama,ka siam laiin ka pi a rawn luta, ka nu te chanchin min rawn zawt luam. An thlen tawh thu leh naktuk lamah Doctor an hmu dawn tih ka hrilha. A bu nghat nghat.’ Ka rawn riahpui dawn che em? Nge ilo riakphei zawk ang?” a ti a. Riahpui ka ngaih loh thu ka hrilha,a pawm chiah lo nangin min tilui lem lo.Diktak chuan Lawmi pawh ka be ta lo hrim hrim,ka nuin ka biak leh biak loh min zawta, a rilru nawm nan ka bia angin ka sawi thung.

Ka Phone riin min tiharha,ka ban vat. Min rawn call tu number ka en a. Ka Contact list ami a ni lo. Sana ka en a, dar 12 a hnai tawh.

‘Hello..’ ka ti sap.

‘Kawngkhar lo hawng rawh’ Sangkima aw pa zetin a rawn ti sup. Mak ti lutukin ka thuchhuak nghal zawk.

‘Enge i duh?” mak ka tihna thupin ka ti chang fak. Ka sawi zawh rualin a thaw hak ka hre zui zat bawk.

‘I lo hawng dawn nge Tukverh ka tikeh zawk dawn?” a rawn ti leh hmuk.

‘Kalbo rawh’ ka ti hul hak. Ka Phone ka off zui nghal hmak bawk. Mahse, ka phone ka dahthlak rualin Darthlalang keh thawm niawm tak ka hre zui nghal zat thung.

Che loin thawm awm leh hun ka nghaka,mahse a reh vung vung. Tun lawka min rawn biakna kha ka mumang a ni lo tih ka chianga,Darthlalang keh thawm ang tak ka hriat pawh kha ka hre sual miah lo tih ka chiang. He Sangkima hrep hi engti turin nge hetah a lo kal ngawt ni? Chu pawh zanreiah lehnghal,thil pangngai a ni thei lo hrim hrim.

Khum aṭangin ka chhuka,Slipper pawh bun loin ke lawngin kawngkhar lam ka pan pheia. Lawmi riak tura ka sawm lo mawl ka inti leh hnuhnawha,Awmzia a awm tawh der si lo. Mahse, kan in a Tukverh zawng zawngah Bar a invuah veka,Darthlalang tikheh eng ang mah se lo luh ngaihna a awm miah lo tih ka chianga. Chu chuan min ti thlamuang viau lawi.

Room aṭangin ka chhuaka,Inhnuai panna Step tawntirha Switch awm ka hmeta,a eng nghal pap. Mahse, Inhnuaia thutkhawmna pindan erawh a en pha tehchiam lo thung.Stepah ka chhuk thlaa, ke lawnga kal ka ni bawka thawm ka nei mang lo.

Living Room ka thlengthla chiah tihin thil tliak ri deuh bak ka hriaa,ka khawng nghal lah,kalsawn loin thawm lo chhuahna lam hriat tumin ka dinga. Minute khat vel chu a reh ṭhapa,kalsawn leh ka tum lai takin ka pa Lehkhachhiarna Room lama thil tla ri bawl ka hre leh a,rang lutukin ka per deuh dawrha,Pangpar khawina,Dar atanga siam rit leng lawng chu ka hum nghal chat.Tlaiah khan ka nu Pangpar khawisa a vuai deuh tawh avangin ka lo paihruak hman hlauh bawk.

Dingdihlipin ka pan pheia, Bar a awm vek chungin a lo lut thei tho tih achiang tlat. Engtin nge a lo luh theih tho erawh ngaihtuah chhuah mai ngaihna ka hre rih lo.Kawngkhar bulah ka dinga, nghet lutukin ka thil ken ka huma,a lo chhuah rualin ana thei ang berin ka hlap dawn a ni tawp mai.

Rei pawh ka din hmain Kawngkhar a rawn inhawng ṭial ṭiala,thawk pawh thaw ṭha ngam loin ka ding khawng lah mai. A rawn inhau zau zela,mahse tumah lo chhuak an awm tlat lo. Thawklehkhatah hlauhna in min rawn tuam thuta,Sangkima ni loin midang zawk anih rinna ka ngei nghal thut bawk. Sangkima kha chuan aruka luh tum loin min rawn call harh kha ania.Mahse,tuna ka thawm hriat hi chu thawm nei lo a lo luh tum thawm a ni tlat. Tukverh tihkeh a tum thu a sawi vang khan Darthlalang keh thawm kha amah turah ka ngai ngawt kha ania.Ka Phone ka hre chhuak thut. Huizz,khumah ka lo kalsan daih chu niin.Engvangin nge maw ka fimkhur loh viau mai le aw.

‘I din reng chuan i ke a kham viau dawn ania’ Sangkima aw in a rawn ti thuta, ka ngaihtuahna lo buai laklawh bawk nen ka phu nasa lutuka ka zuang deuh dawrh thei.

Muangchangin a rawn penchhuaka, chet nachang pawh hre loin ka en a, Lukhum phiar a khuma,Jacket a mal chanve thlenga fual a haa,Jogger Pant a ha a. Millitary Boot a bun bawk.Nidang ang bawkin ka tum vang reng pawh ni loin a incheina langthei chin ka hmu kim lehnghal vek pek.Awm lo lutukin amah ka hmuh rual khan ka thawveng hawk zui bawk. Midang kha lo ni se enge ani nen danglamna vak? A lo kal hun ngaihtuah hian thil lawmawm lam a ni dawn lo chiang lutuk.

Ka che thuta, ka thil ken ka vai nghal pawp bawk.Mahse, ka chet tum dan hre lawk ang hrimin min bum zauha,ka Balance abuai ve thung. Ka tlu tur invai vel chu ka banrekah tak a rawn hmera,min pawt let nawka. A kut lehlamin awlsam zetin ka thil ken min laksaka,thutthleng hnai berah a thehphei nghal daih bawk.

‘Mi tenawmpa,min thlah rawh’ ka ti chang fak. Min thlah ve mai bawk. Khawih leh pawh tum loin ka kut a hmerna ka tuai a. Kut hnung suih chungin a ding khawng luha,hriatthiam har zetin min en chhuk run bawk.

‘Ka au vak hmain chhuak rawh.Anih loh chuan a pawi viau ang’ ka ti leh hmak.

‘Ka chau..Ka mut a chhuak’ ka thilsawi nen a inpersan lulai lutuk.

‘Haw la,I mu thei ang.A tha em?” ka ti nghat.

‘Hetah hian ania mut ka duh.I phal chuan?” a ti awlsam leh mai. Eng chu nge a hriat hrep ni? A damlohna khan athluak a khawih deuh zawk nge ni?

‘Enteh,dar engzat nge i hria em? Tun hun hi mi ina len hun a ni lo ania,chu pawh hmelma te inah lehnghal’ ngaihnobei lo zetin ka ti leh salh. Ka thusawi engahmah ngai lo hmel zetin a hmui a petsawia. A lukhum a a siamtha a, a thle leh buka,a din dan ngai bawkin a kut hnung lamah a suih leha. Chetsawn tum hmel pawh a pu chuang lo.

‘Zanin chauh i bulah ka riak thei angem?” ka hre sual emaw tiin ka melh vat.Mahse, a hmelpa leh ngeng zetah chuan fiamthu a sawi lo va, ka hre sual lo tih achiang. A thluak lam achiang lo tak tak anih ka ring nghet hmiah. Mahse, a rilru a fim lo anih pawhin ka riahtir dawn tihna a ni chuang lo.

‘Chhuak rawh’

‘Khawngaihin…’ min la ngen tak deuh deuh.Hahthlak…

‘Rosangkim...Mi a ka ni emaw iti alaw? Fair taka kan inbeih theih nan tunah chance ka pe leh ang che.Kal rawh’ inringtawk lutukin ka ti dam leh thlap.Engvanga inringtawk ta thut nge ka nih ka hre miah lo thung.

‘Engpawh ti rawh,kal tumna ka nei lo’ mak khawpa damin a ti nghut.

‘Ka u chuan enge thleng dawn i hriat ka ring’

‘Au la…I duh phawt chuan’ a ti awlsam leh mai.

‘Aaah,a ṭha lutuk.Anih chuan mi in a luhruk thubuai i nei dawn tihna anih chu.Ni lo,tualthah tumna ti zawk ila…’ ngeiawm zetin ka ti a.

‘Pawi miah lo.Mahse, I sawi kha engmah iti dawn lo. Ti dawn nila chuan min hmuh tirh khan iti tawh ang’ mahni inringtawk lutukin a ti leh nghut. A sawi dik lutuk chuan min deng deuh dawt thung.Ka hmaa ding mek,ka u thattu leh ka chhiatna tura beitu hi engvanga hum duh tlat si nge ka nih ka inhre thiam miah lo. Keimah zawk hi ka chiang lo anih awm hi maw!!!

‘Ka ngen che..Zanin chauh aniang’ amah bawkin a ti leh sup..

Note : Chapter 9 ka dah belha,zaninah chapter 10 ka dah belh thei dawn em ka hre rih lo aw.