ANNEM - 25

Chapter- 25

‘Ka kut ka lasawn dawn ania..Thil atthlak itih loh hram ka beisei bawka’ a ti leh supa. Tihpalh niawm takin ka beng kawm a fawp thawi thuaka, ka ip chawih mai.

Muangchangin a kut a lasawna,a laksawn rualin ka thaw nghal hawk thung. Min kuahna a thlaha,khum atangin a chhuk a, Bathroomah thawm nei miah loin a lut bo zui nghal hmak.

‘Mambawih…’ ka nu awin a rawn ti leh a. Khur dar dar chungin ka dingchhuaka, thawk ka la leh vak.

‘Aw, Nu…ka lo hawng’ tih pahin kawngkhar ka hawnga, hlauhthawn hmel zetin a lo ding ran mai.

‘I au ri niawm tak ka hriaa’ a ti a. Chik zetin min en kuala. Chhungrilah huaisen turin ka infuih mawlh mawlh. Eng emaw dik lo a awm ni a a hriat vaih chuan a pawi dawn lutuk tlat.

‘Thil ka hmusuala,ka harh thut bawk sia. Chuvang anih kha…’ inthlahrun hmel zetin ka ti a, ka dar ka ti sang ak bawk.

‘A ni maw? I hmusual ngei tih i chiang maw?” ngaihthat loh hmel fein a ti leh a, Room kawngkhar bul atangin ka room chhung a melh kual dan dana, a lo luh loh nan ka tawngtai ru lo chauh thung.

‘Aw, ka Bathrobe khai mawle..Tlaiah khan Tukverh bulah ka khaia,ka lo theihnghilha..Ka au ring viau alaw?” ka ti leh ha.

‘Ring lutuk hran nang.Zanin chu ka dik lo riaua,ka mut a buai tlata.Ka harh lai takin i au ri niawm tak ka hriaa, ka lo rawn ngaihven che mawle’ a ti a. A tawng danah min ringhlel loin ka thusawi a pawm hmiah tih ka hrethiam.

‘Mu leh rawh,keipawh muthilh kan tum leh teh ang.Anih loh chuan ka lu a na leh nasa dawn lutuk’ amah bawkin a ti leh a, ka chhan pawh nghak tawh lem loin a inhera, inhnuai lam panin a kal zui chu a nider.

Kawngkhar ka khara, ka kalh nghal khap. Khum lam pan tawh loin Sofaah ka thu a, inringtawk tak anga lang turin ka thu mar auha,ka inkuangkuah fel than bawk. Mahse, a lo chhuak mai tlat lo. Ka nu a kal tawh tih a hre lo a ni mahna.

Ka nghak deuh ren rawna,mahse a lo chhuak chuang miah lo. Nghah ngawt ngawt ka thei lo,bakah ka nghah tur a ni lo hrim hrim.Helai hi a room ni loin ka room a ni a, a neitu zawk lehnghalin ka nghah chiam a tul lo tawp.

Ka tho chiah tihin kawngkhar a rawn hawng ve chiah. Rang zetin ka thu thla lehnghal vat. Ka thut dan ngai bawkin ngil auhin ka thu leha, ka inkuangkuah fel leh than. Mahni room ang maia tlangnel leh tim map lova a rawn kal phei chu khap mang loin ka melh kar. Khum mawngah a thu a, hnung zawngin khumah a lehtthla nghal hmak.

‘Enge min hmuh duh chhan chu le?”  tho chuang loin zawi fiah zetin a ti sup.

‘Chumi hmain thil pakhat ka hrilh duh che. Ka hmu duh che ka tih avangin helaiah hian i duh hun hunah ilo kal tur tihna a ni lo.Inzah lohna lian tak a ni’ ka ti nghauh. Ka sawi zo hman tawk tihin a rawn thuchhuak nghal vut. Chiang zetin ka mitah a rawn en a, ka ngaihtuahna a hmu tlang vek nimaiin ka hria. Mahse,a mitmu dum fiah leh fing lutuk chu inti paukhauh luiin ka en lui ve tlat.

‘Hetah ka lo kal lo anih chuan ilo kal dawn tihna ami?”

‘A tul dan azirin.Mahse, msg kha msg bawkin i rawn chhang theia,duh duh huna mi ina rawn lut ngawt loin’ ka ti leh fak.

‘Oh..Anih chuan ka lo luhna lai hi in siamthat vat angai anih chu.Anih loh chuan helaiah hian hmeichhe pakhat,thinchhe deuh leh thuduh tak,min hip deuh a awm tlat avangin ka lo la kal leh zel dawn tlata’ nghet churhin a ti nghut. Keimah min sawina tih ka hai lo,mahse ngaipawimawh lo lui chungin ka dak lui deuh vah.

‘Enteh,I awmdan hi ka hrethiam lo. Hetah hian tupawh chengin cheng lo se i awmdan hi a mawi lo hle ania.Rukru ang mai’ ka ti deuh salh.

‘Oh..Rukru anga min ngai anih chuan ka lo kal chhan hi ru chhuak ta law law ila kan fel duak dawn anih chu’ pawisak nei lo hmel zetin a ti hul hak. Chhan tumin ka ang ziaua, mahse ka chip leh hmak. Inhnuai maiah ka nu a awma, tun ang zanreh lai lehnghal chuan thawm engkim mai a langsar thina, tunah pawh hian lo inhnial pui chiam a fuh lo.

‘Ka sawi nawn leh ang.Ka hmuh duh chhan che hi hetianga inhnial leh infiam kual tur hian a ni lo ania’

‘Ok..Thil pakhat,tunah hian lo kal loin khawiah emaw min hmu turin lo kal ta zawk la. I bialpa nih tum mek Malsawma kid te khan i hnungah an zui kual zel bawk che anga tiraw’ a tawngkamah chuan hmuhsitna chiang takin a hriat theih.Kei erawh a thilsawi chuan min thawng dawt thung.Min zui kual tu kha ani pawh hian a lo hria tihna a ni mai angem? Hrep taka,min zui kual tir hi tawpsan tura hrilh angai.

‘Min zui kual lo’ alangah erawh ka ti hmak.

‘A zui kual tir che,I bialpa nih tum mek kha’ a ti leh kher.

‘A tum lo..’

‘Aaah,anih chuan a lawmawm anih chu.Mahse, an zui kual che a, chu pawh nangma himna tur ni loin keimah min hmuh theih nan’

‘I duh duh sawi lo teh’

‘Ka sawi lo tlat. Hnaih zel che ka duh anih chuan tun ang hunah hian ka lo kal angaia,nang tereuh hian min thunun tlat a. Ni lo se chuan awmdan mawi pel rawk khawpa ka lo kal angai lo tur ania’ a ti leh duah. A awpa leh nghet zetah chuan thu ho mai mai sawi a ni lo tih ka hre thei vek. Mahse, nem leh tur leh ani nena inkawp leh tura hmu duh ka ni lo tih ka inhrilh nawn mawlh mawlh.

‘Ka thunun lo chea, ka thunun theih ini hek lo. Ka sawi lawk tawh ang khan ka hmuh duh chhan che hi kan pahnih inkar a ni lo’ theihtawpa inthunun chungin ka ti dam thlap.

‘Min hmu duh..Ni tak,sawi la’ tih leh mut a rual lehnghal hmak. A awmdan ngeiawm lutuk chuan min ti thinrim nghal phat, mahse ka kut ka humruha, ka  chhungrila thinrimna  thunun turin thawk ka la raih raih mai.

‘Fimkhur turin ka duh che’

‘Tu lakah maw?”

‘Ka sawi angai lo,nangman i hmelma chu i hrechiang ang. Mahse, kei ang mai maia awlsam chu anih ring suh’ ka ti leh hlak.

‘Hmelma ka nei lo’

‘I nei…’  ka tawngkam chang fak maiah chuan insumtheihna ka hloh tan mek tih ka inhria. Mahse, ka insum hleithei lo.

‘Min venhim ilo tum tihna a ni em?” a rawn thuchhuak leha. A hmelpa leh ngeng zetah chuan angaihtuahna engmah alang thei lo.

‘Aih…’

‘Anih chuan engvangin nge fimkhur tura min hrilh a?”

‘I fapa vangin…’ ka rilru a lo lang hmasaber ka sawi pawp. A mitko hmu a tisang awk mai.

‘Ka fapa….Amak hle mai’ a then leh suk.

‘Amak hleinem,I fapa hian a mamawh che a. I dam angai; chuvangin fimkhur turin ka duh che’ ka ti leh hmak.

‘Ka lawm e ka ti mai ang’ a nui a, mahse a hmelah nuizatna a awm eih lo thung.

‘Kal tawh rawh. Ka sawi tur ka sawi zo tawh’ diktak chuan adang pawh sawitur ka la nei a, zawh duh pawh ka nei ngah lutuk.

‘Ka la kal ang chu,mahse ka mut achhuak viau mai.Nizan atangin ka la muhil miah lova’ a ti leh daih. Ka thilsawi kha engahmah angai zui lo niin ka hriaa, amah vanga ka hlauhthawn zia ka ngaihtuaha,ka thinrim the leh et et mai.

‘Hetah chuan i mu thei lo’ka aw erawh a dam raih lawi.

‘Min thehchhuah tum chhin la..I nu nge Malsawma zawk i koh dawn?’ ati leh hluk. A aw pa zetah chuan thinrimna ahriat tel theih.

‘Ka ko lovang,mahse i chhuak ang’

‘Malsawma hming i sawi ri hauh lo,mahse ani lakah khan min venhim i duh tih ka hre tho. Ka fapa vang a ni lo tih pawh ka hria..Mahse engvangin nge a fawhna che kha i dawh mai mai si a? ’ a sehchilh titih. Sawi leh mai tur hre loin ka thu ngil deuh awta, ka hrawk a ro nghal halh mai.

‘Mipa dang bula i awm hian ka feelings i hre chiang a ni lawmni? Kha mi tenawm lakah lek phei kha chuan” a ti leh nghut. Awmze nei lo zetin a kut a vai kual zui nghek.Engmah sawi loin ka en a, min rawn en ve a; a mitthim raih mai chu en rei ngam loin ka hawisawn lehnghal vat.

A tho vut chu ka en leh vat, a rawn kal phei a,ka thu tawm nghal chawih thung. Ka thutna hmaah tak a rawn dinga, ka beisei loh lutukin chhuatah a thingthi a, ka kut a rawn vuana, a hmelpa leh mi hip lutuk chu ka hawisawn san thei lo.

‘EngeiI tih a?” tawng ring ngam loin ka ti sep.

‘Ka ngen dawn che’

‘Aih, tisuh..Kan inrem thei ngai dawn chuang lo tih i hriat kha’ mangang zetin ka ti leh halh.

‘Kan inrem em em zawk,thildang chu fiahna ka pe ang che ka tih kha’

‘Kan tawp hlen hi a tha..’ mangang zetin ka ti leh halh.

‘Min en teh..Zawhna ka zawt ang che.Chhanna inei lo anih pawhin a pawi lo.Keiman ka chhang mai ang che’ a ti leh sup. A awmdan vanga ka chhungril luhlulna tuiral mek chu ka duhdan ni lo mah se ka dang thei lo. Hmeichhe nem leh induhtawkna nei lo ang maia lan ka duh loh tehlul nen ka chhungril hian min phatsak mek chu ania.

‘Ka nuna thutlukna harsa ber ka siam lai khan lawm vangin ka lam i ring em? Kha thil ai khan Hotel emaw ka thil neih dang pawh min dil se pek mai a awlsam zawk ang. Amber-i puma naute kha ka thisen anih avanga ka hahchawlhna awmchhun Hmeichhia kalsan kha nuam ka tih i ring tak tak em? A teuh lo,ka mamawh lutuk che kha ka a lo chauh thin zawk. Ka thutlukna siam ka hrilh zan che khan vawikhat lek pawh min ngen la ka fa kha ka thlauhthla ang tih ka chiang asin.Mahse, iti miah lova..Ka sawi ang kha ni loin Amber-i kha ka rawn hmuh hnuah che ka hruailut chauh. I remtihna avanga chauhin…Mahse,A awm ve tak hnuah pawh khan ka tih loh tawp tur tiin hetah ka lo kala..I lo tap muhil a,I lukham pawh i mittui vangin a hnawng chapa. I tawngvaia,min ko bawka.. ’ a aw pa leh ril lutukah chuan thinlung chhung ber atanga chhuak,min tlawn lungawi na tura sawi mai mai  ni lo,thutak anih zia ka lo hre thei. Ka mittui rawn tla tur duh loin ka mit ka khap sak saka, mahse ka biang  a lum thla ta pap tho.

‘Shh…tap suh,eng ang pawn tum mah la ka kalsan dawn tawh lo che. Dam reng chunga thih kha ka peih tawh lo’ a ti leh sup. A kut zungpuiin ka biang a rawn tuaia,a hmelpa zet lang dam thluam mai chu mittui kar atangin ka en a. Hai rual lohin ka Hmangaih tih ka hria..

‘Amber- i..’ ka sawi zawm hmain ka hmuiah a kut zungtang a rawn dah a.

‘A kal tawh..Ka nunah emaw i nunah pawh a lo let leh tawh lovang’ a ti supa.A kut a lasawna, a ha rual nalh zet langin a then zui suk.

‘A fair lo em mai’ ka ti leh sep.

‘I chunga thleng pawh kha a fair chuang loh kha..A ni lawmni? ‘ a sawi dik…

‘Ka phalna tel loin Bsa’n thil tamtak a hrilh che tih ka hria,ka thinrim viau dawna,kan pahnih tana ti anih vangin ka sawisel ta lo’ amah bawkin a ti leh sup.

‘I reh leh vang vanga, Bsa’n min hrilh hnuah pawh min rawn be ngai miah lova’ ka tum loh deuhin titau aw niawm tak a hriat theih. A thaw deuh huai thung.

‘Biak che ka tum lo maw? Umm...Diktak chuan ka nawr nasat lutuk che chuan i thinrim ka hlaua..I nu leh Malsawma’n lehlamah an nawr chep em em bawk che a..Mi tenawm,a fawp che a’ a mitmeng danglam nghal vek chu hlau zetin ka en a, ka tim nghal chawih bawk.  

‘Ka ta inih hi..Ka hrilh tawh che kha, mipa dangin an khawih che ka phal lo’ a ti leh sup. Ka kut a lakanga, a awm zawnah a daha.A  lungphu dat dat ka hre thei.

‘I hria em? I telve..Kei pawh tah hian ka tel ve’ tih pahin ka awmah a kut a rawn daha..Sawi ve tur reng reng ka hre lo.

A rawn tho a, min pawt tho ve nghala. Nghet zetin min kuah bet zui nghal vang vang.A awmah hmai ka phum kaka,a kawngah ka kuah ve tlat bawk. Kan inthen hnua thil thleng zawng zawng ka ngaihtuah let a,ka nep a, ka nem viau angin alang mahna..Mahse, kan pahniha kan paltlang zawng zawng ka ngaihtuah a..Nakin chu nakin nimai rawhse.

Khumah kan mu duna, kan lo hrehawm tawhna zawng zawng kha khuhbo turin chet kan laa, kan in mamawh na sang lutuk chuan muangchang pawhin min chet tir thei lo. Tawng zui angai lo,chet ziain kan lantir mawlh mawlh a, Diktak chuan kan sawi bak kha sawi dun leh kan mamawh tawh lo hrim hrim zawk.

Khawvar hmain inhnuai lamah min kaithlaa, ngawirengin a lo luh thinna min kawhhmuha..Ka rin lohna ber ka nu te rooma Emergency atana an siam,kawngkhar  lian vak lo atangin a lo ni reng..’Lo in enkawl tha ang che. Chuan,engahmah lo inrawlh miah suh. I inpeih hun hunah engkim kan hmachhawn dun ang.Ka awm chhung chuan tuman an tina ngai lovang che’ a ti sup. Ka chalah a fawp leh vang vang.

‘Hmanhmawh rawh,an lo thleng dawn hnai ania.Ka hrilhna che a rei tawh tehreng nen,I muang em em zel mai’ ka nuin Inhnuai pana stepa ka chhuk thla lai min lo ti hlawk hlawk. A vawikhat nan kan Damdawi tur a rawn thleng dawna, thil harsat zualpui a reh tawh chungin mi tamtak tana tih theih loh kha ka nu chuan a thei leh tlat.Nizan atangin ka nu a awm hle hle thei tawh lova, zingah pawh hma mangkhengah min rawn kai tho leha, Driver nena kan inbiak danah khan zing kara lo thleng tur a ni a. Chuti taka hmanhmawh rum rum ngai pawh a ni lo.

‘Dingi,khawnge ka Flask ken tur kha? I lo dahsawn leh hman alaw?” Dingi hnenah a ti leha, a phili riai a ni ber.

‘Dahsawn nang,nangman Bagah i thun kha’ Dingi’n a kitchen lam atangin a rawn ti vin ve hlar thung. Khawsak phung la pangngai chiah lo mah se Mizoramah Positive case a awm belh tak rih loh avangin ramchhung bikah chuan kan indah zalen leh tawh viaua. Mahse, kan fimkhur zui zel na tura inzirtirna erawh a remchan dan ang angin sawi ala ni zela,duh duha chhuahvah theih ni tawh mah se mi tam zawk chu an la tawmim viau tho. Keini ngei pawh tul tawp khawkah lo chuan kalchhuah mai mai kan la ti meuh lo. Nimin piahah Dingi a lo chhuk thlaa, ka nu tan chuan hauh tur a lo thleng leh hi a ni hawt mai. Mahse, an inhauh aiin an nuih dun atam zawk tho avangin ka ngai thupui viau lem lo.

‘Thiannu,indawr thar in hawn tak tak hunah hnathawktu tur in mamawh angem?Restaurant lam pawh nise in mamawh chuan kan kawmthlang te inhnuai ami nula fel deuh hi a awm reng ania. Phai lama awm reng kha ania, Hotelah a thawk thina, lehkhathiam tak chu a ni lo nangin a smart a,tawng a thiam bawka;hna an thawh zui mai hmel tawh si lova,hlawh tam over lo pawh nise lo chhawr hram teh u’ Rasky-in a rawn ti a, ka nu hnenah ka hrilha. Sawi buai loin a la nghal hmak.

‘Motorin kal ila’ ka nu hnenah ka ti a.

‘A teuh lo em mai,ila khalh thiam tawk lo’ rang zetin a ti a. Ka nui hak mai.Karhnih vel chu ka zir ve tawha, ka huphurh loh ang ngeiin ka thiam chu a ni der tawh.Mahse, Motor tam laia tlanchhuak chi erawh ka la ni lo.

‘Zingah te chuan Motor a tlem alawm’ ka tilui leh hram.

‘Ka duh mai mai lo,min accident pui reu reu ang. Lo kal vat teh,ruah atla leh mai ang. Dawngkima a thleng daih tawh ania, chahbi kan kawl bawk si,pawnah a ding renga, a khawngaihthlak’ a ti leh duaha. Dawngkima hi Malsawma Cousin,Pharmacist kha a ni a. Vawihnih chu ka hmu tawha,kum 25 vel bawr a ni a.Ngo leh fai var mai,tlema tawng nem deuh a ni a, a ngainatawm hmel viau.

Dawr kan thlenin kawtah Dawngkima a lo ding khawr hlan mai.. Kan thlen fel hnu lawkah Bungraw phur pawh a lo thleng ve nghala,kan buai zui ta char char.Dawngkima’n Damdawi ho a en fela, keiin an lehkha rawn ken leh kan Order a inmil em tih ka lo check ve thunga. Kan buai a reh meuh chuan ril a tam vawng vawng thei.

‘Mambawih, eitur kha an rawn dah hman dawn tawh em?” ka nuin min ti a, lum ti hmel zetin a inzap  pah lauh lauh.

‘Ka’n bia ang’ ka ti a, Restaurant lam hi karthar atanga hawn tan leh tum kan ni a, tunkar tirah Cook leh staff zinga pahnih an lo thleng tawha.Tukinah eitur kan mamawh dawn avangin zanah cook hnenah ka hrilhsa vek.

‘Boss, kan lo chhuak dawn chiah’ kan Cook aw per zetin phone a pick veleh a rawn ti a.

‘Ok..Chu chu lo zawh ka tum che u a.Kan ril a tam viau ania,mahse hmanhmawh lutuk lo ula’ ka ti zangkhai vah.

Phone ka dah deuh chiah tihin Sangkima msg a rawn thleng a, ka hnung maiah ka nu a din avangin ka kalsawn pui nghal daih.

‘Good Morning..Zaninah i bulah ka awm duh ania’ ka chhiar rualin ka thensak..

‘Inah chuan a theih loh bur’

‘Khawi hmun pawh nise a pawi lo’

‘Curfew lai anih hi…’

‘Duh leh lo curfew mai mai se..khawiah nge i duh? karkhat hi kumkhat tluk zet ania aw’ a rawn ti leh a.

‘Ka chhuak thei angem ka hre lo alawm’

‘Thei ang..Tihdan a awm mai ang’

‘Hetah hian ka lo nghak ang che’ tih a rawn thawn leha, ka nui sak. Mahse, enge chhuanlam atan ka hman ang ka hre lo.

Eitur kan nghah chhungin a rem fel theih ang ang kan remfel lehnghala, naktuk atanga mumal taka inhawn nghal tum kan ni a, ka nu a phur sarh sarh bawka,a ka pawh zen ila min seh kher lovang tihtur a ni.  

In kan  thleng deuh chiah tihin Lawmi’n min rawn call a.’Sangzuali nu a thi a’ a rawn ti lang lang. Sangzuali hi College kan kal laia kan classmate  a ni a, amah hi tlema pa deuh chi leh volleyball thiam zet mai a ni a. Tute pawh kawm thei vek khawpa zau a ni a, Lar lah a lar; kan thianho zingah pawh khan a tal ve nasa thin. College kan zawh hnuah erawh kan inkawm zui ta lem lo.

‘Kan kal dawn mi?” a rawn ti leh a. Ka thluak a vir zawk,Sangzuali te hi Sihphirah an awma,anih chuan thil a fel ta duak.Huizz,mi chhiattawh lai laia ka rilru put dan hi a zia lo..

‘Nia, ka nu ka lo zawt anga.Lawk, Rasky leh Zohmingi hi an kal duh em?’  ka ti leh rih.

‘Ka biaa, an hman lo ve ve. Rasky a duty dawna,Zohmingi chu apa a nuam vak lo aniang,keini chu kal hram ila..A hla lem lo bawka,bakah chhuah thawven a chakawm.An sawi hmang khan an veng lam hi an Strict over tawh lo aniang.Ampuia pawh ka be tawha,a lo ngaipawimawh ve lutuk.Sangzuali hi chu a dan a dang ve em a.Amah boral lo mah se a ngaihawimawh awm tlat’ a rawn ti leh duah.

‘Tu nge thi a?” ka nuin a lo ti vat.

‘Sangzuali  nu a borala,zanin Lumen tur ania..College kan kalpui thin Sihphir ami kha’

‘Sangzuali ber pawh ka hre love, engtikah nge a boral a?” ngaipawimawh lo hmel fein a ti leh puat.

‘Dar 4 vel a ti,Lawmi khan kalpuiah min lo sawma.Kal ve ngei ka duh deuh’ ka ti leha.

‘Vengdang mi kal an phal em ni? Tehngawt che u hian’

‘Phal e…Anni lam chu an inthlahdul deuh hret tawha’

‘Tunah em ni inkal dawn?in tlaivar peih loh phei chuan lo haw a buaithlak viau ang.Curfew a la ni reng ania. Dingi,Pangpar tui ipe em?” a tih zawm zat.

‘Kan tlaivar ka ring. Thil ka ei zuai anga, ka inbual leh bawk anga.Kan kal nghal mai ang’ ka ti a.

‘Anih chuan ti ve vat vat la,I che lah a muang thei si,nghah reng ngai nih te a tha lo ania’ Kitchen lam pan pahin a ti tha ve mai.

Darkar khat a liam leh chuan Lawmi nen kan inphur chhuak vawk vawk tawh.

‘Kan tlaivar angem? ‘ rawn kun hnaih pahin a rawn ti lawng lawng.

‘Tlaivar ila..Haw leh a buaithlak mai maia’ ka ti ve lang lang, Tlan paha inbiak hi chu kan au hi a ni hrim zel mai.

‘Nia..Tlaivar ila..Mahse,  Tunlai chu Someone-a hi a rak peih lutuka’

‘Mahni aia naupang i kawpa,ila hlau zuia’ ka nui a.

‘Ka hlau lo,ka zah thiam alawm’ kan nui dun hawk hawk.

Kan thlen hnu lawkah Ampuia te an lo thleng ve a, kan thu ho tham. Sangzuali’n kan kal a beisei lem lo tih kan hmel a hmuh ruala a lawm hmelah chuan alang thei vek.

‘Chhuak harh ila…’ Dar 9 velah Ampuia’n a ti a. Kan chhuak ta dial.

Pawnah kan ding thapa, kan titi mam mama. College kal laia inhre sa vek,inhmu khat tak tak kan ni bawka chanchin kan inzawt nak nak bawk. Kan titi mawlh mawlh laiin Malsawma’n min rawn calla, ka reject a, msg in mithi inah ka awm tih ka hrilh nghal thung.Duh chuan ka pick thei nangin ka pick chak lem lo. Sangkima nen tihtakzeta inzawmna kan neih leh hnu hian ka hel theih ang angin ka hel ta zar zar.

‘I nu hi phone a pick thei lova,naktukah ka lo haw dawna,a thil min chah kha ka hmu zo tlat lo’ msgin a rawn ti a.

‘Ok,Ka lo hrilh ang. Tluang deuhin lo kal la’ka titha ve mai.

Lawmi’n ka banah a rawn kaia,midang zing atangin min ko penga,’ lo kal lawk teh’ a ti sap.Midang dinna piah deuhah kan ding duna,rilru nuam lo hmel zetin a hawi deuh zak zak.

‘Enge a?” ka ti a.

‘Ih…Thil min tihsak teh’

‘Eng maw?”

‘Rca a lo kal dawna, ih…Diktak chuan inhmuh kan duha,min puih ka ngai’ ka thaw nghal hak. Keimah zawkin puihna ka dil ang ka ti asin le.Mahse, a pawi lo..Engkim mai rem ta thlip thlep lutuk hi amak lamah a kal mah mah zawk.

‘Ok..A tha alawm..Hetah a lo lam dawn che mi?” ka ti sap.

‘Aih, khaw luh dawnah tunah hian min nghaka, min va drop lawk mai la..’

Ampuia hnenah Lawmi in lamah haw angai thut tih ka hrilha, a u in khaw luh dawnah a nghak tih ka sawia, ka drop zuai anga, ka  let leh dawn tih ka hrilh bawk. Zawhna a nei lem lo.

Khaw luh tirh lama Rca awmna lamah kan inphur pheia, Rca Motorah a lo awm vang. Kan venga mi tho a ni a, a fel lo pawh ni loin Lawmi aia a naupan zawk avangin Lawmi nu hian a duh lo.Mahse, mi a anni lova, an tilang tehchiam lo thung.

‘Ka lawm aw, chuan ka ring tawp che. Zingah ka lo bia ang che’ Lawmi’n inthlahrun hmel fein a ti a. Ka nuih var var.Ka tum lawk dan hria se chuan a inthlahrun dawn loh vei nen.

Lawmi te kal hnuah Ampuia msg ka thawna, ka haw leh si tih ka hrilha. Emoji thinrim lai sen hlur a rawn thawn let.

Huan kawngah ka tlanthlaa, ruah a tla deuh seng seng a, ka hnawng deuh chuap mai. Kawt zawl ka thleng thlaa, Sangkima Jeep a lo ding vang mai. Mithi inah ka kal hmasa dawn tih ka hrilh lawk veka, ‘ok..i lo kal dawnah min lo hrilhla,pengah ka lo nghak ang che’ a ti kha ania. Mahse, engmah ka hrilh ta lem lo.

Verandaah ka dinga, light en china ruah tla seng seng chu ka thlir a,eng emawti takin a hmuhnawm tlat. Kawngkhar ka kika, chhanna awm loin a reh thap. Ka nema, a inhawng ve mai. Thawm dim zetin ka lut tham thama, thutkhawmna pindana thutthlengah Sangkima a lo thu a, tui zetin a lo muhil a,a muhil hmel chu hmuhnawm ti lutukin ka ena, a hmelpa leh ngeng ngulh,induhtawk zet thin kha awm loin a hahdam hmel ngawih ngawih.

Ka pan phei tham thama, a bulah ka dinga, a biangah ka khawiha,a rawn thu mar nghal zawka,ka ban rekah a rawn mana; amah bawh rawk khawpin min pawt hnai nghal dawrh bawk.

NOTE- CHAPTER 25 KA ZOVA, CHAPTER 26 PAWH AW...Mahse, min hau lo ula😁