THIL PAHNIH - 3

                               

Chapter -3

"Vak vak ache, eng thil nge ni?" ka nuin a ti a. Zampuia a en a,ani lah chuan chhan tum awm pawha awm loin a thil ken zawr hnuang mai chu a en reng ringawt.

"Lehkha pawimawh atia..Nizanah thawmhnaw kha ka chiah hmain ka check vek a.Engtin nge tunah tikhan a lo awm theih ka hre bik lo" ka ti chuai raih. 

"Eng lekha nge? Khawi maw,nuai hman loh chuan lehkha huh ringawtte chu tihdan a awm ang" tih pahin Zampuia thil ken lai ava bana, dim fein a la a,a kalsawn puia. Milim ang maiin che loin ka ding tlawn at ringawt.

Tim leh inthlahrung ru em emin Zampuia kalsawn chu ka zuia, Choka lamah ka zui pheia. Ka nuin Gas a inchhuang mek bel chhin chunga lehkha tihro tuma a lo buaipui lai ka va hmu nghal,a bulah Julie a dinga, eng emaw a lo sawi meka,a ṭawng ring lem lo bawka,a sawi erawh ka hre thei lo. Kan lut thawm hriain a ṭawng lai a tawp nghal daih bawk.

"Hei chu Bimbim-a thil ziah mai mai anih hi" ka nuin ring angreng takin a ti a. A thil ken lai chu phawk zetin ka va en hnai vata,a sawi ang ngeiin naupang milem ziah,fiah vak lova pencila a thai rang hi a lo ni a. Ka thaw nghal huai mai.

"Eng nge a awmzia? Bucketah tinge alo awm theih si a?!" Zampuia'n a ti hu. Kei erawh rilru chapo takin ka dak deuh vaha,ka dak mah mah angem tih zawk hial tur a ni.

"Ka hre bik nang mawle. Awmze nei hlei loah Tebawihi i puh ngawta, ka check ti na na na" a ti leh hlawk hlawka. Mak takin hetianga ka thlavang hauh khut ṭum hi a nei leh zauh ṭhin.

Ngawirengin Zampuia roomah a chho a,kei erawh chho ve loin a thawmhnaw suk tur ka chiah ka su a. Tun maia thilthleng khan min ti thinrim thar leha,a thawmhnaw ka suk lai na fein ka brush tawk tawka.Tihtheih tawk a tlem teh nangin ka thawl phah ve hawk tho mai.

Office kal tura a chhuah dawnin ka la insiam meka, min be lova,ka be bik hek lo. Kan Office kalna hi a inpersan deuh bawka kan kal rual khat angrenga,ka tlan lohni anih erawh chuan min drop ziaha, a tlan lohni anih erawh chuan Bike a neih tho avangin a keng ṭhin thung.

"Eng nge i an zel? I mu ṭha thei em?" Office a room khata ka ṭhutpui, Tete-in min hmuh veleh a lo ti sawk sawka. A pa damlo entirin phai lamah an kala,kar 2 zet a chawla,vawiin hi a lo kal lehna hmasaber a ni a. Kum eng emaw zat lo ṭhu dun tawh kan ni bawka,kan inpawh em em a,kawm pawh kan inkawmngeih.

"Ka ṭha lutuk, eng nge in an zawk?" ka ti let ve a.

"Kan ṭha e, damlo pangchang satliah mai mai kan ni tawh" nui var var chungin a ti a. 

"A lawmawm nasat chu,remchan veleh ka rawn tlawh ang" ka ti let ve a.

"Tete,ilo haw tawh law? Eng nge min rawn hawna?" Nu Thangi'n rawn luh pahin a rawn ti lung lunga. A chhan hmain Tetei'n min rawn melha,ngaihtuahna inhriatsak em emin kan innuiha..

"Ka lo hawn ṭeuh che,mahse i thil min chah ho kha chu a awm lo a" a ti a. 

An zin dawn tih a hriat khan eng eng emaw a chah ṭeuha,a mizia hre chiang tawh kan ni bawka. Tetei pawh khan a 'aw' liam vel mai mai. Amah hi kan senior niin, nu lian leh invawng tak mai a ni a. A pasal leh a fapa hi zu lamah an buaia,a fanu pawh Damdawi hmansual vangin a boral tawh bawka. A fapa fa mipa naupang a enkawla, a mizia hi hriatthiam ngai tak,ngaihdam zel loh phei chuan awmpui harsa angreng tak mai a ni a. Mi thil a duh em em maia,tupawh zin dawn se thil a chah ṭeuh zela, mi hauh mai mai a chinga,office dawrtu te lo vin tak chiam ṭum lah a ngah. Kan pu pawhin a kamkhat fo a,a hauh hlimchhawnah a zia anga,rei phei chu a ni ngai lem lo. Midang chanchin sawi a peih em em a, hriat lah a hre thei ngiang mai bawk.

"Hello...mak ṭhin vung vung tak" ka hmai bula a kut rawn hmeh rik khauh pahin Tetei'n a rawn ti a. Ka phu deuh zawka, ani lah za zetin a nui zui hak hak mai.

"Kha, Nu Thangi rawn let hmain la vat rawh,i bagah khan dah la" a ti leha. Ka dawhkanah box lian vak lo a rawh daha,rang fein ka laa,ka bagah ka thun nghal vat.

Hnaah kan buai zui a, mahse hna awl hun lai anih avangin chawhnu lamah chuan kan awl leh ta viau tho. Kan titi a, kan Room a mipa awmchhun Pa Dika titi kotlangah kan dak ṭhap. 

"Tebawih,i nu thil min chah hi hawn mai ta che,a buaithlak angem?" ka nu Cousin-in a rawn ti a. Office khatah kan thawk ho a,mahse amah hi kan pi niin nikum aṭangin kan awmnaah a rawn insawn ve chiah thung. Pi ber erawh a ni lo thung.

"Pawi hleinem,i lo keng nghal mi?" 

"Aih,haw dawnah nimai rawhse.Mama'n min rawn hruai pahin a rawn keng dawna" a ti leha.

"Um,mahse ka haihawt sia,min remind leh la" nui chungin ka ti a. 

"Nia..Ah,tunlai mi ho hi inhaihawt em em vek maia,kan kum zat ang inkum ve hunah phei chuan inhming pawh inhre tawh lo ang" nui chungin a ti a. Kan vaiin kan nui dar dar mai.

In ka thlen veleh ka nu hnenah ka thil hawnsak ka pe a."Eng nge a?" a ti hu a.

"Nu Partei min thawn ania" ka ti a.

"Eh,a rawn thawn dawn che tih pawh a sawi hleinem. Han sawi ve bawk awm.Sangtea i pain a tira,chumi paha lam turin ka lo ti hman a" lungawi lo hmel takin a ti nghauh.

"A hrilhlawk che emaw ka tia.." ka ti satliah. Julie a rawn lut a." Nu,Sangtea chu min rawn call a,tunah a kal nghal dawn sin " a rawn ti a. 

"Angai lo,hei a rawn thawn tawh" a ti hmuk.Chhun lamah a mood an lo tihchhiatsak a ni chek ang. Sangnoi thingpui no kengin a rawn lut a.

"U Te, api thingpui ka siamsaka,i in ve duh  em?" ati nghala.

"Aih,duh lo mai..Ka han inthlak ange" 

Inchung lam pan tumin step lamah ka kal pheia.."Hei hi mi? Ka hawng nghal dawn,ka enchak lutuk" Julie-in atih ri leh ka nuin zawi sapa a khap ri chu ka hre theia. Ka nu thil tur ni loin Julie ta tur zawk a ni ngei ang.

Engpawh leisak se ka thik ngai lo,hnathawka chhuak leh hlawh nei zawk ka ni a,chhunah in nghakin engkim a buaipuia,ka duhsak theihna laiah chuan ka theihtawp ka chhuak ve a,bag leh thawmhnaw thlengin ka leisak ve tho a.Ka ui ngai lo,ngaih loh lamah angaih ka hlauh avangin hun pawimawh bikte ka nghaka,anih loh pawhin ka lei rualin ka leisaka,"a tha reuh em a,kan 2 ta tur ka rawn lei' ka ti mai zela.Ka thik ngai loh zia a hre chiang a,ka hre lo ati anih chuan a hre lo der tal ang. Rilru chhia ka put miah loh laia hetianga a ruk arala thil an han ti vel hi a vawikhatna mai a ni tawh lova,ka hre lo der mai mai ṭhin nangin tun ṭum erawh ka chhungril hawlh zawng a ni tlat.

Ka kal lai ka tawp thuta,"Chahbi ka phawi theihnghilh" tih pahin ka inher nghal,Julie-in rang fahrana a thil ken a thukru lai chu ka hmu hman tho.Mahse,hmu lo leh ngaipawimawh lo niawm takin kawngkhar lam ka pan ding nghala. Scooty bulah ka va dinga,minute pawh tling mang loah ka let lehnghala, mahse ka nu amah chauhin a lo ṭhu tawh.

Ka inthlaka,inthlak pahin eng eng emaw ka ngaihtuah kuala,mo neih leh mo nih hi a nawm loh dan a inang maithei. Julie thil a tihsak fo avanga inthlahrung emaw, ka inhriat miah lohin ka thik anga an ngaih theih turin keipawh ka lo awm ve tlat thei.Chuvangin ka nu dem viau ngawt tur ka ni lo tih ka ngaihtuaha,tlem chuan ka thinrim pawh a reh leh ta deuh.

Tlai chawei hmain chhung inkhawm hi kan nei ziaha,kan vaiin kan inhman chhawk ṭhina. A tlangpuiin Bible kan chhiar bakah kan ṭawngtaia,a tawpna Lal biakna kan sawi rual leh ṭhin a. Ka nu leh ka pa hi chuan thu tlem an sawi tel ṭhina.Ka pa aiin ka nuin sawi tur a ngah ṭhin tlangpui.

"Mama hi a rawn tlai leh dawn em ni?" Bible a chhiar lai hawisan chuang loin ka nuin a ti a. 

"Aw, Zuala teinah chaw a ei dawna" ka ti a. Vawiin tlai chu mak takin Zampuia'n Zuala te in lamah chaw an ei dawn thu leh a tlai deuh dawn thu msgin min rawn hrilh ve tlat. Kan boruak ṭhat loh viau hnuah hetianga a awmdan tur a rawn sawi vawi khatna a ni hial ang.

"Eirawngbawl hmain chungte chu sawi tur alawm mawle" a ti leh hmuk.

"Ka rawn haw hnu khan a rawn sawi ve chiaha.."

"Nikhua lo leh lutuk mai" ka sawi zawh hmain a ti leh a. Engvanga han thinrim leh ta viau nge maw anih?

Ani chaw vawikhat ei loh vang mai maia tlachhe tur lah kan ni der si lo. 

Chhung inkhawm kan nei zui a,ka nu hun hman a ni a, Bible a chhiara,a chhiar zawhah nidang ang bawkin Pathian thu a sawi a.Midang hmangaih tur kan nih thu sawiin mi thil pek chungchang a sawi kaia, "Midang thikte hi kan tih loh tawp tur a ni a. Bimbima pawh hian a nau a thik tur a ni lova, Sangnoi pawh Thari a thik tur a ni lo..Hei,fanu pahnih kan nei che u a,puitling ve ve inni a, kei chuan mo ang pawhin ka en lo che u a,mi zingah pawh ka fanute ka ti mai ṭhin che u.Mo pahnih kawl hi a harsat zia an sawi ṭhina,mahse keini chu kan vanneia,hei buaina awm miah loin kan khawsa ho vek theia, a lawmawm em em a. Chutihrualin achangin Julie thil kan tihsak anga,achangin Tebawihi kan tihsak anga.Hetiang hunah te hian a tihsak ve loh zawkin thik a,midang tana nuam lo rawk khawpa khawsak te hi chin loh tur ania..."

A thusawi zawm zel eng mah ka hre tawh lo. Ka lungphu ri dut dut chauh ka hriaa,ka bula ṭhu Sangnoi pawhin a hre phak hialin ka ring.

PS: He Story hi Story a ni lo🤗 Thil tak tak behchhan,a ngaihnawm tura her rem hret chauh a ni a. Nidang anga achangtupa pa leh chhe lo em em lam kha a ni vak dawn lo a,thawnthu sei tak tur pawh a ni lo bawk e aw. Tin,phone aṭang hi chuan ziah sei a lo har khawp mai.Chuan,theih veleh ka rawn zawm leh dawn nia.