THIL PAHNIH - 2

 

                             Chapter - 2

" I u awmdan hi amak tlat tawh. Ethan-a boral vang emaw ka tia,ni pawhin ka hre tawh lo. A nupui hian a zir lo ni hian ka hre tawh" ka nu aw in a tih ri ka hre nghala,min ṭhawng deuh dawt mai. Ani zuin chu keia thiam loh eng nge anihna?

"Chutiangin tingawt suh. Atea pawhin zute chu a in tho a.Ka thiam loh tiin ka nute sawn sawi se i duh teuh lo mai" Zodini awin dam thlapin a ti a. Zodini ṭawngkamah chuan min demna lam reng reng alang lo a,ka nu vanga ka thinrim ru ṭeuh pawh ka zia nghal huai mai.

" Atea leh i u an inang lo.Nangin i pasal i care angin kan Tebawihi hian a care ve lo. A lo haw tlai ziah pawh hi engahmah angai lo aniang" ka nu bawkin a ti leh hmawk hmawka. Hriat nuam lo turin ṭawngkam nei fek fek ṭhin mah se tiang tak hian min lo hmu mawh tih ka hre ngai lo. Min ngaihdan lah a mak, engvangin nge maw ka pasal mize danglam leh lo haw tlai fo chu ka ngaimawh loh tehlul ang le???

Zodini'n ka nu a khak hlak hlak ri ka hre zui a.An sawi zawm leh tur hre duh loin inhnuai lamah ka chhuk thla ta daih..Roomah ka lut a,Balcony lian vak lo  lamah ka chhuak phei a,railling bawhin ka dinga.Ka thlang deuh kawnga motor leh mihring kal vel chu ngaihtuah mumal pawh nei loin ka thlir a,vawiin khan ka hlim ve tehreng nen tunah chuan a hma ang bawk khan ka ipik a,ka ngaihtuahna pawh a tawi leh tup tawh.

Rei angreng tak ka din hnuah ka zia ta deuh a,ka ngaihtuahna so deuh bulh pawh kha azia ṭana. Ka nu min ngaihdan maksak em em mai kha fim zawkin ka ngaihtuah let thei ta a. 

Kei emaw hmeichhia tumah hian pasal kan neih hian MO SUAL nih hi kan tum ka ring lo.Mahse,midang chhungkua va zawm kan ni a,la Cheng ho ngai reng reng lo cheng ho tihtakah Insiamrem nan kum dawn chu kan mamawh vek. Tin,Chiang taka ka hriat bawk chu kan duh emaw duh lo emaw Automatic hian Mo sual a lo nih tawp theih.

Ka ṭhiante hian ka vanneihzia an sawi fo ṭhina.Ni e,midang ai chuan ka vannei. Pasal mi pangngai tak ka nei a,inchhungah nise a hranpa taka inhauh buai kan nei ngai lo a. Vannei tak chu ka ni ang.Mahse, pasal neih leh mo nih hi a nuam lem lo. Pasalte inchhung leh pasal chhungte rilru taka pawm loh vanga hrehawm ngawih ngawih ni loin mahni seilenna inchhung zawk hi a lo nuama, a ngaihawm ber alo ni zawk.

Sana ka en a,Dar 10 a kawk va tawha.Mahse,Zampuia a lo la haw lo fo. Ka msg thawn engmah a seen lo a,call a pick hek lo. Zingah khan a buai dawn tih a sawi ngeia,Mahse tun ang hun thleng thlenga buaina tur hna a awm ka ring lo. Sawrkar hnathawk ve tho ka nih angin office kan buai zual lai chu ka hre ve a, Department hran hran hi kan buai lai inang vek lo mah se atlangpuiin Finacial year tawp dawnah kan buai veka.Zan lam thlenga thawh tur kan neih chang pawh a awm.

Ka rilruah hlauhthawnna a lo luta,rui chungin a rawn inkhalh haw anga,a accident aniang... Ngaihtuahna mumal lo nuaiin ka call nghala,a ring tawp hman dawn emaw ka tih hnuah a rawn pick ta hram. Mahse,amah ni loin hmeichhe aw hian min rawn chhang thung.

" Tebawih, Sir hi toilet a hmang lawka" zangkhai vahin a rawn ti a. A aw aṭangin Zampuia te Office a LDC, Ruth-i a ni tih ka hre thei a. Nula upa lam, zangkhai leh thar sar reng chi, nu lian lo leh ngo paw phak mai,ngainatawm zet mai a ni a. Keipawh hian Zampuia thawhpuite zingah chuan ka nel ber pawl a ni a.Mahse,tun ang huna a niin phone a lo pick daih erawh thil pangngai a ni lo.

" Sir Zuala te accident naah khan kan la awma" engmah ka sawi ve hmain amah bawkin a rawn ti leh a. Ka thaw nghal hak mai. A rawn sawi danah chuan Zampuia'n engkim min hrilh sa angah angai tih ka hre theia. Mahse,engmah min hrilh der si lo.

"Aw,anih chu mawle..Eng nge Zuala te chu an an ?" pangngai takin ka ti a. Engmah min hrilh lo tih a hriat a tulna a awm lo. Zuala hi Zampuia nen Transport Deptah hian an lut ruala,Mahse,Zampuia hian a kaisan khalh ta thung.

"An tha animai. An nu zawk hi a na deuha. Mahse, ani pawh ngaihtuahawm a ni lo ang. Damdawiin an thlenpui hma bawka,an ngaihtuahawm lo ang.Keini hi chu Motor zawk hi an hnuk law law a,hei hian min ti rei ta deuh anih hi" a rawn ti leh mawlh mawlh a. 

"Aw le,in lo thleng ve mai ang. In rilṭam tawh em?" ka ti leha.

"Ṭam lutuk lo e, hmawmsawm eng eng maw kan ei a..E, hei Sir chu a lo kal e" a tih zawm leh a. Zampuia hnenah phone pek paha tu nge ka nih a hrilh nghal chu ka hre thei a. 

"Hello.."Bung angreng fein a rawn ti a.

"I rawn haw dawn tawh em tih ka hre duh mawle" no vak loin ka ti let ve a. Thinrim vanga ṭawng bung hmuk pawh ni loin,ka ṭawngkam hi a no hlei hlei lo ve hrim hrim.

"Dawn ṭep ang.Min lo nghak duh suh" satliah ang reng takin a rawn ti leh a, a bula awm ten an lo biakna achhang zawm nghal mawlh mawlha.An buai hmel bawk si nen biak rei chi niin ka hre lo.

"Inbuai hmel em mai,ka dah ania" 

Min chhang loin a off nghal a. Ka phone ka beng bul aṭangin ka la thlaa, ka pawi a sawi emaw tih mai turin ka melh vak ringawt. Nupui nive si,eng mah ṭha taka inhrilh awm ta mang lo hi engtia han tihchi nge maw ni??

Ka lu ka thing nawka,inngaihtuah lunghnur vak ai chuan hahdam tum rih phawt ka duh. Vawiin ka nu ṭawngkam ka hriat leh Zampuia khawsak dan vang hian ka ngaihtuahna a hah lutuk.Chuvangin ngaihtuah loh rih ka mamawh. Duh leh a lo haw hunah ka sawipui anga,ka thiam loh a lo ni reng em tih pawh ṭha takin ka sawipui zawk ang.

Khumah Laptop nen ka inchhawpa,Movie ka en a. Min nghak duh suh a ti nangin chaw ala ei bawk si lo nen nghak lova mutsan chi niin ka hre lo. Dar 8 velah ruah a rawn sur chiam avangin a vawt deuh vura.A inbual duh ngei dawn tih hriain Geyser ka on sa a. Ka mut ala chhuak lem lo bawka, Movie an release hlim hlawta en tura ka dah,ka en tak loh en tumin ka insiamrem a. Atir lamah ka ngainat chi a ni dawn lo emaw ka tia,Mahse achanve vel ka en hnuah erawh ka ṭang ṭung tawh mai.

Dar 12 rik dawnah a Motor thawm ka hriaa,ka Movie en lai ka en zo hman ve chiah bawka. 

Zan dang ang bawkin zu rim a rawn nam haw leha,mahse rui chhia erawh a ni lo.

" I inbual chhungin chawhmeh ka lo ti lum anga,tui lum kha On sain ka dah ania" ka ti a. Eng mah min hrilh loh vanga ka lungawi loh em em na ka thup hram hram a. Awlsam tak erawh a ni lo. 

A thawmhnaw kalsan ka lakanga, a kekawrah chirh a kai a nuala, a pheikhawk pawh tihfai hurphurhawm tak a ni. Bathroomah a luh nghal avangin a thawmhnaw leh a kekawr inhnuai lamah ka keng thlaa,chiah hmasa ila,zingah tihfai a awlsam ang.

Ka chevel thawmah Sangnoi a rawn tho a,mahse buaina tur vak a awm lo a, mu turin ka ti a.Chaw ei min siampui a,min siampui zawhah ka mu turin ka ti leha, zingah a thawh tlai vaih chuan a thei theiin awmdan an hrilh leh nek dawn a,chuvangin zan lamah hi chuan ṭul tawpah lo chuan tibuai lo hian  mu hma se ka duh ṭhin.

"Zuala te chu eng nge an chanchin?" chaw a ei laiin ka ti a. A lo haw tirh aṭang khan min la be mumal lo.

"An ṭha.." a ti mawl tehtawp. Rilruah lungawilohna lo khawlkhawm ve ṭun bawk si nen ka sa nghal phat mai. Mahse, tun ang zan rei tawh leh helai Chokaah hian inhauh hun leh hmun a ni lo tih ka inngaihtuahfim leh vat.

"Anih chu..An nat viau loh chuan a lawmawm" awki pangngai takin ka ti ta zawk. Awki sang deuh emaw bung tak hmang ila chuan kan inhau zui nghal dawn tih a hmel thutak em emah chuan alang renga. Lungawi lo zawk tur ka nih laia a tum bur mai chuan minti hrilhhai em em bawk.

Ngawirengin a ei zawm mawlh mawlha, ka biakna bak kha eng mah sawi zawm tumna nei hmel a pu lova, zawh nawn sek lah ka tum bik ṭhak lo. A ei kham veleh room lam a pan nghala,a eina vel ka sengfel hnuah ka silfai leh veka. Room ka han luh ve chuan a lo muhil fel der tawh. Khum kil lamah amah si loin ka mu fel at a,ring vak lova a hnar ri ka ngaithlaa, ka mut a chhuak eih lo.

Lu na deuh burin ka tho chhuaka,khawvar dawn lamah ka muhil chauh kha ania. Ka mut tlem lutuk vanga awm nuam lo ka ni tih ka hai lem lo. 

Rin loh takin ka nu a lo tho tawha,awki sang leh vin angreng taka Sangnoi a lo hau bawng bawng ri chu Choka ka luh hma phatin ka hre theia. A aw ka hriat rualin nimin tlaia ka chungchang a sawi dan kha ka hre chhuak leha,ka thinrim thar leha.Mahse, eng nge ka sawi chuan ang? Ka pasal lakah ka vui thei tawh lo tluk a ni a. Thildang duhawm lo zawk a lo thleng leh anih pawhin ka tuar ngar ngar mai dawn tihna nimai. Mi chu pasalte inah an awm rei ang zelin an tlangnel a ni ngaia,kei ve chu ka awmrei poh leh ka bet lo ve thunga. 

"Nizan kha Mama a lo va haw har ve, eng tizia nge?" min hmuh veleh a lo ti nghala. Zan dangah pawh a lo haw hma ngai lo nangin nizan kha chu atlai uchuak ve em a,min zawt pawh a mak lem lo.

"Zualate nupa an chesual a ni awm e.Chu chu an buaipuia, an mahni Damdawiin lama an kalpui hnuah an Motor kha an lachhuak lehnghala" ka ti a. Thingpui bel ka ban nghala,siam zawhna la rei lo tih hriat takin a lo la sa vara.Chhuang tawh lem loin ka insiam zuia.

"I in tawh nge? Ka siam kep dawn che em?" ka nu en pahin ka tih zawm leh a.

"Ka in tawh, Zuala te chu engtia accident nge an nih a?" a ti leha. Zuala hi kan inah a rawn chuangkai fova,kan chhungkaw tan mithar a ni lem lo.

"Ka hre chiang bik lo.Nizan khan a chau sia,ka zawt chik viau duh ta lo a" ka ti leha. A tlak karha,Hetianga a tih hi chuan tawngkam hriat nuam vak lo a chhakchhuak duh viau.

"Chungte mai mai chu han zawh ve bawk awm che..Thil danga inbe lo pawh inni si lova,I dangdai thei..Sangno,I u Tebawihi hi chu a style a dang ania" a nui zuia. Ka rinlawk ang ngeiin mi khei deuh,huat hleihtheih si lohin a ṭawng ta chiah. Haw viau dawn ila,Rilru te nih bak ka hlawh dawn der der lo tih lah ka hming ka hriatchian tlukin ka hre chiang.

"Nizan kha chuan u Mama kha a mood a uih hmel e. Biak a huphurhawm ngawt ang" ka rin loh deuhin Sangnoi'n a rawn ti khauh mai. 

"Hmm,i hmu em ni?' Ngaihdan ni lo aw ka nu awah a hriat theiha,Sangnoi hi a beng buang leh thil hre rei thei lo zet mai a ni a. Kei ngei pawh hian hauh chang ka ngah lutuk,mahse tun ṭum erawh chu ka nu a chhan danah lawm tak ka ni.

"Hmu e,hmu lo ila ka sawi nang" ngaihsam leh duhdah angreng tak maiin a ti liam leh puata. Ka nu ngaihdan ni lo lutuk hmel chu ka en a,ka nui chhuak ang tih hlauin lehlam ka hawi vata. Ka bul chiaha ding U Thari ka en a,nuihza insum hmel lutuk ka va hmu nghala,nui ngam si loin ka ding khur dar dar mai.

Room ka luh rualin Zampuia thinrim hmel ka hmachhawn nghal a, zawn nei tih hriat takin balbawm a lo hai let phung mai.

"Zawn i nei ami?" ka ti nghala.

"Khawiah nge nizana ka thawmhnaw hak?" bung em emin a ti hmuk.

"Suk turin inhnuai lamah ka chiaha,tinge?"

"Ipte i check em? Ka kekawr ipteah khan lehkha pawimawh a awm" a ti leh hluk. 

Ka ngaihtuah leta,nizan khan ka chiah hmain ka check veka,eng mah chutiang a awm lo.

"Check vek,eng mah ah i nei lo" 

"Ka nei,nei lo ila ka sawi dawn mi?" a ti vin leh vaka. Kan indin hnaih hle nangin a vin vak mai chuan minti phu nasa viau tho.

"Ka check veka,ka hmu si hleinem. Vin vak pawh angai hleinem mawle" ka ti ve hmak.

Min chhan tumin a ang zuaua.Mahse,a lu a thing nawka,kawngkhar lam a pana,a hawnga,na zetin a rawn nem khar bura,Kawngkhara Tawngtaina thu inziak,a khaina neia siam ka khai chu a tla chiang viau.

Ngaihtuahna buai nuain inhnuai lamah ka chhuk thla ve a,Insukna room lama ka nu ṭawng ri lawng lawng ka hre thei nghala,ka pan pheia.Julie leh U Thari mak ti hmel pawh chu ka melh zawk chauh.

"Insuk dawna eng mah check nachang hre reng reng lo mai,Sangnoi nen hian an inang reng mai. Nep leh lutuk" ka nuin Zampuia bulah a lo ti meka. Zampuia erawhin eng mah a sawi lo.

"Hei eng nge?" a kuta a thil ken ka lama rawn lek hnai pahin a ti a. Paper var zawr chhe vek hi a kenga,a hmel tur ngun maiah chuan pawisak nei lo hmelbak a lang lo.

"Lehkha maw?"  sawi mai tur hre loin ka tichuai raih ringawt.Nizan khan ka check ngei tih ka chiang em em a,eng mah a ak lo tih pawh ka chiang.Mahse,tunah Lehkha a lo awm leh tlat si!!!

"Anih hi,engtin nge i hmuh loh theih? A awm lo ti khan ila a ṭang na em em zui bawka, hei i hmu a,a chhe veka, i lawm tawh em? " ngeiawm tawpkhawkin minti leha..

Lai em emin tihmai tur hre loin ka ding a. Kan nupa kar a ṭha lo a,mahse tun hi midang awm laia ṭawngkam mawi lo taka min tihna hmasa ber a ni a. Ka zak a,ka na a, ka inkhawngaih em em bawk...

PS: Phone aṭangin ka type a,a hawrawp leng zat a lo tam viau lo tlat mai.Tin, chapter 3 hi ka dah hun tur ka sawi lawk thei lo a,a remchan veleh ka rawn dah ang aw.