ANNEM - 16

Chapter- 16

Lawmi thaw ri sak sak chu ka ngaithla kara, chhin khat te pawh ka la chhin ve eih lo thung. Ka mitthlaah Amber-i kutzungtanga zungbun awm kha a lang renga,tihbo ka tum pawn ka thei lo. Mizo zingah hian inhual hmasaka,vantlang zinga puanchhuah kher hi mi nawlpui tihdan a ni lem lo va,aruka pahnih remtihnaa lo inhual ve erawh an kat nuk ang. A tlangpuiin inkawp rei tawh zingah pawh hian palai tirh hma hi chuan kan intha en liam vel mai mai a ni deuh ber.

‘Naktuk chawhma lamah kan kal dawn tho sia, lo riak phei daih la’ Lawmi’n min ti a, ihe loin ka pawm nghal hmak. Ka awmdan dik lo ka thianten an hmuh lohna turin theitawpin ka incontrol a,mahse chaw erawh tihtham ka ei lo. Ka hrawkah min hnawh tlata, ka ei lui thei ngang lo.

‘I nawm loh hmel e’ Lawmi’n min ti chat renga. ‘Ka pum a no hlui zela’ ka ti ve ngawt.

‘Chaw i ei mumal lo lehpek aniang chu.I pum chhiat tehreng nen’ a ti hlak hlaka,min ringhlel awmin a awm lo.

Ka nu hnenah Lawmi te inah ka riakphei dawn tih leh dil sahna lamah  zankhat kan riak dawn tih ka hrilh lawka.’Inah khan riak dun zawk ula,in chhuahsan vek chu a tha dawn mi?” a rawn ti a,’ Lawmi pain zing kal a ti maitheia.Chu vang ania’ ka tih takah chuan a sawi nawi zui lem lo. Kan inhlat lem loa,zing kal tur pawh ni ila riakphei kher lo pawhin a buaithlak loh.Mahse, riah duh chhan ka nei miaua.

‘Malsawma khan kal ve a chak lutuka,ka lo sawm ve tep a’ ka ti satliaha.

‘Maw? Lo kal ve se.Ka u thiante pawh an kal dawn lawm.Thlamah kan mu tlar put mai ang chu’ nui kar kar chungin Lawmi’n a ti a.

‘Kan huan a ni ve si lo va, ka lo sawm ngawt ngam lo alawm.Bakah,thil i ngaihtuah mak thei sia,ahming ka sawi chuan i duh duh i ngaihtuah leh anga’ nui chungin ka ti a.

‘I chhe mai anih chu a,tak takin in kan thlen hunah ka pa ka hrilh anga,a phal ang’ awlsam zetin a ti leh mai. A sawi ang ngeiin an in kan thlen veleh apa hnenah Malsawma a sawm ve dawn tih a hrilha,’ hruai ula,in riak dawn bawk si a.Mipa awm ve chu a tha alawm’ a ti awlsam then.Malsawma ka call nghala,mahse in entir tura kal a tum tih ka hrechhuak lehnghal a..Ka sawia,’ a ho lutuk.Ka tha vek tawh’ a rawn ti zangkhai vuh.

Lawmi tihharh hlau takin ka inleta, ka mitthlaah Sangkima a rawn langa,tunah hian ka Roomah a awm angem? nge a nupui hual bulah a mu ang? Ka uak lo chauh..A thil tih tenawm lutuk avangin huat ka duh.Mahse, ani ni loin keimah a ni huat tur zawk . A thusawi ka ring leh kha dem tur an awm anih phawt chuan keimah chauh ka ni ang.Ka Phone ka bana,ka off daih avangin ka On chawpa..Ka On fel deuh chiah tihin msg a rawn thleng nghala,Sangkima min call tumna msg a rawn lut nghal pawp pawp. Mahse, msg pangngai erawh pakhatmah a rawn thawn lo thung. ‘Naktuk zanah ka lo let leh ang’ a tih kha a ti tak tak anga,ka lo awm si loh avangin min rawn biak a tum pawh a nimahna.Hrep hian a..Nupui hual a neih thu ka hriat loh a ring nge ni a nupui hual nei kha duh takin ka lo lawm ala beisei ngam cheu zawk ni? Aaaa,a lo kal dawn lo tih a sawi tum vanga lo call pawh a ni zawk thei tho.Zanin chu atan chuan zan Special tak a ni tlat. Beidawng thinrim bawk siin ka thaw halh mai.

Tim deuhin IGah ka lut a, Amber-i Post kha enchian leh ka duh tlat,a thil design ho a dahchhuah thinna chauh ka follow a, a mimal hi ka follow lo hrim hrim. A lo indah Private daih chuan en ngaihna a awm lo ang. Mahse, ka search a, Amber tih hmingpu an lo tlar thla dul.  Amah ber ka hmu nghal chata,vanneihthlak takin alo indah Private lo hlauh. Pic a post chu ka en a, Comment a tam ngang mai; ka enthla dan dana, a then chuan Sangkima an mention a. Mahse, Sangkima a rawn lang miah lo a,Amber-i zawkin a then chu a reply hlawm.

Comment ka en thla zela,thenkhat chu Amber-i Close friend te anni tih a hriat theih mai. ‘Bsa_85 ‘ tih chuan ka mit ala nghal chat. ‘Wow,mak ve’ tih zawngin a comment a, Sangkima rawn buaipuitu Bsa kha anih ringin ka stalk nghala,a lo ni ngei.Mahse,a active Over lo a ni ang,Post a nei tam lo. Thlalak ho ka en a,Sangkima nen Silai keng chunga Jeep bula an ding dun lai chu ka en vang vang. Nikum thal laia a Post a ni a, an kalna hmun pawh Phawngpui tlang tiin a dah kalh.

Ka Off leha,muthilh tumin ka mit ka chhinga, mahse ka mit ka chhin rualin ka mitthlaah Sangkima a lo lang lehnghal zat. Ka meng leha, chung lam ka melha ..Beidawnna mak lutukin min rawn fana,’ chance vawikhat chauh min pe rawh,ka chingfel vek ang’ a tih ri kha ka bengah chiang takin a rawn ri nawn leh a. A sawi laia a tihtak zia leh tuna thil thleng leh hi thilmak ti ila a dik ber awm e. Ka thaw halha, ka chhungril na ngut ngut chu ka mittui-in a rawn pui a, Amber-i nen an inhual tih ka hmuh atanga darkar fe liam hnuah ka mittui a tla thei ta chauh.

‘Hey, mut hlum i tum ami?” ka lu a rawn sawi pahin Lawmi’n a rawn ti a, ka mengchhuak nghala. A lo nui var var mai.

‘Dar engzat nge ri tawha?” ka ti a, tho chuang loin ka zi mar ar ar.

‘Dar 8 lek…I intih thawh hma theih theih nen’ a ti leh a. A kalsawna,ka let ve thaka,ka mit thial deuh urh chu ka nuaia. Dar 5 velah ka muhil ta chauh kha ania.

Ka tho a, ka inphihfaia,Lawmi erawh a insiam rak rak reng thung. Kan naupanlai atangin kan inkawma, kan in hi an in pakhat a ni a,an in pawh ka in pakhat a ni ve tho bawk. Zohmingthangi leh Rasky hi chu naupanlai atanga hria ni tho mah ila kan inhlat deuh bawka, inkawm tak taka kan inkawm chu kan tleirawl hnuah a ni thung. Kan inkawmngeih vek nangin Rasky leh Zohmingi an inkawm bik deuha, kei leh Lawmi..

‘I u leh a thiante pahnih an kal ve nghal leh si dawna. Malsawma chu a kal ve theih dawn chuan Motor a keng dawn em? A ken dawn chuan chhuak rual ula,naktuk lama kan mamawh tur pawh keng nghal vek ula a tha ang’ Lawmi pain chaw kan ei laiin a ti a.

‘Anun,Mala chu bia la..’ Lawmi’n min ti a. Ka bu nghat ringawt. Nizan khan chaw tihtham ka ei lo va,ka ril a tam lutuk.Mahse,Eng tham mah ka ei leh ta chuang lo.

Kan eikham hnuah Malsawma ka biaa, Lawmi pa duhdan ka hrilha,awlsam zetin ‘Bungraw ken tur a awm dawn chuan Pik-up keng ila..Scorpio pik-up a ni tho a, chuan a hrehawm loh vang’ a rawn ti awlsam then.

Dar 11 vela chhuak hman turin kan insiama,ka nu thlai chi tur nu Zothani dawrah Lawmi nen kan va lama,eitur siam awlsam chi kan lei nuala. Keini thianho bakah Lawmi u,Sangtea leh a thiante pahnih nen kan riak thla anga. Leilet enkawltu atana an dah hian Dil pawh a enkawl tel veka. Zanin atangin tui a paih tan anga.Naktuk zingah Lawmi pa te an lo chhuk veleh anga. An lo thlen veleh man tan theih animai.

Dar 1 velah kan chhuak thei ta chuah. Muangchangin kan tlana, ka thiante tawngri bawrh bawrh chu ka ngaithlaa, a khat tawkin ka chhang ve zauh zauh bawk.Mutchhuakin min rawn zem chiai chiaia..Ka harh leh meuh chuan Kolasib kan lo lut der tawh.

‘I mutui em? Hnar ring mai sia’ Rasky-in nui chungin min ti a.

‘Mutui rapthlak…Tinge kan din a?” ka ti a. Malsawma leh Lawmi an awm lo.

Huana eirawngbawl chawp leh ai chuan Hotelah ei mai ila an ti deuha. Hotel an va be lawka’

‘Um’ ka ti ringawt.

Reivak loah an lo let a, ‘I harh tawh maw? Zinkawng a tawi bik ngawt ang’ min rawn ti nghal bawrh bawrh.

‘Raju-a khan eirawng lo bawl chu a hreh lo va, mahse kan thahnem tho sia, hetah ei mai ila kan tia.Ka u te pawn pawi an ti lo a’ amah bawkin a ti leh a.

Kolasibah chaw kan ei a, huan kan thlen meuh chuan dar 8 a hnai thuak tawh. Assam type in lian pangngai tak a lo awm a,a bulah Assam type bawkin huanpu te khawsakna hmun a awm bawk.

Mutna pindan pathum a awma, mahse pindan satliah a ni mai. Khum pawh a awm lem lo. Bangah,Dunlop a intung a,an riah changin Chhuatah an phaha,an mu mai zel tih Lawmi’n a sawia. A remchang ka lo ti lehpek viau.Thutkhawmna hmun leh Choka a inzawm veka..Veranda zau tha zet a awm tel bawk.

Verandaah kan thu khawm taiha,Sangtea thiante pawh kan nel ta thuai. Kan veng ami anni lo ve ve a.Pakhat tlangval a ni a, pakhat zawk erawh nupui nei tawh a ni thung. Kan titi laih laiha,kan sawi tam ber chu hrileng chungchang a ni a,mahse han hlauh tehchiam ngaihna kan hre hlawm lo nge kan vei zui lem lo.

Kan thlanga dil tui khat pung mai chu thlain a chhun tle suar a, hmuhnawm ti zetin ka thlir dauh dauh mai. Motor thawm bengchheng awm loin rannung hram hriat tur a awm a. Eng emawti takin ka lung a ti leng veng veng a. Tap mai thei turin ka inpeih thlap a ni ber.

‘Kha….’ Malsawma’n a rawn ti a, ka hawi vat. No min rawn pe a, ka ban ve mai bawk.

‘I nawm loh hmel ka lo tia’ rawn thutthlak ve pahin a ti a.

‘Aih,nuam e…Ka muhil khan min ti zawi vek’ ka ti vat.

‘Um,nia..Nizan i mu tha lo ami? Zan hmasa lah kha ka tibuai chiam che a’ inthlahrun hmel zetin a ti a.

‘Min tihbuai loh kha a..’ ka ti nghauh.

‘Ka inthlarung viau dawna,mahse ka naute kha ini tlata’ nui chungin a ti a, ka then lui sak. Diktak chuan ka ngaihtuah naah Sangkima a awm tlata, a chetdan fair lo lutuk vangin ka naa,ka chhungril hi a sahal huam huam reng a. Engtihmah ka tui thei ngang lo.Mahse, ka thiante tana nuam lo tur khawpa khawsak erawh ka tum lo bura,control pawh ka in control nasa viau reng a.

‘Thiannu,I phone a ri char charin ka hria’ Lawmi’n min rawn ti a.  Ka tho vat, ka nu anih ka ringa, kan thlen hlim khan ka call a, a pick lo a. Min rawn call back anih ka ring nghal mai. Ka rin ang ngeiin ka nu a lo ni a. Mahse, ka pick hmain a tawp hman chiah thung. Ka call back nghala,vawikhat chauh a ring hman tihin a pick nghal mai.

‘I lo phone lai khan ipi an rawn nawrchhuak chiaha,ka chhang hman lo che anih kha’ a rawn ti nghal mawlh mawlh. Inrinni khan ‘ naktukah an zai dawn’ a ti a,Sunday anih vangin mak ka lo ti deuha, mahse ka zawt ta lo a. Ka rin ang ngeiin a lo hresual pek chu niin.Vawiinah an zai dawn tih zingah min rawn hrilh leh a..

‘Enge a an hmel? A harh tawh em?”

‘Harh tawh e. Doctor kha chuan an zai hlawhtling thawkhat chu atia. Pathian zarah hei a ngaihtuahawm loh’ a rawn ti leh mawlh mawlh.

‘A that hlauh chu,na a lo tih viau ka lo hlaua..E,thlai chi chu ka la ania’

‘I haw hunah ipi ipe dawn nia,inchungah khan lo chin tir la..Ala hma deuh nangin a pawi tawh lo ang.Nang lek kha chuan i ching awm der si lo ‘ a ti leh bawrh bawrh. A sawi dik lo lem lo,thlai leh Pangpar hi chu ka nu tihturah ka dah mai zela,englaimahin thlai chin leh pangpar enkawl hi tih ka tum ngai lo.

‘ In lo haw hun tur chu tumdan innei tawh em?” ka ti leh a.

‘Naktuk thleng phawt se, ipi awmdan azir animai. Mahse,tunkar tawp chu ka beisei deuha. Teseni pawh naktukah ka be nghal ang.Chuan,Malsawma azin dawn tho chuan ka lo haw hunah law law Dawr chu khawih tum ang. I Patea’n min enfelpui thei bawk anga’ a rawn ti leh duah.

‘Atha alawm,ani pawh hei a kal ve a’

‘Aaa,a zin dawn maw tih nak laia..A kal ve chu a that hlauh chu.Sangha kha hawn teuh kher angai lo ania. Mahse,a te nawi a awm teuh chuan ipi in a duh thin ania.Lei sak nual mahla a pawi lo ang’

‘Um,nia..A awm chuan..’

‘Ka dah dawn.Hei i Putea Hotel lamah a let dawna.Kan thlah lawk ange’

‘Um,Bye..’

Ka Phone ka kalsan leh mai dawna,mahse ka Cousin Mite-in min rawn call ve leh zat.

‘ Aw,Mate..’ zangkhai takin ka ti a.

‘I buai em?”

‘Aih, enge nita?”

‘I thianpa a lo kala..’

‘Tu ka thianpa maw?” a tawng laklawh laiin ka ti vat. Ampuia a ni thei lo tih ka chiang. Ni thei chu pakhat chiah,ka lungphu arang nghal titih.

‘Hmanni a lo kal kha ania,U Sangkima anih chu.Lawk aw,a be duh che a. Phone ka’n pe lawk ang’

‘Ni lo..’ ka ti that.Mahse,ka tawng a hre hman tawh lo tih Sangkima hnena min be tura a tih thawm chuan a tilang vek. Ka hmui ka peta, ka inhmuhruh tlat bawk. Tihngaihna hre loin ka Phone ka off ta ngawt. Hmanhmawh zetin a rawn call nawn leh hlauin ka switch off nghal vat.

Dawhkana ka phone awm chu ka en a, ka awm dawmin thawk ka la vang vang bawk. Eng chu nge maw ala duh tehchai ni? Ka Patea te chhungkuain tunge anih hre lo mah se vawihnih a lo kalna a ni tawha, a hming lah Mite-in a hre tawh bawka.Chumai bakah tunhma lamin a lo kal ngai lo a,tun hnaiah a lo lang sek mai hi ngaihtuah tham a ni dawn lutuk. Bialpa ka neih pawh hriat ngai loh leh mipa thian kawm vak ngai bawk si lo kha,min rawn zawn sek chuan tu nge anih an ngaihven lo thei dawn tlat lo. Ampuia nise aziaa,ani chu a lo kal f ova, an tan pawh thilthar a ni tawh lo. Chung zawng zawng aia pawimawh ber chu,a lo kal sek anih chuan ka nu pawn hriat hun ala nei dawn.Hmalam pan tuma ka pen mekna hun reilote chhunga at ka sona khan min tihbuai ka duh lo bur.

‘An be duh che…’ Lawmi’n min rawn tih thawmah ka zuang zawk lo chauh.

‘I va han phu nasa em em’ nui hak hak chungin a ti a, kei erawh chuan a phone min rawn pek chu lak pawh tum loin ka melh reng.

‘La ta che,Mite-in a be duh che’ amah bawkin a ti leh a. A phone a rawn lek hnai leha, ka hrawk ro lutuk tihnawng turin ka chil ka lem a. A rukin ka insangmar teuh bawk.

‘Aw, Mate..Ka phone Battery a low lutuka’ theihtawpa pangngai tumin ka ti a. Ka beisei ai tak chuan ka aw  pawh a chhuak pangngai.

‘Keimah zawk. Min biak duh loh vanga Battery low thut kha ka hre duh lo ania’ nelawmna tel map loin a rawn ti sup. Ka hmui ka peta, ka thaw hak mai. Lawmi’n ka darah a rawn khawiha,a mitmeiin zawhna min zawt a, a awm tih ka lo hre chang leh tawh lo. ‘Engmah a ni lo’ hmui phunin ka ti a. Hmui phun bawkin a chhuak dawn tih a sawi ve a. Ka kut ka vai zauh ringawt.

‘Enge i duh?” ka ti dam thlap.

‘I lo haw hun tur ka hre duha,I sawi duh lo anih chuan i kalnaah khan ka rawn kal ang’ khauh zetin a rawn ti hmuk. A bulah Mite-i a awm lo nge a awm reng chungin a pawisa lo zawk?

‘Ka chhungte khan ka thian anga an ngaih che ka duh lo ania.Tawng fimkhur rawh’ a zawhna chhang loin ka ti leh hmak.

‘Ka zawhna kha…’ ka sawi a haider ve hmiah.

‘Ka duh hun hunah..Lo buai suh’

‘Ah,a tha hle mai. Anih phawt,naktukah kan inhmu dawn nia’

‘Rosangkim…’ insum hman loin ka ti nghal that.

‘Ka zawhna kha chhang rawh…’

‘Naktukah ka lo haw dawna,mahse min biak emaw min hmuh pawh tum suh ang che’ ka ti chang faka,ka off zui nghal hmak bawk.

Ka khur dar dar tihreh tumin ka inkuangkuah a, a chet lak dan maksak lutuk khan min ti chiai niberin ka hria. Ka haw huntur kha hrilh lo ila chuan chiang takin naktukah helai hmunah hian ka hmu dawn tih ka hriatna hian a pawm thlap. Huizz,eng ber hi nge keimahah hian a duh tehlul ni?  

Hmeichhe ho Room khatah kan riak khawma,Sangtea thiante pahnih room khatah an awma, Sangtea leh Malsawma an awmdun bawk. Malsawma te kan venga lo awmreng tawh anni bawka. Sangtea nen pawh an inhre sa a. Room han luah dun mai kha harsatna a awm lem lo.

Muhil thei loin ka meng leh kar tawh. Rasky leh Zohmingthangi an hnar tlat tlata, a khat tawkin Rasky a rawn tawngvai leh niah niah thina, a sawi ber hriattur erawh a awm lo. Pawn lama rannung hram chiah chiah chu thawm dang a awm tak loh vang aniang,a ring ta sawtin ka hriaa; Ka ngaithla kar mai.

Lawmi a tal sat sata, ka mit ka chhing nghal vat. ‘Ti nge i muthilh loh a?” a rawn ti sa sa.

‘Motorah khan ka muhil nasa lutuka..Chuvang aniang’ pha buai duh loin ka ti tha ve mai.

‘Enteh,thil ka zawt dawn che’ a ti leh sap.

‘Eng chu?”

‘Tun hnaiah hian i awmdan hi ka lo chik che a, I danglam vek ania. Ti nge?”

‘Chutiang a awm pawh ka hre lo’ ka ti sep.

‘Aih, dik lo a awm tlat alawm. Mahse, min hrilh turin ka nawrlui lo che ania aw. Ka ngaihtuah vang che ania’ a ti leh a.

‘Ka hre thiam che alawm..Diktak chuan Family thilah tlema Problem tereuhte kan neia’

‘Um…Sawi duh suh. Chuan maw,Ampuia hi tinge i bialpa a ni lo tih min hrilh duh miah loha” a ti leh sa sa. A thusawi chuan min tiphu deuh zawk thei.

‘Ih…Eng lo ,chutiang lam pawh a ni lo’ awmze nei miah loin ka ti nawi nak ringawt.

‘Amah hian i ngaizawng lo tih a inhriaa, hmanniah a beidawn thu a sawia. Mahse,mak ka ti vak lo.Diktak chuan  bialpa nisi hian i awmdanah hian i ngaihven lo ka lo ti thei tawpa. Atir lam bak kha chu.Mahse, I sawi loh vangin ka zawt duh lo che a’ a ti leh sap sapa. Chhan mai dan tur ka hre lo. Lawmi hi ka best takzet a ni a, hman atangin alakah hian zep ka nei ngai mang lo va. Ani pawh chuti tho,mahse tun hnaiah hian ka nun hi zep tur hlirin a khat ta a ni bera. Ka ring lo nimiah si loin keimah leh keimah ka indangping ta zar zar a. Thawklehkhatah engkim hrilh vek mai duhna ka nei thut.

‘Ih…ka thluak a buaia,mi ka Hmangaih in ka hriaa’ ka ti halh.

‘Maw? Tu nge? ‘

‘I awih lo ngawt ang..Amah chu maw..” sawi zawm loin ka ngawi leh daih. Sawi lo tura min dal tlat tu awm ang maiin ka chip zui hmak.

‘Mala a ni em?”

‘Aih..Sorry, nakinah ka la hrilh ang che,tunah chuan ka thei rih lo’ ka ti ta sap.

‘Yes, tunah chuan muhil ang.Zing atangin kaikuang vel man tur a awm dawn ania’ zawitein a nui a. Min rawn kuaha, reivakloah a muhil zui a. Kei pawh mutchhuakin min rawn zema, ka harh leh chuan khua a lo var tan der tawh.

Midang tihharh hlau zetin ka tho tham thama, Rasky leh Zohmingi mangchhe lutuk chu thla ka laksak a. Pawn lamah ka chhuak pheia, Mipa ho pawh tho an la awm lo aniang,a la reh thap mai.

Verandaah ka dinga ,ka zi mar ar ara. Ka hawikuala,nichhuak tir in dil leh leilet a rawn chhun en iar mai chu hmuhnawm ti lutukin ka thlir a. Boruak thianghlim hipin thawk ka la vang vanga,  engkim mai ngawi thuap leh dam raih lawi si chu a hahdamthlak ngawih ngawih.

Lawmi Pa te dar 11 velah an lo thleng thlaa, Lawmi ni te nupa bakah a Patea an rawn kal tel ve a. Nimin tlai lam atanga tui paih tan kha zingah tui paihna lian atangin an paih leh a, Lawmi pa te lo thlen meuh chuan ngalrek chen vel bak tui a awm tawh lo a. Reilote an thut hahdam hnuah kan man tan a. Lian tak tak an awm laiin a te nawi an awm teuh bawk. Kaikuang phei chu man peih leh peih loh athu animai. Sangha lianpui pui han leu zuai zuai mai chu rak teng tung chungin kan um a, kan ri chel chul a ni ber.

Sangha tam lutuk chu a kal ten insem zawh sen chi pawh a ni lo.Engtin nge an tih ang tih ka lo ngaihtuah buai viau laiin Sangha leitu tur te an rawn thleng a. Kan mansa an buk ta char char. Kan hawn tur theuh tam fe an dah hranga, kaikuang leh sangha te nawi ho pawh an dahtha teuh bawk. Dil sah naah ka vawikhat kalna a ni lo nangin vawiin anga nuam ka tih hi ala awm lo hial ang.

Dar 4 velah huan atangin haw turin kan chhuaka, kan titi nak nak nangin kan tal chau deuh bawk aniang,Kolasib kan pelh chho hnuah kan ngawi ta thap.Bualpuiah chaw kan ei chho a, chaw kan ei laiin ka piin min rawn phone a, ‘ khawiah nge in awm? Kawngah chaw in ei dawn em ni?” a rawn ti lang lang. Kan ei mek tih ka hrilha. ‘A that chu, kan lo nghak ang che.Fimkhur deuh khan Mala khan Motor khalh rawhse’ a rawn ti leh vau vau.

Chaw eikhama kan kal leh chu kan puar tlang ta deuh a,kan hahdam ta deuh bawk aniang  ngai kan awh leh ta tawh. Aizawl kan thlen thlengin kan titi chho a, Rasky phawk a chhuaka, zahmawh rawngkai fiamthu sawiin kan nui tlawrh tlawrha,Malsawma pawh a nui kawng tluan a ni mai.

‘Riak leh mai rawh,atlai tawh bawk si’ Anun-in min ti a. Anu pawhin riak mai turin min ti ve bawk.Mahse, zan hnih ngawt ka riakbo tawha,inah tumah an awm bawk si lo. Bakah,ka piin min lo nghak dawn bawk.

‘Ka va phei zawk ang. Ka piin min lo nghah ka ringa, ka haw leh si loh chuan a thinrim ang’ nui chungin ka ti a.  Min tilui ta bik lo.

Malsawma’n min thlaha, Lawmi te nen kan inhlat viau lo nangin ka thil hawn nen ka bawr a,zan a lo ni bawka,min thlah a tum pawh ka hnial lem lo.Kan In kan thleng tep tihin ka phone a rawn ri a, ka lachhuaka,min rawn call tu ka hmuh rualin ka insangmar nghal teuh mai. Ka pick dawn lo zeta, mahse a beidawng duh leh dawn miah lo tih ka hriaa, Pick mai a tha.

Hello..’

‘Khawiah nge tunah i awm?” a rawn ti sup. A tawng ring lo nangin Malsawma’n a hriat phak ka hlau tho.

‘Ka haw mek’ ka ti a. Malsawma hian Ampuia angin ngai hram tehse.

‘A tha, ka lo kal’

‘Aih…’

‘Ka lo kal’ a off nghal hmak.

Ka pi teinah ka lut hmasaa, Malsawma erawh chu lo lut loin ahaw tlang nghal thung. Ka sangha hawn zinga lianber ka pi te ka pe a. A te nawi kg 2 vel zet ka pe tel bawk.  Pahnih ala awma,pakhat ka nu te in pui lam ka pe anga, pakhat kan ta tur ka dah ang. Kaikuang tam tham zet ka hawn tela,ka nuin a duh lutuk avangin tumah pek then ka tum lem lo.

Fridgeah ka khung tawpa, duh leh naktuk lamah ka khawih mai ang. A rim ka hne tawh lutuk tlat. Kawngkhar ka kalh a, inhnuai lam room ho ka enkual thuak thuak. Roomah ka chho a, Huanah khan ka inbual thuak thuak nangin inbual nawn leh ka duh,ka thang vekin ka inhre tlat. Ka hnarah dum rim leh sangha thang rim a cham laklawh nge pawh ka hre lo.

Tui lum pep pepin ka inbuala, ka harh deuh sawng sawngin ka hria, Motor chuanna sil deuh them thum pawh a zia huai huai bawk.

Towel ka hnute hnuaiah ka venga, ka mal chanve thleng bak a khuh lo. Ka sam chhah zet ka tuama,suk loh ka tum zet nangin a pheng bet deuh chuala,ka su leh ta nge nge. Ka chhemro mai ang.

Bathroom kawngkhar ka hawnga, ka hmai ka hru paha. Mahse,thutthlenga Sangkima lo thu reng ka hmuh rualin ka pen lai ka tawp chawt. Ka lo kal ang atih kha chu ka hria,mahse tunah a lo thlen mai ka lo ring lo hrim hrim. Ka Towel khuh chin tlem lutuk leh ahnuaiah engmah ka ha lo tih ka ngaihtuah chhuak thuta. Tih leh mai tur hre loin ka dinna ngaiah ka ding mawl tawp. A nui suk ka hmuh rualin ka harhchhuak thut.

‘Kawngkhar atanga lo luh hi mi pangngai tihtur ania’ ka ti hmak.

‘Kawngkhar atang chuan lo lut e..Thla ka ni hleinem’ a ti ve hmuk.

‘Sawi dun tur kan nei lo ania.Bakah, mi remtihna la miah lo a duh hun huna luh leh chhuah hi nang ang mi Ropui hian i inhmeh lo’ ka ti leh salh.

‘Kawngkhar atanga pangngai taka lut tura min duh phawt chuan harsatna ka nei hleinem’ a ti leh nghut.

‘Kawngkhar a ni emaw ni lo emaw,lo kal tawh suh. Mahse, zanin chu ilo kal ta sa saa,I lo kal chhan i sawi ve hrim hrim dawn nia’ ka ti leh nghauh. Min chhan hmain a awm ve engahmah ngai lo niawm takin khum lam ka pan pheia, Khuma ka thawmhnaw hak tur leh Panty leh Bra dah ka laa. ‘In hnuaiah min lo zuk nghak mai ta che’ amah en loin ka ti hmak.

‘Ha rawh…’

‘Chhuak rawh,tunah’ ka au nghal that. Dam raiha lan ka tum nain a tlin tawh lo.

‘Au vak kher suh’ a ti ve thawt. Ka phu zawk zui..Hahthlak..

‘Khatiang khan min vin miah suh, ka in anih hi.Chhuak rawh,zak lo lutuk’ ka au leh vak.

‘Zonunmawi…Min aukhum tawh suh’ kei aiin a awki a sang mah zawk.

Engmah sawi loin Bathroomah ka luta, na zetin kawngkhar ka khar bur bawk. Hrep tak hian,engvanga au ve chiam chiam nge maw anih le a?!

Note: Sermon en chungin ka ziaka, ziah tui har rap🤭...Click thei tan click leh suau suau ang aw.Tin, click thei lo te inthlahrung lo bawk ila.A thei hoin an click kep vek che u.Chuan,in  luh hrim hrim Khan ka tarmit man in tuak aw😉..