MINE -10

 Chapter - 10

A rawn inhera,thinrim zetin a phone thutthlengah a vawm thla nghal pawp. Lai zeta ka ding min rawn hmu a, a mimeng lian kelkawlah chuan min huatna chiang takin alang thei a. Achhan hre lo mah ila ka tiril a khur dar dar mai.

"I lo hria maw? Mahse,I duh ang chuan eng mah a kal dawn lo ania" zawi satin a ti leh a. Min en avangin keimah min bia tih ka hria. Mahse,a sawi awmzia erawh ka hre lo.

"Ka va hre thiam lo.." ka ti mawl tawp.

"Aaaa,Haider duh lo mai rawh. Diktak chuan ka u nupui i nih vangin lawm lo chungin ka pawm lui che. Mahse,I huang chin i pelh chuan ka u pawh ka hlau lo" a ti leh sak sak. A tawngkam chhuak chuan min deng dawt dawt nimaiin ka hriaa. A hmeltha takah pawh min huatna bak alang lo.

"Ka hre thiam lo tak tak. Tihsual ka nei anih chuan min hrilh fiah la" ka ti leh a. Ka chhungrila nuam lo tihna ka thup lui hram hram bawk.

"Ha, lemchan leh mi bum vel pawh ilo thiam lehzel anih hi. E,I thiam ang. Mi bum thiam lo ni la ka u hian engvangmahin a nei lo ang che" a ti leh sak sak. Mak deuhin ka hlauhthawnna a bo duak. Ka tihsual sawi bawk si loin a duh duha min tawngkhumna dawh mai mai ka peih bik miah lo. 

"I thinrim chhan ka hre lo a. Min hrilhfiah la,ka sawifiah thei anih chuan ka sawifiah anga" ka ti dam thlap. 

"Lani, thu phawt rawh. Nangpawh Mamte, thil hi tha taka sawi ho tur" Nutei'n dam angreng takin a rawn ti ve a. Ka hnaih ber thutthlengah ka thu a, Rempuii erawh thu duh loin a din ngaiin a ding ngar thung.

"Mambawih, hrilhfiah la" Nutei bawkin a ti leh a. Rempuii ka en a, min melh hlum tum niawm takin tur lutukin min en a. Ka hawisawn duh bik lo.

"I hria tih ka hria. I duh phawt chuan lemchan kha chu zawm rawh. Mahse ka hrilh ang che. I ni Fate, tumah an hmel ka hmu peih lo. Chiang takin hrilh rawh.Anih loh chuan a pawi ang" a ti chang fak. Ka rin loh lutuk a sawi takah chuan inring hman loin ka thaw hawk ringawt.

"Ka hre thiam lo" awmze nei loin ka ti sap. Ka lu ka thing nawk bawk.

"Kan office Kawngkhar rawn kal pel tawh suhse. A bul hnaiah pawh lo kal lo se ka duh.I ni fanu pawh ni chatuan rawhse, engatanmah ka ti lo" a tihzawm leha. Ka ngaihtuahna buai nuai a vir zawka. Thil ka hre chhuak nghal zat.

"Seni a lo kal tihna mi?" 

"Kal tak a ni. Tu nge hna pe ka hre lo. Kei leh u Tea chuan kan pe dawn lo chianga. Staff ho zingah ka unaunu angin a lo la insawi zui lehnghala. A ngampat danah khan i telve ang tih ka chiang lutuk tlat. Ka that lo kha a vannei lutuk" a ti leh chiam.

Sawi leh mai tur hre loin ka thu mar auh a. Nghet zetin ka kut pahnih ka hum kawpa. Ka mitthlaah Seni a lo langa, hnathawh tur a mamawh tih min hrilh atangin ni tam ala liam lo. Remsanga hnenah pawh ka la sawi hek lo. Mahse,vawiinah hnathawk turin engtin nge a kal ngawt theih? Chutah a hna neih danah Rempuii hian min la ringhlel zui chu ania...

"Ka lo be dawn nia" ka ngawih vang vang hnuah ka tichhuak sap. A dang han sawi mai tur ka hre tlat lo.

"Ni e,lo bia la. Kan boruak hi a tha zawngin kal hram tehse" Nutei zawkin a ti a. Ka bu satliah ringawt.

"Biak enge a tulna? Nangman ka u kaltlangin i rawn kal tir anih loh chuan eng nge a lo kal ngawt ang?" Rempui'n kha zetin min rawn ti leha.Ka ling ve nghal phat mai.

"Ka inrawlh miah lo. Engvanga lo kal nge anih amah zawt ta che. Kei min puh ngawt kha a dik lo" insum buai peih loin ka ti ve hmak. Mo ka nih vanga dik lo taka min puh a tum anih chuan a fuh lo viau ang. Naupanlai atanga nu zim zem ka ni ngai lo. Tun thlengin ka chhungril ngawhngawlna ala bo hek lo. Ka tih ni lo a min puh chuan ka dawh hle hle dawn lo a ni tawp mai.

"Lani, I nasa hle mai" Nutei zawkin min rawn ti hmak. Ka en vata,a mitmenga min huatna lang chu Chiang takin ka va hmu thei nghala. Vawiin atang hian inchhungah kan indo zui tawh dawn tih Chiang takin ka hriaa. Nakinah chuan pawi ka ti maithei. Mahse,tunah chuan eng mah pawi ka ti lo. Ka hlau hek lo.

"Engmah keiin ka ti lo. Ti ila ka zep lovang.  Ka zawt fiah anga,a hriat mai ang" ka ti leh nghat.

"Mambawihi rilru tur hi ngaihtuah ve la. Nang chu lo thinrim ve tur i ni lo" a ti chang leh fak.

"Ka hre thiam a..Mahse, ka zawtfiah phawt anga,chumi hnu" ka sawi zawh hmain Nutei'n a ban vaiin min rawn ti tawp a. 

"Tawng tawh suh. I huaisar  em mai. I pasalte unau hian khatiangin min chhang ngai lo reng reng. I lo ropui mang e" elsena leh huatnaa khat hian Nutei'n min tihkhum leh a. Eng emaw sawi tumin ka ang ziaua,Mahse ka chip leh hmak. Ka bag ka hai a,Phone ka lachhuaka. Seni number ka hmuh veleh ka call nghala. Mahse,ala pick thei der lo zui.

"I biak theih hunah lo bia la. Engkim Chiang takin i hrilh dawn nia. Inzawmna neih kan duh lo va, chu chu chiang takin hrilhfiah ang che. Mi pangngai a pha zan lo anih pawhin a hriatthiam dan tur i zawng dawn nia " Nutei'n thupe zetin a ti leh fak faka. Ka chhang tawh lo. Hmusit tawpkhawk tawngkam kha na ka ti nge min ti a pawh ka hre thiam lo.

Ngawirengin khumah ka thu a,inthlak pawh ka la inthlak lo. Nichin lawka thil thleng khan min la fan tlata,ka hah hluah hluah. 

Ka phone riah ka phu zawka, rang zetin ka phone ka en nghal vat bawk. Seni a lo ni a. Tawngkam mawi lo hmang lo turin ka incontrol hmasa leh te te a ka pick ta chauh.

"I lo call lai ka hre lo a" ka rilru hre miah loin a rawn ti lang lang. 

"Nia, thil zawh che ka tum a" 

"Enge ni ta?" 

Vawiinah Rempuiin office atanga a haw tir thu a sawia. Mahse, a landanah hi chuan mood fuh lo leh thil dik lo lianpui thleng ang pawhin a awm hauh si lo!!

"Vawiinah Chanmari lam Officeah i kal em ni?" Ka theihtawpin ka incontrol a,Mahse ka aw a khur titih tho. Min chhan let dan tur thaw dep depin ka ngaichang a ni ber.

"Aw,kal lawka. Lehkha pawimawh ka daha"

"Maw?!!" Rang lutukin ka ti a. Ka aw pawh a ring lutuk hret. 

"Lehkha pawimawh ka daha.Tinge? Dik lo a awm em ni?' a rawn ti leh a. 

Dik lo, dik lo... Ka rilruin ka sawi nawn a. Eng mah hi a dik lo. An sawi dan a inmil hek lo. 

"Awm lo e . . Rempuii sawi dan.." sawi zo loin ka ngawi leh daih. 

"Aw, Rempuii kha a lo awm a. Ka pe a" a rawn ri leh a.

"I pe a,I kal leh mai ami?" at hmel deuhin ka ti hu.

"Um,kal leh mai e. Eee, ka school kalpui thin a lo thawka,chu nen chuan kan inbe zuaia. Abak chu ka awm khawmuang lo.U Remsanga khan Rempuii hnena pe a, let lehnghal turin min ti hrim hrim bawka" a rawn ti leh zung zunga. Thil awmdan a sawifiah duah nangin kei erawh Remsanga hming a lam rik zawk khan ka beng a verh ve zak thung.

"Remsanga maw?" ka ti chhuak halh.

"Aw..Mall-ah khan hna ka tan tawh alawm. Ka lawm lutuk ania" a rawn ti leh a. Hun reilote chhung hian thil mak deuh deuh ka hriaa, eng nge mak ber thlan tur pawh ka hre lo. Engmah thil awmzia ka hre hek lo.

"Mall-ah..Lawk..Enteh, thil engmah ka man lo' ka ti ta thlawt.

Hauh chiam ai chuan tha takin zawh ka duha. A call ka pick ruala ka vin vak lo kha ka lawm leh hnuhnawh zawk.Tha takin ka zawt anga, ka hriat loha thil thleng hi ka hriatfiah angai. Bakah, Rempuii hnen atanga hriatfiah tum ai chuan Seni hi zawh mai a awlsama. Rempuii kha chuan engamah hmain tha takin min sawipui a tum lo nghal tih alang reng. Bakah, Mak takin Rempuii sawi aiin Seni sawi hi ka ring zawk bawka. Inpawh leh inkawmngeih tak ni ngai lem lo mah ila thisen inzawmna nei na na na chu hun danglam deuh a lo thlen hi chuan kan inzawm leh tlat thin. Chuvangin tunah pawh hian vawiin thil thleng engmah ka la hre chiang chuang lo nangin Seni sawi a dik zawk ka ring nghal tawp.

"Saturday khan Security Agencyah hna ruak a awm tih ka hmu a. Chawpchilh deuhin ka va dil ve a. Chuan, khami ni khan u Remsanga nen Mallah kan inhmu a. Hna ka dil tih vel ka sawia. Tukinah min rawn call a,ka hna dilah min la tih an rawn sawia.U Remsanga min biaksak anih ka ring tawpa. Achhan chu interview naa thu nen khan a hnu daihah an rawn inzui chhuaka. An inhriat that hmel lutuka" a rawn ti bawrh bawrh. Rempuii sawi dan ka ngaihtuaha, a inmil lo satliah lo. Mahse, engvangin nge khatianga dawt a sawi kher? Seni zawk hian dawt a sawi tidawn ila a sawi dan kha a mam thluam mai bawk si.

"Anih tak chu mawle"  ka ngaihtuahna sawichhuak loin ka ti fan raih ringawt. 

"Mahse,Engtin nge Officeah Lehkha ka dah tih i hriat daiha?" a rawn ti leh a. A awah mak a ti tih ka hre thiam.

"Ka hmu chein ka hriaa. Chuvang mawle" dawt chiang lutuk ka sawi ta ngawt.

"Anih tak chu.. enteh, Lan...Puitlin hi ka duh takzet tawha. Ka thianpa hi thlah hlen ka duh bawka" mi hriat hlau niawm takin zawitein a rawn ti leh sar sara.

"A van lawmawm dawn ve. I nu a lawm awm mange" nui chungin ka ti a. An inkawp rei tawha,an mualpho nasa tawh bawk a. A thlah tak tak angem ka hre lo.

"Nia, ka unaupate hi an puitling si lo va. Kei tal ka puitlin loh chuan..Awi,ka harhchhuak tlai bawk si" a nui zui ar ar a. 

"Tlai lah lo e...Inbual ka lo tum meka,ka dah mai ang aw" ka tihzawma. Nui hak hak chungin min rawn bye bye a. 

A dah hnuah thochhuak loin ka thut ngaiin ka thu a. Tu sawi zawk nge ka awih ang tih ka ngaihtuaha. Ka rilruin awn lam a neihsa tlat avangin awmzia vak phei chu a awm lo. Remsanga ka biak theih veleh a chiang mai ang chu.

Ka inbuala,ka inbual zawh hnuah chawei an duh tawh ringin Inhnuaiah ka chhukthlaa. Mahse,tumah ka hmu lo. Sangzuala a lo la haw lo nge a lo haw hnuah inkhel turin a chhuak leh ka hre lo va. Nutei leh Rempuii thawm a awm lo. Kitchen lamah erawh  BTS ho zai ri ka hriat avangin Thlungi a awm tih ka hre thei thung.

"Khawnge midang hi?" Thlungi hnenah ka ti a.

"An ei vek tawh.I ei ve nghal duh em?" Nui var var chungin a ti a. 

"An ei tawh maw?" ka ti sap.

"Aw, kalna tur an nei nge pawh ka hre lo. Nichin deuh khan an ei a" a ti leh a. Kan room awmna hi inchungah a ni a. A phui that avang leh inhnung lam hnaiha awm anih avangin kawtzawl lama thawm a hriat lutuk loh a. An kal chhuak anih pawhin Motor thawm ka hre kher lo maitheia. Mak pawh a mak lem lo.

Keimahin chaw ka ei a. Ka ril a tam hlawl lo a,tihtham ka ei lo. Kan boruak tehhrep khan thil ei chakna pawh a hnawt bo zo vek. Kan ka ngaia, haw daih ka chak ru vawng vawnga. Thil a Danglam leh ta thut anih loh chuan Nutei leh Rempuii hian min mil leh mai mai tawh dawn lo a. A zawng zawngin Remsanga hrilh a rem kher dawn si lo.Hrilh pawh ni ila a awih kher lo tueia. Nupa kar a chhe viau thei ve tho.Huizzz, kum chanve em pawh ka la mo lo a. Engtin chuan ka nun ka hmang dawn chu ni maw? Nutei leh Rempuii tan lah chuan mo sual ka ni fel der tawh tih achiang. 

Room ka lut fel deuh chiah tihin Remsanga'n min rawn call ve chiah.Rang fein ka pick nghal vat mai.

"Hello.." zangkhai thei ang berin ka ti a.

"Khawiah nge i awm? " A rawn ti bung vut. Ka beng bul atangin phone ka lasawna, a zawhna mak ti zetin phone ka melh vak ringawt. Khawiah nge maw awm se mintih le?

"Inah.. khawiah nge ka awm anga?" ka ti a. Ka aw a no lem lo viaua,pawi pawh ka ti Chuang lo. Mangan ruk nak laia zawhna awm ang lo lutuk lo inzawh kha ka peih lo.

"A that chu.. " a ti sup.

"Hotelah i lut tawh em?" ka lungawi lohna dah thain ka ti a.

"Lut tawh. Naktukah ka lo haw ang" a ti leh hmuk. Eng chu nge maw a hriata a mood a uih em em mai ni? Vawiin chu tumah hi an dik lo vek zawk nge pawh ka hre lo e a.

"A that chu. Zothana chu Hotelah a rawn lut ve nge?"  alangah erawh chuan ka ti a.

"Ani chu kartawpah a lo haw ang" a ti tawi leh tuk.

"Ah, in lo haw rual dawn maw ka tia..Ih..thil zawh che ka duha, Rempuiin..." 

"Ka hria.. " ka sawi zawh hmain a rawn ti hmuk.

"Eng maw i hriat?" ka ti nghauh.

"A vaiin... Ka lo haw hunah kan sawifel ang. Chuan, Ka lo haw hma chu Nutei leh Mambawihi kha an lo haw rih lovang" a rawn ti leh a. A tawngkam hi a nem ngai miah lo nangin tunah phei chuan a nem lo satliah lo. A tawng dan thupe lutuk chu a nupui ni loin a hnathawk zinga pakhat a bia a ang zawk!! Mahse,a awki hlauhawm lutuk lam aiin Nutei te lo haw lo tura a sawi chuan min tibuai rih zawk.

"An lo haw dawn lo maw? Enge a awmzia? Khawiah nge an kala?" zawhna hlir..

"Tihtur ka nei a, ka dah phawt" tih leh Off a rual nghal a. Angaihna hre loin ka din ngaiin ka dinga. Ka melh ngai ka melh tlawk tlawk ringawt.

PS: "Zanin chu a Tawi,a ngaihnawm loh,a muang den den lutuk" inti dawn. Ka hre vek🤭 Diktak chuan chawlh ka tuma, Mahse naktuk Sunday a ni sia. Hman leh hman loin tlem ka rawn dah. Keipawn ngaihnawm ka ti vak lo😁 Chuan, ka edit lo leh tawh. Ka vahnu Special "Zoeyyy" birthday kan lawm dawn,ka hmanhmawh tawh🤭

He Story hi M&B tehvak a ni dawn lo a..Ka Story hmasa, THIL PAHNIH in ngaihtuahna min pek atanga ka ziah a ni e🤗