PURPLE HEART - 6

Chapter- 6

‘Awi, Terin,I dam maw?” Hriati’n min hmuh veleh a ti nghal hliai. Zorema en loin Hriati zawk ka en a.

‘Aw, dam alawm. Tunlai chu i va vang ve’ zangkhai tak ka ti  ve vat.

‘Nia, vanchhan tha deuh ka nei a’ Zorema melh ralh chungin a ti a. Ka lo tim ve sawk thung.

‘Um,ka hre thiam..Lo leng leh tawh rawh.I ngaihawm ania’ ka ti ve leh a. Pir deuh vahin Zorema lam ka hawia. Ka nui lui sak.’ I tha maw?” ka ti a.Ka chet tenawm em em zan atang khan ka hmuh leh hmasak berna a ni a. Thla a lo vei ta hial bawka,ka zak lutuk tur pawh a zia  vek hman.

‘Tha alawm’ nelawm lo angreng takin a ti nghut.

‘Lut phei ila..’ka ti leh a. Min chhan pawh nghak chuang loin Martin-a lam ka hawia, a banah ka vuan zui nghal zat.

Party nuam tak a ni dawn lo tih ka hre sa veka. Ka kal hma atangin Zorema a lo kal ve ang tih pawh ka ring lawk sa vek bawka. A hranpa taka hrehawm han tih thar leh chiam ka tum lem lo. Mahse, an thutna lam ka hawi apiangin min lo en run zela,ka inthlahdul hleithei der lo thung. Diktak chuan kan lo inzui ve zawk tawh a,midangte ang bawkin kan inthen leh a ni maia.Kan inthen chhan chu engpawh nise kan inbe hleithei miah lo mai hi a mak. Keimah lamah chuan mak a awm lo,achhan pawh amah vanga ka natna ala tawp thei tlat lo a. Mahse, ani hian engvanga min lawm lo em em nge anih ve ngawt? Mipa zawk a ni a, rilru zau tak a pu tur ania.Mahse, a ni tlat si lo.Huiham…Min be chak lo a nimai.Enge maw ka buai chiam le a??!!

‘Haw tawh mai ka duh’ Martina hnenah ka ti a.

‘I tih dan dan animai’ a ti awlsam mai.Party nuam lo zawk zawk tihtur a ni lo chungin nuam viau tihtur pawh a ni chuang lo. Ka rin ai takin Zorema leh Hriati pawh an chetdan hmuh hrehawm lutuk a ni lo a. Mahse, tu tan mah chuhpui ngam a ni lo tih Hriati awmdanah a chiang vek thung. ‘Ka ta anih hi’ tiin au kual lo mah se a awmdanah alang vek.

‘Eve-i hmu leh zuai ila,chuan kan kal thei animai’ ka ti a. Ka tho chhuaka; kan thutna piaha Zorema leh Hriati inhnaih fahrana thudun chu ngaipawimawh duh loin ka hmu lo der tlat bawk.

‘Ti nge? Ala hma e’ Lungawi vak loin Eve-in a ti nghat. ‘Nia,ala tlai over lo nangin Soso-i ka ngaihtuah deuha.A nuam vak lova’ kati a,ka nui lui sang a. Ani erawh a tum deuh hmaka, a awmdan naupangchhia tak mai chuan min ti hlim letling.

‘Thiannu,ka kal mai dawn’

Ka hawi nghal vata,kan bulah Zorema leh Hriati an lo ding reng tawh.An lo kal hnaih lai reng reng ka hre lo.Ngaipawimawh lo hmel takin Hriati ka nuih saka. Eve-i ka en lehnghala, ‘Kan kal phawt ang. Dawrah min rawn tlawh vat la, Birth day Present atan i duh duh min rawn tihtir thei ania’ ka ti a. Hlim zetin a khek raiha,ka nui ve nghal hak bawk.

‘Takzet maw? I rin loh lam daih ania ka dil dawn che’ a ti a.

‘Ka theihphawt chuan le,mahse theih loh thil a awm ve ania’ nui chungin ka ti let a. Nui chungin a thle baka,a mitmeng a de sar sar bawk.

Martin-a banah ka kuaha, pawn lam kan pana.Ruah a sur tawh lo nangin khua a vawt deuh vur a. Ka kawr hak a lo pan deuh bawk nen ka inkuah khawr hlan mai.

‘Ac ka on dawn em?’ Motora kan thut luh veleh a ti a. ‘Aih.ka ngaithei lo lutuk.Pawi itih loh chuan’ ka ti a. A thle baka.Pawi a tih loh thu a sawia. Zi mar ar ar chungin pawn lam ka va hawia. Zorema Cara Hriati thu lut tur ka va hmu hman chiah.

‘Ac i ngaithei lo lutuka, keimah chauha ka chuan pawh hian ka On ngai mang ta lo reng reng’ Zorema aw ka bengah chiang lutukin a rawn ri a. Ka mit ka chhinga, ni e..Ani kha chuan kawng engkimah min hriatchian a tum thin a.Thla tam kan inzui hma khan ka duh leh duh loh zawng zawng a hre hman vek tawh anih kha. Mahse, min hriatchianna khan engthilmah a thlen ta chuang miah si lo….A tawpah na takin min kalsana,tha leh tur chuang awm thei lo khawpa tha lo ala ni zui.

Motor ding dat vangin  ka hawichhuaka,kan inkawt kan lo thleng der tawh. Ka thu mara, ka ham zui nghal bai bai bawk.

‘Kan va thleng hma ve’ ka ti a. Ka zi mar a.

‘I muhil nasa em alawm’ nui hak hak chungin Martin-an a ti a. Ka en a,ngainatawm takin a nui sang a.

‘Nia., ka mut alo chhuak ngang aniang’ ka ti tha ve mai. Diktak chuan ka muhil eih lo.Thil tul lo em em ka ngaihtuah kual avangin ka mit ka chhing mai zawk.Hriattir kher erawh a tulna ka hre lo thung.

‘Mangtha aw’ ka ti a. Motor kawngkhar hawnna ka vuana.

‘Te…’ ka hawi let a.Mahse. a dar a tisang zauh ringawt.

‘Mangtha le’ thildang sawi loin a tita zawk.

A tlanliam tur ka thlira, mipa tha tak anih zia ka ngaihtuah vang vang mai. Thian nihna bak engmah neih kan nei loa,mahse ka tan a awm reng thunga. A nupui chu hmeichhe vannei tak a ni ngei ang.

Soso-i au lauh lauh thawmah ka harha, peih lo zetin ka mengchhuaka. Soso-i mutna a lo ruak hiau tawh. Ka nu nen an inbe lawng lawng thawm ka hre leha.Ka nui sak mai; tuktin Soso-i hlim nuiri hre chunga khum thawhsan aia nuam zawk hi khawvel dang a awm thei hian ka ring lo hial.

Ka phone ka en a, Martin-a min wishna alo awm vang tawh. Ka wish let ve nghala,mahse a read lo thung.Zingtin inkhel thin a ni a,Kan inkawmngeih tak deuh atangin zing tin min wish ta ziaha. Mahse, atir lam kha chuan Zorema min hriatchhuahtir tlat avangin ka duh lo lek lek thung. Tunah erawh chutiang zawngin ka ngai tawh lem lo.

Dawr ka thlenin ka rin loh takin B-i alo thleng fel tawh. ‘Ehe! I va hma ve’ ka tinghal chul a.

‘Ka tlai ngai reng reng ami?” nui chungin a ti a, ka ner khum nak. Hman atanga tun thlengin a chet muan dan ala ngai renga. Khawiah pawh kal dawn ila nghah ngai deuh ziah a ni bawk.

‘Enge nizan Party chu?” a bula ka thut veleh a ti a.

‘A pangngai animai.Model leh 

zaithiam,designer lar chin an kim viaua’ 

nui chungin ka ti a. A bu nghat. ‘IG lamah ka lo hmu chuai chuai alawm.Hei enteh’ tih pahin a phone a rawn lek hnaia. Ka en ve mai.Mahse, ka rin loh deuh ka zuk hmu a, Zorema nen inhnaih deuh takin kan thu duna, ka no ken ka en laiin Zorema erawh chuan keimah min en thung. Ka ngaihtuah let pawhin an lak lai awm ka hre miah lo.

‘Ehe!! An lak lai ka hre miah lo’ ka ti a.

‘Nia, I hriat hmel loh ka lo tia. Mahse, enteh..A endan che hi a pangngai lo tawpa’ a ti leh sa sa a. Ka ner khum leh nak.’ A ho em maia,kan pahnih chauh a awm ni loin midang nen kan nih kha.Tihpalha lang kan nih ve mai mai kha’ ka ti liam puat. A thle baka, a phone a lasawna,a nui pawt pawpta..Mahse, a landan chu chik angreng deuhin ka en a,midang tan chuan nidang nen danglamna  a nei vak lo maithei.Mahse,ka tan chuan danglamna a nei tih haider rual a ni chuang lo.

Customer an lo kal dawt zuta, nidang ang bawkin kan buai deuh mam mam reng. B-i pawh a nui bawk bawka, a titi bawrh bawrh a. Mahse,. A mitmeng ngui raih mai leh a nui lui hmel chuan ka awm a tinuam miah lo.

‘U Te,enge eitur ka chah ang?” Latei’n a ti a.

‘Chah lo mai rawh.Vawiin chu pawn lamah ei chhuah ka duha’ ka ti a. B-i a zawt leha,’ Ani pawh kha chah sak lo mai rawh.Kan pahnihin kan ei chhuak dawna’ ka ti a. Phawk zetin B-in min rawn en a,engmah sawi loin  ka nuih a. A dar a tisang ak ringawt.

‘Darkar khat vel ka chhuak dawna,keimah kher duh an awm chuan min lo nghak mai rawhse aw’ Puipuii hnenah ka ti a.

B-i  nen kan inzui chhuaka, kan dawr piaha kan kal fona restaurant kan pan phei duna. Vanneihthlak zetin kan thut thinna bang kil bera dawhkan a lo ruak hlauh.

‘Angai ami ?’ kan kal apianga min lo ngaihven vat tu ,tleirawl ria thel thawl hian a ti a.

‘Ni leh mai rawhse’ ka ti a. B-i erawh chuan engmah a sawi lo.Dik lo awma ka rin kha tuna a hmel tak ran mai hian a tichiang ta chiah. Dawrah kha chuan nidang ang tho khan alanga, mahse tunah chuan a ngui raih a,a mitmeng a dul riai bawk.

‘Sawi la…’ ka ti satliah.A thaw nghal hak mai.

‘A harsat chuan ka nawrlui lo che ania’ ka ti leh a. Ka en a, ding takin hmalam a en a, a hmui a pet nauh nauh bawk.

‘Hrilh tur che a ni em tih ka ngaihtuah mek a’ ati mar at mai.

‘Ok,sawi lo mai la.I inpeih hunah animai. 

"Nizan khan Eve-in hmuh che alo beisei lutuka’ sawi zawm mai tur hre loin ka ti a.

‘Nia, nuam lo ka ti tawp. Mahse….’ Sawi zawm loin angawi leh daih.

‘Tunkar tawp chu Mama huanah zuk riak ila…I duh em?” ka ti a.

‘Ka pain sawn a lo thlaka’

Ka thu mar nghal awk mai. Ka hresual anih ringin ka en a,mahse a mittui hnaih zia ka hmu thei nghal vek. Engmah sawi loin a kut ka vawn saka. Hma lam enin a mit a khap sak saka. Tap lo turin a insum nasa tih ka hrethiam.

‘Khawvel hi a letling vek niin ka hria. Nizan khan kan Inah awm ve la chuan a boruak mak lutuk kha i hrethiam ang. Tunah chuan ka sawi thiam lo’ a ti leh a. A insut zui nghal hraih a. Ka mitthlaah B-i pa hmel a lo langa, Pa invawngfel leh khawtlangah pawh inhmang tak, ruihtheihthil lama fihlim bawk si a ni a. Engtin nge chutiang a thlen theih?!

‘ I nu enge a an?” pangngai thei ang berin ka ti a.Diktak chuan ka la awih hleithei lo.

‘A tha ang ka ring,mahse that chu a harsa ve ngawt ang’ a ti ro leh halh.Ni e, that chu a beiseiawm loh zawk.Mangchhiaah pawh chhe ber a ni ringawt zawk ang.

‘Ka nu ka khawngaiha, ka pa ka hua’ a ti leh sap. Sawi mai tur hre loin ka eitur ka chawkkual sek ringawt. Ka chunga tla nise engtin nge ka dawnsawn ang ka hrethiam lo.

‘Ka pa chuan ngaihdam a dila.Neih a tum loh thu a sawi bawka, mahse nizanah ka nu chu ka Pu te inah a riak phei a. Mahse then chu a tum kher lo maitheia..Bakah,phal pawh ka phal lo ang.Ka u te pawn an remti lo a.Enteh,Thih daih mai ka chak’ a ti leh a,a awah chuan tahchhuak insum tih a hriattheiha. Dawhkan hnuaia a kut dah ka vawn sak leha.Helai hmun ualau lutukah hian kalpui tur ka ni lo asin le.Mahse, a mood dik loh chhan kha hetiang khawpa serious hi anih ka ring eih lo atin ni.

‘I duh chuan i chawl thei ania. I tel lo chuan ka buai em em chungin hun thawl i mamawh in ka hria’ ka ti a.A lu a thing nak.

‘Aih,Inah ka awm peih lo. Tlaiah ka pu te inah ka phei anga. Ka nu bulah ka awm rih ang’ a ti leha. Sawi tur hre loin ka bu liam satliah ringawt.

Dawrah B-i nen kan let leha,kan thlen hnu lawkah a nuin a rawn call a.’ Ka nu va hmuh lawk ka duha,ka kal mai dawn sin.In buai angem?” ati a. Ka lu ka thing mai. A tlan lohni anih avangin thlah ka tuma, mahse a duh lo. Taxi ka chanpuia. A kal hnuah Soso-i mamawh lei ngai ka nei tih ka hrechhuaka. Kan dawr thlang lane a Stationary zawrhna dawrah ka chhuk thlaa. Pencil leh eraser,cute zet zet a lo awm teuha, a mamawh lem loh pawh ka lei ta nual. Ka nuin min khak leh ngei ang tih ka hre sa a. Mahse,ani pawh hian a mamawh lem lo a leisak nasa ve tho a. A lei lo tu zawk zawk hi kan insawisel vel mai mai chu a ni. Ka thil lei ka khaia,ka dinna piaha thei zawrhna lamin ka mit ala leh a. Ka phei leh a,ka nu eitur atan lakhuih ka leia, Soso-i leh keiin Dragon fruit kan duh thin avangin ka lei tel bawka.

Ka thil lei khai chungin muangchangin dawr lam ka pana, kawng ka kan chho a, mahse kawng kan tuma B-i pa leh hmeichhe pakhat,rai puar rawn kal thla ka hmu ta chat. Ka ding data,mahse Motor horn ri avangin rang zetin ka kal chho a. Kan intawk tur chu B-i pain min rawn hmu a. A zak nge ka hre lo, min hmu lo der zui nghal hmak. Chilchhak khum tak ka nap mai a…

Mi ka sut chawrh rualin ka phone ka thluah nghal tapa. B-i te chhungkua ringawt ka ngaihtuah atalangin ka kalna pawh ka lo en pek lo.

‘Sorry’ inthiam lo zetin ka ti a,mahse ka tum loh lutukin Zorema nen kan inhmachhawn ta ran mai.

‘Terin,eheu!! I tha em?” min betu lam ka hawia,Papuia.Aizawla ka awm leh hnu hian Zorema thiante ka hmu zauh zauh hlawma.Mahse,Papuia hi chu ka vawikhat hmuhna a ni thung. 

‘Nang maw? I dam maw?” ka ti nghal hliai. Ka phone tla chhar ka tuma, mahse Zorema’n min rawn chhar khalha,min pe a. Ka laa, ka nuih lui sak a.Papuia lam bawk ka hawisan leh mai.

‘Aw, dam alawm…Helamah i awm leh tawh tih ka lo hriaa’ nelawm taka nui chungin a ti a.Diktak chuan alo haw lawmna Partyah khan thil tenawm tak ka chungah a thlenga,Zorema nen kan tawp zui bawk nen Papuia hi chu Zorema thiante zingah pawh ka kawm nel loh ber a ni. Bakah,khami zana thilthleng kha engtin nge Sena khan a sawi zui ka hre lova. An thianho zingah ala tel ve zel em pawh ka hre tawh lo.

‘Nia..Awm leh ta anih hi’ ka ngaihtuahna a thil chi hrang hrang lo lang thup nan ka ti zangkhai vah.

‘Atha,keini pawh kan chhuk duh tawh miah loh hi.Aizawl hi a lo nuam ania’ a ti a. A nui zui leh hak haka. Ka nui ve a,’ ka kal dawn.Anih phawt u’ ka ti a. Zorema lam ka hawia.Ka nui lui leh saka. Amah vanga engemaw danglamna nei anga lan ka tum lo bur tawp.

Fur a zo a,Favang a lo thleng tana. Ka nunah engmah danglamna em em a awm lo. Nitin hna ngai a ni a.Ka khawvel pawh chhungkua leh ka eizawnna a la nita reng.Mahse,Martin-a nen kan inzui nasaa.Inngaihzawnna engmah awm lo mah se ka bialpa emaw an ti deuh zela. Engmah chutiang lam sawina kan nei lo a. Ka thiantha tak a ni tihah ka chianga, ka duhtawk em em. B-i te chhungkaw chunga thilthleng pawh vengchhungah a darh ta haka.Pa fel leh khawtlanga inhmang tak a lo ni bawka, veng kilkhawra tu pa emaw sawn lo thlak nen chuan a in ang thei lo.Mahse,B-i nu erawh a chhuak ta lova. Inthen lam sawirik a awm hek lo. Thla a liam hnuah pawh B-in ngai ala awh hleithei lova. Mahse, amah hi hmeichhe harhvang leh nun tlang,hlimthei tak a lo ni hlauha.Midang tana hmuh hrehawm turin  a awm ngai miah lo. Ka thiannu a ni vang vangin ka fak lo thei lo.

‘En chhin teh..Enge tha lo lai a awm em?” tih pahin ka kalsawna deuha. Chik zetin Darthlalanga a thla lo lang chu a en vang vang.

Ka phone a ri a, min rawn call tu ka en a. Ka pick nghal zat.’ Yes…’ hello ti loin ka ti zangkhai vah.

‘Ka lo phei dawn asin’ Martin-an a rawn ti dut dut.

‘Um,I free ami?” ka ti ve nghala. An hna hi a hahthlak em em a, hunawl an nei mang lo emaw tihtur a ni a. Fimathuin ‘Hna dang ang a ni lo,Bankah hi chuan a thu deuh apiang kan buaia,a ho tak tak’ a ti thina. A ni deuh tak takin ka hria.

‘Darkar chanve vel chu free e’ a rawn ti leh a.

‘Naaa,a rei lo sia. Traffic jam chhung nen’

‘Nia.Mahse,tunah Main ah alawm ka awm.Bike ka keng bawka’ a rawn ti leh a.Kan dawr leh Main Branch hi a inhlat lem lo a. Two wheeler chuan a lo jam anih pawhin, lo phei nan a rei berah minute 10 bak a mamawh lo vang.  

‘Ok,atha animai lawm’ ka ti leh a. Nui chungin ka Phone ka daha. Eve- i lam ka hawia, a la in en emaw ka tih laiin chik em em in min lo  enreng.

‘A tha em?” ka ti nghala.

‘Um,tha..I hmelah khan lo call tu che ka hrethei mai’ nui hak hak chungin a ti a. Dawrah a lo kal nguna,min ngaina der em ka hre lo.Ka hmuh danah hi chuan min ngainaa, keipawhin ka ngaina bawka. Sumdawng leh Client ang ni loin,thian tha tak angin ka en zawk mah tawh.

‘Naaa…’ ka ti hap.A nui leh var vara.

‘Ka ngaina renga, mahse ka ngei deuh’ a hnar a ti vang zauh.Kei erawh chuan angaihna hre lo zetin ka melh ringawt thung.

‘Awi, I huatpui alaw? Huat turin ka sawi lo ania aw..Ih,diktak chuan ka u tan ka awt che a’ nuam ti lo hmel deuhin a sawifiah nghal thuai thuaia.

‘Ah,huatpui nang..Chuan,nang aiin ka upa a .I u chu ka ni sa reng lo mi? ’tih pahin ka nui a. A sam chawlleng a hui kianga. ‘Ka u nen khan ni ula in inhmeh dawn sin le’  ati leh a. Ka khawng deuh lah mai.

‘Tu i u maw?’ satliah angreng fein ka ti a. Mahse,ka lungphu erawh rang zaih zaih tak a ni.

‘Tu nge ni vak ang? Mama bak..Oh.Zachary ka tihna’ ka ngaihtuahna hre lo em emin a ti leh a. A mitmeng lian leh zahawm zetin min en kiau bawk.

‘Awi,ani te chu Tlangval luck ania.Kei nuthlawi nen chuan fiamthu pawh a sawi zawm chi ka ni nang’ nui chungin ka ti a.

‘A ho e,chutiang lam pawh a ni lo’ a ti leh hap.

‘Anih chuan englam nge?” ka ti leha. Diktak chuan achanchin hriat ka chakna in a turin min tur et et a, ka in control buai peih lo.

‘Hmanah hmeichhe pakhat atchilh a lo nei tawha. Mahse, an inthena,chuta tang chuan hmeichhia hi ala thutak ta miah lo a. Ka nu pawh a mangang thei lutuk.Nupui neih a hun tawh chung hian ala kawp kual vel mai maia’ a tita duah. Ka mitthlaah Hmingsangi a lo langa,pasal a nei tawha, Fa pawh pahnih a nei tawh.Chutichung chuan amah vangin hmeichhe dang ala thutak thei tawh lo a. Huizz, ka haw viau dawn emaw ka tih lain ka khawngaih ta tlat. Keipawh amah ang tho ka ni ve miaua.

‘Tinge chu nu chu a neih mai loh?” min chhanna tur hre lawk vek mah ila ka zawt lui talh tho.

‘Ka hrechiang chiah lo nangin hmeichhia zawkin chance a pe lo anih hmel. Thil hriatsual palh a awm an ti bawka’

Ka khawng nghal lah mai. Hmingsangi nen an buaina kha chu family lam a ni tlat.An induh loh tawn vanga inthen anni a.Mahse, ka hriat lohah thildang ala awm cheu anih hmel.

‘Ih,chu hmeichhia chu ka hre ve lo nangin ka hua’ a ti leh hlak.Ka ip chawih mai.

‘Ti nge?Oh…Sawi duh kher suh.Ka buaina pawh a ni lo ania’ nuam ti lo lutukin ka ti leh lawi.A thle baka,a hmui hnuai lam a pet a.

‘Ka u nen hian kan inpawh overa, ka unau pianpui ang maiin ka ngai bawka.Mahse,hetiang lam hi kan sawi dun ngai mang lo a.Amah hi a tawng duh lo bawk sia.Vawikhat chu a rui nawi ve vaka,chumi tum chuan a sawichhuaka.A sawi dan atang pawhin chu hmeichhia chu atan a pawimawh zia ka hrethiam vek. Ka u,mipa zawng zawnga ka ngaihsan ber lo hnawl ngamtu hmeichhia chu ka haw ta em em tawp animai’  a ti duah.Zorema angaihsan zia hi chu tun tum chauh lo pawh ka hmu tawha. Mahse, tiang em em hian angaisang tih ka lo hre miah lo thung.

‘Ka hrethiam che lawm’ ka ti a.Englaiber nge ka hriatthiam pawh chu ka hre chuang der lo.

‘Um..Ih.,diktak chuan ka nel hnu che khan i mizia hi ka duh lutuka.Ka u nen inkawp ula ka lo ti ru thina.Ka u hnenah pawh ka sawia.Hmuh che a duh vangin dawrah pawh ka in lamtir kha’ a ti a, zak deuh niawm takin a sen awp awp a. A thilsawiin min thawn zia a hre der lo chu ka mangang ru zawk.

‘I va han ho tak’ ka ti hap mai.

‘Naa, hoh vang pawh a ni lo. Kei chu ka vei zawng ka vei vak zel alawm. Mahse, ka chet hmain u Martin-a hian min chet khalha; Chuvang takin u Martin-a ka ngei ka tih. Ka u hnenah pawh ka sawi hrama,a nuih a za lutuka. Mahse,vanneihthlak deuhin tunah chuan a danglam ve ta deuha. Hriati hi ka hmelhriattir ania. Hriati hian a duh hneh bakah a zei aniang.Ka beisei aiin ka u pawh a serious ve taa’ a ti leh siam siama. Ka hrawk a ro halha, a u nen kan lo inzui tawh tih a tawngdanah a hre lo tih achianga. Bakah,Zorema pawn a sawi lo tih a hriattheih vek.Nia, a sawi nang.Thla thlemte chauh kan inzuia, hriatreng tlak a ni nang. Ka mitthlaah Hriati’n inti tatu taka Zorema bana a chelh lai kha a lo langa. Ka awm a nuam lo teuh mai.

‘I ho em maia. Ka sawi kha,kei nuthlawi hi tunge maw min duh ang le a?”  ka ngaihtuahna a thil tamtak lang zut zut dahbo chung leh a thilsawi ngaihven lo awm takin ka ti zangkhai vah.

‘Hmm,I ngeiawm em maia..Diktak chuan..’ a sawi zawm hmain Martin-a a lo luta, a sawi zawm ta lo.

Ka nu leh ka u bakah Soso-i, ka nu u lungphunnaah an kal dawna, zankhat an riak dawna. Kal ve ka tum zeta,mahse hritlang khawsik ka kai peka,ka zia deuh tawh nangin zin tur khawp chuan ka la fit lo thunga. Soso-i kal ve lo maise ka ti a, mahse kal turin kan lo sawi hmuh vek tawh si avangin a rilruah a awm tlata. Thulh tir leh mai mai chi  a ni lo.A luhlul lutuk hi ka nuin min chhun vang tih a sawi chamchi a, ka hrin ni hauh lo mah se kei pawhin min chhun niin ka hre ve tho.

‘Mum,min ngai angem?” Soso-in a ti a. Ka malchungah a thu a, ka bengbeh a khawiha.

‘Ngai ang ka ring..Nang? “ka ti a. A hnarah ka piaia,duh loin a thle sawn vat.

‘Aw, lo kal ve la’ a ti leh a.

‘Ka dam lo alawm..Api leh a Pu nen inkal anga,thuawih em em tur ania’ ka ti a. A bu vei nghat nghata, a mitmu pawl ram mai chu ka en a, ka ngaihtuah naah Sebastian-a a lo langa,Arti a zawn thu min rawn hrilh bak kha chu a reh ta vang vanga. Atir lam kha chuan ka hlauthawnga, mahse a reh tak vang vang avangin ka thlamuang leh tawha.Hriat pawh ka hrechhuak ta lo hrim hrim.

An zin tur an kalchhuah hnuah zawi zetin ka mu a, kan nula che vel thawm bak thawm dang awm loin a reh thap a. Muangchangin ka insiama,dawrah ni hnih lai ka kal tawh loh avangin kal ka duh.Ka awmrei peih lo anih pawhin tlawh hrim hrim ka duh.

Dawr ka thlen veleh B-in min lo lawm nghal Chula, midang pawhin ka that leh that loh min lo zawt laih laih bawk. Ka khua asik leh mai ka rin laiin a sik ta miah lo a. In lamah tihtur ka nei lem lo bawk nen ka awm nileng ve ta thak.B-in ngai a awm leh tan deuh tawh bawka,a dan ngai te tein sawi tur  a lo  nei leh teuh tawh.

‘Aw, nu…’ phone ka pick veleh ka ti a. Ka darah ka Phone ka nawr beta. Ka kut lehlamin ka thil tih lai ka tih zawm pah mawlh mawlh bawk.

‘Bawihtei hi a lo la thleng lova.Nidanga an lo thlen a hun tawh si a.Lo be teh’ a rawn ti a. An zin an lo haw atangin kar a liam leh tawha,Bawihtei pawh School a kal leh tawha,ka nu erawh kan inpiahah mithi kan neih avangin vawiin a chawl thung.

‘Aw, ka lo be nghal ang’ ka ti a. Ka khawih laklawh lai Puipuii ka khwih zawm tir a, ka kalsawna. An Miss call tumin a number ka en a, mahse ka rin loh lutukin Zorema’n min rawn call tlat!

Ka reject ang nge ka pick ang tih ka ngaihtuaha,Bawihtei te Miss call hmasak a tul ka tih avangin ka reject ta zawk.Mahse, ka call hmain a rawn call lehnghal zat. 

Hrep taka,eng chu nge maw a duh ni a?

‘Hello..’ ngaihno bei lo zetin ka ti hmak. Ka tawngkam chang zet chu hriat a nuam lo khawp ang tih ka hria.

‘Terin, I fanu te school van hi a accident a…’

‘Maw?!’ ka ti tuar.

‘LPK brake fail in kawngthlangah a nawr thlaa,mahse an ngaihtuahawm lo ania’ a rawn ti leh a. Ka mang mup theia, ka thaw hleithei lo. Ka hmaah B-i a rawn dinga, a mitmeiin zawhna min zawta.Ka lu ka thing ringawt.

‘Khawiah..Khawiah nge?” ka ti bah nawk nawk mai.

‘Hahdam rawh,tunah Damdawiinah ka kalpui meka,a hlauthawng deuh tih loh chu engmah na a nei lo’ a rawn ti leha. Ka khur nasa lutuka, ding hleithei loin ka bula thutthleng ka nghenga, B-in min rawn vuan nghal vat bawk.

‘Thu phawt teh’ a ti a. Thutthlengah min nawr thu a, ka phone a rawn pawtthla nghala. ‘Hello..Eng thil nge?” a tih ri chu hla taka tawng ri ang maiin ka hre hla du mai.

Ka kawchhung atangin hlauhnain min rawn fana, ka thauah a man ni berin ka hria. B-i leh Zorema inbe mawlh mawlh chu ka en a, ka chhaw hu a ni ber.

‘Kal ang le’ min rawn en a. Ka lu ka thing leh ringawt.

‘Ngaihtuah suh, engmah hliam a nei lo. A hlauthawng ringawt tih loh chu a tha a ti a, kan va kal vat anga. Amah i hmuh veleh i dam hawk mai ang. Hlauthawng suh’ a ti leh mawlh mawlh.

Kan tlanchhuak deuh chiah tihin Zorema’n a rawn call leha, In lama kal tur zawkin min rawn ti a.B-i nen in lam panin kan tlana, ka rilruin ka tawngtai a, mahse mu leh mal ka nei lo.

B-i a din fel rualin ka chhuk nghal rawk rawka, inchhungah ka tlan lut a. Soso-i ka nu mal chunga a lo thu chu mittui nen ka pana, ka thingthi thla nghal rawk rawk mai.Ka kuah beta, ka nghawngah a rawn kuah ve a..A darah ka hmai ka phuma, ka chan mai thei tih ngaihtuahna avangin ka mittui a rawn tlaa. Tah rik loh tumin ka hmui ka pet tlat thung.

‘Soso-i lawn tur chiah kha chak lutuka Motor rawn tlan khan Van kha a hnawl deuh bura. Vanneihthlak lutukin Zach-a kha a lo awm hnai hlauha. Ani khan engtin nge a pawm kan hman pawh ka hre lo.Awm lo se chuan a chhe ber kan thleng hial ang’ an Principalin a rawn ti a. Ka mitthlaah Zorema hmel a lo langa, lawmthu engtin nge ka sawi ang ka hrethiam lo.Diktak chuan vawiin khan ningnel lo zetin lawmthu kha ka sawi a ni deuh mai a. Ka inthiam lo vang vang mai. Na a lo nei reng em pawh ka hre miah lo a. Zawhna chang lah ka hre hek lo..

Soso-i muhil hmel ka thlira, a khat tawkin a phu leh zawk thina.An accidentna khan a la tihlau reng tih ka hrethiama. Ka muhil thei pawhin ka ring lo.

Ka Phone ka lakanga, Zorema number ka hmetchhuaka. A lo la Online kalh mai..Ka call ang nge msg ka thawn ang? Sana ka en a, dar 11 a ri tawh.Bakah,Soso-i tihharh ka duh loa, kalsawn san ka duh chuang hek lo.

‘Ka lawm e aw..Chuan,nangmah i tha em?”

Send…

Vawi tamtak ka type that hnuah ka thawn thei ta hram..Mak takin ka msg a lo nghak emaw tihmai turin a seen nghal zat mai.

Typing…..thaw dep depin ka nghaka..

‘Ka tha..Enge tunah a an a?”  a msg ka chhiara, ka thaw deuh huai mai.

‘A muhil a, mahse a phu leh zawk thina..I that chuan a lawmawm.Chuan,I hnenah lawmthu sawi sen loh ka ba..Duah maia’ 

Ka msg chu ka en a, ka nui leh rih.

‘Tha lo ta ila engtin nge niang?”

A msg chhan let maid an tur ka hre lo..’Pawi ka ti ngawt ang’ tih ka thawn let ta  ngawt.

‘Kei chuan pawi ka ti lo maithei.Hmeichhe naupang duhawm em em ka chhanhima..Chu zawng zawng aia pawimawh chu ZORINSANGI fanu a ni tlat..’

Ka phone ka melh reng mai….

PS: Ka dah ang tih ka sawilawk si avangin mi Computer hawh chawpin ka ziaka,engkim hi a mak deuh nuaih maia.Ziak hi sin te te,bichilh deuh deuhin a awm tlata.ka Edit thiam tawh si lo.Lo zoom ula,anih ang ang hian lo chhiar Liam mai teh u.A hrehawm em mai.