THIL PAHNIH

THIL PAHNIH

Ziaktu : Maengi ralte

Chapter-1

Kan Room kawngkhar inkhar ri dawt thawmah rang zetin ka hawichhuaka, ka rin ang ngeiin ka pasal alo ni a, a  rawn rui haw leh tih ka hrethiam nghal mai bawk.

‘Ka rin aiin i rawn tlai leh sia’ tih pahin ka thochhuak nghala.Min chhang loin khumah a letthla hnawka, a che zui lo.Ka dinna ngaiah che loin ka dinga, ka pasal mu hlawm reng chu ka en a, ka engkim nithin kha a nita lo emaw ka ti rum rum mai.

Khumah mu loin Room chhunga thutthleng kan dahah ka thu mu a, ka pasal hnar ri bur bur chuan minti muhil thei lo a, muthilh luih ka tumna lamah ka lu a na a,ka mit a kham em em bawka.Meng loin mit chhing hrim hrim ila azia deuh ang tiin ka mit ka chhinga, ka ngaihtuahnaah hun kal tawh a lo lang nghal zut zuta, ka inrin hmain ka biang a rawn lumthla papa, piang nawn leh thei ila chuan Pasal ka neih ka ring tawh lo.Ka duh vang ni hauh loin ka hun liam tawh lamah ngaihtuahnain ka cheng zui ta vang vang.

Ka Pasal, Zampuia nen hian School khatah kan kal ho thina,high school ka luh ve tan kum kha ani erawh a chhuahsan kum tur a ni ve thunga.  Mahse, School khatah kan kal ho thin tih erawh kan inngaihzawn hnuah kan hre ve ve chauh.

B.com ka zawh hnuah zirzawm loin hna dil theih apiang ka dil a, ka dil chhungin ka ni te dawrah ka inhlawh pah bawka. Vanneihthlak takin kum khat chauh ka awl hman tihin Agriculture Deptah hna ka hmu ta hlauha.Atir lamah nuam ka ti em em lo nangin rei pawh ka thawh hmain nuam ka tita thuaia.Ka hna thila kan zin chhuahna lamah Zampuia nen hian kan intawnga, ani hi Transport deptah Officer niin Mamit lama a post lai a ni a. Kum hnih kan inzui hnuah Biakin hawngin kan innei a. Mahse, fa erawh kum 3 hnuah kan nei ta chauh.

Ka inlet a, khum lam ka hawi pheia, a mut dan ngaia mu tawh loin tla lek lekin khum sir lamah a lo mu saisir a.Ka tho vata, khum lai lamah ka nawr phei dawna, a rui zawi bakah a te chhe lem lo bawka ka nawr phei mai thei lo.A rum tuah tuaha,’ Tawlh phei la, i tla tep ania’ a hriat pawh ring chuang lo chungin ka ti a. Mahse,a tawlhphei ve mai bawk.

Thutthlengah bawk ka mu leh a, a hma ang bawkin hun kal tawh lamah ka cheng leh nghal zat.Inneih ni kha ka nuna ka hlim ber ni a ni a. Mahse, inneihna ken tel 'Mo' nihna erawh ka nuna hun hrehawm berte zinga pakhat a ni ta thung. Tin, Mo fel leh perfect em em lo awm tawhna hmuna mo hnuhnung zawk va nih hi a hrehawm dan a thuahhnih lehzual niin ka hriaa. Mahse, hrehawm ka tihna vang ringawta inthen emaw tlan tumna lam ka nei ngai lo.Mi tamtak lo paltlang tawh kha ka paltlang ve mek nimaiah ka ngaia.Ka nu leh pa hnen lamah pawh hrehawm ka tihrukna eng mah ka thlen ngai lo.

Kan pa te chhungkaw lam hi khawsak harsa lo tak anni a.Kan in lamah pawh khan Pathian zarah harsa kan ni bik lo va, mahse Zampuia te chhungkua ang em a nei erawh kan ni lo. Zampuia pa hi Contractor che thei pangngai tak niin, a nu erawh Middle School zirtirtu a ni thung. Ka mo hnuah sum lamah buaina an neih ka la hre miah lo a, kan nupain a hranin kan hlawh ve ve pawh kan kawl maia. Mahse, nitin hnathawka chhuak,hlawh nei ka ni a, eng emaw chen chu ka nu kutah ka pe lut ziaha, inchhung mamawh lei ngai pawh keiman ka lei fo a, chawhmeh bazar phei chu ka bazar dawnin pawisa ka dil ngai lo. 

Zampuia hi unau pathum zinga upa ber a ni a, an milai leh an hmeichhe neihchhun ni bawk hian pasal a nei tawha. An naupangber pawh hian nupui nei tawhin kan inneih khan fa 2 an nei tawha. Tunah hian an fa upa zawk kum 10 niin a nau kum 7 a ni ve bawka.

Ka mopuinu hi ka nu(ka pasal nu) nau fanu a ni a,a nu hian a tleirawl laiin a thihsana, pa tel lo a a nuin a pawm a ni a. A nu boral hnuah  Zampuia te bulah a awm ta a, kum 20 vel chauh annih laiin Zampuia nau Sangtea nen an innei zui ta daih. Sangtea hi lehkhathiam tak,mahse hna ngaihven lem lo a ni thung a. Unau zinga naupangber a ni a, an duat mai bakah nu leh pa thlazar hnuaiah nuamsa taka khawsa thei a ni a,ka nu leh pa chang lo Zampuia leh a farnu pawh hian duat tak anni. Zampuia leh Zodini ang lo takin a mizia hi a danglam a, tawng duh tak, thil engpawh sawise hre ber ang maia lo sawi ve chiam chi a ni a. Zu a duh em em bawka.Mahse, zu a in vang mai ni lo,a ruih sual chang pawhin an hauh emaw sawisel  pawh ka la hre lo..A nupui Julie pawh  hi engmah thawk lo mah se ka nu tan mihrang a ni lo va, mo tamtak angin sum lamah buaina a nei lo.

Ka pasal pa hi pa tha tawpkhawk a ni a, mahse inchhung enkawl tur chuan pa tha ngawireng nih hi awmzia a lo neih loh zia ka hre chiang ta khawp mai. Ka nu hi nu mize mak angreng tak a ni a. Nu sual chu a ni lo.Mahse,ka mopuinu hi a laizawn neihchhun fanu anih tlat avangin keinen chuan kan dinhmun inthlau tak a ni. Ka mo tirh phat atangin inchhung thil zawng zawng Julie kutah a awm tih ka hre thiam thuaia,Julie ngaitheih loh zawng chu ka nu leh pa tan mi dik lo anni ve nghal tawp mai tih pawh ka hre thiam har lo.  

Atir lamah phei chuan ka la mo thar a, inchhunga engkim lo enkawl thin anih vangin thil tih dawna han rawn vel kha mak tihna pawh ka nei lem lo a. A kutah engkim inchhung enkawl a awm veka, Upa zawk nupui ka nih vang ngawta thu nghal viau tur ka ni lo tih ka hriaa, thil tihdan pawh ka zawh fo a fuh ang tih ka hre thiam ve bawka. Mahse,kum a vei hnuah erawh Julie hnena engkim thlen hi he inchhunga kan awmchhung chuan kan nih dan tur kumkhua a ni tih ka man thiam ta zawka.

Kan nupain nitin hnathawka chhuak kan ni a, min awmpuitu nula 1 leh lang kal 1,kum 40 mi vel an awm tho nangin inthlahrun chang ka ngah. Fa ka neih hnuah chawlh ka laa,ka lak theih loh hnuah ai kal ka la leh a.Mahse,chutiang ngawt a lo ni reng thei si lova, inchhungah tangkai lo em em niin ka inhre fova, tuman min sawisel lo mah se Julie nen kan dinhmun a in ang lo lutuk tih ka hai bik lo a. Tawngkamin sawi lo mah se thil engpawh inchhungah ti dawn ila Julie zawh hmasak angai deuh zel te, chawhmeh siam tur thlenga Julie thu nghah zel angai thin te hian mi chuang awm ve ang maiin ka inhriat phaha,ka hnawk ngawih ngawih nitein ka inhre fo bawk.

Kan pa hi upa zawk leh eizawnna tlak hna nei ni mah se ka nu leh pa tan an innghahna a ni a.An rinna hi sum lam erawh a ni lo..Chuvangin in dan hi sawirik chi a ni lo tih ka hrethiam tawha. Amah hi pa tha leh thunawi nei lo, abulah pawh phun bawrh bawrh mah ila ngaithla liam mai mai thei chi a ni a. Ka nu tawngkam ngeiawm leh min khei ve tlat a awmchang te hian ka phun ngam ve na awmchhun anih avangin a bulah ka phun ve thina, tha takin a ngaithlaa, min vuipui ngai lo a, a nu pawh a sawisel chuang hek lo.Mahse, kan fapa boral atangin zawi zawiin a mizia a inthlak dang lam hret hret a, zu in ve zeuh zeuh chauh thin kha rawn nam haw loh ni a nei ngai ta meuh lo a.

Atir lamah chuan kan fapa boral a tuar lutuk aniang ka ti a, mahse tunah chuan chutiang niin ka hre tawh lo. Ka lusun hun hrehawm pawh a reh hmain,min hnemtu leh ka nghenchhan tur nisi hian ka tahna titamtu a nita zawka. Zu a in tam nasat ang zelin a mizia pawh a dang lam ve zela, inhau si loin kan inbe tlema, kan inhlat ngawih ngawih maia. A office bang zan dar 8 hmaa lo haw a nei ngai ta hek lo..Ka lusun mangang nen ka muhil hleithei lo a, thil ka ei thei bawk si lo. Ka nun a nguaia, reilote chhungin ka rihna ka hloh nasa hman viau.

Ka mitthlaah ka fapa a lo langa, mipa naupang ngo leh sa muk lam a ni a. Sam dum hlap,chalsam rual hmak mai niin mitmeng zahawm leh lian kel kawl tak a nei bawka..Mipa naupang tihtakah a harh vet vawt viau bawka.Thil ei tha duh tak mai anih avangin a chak em em a,a kutthlak pawh a rualpuiah chuan na pawl tak a ni.

Kha thil thlen tlai kha…Roomah kan nufain kan awma, ka thawmhnaw ka thlak laiin ka phone a lo khala.Ka thawmhnaw suk tur dah turin kan room chhunga awm,Bathroom a Washing machine ka pana, ka hmai ka phih nghal zuaia,ka let lehnghal maia.Mahse,roomah a lo awm tawh lo a. Amah kha kal thei tawh anih avangin Sitting room lamah a chhuk anih ka ringa, hmanhmawh fein ka tlanchhuaka, inchung leh inhnuai panna stepah a tlak ka hlauh vang a ni ber a. 

Inhnuai chhuata thisen nena inchiahpiah nuai chunga a lo mu reng ka zuk hmuh khan au pawh ka au chhuak thei lo..Ka khawvel kha a tawp nimaiin ka hriaa, ni 2 chhung kha engmah ngaihtuahna mumal ka nei lo a. Ka bial vel mai mai a,fapa ka sun tih lam pawh ka ngaihtuah lo.

Ka ngaihtuahna vangin ka thaw hawka, ka beng ka hup a. Kha hun rapthlak khan angai ang bawkin min rawn fan leh a, vawilehkhatah ka taksa pumpui a khur nghal hlawk hlawka, ka awmah engthil emawin min rawn hnawha, mangang lutukin chhuatah ka vakthlaa..Ka thi mai dawn emaw ka tih hnuah ka thaw chhuak hawka, ka mittui a rawn tla nghala,ka tapchhuak thei ta hram..

‘Tebawih, Mama hi a la tho lo em ni?” ka nuin Choka a rawn luh pahin a rawn ti a.A la thawh loh thu ka sawia, a thingpui tur ka chhuansak nghala. Thingpui hi a hang kan in thin avangin lum chawp zelin kan intlangpui a. A thlum erawh inmai theih turin Flaskah kan dah reng tho. A bang hi ka nu bik phei hi chu a duh khirh lehzuala, siamna la rei lo pawh nise a duh chuang lo a, a thar kan chhuang leh kher zel.

Sangnoi nen eirawng kan bawl duna. Chawhmeh siam tur zan lamah Julie-in a lo hrilh sa a. Ka nu-in a khat tawkin Sangnoi chawhmeh then dan a sawisel a, a tawngkam hi sawifak tur awm si lo hian a ngeiawm thiam em em a.Mi a khei riau zel bawk nen nula pawh hian min awmpui rei peih meuh lo thina. Langa lo kal erawh hi chu kum 20 dawn a lo kal tawha. Pasal a neih hmain a awm thina, pasal a neih hnuah pawh langin a lo la kal ta zela.An mizia

hrechiang tak a ni a,en pawh an en mihrang vak lo a. Keipawhin kan chhungte zinga pakhat angin ka ngai ve mai.

‘Ka lu a na riau mai.Nizan ka mu tha lo leh lutuka,Tebawih..Mama thawh hunah Roomah lo kal tehse,biak lawk ka duh ‘ atih zawma.A tho a, nu upa lam nisiin a pian a infit a, thau lam lek lek a ni nangin nalh lo khawp a ni ngai lo.A inuluk em em a, a vun enkawlna lam phei chu uluk tak a ni.

Reivakloah Julie te nufa ho an rawn tho a, a tihfo danin tum deuh barin thingpui a in a, a pawi kan sawi emaw tihmai turin darkar chanve vel chu biak ngam pawh a ni lo.A fa naupang zawk thingpui intha duh lo a han kawisawi deuh pawh a dim lem lo lehpek. Mahse,kum eng emaw zat chhung chu ka lo hre ve tawha, a tum satliah mai mai hi chu ka ngaipawimawh duh lem lo.

Roomah ka lut chho a, Zampuia a lo tho tawha.Bathroom lamah a awm tih a thawm atangin ka hre theia.Khum ka thlep fela, nizana a thawmhnaw hak pawh thutthlengah  alo daha,suk turin bal bawmah ka dah lut dawna, ka lak kan zawnga a rim rawn nam chuan ka hnar a rawn verh zawka, ka ner nawk mai. Nulat lai atanga zu ngaithei lo ve thin tak ka ni a, ani pawhin a hriaa,a in khat teh nangin a in chhunah pawh ka hre fuh ngai meuh lo thina. Mahse, tunah erawh zantin zu rim rawn nam haw loh a nei ta lo a. Zu bel bulah ka mu a nita ngawt chu ania. 

‘Ka nuin a be duh che a’ a rawn chhuah veleh ka ti a, Min chhang lo.Mahse, ka sawi a hria tih ka hre tho.

‘E, vawiin kha i kal hman dawn em?” keimah bawkin ka ti leh a. 

Kan Inneih a best atana ka hman,Ropuii fanu piancham a ni a. Dar 2 hunserh a ni a,kal ngei turin min phut a. ‘I tan a hrehawm dawn tih chu ka hriaa.Mahse, lo kal ngei turin ka duh che ania aw’ ngengawl takin a rawn ti a.Keipawhin ka boruak ipik em em a zia deuh beiseiin kal ka duh ve bawka. Chak thuah chuan ka chak hlawl lo. Ka fapa, cake a hmuh apianga a Birthday emaw tizeltu ka ngaih a zual lo thei dawn si lo a. Mi zingah pawh ka mualpho palh theia,mahse vah harh ka mamawhna zawk hmuh len hram hram ka duh a. Ka inti paukhauh lui a ni ber mai.

‘Eng hi nge maw i ngaihtuah thin le?‘ bung zeta Zampuia’n min rawn tiri chuan ka ngaihtuahna atangin min kaiharh zawka. Ka piaha a ding chu ka va en a, a lungawi loh changa a tih thin danin a mit a tizima, hmelah ning hmel alang thei bawk.

‘Eng nge?” ka ti tawi tak.

‘Ka kal hman ka ring loa,nangmahin kal mai rawh ka ti. Pawi i tih lem loh chuan’ tha tak chuan ati veleh mai a.

‘Hman thei la chu a tha a,mahse hman loh chuan tihngaihna a awm lo nimai..’

‘Hman lo’ a ti leh tawp.

‘Um,pawi lo.Keimah tal ka kal chuan a zia’ a thawmhnaw suk tur check mawlh mawlh pahin ka ti a.

‘Nia, nangmah i kal khan a tawk.Min mamawh vak pawhin ka ring lo’ a ti leh a.A tawngdan kher chuan min khei zak mai.

‘Mamawh leh mamawh loh lam thu a ni emawni a?” ka ti hmak.Ka tum aiin ka tawngkam a chang lehnghal.

‘Eng thu nge ni a? ngeiawm deuh deuh hian i tawng ang fek fek a’ a ti a.Amah zawk tawngkam ngeiawm hmang anih laia chuti khera min han ti leh chu ka sa leh zak mai.

‘Ka ngeiawm ka hre lo e’ 

‘I hriat lohna tak kha ania i ngeiawm na chu” a ti leh kher. Ka thil ken lai thutthlengah ka thehthlaa,inhauh cho em emin ka melh nghal a. Ani pawh a hmelah inhauh a hreh bik lo tih alang ve reng.

‘I sawi duh sawi mai la, rilru hah nen,I zu in nen ka hne lutuk’ ka ti ta hmak. A zu in nasat tirh atang khan ka la phun khum miah lo a, ka hmelah erawh lawmlohna alang fo ang tih ka ring thunga. Mahse, tukin erawh chetziaa lantir ngawtin a daih tawh lo.

‘Enge ilo hne vak? I free tehreng nen nuam iti viau ang chu ka tia’ a ti leh a. Tawngkam vin leh awki sang a hmang hauh lo nangin a hmelah erawh thil tenawm tak bula ding ang mai a ni. 

Tawng tumin ka ang leh ziau hmana, mahse pawn lama ka nu tawng thawm a awm takah chuan ka chip leh hmak. Zampuia ka melhna atang erawhin ka mit ka lasawn eih lo. A mitko hmul a tisang zawka, ngeiawm em emin a hmui a tisawia. A chhuak zui ta daih. 

Khumah ka thu thla hnawka, a thilsawi te kha ka ngaihtuah let a, ka thinrim lutuka ka alh pup mai dawn hian ka hria. Engtin nge free te min han tihngam zawk? A nu mitmei veng reng renga ka khawsate, ani lo rui veleh bawk,Office ban hunah pawh lo alo haw mai loh thin avangte  hian ka dam lo ngawih ngawih tih a hre lo tak tak nge a hre lo der zawk ni? Sual leh lutuk mai. 

Ka tho thut a, ka thawmhnaw dahna bawm ka hawng rawka..Ka mamawh tura ka rin ka thehchhuak nghal hmawk hmawka,  zin bag lian vak lo ka lachhuaka, ka khung khawma. Hetiang reng renga nun hman ai chuan kan in lamah let vang vang ila ka hahdam zawk anga,keimah pawh hi keimah ka ni leh thei zawk ang..

Khum bula cabinet kan hunah ka phone ka daha, lak tuma ka ban chiah chu kan inneih thlalak lo intar chuan ka mit ala ta chat. Phone la loin thlalak zawk ka laa, la hmu ngai lo niawm takin ka en ta reng.

Kan lang naupang dun hle a, tun ai hian ka thau deuh zawka. Kan pahnih hmelah kan hlim tih alang theia..Ni e, kan hlim alawm,keiphei chu ka nunah ka hlim ni ber a ni hial zawk. Vawilehkhatah ’A nuamah emaw a hrehawmah pawh’ tih ka sawi lai kha chiang em emin ka bengah a rawn ri a. Khumah ka thu thlaa, kan inneihni khan thu kan tiama..Kan thutiam kha inneih min hmanpuitute hriat atan mai a ni lo a, Pathian hnenah,a Biakin thianghlimah ngei kan tiam zawk a. Engkim mai kha Pathian hmaah a thleng chho veka..Tunah hrehawmna a lo thlenga, ka hrehawmna avangin inthen tumin ka che a…Tlema tlemah Pathian hmaa kan thutiam ka va han bawhchhe teuh tehlul em..

Tlai lam erawh ka rinai tak chuan nuam ka tita phiana, kan thian dangte an lo kal ve hlawm bawk si nen kan ti ti laih laih renga. Ipik churh reng maia ka awm kha a zia ta deuh hawkin ka hre nghala,pawnlang leh a der ni hauh loin ka nui ve bawk bawk mai. 

Ka haw pahin ka nute in lamah ka kal zuaia, rei awm loin ka haw leha.Julie te nupa bakah naupang chawei turin an chhuak ve bawka, Inchhung a lo reh thap mai.Room lam ka pan ding chho nghala, Office ban hun pangngai ang vel haw ka ni bawka ,Zampuia a lo la haw dawn lo tih ka hre saa. Ka inthlak a, ka inthlak zawhah Inchung zawla Pangpar leh hmarcha pot ka thlak thar ho en turin ka chho a, mahse inchung zawl ka chhuah thlen hmain tawng thawm ka hriaa, ka hming an sawi rik ka hre zui a,kal zui tawh loin an sawi zawm leh tur ka nghak ta zawk.

Mi thusawi lo ngaihthlak ruk chu a mawi lem lo tih ka hre tho nangin ka hre duh miau sia, mawi leh mawi lo ngaihven hman ka ni rih lo.