PURPLE HEART - 1

 PURPLE HEART

ZIAKTU Maengi Ralte

Chapter – 1

Thawm awm loin a reh thiap mai. Ka ep zawnga thu chu ka en a, a hmai a tuai pawk.

‘Eng emaw tal i sawi thei angem?’ a ti thawp sut.

‘Sawi tur a awm lo’ ka tum aiin ka aw achang lam hreta, lo dawngsawngtu tan chuan hriat nuam tak a ni lo ang tih ka chiang. Mahse, pawi ka ti lo.Nia, pawi ka ti hauh lo.

‘Kal tawh rawh’ ka ti dam leh thlapa, ka tho a. Kawngkhar lam ka pana,a kalhna ka hawng a.Ka nem hawng zui nghal zat bawk.Min rawn en a, a hmelpa leh ngeng zetah chuan a vawi khat nan beidawnna chiang takin ka hmu a. Mahse, eng anga beidawng pawh lo ni se ka chunga thil thleng kha siamthat theih a ni tawh lo.

‘Te…’ a titham leh tuak.

‘Kal rawh’ ka insum theihna ka hloh loh nan ka chhugrilah ka infuih mawlh mawlh angai hial. Beidawn hmel lutukin a thaw hawka,a hmai a tuai leh pawk. Ka awmdanah nawrluih chi ka ni lo tih chiang takin a hmu ngei ang tih ka hriaa. Thla ruk chauh la inzui mah ila ka duhzawng leh duh loh zawng a hrechiang em em tawh bawk.Kei pawhin hriatchian tumin ka zir nasaa,ka hrechiang thawkhat ve bawka. Mahse,tunah chuan a tawp vek tawh.

Min rawn kal pela, a dar hlai hlap mai chu a kum deuh hluna, a sam chhip lam buk deuh bik pawh a hnawk deuh niaih. A chhuah fel rualin kawngkhar ka pawtkhar nghal hmaka,ka kalh a. Mahse, kalsawn loin kawngkhar nghengin chhuatah ka thusawp thlaa. Ka biangah mittui a rawn luangthla nghal a; ka tap khur zui ta hlawk hlawk.

‘Zo....Ka mamawh lai ber che khan khawiah nge i awm? I thianpa ngeiin tennawm taka min khawih tuma a beih lai khan mangangin ka au che a, i awm si lo..Ni e, I awm lo..Ih e, awm lo satliah nila chuan ka ngaidam thei ang che,I thianpa chetdan tenawm tak kha i thiam loh a nih tlat loh avangin; mahse, tu bulah nge i awm ka hriat rual khan ka kehchhiaa, hlauthawng chung chunga i hunkal tawh ami ti a ka lo inhnemna ngei bulah khan i lo awm tih ka hriat khan nang nena inzawmna nei leh tur chuan ka chapona hian a tlin ta bik lo.Ka dem hauh lo che, kum kha lehchen ilo zui tawh leh i hmeichhe hmangaih bulah khan awm reng la, hlim ang che’

Ka tapchhuak ta hawk hawk..Hlim se ka la duh cheu hi ka inhrethiam thei lo.Kalsan,hnawl leh bum ka ni chung pawh hian a hlimna tur ka la duh miaua..Hei hi Hmangaihna anih ngai chuan ka nun pumah hian ka Hmangaih nen hun kan hmang dun leh tawh ngai dawn lo tih ka hming ka hriatchian tluk zetin ka hre chiang ta e.

Zorinsangi ka ni a, ka chhungte chuan ‘Bawihte’ tiin min ko a,ka thiante leh hmelhriat tam zawk chuan ‘Te-rin’ tiin min ko ve thung.Kum 2 mi lek ka nih laiin ka pain a Duty na hmunah Tuikuk helho kut tuarin min boralsana. Ka nu hi Electric Deptah JE niin ka pa awm tawh lo mah se harsat erawh kan harsa lem lo.Hausa tak tihtur kan ni lova, kan mamawh ang chu kan nei ve ti ila a dik ang. Unau pahnih kan ni a, ka u mipa a ni a,kan inkarah kum 4 a tla..Kan unau zia a in ang lo lutuk hi thilmak tak a ni .Mi tumruh leh tih tawh lam tibur mai a ni a,kei erawh hmachhawp em em pawh nei lova nung ve tawp ka ni thung; a naupanlai atangin a tuipui ber kut hnathawh lam a ni daih bawk.Mahse, ka nu thuawihin College erawh a kalchhuak thlap tho. Ka nu hian ‘kuthnathawk tur pawhin lehkhazir hmasak a pawimawh’ a ti thina. College a zawh hnuah ka puin ka pa ram a pek,Reiek lamah a hun tam zawk a hmang ta thung. Thlai leh thei,hralhchhuah theih chi tur a buaipui em em a, Nimbu tam vak lo leh Serthlum thahnem tak a phun a. Dil lian tha tak pahnih a awm bawk. Kumin atangin Dragon Fruits a phun belh leha, vanneihthlak takin kan ramri chiaha awm ten an huan thenkhat hralh an lo phal lehzela, kan lei belha. Dragon fruits chinna atan a buatsaih zui leh a; Thlam atan Assam type nuam taka sak a awma. Tui lah a tha lehzel bawk. A Gypsy hlui tawh tak kengin a riak lut deuh reng a ni ber.

Kei erawh tum mumal tak pawh nei lem loin ka zirlai ka zir mawp mawpa, MA ka zawh hnuah tihber tur hre chuang loin ka awm ta mai mai. Ka nun hi a thawveng halha, vei renrun ka nei ngai lo. Ka nu hi nu fel leh tluang tak a ni a, mahse Kohhran lam a la na vak lo.Chu chu keipawhin ka thanlen puia, Kohhran ka bel lem lo. Sunday chawhma ka inkhawm ve a, chu zawng chu a ni deuh mai. Mi harhvang leh thawmna tak,tawng duh leh nui peih tak ka ni a. Thian ho a chhuah thawven vel nuam ti chi ka ni bawk. Mahse, zu ka in ngai lo tlat thung. Nu lian tak tihtur ka ni lova, te chhia pawh ka ni chuang lo. Ka hmelchhe hran lova, mahse tha tih vul chuk chi ka ni chuang lo. Cher lam aiin thau lam ka hnaih zawka, vanneihthlak takin ka dul a kiar ngai miah lo.Ka hnute lian leh kawh lah hi ka thinrimpui tum a awm fo.Ka taksa dang nen a inmil lo ka ti thin miaua…Mi harhvang tihtakah ngaihzawng ka nei zula,mahse tumah lak thutak ka nei ngai lo.. Kan inkar a tha vak lo dawna ka hriat chuan min then hmain ka then ziah. Mipa hian min then ka hlau ngawih ngawiha,keiman then hmasak ka duh a ni tawp mai.Mahse, Zachary Zoremsiama ka tawn hnuah erawh Mipa ka endan a inthlak danglam ta hlawk thung.

MA ka zawh atanga thla li a liam hnuah kei ang bawka hmachhawp nei lo ka thiannu nen Computer class kal kan rawta, ka nu hnenah ka hrilha. A  pawm zawng tak a lo ni a.Kan kal ta lauh lauh; reipawh kan kal hmain nuam kan ti leh nghal dera.Thian fel tak tak ka tawnna hmun leh ka nuna mi pawimawh ni kumkhua tawhtur Zachary nen kan intawnna a ni ta bawk. Mahse, kan intawn dan hi tihpalh thilthu takmeuh a ni thung.

Kan class kalna bul chiahah Damdawiin atana hman thin Building lian zet a awma; Damdawiin atana hman anih loh hnuah an vaw thiata,an siam tha leh meka..Kawngpui an ni siin Vairam ang maiin kawngpui atanga hla deuh de daw a sak a ni thung. Ground Floorah insakna bungraw hlui an vawmkhawma, chumi bulah chuan keini pawhin  Scooty kan hung ve thina,Kawngpuiah Motor tlan tam em em mah se a va hlat deuh avangin a hnawk pha lo bawka tuman min hau ngai lem lo.

‘Naa, he Motor hi enteh.Engtin nge ka chhuah anga?” ka Scooty hnunga Car nalh zet lo ding en pahin ka ti nang nang mai.

‘Ekhai!! A va ding tawk chiah chiah ve le..A fai mai sia’ ka thiannu B-in a ti nghal hap.

‘Lo fai chatuan mah se ka Scooty chhuahna adala,tunah chuan bawlhhlawh a ni rih’ ka ti hlak..Min chhan pawh nghak chuang loin ka kal kuala, Motor ka sik rualin ring zetin a rawn chiau nghal vak..Nasa lutukin ka phu dawrha,ka zuang sawn nghal zawk bawk.

‘Hrep tak hian….’ Rum zetin Motor ka en a,B-i lo nui tlawrh tlawrh chu tur zetin ka melh leha; inthlahrung siin min en pahin a nui khur zui char char. Tihngaihna hre lo thinrim bawk siin Motor ka melh vaka,lei ka chhuahkhum nghek ringawt.

‘In chhuahna tur ka dal em?” Mipa aw thum lam hian a rawn ti a, ka inher zawk. Inchung lam panna Step a lo kal thla mek chu ka han hmu a. Ka tihthin danin a dress ka hmu kim leh hman vek..Collar T-shirt dum a haa,kekawr vutbuak rawng a ha thung. Loafers a buna, a kekawrah a kawr hak a bilh lut thlap.A pian nalh zia chu a…

‘Ka dal che u em?” a ti nawn leh a. Ka dinna bulah a rawn dinga, ka melhchho ha mai.Mizo mipa pawh hi an lo lian thei ngei mai…

‘Aw… Min dal chu anih hi’ ka ti satliah.

‘A zia lo hle mai..Ka tum aiin ka rei ta zek a’ a ti leh a. Amah leh a aw a inhmeh tlat. Tunlai hian You tube lamah eng eng emaw chhiar an intih hmuh nasa sia,he pa hian chhiar ta se a aw ngaihthlak a nuam kher ang tih ka lo ngaihtuah daih.

A tlan liam tur chu B-i’n a thlir zui vang vang.

‘Tu nge le?” min rawn en pahin a ti a.

‘Ka hre nang,Ti nge?” Scootyah ka thu kai a.

‘Ka hmuh hnu a ang em a..’ ati leh a.

‘A va han ho mai mai e aw..Bazarah in intawk tawh aniang chu’ ho ti lutukin ka nui a.

‘I chhe mai anih chu a..Chutiang lek nise ka hriat reng i ring ami?” a ti hlak.

‘Chutiang lek a ni lo chung pawhin i hrereng chuang si lo chu anih kha..Chuang teh,a ho em mai’ ka ti liam leh puat.

‘Khawiah nge ka hmuh tawh le?” ti vang vang chungin a rawn chuang kaia,ho ka ti lutuka sawipui zui ngaihna pawh ka hre lo.

Kan thiannu Birthday kan lawma, kan ti le lu mai..A then erawh duh ai chuan an rui lam mah tawh..’ Lam ang’ Zira’n a rawn ti a. Zira hi College atanga ka kawm a ni a. Pianphunga tuai ni hauh lo,tawngkam pawh nem eih lo a ni a. Mahse, a rukin Mipa a kawp thin tih ka hre thung.

‘Ka lam peih vak lo sin’ ka ti a,ka kalchhuah hmain ka nu nen thil ho mai maiah kan inbat buaia,  B-i kal tum vek tawh a thulh leh thut zui bawk nen ka mood a fuh lo teuh mai. Mahse ,ka hnialna ngai pawimawh lo zetin Zira’n min pawt tho nghal a. Nia, lam hi nuam ka ti a. Ka thiam bawka,Party naah reng reng Zira nen kan kal chuan lam dun turah min ngai deuh tlat tawh.

Kan lam zo a, kut an beng nghal dar dar mai. Atira ka peih loh ngaihtuahin ka lam takah chuan nuam ka ti leh phian lawi.

‘Thianpa, I thiannu hi ka lo lampui ve’ mipa cher sang zet a rawn ding hnaia. Ka tawlh let nghal vat.

‘A chau deuh tawha, min hrethiam teh’ ka awmdan hrethiamin Zira’n a ti vat.

‘Ah,a rei dawn hleinem.Khatiang khawpa lamthiam kha lampui ve ngei ngei ka duh tlat’ a ti leh ta tlat. Tu nge anih ka hre ngai lova, a mitmeng vai deuh ruai mai chuan ruih a nei tih a tilang vek zui bawk.

‘Min hrethiam rawh..’ tih pahin ka nui lui saka, Zira ka mitmeia,ka inher zui nghal zat.

‘Lawk…’ ka ban rekah a rawn vuana. Rang lutukin ka inhera, ka kut a vawnna ka thingthla nghal nawk. ‘Eheu!! I va inla hlu ngar ngar ve le’ a ti pawr huar.Min rawn ban leh rualin ka kut a phe zawka,a hmaiah ka beng nghal thuai..

‘Hmeli le(h)…’ a kut a lek ve nghal uaiha,mahse min rawn khawih ve hmain kan inkarah tak mipa pakhat a rawn ding a.Zira emaw ka ti hmana,mahse a awpa leh fiah zet chu Zira aw a ni lo tawp.

‘Thianpa,a duh lo tih a sawi tawh kha’ a ti vawt ruih mai. Kan boruakin a zir lo bawk nen Party naa awm ve hoin min rawn hnaih nghal huk bawk.

‘Tu nge maw inih le?” Chersanga’n a teng pherh zetin a ti leh a.

‘A bialpa…’ ka thaw a tawp chawt.

A rawn inhera, ka hmu tawh..Nia, ka hmu tawh chiang lutuk..Ka scooty chhuahna dal taka Car fai nalh zet dahtu ngei kha a ni. A rawn kun hnai thuta…’ Hamhaih vak duh suh’ a mit a siai zauha. A ding ngil lehnghal daih bawk.

‘Nang….’ Ka ti hmana, ka sawi zawm hmain Mipa dang tawng riin a rawn hliah ta zawk.

‘Ehe!! Sir,nangni alaw? kan tihpalh lutuk,Thianpa kal teh ang’ keimah ang rual vel tur,hmai fang fel tak hian a rawn ti nghal mawlh mawlha, ka bula ding chu ka melh a, lo kal thar pa lam hawiin a bu nghut.

‘Kal ang le…’ ka banrekah a rawn vuana, engkim mai chuan min ti hamhaih lutuka, hnial nachang pawh hre loin min kaih ang angin ka zui chhuak ve tawp.

Kan Party na building atangin min kaichhuaka, kawng min kanpuia, a Car ka hmuh tawh ngei mai kha a lo awma, a bulah a ding chut.

‘Lut rawh le…’ a ti dam thlup.

‘Aih, tu nge inih pawh ka hre hleinem che’ ka ti hmak. Ka banrek a vawnna a thlaha,ka tuai nghal nauh nauh mai.

‘Lut rawh..’ ka sawi hre lo ang hmakin  ati leh nghuta, a sawi zawh rual deuhthawin Kawngkhar a rawn hawnga, hnialna hun pawh awm miah loin min nawrlut chu a ni der.

‘Hey….enge itih a?” ka ti vak.Nem hawn ka tum a, a lo lock vek hman.A rawn thu lut ve nghala, hahdam hmel takin a seat nghenchhan a ngheng nghal ur ur bawk.

‘Ka chhuk duh ania…’ ka theihtawpa pangngaiin ka ti leh hmak.

‘Zachary ka nia..I duh chuan Zach tiin min ko thei ang’ ka thilsawi a haider hmiah..

‘Tu pawh ni rawh…Mahse, khatiang lemchan vang mai mai khan duh duha kaihkual theih hmeichhia ka ni lo’ ka ti leh tan tan.

‘Yes..I ni lo tawp.Ka lo hmu che alawm..Chuan, I bialpa nih ka tum tak tak bawka’ a nui ri chu mak takin ngaihnawm ka ti ru viau tlat.

‘Ka duh lo bawk che’ ka ti nghauh. Ka tawngdan chuan a nuih a ti za a ni ngei ang,a nui nghal hawk a..Ka ngaihtuah leta, naupangchhia ka inti lutuka, ka hmai a sa hat hata, ka nui ve ta hak.

‘Terin-i…’ ka ti ta hap.

‘Terin-i…A va nalh si ve’ a ti liam vut.

Ka nuna mi pawimawh ni kumkhua tur ZACHARY ZOREMSIAMA  nena kan inhmelhriat tanna a lo nita a..Amah hre tu zawng zawngin ‘Zach’ emaw ‘Zachary’ tiin an ko a. Kei erawh chuan midang koh loh danin ‘Zo-a’ ka tih loh pawhin Zorem’ tiin ka ko thung..Mizo hming nalh tak aneih laia Sap hminga lo koh ka duh bau lo..Atir lamah chuan ho a ti a, a hnuah erawh a duh ta ngang mai thung. Ka tihtauh changa ‘Zachary’ ti a ka koh chuan a haw thei ta viau bawk..Kan bul tan dan hi ka ngaihtuah let chang apiangin ka nui thina, thawnthu a cheng nimaiin ka inhre thin.

Thian angin kan tana, mahse atir phat atangin a hmeichhe duh chi ka ni tih a sawi nghal hmiah.Han thluaithlum chiam a awm lo..Kan class kalna bula Building kha an ta a lo ni a. Unau Pahnih zinga naupang zawk niin  Police Officer naupang leh hmingtha tak a lo ni a. Social media lam hian ka nunphung a tihbuai lem loh avangin Mizo Mipa,IG lama followers ngah ber pawl a ni tih pawh ka lo hre ve pek lo.A hnathawh that leh biak a nawm mai bakah a pian nalh a lo larpui viau tih phei chu ka hre lo lehzual.

‘Hmeli, ka hre teuh lutuk ka tih reng kha. IGah a lar lutuk tlat’ B-in Party naa thil thleng a hriat veleh a ti nghal pang pang. Ka lo nui liam vel mai maia, hun a kal zela, kan inkawp zui tih a hriat phei chuan min thik fiama,min lawmpui lo lek lek mai. Nia,a mak ve em bawk a ni.Kei ai mahin B-i a chhe lo zawka; chumai bakah Aizawl chu sawi loh kan veng nulaah pawh a tha ber ka ni lo ve chianga.Chuti chunga min duh tlat mai hi thil pangngai ni hek lo le. Ka englai ber hi nge a duh ang tih ka ngaihtuah vung vung ziah.Amah ka zawt phawng tawha, ka khabe a dawm chungin chiang takin min en a…’ Amal te te chuan ka hre lo,Mahse, nangmah pumpui hi ka duh che’ tiin min chhang a..Ka ringtawk veng vawng khawp mai.

Thla thum kan inzui meuh chuan ahmaa mipa ka lo kawp tawh thin te nen an danglam tih ka hrechiang tawh lutuk ringawt. Tawng duh tak a ni lova, mahse tupawh a bulah an tlangnel sarh zel mai. Mi thusawi angaithla peih em em a, an phak tawk ang zela titipui a thiam tlat..Hnaah a buai avangin a lo leng regular viau lo,mahse hun a neih apiangin a lo kal zat zata, harsa deuh chung pawhin hunawl a insiam hram hram zel bawk. Kei aiin kum 5 in a upa zawka, min care lutuk hian min ti pangchang khaw lo lek lek thei hial..Mahse, a nuna angaihpawimawh ber erawh chu hna a ni fan.

‘Te, Zachary bialnu hlui i hria em?” thil kan ei mawlh mawlh laiin B-in a ti thut.

‘Hre ve e..Tinge?” ka ti liam awlsam mai.

‘A lo haw asin, niminah ka cousin-in min hrilha..’ ka hawi bo deuh tlat. A bialnu hlui pahnih ka hriaa, Aizawlah pakhat a awma, pakhat Lawngtlaiah. Midang pawh a neih teuh tawh ka ring tho.

‘A lo haw a? tu nge? ‘ ka ti deuh ha.

‘Mamali te veng ami ania..An tleirawl chhuah phat atangin an inkawp atia..Zachary te veng bul chiahah an awm..Mahse, eng emaw thil vangin an chhungkua hi an induh lo tawn aniang. An inthena, an inthen hnuah a awm bo ta vang vanga.Chuan,niminah a lo haw a..’ a ti duah. He Story hi ka la hre ngai tlat lo.

‘Tu nge ahming?”

‘Hmingsangi ania..Keini ai chuan a u hret ang. Ih, a chhe lo rapthlak mai’ a ti leha.

‘Chuan…?” ka ti tawi tak.

‘Ka sawi mai mai mawle..Mamali chuan an inthen hlen tak tak aring lova..’ a ti leh a, nuam ti lo hmel a pu.

‘Inthen hlen lo se kan ni tawp nang’ ka nui sak.

‘Nia,keipawn ka lo tia. Bakah tupawn nunhlui kan nei vek alawm tiraw?” a ti leha. Ka bu nghat; kei pawh hian x ka ngah ve em tho mai.

Hna tul angah tial tiala, kan inhmu khat tual tual bawk. Vawi tamtak Hmingsangi chanchin zawh ka tum tawha, ka thulh leh ziah.  B-in an inkawp dan engkim a lo hre chiang ta veka, min hrilh leh vek bawk nen ka awm a nuam thei lo. Hna tul avanga a lo kal loh hian min lo be ziaha, a hman veleh min rawn be leh bawka.Mahse, ka rilru a nuam thei ngang lo. A nunhlui ami tiin vawitamtak ka inhrilh nawna, ngaihpawimawh loh ka tum luia.Thil tul loah ka inti hah tih ka hai hek lo…Mahse, hahdam taka awm erawh harsa ka ti. Zorema hi kan la inzui rei lo chungin mi rilru nghet a ni tih ka hria,a bialnu hlui, reitak a lo kawp tawh chu a kalsan tak tak angem?

‘Kan area-ah buaina liantham deuh hlek a awm tlat maia. Ka thulh mai angai’  a rawn ti dut dut. Vawiinah kan thian ho Picnic kan tuma, chawhnu lamah ahman arin avangin chawhnu lama kal tumin kan awma. Mahse,zingah a rawn thulh leh..

‘Maw? anih chuan ka thulh ve mai teh ang’ ka ti halh.

‘Sorry…hna hi a pawimawh hmasa lo thei thin lova.Mahse, thulh suh; midang an awm vek dawn tho a’ a rawn ti dam thluam.

‘I awm ve dawn chuang hleinem’ ka ti nghauh.

‘Aaaah, ka awm loh pawn a hrehawm lutuk lovang.I thulh ve zel chuan i thiante an lawm lo ang’ a rawn ti leha..A awah min duatna ri ka hrethei.

Min thlem fe hnuah kal ka ti thlu ta chauh..Tunlai an buai zual avangin kan inhmu khata, vawiin ka lo nghahhlelh tehreng nen..Nilengin nuam ti lo em emin ka awm tluan ta zak.

Chhunah vawikhat min rawn biaa, chubak chu min rawn be lo.Abuai viau anih ringin ka call buai duh lova.In ka thlen hnuah ka haw tawh tih hrilh turin Msg ka thawna, darkar khat a liam hnuah pawh a la seen lo. Ka nghak deuh ren rawna, mahse tui ka cheng nasa bawk nen ka chau lutuka ka muthilhsan ka daih.Zingah thuphachawina msg a lo awm vang.Ka lungawi chu a ni leh mai.

Karkhat liam hnuah min Bazar pui turin hunawl a nei ta hram. Jojo’s Cafeah lunch ei turin kan lut a..Kan thu fel deuh chiah tihin hmeichhe pakhat hi a rawn kal hnaia..’ Hey, Zach…I tha em?” a rawn ti a. Ka en vat, nu tawi thau lam..Ka rualpui awm vel a ni a,a sam buangthang chu a kir chiat bawk.

‘Aw. Tha alawm…Nang zawk?” zangkhai vuhin a ti let ve a.

‘Um,tha..E, engtin nge Hmingsangi chu a awm tak? A zia zel em?” a ti leh a. Ka phu zawk,rang lutukin Zorema ka en a,a hmelah engmah danglam a awm lo.

‘Tha zel ang..’ a ti tawi tuk.Hmingsangi dang an sawi nge a x zawk ni ang? Ka awm a nuam hlawl lo.

‘Anih tak chu mawle..Anih u,ei teuh ula’ zangkhai takin a ti leh a. Min rawn en a, nelawm takin a nui a. Ka nui ve sak ringawt.

A kalsawn hnuah insum thei loin ka zawt ta tawp. ‘Tu nge Hmingsangi chu?” ka aw a khur lek lek mai.

‘Ka thianhlui ania…’

‘Um…A dam lo mi?” ka ti leh a.

‘Aw, karhmasa khan nikhaw hreloin a roomah an hmu a.Ka lo awmhnai hlauha,ka buaipuia’ a ti leha. A sawi danah chuan danglam engmah a awm lo.

‘Anih chu mawle..In veng a in ang ami?” ka ti leh talh.

‘Aih..Romala te in bulah khan an awm. Romala te in a ka kal tur an gate bul ka thlen lai takin an nula mangang deuhin a rawn tlanchhuaka’ a ti leh a. Hai rual lohin Romala te in bul anih chuan B-i Cousin te veng a ni tihna ania.A x chu a ni ngei mai. Mahse, a aia thui zawt turin huaisenna ka nei tawh lo. Hmeichhe huaisar ve tak thin kha ani ka tawn hnu hi chuan ka nawi ta em em mai chu ania.

‘Anih chu mawle’ ka ti hul hak.

‘Dik lo a awm em?” ka awki hniam deuh chu a lo man leh hman.

‘Aih..Tinge?” angaihna hre lo niawm takin ka ti deuh ha.

‘Ka hre lo..I awmdanah khan dik lo awm a ang em a” a titha ve mai.

‘Aih’ ka ti leh a. Ka nui lui hak..A nui ve suka,kan eitur chah a rawn thleng zuia.Engmah sawi zawm leh tawh loin kan eitur ve ve kan ei dun zui mawlh mawlha.Mahse, ka rilruah erawh chuan Hmingsangi nen inzawmna an nei leh em tih lam bak a awm thei lo. A sawi danah khan thianhlui te chanchin sawi ang mai a ni tak taka; han ngaihbel luih tlat tur pawh a awm miah lo.

Thil kan ei zawh hnuah kan Bazar leha, in kan thlen meuh chuan khua a thim hnai tawh. Kan hun hman nuam tak khan ka rilru nawm lohna pawh min theihnghilh tir ve titih leh ta mai.

Ni hnih liam hnuah zanah an thianho zinga mi Papuia lo haw lawmna Party an siama,kan pahnihin kan kal duna.A Best Romala hi ka ngaina tawh viau mai.Midang dang pawh ka hre nual tho a,mahse Romala tluka nel ka nei lo.

Keini pahnih leh Romala bakah Sena kan thu ho a,Romala tih lohah chuan Sena hi ka nel leh deuh ber a ni a,kan titi mawlh mawlh laiin Zorema Phone a ri a,a en a..’ ka va be lawk ang’ tih pahin min rawn en a. Ka bu nghat..A kalsawn hnuah kan titi zawm lehnghal mai.

Minute 5 hnu velah a rawn let leha, a rawn thu thlaa…’ Ka kal chhuah lawk angaia’ a ti a. .Ka en vat.

‘Tinge? Hna thil ami?” ka ti a.

‘Um..Aw’

‘Anih chuan min Drop mai la…’ ka ti leha.

‘Aih,angai lo..Party hi hun chanve pawh ala kal lova.Papuia a lawm lo palh ang.Lo let leh vat ka tum zawk ang’ a ti a.

‘Nia…Kal rawh.I lo let leh ta lo anih pawhin ka lo thlah mai ang’ Romala’n a lo ti ve vat.

‘Ok..Anih chuan ka va kal zuai ang’ a ti a. Ka kut a rawn vuan zauh.

Darkar khal a liama, a lo la let ta lo. Ka calla, a pick thei bawk si lo.Tihbuai viau ka hlau bawk si nen call nawn loin bet lo zetin ka awma, ka bula midang hlim ri chel chul chu ka ning hluah hluah tawh.

Sana ka en zauha,Dar 11 a ri tawh.Zorema kalchhuah atang khan darkar 3 a tling tep tawh. Ka tho a, Balconyah ka chhuaka..Ka phone ka phawrha, msg ka thawna..A tlang thei miah lo. Internet signal a nei lo anih ringin ka call nghala, Switch Off..Romala ka inthlah tir mai atul dawn tlat.

Inchhung lam ka va thlek dak daka, Light dul zetin a eng ruaia, Romala awm reng reng ka hmu lo. Nichin kha chuan a bialnu nen an lamdun a.Khawiah nge an kal tak ni?Ani pawh ka call mai angai dawn anih hi a..A bialnu nen anni bawk si a, nuam erawh ka ti lo ru nghal pang mai.

Ka call hmain Toiletah ka lut te te a. Chhuah tuma kawngka ka hawng chiah chu Kawngka bul seta Sena lo ding chuan minti phu zawk.

‘Awi,ka phu nasa lutuk’ ka ti halh.

‘Ha…Min hlau suh’ a ti a, a mitmeng phelh phung maiah chuan a in hnem tih achiang reng.

‘Hlau lo ve’ tih pahin kal pelh ka tuma, mahse ka rin loh lutukin min rawn nem thuta, Toilet chhungah min nawr lut nghal rawk.A chet dan tehthut chuan min ti hamhaih lutuka, chet lak mai dan tur ka hre lo.Mahse, min rawn fawh tum niawm taka a rawn kun hniam chiah chu ka harh zawk. Na lutukin ka nem vaka, a let deuh rawk. Kawngkhar lama ding anih avangin tlanchhe turin amah ka kalpelh angai.

‘Enge i hriat a?” ka ti that..Min chhang loin a thle luk luka, min rawn ban leh nghal du mai.Ka petek zauha, mahse a zim ngang mai si a kan inhlat tak tak thei lo.Min rawn nek bet rawka, Palian pangngai tak a ni a, sa nei chi a lo ni bawk nen min nek bet chiang lutuk tlat.

‘Tal lo maiteh’ a ti a, a nui zui kur kur mai. Rapthlak ti lutukin ka en a,a rawn kun hniam lehnghal chu ka ngaihtuahnaa lo lang hmasa ber zuiin ka tauh nghal chawrh.

‘Zawngi..’ a ti tuar.Min hlat san lai remchangah lain ka talchhuaka, min rawn man leh hman tho.A kapkarah tak ka pet chawrha, a awp nghal rawk mai.

Kawngkhar ka hawnga, ka tlanchhuaka, pawn lam atangin ka lock nghal hmak..Inchhungah ka tlan luta,Romala zawngin ka hawi kuala,a eng chau bawk nen ka hmu mai lo.Tihngaihna hre loin pawn lamah ka tlanchhuak ta ngawt.

Pawn ka thlen veleh ka phone ka phawrha, Zorema ka call leha, atlang thei lo.Ka mittui a rawn hnam sawk.Mahse, tap hman ka ni lo.Taxi lo tlan hmasaber ka phara, ka lut nghal sawk sawk. Kan in kan thlen hmain vawi tamtak Zorema call ka tuma, a tlang thei ngang lo.

Khur hlawk hlawkin ka mu tawm kak mai. Sena chetdan tenawm lutuk kha Zorema’n a hriat hun chuan a him hauh lo vang.Mahse, tlema tlemah min pawngsual lo chauh chu anih kha. A hmelah khan pawisak a nei miah lo tih alang reng mai si.

Khawvar dawn thlengin Zorema hnen atangin msg emaw call takngial pawh ka dawng ta lo.Kawl a en hnuah ka muhil ta chauh.

Ka phone riin min tiharha, peih lo zetin ka en a. B-i a lo ni a,’ Hello’ tih pahin ka mit ka chhing lehghal mai.

‘Ka msg lo en teh..Nizan thil ania.Party naah inkal emaw ka tia’ a rawn ti nghal mawlh mawlh.

‘Enge a?” mutchhuak awin ka ti a.

‘En phawt teh. I en hunah zawhna min zawt loin keimah zawkin ka zawt ang che’ a rawn ti leh daih.

A off zui nghala, mit thial urhin a msg min rawn thawn ka checka, mahse enge anih ka hmuh rualin ka mutchhuahna a thlawkbo nghal vek.

Zorema leh Hmingsangi thlalak a lo ni a. Hmingsangi upload niin ‘Z&H’ tih ringawt Caption atan a hmanga, Zorema thawmhnaw hakah nizana mi a ni tih ka chiang lutuk tlat. Mangang taka ka awm lai khan tihian a nunhluia mi nen an lo awm duna, a hna pawimawh kha thildang ni loin a nunhluia mi pawimawh kha a lo ni bawka..

A tawp ta vek mai..Reitak a lo zui tawh kha a lo lan leh meuh chuan reilote ka ta a lo nihna kha awmze nei lo mai a lo ni.

Sena natuar let reng kha an va hmu lawk lova, inthiar tura mipakhat kalin a va hmu ta chauh.Engmah a sawi tha duh lova, mahse ka tlanchhe chhuak lai kha min hmu an lo awm a. An han zeldin kuala, zep reng theih a nita lova. Party naa kal zingah a darh ta hluai. Mak takin Sena dem tawk an awm laiin keipawhin ka thiam lo ve anga ngai an awm tlat. Mahse, thian tha zual deuh tak tak chauh annih bakah mi puilting tak vek anni hlawma. Pawn lamah thilthleng kha a rikchhuah a rinawm loh..

Ka chunga thil tenawm tak tih tumna min beih ai khan Zorema vanga ka natna a thuk zawk..Engtin nge Sena a insawifiah ka hre lo.Vawi tamtak min rawn calla,ka pick lo vek. Tlaiah Inah a rawn kala, thinlung kehchhe vek chung siin a tawpna erawh dam thlapin ka siam thei ta tlata. Mahse, ngaiawh turin ni engzat nge tih lam a ni lo.Kum engzat nge ka mamawh ang tih zawk a ni.

Motor atangin pawnlam ka thlir dauh dauha, ka awmbo atangin kum 4 a tling thelh tawha, vawiin hi ka awmbo atanga ka haw vawikhatna tur a ni a. Pathian zarah ka nu leh ka u an damtha a, ka nuin kan chhungte thingtlang lam mi puanthui zir a awmpui a. In lam ngaihtuah angai lo bawka,ka awmbo vang vang pawh buaina a awm lo. Ka mitthlaah Mipa pakhat kha a lo langa,kan inthen hnuah amah hriatchhuah theihna tur engmah ka duh loh avangin IG leh Fb ka khawih ta miah lo. Khawih nasa ni ngai lo mah ila a khat tawkin ka hmang ve thin a,tunah erawh ka khawih lo ta vek.Ka number erawh thlak tul ka tih loh avangin ka thlak lo. Ka rin ang chiahin vawikhatmah min rawn be lo.

 B-i hnenah thil thlendan engkim ka hrilh veka, kei ai mahin B-in a haw zawk emaw tih mai tur a ni. Kan inbe chamchia, mahse achanchin vawikhat te mah kan sawi chhuak ngai eih lo. Hmingsangi nen an innei ta nge midang a nei tawh zawk ka hre lo. Kan inthen hlim khan ka tha tawka, hnungtawlh nih ka duh loh avang leh amah vanga mipa dang ngaihsak thei tawh lo tur anga min ngaih ka duh loh avangin; rilru inpeih lo chung chungin kan inthen atanga karhnih a liam leh hnuah B-i cousin min lo Star tu ka nihpui hmiah.Mahse, rei kan inkawp lo..A hnu lawkah ngaihzawng ka nei zui leha, mahse ka chhungril ka bum thei chuang lo tih chiang taka ka hriat avangin ngaihzawng neih ka peih buai ta lo..

Ka awmnghenga muhil mek hmeichhe naupang hmeltha zet mai chu ka en a. Ka hmingchhiat theihna tur zawng zawng pawh hre vek chung leh Pa tel lova fa pawm hautak zia min hrilh chung pawhin ka chhungte remtihna nen ‘NU’ ka ni ta. Ni e, Single Mom nih hi thil namai a lo ni lo..Mahse,Amah vang hian nun awmzia ka zir thar leha, amah vanga ‘NU’ ka ni hi ka la inchhir chhin hek lo..Ka nu leh ka u nen an pathum hian ka damchhan te anni a, ka khawvel te anni bawk.

P.S - CAPTION ULUKLY IN CHHIAR ANG AW..