THIL PAHNIH - 4(Last Chapter)

 Chapter - 4(last chapter)

Roomah keimahin ka ṭhu a,vawiin tlai thil thleng zawng zawng kha a bul aṭangin ka ngaihtuah leta,ka thinrim satliah lo.Ka na ngut ngut maia, ka nu min han tihdan engkim mai kha na ka ti a,ka rilru lo lutuk min puttir tlai maite kha ka huaa, hun kal tawha thil thleng,ka hriatchhuah zen zen loh thlengin a lo lang leh zut zuta,midang tana fiamthu anga lang,mahse ka tana na em em si, ṭawngkam mei nei tak taka min khak fek fekte,Zampuia laka ka thlavang hauh fo siin a awm loh changa min endan danglam leh tlat si te, ka naupai laia inthlahrung chung chunga ka che lui te,ka naupai fual vanga damdawiin ka luh ṭuma ka nuin " Julie naupai hi a buaipuiawm lo khawpa, Mami pawh a ni tho a,Tebawihi hi chu a hrisel lo a,dimtheih ang anga dim angaia,chhungkuaah chuan hetiang a buaipui ngai hi an awm ve chawka,chutihrualin Julie hi chu a chhel khawpa" tia ka hriat lai ngeia a sawite kha a hunlai khan rilru kawi ka put loh vangin ka inthlahrung satliah a,mahse tun hnua ka ngaihtuah let hi chuan ka nep zia leh Julie fel zia thiam taka a sawi lanna niin ka hre vek tawha. A huat hian ka haw hlur tawh.

Eng emaw tal ka tih angai. Hetianga ka tuar reng anih chuan ka rilru a dik lo zo vek thei mai ang.Mahse,engtin nge ka tih chuan ang? Han haw viauiin tlah phah ta hial ila eng nge ka sawi ang? Inhauh buaina awm bawk si lo.Ka nu ṭawngkam ngeiawm leh min khei fek fek reng hi ka sawi danin azir loh chuan ṭhenkhat tan a ho em em si ang.Bakah,kan in lamah pawh mo kan nei ve tho a,ka Problem hi ho a ti viau anga,ka harsatna ang tho hi a lo tawk ve reng theia. Ka va haw ngawt khan fanu te na na na chu min lo duat anga,kan mo tan harsatna ka siamsak ang tih ka hlau ve tho..Zampuia tal belh tlak se a zia tur hi ania. 

Kar a liama,kan nundan phung pangngaiin kan nung mawp mawpa, a hranpa taka inhauh leh intihthiam loh pawh a awm chuang lova,mahse keimah lam ka dik tawk tawh lo nge ho mai mai huat tur ka hmu tam malh malh viau thung.Mahse,eng emaw changa Julie pawh chhan ve fawk ṭum erawh ka nei ta zauh zauha,a nazawng chu ka insum thei viau lawi.

Zan khat chu Zampuia haw hun pangngaiah a rawn haw tehmiala,zu a in miah lo bawka. Hetiang hi kan inneih hnu khan a nihziah dan a ni a,mahse tun hnai thla 3 vel chhung chu a inthlakdanglam chiang em maia,rui lo leh haw hun pangngaia a rawn haw ve tlat pawh ka tan thilmak a ni letling zawk.

"Grace kha i en thei ta em?" a sam hruk hul mawlh mawlh pahin a ti a.

"En thei ang" ka ti satliah.

"En thei ang chu eng tihna nge?" a sawi pahin a nui huk huka,ka pasal Zampuia ngei kha a ni.

"Nizanah ka leia,ka la en lo..I en ami?" ka ti let ha.

"Nope..zaninah en ila"

"Maw?"

"Zanah en ila ka ti,i peih lo mi?" a ti ṭha leh mai.

"Peih e..." 

Chawei chhung leh chaweina ka sengfel lai pawhin tlaiah kan inbiakna khan mintihlim veng venga,chutihrual chuan ka hlimna hoh zia ka ngaihtuah erawh chuan ka inkhawngaih ru viau lawi.

Mu chungin kan en duna, ka nun nen inanna nei miah lo mah se keimahah ka inhmehbela,chhungrila ipik,ṭah thawl hawk hawk chak lutuka lo inup kha ka thup seng meuh lo. A khat tawkin ka mittui ka hru leh ṭhina, Zampuia'n duat taka min rawn kuah takah phei chuan ka ṭap chhuak ta hial.

"Dik lohna ka nei anih chuan min hrilh la, ka lusun hrehawm ngawih ngawih laia zu ilo in leh tlai tak taka ilo haw ṭhin te hian minti hrehawm zuala. Tihdik loh ka nei anih chuan min hrilh rawh" ka ti a. 

"Engmah dik lohna i nei lo,ka thiam lo a chu zawng chu animai" a ti mar ut.

"Khawngaih takin zu in tawh suh. Bawihtea boral hi i tuar tih ka hriaa, mahse hetiang chuan a dik lo" ka ti leh ringawt.

"Nia,ka hre thiam che.Diktak chuan ka rilru lam a dik tawk lo a.A boral danah khan ka puh deuh tlat mai che a" a ti a. A thusawi chuan min deng sawk mai. Chutiang zawngin ka lo la ngaihtuah ngai reng reng lo.

"Min puh maw?" ka tizuai raih ringawt. Abak sawi tur ka hre ngang lo.

"Um,i ngaihsak tawk lo anih ka ring a.Mahse,chutiang lam ni loin ka lusunna hmangin sualin min lo bei a. Ka ngaihdan a dik lo" mahni inringtawk lo em emin a ti a.

"Khami tlai khan..' ka sawi tan chauh tihin min lo khap vat.

"A tawk,ka hre vek a,ka hriat dan pawh kha a dik tih ka pawm alawm.Sual hnathawh ka ngam loh vang ka tih kha" a ti leh vat.A hmel thutak leh inthlahrung hmel taka tim ve deuh dai mai chu sawi tur hre loin ka melh reng a.

"Zu in loh ka tum tawh ang.I khua a har em tih pawh ka lo ngaihtuah tawk lo che a,ka thiam loh a ni" amah bawkin a ti leh a. Abak simna thu emaw pianthar thu pawh a sawi zui chuang lo.Sawi ṭeuh lo mah se pawi ka ti lo a. Ka hriat ṭhin ka pasal kha anih tlat avangin a sawi angin a awm ang tih ka chiang em em tlata,chubakah nupa inzawmna hi alo mak em em maia,kha lehchen inhlat taka awm kha,reilote chhungin kan inzawm leha,chhungril hian a ngaidama,a hre thiam tlat thei ṭhin a lo ni.

Rilru thlamuang takin ka muhil a, Pathian hnena bang loin ka dil ṭhin a. Rilru inpawh taka kan titi dun theih nan zan khat tal pawh tiin ka ṭawngtai ṭhina,ka ṭawngtaina chhanna a lo thlenga,engkim mai a felfai ta thlup niin alang a..Tunah chuan ka nu vanga buaina ka nei anih pawhin ka pasal bulah ka thlamuang leh thei anga,ka hrehawmna pawh nasa takin a chhawk ngei ngei ang.

Thla a liama, Zampuia pawh a sawi ang ngeiin zu a in nawn ta miah lo. Hna ban hun pangngaiah a lo haw a, thil ṭul lem loah chuan zanah pawh a chhuak ngai mang lo. Mahse,mak takin ka nu nena kan buaina erawh a hma ai mahin a zual ta zawk. Zampuia zu nghei ta leh min duatna ti lang fo hi a ngaithei lo.Zampuia hian a nu rilru hi a hria em ka hre lo thung.

Office aṭanga ka hawin kawtah Bimbima a lo awma,ka Scooty sirah a lo ṭhu a,eng nge a tih ka hre lem lo.Kal pahin ka ko a, min hmuh veleh a tho a,a tlanchhe nghal phat mai. Eng chu a hria ni maw tih pahin inchhungah ka zui lut ve a,inchhungah pawh chuan ka hmu zui lem hlei lova.

Ka thawmhnawh ka thlaka,eirawngbawl tihpui an ngaih leh ngaih loh ka zawta,Sangnoi'n an tihfel tawh thu a lo sawia.Ka Scooty bal zet sil turin ka pan pheia,ka Scooty bul ka thleng phei chu ka ding chawt mai.

A sir tawn tawn chu duhtawka thilzum a thairan tih hriat takin a lo rang chik nuai maia, a site glass lehlam a keh bawka.

"Nu,vawiinah Scooty kengchhuak an awm ami?" ka nu lo ṭhu hnenah ka ti thawr.

"Aw,Sangtea ten an ken kha" ngaihsak lo zetin a ti liam puat.

"A rang leh a keh bawk sia,a accident ami?" ka ti leh a. 

"Aw,Julie zawk a tlu anih kha,a khawl ber a chhiat loh chuan a pawi vak hleinem.Naktukah a chhe lai kha va thlaktir rawhse" a ti leh nghat nghata. Kan inneih khan ka Scooty ka chhawm luta,kan hralh hnuah tuna mi hi kan lei leha. Tu pawhin lo khalh se ka ui em em hran lo.Mahse, Sangtea pawhin Bike a neia,Julie pawhin ama pualin Scooty a nei ve tho a. Engvangin nge ka ta kher an khalh chhuah? An tlukpuia, chu pawh ṭha taka inhrilh awm miah lo. Ka nu lahin a khawl ber a chhiat loh chuan enge pawi a ti mai maia. Ka lungawi ngang lo.

"Eng nge a? Scooty chhia kha mi insawi?" Ṭawng ka tum lai takin Sangtea'n rawn luh pahin a rawn ti lung lung.

"Aw, naktukah inthlak anga a ṭha nimai" ka nu bawkin Game khel mual mual pahin a ti leh a.

Sawi tur ka neih kha a bo ta duak. Diktak chuan sawi tur hria pawh ni ila sawi loh ka thlang tho ang.

Ngawirengin ka inher a,ka mittui ka khap per sawk mai. Mahse kawngkhar ka thlen hmain ka ding leh a.

"Scooty chhia mai mai a siam leh theih, mihring zawk an na em tih pawh ngaihven lo.Em em a" ka nu ṭawngri chuan min kal tir thei lo.

"Ka ngaihven lo a ni hleinem, a hmaa chhe si lo kha a lo chhiat takah chuan achhan ka zawt mai che a..." 

"Eeeee,i va zak lo ve. Tikhan ka nu i chhang ngam vel amaw? " sawi pawh ka sawi zawh hmain Sangtea'n a rawn ti vak. Ka phu dawrh mai. Ka bul a rawn thleng phei nghal ruaka,min rawn dinchilha,a mitmeng sen deuh rum maiah chuan ruih a nei tih ka hre thiam mai.Mahse,zu rim erawh a nam lo.

"Ka u nupui ni lo la chuan ka beng ang che,i hlawh nei hi i chapo khanglang a,i hlawh hi kan mamawh lo lutuk. Julie lah i hmusit em em a,ilo awm ve aṭangin inah hian buaina hlir i thlen" a ti leh phiar phiar mai.

Hamhaih em emin ka ding a, ka khur hlawk hlawk lawi..Ka nuin Sangtea khap tum miah lova a ṭhu ngar mai chu ka va melh ṭawk ṭawka,mahse a chet hian a che eih lo.

Ka rilru a lo lang hmasaber ka ti ta phat. Pawnah ka chhuaka,Scooty ka start a,vawikhatmah let leh tawh ngai lo turin ka tlanchhuahsan ta vang vang. Inneih thutiamah khan a nuamah leh a hrehawmah tiin ka tiam ngeia. Atir phat aṭangin ka pasal chhungte hi ka thiam ang angin ka nei tel bawka. Mahse, mahni pawh intheihnghilh titih leh englaimaha chhungkuaa min ngai lotu te nena chen ho hi ka ba bik lo.

Ka nu hmel ka hmuh rualin ka ṭap chhuak nghal hawk mai. Mak ti em emin an rawn tlankhawma, min ṭhut huala,mahse ka nu leh kan monuin room lamah min luhpui ta zawk.

"Engthil nge? Zampuia a accident em ni?"  Khuma rawn ṭhut pahin ka nuin a ti a. Mahse,ka u nupuiin a khap vat.

"Nu,ṭap phawt rawhse. A ṭah zawh vek khan a thawl zawk ang" dam thlapin a ti a. 

Reitawk fang ka ṭapa,ka taksa khur hlawk hlawk pawh a zia tan ta bawk. Engtin nge ka sawi ṭan ang ka ngaihtuaha,vawikhatmah ka nu leh pa  bulah ka pasal chhungte hi ka la rel ngai lo. Ka fel viau bik vang niloin ka nu hian sawi ngam turin min siam ngai lo hrim hrim zawka. Kan inneih a ka best erawh eng emaw changin ka hrilh zauh zauh thung.

Thil thlen dan ka hrilha,ka sawi chhung zawng engmah sawi loin an ngawi reng.Thil nihna tak pawh sawichhuak thiam lo chi ka ni a. Ka thinrimzia pawh ka sawichhuak thiam meuh lo.

"Zampuia i be tawh em?" Ka sawi zawh veleh la nuin a ti dam thlapa. Ka lu ka thing ringawt,Zampuia biak lam reng reng ka lo ngaihtuah lo.

"Bia la a ṭhat ka ring. Bakah,chhungkua chuan buai chang kan neia. I sawi ang kha thil thlen dan anih pawhin i nu ten sawi tur an hre ve tho ang. Thinrim nghala,tlan rum rum emaw inṭhen tum ngawt te a fuh lovang. Hei,i u Dini pawh hian sawi dawn se i tuar aia hrehawm daih a tuar ang. Chuvangin mahni inkhawngaih hi a ṭha lo" a ti leh a. Ka sa ve nghal phat mai. 

Thinrim tawpkhawkin mahni in lam ka thleng a, a awih lo zawnga min hringtu ngeiin a lo ti hi ka ngaithiam bau lo.

'Haw ka tum tawh lo. Hetah hian awm ve a rem lo anih pawhin ka indang mai ang" ka ti bak hlar mai. Diktak chuan eng pawh ka cho vek tlat.Thinrim inkhawlkhawm kha a puakkeh ve tlat tawh.

"Buan buan che hian,i pasal pawh be ve phawt la,rilru fima ngaihtuah a ṭha ka ti mai alawm mawle. Pasalte nena inkar pawh nisi lo kha a dik lo.A reng rengah mo nih hian ho mai mai inhaw sam ṭhin lutuk a" a ti leh a.

"Ka nu,chutiang lam a ni lo. Nangpawhin min haua,min zilh ṭhin. Ka titau fova,mahse i fa te nen min endan a danglam lo tih ka hriaa,ka vui ngai lo. Tebawihi pasal neih hnuah pawh i fanu pasal nei aiin in a kei mo awm hi min ngaihtuah zawk.Tebawihi hi a rawn kal khata,a rawn vui ngai lo tih vanga lo enliam a fuh lo. Tunah a rawn vui ve a,a tawp thlen a duh nghal bawka. Chuvangin vawikhat thlenna a ni dawn lo tih ngaihtuah tel la..Zampuia bia se,thutawp siam se ṭha ka ti"  u Dini'n a lo ti dap dapa. 

Zampuia ka call a, kan in lamah ka awm tih ka hrilha,a hria tih a rawn sawi nghala. Mak ka ti lo. Ka nuin engkim a hrilh leh vek tawh ang tih ka hre thiam ve vek.

Lo awm phawt la,ka thleng ṭep a,ka rawn be leh ang che a ti a. A ṭawngdanah thinrim ang pawhin alang lem lo. Zu a nghei hnu leh nunphung pangngai a neih leh hnuah khan a nihdan ṭhin,thu lai la tak leh ṭawng tam lo em em mai kha a ni leh tawha. Inchhunga neuh neuh kan neih pawh a ngai thupui vak lo. Ka thlavang hauh ṭum leh ṭawngkam han neih ve zauh zauh erawh a nei fo va.Chuvang takin ka nuin a ngaithei lo reng bawka.

Zanah Zampuia a rawn kala, kei min be loin ka nu leh pa bakah ka u te nupa a be duh tlat lawi. Darkar chanve vel lai Room a an inkhung hnuah min rawn ko a. Vawiin tlai thil thleng chungchang an lo sawia. Haw leh tawh loin Zampuia'n inluahtur a zawn hmuh veleh kan insawn lut nghal anga,chumi chhung chuan kan in lamah ka awm rih ang.

Zampuia haw hnuah u Dini nen kan titi a,u Dini sawi dan chuan Zampuia'n vawikhatmah a nu dem zawngin ṭawngkam a chhakchhuak lova,mahse Sangtea leh Julie chet dan vangin thupha a chawi tih a sawia. A nu leh pain indan an remti em tih ka pain a zawhna pawh thiam takin a pehhel a,in luah tur a biak nghal thu a sawi daih a ti. Ni e,a nu leh pain indan an remti ngai dawn lo. An fapa hi a puitlinga,an inngahna a ni a. Sangtea lakah rinna an nghat ngam lo. Mahse,kei an mo erawh an bula awm turin min duh lo, thiam lohna tamtak ka nei ve ngei anga. Mahse,ka theihtawp ka chhuah ve a,abak dang pek belh tur pawh ka nei lo.

Sangnoi'n min rawn call a, ka nu leh Sangtea'n keimah mjn dem zawnga thil an sawi nasat zia min rawn hrilha. "U Mama a ngawi renga, pi in koh angai lo,a tlanchhan a ho lutuk a ti che a,u Mama'n kan indang mai ang. Awmkhawm hi a harsa anih hi a tia. Pi a thinrim lutuk,aṭapa.U Sangtea kha a lo ṭawng leh vaka,u Mama'n ben a tum bawka. A hnuah keimah a hranin min zawt leha. Pi leh U Sangtea tihdan che kha ka hrilh veka. Indang inluah hunah ka lo awm ve ang aw" a rawn ti siam siama. Hnehna ka chang ve ta tih hre daih tawh mah ila Sangnoi thil sawi chuan min tihlim takzet tho.

"Inchhung boruak, mei nei tak taka inkhak fek fekna, mo pahnih zinga an en hran em em ini hi ka hai ngai lo. I strong em em a, i tuarchhuak ang tiin ka lo ngaihtuah ṭhina,mahse tunah chuan tuarchhuah hun a awm dawn lo tih ka hre thiam.Chuvangin awmhran a ṭha bera,ka nu leh pa rilru tur i hriaa,an remti dawn lo.Mahse,kan indang ang. Ka nu leh pa hi ka zah em em a,mahse,ka nupui pawh ka hmangaih ve bawka. Engtikah emaw chuan an fapa ka nia,min la ngaidam leh mai ang.Kan chhungte leh khawtlangah i chanchin an sawi dan tur i hre thiam anga,lungngai suh.Indan i kherh vanga indang kan ni lo tih kei leh Pathianin an hriaa,a tawk. Mahse,khawngaih takin ka nu leh Sangtea hi haw lo thei la ka duha,ka ngen bawk che. Ka tan Nu hi pakhat chauh a awm a,unaupa pawh pakhat chauh. Ka tan an hlu a,ka neihchhun anni ve tlata.Mahse,chung zawng zawng ai chuan i pawimawha. I rilru a dam ka duh ber tih hre reng la"

Zampuia msg ka chhiar zawh rualin ka thaw huai mai. Ni e,Zampuia nupui ka ni a,ka nu pawh ka pasal nu leh ka nu a ni ve tho. Sangtea pawh ka unaupa ve tho a bawk. Ka tana nu leh pa pawh tawn tlang ngam pasal hi a hlu a. A nu leh a nau haw lo tura min ngenna hi ka ti hlawhtling ngei ngei bawk ang.

Ka damchhung hian ka nunah THIL PAHNIH a awm reng tawh dawn.

NUPUI ka ni a,MO pawh ka ni bawka...

Nupui ka nih angin ka pasal tan theihtawp ka chhuah anga,ka tana chhe theihtawp duhtu ni mahse ka pasal nu anih angin a MO ka ni reng bawk anga. Pathian zarah fate kan nei leh anih chuan ka fate tan PI a ni bawk ang. Ka nuna THIL PAHNIH hi a inbuk tawka awmdan ka zir a ṭul kumkhua tawh ang

PS: A tawp ta...Thil tak tak ziah harsat dan hi a rapthlak,phuahchawp mai mai nise a lo awl zawk daih anih hi..Engpawhnise,fan taka ka dah chung pawh min chhiarsaktu te in chungah ka lawma. He Story neitu,ka thian duhtak...I pasal nen hlim dun zel ula,mo inih laia i hrehawmna hre rengin pasal nu fel tak nih tlum tlat la.I hrehawm tawrhna chanve pawh ka ziak chhuak zo lo erawh min ngaidam mai aniang chu.