PURPLE HEART - 4

Chapter- 4

‘Engmah ka hrilh loh chhan che chu i nat nawn leh ka hlau a..Ih,aaaa…Ka hrilh lo che kha ka tidik lo tih ka hria a ’ inthiam lo em em hian a ti leh a. Awmze nei miah loin ka bu liam satliah ringawt. Ni e, a dik lo;min lo hrilh ta se thil hi a danglam vek maitheia. Khang kum chhung zawng zawng khan rilru na reng renga hun hmang loin ka pasal pawh a lo ni zawk maithei bawka.Mahse, he thilah hian B-in engmah thiam lohna a nei lo.Ka na tih a hriaa, ka nat nawn a duh loh avangin ka tana tha tur angaihtuah animai.

‘A pawi lo….’ Muang ban chatin ka ti a. A rilru tihnawm tumin ka nui lui sak bawk.

‘I awm loh hnuah khan Hmingsangi kha a raia, mahse ka hriat chuan i awmloh atang khan kum a tling hmana. An lo innei fel daih tawh bawka. Ka hrilh ang che ka ti a,mahse thil tul tak ni loin ka hriaa,ka hrilh ta lo mai che a.Bakah,Zach-a khan insawifiah duh tak tak se a rawn be em em ang che tih ka ngaihdan kha a ni tlat bawk nen’ a ti zui leh niah niah. A tihsual engmah a awm lo.Ka nat a duh lo tihna a nimaia.Hmingsangi chungchang thleng thlenga min hrilhhriat kha a mawhphurhna a ni lo a. Ka tuarchhuak ni a ahriat kha tul loah ka rilru a nat nawn leh a duh lo tihna pawh a ni ang chu.

Muhil thei loin ka mu meng kara, ka ngaihtuahna a buai a. Ngaihtuah loh ka tum pawhin ka thei chuang hek lo. Min biak a duh a, min tihnat a duh lo bawka.Anih si chuan aman min hmachhawn thei ang chu? A mizia ka hriat danah khan midang puihna dil ngai khawpa dawihzep a ni ngai miah lova. Engvangin nge B-i hnenah puihna adil kher? Ni e, B-i sawi kha adik. Min be duha,insawifiah aduh takzet anih chuan vawikhat mai ni lo vawi tamtak min biak pawh a tum tur a ni.Mahse, a ti lova. Hmingsangi nen an inkar chu engpawh lo ni se, kan pahnih inkar kha a thuk tawk lo va. Ka duhna chanve pawh ani min duhna khan a phak lo tihna mai a ni.

Ka thuchhuak hlawl. Ka muhil thei dawn chuang lo tih ka hriaa, Soso-i tihharh hlauin thawm dim takin ka tho tham thama,Tukverh lam ka pan pheia. Curtain ka pawt kaua, kan inpiaha Street light eng thlara ruah sur sung sung chu ka va hmu a. Kalsawn loin hmuhnawm ti em emin ka thlir ta reng. Eng emawti takin ka lung a tilenga, ka mit ka chhinga. Kum li kal taah khan ka let leh ta vang vang.

A hmui chhah lam lek lek,lum ham hamin dim leh dam takin min fawpa, kan insan hleih lutuk vangin ka dingdihlipa, a nghawngah ka uai titih bawka..A duhthawh tual tuala,min pawmkang nawlha,a kawngah ka kherh bet ve nghal vata. Bangah min nawr beta, dimna a tel tawh lo.A thawk dan a mumal lo va,a hmanhmawh em em bawk..

‘Zo…’nuam tihna leh hlauhthawnna inkawpin ka ti sepa,hre lo niawm takin a tihlai a tihzawm zela, ka hmuia fawp tawh loin ka nghawngah a rawn fawpa, ka kawr chhanah ka hnute a rawn thama,ka mar nghal awk bawk.Mahse, ka chhia leh tha hriatna zawkin tawp turin min rawn ti leh a. Harsa ti em emin a samah ka thama..

‘Zorem’ ka ti leh thei hram.A thil tihlai a tawp nghal chawta,ka darah a hmai a rawn phuma, thawk a la zui nghal vang vang.

‘Ka hria e..’ che loa a din deuh vang vang hnuah a ti chhuak supa. Dimtein ka nghawng sir lam a fawp lehnghal zauha. Ka mur nghal vek thei.Mahse, min kuahna a phelha. Chhuatah min dahthlaa..Ka khabeah a rawn dawm zui leh a.

‘Ka tihlau che em?” a ti dam thlup.A mitmeng thim deuh khap chu ka melh zawka, tawngkaa chhang loin ka lu ka thing ringawt. Diktak chuan a tawp thleng turin min kalpui ta se pawi ka ti angem ka hre lo.Invawn thianghlim ka duhna aiin a tawp thlen pawi ka tih lohna alian zawk hial ang.Mahse, a hmelah chuan min nawr zui zel tumna a nei lo tih ka hmu theia. Mipa zawk a ni a, a in control thei lutuk chu ka ngaisang takzet.

‘Ka tinawn tawh lovang.Ka ta tur tho ania, ka nghak thei alawm’ a then suka. A rawn kun hniam lehnghala, ka chalah a rawn fawp zauha. A inlahrang zui nghala.Kei erawh ka dinna ngaiah ka ding a, ka khup zawi deuh huai mai chu control hmasak ka ngai.Ka bialpa hlui te nen khan kan in kiss ve fo tawha, mahse thil pangngai leh satliah tak anihna bak a awm ngai lova. Han vei zui emaw,a tawp thlen law law duhna khawp nawmna,chhungril thleng pha hi ka lo la nei ngai miah lo. Bakah,hetiang thil hi chu thawnthu vela thleng tawk lek niin ka hre thin hrim hrim.Mahse, tun lawka keimah a nawmna thleng kha a satliah lo.Ka hlauthawng leh hnuhnawh zawk. Zorema zawk inveng thei hlauh lo se chuan thil thleng tur hairual a ni lo.

‘Mommy’

Soso-i min au ri ka hriat rualin ka che nghal phata. Rang zetin ka inhera, khum lam ka pan nghala, mahse a mut dan a lo thlaka,a lo muhil leh hman tawh. Puan ka sin that tira, mu loin a sirah ka thu thlaa. Ka mit hnawng deuh chap chu ka hru chat chat. Soso-i muhil hmel chu ka en vang vanga, mi ngaihdanah chuan ka fa hrin ngei a ni a, chu pawh hnamdang lakah a ni bawka. Ngaihsan tur ka awm lo. Mahse, anihna takah chuan tun thlengin nula thianghlim ka la ni a. Ka fel vang leh that bik vanga invawngthianghlim erawh ka ni bik lova, chuvangin Virgin lo te ka hmusit lo. Anihna takah chuan pek tura ka duh khan min nawrluih loh vanga him ka ni zawk. Mahse, ka pek tur erawh engtikahmah ka pe ngai dawn lo tih ka chianga.Ka pek theih tak loh vangin hrehawm erawh ka tih phah lo.

‘Zanin chu kal ang aw’ phur sarhin B-in a ti a. Zorema chungchang kan sawi atang khan thla aliam leh tawha,atir lamah khan a inthlarung lutuka,a ti deuh dak renga. Mahse, a thiam loh anih loh avangin huat chhan tur ka nei lo a. Nidang ang bawkin angai rengin ka be bawrh bawha, ni reilote hnuah ani pawhin ngai a awh leh ta thuai.

Ka pheikhawk ka tlawhphelha,ka ke zungtang na thum mai chu ka tuai nghal hauh hauh.’Hei aw’ tih pahin Puipui’n Coffee min rawn pe a. Ka ban nghal vat. Kan school kalpui thin pakhatin nupui a neia. Aizawla awm zawng zawng kim taka kal vek tur an tih avangin keipawh ka kal ve a. Ka pheikhawk bun a fuh lo leh lutuka, ka ke a ti na vek. Inneihna hmuna kan awmchhung zawng khan mi hriat lohin hrehawm ka tuar ngar ngar hi a ni ringawt.Chaw ei nghal tur kan nih laiin chaw ei chhung lek pawh ka tuar peih tawh ngang lo va. B-i hnenah ka hrilha,Dawr a hla lo bawka Dawrah kan phei ta daih.

‘Ka sawi i hria em? Zanin chu kal ang aw’ B-in rawn thutthlak ve pahin a ti leha.

‘Ka peih chiah lo e. Party tihvel hi ka kalsan ta deuh aniang’ nui chungin ka ti a. A ner naka,a hnar atuai nghal zauh. Sinus nei nasa tak mai a ni a. Vawiin ang khawduai leh ni chuap phei hi chu a ngeih lo lehzual thin.

‘Bawihtei a awm chuang lo va. Kal ve hram ang,a hrim hrimin Party tih lemah rik huau huau a ni dawn lo va. Mi 20 atanga 30 chauh kan nih dawn kha. A nuam tawk viau ang’ a ti leh sar sar.

‘I hnar chhe lutuk kha chhuak loin In chhung luma tawmpui mai mai chi a ni zawk lo maw?” ka ti nghat.

‘Zan khat lek alawm.Ho lutuk,inah pawh a tui zawih zawih reng tho’ a ti awlsam et. Kal a tum khawp tih ka hrethiam mai.

‘Um,nia..Mahse ,ka za lo ve e…Engpawhnise ka lo ngaihtuah ang’ ka ti a. Hlim zetin a khek raih mai. ‘ka lo ngaihtuah ang’ ka tih tawh chuan ka ti dawn tihna a ni tih chiang takin a hria.

Coffee tak ngek ngawk chu ka en vang vanga. A rim hmui ram ram mai chuan ka hnar a verha, ka hnar bulah ka keng hnaia,ka hip zui vang vang. Vawiinah ka nu leh Bawihtei, ka u huana riak turin an kala. Ka  phal chiah lo nangin ka nuin a lo sawi hmuh tawh si avangin a rilruah a awm nghet tlat tawha.Naupang luhlul leh tihtawh lama ti ngut mai a ni a. Chumai bakah ka u in riah an tum tih a hriat veleh hruai turin a lo haw nghal vang vanga. An kal hma atangin an tihtur an sawi a, abak engmah Soso-in titi dang sawitur a hre lo. A phur zia ka hmuhin dan chiah ka ngai ta bik lo a. Atana tha lo tur a ni lem lo bawk nen. Mahse, a tel lova zan mut ka huphurh ngang mai thung.

‘Group kha en teh. Lawmsanga tenawm zia kha’ nui kar kar chungin B-in a ti a. Ka phone ka bana, Groupah ka lut nghala. Lawmsanga thil sawi chuan min ti nui nghal hak mai.

‘Nuthlawi chhe lo tak pakhat leh Nula senior induh zet mai an bo va. Chawei tura nghah reng anni. Lo hmu in awm anih chuan Chaweina Hall lamah lo kal turin in lo hrilh dawn nia’

‘A va han nghal zek zuk tak’ ka ti a. Za zetin ka nui nghal hawk hawk bawk.

‘Ehe!! U Te,I nui thei alaw?” zirlai zinga naupang ber, duh duh sawi phawng phawng thin Nutei’n min rawn ti a. Ka nui tawp nghal hmak.Zawitein Latei’n a haua,a sawi tak erawh ka hre lo.Nutei ka en a, a hmelah chuan inthiam lo hmel a langa. Ka lainat reuh lutuk.

‘Ka nui nasa thei lutuk alawm,mahse u B-i aiin ka nui ring lo zawk thina’ nui chungin ka ti a. Nia, ka tleirawl chhuah hlim chuan ka nui nasa thina, kan in hi ka nui ri hian a khat a ni ber thin. Thil ho te te ka nuihpuia,ka nui lah hi nui satliah loin ring tak taka nui chi ka ni zui bawk.Ka nu phei chuan ka nui nalh lo leh nui ring thei lutuk kha min manganpui hial thin a. Mahse, Zorema nen kan tawp atang khan ka nun hi a inthlakdanglam ta hlawka. Nuihpui tur ka hmu lo ni loin ka nuihpui vak vak thinte khan nuihza satliah bak min siamsak tawh ngai lova. Ka nui tlem tial tiala, tunah chuan ka nui anih pawhin a zat vang ni loin a tul vang zawk a ni ta fo.

‘Awi, nang aiin ka nui ring lo daih zawk.Nute, awih miah suh’ B-in a ti a. A nui zui vak vak.

‘Tikhan tu nge nui ring thin zawk chu i hre mai ang’ ka nui ve zui ve leh hawk hawk.

In ka thlen veleh Bawihtei ka biaa, hlim zetin sangha an man tih min rawn hrilh vau vaua, rei pawh ka be hman lo. ‘Nakinah rawn be leh mai rawh.Nuam a ti lutuka,phone reng reng angaihven lo’ ka nu zawkin a rawn ti a. ‘Tuiah inchiah rei tir suh aw. Hritlang akai leh ngawt ang’ ka ti a.

‘Ngawi mai mai teh,fa pahnih pawm tlei tawh leh tu nei tawh ka nih hi’ awlsam zetin a ti duh lek.

B-in min rawn calla, ‘Ruah atla leh thut thut zel sia, Zira inhruai tir mai ang’ a rawn ti a. Ka pawm zawng tak. Zira te leh Mo neitu hi inchhung hnai an lo ni a, vawiinah tum loh deuhin kan inhmu hlawl.Aizawl ka awm leh tak hnu hian kan inhmu zauh zauha,mahse tunhma ang kha chuan kan inkawm ta vak lo. Hna nghet a nei tawha, keilah ka dawr mai bakah Fanu nei ka ni a. Naupan deuh lai anga nuam tihna lam lama thle thei ka ni tawh lo ve bawk a,tul takah lo chuan zanah phei chuan ka chhuak ngai lo.

Dar 8 velah min rawn lam a, Zira thianpa a rawn tel ve a. A thianpa ka ti ngawt nangin a bialpa zawk a nimaithei. A nihdan hi ka sawisel phak a awm miah lo nangin ka ngaihtuah zawng ringawt pawhin ka luak achhuak hlui thei. Mahse, amah ngainat loh phah nan erawh ka hmang chuang miah lo thung!!

Partyna tur kan thlenga, an sawi lawk ang ngeiin thiantha zual tak tak leh an Cousin ho an ni a. Kan felfai theh thawh ang tih alang thei nghal vek.

‘Beer ami ka lak ang? Te,in ve la’ Zira’n zangkhai zetin a ti nghala.

‘Aih ,ka lawm…’

‘Naaa, in ve la.Zanin chauh nimaia’ B-in a ti sar sar. B-i hi chuan Beer a in thina, a heh ngang mai bawk.Mahse, mualphopui tur khawp erawh a ni lo.Bakah,chutiangin ka ngai serious viau lo a. Ka in chak lo va,ka in lo a ni deuh ber.Phai ka awm lai pawh khan duh duha in mai theih a ni reng chungin ka in lo tluanchhuak.

‘Ka rawn lak kep che’ tih pahin Zira’n ka kutah a rawn hmehbela; ka la ve mai.

‘A tha alawm’ ka ti sap.Nula oh Nuthlawi ka ni a, ka kum lah a tam ve tan tawha, vawikhat han in ve mai mai chu buaina tur a tling lo.

Tlem ka tema,ka ka chhung a hiara,ngaihtuah buai loin ka lem nghal a. Ka hrawk a sa thla nghal veka,a kalna chin a hriat ram ram mai.

‘Enge a an? Tui lo over chu a ni lo ania’ ka ngaihdan hriat chakin B-in min en kar chungin a ti a. Chhang loin Beer can ka melha,ka thle bak ringawt.A tui loh lutuk pawh ka hre loa,a tui pawh ka hre chuang lo.

Titi luam chungin ka lem ve zela. Ka hriat loh karin a chanve vel lai ka lo inzo hman reng tawh.A ruih theih loh nge ni? Engtin ka danglam phah pawh chu ka hre lem lo.

‘Lam ang’ Zira’n min rawn pawta. Thil kal tawh ka hrechhuak nghal zawk. Mahse, theihnghilh tumin ka lu ka thing nawka. Zira’n ka hnialna emaw a lo ti a. ‘Min hnial lo mai teh,kan lam dun tawp berna pawh ka hre tawh lo.I la lam thiam reng em ka hre chak’ phur lutukin a ti leh a. B-in kut a lo beng thak thak thung.

Min pawt tho a, ka pai nghal dat a. Nui hawk hawk chungin lam tual lamah Zira’n min pawt pheia.Zangkhai deuh hah chung hian min kaih ang angin ka zui ve a,midang lo lam mek te bulah chuan kan inzep lut tawlh tawlha.Ka kawngah a rawn vuana,a darah ka kut ka dah ve nghal zat.

Music dam leh muang fan raiha lampui chi an playa, Muangchangin Zira’n min tawlhkualpuia,ka mit ka chhinga..Khawvel dangah ka cheng ta daih.

Thaw hlawp hlawp chungin ka dinga, kut beng ri chuan ka beng a luah khata. Kum li liam hnuah ka lam leh vawikhatna a ni a,a nawm dan a lo la ngai reng mai. Ka hawikuala, Zira leh kei tih loh chu tumah lam tualah an lo awm ve tawh lo.Kan lam tan tirha lam ho pawh kha kan lam en in an lo thu vek tawha. Engtik laiin nge hi an lo kalsawn hman ka hre eih lo thung.Light dul deuh ruih chu a aia eng zawkin a rawn thlaka, Room chhung zawng zawng a eng ta uar. Ka hawikual leha, B-i thutna hnung chiaha mipa thu ka va hmuh rualin ka thaw a tawp chawt. Ka hmusual emaw tiin ka mit ka chhinga, mahse ka men leh pawhin a lo la awm ta cheu. A mitmeng nelawm lo leh a hmel chang zet chu ka hriat thin Zorema hmel leh mitmeng ang chiah a ni a.Mahse, a landan engkim maiah chuan hmana Zorema kha chu a ni tawh miah lo thung tih ka chiang.

‘Intur i duh angem?” mipa aw hian a rawn ti a,rang lutukin ka en nghal vat. Ka hriat ngai a ni lo. Hnial ka tum zeta, ka thluak a vir zawk.

‘A lawmawm ngawt ang’ ka ti zangkhai vaha, ka nui lui sak bawk.Zira, ka en a, a bu nghata. Intur min pek ka bana,thutna awl lamah kan inzui phei duna.

‘I la lamthiam reng mai’ kan thut fel veleh a ti a. Ka mengphar deuh ak mai.

‘I ti lawmawm..Mahse, min  hrethiam la,ka hria che em ka hre mai tlat lo’ nuam ti chiah loin ka ti a.

‘Nia,min hre kher lovang.Mahse, ka hria che a.Hmanah leh tunah te tiduah ila’ nelawm takin a nuia. Ka ngaihtuah naah Zorema’n min tibuaitu laka min chhan zan kha a rawn lang lehnghal zata.Tuna ka bula thu mek hi Zorema ni loin midang a ni a. Chhan ka ngai ta hek lo.Mahse, hetah hian a awm ve a. Ka mit hian a thu lai va en nawn kher lo mah se ka hriatna thazam te hian ala awm reng tih min hriattir sup sup tho.

‘Martin,awi..I dam em?” B-in ring leng lawngin a rawn ti a,ka bulah a rawn thu thla ve a.

‘Eheu! Nang pawh chu..Ka dam alawm,nang zawk?” ka bula thuin phur zetin B-i hnenah a ti ve nghala. An lo inhre sa tih ka hre si lo.Angaihna hre vak loin ka melh tawn chhen mai.

‘Aw,dam..Thiannu,Martin-a hi ila hria em? College week laia khuangpu hot deuh thin kha’ a nui zui nghal ar ar a. A sawi takah chuan keipawn ka hre leh ta uar uar.

‘I ni,nia..Awi,insawi mai ta che’ rang zetin ka ti a. Nelawm taka nui chungin min en a.

‘Engtin nge ka insawi ang? Khuangpu kha inti ila min hriat si loh chuan zahthlak deuh tur ania’ a ti a, a nui zui huk huk.A sawi dik ve reng mai.Thian han tihtur kan ni tlat lo.Mi harh leh thawmna chi ka nih avangin Collegeah pawh khan ka eng emaw lar hrep zela.Lam ka thiam vang a ni pakhat bawka. Martin-a te hi Hot ve tak,an thianho kha thiam em em nei lo,mahse boruak nei si anni a. Kan inkawm ngai lem lo va; mahse kan inhre tho thung. Chuvang takin kum fe a vei hnuah chuan ka lo hre tawh lo a,ka zak lem lo.Engtin nge B-in a hriat chat theih kha mak ka ti zawk.

Eng eng emaw sawiin kan ti ti hluta, College kal lai chanchin kan sawia, kan nui ho leh dar dar thina. Zira leh a thianpa an rawn thu ve leh bawka, titi a rual ta ngang mai.Mahse, ka rilru kil khatah Zorema a awm ve tih ka hre kara, nui bawk bawkin titi ve reng mah ila ka inthlahdul tak tak thei miah lo.

‘In leh la…’ tih pahin Beer min rawn pe leha.

‘Aih, ka inhnem tawh lutuk’ ka ti vat. Diktak chuan engzat nge ka in tak pawh ka hre lo.Kan lam zawh hnuah khan min pek apiang ka ban ve zela,titi paha in ka ni bawk nen ka inzat lam ka lo ngaihtuah lo.Mahse, ka inhnem thawkhat tih ka hriaa.Ka lu a hai deuh chhalha, ka luak a chhuak deuh titih bawk. Ka inchhan ber,thil kaltawh theihnghilh leh Zorema awm ve ngaihpawimawh loh erawh ka hlawhchham thak tho.

‘Haw dawn tawh ila..’ ka ti a. Ka phone lakchhuah tumin ka bag ka hai rak rak bawk.

‘Ah,ala hma’ Zira’n a ti vat.Sana ka en a, dar 11 a lo hnai thuak tawh.Naktuk Inrinni a ni a, mahse Sawrkar hnathawk nih ve lem loh chuan Weekend hian danglamna a thlen chiam lem lo.

‘Hei hi in ve chhin teh,a nem sia.A tui tawp’ Zira bawkin a ti leh a. Ka hmai bul setah a rawn lek hnaia. A landanah chuan tui satliah mai mai a ang.

‘Aih, Beer kha rapthlak tham khawpa tam ka in tawh’

‘Awihawm loh lutuk,avai belhkhawmin Can 2 bak ila in lo ang’

‘Aaah,chu pawh chu in ngai lo tan chuan a tam lutuk’ ka ti leh a. Mahse, an vaiin tem chhin turin min nawr rawna, Beer ka lo in tawhna khan atirah danglamna min thlen lo mah se tunah chuan min ti danglama,pawisak ka ni tlem ta riau bawk.

Ka tem hlaka, a sawi ang tak takin a tui ngang mai. A nem thepa, Beer anga lem harsa kha a ni ve lo.A thlum zui veng venga, Apple rim a nam chak bawk.

‘Enge a an?” a ti haw.

‘A tui..A nem bawk si’ ka ti ve mai. Ka lek hnaia,ka in lehnghala. ‘Hey, inhnem lo teh.I intam chuan i tho chhuak zo miah lovang aw’ B-in min vengthawng takin a lo ti a.

‘Em em a che. Chutiang em em a Dose hniam a ni nang.Bakah,No kha a te lutuk.In vek rawh’ a ti a. Thuawih fahranin hmui phawi map loin ala awm zawng ka tlak nghal vek.

Ka Phone nghawr dar dar ka en a. Number ka hriat ngai loh atangin a lo ni a. ‘Hello’ ka ti a. Party boruak bengchheng bawk nen engmah ka hre thei lo a. Ka off ta ngawt. Mahse, ka Off hnuah a rawn call nawn leha. Tun ang zan rei tawh lam a lo call chu a pawimawh a ni ngei ang.

‘Ka va be lawk ang’ tih pahin ka tho a. Ka thochhuak fel deuh chiah tihin inring hman loin ka pai nghal naka.Rang zetin Martin-an min rawn vuana, ka nui nghal hak mai.

‘I tha em? Ka sawi reng kha,a nem si;a thawkna lutuk’ B-in rawn dinchhuah ve pahin a ti nang nang.

‘Tha.Lo kal duh suh,keimahin ka kal thei’ ka ti a. Martin-a ka en leha, ka banrek a chelhna ka en a,hrethiam takin min thlah ve nghal mai bawk.

Pawnah ka chhuak pheia, bang kil lam ka pan a,Bu lak lak chungin bang nghengin ka dinga.Ka phone ka beng bulah ka daha, a ring ral ral chu ka hre hla du mai.

‘Hello’ Mipa aw hian a rawn ti a.

‘Tu nge aw? ‘ ka ti a, ka mit ka chhinga, mahse ka meng lehnghal vat. Ka mit ka chhin khan ka luak achhuak rapthlak lutuk.

‘Te-i…Keimah Sebastian’ ka dingkhawng nghal lah mai.A aw phawi leh ka hming a lam rik danah chuan hai rual a ni lo. Mahse, engvangin nge min lo call thut ang? Bakah engtin nge ka number a neih?

‘Hello..I hre thei em?” a rawn ti leha, ka ngaihtuahna atangin ka harhchhuak zawka. Ka rui pawh ka harh tel kawkin ka hre bawk.

‘Oooo,Hre thei e. I dam em?” ka ti buh nak mai. Ka mitthlaah Soso-i a rawn lang nghala. Sebastian-a hian a hre chhuak tihna a ni mai angem? min chhuhsak a tum anih vaih chuan ka theihna zawng zawngin ka bei dawn a ni tawp mai.

‘Aw,dam e. Niminah Indiaah ka lo let leha, Arti biak pawh ka tuma,min pui thei angem?” a rawn ti a.Ka thaw hak mai. Arti nen an la inhmu lo anih chuan fa a nei tih ala hre lo tihna animai.

‘Sorry,ka theih ka va ring lo.Kan inhmuh lohna kum 3 vel lai a ni tawha’ ka ti hap.

‘Ok..A lo be hlauh che anih chuan min lo hrilh thei angem? hei hi ka number ania’ a rawn ti leha.

‘Yes,ka lo hrilh ang che. Engtikah nge Australia ah i let leh ang?” ka ti leh a.

‘Ka hre lo. Arti ka hmu hmasa duha.Nangpawh ka hmu chak khawp mai che’ a rawn ti dam leh thlap. A hmel ka mitthlaah a lo langa, Soso-i hian a mitmu rawngah leh a sam rawngah Sebastian-a achhun a. Awm dun se chuan tu tan mah a pa a ni tih hai chi a ni lo ang.

‘Aizawlah ka awm tawha’

‘Ooo,a va tha tak,Chance ka neih chuan lo kal ngei ka duh ang’ a ti a, a nui hak haka. Ka nui ve bawk tak nain ka nuih a za der lo thung.

Eng eng emaw sawiin reivak lo kan inbe zui leha, kan in mangtha hnuah lut mai loin ka dinna ngaiah ka ding deuh vang vang. Kum li dawn hnuah min rawn be hlawla,Soso-i hi awm kher lo se chuan thian hlui tiin ka phur viau maithei.Mahse, tunah chuan Soso-i a awm tawha, fa a nei tih a hriat vaih chuan a awm mai mai lo maithei.Chu aia duh loh zawk ka nei dawn hauh si lo.

Inchhunga luh tumin ka inhera, ka hma takah Zorema a rawn din takah chuan ka ding leh chawt.Mahse, ka inngaihtuah fim leh vat thung. Dak deuh vah chungin a sirah ka hela.Mahse, a tawngriah ka pen lai ka tawp leh chawt. Ka inhera, muangchangin ka en chho a, a mitah tak ka en a.

‘Min bia em?” ka ti vawt raih bawk.

‘Hei hi i ta a ni em?” tih pahin ka Purse a rawn lekchhuaka.Ka mengphar awk mai. Ka thlauh lai reng reng ka hre lo.

‘Aw,anih kha’ tih leh lak tuma ban ka ruala.Mahse, a la sawna, a kekawr ipteah a thun zui daih.Angaihna hre lo lutukin ka melh reng ringawt.

‘I danglam ta hle mai’ zawi fiah zetin a ti sup.A tawng ring lo nangin ka hre chiang ngang mai thung.Ka lu hai nen ka duh angin ka inlekkhawng zo lo a, inringtawk taka hmachhawn ka duhna chu ka taksain min phatsan mek thung.’Ni lo,ni lo’ ka rilruin ka ti a. Inthin harh tumin ka lu ka thing nawk bawk.

‘I that loh hmel hle mai,I in hnem bawk atin ni’ amah bawkin a ti leh nghut. Awmze nei lo zetin ka nui chhuak nghal hak.

‘Enteh…Nang,nang hi ka hria che em?” ka ti buh nak. Ka pum a rawn let but a, ka lu hai bawk si nen tluk mai hlauin bang vawn ka tuma. Mahse, ka dinna atangin a lo la hla deuh a, ka pai nawk; ka tlu thla chawrh dawn emaw ka tih laiin hneh zetin min rawn pawt dinga, amah si rawk khawpin min pawt leta.

‘In control rawh’ ka beng bulah a ti sup.

Ka hawichhuaka, mi a ang maiin ka nui leh a. Ka nuih rualin ka pum a let leh buta..Insum hman loin a awmah ka hmai ka phum nghal zat; Ni lo…Ka luak zo vek tawh.

‘Enge maw i tih hrep le?” a ti nghal hmuk. Ka thil tih zawh chiah kha a hriat loh vanga min zawt ni loin,a thinrim lutuk vanga sawi a ni tih ka hrethiam vek.Ka lu a haia, ka vir deuh muai muaia, ka khawhmuh atawi vel vek….