PURPLE HEART - 7

Chapter- 7

Muhil loin ka tlaivar ta thak.Soso-i tal vel tur ka veng anih rualin diktak chuan Zorema tawngkam vang kha a ni zawk tih ka inhre ru kar mai.

‘Enge Bawihtei chu a an a?” min hmuh veleh B-in a lo ti a.

‘A tha lutuk.Engmah na a nei hran lova’ ka ti a. Ka bag ka daha, Latei’n Lemon tea min rawn pe a. 

Ka laa, B-i bulah ka thu thla ve a.

‘Enteh, Zach-a kha…’ zawi angreng takin a ti a.

‘Enge a? ‘ duhdah fahranin ka ti liam puat.

‘A lo awmhnai lo ang tih a hlauhawm e’ a ti a, tawngkaa chhang loin ka bu satliah ringawt. Mahse, ka hmelah eng emaw tal hmuh tumin chik takin min enru reng tih ka hre ru kara, alam ka hawi duh lo lui tlat thung.

Kan buai zui ta viaua, ahranpa taka titi zui viauna hun a awm ta lo hlauh. Lunch pawh pawnlama ei loin Dawrah kan ei a, chawhnu lam dar 3 vel thleng chu hunawl a awm ta miah lo.

‘Vawiin chu Zorema a lo kal leh a’ ka nuin Soso-i chaw ka pek laiin satliah angreng takin a ti a, kei erawh ka thil chawhkual lai ka tawp nghal chawt thung.

‘Enge a duh a?” ka tum aiin ka aw a chang lam mah.’Bawihtei a rawn tlawha,chu zawng chu’ a ti a, a dar a tisang nghal zauh bawk.

‘Um,anih chu mawle’ ka ti ro halh ringawt.Soso-i chaw ka pek chhunzawm lehnghala,mahse ka rilruah erawh engvanga rawn ngaihven zui leh kher nge anih ang tih bak a awm lo. Nizanah khan a tha vek tih ka hrilha,lo kal nawn leh kher a tul lo tih hre lo a ni miah si lo.

‘Bawihtei lah chuan a ngaina em em maia,amak khawp mai’ ka nu bawkin a ti leha, Ka hrawk ro nghal halh leh ka kawchhung let but mai chu ka hrethiam chiah lo.Soso-i ka en a, nizan khan ka fanu anih vanga pawimawh anih thu kha a sawia..Eng nge maw a hriat hrep le??

‘Enge maw i ngaihtuah le?” lawm lo awki hian ka nuin min ti hmaka. Ka phu zawka,ka inngaihtuah kual nasa phengin Soso-i min kohna ka lo hre pek lo chu niin.

Nuihtlawn titihin ka nu ka en a, tur angreng fein min lo melh khai mai. Diktak chuan Zorema nen kan inthen boruak te, ka tawrhdan engkim hretu a ni a. Ka awmdan danglam pawh hi achhan tur a hai hauh lo ang tih ka chiang.

Soso-i muthilh hnuah muhil ve thei loin ka mu meng kara, ka ngaihtuahnaah lah Zorema bak alang thei miah lo zui.Ka muhil thei lo beidawngin Netflix lamah bawk ka kual lut leh ta nge nge a. Movie thar en tur ka zawng kual dan dana, Chhunzawm chi hi chu ka hun neih dan nen a inmil loh avangin ka enbuai peih ngai lo a. Mahse, chhunah khan B-in Korean serial thar, ‘Flower Of Evil’ en ve turin min ti a. Lar eng ang pawhnise Korean lam hi ka en ngai lo tluk a ni a. Tleirawl laia ‘Full House’ leh ‘Classic’ movie ka en kha ka enchhun a ni hial awm e. Mahse, a sawi danah khan a hmuhnawm hmel em a, ka search a,a rawn lang nghal iar a. Trailer ka en hmasa te te a, a changtute an Mature tawh bakah a Plot ka ngainat zawng tak tur,ngaihtuahna sen ngai chi a ni tih ka hre theia,ka phur nghal sarh mai.

Episode 1 ka en zo ta thak. Episode 1 chauh nimahse min hip nghal vawng vawng pek. No diai diai lam reng reng an awm lo a.A changtute lah an a der hek lo.Episode 16 a ni a, en leh tur ka download sa a. Pakhat te te a entura hunbi ka insiam anih loh chuan tih tawh lam ti nghek chi ka ni a, ka hna a tibuai dawn tih ka hre ru kiau.

Ka download zawhah Whatsapp lamah msg ka en kual thuak thuaka, pawimawh a awm hran lo. Muthilh tumin ka Phone ka dahthlaa, ka dahthlak rual deuhthawin a nghawr nghal data. Ka lakang leha, open chuang loin notification a lo lang ka tuai thlaa, Zorema hming ka hmuh rualin ka awmdan a danglam nghal vek.

‘ I va mengrei ve,Soso-i a nuam lo leh deuh nge?’

Ka chhiar rualin ka then sak mai. Mahse, engvanga nui nge ka nih ka inhre chiah lo thung. Ka Phone ka awm chungah ka daha,thaw mang loin ka mu mar ata. Ka chhan let dantur ka ngaihtuaha, diktak chuan ngaihtuah buai tur a awm miah lo.

‘A tha e..Vawiinah ilo kal leh tih ka nuin a sawia’ vawi tamtak ka type that hnuah ka thawn ta hram.Rang zetin a rawn reply nghala.

‘Nia, ka sawi kha..Ka tan a pawimawh’

‘I lo ngaipawimawha, kan lawm lutuk’ tih ka thawn let ve vat.

‘Engvang nge i hriat kha’ a rawn ti leh ve nghal zat. Eng chu nge maw a hriat le? Min fiam kual a tum anih chuan a fuh lo khawp ang.Ka rilru hian la duh ngawih ngawih mah se khatianga inbum nawn tir leh ka tum tawh lo.

‘Hmingsangi khan pasal a nei tih ka lo hre lo a. Pawi ka tihpui che’ ka thawn zawh rualin ka inchhir lehnghala, mahse Delete leh kher erawh ka tum lo.

‘Pawi tihna tur ka nei lo’ a rawn ti tawi tuk.

‘Ok, ka sawi tur a awm chiah lo a. Ka hrechhuak thuta, ka sawi mai mai mawle’ ka ti let ve leh zat.

‘Kan pahnih chungchang kan sawi thei angem?” a rawn ti leh a.Min bak dan zawng zawngah ngeiawm engmah a awm lo a. Ngeiawm taka lo tihlet ngawt theih a ni tlat lo. Emoji,a ngaihna hre lo deuh lai ka thawn let tawp.

‘Kum 4 hi a rei khawp mai’ tih arawn thawn leh tawp.Ka phone nghet lutukin ka huma, ka tiril a khur dar dar mai.Eve-in a nuna Hmingsangi pawimawhzia a sawi kha ka bengah a lo ri nawn a. Thikna avangin ka lum deuh pup theia. Huiham,kum heizat hnuah pawh hian ava buaithlak em!! Kum li lah chu rei kan tih dan a in ang lo nasa mai bawk si.Ka Phone a nghawr leh dat a, rang lutukin ka en lehnghal vat.

‘Vawikhat chauh chance min pe leh thei angem?”

Ka chhiar sual emaw tiin ka chhiar nawn leh ngata, mahse engmah ka chhiar sual lo.

‘Eng nge sawi i tum? I send sual palh zawk nge?” tih ka thawn leta, a type chhungin ka lungphu a rang lutuka, a ri tluk tluk nimaiin ka hria.

‘Vawikhat chauh i bialpa ka ni leh thei angem?”

Ka hmui ka pet a,ka insangmar nasa lutuk ringawt. Muangchangin thawk ka laa,ka mitthlaah Hriati a lo langa. Eve-i khan Zorema pawh a thutak ve tan tih a sawi kha ka hrechhuak leh iar iar a,ani leh kei hian inzawmna nei leh thei kan ni tawh lo.

‘Hriati nen khan in inhmeh ka lo tia,ka lawmpui lutuk che a. Bakah,hetianga infiam kual tur chuan hun ka nei tawh lo. Nu, fa nei tawh ka nih hi’ ka ti ta duah.

‘Ka tihsual siamtha leh tur khan vawikhat chauh chance min pek leh hi ka duh a, ka phut lui che’

Ka chhang tawh lo..Data ka off nghala,muthilh erawh ka tum buai ta lo law law.

Nuam lo burin Dawr ka thlenga, nidang ang lo takin zingah Soso-i a huaibaka, ka mu tha lo,mood fuh lo lutukin ka sawi peka. Ka hrem mai mai ngai lo bawka min hlau ngang maia.Mahse, keimah zawkin hrehawm ka ti leh ngawih ngawiha.Ka nu nen kan inhauh phah bawk vei nen vawiin zet chu ka mood a uih hluah hluah.

‘I va nawm loh hmel em em’ min ngaihtuah hmel takin B-in a ti sar sara. Chhang loin ka thle baka, coffee sa zet ka in nghal pawpa.Ka hrawk a sa thla ram rama,a thlen chin a hriat thla vang vang mai.

Client lo kal an awm seka, ka Mood lah tihlan a rem der si lo. Ka ngaihtuahnaah Zorema leh Soso-i a inlan chhawk seka, engvanga bul tan leh duh nge anih ang? Kan tawp atangin kum aliam teuh tawha.Kan tawp hlimchhawnah pawh engmah sawifiah a tum lo.Ni lo,B-i puihna chu a lo dil ve ngei tak kha.Huh, engpawhchunise tun ataka bul tan leh duh kha enge awmzia ni ang?tunah pawh B-i puihna a dil lo a, aduh chu directin a sawi pawp a. Engvangin nge a hma khan puihna a dil kher ang? Chhuanlam awmze nei lo mai a ni.

‘In buai em?” Eve-i awin zangkhai vahin a rawn ti a. Ka thlek zauha,mahse ka tum loh lutuka a hnunga rawn lut ve mek ka hmuh rualin ka tawm nghal chawih mai.

‘Buai lo e, lo kal ru’ B-in zangkhai takin a ti let ve a. Kei erawh an pahnih lam hawiin ka nui lui sak ringawt.

‘Vawiin chu Bodyguard ka rawn neia’ hlim takin a ti leh a. Ka then leh sak a, Zorema lam ka hawia. Chiang zetin min lo en reng chu niin ,kan mit a intawng sawka. Rang lutukin ka melh sawn nghal vata.Diktak chuan ka lai chhe hle tih alang veka, mahse ka insiamrem hman ngang lo.

Eve-i a tawng siam siam renga,ka chhang ve luam nangin B-i nen an inbe tam mah zawk. Zorema erawh athut ngaiin a thu a, Phone a khawih deuh renga. Eve-in a be zauh anih loh chuan a tawng ve lo tluk a ni.

An kal hnuah ka inthlahdul thei ta chauh,mahse an awm lai khan ka tang lutuk tih pawh ka inhre leh chuang miah lo.Huiham..Khatianga inthawn thut thut kha thil lawmawm a ni hlawl lo.Eve-i a lo kal fova, Zorema a lo kal tel ve kher ngai lo. Nizanah bul tan that leh a duh tih a rawn sawia,  Eve- i a rawn zui nghal zata, thil thleng palh a ni angem?

‘Zach-a khan hmuhnawm a ti tawp che’ zawi sapin B-in a rawn ti a.

‘I over anih chu a’ka ti bak hlak ringawt.

‘Hm,over miah lo. Eve-i i buaipui lai khan a phone kar atang khan a rawn melh reng mai che khan ka hria..I hmelthat tak thut pawh ka hre si lova’ a ti a, nghal zetin a meng rang kual a. Kan nau te awm hnai lo se chuan ka kuk pawp ngei ang.

‘Nghal lutuk hi sim teh’ ka ti nghat.Mahse, ka ngaihtuaha, nizana Zorema thil rawn sawi kha hrilh mai ka duh a.’Enteh’ ka ti hman zuaua,mahse ka ngawi lehnghal daih.

‘Ka en mek che..Sawi la’nui chungin a ti a.

‘Aih, ngai leh lo mai rawhse’ ka ti leh ta zawk.Ka thian mai bakah unau ang thawthanga ka en nimahse tunah chuan hrilh tul ka ti leh ta rih lo.Nakinah thilthleng a awm anih chuan ka hrilh ngei ang tih erawh ka chiang viau thung.

Zorema’n min rawn biak atangin karkhat a liam leh tawha, nitin zingkara min rawn wish leh zana min mangtha na msg rawn thawn loh ni a nei ta miah lo. Atir lamah chuan engtia chhan tur nge ka hre lova. Chhan loh ka uia,chhan chuan ka rilru puthmang angaih ruat anga, min zuam ang tih ka hlau bawka..Ka inkhap fe hnuah chhan let loh tha zawkin ka hriaa, ka chhang lo a. Karkhat lai hnuah pawh ka chhang ta chuang lo.Mahse, ka thawh veleh a msg a lo awm ringin phone ka ban vat zel thung.

Karkhat chhungin dawrah Eve-i vawithum a lo kal hmana, nidangah chuan karkhatah vawikhat bak a lo kal ngai lova. Mahse, chu aia mak ala awm cheu. A lo kal apiangin Zorema a lo kal tel ziah!! Min be hran lova, Eve-i kan buaipui laiin ngawirengin a lo thu ve tawpa.Chu zawng chu animaia.Tawngkam thaa,vawihnih khat inbiak chang erawh a awm lo thei lo a.Chutah pawh chuan min duh emaw keimah vanga lo kal anga ngaihbel theih turin engmah a awm ngaih eih chuang lo. 

Msg min rawn thawn danah pawh Good Morning leh Good night animaia. Abak thudang sawi zawm a awm miah chuang lo bawk.

October thla tantir a ni a. Favang khawnawm hun lai tak tur ni siin ruah a tla fuap fuapa. Khua a thim dawn ruai tawh bawk. Taxi lo tlan apiang mai an full zela, Ka rilru hmanhmawh tawh bawk si nen ka thinrim ru teuh tawha. Thinrim ngawt lah chu awmzia a awm der lo zui.

Ka bulah Car a rawn ding chawta, ka en vat.Zorema a rawn dakchhuaka, ka thaw ru nghal hak mai.

‘Lo lut rawh’ a rawn ti nghal vuta.

‘Aih, ngai lo mai’ ka ti let ve vata.Mi ka nghah thu sawi zawm ka tum zeta, thil tul lo a dawt sawi tel hram kher chu a…..Angai lo ka tih chuan a kal leh mai dawn tho.

‘Lo lut rawh. Traffic ka ti jam ania’ ka sawi ngaipawimawh lo zetin a ti leh a. Ka lo rin anga kal lehnghal mai tumna a nei lo tih alang reng.

Hnial leh tumin ka ang zuaua,mahse ahnung chiaha Motor rawn dingin ring zetin Horn a rawn hmeta, han hnial buai chiamna hun a ni lo tih ka hrethiam nghal mai.

Ka thu luta, a tlan zui nghala. Mahse, Motor tawt lutuk avangin kan tlan sawt lo ngang mai thung.Inhre ngai lo leh inhua niawm taka boruak awm deuh run chu ka hretheia, mahse enge hetiang boruak neih a tulna? Huatna chhan tur ka nei lo ang bawkin ani pawh hian min huat chhan tur a nei lo tawpa.Hmanah reilote kan lo inzui ve tawh tih mai a ni a. Tun thlenga Mood danglam phah nana ka hmang hi abulah lehzel lantir a tul ber lo chiang bal.

‘Khawnge i kala?” satliah thei ang berin ka ti liam puata. Ka melh zawka, Pawn lam ka thlir zui leh mai. Ka awmdan engkimah amah vangin ka danglam lo tih ka lan tir a tul em em a,chuvangin awki pawh a zangkhai leh satliah thei ang ber ka hmang tur a ni.

‘Hna ka kala’ zangkhai vuhin a ti a. Ka melh leh zawka, Uniform a ha lo tih ka hmu a, ka ngaihtuah leta, kan inzui chhung khan hna thilah Uniform ha loin a kal zeuh zeuh tih ka hria. Mahse, tam erawh a ni lo.

‘Anih chu’ sawi leh mai tur hre loin ka ti fan deuh raih ringawt.

‘Min chhang har tawh hle mai’ reife kan ngawih vang vang hnuah zawi deuh takin a ti thawp suta. Rang zetin ka melh nghal vata, min en loin hmalam a lo en a. A hmelpa zet chu alang thutak run mai bawk.

‘Min bia tih ka hre lova. Sorry lutuk’ inthiam vak loin ka ti bah nak mai. Hmalam ka en a, kan veng peng kan thleng dawn reng tawh a lo ni.’ A remchang laiah ka lo chhuk ang aw,ka lawm lutuk ringawt.Taxi a vang bawk si’ ka ti a, achhan awm lem loin ka nui lui hak bawk.Mahse, ka sawi hre lo ang maiin kan veng peng lama tlanthla turin kan hmaa Motor hnungah a ding a, Traffic police,thahnem ngai taka vai lauh lauh chunga Whistle ham tuar tuar chu a en vung vung bawk.

‘Ka be hleinem che’ kan veng lam panna kawnga kan tlan thlak hnu lawkah a ti leh a. Awmze hre lo lutukin ka en ha mai.

‘Eh, min chhang lo iti bawk sia..Eng?”

‘Kan pahnih chungchang zawk kha.Kum li bakah karkhat aia tam ka nghak leh tawh a’ ka tawnglai titawpin a ti mar ut a. Inring hman loin ka thaw nghal hawk thung.

‘Enteh,I hriat angina nuthlawi ka ni a…"

‘Aw nge Aih?” a ti leh hmiah. Ka kut ka humruha, a hriat loh turin muangchangin thawk ka la vang vanga,a mize ngeng leh luhlul lutuk hian min tibuai tur a ni lo.

‘Aih tiin ka chhang che che ni tehse’ mahni inringtawk takin ka ti dam thlapa. Mahse, ka tawngkam chhuak letling thawkin ka chhungril erawh chuan min hrilh a..Ni e,khang kum chhung zawng khan amah ka beisei a.Ka hmangaihna avangin mipa dang reng reng ka hnaih thei ta lo hiala..Mahse, tunah chuan a tlai tawh.

‘Ok,anih chuan ka la nghah leh angai dawn tihna anih chu’ ka beisei loh lutukin a ti awlsam then mai.Beidawng zetin ka thawnghal haka,eng chu nge maw a duh tehrep ni??

‘Min nghak duh suh,nghah chi ka ni lo’ ka ti nghauh.

‘Pawiti suh,nupui neih ka hmanhmawh hleinem’ a ti liam leh vut.

‘Min fiam kual lo la ka lawm ngawt ang,hman ang kha ka ni tawh lo ania’ ka ti chang fak.

‘Um,nia, ini tawh lo.Ka hria alawm’ a ti leha. A awmdan hahdam leh zangkhai ru fu bawk si chuan min ti zam tih ka hai lo.

‘Enge i duh?” sawi mai tur hre loin ka ti ta hlawl.

‘Nangmah…I fanu pawh telin’ min chhang rang lam mah chu a ni.A mize tlang leh engkim mai a sawi tlang pawp thin kha ka duhzawng tak a ni thina, mipa dangah pawh hian khatiang mizia kha ka beisei ru tlat zel bawka. Tunah pawh a mizia a lo la thlak danglam chuang miah lo tih ka hre theia,mahse ka lawm miah lo tih erawh ka hria.

‘Engvangin maw? Nula tamtak nei duh che an awm ang chu’ ka ngaipawimawh lo tih lan tir turin ka nui zui nghal hak hak mai.

‘Nula tamtak min nei duh an awm anih pawhin keichuan nuthlawi induhtawk tak pakhat neih ka duh tlat’ nghet zetin a ti hmuka. Ka ip ru chawih ringawt.

‘Ka lawm e ka timai dawn mi?” ka sawi zawh rualin ka nui hak.

‘I inpeih hun hun atan ni rawhse’ ka thusawi haiderin a ti leh hmuk. Fiamthu anga lap deuh zawnga lak dawn pawhin a haw duh eih lo tih ka hriaa.

‘Enteh,fiamthu loin ka’n sawi ange. Min nghak duh suh,nghah chi ka ni lo’ ka aw nghet charh mai chu keipawn ka awih lo rum rum mai.

‘Kum li tal tap innghah hnuah chuan nghahbelh leh chu thilpawi a ni lo vang ka ring’

‘Duhtawk teh,min nghak lo tih ka hria. Min nghah nachhan tur i nei lo tih pawh ka hria. Chuvangin tihian ka thaa, nangpawh i thaa. Infiam kual turin kan upa ve ve tawh. Diktak chuan thian nih pawh ka duh lova. Min hrethiam dawn nia’ ka ti ta duah.

‘Ka nghak lo che maw?” a ti tawi tuk.Chhan tum tawh loin ngil auhin ka thu a, hmalam ka en ngar bawk.

‘Ka fiam lo che a, ka nunah tun aia thutak zawk tum hi ka nei anih pawhin a tam lo khawpin ka ring’ amah bawkin a ti leha. Ka la chhang chuang lo cheu.Diktak chuan chhang tur pawhin chhan dan tur ka hre lo hrim hrim. Ka mit ka chhinga, kan veng thlen thuai thuai ka duh ber mai.

Thawklehkhatah Motor a ri deuh bura, ri tuar khawpin a Brake a, inring hman hek lo i,hmalamah ka bu dawrha, ka intauh chawrha, ka lu a hai nghal chum chum bawk.

‘Ekhai…I tha em?” Zorema’n a ti a. Min rawn vuana,awmzei nei loin ka lu ka thing a, ka chal a thip vung vunga, ka khawiha,a na vin thak mai.

Motor kawngkar a hawnga, a chhuak zui nghala,Kawngkhar khar loin a kalsana,pawn lam ka va en a. Mi an lo ding khawm taih mai.Ka mit ka chhinlai anih avangin enge thleng chiah ka hre lova, min rawn su nge kan su zawk pawh ka hre lo.

‘In fimkhur thei lo anih chuan Lirthei khalh lo mai rawh u’ Zorema awki nelawm lo em em mai ka hre zui zata. Ka dakchhuaka, mi zinga Zorema leh mipa pahnih inhmachhawna ding chu ka en a, ka chhungrilah hlauhthawnna a rawn lut nghal a. Engvanga hlauthawng nge ka nih erawh ka hre lo.

Zorema hnaih zawka dingin Zorema a nem sawk lai leh pakhat zawkin a bawh ve nghal ka va hmua,engmah ngaihtuah hman loin kawngkhar ka hawng rawka, ka tlanchhuak nghal a. Zorema bul ka thlen hmain a kut a phe zawka,amah nemtu pa a thal nghal huanga, pakhat zawk kut aman sak bawka,abula ding ho an ri nghal hak mai.

 A kut lehlam a lekleh chiah tihin hnung lam atangin a kawngah ka va kuah nghal chawta,a hnungah hmai ka phuma; ‘Zo,ti tawh suh’ ka aw a a khura,hlauhthawnna avangin ka lungphu a inthumrawn tluk tluk bawk. A taksa inphiar talh talh chu a kawr hak chhanah ka hretheia, ka kuah nghet leh sauh bawk.

‘Zach,eheu..Engthil nge?” Mipa aw hian a rawn ti a, ka hawichhuak nghal vata.Kan bulah mipa pakhat,thau lam lek lek a lo ding reng tawh.

‘Min rawn su a’ nelawm lo fein Zorema’n a ti nghuta. A inthlahdul tawh niin ka hriaa.Ka kuahna ka thlah nghal vat. Ka kuah ngawt mai kha ka zak leh dawn tih hrereng mahila tihdan dang tha zawk ka hre miau si lova. Tunah chuan ngaihtuah loh law law ka duh rih zawk.

Kalsawn ka tum lai takin ka banrekah a rawn vuan leh chata, ka melhchho nghal vata. Min en loin kan bula ding nen an inbe mawlh mawlha.An inbiak danah chuan an inhrechiang thawkhat tih a hriattheih mai bawk.

‘Motorah min lo nghak lawk la,ka rei lovang.Hlauhthawn tur a awm lo ania’ min rawn en pahin a ti dam thlup.Chhang loin ka bu nghata,kan bula min rawn sutu te zinga pakhat zawk let reng chu ka melh zawka, Zorema kutthlak nat tur zia ka ngaihtuaha, a thi mai ang tih ka hlau ru zek zeka.Mahse, ka kut a vawnna a thlah rualin engmah sawi loin Motor lam ka pan nghal vata.Rang zetin ka thu luta, ka chal na lai dimtein ka khawiha, mahse Zorema te awmna lam atangin mit ka lasawn chuang eih lo thung. 

Kawng lunlai tak anih avangin mi an tam chak ngang maia,a thenin Motor an rawn en a,a hmalamah chhia a awm leh awm loh an en anih ka ring ve tawp.

‘Engtin nge?” Motora a rawn thut luh veleh ka lo tinghal vata.Mahse, min chhan hmain ka thutna lamah Zorema rawn betu kha a rawn daka.

‘I tha em??”Zangkhai takin min rawn ti a.

‘Aw, tha e’ ka ti let ve vata. Nelawm takin a nui suka. Ka ngaihtuah leta, kan inzui laia ka hriattawh anih leh nih loh ka ngaihtuaha, ka hmuh ka la hre lo.

‘A that hlauh chu. An rui ve em atin nih saw. Tisawn zankhat Lock-upah kawl ila,an harh hawk mai ang’ nui chungin a ti leha. Zorema te thawhpui tih ka hrethiam chiah.

‘An mahni kha an na em?” ka ti a. ‘I bula mi kha Boxer a ni tih an lo hre lova,tak takin na lo ve. A rui lutuk a chatthla zui anih ber saw’ a ti awlsam leh et.

‘I tha tak tak em?” kan tlanchhuah rualin a ti dam leh thluama.

‘Um,tha..Tlemin a thip deuha’ ka ti tha ve mai.

‘Damdawiin lamah kan kal lo ang maw?” a ti leh a.’ Naa,ka intauh chauh ania,chutianga na a ni lo.Motor hi a chhe nasa em?” ka ti leh a. ‘Aih, tlem chu siam angai anga.Mahse,keini aiin anni kha an chhe nasaa.Engmah chawitir pawh ka tum lem lo’ a ti leh a.

‘I khawih na viau maw ka lo ti a’ nuam ti chiah loin ka ti a.

‘Na vak lo ang.A rui em a,a zawi laklawh anih kha’ a ti awlsam leh mai. Kan veng kan lut a, ka rin loh deuhin kan veng leh kan veng bul chiah inrinna laia kawngfal leh reh laiah Motor a tidinga. Phawk zetin ka en nghal hau mai.

‘Tinge? A chhia ami?” ka ti nghal vata. Motor Head light a thim takah chuan eng dang awm hek lo,a thim tha ngang mai.

‘Chhe lo e..I intauhna lai kha ka en duha’ a ti a. Motor chhung light a on dawn emaw ka tih lain a Phone flash light a on a, min rawn hnaih chilh nghal chu animai. Ka inrin hmain ka khabeah  a rawn vuana, nghet zetin a chelh beta, ka chal ka tauhna lai a en a, kan inhnaih leh lutuka, thawk pawh ka thaw tha ngam lo.

‘A pilh lova, mahse a pawng nghal anih hi.A sen bawka,a thip em?” a tihzawm zat.

‘Aih,aw..Tlemin a thipa,mahse…’  ka sawi zawh hmain a hmui lum thar tharin ka chal a rawn si a, ka thaw a tawp titih hial mai.

‘Hey…tinge?” ka induhtawkna la neih ve tek tek sawmkhawmin ka ti a. Inlakhran tumin ka che nghala, mahse  amah si chetin min pawtbet nghal hmiaha. A phone light a off nge a khup zawngin a dah ka hre lo.A thim leh ta vek. Engmah sawi loin ka biang a rawn khawiha,dimtein a kut zungpuiin a tuai zui nghal hauh hauha. Ka lungphu ri tluk tluk mai chu a hrethei hialin ka ring. Diktak chuan nichin lawka ka hlauthawnna ai khan tuna ka hlauhthawnna hi a nasa zawk fe bawk.

‘Yes titawh mai rawh’ zawi supin a ti a. Ka ip ru nghal chawih thung.

‘Min thlah la…’ a sawi haiderin ka ti ve thung.

‘Min  nghah rei tir mah mah ania’ ani pawhin ka sawi a ngaipawimawh bik lo.

‘Kan thei tawh lo..I hria alawm.Thil thleng a tam tawh lutuk’ beidawng ru zetin ka ti halh mai.

‘Thleng lo angin ka awm thei. Ka tiam che’

‘Zorem…’

‘Aw nge Aih?”

‘Ka hre lo..’ ka ti ta thlawt. Ni e, ka hre lo. Ka duh em em a, ka duh satliah lo,ka hmangaih hial zawka. Mahse, inkawp leh tur hian ka rilru a inpeih hlawl lo.

‘Min hriat chuan a tawk reng.Nang aia min hrechiang an awm ngai lova, an awm thei lo bawk ang’ a ti leh duah. A awmdan leh a sawi engkim mai hi ka beisei loh lam hlir a ni a.Mahse, min tithlamuang lo ting mai.

‘Tinge kan inzui leh ang?”

‘Ka duh che tih i hria’ a ti tawi tuk.

‘Hmingsangi...’

‘Ani nen khan inzawmna kan nei lo’ a aw chang zetah chuan tih tak takna alang theia, mahse thil danglam lua a awm tihna a ni lo.

‘Nia, Pasal anei tawha’ ka ti hlak.Inlakhran ka tum leha, mahse min kuah nghet sauha. Motor lo tlan lah chu awihawm loh khawpin an awm miah lo zui.

‘Aneih hma pawhin inzawmna kan nei tawh lo. Kan inthen ni atang khan inzawmna ka neihpui leh tawh lo hrim hrim’ a ti leh duah.

‘Mahse, khathil thlen zan kha’ ka ngaihtuah zawng pawhin ka na nawn leh vawng vawng thei.

‘Ka sawifiah thei,mahse i ngaithla duh tlat lo a..’

‘Tunah engmah awmzia a nei tawh lo’ ka ti ve thung. Kan insi reng bawk si nen ka awm a nuam thei ngang lo.

‘Hmanah pawh khan a nei chuang lo’ a ti dam thlup.

‘Hriati..ani kha chuan awmzia a neia’ ka hriatchhuah rualin ka tichhuak nghal halh mai. Engtin nge maw ka theihnghilh theih zawk ni?!! Eve-i ngei pawn a u in rilru a pe ve tan tiin a sawi reng sia.

‘Hriati…I thik em?” a ti daih.

‘Thik tur ka ni em?” ka ti ve hlak thung. Motor a rawn tlana,min thlah dawn emaw ka tih laiin min kuah nghet salha,inlakhran ka tum pawh hreawmin a awm lo.

‘I nih ka ring lo.Thian leh nau ang bakin ka en lo’

‘Ah,ka awih e a’ za lo zetin ka nuia.

‘Ok,a tha alawm. Ani nen kan chungchang sawi tulna a awm lo. Mahse, Aw tiin  min chhang rawh. Diktak chuan ka kalsan tawh lamah hian let leh ka tum ngai lova. 

Nangmah chauh lo chu’ ani leh ni lo ang takin inringtawk lo aw a hriat tel theih a. Inring hman loin ka then sak ringawt.

‘Nuthlawi ka ni a,…’

‘Nangmah chauh lo,I fanu pawh ka duhnaah che hian a tel vek’ min tihkhalh leh hmiah.

‘Mahse….’

‘Aw tihna a ni em?”

‘Ih…Eng lo,engtin nge niang?” ka tawng buh nuaih mai chu ka inngei ngawih ngawiha,mahse min dangchep thiam lutuk leh min nawrchilh hneh lutuk vang tih ka hai lo.

‘Ok…A tha alawm’  ka ti ta nge nge.

Ngawirengin ka hmui a rawn tuaia, enge tih a tum ang tih ka ngaihtuah laiin a hmui lum ham hamin a rawn zui nghal zata, mumang ang ruai nimaiin ka hre thung.

Kan inzui leh ta chu ania. A hmaa kan lo inkawp lai ai khan a let tamtakin min la care zawk ta fo mai!! Mahse, keimah ka la inpeih hleithei lova, ‘thuruk la ni rih rawhse’ tia ka ngenna min hnial lova. Kan inzui leh tih tuman an la hre lo. B-i takngial pawh ka hrilh lo. Eve-i a lo kalpui anih loh chuan a lo kal ngai lova,mahse a hunawl neih zawng zawng min pe fai vek tihtheih a ni thung. Inhmuh loh erawh harsa kan ti ve ve a. Tlaiah min rawn lam thina,Scooty ka ken loh phah ta ziaha. B-i leh ka chhungte hnenah chuan ka kawng na ka chhuanlam hmiah. Kan inzui hmasak ai khan a letin kan inhnaiha, kan inthlahlel zawk bawka.Mahse, puitling tak tak kan nih tawh avangin a tawk chin kan hre ve ve a,kan invengthawng tawn ti ila a dik ang. A chang chuan hetianga inzui leh ngawt mai hi ka tidik angem tih ka ngaihtuah let fo a. Ka nep tih chang pawh ka neia, mahse ka Hmangaihna hian min hneh leh nge nge zela, Virgin killer ti hiala sawi ni mah se,awihawm loh khawpin ka lakah erawh a insum thei lawi si !!

‘Inpeih vat teh, neih che ka duh ania’ ka biang tuai hauh hauh pahin a ti a. A mitmeng thim leh a hmelpa zetah chuan a ti mai mai lo ang tih ka chiang thin.

Zai rat rat chungin ka thawmhnaw hak tur ka enkuala, tlai lamah Rinzuali nu leh pa te inneih cham lawm naah kan kal dawna,kan School kalpui thin te,abik takin Group khata awm ho min phut nat em avangin kal loh ngam a ni lo. Haw leh ngai lo turin inchei law law ka duha, dawrah hian simple tak bak hian ka inchei ngai mang lova. Vawiin chu min ti lang zahawm thei deuh tur hak ka duh thung.

Ka kawr ka khaichhuak chiah tihin ka Phone a rawn ri a, lakang chuang loin ka thlek a,  ka contact list a mi a ni lo.Bakah,Mizoram number a ni lo  tih ka hrethei nghal bawk.

‘Hello’ zangkhai vahin ka ti a. A reh vang vanga, Hello ka tinawn leha.

‘Te-i.Keimah,Sebastian ka nia..’ ka beisei loh lutuk aw ka hriat takah chuan ka thaw nghal hawk mai. Mahse, ka insiamrem lehnghal vat thung.

‘Oooo, I tha em?” ka chhungrila hlauhthawnna awmze nei lo phumbo lui chungin hlim hmel takin ka ti zangkhai leh vaha.

‘Aw, ka tha..Aizawlah ka lo chho dawna,Hotel pawh ka tifel sa vek tawha ’  Hotel hming leh Room number a rawn sawia, ka lungphu a thlawkchhuak dawn nimaiin ka hria.

‘Ka tum aiin helamah thil ka tifel hma leh sia, a remchang em a inram ka rawn en ang ka tia’ a rawn ti leha. Ka tawng dawna,ka tawngchhuak zo mai lo. Harsa ti zetin ka chil ka lem a. Ka awm ka dawm vang vang bawk.

‘Terin…I hrethei em?” a rawn ti leh a.

‘Aw,aw,ka hrethei chiah e.Aizawlah ilo kal dawn maw?” phurna pakhatmah tel loin ka ti a. A thusawi ka hriat loh vanga zawt nawn lah ka ni hek lo.

‘Aw..Vawiinah ka lo thlawk chho dawna,Surprise che ka tuma; mahse, ka thulh leha’ nui huk huk chungin a rawn ti leha. Ka nui lui thei ngang lo thung.Lo kal mai mai tum mah nise kei lo chu tumah hriat a nei lova. Ka buaipui vek angai dawn tih ka hai lo.Engtin nge Soso-i ka tih ang?

‘Ok..Tehreng mai. I lo sawi har lutuka, Hotel kher angai lo asin’ ka ngaihtuahna letling thawk ka sawi angai.

‘Aih, angai lo. Ka lo thleng phawt ang.Duh leh ka lo insawn anga’ a rawn ti leha. 

 ‘Ok,engmah ka hre lawk si lova. Tihtur pawimawh ka lo neia. Mizoram ilo thlen veleh min lo call la,zanah ka rawn hmu ang che’ ka theihtawpa pangngaiin ka ti a. Min rawn call ang tih a sawia, lawmthu min rawn hrilh zui lehnghal mawlh mawlh bawk.

Khumah ka phone ka thehthlaa, ka khup sai dar dar vangin ka thu ta ngawt. Ka rilru hria se chuan lawmthu min hrilh lo chiang khawp ang.  Che loin ka thu vang vanga, ka ngaihtuahna a buai deuh nuai a ni ber. Arti nen an inhmuh ka ring chiah lo chungin hlauhthawnna ka nei lo thei lo. Soso-i hmu se chuan a fa anih zia a hai lo ang tih lah ka chiang reng mai bawk si. Huizz, a sawi ang ngei khan lo zin satliah ni mawl tehse.

Nilengin awm nuamin ka awm thei lo. Client an awm reng si avangin ka mood thunun angaia, mahse ka insum zo lo teuh thei viau.B-i lah an monu inentir a kalpui vangin a lo kal bawk si lo. Thianhlui lo zintur nisiin ka hahpui hluah hluah mai chu ania.

Dar 4 velah dawr ka chhuahsana, Rinzuali te in lam ka pan ding nghala. Ka thlenin kan thiante an lo awm thap tawh. Kan kalchhan pawh hrechang mah loin kan ri leh dar dara, a hlimawm viau.Mahse, min kaptu a awm tlat avangin ka chhungril atangin ka nui hleithei der lo.

‘I nuam lo em?” B-in min ti ta chat renga.

‘Nuam chiah lo,tlemin ka lu a naa. Mahse, ka zia mai ang’ nui chungin ka ti a.

‘Um,I nawmloh hmel reuh tawpa. Tarmit i vuah thatchhe ve em a ni.Damdawi ei la’ a tihzawma.

‘Ka ei alawm..Engtin nge u Mary chu?” ka ti ve a. Kan inhmuhtirh lama zawh awm tak anih laiin kan thian dangte titi chul nen ka lo manghilh peka.

‘A chhulah bawk a awma. Mahse, a hlauhawm loh an ti’ a ti liam puat.

Haw lamah erawh thiltih kawi tur ka neih thu sawiin B-i nen kan hawrual lo. Ding takin Sebastian-a awmna Hotel lam ka pana, Zorema hnenah pawh chhungkaw thilah ka buai dawn tih ka hrilh lawk thlap bawk. Dawt hrilh kher a tul hauh lo nangin engtin nge Sebastian-a chungchang ka sawi ang ka hre tlat lo. Sebastian-a chungchang ka sawi rualin Soso-i chungchang ka sawi tel angai ang tih ka hlau em atin ni.

Kan han inhmu chu reitak inhmu tawh lo kan ni bawka kan ri ve hlut mai. Tlemin a lo lang thau ve deuh tawha, mahse a hmeltha leh ngainatawm tak erawh ala pangngai thlap thung.

 ‘Ni 3 hun ka neia. A theih anga tam tlawh kual ka duha, hun i neih loh pawhin Driver emaw min Guide tu tur tha deuh min pe la’ nui chungin a ti a.

‘Ok..Ka dawrah ilo kal hmasa phawt anga.Dinner party pawh kan nei anga. Ka best ka hmelhriattir hmasa ang che.Chuan,Mizoramah i lo kal vang vanga, midang Guide tu tur che pek angai lo. Keiman i duhna apiangah ka hruai ang che’ nui chungin ka ti ve a.

Ka haw tur min thlah thlaa, Lobby kan awm laiin ka Phone a rawn ri a. Zorema a lo ni a, pick mai loin ka hawikual hmasa te te a. Mahse, kan bul hnaiah hmuh tur a awm lo.

‘Hello’

‘I buai em?” a rawn ti dam thluam.

‘Aih, buai lo e. I haw tawh mi?” ka ti let ve zat.

‘Um, haw meka..Inah ami i awm?” a rawn ti leha.

‘Aih, ka thian pakhat ka hmu kual leh lawka..’

‘Ok..I haw hunah lo sawi la’ a ti tha ve mai.

Soso-i mut hnuah ka nu leh ka u hnenah Sebastian-a lo kal thu ka hrilha, ka nu mengphar nghal awn awn mai chuan kei ang bawkin a hlauthawng ve tih a tilang  nghal vek. ‘Hlauthawng chiam lo phawt ru. Fanu a nei tih hresaa lo kal pawh anih loh chu. Bakah,a lo hmu ta anih pawhin tlanchhiat kual vel tul ka ti lo. Anih nih nirawhse.Bawihtei hian nakinah zawhna ala nei dawn tho tho a. A lo hriat hma chu a tha zawk mah ang. I paltlang tawh hautak zia kha a hria anih phawt chuan kan inchuh chiam pawh ka ring lo ania. Hnampui zawk te hi an zau em em zawk’ ka u in a ti a. Ka chhang lo,mahse ka hlauhthawnna a tizual ting mai thung.

Ka mu mengkara, ka rilruah engmah alang tak tak thei lo. 

Zorema pawh msgin ka chauhthu ka hrilha, ka mangtha nghal daiha.Mahse, ka muhil mang lo tluk a ni. Sebastian-a lakah Soso-i thupbo dan tur ka ngaihtuaha, huan lamah ka nu nen zuk riak mai se a tha ang..Mahse, ka u sawi kha ka ngaihtuaha. A dikna chen a awm tlat. Nakinah Soso-i hian min la zawt ngei ngei dawna,tunah hian hrilh ila a tha zawk tak tak angem?

Mit thial urhin ka harha, sana ka en a. Dar 8 a lo hnai tawh.Rang zetin ka tho nghala,Soso-i an rawn lam a hun tep tawh avangin muangchanga chetna hun a awm tawh lo.

Ka nuin chaw a lo eitir meka, min hmuh veleh nui seng chungin min rawn en a, ka pan hnaia,a biangah ka fawpa. A sam kir chiat leh buang thang maiah chuan ka hmai ka phum vang vanga,ka mittui a hnai em em bawk.

‘Nizan chu ka ngaihtuah nasaa, Sebastian-a hnenah engkim hrilh mai thain ka hre ta a’ chaw kan ei laiin ka nuin a ti ban chat. Ka chaw thial laklawh lai ka tawp chawta, ka thu mar nghal auh bawk.

‘Nia, keipawh ka ngaihdan ania. Bawihtei pawh hian hre ve ta bawk sela.Mahse, ka nawrlui lo che ania aw’ min rawn en pahin dam takin a ti ve leha.Sawi mai tur ka hre tlat lo.Nizanah tlaivar deuhthaw khawpin ka ngaihtuah tawha,mahse engmah tha zawk leh  ‘heti zawk hian’ han tih tur ka la hre ta chuang miah lo.

‘A pa tunge tih ala zawt dawn che a, chhanna i nei dawn miah lova. Bakah,ka sawi ang khan amah hian hmuh tum hun ala nei dawn ania.A puitlin hnuah chuan i dang thei lo ang’ ka nuin a ti leh charh charha,an sawi dik ve ve a, kei ngei pawhin chutiang ngaihdan chu ka nei ve tho.Mahse, min chuh ta tlat se engtin nge niang?

‘Min chuh ta tlat se engtin nge niang?” ka aw a khur titiha.

‘Chulam chu ngaihtuah rih lo phawt rawh.Court lamah nu nihna i nei vek tawha.Nizana ka sawi ang khan engvanga nangin enkawl nge inih a hriat hun chuan a chhuhlui chein ka ring lo tlat nia. Ka thianpa ukil pakhat ka zawta, engkim fa atana lakna kha a fel thlap chuan apa pawh nise chance a nei vak lo a ti a. Aaaa, kan inchuh lo ang. Bawihtei hian a chhun anih ngat phei chuan pa tha tak a ni ang.Amah ka hmuh hma hauhin ka hahdam tlat’ ka uin a ti leh duaha. Thudik tak sawi mah se ka ngei ru deuh ta tlat peka.Mahse, ka tilang lo thung.

‘Ka lo ngaihtuah ang.Vawiinah kan inhmu dawna’ alangah chuan ka ti ta nge nge.

B-i ka calla,Sebastian-a lo kal thu ka hrilha..’ Soso-i pa kha a ni lovang tiraw?” engdangmah sawi loin a rawn ti nghal chat.

‘Vanduaithlak takin ni tlat pek e..’ ka ti zuai raih.

‘Ooooo,engtin nge kan tih anga?” a rawn ti nghal a. Ka best a ni satliah lo a, ka mangang dawn tih a rawn hrethiam nghal vek pawh amak lo.

‘A fanu neih a hre lova. Hun a neih vanga Mizoram rawn tlawh mai anih hmela. Enteh, vawiin pawh Dawr kal loin chhuahpui ila ka lo tia..Latei a awm tho a’ ka ti leh hap.

‘Ok,khawiah nge kal a duha?”

‘Duhna bik pawh a awm lo. Idea a nei lo hrim hrim zawka.Hmuifang velah va kal ila,duh leh Sialsuk thleng ila..’ ka ti a.

‘Yes,a tha alawm.Chhuah thawven ka lo chak hrim hrim a’ a rawn ti nghal var.

Latei ka calla, Dawr ka kal dawn lo tih ka hrilha. Client lo kal an awm pawha lo buaipui turin ka ring tawk tih ka hrilh a,a rintlak em em a.Ni hnih khat lek awm loh san chu pawi turah ka ngai lo.

Zorema ka ngaihtuaha, Sebastian-a chungchang ka hrilh a tha angem? Zinga min rawn wish bak kan la inbe leh miah lo a. Msg-in ka buai dawn thu hrilh ka tum zeta, mahse ka call ta zawk.

‘Hello’ a rawn ti a.

‘I kal tawh em?”

‘Aih,ka insiam mek..Min ngai tihna mi?” ring vak loin a nui zui a. Ka then ve nghal sak mai.

‘Ngai dawn lo che mi? ‘ ka ti let sap.

‘Yeap,min ngai ang..Keipawn ka ngai che chu anih hi.Nihnih hi a lo rei khawp ania’ a rawn ti leha. Ni hnih kan inhmu tawh lo tih ka ngaihtuahnaah a lo lang nghal zat.

‘Nia..Ka buai ve deuh thina,enteh..Ka thian pakhat a lo zin a.Vawiin pawh chhuahpui angai dawna’ ka ti a.

‘Ok,a tha alawm.Min hmelhriattir ve la’

‘Tehreng mai..Ka dah phawt aw..’ ka tihzawm zat.

Ka Cousin Atea ka sawma, ani hi kar hmasa lawka Delhi atanga lo haw a ni a. Kan kum a inrual a, kan cousin hoah chuan kan inkawmngeih fal nalh bawk.

B-i kan inah a lo pheia, kan pathumin Sebastian-a thlenna Hotelah kan kala,a lo inpeih thlap tawh. Atea leh B-i ka hmelhriattira, Atea hmela zawhna lang chu ka hmu lo der hmiah rih.Nakinah ka la hrilhfiah mai ang chu.

‘Enteh,sawlaia mi saw Zach-a a va ang ve’ B-in zawitein ka beng bulah a rawn ti a. A enna lam rang lutukin ka en phei nghal vata. Ka thaw nghal hak mai. Amah ngei a ni..kan inbiak khan helaiah hian a kal dawn tih a sawi miah si lo..

Ka hawisawna,B-i en loin kan thlanga Sebastian-a leh Atea inbe mawlh mawlh lam ka en a.

‘Anih hmel hle mai’ chhan loh aiah ka ti nghauh ringawt.

‘Eee,enteh..Hriati pawh a awm anih saw.Awi, an inkawp tawh lo emaw ka tia’ a ti leha. Muangchangin ka hawi phei leha.

Kan awmna lam panin an rawn pheia, inti tatu takin a banah Hriati’n a kuah bawk.

NOTE : (COMPLETE A LO DAH TUM KA NIA, MAHSE A TAWP BUNG DAWN RIAU MAIA. KA DAH KHAT TIH KA HRIAA, TUNAH PAWH HIAN ‘ KEI CHU A TAWPAH LAW LAW KA CHHIAR ANG’ EMAW ‘AVA TAWI TAK,I DAH KHAT TEHRENG NEN’ TIH EMAW, ‘A NEXT A AWM HAR LEH DAWN SIA’ TIH LAM HAWIA COMMENT TAM TAK A AWM LEH NGEI DAWN TIH KA HRIAA, DAH RIH LOH MAI TUR EMAWNI KA TI A. IN SAWI TUR LAH DAWT A NI DAWN BAWK SI LO..MAHSE,INZAHAWM EM EM MAI SI A. MI KHAWL HAWHCHAWPIN, A THEIH ANG ANGIN KA RAWN ZIAKA. CHAPTER KHAT CHAUH NI MAH SE A TAWI LEM LO KHAWP MAI. NIDANG ANG CHU NISE CHAPTER 3 A DAIH THUAKIN KA RING..ENGPAWHNISE,KA HMANGAIH VEK CHE U AW💜💜💜💜💜