MINE - 2

 CHAPTER - 2

Ngaihtuahna khingbai huin nilengin ka awm tluan ta parh. Ka ngaihtuah ngial pawhin tu nge anih ka hre chhuak zo chuang tlat lo. Engpawhnise,pangpar nalh tak a nia,a lawmawm hrim hrimte ka ti vel ta mai mai.

"Lani, naktuk dar 11ah meeting turin lo buatsaih teh aw" haw dawn hnaih tawhah kan puin min rawn ti a. 

"Yes, Staff meeting pangngai a ni em?" ka ti let vat.

"Aih, Business team leh Fiber Team lam  head an lo tel ve anga. Chuan, Business lamah hian thil thar kan nei tlat maia.Ka hre ve chiaha, an Team Director leh Co-ordinator an lo kal tel ve ang. Keini lam chu tel tur list ka rawn dah ang" a ti leh zung zunga. 

Kan hna hi hlawm khata kal ang tak,ni miah si lo a ni a. Thawk ve lem lo tan chuan inhre pawh vek leh hmun khata thawk vek ang mai kan ni a. Mahse,Team hran hran hi kan kaldan a hrang hlak veka, thawhna hming inang vek si hian kan inhre pawh hlawm mang lo a. Business team lam phei chu kei phei chuan ka hre lo lehzual.

Bawihtei'n ka pangpar hawn a hmuh veleh ama ta tur emaw tiin lawm em em in a lo buaipui nghal chat. 

"Khawi lam pangpar nge? Ava nalh ve a. A vih nun theih ang a" ka nuin a lo ti hmanhmawh a. Pangpar leh thlai chin nuam ti em em mai a ni a,neih pawh a nei tha.Thlai rah leh hnah ei chi phei hi chu kan eitur kan intodelh titiha,kan lei ngai lo tih theih a ni a. Inchung zawlah ka u in Green house lian ṭha zet a sak saka, hunawl zawng zawng a hmanna hmun a ni tawp. Kei erawh tihtur ṭul bik ka nei anih loh chuan ka kal chho ve ngai mang lo va, pangpar phei chu mawi ka ti lo pawh a ni lo. Mahse,mi hian nei se ka duhtawka,thlai pawh chin a buai buai ai chuan lei mai awlsam ka ti zawk.

"Ka dawn anih kha" room lam pan pahin ka ti liam puat.

"Ve ngei chuan... Nimin aṭang khan a lerh riau mai" u Sini'n a lo ti vata. Ka hawi leta,ka va ner khum a. Mahse,thil hriatchhuah zawk ka nei. 

Kha pa kha....Aih,a ni lo vang. Ka hnathawhna hmuna pangpar rawn dah tir tiur khawpa min hre chiang-tu kha amah a ni thei lo tawp. Kan inhmu zawk ang chauh ania, chu pawh tawite kan inbia a ni leka. Kan inphurh chhung kha rei mah se Pangpar rawn thawnna tur hmun hre dik chat tura min hre chiang a ni thei lo. 

Office ka thlen veleh Meeting-na tura ṭul ho ka lakhawm nghala,Duatpuii nen kan vir buai zak zak. Helaia Office staff pangngai chauh Meeting anih hi chuan a ziaa.Mahse, Team dang nen anih hi chuan kan inbuatsaih ve angai ṭhina,a buaipuitu ber ka nih avangin ka virbuai thei viau zela. Mahse,ka tih ṭhan anih avangin harsatna ka nei tawh lo.

"Hey,Lan... Kan va inhmu khat ve" Fiber team lama an Boss, Petera'n min hmuh veleh a rawn ti nghal chul. 

"In lo leng duh lo em alawm,Tunlai Inbuai em?" zangkhai takin ka ti let ve nghala. 

"Keini hi chu kan buai reng mai.Mahse,he lam Office chu ṭul feah lo chuan ka rawn thleng pha meuh lo. In lamah ka buai em em bawk a" a ti leha. 

"In naute pawh ka la rawn en hman lo. Pasalṭha ngang hi i nia,Diaper thlakte chu i hnehsawh viau tawh ang a" nui chungin ka ti let ve leha.

"Nau paw chungin ka inbual lo chauh mawle" nui huau huau chungin a ti a. A awm ho kan nui ham ham mai.

"Lani meeting host hi chu kal loh ka ui tlat zela, lunch ringawt pawh thlakhlelhawm...E, Boss,I lo thleng maw?" Kawngkhar lam melh chungin a tih zawm zat. Business team lam an lo thleng anih ringin ka va en ve a, Mahse, ka hriat ṭhin Sir Hlua a ni tlat lo. Bakah,kan lam pana lo phei mek chu ka hmuh hnu a ni..Min rawn en ve a,kan mit a intawng chiaha. Min en danah ka ngaihtuahna ang tho angaihtuah ve tih ka hre thei mai.

"Lan, a sum lam thawkchhuaktu hian Boss  thar an nei a..I la hre dawn tho a,Mahse ka sawi chak tlat..Hei hi, Business lam changtu thar,Remsanga anih hi. I duh leh 'Pu' la,I duh leh "Thianpa" ti la...." a nui zui leh huau huaua,kei erawh chuan a hming lam daih ka lo buaipui. Remsanga anih chuan ZOREMSANGA tihna ania..Tin, nimina kan puin Business team lama thil thar awm a tih kha hei chiah hi a lo nih dawn hi.

"E, chuti law? " ka ngaihtuahnaa thilawm tilang loin zangkhai takin ka ti a. Min Chibai tuma a kut rawn pharchhuah chu ka bana, a kut zungṭang sei leh fai zet chuan ka kut a rawn huma,a hum nghet ṭha ngang mai.

"Pu tih kha chu keiman ka hnawl e..Ṭhianpa tih pawh ka hnawl lehzela..Remsanga nih tawp mai kha a ṭha ang" awki dam leh fiah zetin a ti a. A ha var rual nalh zet langin a ṭhen suk bawk. 

"Okheee,anih chuan keipawh Lani nih tawp mai ka duh..Tak takin,Lani ka nia. Chuan,hei hi ka thawhpui leh ṭhian ni bawk Duatpuii anih hi' Duatpuii lam en pahin ka ti a. Ka kut a humna a thlaha, Duati lamah a kut a pharchhuak leha. An inchibai leha. Hmanni a pa nelawm lem lo tak, ṭawngkam bul hmuk mai, ka Scooty-a rawn chuang ve ngawt kha chu a ang ta hauh lo. Chuan, amah khan "Pu" tih kha duh lo mah se, kan tan chuan Sir Remsanga a ni dawn tih tuman min hrilh angai lo. 

Meeting kan ṭan zui a, meeting chhung zawngin a mizia tur awm ka lo ngaihtuah ve thung. Hna a uluk hmel em em a, an sawi danin kar kalta maia Business lama rawn inrawlh anni a, Mahse network lama kan that tawk leh tawk loh, complaint awm nasa zualte, Sim card hralh chhuah leh customer care lam service  eng kim mai ka rin phakbakin a lo hre vek maia. Thawhpui nuam tak a ni dawn em chu ka hre lo,Mahse hma kan sawn dawn tih erawh ka lo chiang ngam ve tawp thung.

"Remsanga hi chu pa maksak ve tak mai hi ania.College kan kal lai aṭanga hre tawh ka nia. Keini B.E kan zir a,ani kha B.com a zir thunga. Kan inluah naah tho khan a luah ve a, college kal pah khan a inhlawh ngar ngar. A tihtawh lamah chuan ti tlut mai,pa luhlul tawpkhawk ania. A hlawhtling ta em em mai pawh hi a mak lo" Meeting kan neih zawh hnu, titi satliah mai maia sawia kan thut laiin Petera'n a ti a.

"Hna a uluk hmel khawp mai" ka ti mar at ringawt.

"Uluk dawn e, a push nasa dawn che u. Keini pawh min push nasa dawna,ka hre lawk vek nangin pawisa thawkchhuaktu hmasa lam an han inhnuhdawh takah chuan ani kha ka sawi hmuha. Hna dang a ngah avang hian a ngaihven vak ka ring lo a. Mahse,ka rin aiin a rawn bawhzui thaa, a duh naah chuan a lo muangchang lo khawpa " a ti leh duah.

"Um, nia thil pawh a lo hre hnem nghal viau maia. A zirchiang nasa aniang.Awi, Co-ordinator kha ka lainat lawk deuh e a" za vak lo va nui chungin ka ti a. Meeting laia Remsanga bula thu, Palian ve tak tho,thau lam lek lek leh hmel inthlahrung deuh kha ka mitthlaah a lo langa, ka khawngaih tak tak.

"Ha... A nau anih kha,a chhang chiah" 

Phawk zetin ka en a, a sawi ka hre sual zawk emawni...

"Eng maw? A nau maw?"  ka zawh nawn leh hmain Duatpuii zawkin a rawn ti a. Ani pawhin mak a tih ve zia a awah alang thei.

"Um,anau anih kha. Anni chu sumdawnna an khawih apiangin chhungkua zelin an khawiha. Chhungkua hian an ṭangrual ṭha lutuk" ngaihsan hmel takin Petera'n a ti leh a.

Vawiin khan meeting nan darkar 1 zenzawn kan hmanga,kan Meeting chhung khan an inbiak danah unau annihna lai pakhatmah hmuh tur zuk han awm lo va!!!

"Unau inbiak pawhin an inbe lo chu anih kha" ka ngaihtuahna a awm ka sawichhuak nghal pawp.

"Ni chiah mai.Staff leh Boss " Duatpuii'n a lo ti ve chiam bawk.

"Annih dan ve reng anih kha. Unau ropui ka timai. In ngaihven zawng a ni em chu ka hre lo va. TM Shopping mall hi an mahni ta ania. Millenium Centre ang em a lian chu a ni lo nangin a location a ṭha em maia. Dawr kaw khat pawh luah man to tak a ni. Aaa,ka kal dawn. Nangni pahnih bula awm chu ka kal mai thei ṭhin lo,In lamah nau ek suk ngai atam nen" nui huk huk chungin a tih zawma leh duah.

"I daw em mai. Tunlaiah tuman nau ek an su turh turh tawh lo" ka ti let vata. Kan nui ho leh dar dar mai.

Petera kal hnuah Duatpuii nen kan Room lam kan pan chho a, kal pahin hna chungchang kan sawi chho dun mawlh mawlha. Ka rilruah nimin piah a Remsanga ka phurh thut dan kha a lo langa. Nimin khan ka hrilh ang ka tia,hna buai nen ka hrilh theihnghilh a,tunah kan hna peng pakhata kan Boss hming pu tur a lo ni reng sia..Mak a ti ve tho ang.

"Sir Remsanga kha..."

"Awi,mak iti ngawt ang..Nimin piah ka office bang khan amah kha ka phur alawm" ka ti a,a thilsawi tur ka sawi hnan daih. Makti zeta a ang deuh phuau chu ngaipawimawh duh loin kan inphurh dan vel kha ka sawi zawm miah miaha, eng mah sawi loin a ngaithla ve mai bawka.

"Enteh, Pangpar kha..." ka sawi zawh veleh ati nghal hluai.

"Nia... Amah kha a lo nia" za lo zetin ka nui tawi tak mai.

"Awi,mak e.Vawiin khan lo inphur lawp lawp tawh ang pawhin inawm lo reng reng" ati leh hliai.

"Chutianga han awm dan tehvak a awm lo e. Bakah,hna thila lo kal ania. Khatiang lam sawi tur pawhin a lo kal lo va. Chuan, Vawikhat inphurh kha inhriat zui chiam tumna chi pawh a ni hleinem" ka ti duah.

"Nia,ni ve tho a. Mahse,awi.... Keichu chhe lo ka ti tawp asin. A hmelṭha viau pawh chu a ni lo va. A Palian leh pian nalh bawk khan a tilang zahawm ka tia.Chuan,a sam meh dan kha a inhmeh ka ti bawka.Aaaa,hmeltha si lo khan a chhe lo,a langsar ngawih ngawih ka ti mai" duhthawh em emin a ti leh bawrh bawrha. Kei erawh chuan mak ka ti hran lo. A Mipa duh zawng reng reng Palian lam zel anni a, fiamthuin "City Police zingah pasal ka zawnsak ang che" ka ti ṭhina. A nui vak vak ṭhina. Mahse,Palian lam duh em em si hian a bialpa erawh Palian lem lo tak a ni leh tlat lawi.

"Palian duh si,duh si lo" ka nui a. Ngei hmel zetin min rawn en a, lei ka lo chhuah khum ve thung.

Chau zetin in ka thlenga,kan hna hi nuam ti em em mah ila,achang chuan Timing a nei lo lutuk hi ka ning ve fo tho. Kal lamah hi chuan hunbi kan nei ve a,tlai lam erawh chu dar 5 tih ni mah se dar 7ah te kan haw chang a awm fo. Vawiin tlai pawh ban tlai ni a ni lehpeka,kan hna thila pawimawh,ka hnuaia miin lo tihfel loh zeuh a neia, office pum buaiin kan buaia, ka lo hmuh hmaih ṭum tak a lo ni bawk nen,kan pu thinrimin ka hminga min ko sek mai kha a ri ka bengah a khat vek nimaiin ka hria.

"Naktukah i ni an zai dawn a" chaw ka ei laiin ka nuin a ti a. 

"Tu ka ni ber?' ka ti satliah.

"I ni Tetei. A hnute a lo Cancer a, a rang lama zai an ti a" a ti leh a. Ka chaw ṭhial lai ka tawp hmak. Diktak chuan ka pa thihna khan min la fana,fanu neihchhun leh ka pa duat bik ngawih ngawih ka nih avang khan ka tuar em em a, ka ni a Cancer veleh tih ka hriatna chuan ka pa thi ka sunna a kaitho nimaiin ka hria.

"Engtikah nge an hriat a?" ka ti dul raih.

"Kar hmasa lam aṭang khan an buai an buai tawha. Vawiinah an hre chianga. I Pa Rinthanga'n zai nghal theih chuan zai a dila,an zai nghal dawn a ni awm e" a ti leh a. 

"A va zia lo..Aman na a ti em?"

"Ti vak lo aniang. I pa te unau hi chu an chhel khawpa" ka nuin a phone khawih mawlh mawlh pahin a ti awlsam leh mai. Eng mah ka sawi zui tawh lo a,Mahse tihtham ka la ei lo chungin ka rilṭamna zawng zawng a bo vek tawh.

Roomah mu chungin Pubg ka khela,Mahse zanin chu ka khel tui thei tlat lo.Ka ngaihtuahna a kal dik lo laklawha,ka mood a off ngawih ngawiha, kan start chauha,ka thi zel maia. Khel zui peih loin dar 10 velah ka mu ta daih.

Ka alarm riin min tiharha, tho mai loin ka mu deuh vang vanga. Mahse, ni 2 lai gym ka kal tawh loh avangin ṭhulh ka duh tawh lo a. Zawi angreng fein ka tho a. Nizan ka muhil tur ka ṭap khanglanga,ka lu a na bur bawk nen, vawiin chu mood a off dawn khawp e.

Office ka thlen veleh nimin lama min hau lo ang maiin Boss-in min lo be nghal bawrh bawrha. Ani hi chu pa ṭha ngang hi ania, hnam dang a ni nangin Office staff zingah ngaina lo kan awm lo.

Kar a liama,rin lawk ang ngeiin Remsanga te lam aṭangin min push na nghal talh talh viau mai. Chutihrualin hmasawnna pawh a hmuh theih nghal ruak bawka. Eng emaw kawng takah chuan Customer complaint tam lutuk pawh a zia chho zawt zawt mai.

Hna ka thawh mawlh mawlh laiin Petera'n min rawn call a,ani nen hi chuan Office khatah ṭhu chiah lo mah ila kan innel a, kan infiam nasa thei ngang mai bawk.

"Ka cousin-te an lo kal dawna,an hawi tawi ve khawpa,lo buaipui zuai i hman angem?" A rawn ti lawng lawng.

"Hman tehreng e, an lo thlen hunah min rawn zawng mai se,a pawi em?" ka ti let ve nghala.

"No,pawi lo nasa ang chu le. I awm hi chu a hahdamthlak thei thin.E, Lan...I number hi Remsanga ka pe ania. Business team ho Boss kha" a rawn tihzawm leh zat.

"Eh, engati why?" nui chungin ka ti ve a. Ka number a mamawh chhan tur chu hna thil bak a ni dawn lo va. Mahse,kei nen chuan hna thil sawi dun tur kan neih ka hre thiam chiah lo.

"Ka hre bik nang,nula leh Tlangval te chu.." a nui zui kur kur a.

"Eh,chu kan Boss em em chu Tlangval a lo la ni maw? " Duhdah zetin ka ti let a. Remsanga hmel ka mitthlaah a lo langa, nupui nei lai ni turah ka lo ngai ve ngawt kha ania.

"Ni chiang e. Mahse,hlau suh.A hlauhawm vak lo ang.Bakah,a duh chi i nih chuan i chhuak dawn chuang lo bawka..I hnar zo dawn lo ka tihna anih chu" nghal zetin a rawn ti leh awt awt a.

"Lutuk che hian...Nula senior hian hlauh ka nei hleinem. Aaa, thil ka ei lawk dawna,ka ei hlana i cousinte chu an lo kal chuan min lo nghak mai rawhse aw" 

'Ok.. I thu ang zelin le"

Nui bawk bawk chungin phone ka daha, Duatpuii'n nen Lunch eiin Office bul lawka Fast food restaurant-ah kan kal zui nghala,kan let leh veleh inhnuai lama ṭhu ho hnenah min zawng an awm leh awm loh ka zawta, tumah chutiang an a loh thu min lo hrilha. An lo la kal lo chu a ni phawt ang.

Ka phone charge lai ka kalsan avangin ka ṭhutna ka thlen veleh ka ban nghal vat. Telecom mi leh sa nih chuan, Englaipawha Phoneah thil hmanhmawhthlak lo kal thut thei reng anih avangin phone hi kalsan mai mai chi kan ni ve lo. Mahse,vawiin chu Battery ka nei tlem lutuka,lunch chhunga kalsan loh theih loh a ni tlat.

Notification atangin whatsapp msg ka en a,number pakhat atanga ka msg dawn ka open vat. Petera Cousin te annih ka rin laiin ka rin loh lutuk lam a ni ta thung.

"Hello...I biak theih em? Remsanga ka nia"

A rawn thawn hun ka en a, minute 15 vel a liam tawh.

"Yes..Eng thil nge ni ta?" tih ka thawn let nghala. Petera khan ka number a pe a ti tak alawm.  

Ka rin loh takin a rawn reply nghal vut "Office hour anih vangin hna lo kan sawi thei lo tihna a ni em?" 

Reply ta mai loin ka phone dawhkanah ka dahthlaa, kan room a midang ṭhu ve ho chu min rawn en leh en loh ka en kuala, tuman min en lo...Eng nge maw ka awmzia le? Min biak tum dan hi hna thil anih chiah loh hmela,chu chuan minti lai khanglang zawk emawni??? Min biak duh chhan leh eng nge a sawi tum pawh hre chiang hmasa hawt loin ka lo phili nghal vak ringawt maia. Ngaihzawng hmu zo lo, mipa-in an biak hleka phili nghal vak ka inchana, awmze nei loin ka nui chhuak nghal hak mai.

"Engpawh kan sawi thei turah ngai ang" tih ka thawn let a. Ka chhungrila phurna mak deuh awm ta tlat chuan min ti dik hleithei lo.

"Ok...Anih chuan nula leh Tlangval inbiak dan tur hi ti ila.." a tawpah emoji hnar sei zet a rawn daha. Amah zawng zawng nen a inhmeh ngang mai.

"Pawi hleinem' tih chiah ka thawn let.

"Sorry..A Neitu an awm anih chuan?" Laklawh zetin a rawn ti a. Hnaah khan vawikhat kan hmuh naah pehhel a nei lo hle a. A duh kha a sawi pawp pawp maia. Tunah a rawn sawi dan teh tawp pawh hi amah nen a inhmeh ta riau zawk. Bakah, Petera-te nena college kal rual pha anih chuan kum 35 a tling tawh hrim hrim.A la tling lo anih pawhin a teuh hle ang.Chuvangin duh zawng sawi tlang ngam rual a ni tawh.

"Chutiang an awm lo turah ngai ang"

Msg a seen nghala,Mahse a offline zui ta daih. Msg ka delete leh mai dawn mawni tihte ka ngaihtuaha,Mahse puitlin loh thlak ka ti bawk si..Aaaa,min chhaih kual a tum vaih chuan a chak lo viau ang.

Thunawi : Cover photo vang hian Manchester City fans ka ni tihna ni lo😄 amah tawp hi ka duh em em .Keichu A PAWL lam pawl ka ni e💙💙 Tin, Phone atanga type ka nih avangin a sei tawk thei lo ka tih kha aw. Ka theih tawpa sei chuan ka ziak ve ngei bawka🤭 chuan,ka ennawn hman lo va,inkal thelh lai leh hawrawp dik chiah lo a awm anih chuan lo ngaidam leh thlap thlap mai teh u🤗