ANNEM - 31

Chapter- 31

 Sangkima lo let leh hma chu ngaihtuahna mumal pu thei loin ka ngaihtuahna a vak kual vak vak a niber. Zari thilsawi leh Damdawiin ka awm laia Sangkima chet dan kha ka ngaihtuah leta, avai mai khan tider a ang lo.Mahse,  a nupui thihnaah ka pa thiamloh angaiin phuba lak nan min tih a pha lova.Anih chuan lemchan tho tihna ania..Nge min lo duh tak tak zawk?Amber-i khan chiang takin min hrilh tawha, a sawi lawk ang ngeiin nute ka chan ta reng bawka.Mahse, Sangkima hian min tih hrehawm aduh vangin naute min laksak anih si chuan atap leh tho dawn em ni? Mipa zawng zawnga mipa nihna tifiahtu ang maia mipa anih zia lanchhuahtir chiang bertu hian midang hmuh laiin a tuarna a tilang anih chuan a lem a ni angem? Ka thaw hak mai,ka rilru ka siam fel angai tih ka hria. Nau ka pai tawh lova, ani nena inzawmna kan neih zui pawh a tul tawh lo thei. Ka nu hnenah ka let leh tawh dawn lo anih pawhin pawisa tlem azawng ka la neia. Ka intungnung zo tho ang. Zaninah zawhna ka neih zawng zawng ka zawt anga, achhanna chu engpawhnise ka awmzui zel dan turah ka pawm ang.

Chawei hunah pawh a lo la let ta lo cheu.Ka duh lo chung chung Roomah ka nuin eitur min rawn pe a, nu luhlul leh thuneihna kengkawh tha lutuk anih avangin hnial a sawtna a awm lo tih ka chiang tawha. Ka hnial buai peih lo law law.

Kawngkhar inhawng riah ka hawi phei vat. Sangkima a rawn lut mek.

‘Ka lo haw hma thei ngang lo.Enge i an?” a rawn ti zangkhai vuh.

‘Ka tha….Thil ka lo ei tawh a’ ka ti tha ve mai.

‘Um,I ei chuan a that hlauh chu..Ka inbual zuai anga, ka ei chauh ang.I inbual ve duh em?” a ti leh vut.

‘Ka lo inbual tawha..’

‘Nangmahnin maw?”

‘Aw, keimahin..Tinge?” hrethiam chiah loin ka en ha mai.

‘I taksa a chak loh kha,fimkhur lo viau lo teh’ a ti hmuk.

‘Aaa, hei ka that hi…’ ka ti sap. Min rawn en a, a mitmeng thim khap maiah chuan ka hriatthiam si loh thil a lang zawk.Mahse, a bo lehnghal vat.

Zanah kan Roomah an rawn awmkhawm taiha,an titi laih laiha, ka bulah Naunaua game khel chungin a mu ar bawk. Mahse, dar 9 rik hmain an chhuak ta dial.’ I chau palh anga, Someone-a hi a den thei si’ Mami’n a u melh zauh chungin a ti a. An nui tha hlawm,Sangkima erawh za lo zetin a then suk ringawt. A lo haw atang khan ka tum lawk miah lohin ka lo en leh reng thina, Damdawiin ka awm laia ka hmuh miah loh,a hmel pawr deuh fap pawh ka hmu chiang ta ngang mai bawk.

‘Khawnge i kal dawn?” kawngkhar lam pana a kal ka ti a. A ding chut,a rawn hawi leta.

‘Ka mu ang chu ka ti’ a ti bung vut. A naute awm lai kha chuan a titi ve luama, Tetei thilsawi a nuihpui ve suk suk kha ania. Tunah erawh alandan a danglam leh daih tawh.

‘Ih…Hetah i mu thei lo em ni?” ka huaisenna zawng zawng sawmkhawmin ka ti a. A mitmeng a danglam zawk.

‘I duh ka ring chiah lo’ a ti nghut.

‘Ka duhin ka hria…’ ka biang a sa hat hat nangin a mitah tak ka en lui tlat.

‘I chiang em?” min ringngam lo niawm tak a ti leh sup.Tawngkaa chhang loin ka bu nghat thung.

Kawngkhar a locka, a rawn kal pheia.Khum bula Switch awm a hmeta, a thim ta khap.Mahse khum sir banphak maia Lamp awm a on lehnghal zata, awm tinuam tawk lekin a eng dul raih mai.

Khumah a rawn lawna,min sik hlau niawm takin a sirah zangthlain a mu a, a kut lehlam a khama,lehlam a awm chungah a dah thung.Amah si loin alam hawiin saisirin ka mu a, thawm awm loin a reh vawng vawng mai.

‘Sangkim….’ Kan ngawih vang vang hnuah ka ti sep.

‘Um…’

‘Kan titi thei angem?’

‘Muhil zawk la athain ka hria..Vawiin hi i muhil mang lo ania’ a ti daih.

‘Aih, Damdawiinah ni 2 ka mu a, ka ning tawh..’ luhlul zetin ka ti ve tlat.

‘Anih chuan enge sawi i duh?” a ti nghut.Ka lam hawi zawngin a rawn inlet ve a..

‘Naute kan chan hi i lawm em?” ka sawi zawh rualin a mit a chhing nghal sawk.A thaw zui nghal hawk bawk. A awmdan chu hawisawn miah loin ka en a. Tider nitur chuan a theih loh..A rawn mengchhuaka, ka mitah a rawn en a. Chiang takin na a tuar tih ka hmu thei…

‘Hetiang khawpa sual leh tenawm,huat hlawh tlak ngawih ngawih nitur hian enge ka tih?” ka beisei loh lam zawhna min zawh takah chuan ka hamhaih titih.

‘Hua maw? ‘ ka ti sap ringawt.

‘Aw…I zawhna khan a tichiang vek.Mahni fa that duh khawp a tenawm,chumai pawh ni lo..Nupuiin nau a pai lai achhiata lawm tura min beisei kha’ a sawi zawh rualin a mu zangthal nghal daih.A hmel landan ka hmuchiang thei lo.

‘Min neihchhan kha….Phuba lakna a ni si alawm’ dam thlap leh inringtawk taka sawi ka tum nangin ka chhungril na lutuk avangin ka beidawng thak. Ka aw a ring lova, a khur a..Ani pawhin a hrechiang hle ang tih ka chiang.

‘Maw?” a awah mak tihna alang thei.

‘Phuba lakna ka ni a’ ka ti nawn leh sap.

Min chhang loin a thuchhuak a, a hmai a hup vang vang.

‘Amber-i pawhin min hrilha, ka kalsan che anih loh chuan naute ka chan ang tih kha.Mahse, I tum ang ngein ka nu nen kan inkar iti chhe vek tawha. Kalna tur ka nei chuang si lova. Hetah lo awmna tur ka nei lo a’ ka aw a zuih ral titih.

‘Duhtawk teh’ harsa tih hmel lutukin a tichhuak hrawih. Ka thuchhuak ve a, lukhama inkamkangin ka thu mu titih.

‘Naute a awm tawh lova. Enge i tih lehzel ang? Keimah him min…’

‘A tawk…Duhtawk rawh ka tih kha’ a ti leh hmuk. Min rawn hnaih zui nghal rawk bawk.Hnai zetah min rawn en a, kan inhnaih chilh lutuka ka insangmar nghal teuh mai.

‘I sawi zawng zawng kha i ngaihdan tak tak a ni em?” ka khabeah a rawn dawma.Ka thlesawn mai dawna,a vuan nghet zual sauh.

‘Ka ngaihdan mai ni loin ka hriat dan ania.Adik bawka.Mahse, ka pa khan i nupui kha a tihlum lo tak tak’ a mit a chhing leh sawka,a thaw leh huai bawk.

‘Ka neihchhan che min zawh lai khan i hria emaw ka ti asin’ a ti sup.

‘Aw.. ka hria emaw ka tih kha ka lo hre lo ka tih kha’

‘Phuba lakna tura nei che angin maw ilo inngaih tak tak?” za miah loin a nui zui hawk mai.

‘A ni tlat si alawm’

‘Mawli…Ka hmangaih vangin ka nei che.Ka mamawh che a, ka hahdamna ini bawka..Engtin nge chutiang turin min rin theih zawk??’ a ti chhuak hrawih. Ka hresual emaw tiin chik zetin ka en a. Mahse, a hmelpa leh tak ngul maiah chuan engmah ka hresual lo tih ka hria.

‘Maw?!” a sawi ka hriat loh vanga zawt ka ni lo.

‘Ka hmangaih che…Chu chu ka neihchhan che.Abak a awm lo’ a tinawn leh sup.

‘Min hmangaih maw?” ka ti leh cheu. A rawn kun hniama..’Aw, nasa takin.Mahse, kan naute ka venghim zo lo erawh pawi ka ti’ ka biangah a hmui lum thar tharin a rawn ti si a. Thil thlen dan hi ka beisei piah lam a ni. Ka beng ngeiin ka hriaa,mahse ka la ringhlel cheu tho.Min kuai dak leha..

‘Min enteh,ka mitah tak hian en rawh. Na ka tuar tih i hmu em?” a awpa zet a khur ve tih ka hrethei. A mitah tak ka en a,hai rual lovin natna ka hmu thei.

‘Amber-i leh Naute…’

‘Shh…Sawi rih suh,tunah chuan thil pakhat chauh ka hre duh..Min hmangaih nge hmangaih lo?’ a ti leh sup. Chhang loin ka khap sak sak mai.

‘Zoeyy….’ A ti leh sup.

‘Aw…Ka hmangaih che..’

‘Nang aia nasain…Sawi chhuah kher ngai lo pawh hian hre tur ini asin’ a ti leha.

‘Ka ring thei che em? ‘

‘Ka awmdanah hian chiang takin ka tilang emaw ka lo ti asin..Mahse,tuna tang chuan ka tina nawn leh tawh ngai lo vang che.Min ringhlel leh tawh ngai lo bawk ang’ nghet churhin a ti leh a. Min bum lovang tih ka chhungril ber atangin ka pawm thlap tih ka inhria…

Min kuah bet nghal thawk…Ka chhip samah a rawn fawpa,ka tlanchhuah hlau niawm takin min kuah nghet leh salh bawk.

A dar hlai hlap khamin ka mu a, a awmah ka kut ka daha, a lungphu dat dat ka ngaithlaa..Mahse, ka bengah erawh ‘ka hmangaih che,nasa takin’ a tih kha a ri nawn tlut tlut zawk.

‘Ka nu nen kan bazaar khan Amber-i a lo kal thuta. Kalbo turin min rawn ti a.Naute ka chan ang tih a sawi bawka’  ka ti leh sap.

‘Khavang chiah khan tiraw i mood a off?” a ti ve nghut.Ka sam karah a kut a rawn rawlh luta.

‘Aw….ka awm a nuam lo a’

‘Min zawt mai tur ini asin…Ani khan i tan thiltha sawise iti em ni? A natna bak hmu thei lo tu khan amah aia ka thlan zawk Hmeichhia hi tihnat tumin a bei ang che tih hre tur ini asin’ a ti leh nghut.

‘Chutiang chuan ngaih ka duha, mahse thilthleng tam takah hian i landan ang ni lo hi a lo awm ve palh theia..Chuan, a hnuah i nupui hmasa leh naute chungchang kha ka hre leha..I lo haw veleh ka sawipui ang che ka tih laiin i thinrim vaka’ ka sawi zawh rualin ka thaw nghal halh mai.

‘I mood fuh loh danah khan thil awm a awm tih ka hria. Thup i tuma,mahse ka hrechiang lutuk che. Rasky present lei tur anga i insawi khan ka zui tir che a, ka rin loh lutukin i pa Staff hluite i hmu a..I pa Staff hlui hmuh chhan tur pakhat chiah i nei. Chu chu Kimkimi thihdan hriat i tum tihna a ni a. Engmah ipa khan telve na a nei lo.Mahse, I pa chanchin mawihnai lo dang hriat belh lo la ka duh vangin tihtawp che ka tum ta zawk che anih kha…’ a ti leh duah. Ka pa chanchin ka hriat khan min thawng takzet tih ka hria..Doctor tha tak anih mai piah lamah nau titla thin a ni a..Dan kalh chu thuhran ni se.Tualthat a ni tlata.

‘Ka hre hman tho alawm..Mahse, ka lo ngaihdan chuan Kimkimi vanga thinrim emaw ka ti che a’ ka ti sep.A kawr hmaa thil inziak ka kheuh niap niap bawk.

‘Ni lo…Malsawma i hmuh vang zawk..’ ka beisei loh lutuk a sawi ta daih.

‘Plan lawk a awm lo..Ka hmu thut a’ ka ti nghal vat.

‘Chutiang ka ngaihtuah lo…Amah nena in awmdun ka duh lo.. ‘ a ti hluk.

‘Ka nu damloh thu min hrilh alawm…’ ka ti ve nghat..

‘Amah ka huat zia pawh i hria..’ a ti leh hrawk.Nia, chiang takin ka hria..

‘Ka nuin engkim a hre tawha..Ka u thihnaah i telve lo tih pawh’ ka en chho a.

‘Ka hria alawm’ a ti nghut.

‘Maw? anih chuan tinge i sawi loh? Nu inei lo min ti a”

‘I nei lo alawm,amah ngeiin in inzawmna a chhu chata, amah bawkin a rawn zawm leh tur ania.Nangin i va zawm hmasak tur a ni lo’ a ti leh sup. A sawi tum ka man thiam chiah.

‘Min hnaih duh lo a, Naunaua damlohna pawh kha min puh a’ ka sawi zawng pawn ka thinrim lehnghal phat.

‘Sawi suh.Kha thil ka sawi kha chu ka thiam loh liau liau anih kha. Na iti lutuk khan min tina ve vek tho..Mahse,mipa ka ni a..Ka induhtawk ve bawka.Chuan,Room khatah kan awma. Hmu reng,khawih theih si loh kha Hremhmun nen a danglam tam lo ang.Si lo chein ka muhil tha thei ngai lova..Mahse, khumah ka rawn mu anih chuan i mut duh ka ring lova. Ka nawrluih nasat lutuk che chuan i kalbo mai ka hlau bawka’ a ti leh duah.Zanin hi thilmak pui pui ka hrereng mai chu ania.

‘Sangkim….’

‘Shh…..Muhil ang. Khang zan tamtak ka muthilh theih loh kha zanin hian i rulh vek angai’zawi tein a nui hak.

‘Naute kha….’ Ka ti leh sep.

‘I fa anih ang bawkin ka fa a ni ve a. Na itih ang bawk khan na ka ti ve a….’

‘Min ngaidam rawh’ ka ti sap..Ka natna chauh ka hmuh vang leh ka ngaihdan ka lo kaltlangpui nasat lutuk avanga kan nupa kar tha lo kha tunah chuan mumang mai a ni tawha.Mahse,ka thiam loh anih avangin ngaihdam dil erawh ka ba.

‘Ngaihdam dil turin tihsual inei lo ania..Ka venghim zo lo che a, kan inkar that loh vang mai maia Doctor hmu tura ka kalpui lo che kha ka thiam lo zawk…’ a ti dam leh thlup.

Engmah sawi loin ka tho kanga, a biang tawn tawnah ka khawiha..’I thiam loh a ni lo..Nakinah ka nei leh mai ang.Thla thum hnuah kan try leh thei Doctorin a tih kha.Kan nei ta lo anih pawhin Naunaua a awm a..Nu chu ka ni sa renga’ engmah sawi loin min pawt kuna, ka hmuiah a hmui lum ham hamin a rawn si a,ka chhang let ve nghal vat bawk.

Sangkima nen kan inkar a danglam ta vek. Hremhmun kha Vanramah a inlet ka ti lo thei lo.Keimah ai pawha ka lo rin thin Mipa kha ka lo ringsual lo tih nitin atharin ka hmu zela, min Hmangaihna pawh sawi mai loin a chetzia in a lantir chamchi bawk.Mipa tha ber neitu ka nih zia Zari khan a lo sawi sual miah lo tih alang zel a ni ber.

Ka phone nghawr dar dar ka en a,Malsawma a lo ni a. Karkhat aia tam mah kan inbe tawh lo. Sangkima’n a ngaitheih loh zia ka hriaa. Ka nu chungchang pawh Mitei zawk ka zawt mai zel.

‘Hello…’pangngai takin ka ti a.

‘I lo kal vat thei angem? I nu hi a nuam lo viau maia’ a rawn ti a. Ka lungphu a rang nghal dawt dawt thei.

‘Maw? engtin nge a awm? Damdawiinah inkalpui em?”  ka ti nghal mawlh mawlh.

‘Aih, kalpui rih lo.Amah hian a duh tlat lo va.Eng emaw sawipui tur che a neia.Lo kal vat tum teh’ a rawn ti leh a.A aw a dam thlap nangin a landan ang a ni lo ang tih ka hria.

Sangkima ka calla,a pick thei lo..Vawi li lai ka call hnuah pawh a pick theih loh avangin msg ka daha,ka insiam sawk sawka. Ka nu hnenah ka nu damthat loh thu ka hrilh a, ‘ka lo kal ve ang?” a ti nangin ka hnial thung.

Hminga leh Sangkima an chhuaka, Tea leh Zari an thiante inneihna lamah an kal bawk.Driver pakhatin min hruaia.Amah hi pa upa lam niin ka nu hman thin deuh bik a ni bawk.

Kawngkhar kik leh tlanluh ka ruala.Mahse, ka rin loh deuhin ka nu Living Room thutthlengah a lo thu a. A bulah Malsawma a lo awm bawk. Ka nu hmelah chuan damlo chau hmel alang eih lo.

‘Nu,I tha em?” ka ti nghal halh..Min chhang loin ka hnunglam a en a. Ka hawilet vat. Zari a lo lut meka.Kawngkhar a kalh nghal hmak bawk.

‘Nang maw? Inneihnaah i kal emaw ka tia’ mak ti zetin ka ti ha mai.

Min chhang loin a nui a, a nuih dan chu nuih satliah a ni lo..A hmel chuan min rap takzet. Ka hawilet tur chiah ka tukhum a hik chhawka…Ka awp nghal rawk bawk.

NOTE- KA RIN AIIN A SEI LEH SIA, KA ZIAKTUI TA PHIANA,NAKTUK ZANAH CHUAN CHAPTER THAR LAW LAWIN KAN TAN DAWN NIA AW.TIN,VAWIIN RUAHSUR KHA AMAH MAIA BANG A NI LO,KA DO BAN ANIH KHA..KAN CHHUNGKUAIN KAN HUH VEK AW🤭🤭