MINE- 3

 Chapter - 3

Ka haw hma zawng chu hnaah ka buai zuia,Mahse ka rilruah erawh ka msg lam bak a leng lo. A khat tawkin a rawn reply tawh em tih ka en leh ṭhina. A reh zui ta vung vung si chuan eng emaw ti takin min ti hrilhhaia. Min biak dan kha hna kaihhnawih a ni lo tih ka hriaa. Duh aiin ka lo phur lutuk zawk nge mawni?? Ngaihzawng nei ngai lo pawh ni hlei lo, Msg pahnih khat lekah engvangin nge maw ka buai chiam kher le???

Ṭhalai inkhawm zan a nih avangin inkhawm hman hram tumin hmanhmawh fein ka inkhalh haw a. Ka hna avang hian Active tak tur chuan ka thei lo va. Mahse,ka theih phawt chuan inkhawm erawh ka inkhawm ziah thung.Inkhawm banah ding khawmuang loin ka haw nghala,kan in atangin Biakin a hla deuh a. Scooty ka keng mai ṭhina,zanin erawh ka nau-in a kalchhuah-naah bungraw ken ngai a neia. Bike-in phurh chi anih loh avangin Scooty a hmanga.

Kan in panna tur Step thui zet maiah kan thenawm nula nen kan kal chho duna. Step thui em em mai han kal hi chu ka leh hnar 2 ve ve neih a chakawm rum rum zel mai.

Step atangin Kawngpui kan chhuakchho a. Hah zetin kan dinga,kan thaw dun hlawp hlawp mai.

"He step hi chu ngaiah ka nei thei ngai lo" hah vanga thaw deuh hlawp hlawp chungin ka ti a.

"Niang chu. A chhoh dan hi ulh deuh nisi lo hian a hahthlak,kal a nuam lo.A siamtu lam hian an siam thiam lo aniang" nui chungin a ti a. Ka nui ve hak mai. Step kal hahthlak tih vanga a siamtu han dem daih lai kha a nuihzatthlak riau.

Kan kal ṭan leh chiah tihin kan hnung lam kawng aṭangin Bike chak lutukin a rawn tlan a,Kawngsira kal mah ni ila a sir lehzual kan pan dun nghal rawk rawk.Mahse,ka tlai hman ta tho.

Ri bur ka hriat rualin ka leng lawpa,Kawng kama dawrte,Rangva hlanga an sak ka va tauh pawpa. Ka taksa a hit zui mup bawk.

"Awi...Lani, min pui ru.." awmze nei lo deuha Atlani au ri tengtung chu ka mang hriat deuh ruai a, ka taksa a rawn lum leh pup rualin ka mit deuh sulha. Mumalin eng mah hriat ka nei zui tawh lo.

Chiang lo angreng takin min chawikan lai leh Motora min tlanpui lai ka hre leha.Ka taksaah na a awm pawh ka hre lo a.Mahse,ka mut a chhuaka, intihharh leh chet ka tum ngial pawhin ka hlawhchham ṭhak. 

"Lani,muhil suh aw. Meng hram hram teh" aw ka hriat than takin min tih ri chu hla tak aṭanga rawn ri ang mai hian ka hre leh a. Ka lu a rawn sawi pawh ka hre theia.Mahse ka meng hleithei chuang lo. Maimizial-in ka awm ni berin ka hria.

Motor ding deuh datah ka meng zawka,ka lu hai lutuk avangin ka mit ka chhing lehnghal hmiah. 

"He lam aṭang hian lachhuak ang. A ke lamah khan rawn chawi mai rawh" Mipa awin a ti a. Ka thil hriat eng mah a chiang lo. Min kalpui tih ka hre leha, eng nge anih hre tur pawhin ka meng ngam tawh lo. Ka men leh chuan ka luak ngei ngei dawn tih ka chiang.

"Bike-in a su a, thisen a hloh hnem tawh angrenga" 

An inbe ri ka hriat danah keimah min sawi tih ka hria.

"A chhungte an awm em? Amah hi a harh nge harh lo?" Ka mit a rawn keu a,ka mengchhuak lo thei tawh lo. Mahse,ka hlauh ang ngeiin ka men rualin ka luak zui nghal chu a nimai.

Tui hal huam huamin ka harh hlawl mai. Thawh kan mai ka tuma,ka chet ruala ka lu hai lutuk avangin dimtein ka mu thla leh riai riaia, che ngam tawh loin ka mu khawng at ringawt.

Reivakloah Kawngkhar inhawng ri ka hriaa. Huphurh ru em emin muangchangin ka mengchhuaka,khum lam pana ka nu leh u Sini rawn inzui phei ka va hmu a. 

"Eh, ilo harh elaw? I harhna a rei tawh em?" Ka nuin rawn thut hnaih pahin a rawn ti a. Ka chhang mai dawna,ka dang a ro lulai lutuk.

"Tui i in duh em? " U Sini zawkin a rawn ti vat. Hmui phunin ka chhanga, u Sini'n khum bula locker aṭangin no leh bottle a la chhuaka,tui a thli lai pawh chu ka lo it ngawih ngawih hman.

"Kha le" tih pahin ka hmui bulah a rawn lek hnaia. Straw ka hmuiah a rawn vuaha.Rang mangkhengin ka hip nghal vat. Ka dang ro lutuk a hnawng nghal nangin ka duh angin a tui lo. In pawp pawp ka duh zawk.

Keimaha in mai tumin no lak ka tuma,Mahse ka hman thiam lam ka ban ka lekchhuah zawngin a na nghal zawka. Inring hman loin ka ṭe ṭhawt a. Ka nu leh u Sini an "E" rual ṭhawt bawk.

Ka ban veilam ka en a, ka kiu leh banrek inkar an lo tuam var luk chu niin. 

"I che thut thut zel mai sia.A buaithlak mang tak e.A na viau em?" Ka nuin a ti nghal mawlh mawlha.

"Engtin chiah nge ka awm?" ka ti ve thung.Bike-in ka inkhawm bang min su tih ka la hriaa. A tirah khan na ka neih ka hre lo. Ka lu hai leh mutchhuak bak kha problem awm pawhin ka hre hek lo.

"Bike-in a su che a. I ban ruh kha a tliaka. I mal pawh" ka nuin a ti a. Awlsam angreng taka sawi angin lang mah se a awah chuan thinrimna a hriat theih tho mai.

"I ṭha leh mai ang. I buai thei em a,chawlh ila hreh bawk si a. Chawlh i la a ni mai aw" nui hak hak chungin u Sini'n min ti ve a. Mahse,ka ngaihtuahnaah tu nge min su ngawt tu kha tih lam daih a lang ve thung.

"Tu nge min su tu kha?"  ka ti sep.

"Tleirawl hawk lak mai mai mawle" u Sini'n a ti bul hmak.

"A na ve em?"

"Na vak lo e. A vannei khawp mai" ka nu zawkin a ti a. Ka ban an tuam var luk mai chu ka en a, Ka kut na lo lamin ka puan sin ka pawt hlim a, ka mal ding lam an cher khawng bur mai ka zuk hmu lehnghala. Ka hnim sulh a, sawi mai tur ka hre lo.

"A chhungte an fel khawp a. An rawn ngaihven nghal che a,kan chet ve pawh ngai loin min buaipui vek maia. An inthlahrung bawk si nen. Hei,Cabin-te pawh kan han chang maithei a. Hmelhriat an nei ṭha aniang,an ngaipawimawh khawp khan ka hria,an mahni tak pawh an khawngaihthlak letling a. Vawiin pawh an rawn awm renga" ka nuin a ti leh charh charh. 

" Min zai nghal tihna mi?"

"Aw,an zai nghal che a. Rinai takin i harh thei lo lehnghala, minti mangang lek lek hmana. I luak bawk si nen khan i kawchhung lam a khawih aniang an tia. Mahse,eng em a lo ti lo hlauh a.I tluk paha bang i va tauh vang khan i lu a hai aniang. A tihzia angreng tak tak a ni.Vanduai vannei i ni tak tak ania" a ti leh a. Nia,vanduai viau mah ila ka la dama,ka vannei. Mahse, ka ban leh mal ruh tliak hi a dam mai dawn lo..Ava han lawmawm lo tak.

Ka nuin min hawsana,Zana riak turin Ruata nen an lo kal leh dawna. Ka chet theih miah si loh avangin mi pahnih tan lo chuan riahpui ka hautak viau dawn tih a lang reng mai.

Eng eng emaw u Sini'n a sawi a. Titi ka zawm ṭha peih vak lo. Min rawn sut dan leh ka awmdan vel a hriat ang ang min hrilh siam siama. Motor a min tlanpui Laia Mipa aw ka hriat kha kan veng YMA president a lo ni a. Min rawn sutna thlang maiah khan an awm a, Kuhva lei tura a kal chhuak,haw leh turin min su lai kha a lo hmu a. Min rawn buaipui vat tih a sawia.A hunlai khan a aw kha ka hriat hnu a ni tih ka hriaa,Mahse tu nge anih erawh ka hre chhuak zo lo.

"Ti nge min rawn sut ngawt le?" ka chhungrila zawhna awm ka sawichhuak nghal sap.

"An in race a, balance a hloh an ti anih kha..I u phei chuan kutthlak mai a duha,I u thinrim ka hmuh Vawikhatna a ni hial ang" u Sini'n a ti nghauh.Nia,ka u tluka pa zaidam hi ka la hre ngai lo va. Ka naupanlai aṭanga vawiin thleng hian a thinrim vawikhat bak ka la hre lo.

"Engtin nge ka u chuan a tih tak a?" ka ti leh sep.

"Mumal taka inbiak pawh ala awm chiah lo a. Mahse, khapa u kha nangmah hre tu a lo ni hlauh maia. Chuan, I u hnenah khan engpawh kan pawm vek,kan thiam lo a sawi tur kan nei lo atia.Mahse,I harhchhuah hun nghah phawt kha an tia. An mangang bawk si nen,I harh takah chuan i u chuan ngaihdam mai a duh leh ka ring. Mahse,I thu thu ania. A tuartu i ni bawka,keini lo sawi ve tur awmin ka hre lo" a ti leh duah.  A sawi ṭeuh nangin ka ngaihtuahnaah erawh tu nge min hre tu tih lam daih alang lian ve thung.

"Tu nge min hre tu chu? A hming i hria em?" 

"Awi..Tu nge kha le? Zo-a an ti em kha aw? Ka hre tawh lo. I hmelhriat tih bak eng mah in inhriat dan lam ka lo hre lo a. Kei phei chuan ka hmu thawi thuak ringawt a' a ti leh niah niah.

"Um..anih chu" ka ti zuai raih. Zo-a tih hmingpu ka hriat ve chu kan venga mi daih ania. Ani ni se ka u te leh ka nu te tam hriat loh tur a awm lo.

"Min rawn hrilh thut kha ka nu a chau titiha, Ruata lo awm bawk si lo. Kan hamhaih lutuk kha kan phibuai vek a. Mahse,kan chhungte ho damdawiin lamah chuan an rawn thleng khawm a. Kan thlamuang ta huaia. Nang meuh khatianga han awm ta chu kan buai chhia a ni ber e" nui chungin a ti leha.  Eng mah sawi loin ka nui ve ringawt. Rik thutah hian ka nu hi a chau mai thina, u Sini lah mi phili chi a ni lo ni ve a. Thu thinṭhawng deuhah chuan ka laktlak zaw ber tlat zel.

Ka taksa a rawn naa, khawsikin chhungril aṭangin min ṭhâm a. Min rawn jection nghala, na chhawkna a thawh rualin ka muhil zui chu animai.

Ka harh veleh ka nu ṭawngri ka hre nghala. Thu mu deuha awm ka nih avangin ka hma zawna kawngkhar awm aṭangin pawn lam ka hmu theia,khua a thim tawh tih ka hre thei a. Damdawi eng eng emaw ka taksaah a lut hnem bawk si nen ka awm mai mai pawh ka hai deuh chhu reng maiin ka hriaa. Na ngawih ngawih sawi tur awm rih lo mah se ka nuam lo em em tho.

Ka nu ṭhutna lam ka va hawipheia. Ka rin loh lutuk ka va hmuh takah chuan ka mitvai emaw tiin ka hawisawna. Mahse,ka ennawn leh pawhin ala ngai reng tho.

" I harh maw? I ril aṭam em? Hei i thianpa a lo kal leha" tih pahin Remsanga a en a. Ka lo ip chawih thung. Diktak chuan thian han tihtur zawng kan ni lul lo mai.

"I zia deuh tawh em?" Min en reng chungin a ti a. 

"Um, zia e" zawi angreng takin ka ti tawi tak mai. Engtin nge maw ka Accident tih a lo hriat ni? Office lamah chuan an hre tawh ngei anga. Mahse,anni Office lam leh keini lam kan inpawh dan a ler tlata. Chu bakah kan office a pawimawh ber ka ni hek lo.Petera'n Duatpuii hnen atangin a hria anga, a lo hrilh ve pawh a ni mahna..Huizzz,ka ngaihtuah peih rih lo.

Ka nuin "Ka Kuhva ei phak zia chu a" tih leh thawh a ruala.Toilet a pan nghala, Remsanga pawh a ding ve vuta.Ka khum bulah a rawn kal hnaia,Khum bula Chair a pawt hnaia. A rawn ṭhu thlaa, ka rin loh zetin ka puansin a rawn zena,ka kut a rawn hum nghal chat.

"Pawi ka ti takzet.. Dam vat la ka ti" zawi fiah zetin a ti sup a. A ṭawng zawi lulai em a,ka nu tan hriat ngaihna a awm lo.

Ka kut a vawnna a thlaha,a thu mar zui nghal daih.Ka nu a rawn chhuaka,Kawngkhar inhawng leh Ruata ṭawngri ka hre zawm nghal zat.

"I lo thleng thei maw?" Ka nuin Ruata hnenah a ti a. 

"Um,jam nasa bawna. Ee..Zoa chu ilo kal leh nimaw?" Remsanga en pahin a ti a. A thil khai ho locker chungah a hung paha. "Zoa" tih khan min tiharh deuh zawk.Vawiina u Sini sawi,Zoa atih kha amah ngei hi a lo ni dawn anih hi a. Nichin lawka a chet dan mak ka tih em em pawh kha a nau nikhua lo zetin min sut vanga thuphachawina lek a lo nih bawk chu a.

"Um, lo kal leh zuaia. I lo thleng chiah nangin ka kal ve nghal mai ang" zangkhai vuhin a ti a. Thu tawh loin a dinga, kawrlum phiar, pawl tak zet leh kamiz var tha tak a nghawnga rawn lawr chu a inhmeh ngang mai. Vawi 3 ka hmuhna a ni taa. Duatpuii'n chhe lo a tih kha ka pawmpui ṭan tih ka inhria.

"Engin nge ilo kal? Motor anih chuan a Jam nasa lutuk a" Ruata'n ṭha takin a ti let nghal a. An inbiak danah leh en danah chuan min suhlum thelhtu nen unau annih vanga huatna lam eng mah a lang lo.

"Scooter ka keng a. 2wheeler chuan tihdan a awm mai ang..Ka kal ange, naktuk lamah lo kal leh ka tum anga. Pawimawh leh mamawh a awm chuan min lo hrilh anga" a ti a. 

"Akhai,hei nunna em kan chan lo va. Inthiam lo lutuk duh suh u. Engkimah min buaipui a,a lawmawm lutuk" ka nuin a lo ti ve vat.

"Kan inthlahrung takzet a ni ber mai e' a ti leh sup.

"Kan ṭha leh vat mai ang. Kan chhungkuaa kan mi chak ber ania. Pathian zarah a ṭha leh mai ang" ka nuin a ti leh sawk sawka. Nu ṭha leh inngaitlawm tak, miin nuam lo an ti ang tih hlau reng renga inthlahrung reng mai chi a ni a.Remsanga inthlahrunna khan amah lamah inthiam lohna a neih tir leh der tawh tih ka hre thiam mai.

"Nia, a dam leh vat turah ka beisei a" min rawn en a. Ka lo en ve chiah bawk nen kan mit a intawng chiaha,en rei ngam loin ka hawi sawn nghal vat.

A kal hnuah ka nu ten an sawi zui mawlh mawlha, min sutu kha a nutei fapa a lo ni a. An khawsa ho veka,amah kha tleirawl tha za rual,an duat sual ve tak a lo nih hmel.

Karhnih tling lo hret Damdawiin ka awm hnuah ka chhuak thei ta hram. Ka awmchhung khan Nitin Remsanga a lo kal ziaha. Vawikhat a nau hmeichhia leh Mipa an lo kal ve a. Min sutu ber kha chu a lo kal lo. An nutei pawh inentir tura phai lama a kal lai anih thu an sawi a. Lo kal a duh zia te pawh an sawi luam. Remsanga a lo kal reng rengin rei tak phei chu a awm ngai lo va. Min be hurh ngai lem chuang hek lo. Keipawhin a tihtur rawn ti satliah ve maiah ka ngaia. Mahse,ka chhungte nen erawh an innel a,an inpawh em em tawh thung.

Ka thawhpuite an lo kal chamchi a,Duatpuii phei chuan zan 3 lai min rawn riahpui a. Kan Boss pawh vawi tam a lo kal hmana. Hna lam ngaihtuah hah miah lo turin min ti a. Hnaa kan buai theih zia ngaihtuah erawh chuan ka hna lo khawih zawmtu tur ka lainat angreng.

"Damdawiin bill zawng zawng kha an lo pe vek a" chaw kan ei laiin ka u in a ti a. 

"Nia, a zahthlak lam lamah te a kala' ka nuin a ti ve vat.

"Zahthlak pawh ka ti lo. An mahni vanga thleng ania. Chu pawh tihpalh nimahse ngaihdam harsa ber chi a ni tlata. Bill-te chu an pe tur alawm" u Sini erawh chuan a ti hlak hlak. Eng mah ka sawi ve chuang lo nangin u Sini ngaihdan ang tho kha ka ngaihdan a ni ve tlat. Sum nei lo pawh anni lo va,an tihtur an ti veah ka ngai mai.

"Nia,a ni tho a. Mahse,Chhungkaw mize ṭha tak chu anni ka ti tho mai" ka u in a ti leh a.

"Nangte chuan mi zawng zawng ṭha ti hek che" an nuin a ti hlaka. Ka u a nui huk huka, sawi zawm tawh loin thildang kan sawi ta zawk.

Chawei kham hnuah roomah ka ṭhu mu a,ka bulah Bawihtei a mu ve kak bawk. Ka lu a hliam awm ṭhui angaih avangin ka sam an ti kawlh veka. A khuh nan ka tuama, khavang khan ka haw hlim kha min hlau tlat mai peka. Mahse, rei vak loah min hlau lo zui veleh mai bawka.

Kan chhungte leh ṭhenawm hnai an lo lut lat lata. Tu tu nge lo kal ka hre chiah lo nangin ka ni ṭawng ri lawng lawng erawh ka hre thei.

Thla khat dawn ka bawksawp hnuah ka zia ta viau. Zai rat rat chungin ka inbuala. Mahse, bathroom Room Kawngkhar rawn beng ri avangin ka zai tawp chawt.

"A-ni, mi an lo kal" Bawihtei'n a rawn ti lauh lauh.

"Ka inbual zo tep.. Min lo nghak rawhse" tiin ka au let a. A kalsawn lehnghal nitur a ni. Thawm awm loin a reh vang vang mai.

Ka theih anga rangin ka inbuala, ka inbual zawh veleh kawrlum lian leh thawl hek hawk ka ha a, Pyjama lian angreng tak ka ha leh a. Ka sam erawh ala sei lem lo bawka ka hru thuak thuaka ka duhtawk mai thung.

Sitting Room a lo ṭhu erawh ka beisei loh lam a ni. Ka chhuak thawm hraiin ka lam a rawn hawi vut a, kei erawh chuan a lo hawi hma aṭangin tu nge anih ka hre tawh thung.

"Nang alaw? " Amah ep chiaha ṭhuhtthlak pahin ka ti a.

"Um.. eng nge i an a?" zangkhai vuhin a ti a.

"Ka ṭha tawh lutuk. Naktuk aṭangin hna pawh zawm ka tum a" 

"Ah,chuti law? A la hma deuh lo maw?" tih pahin a phone a khawih pah mawlh mawlh.

"Ka chawl rei tawh angrenga..In kal tawh dawn mi?" U Sini leh Bawihtei rawn inkaichhuak mek chu ka biak zawm zat.

"Aw, kal vat ila,I u ruala lo haw leh thei turin" a ti a. Choka lam a pan phei nghala.

"Lan, Thingpui hi thlit mai turin ka rawn chhawp ang aw. Induh hunah lo in mai ula. Ka nu hi inchungah a chho bawka' a ti leh zung zung a. Kan nula an khaw lama a haw lai anih avangin ka nu aikal lain a chawl riha. Vawiin chu u Sini pawh Bawihtei School kalna tur vel buaipui angaih avangin a chawl ve bawka.Mahse,Bawihtei'n an lo haw hnuah a ha a tauh bung peka. Chu chu entir turin an kal chhuah leh angai ta tho.

"Ngai lo..Nakinah ka lo thli mai ang" ka ti a. An kal tur Bawihtei'n min Bye bye lauh lauha,a hmui vung kawh bar nen a nuihzatthlak reuh ngang mai.

"Hna lam inbuai em?" Sawi mai tur hre loin ka ngaihtuahnaa awm hmasaber ka sawi chhuak tawp. Kan pahnih chauha han awm takah chuan ka lai leh hu tawh.

'Buai tho mai.." 

Min chhang tawi teh tawp lutuka sawi zawm leh mai tur ka hre lo..

"Hna kal turin i ṭha chiang chiah maw?" amah zawkin a ti leh sup.

"Chiang chuan ka hria...Scooty erawh ka la khalh ngam dawn lo a' 

"Nia,khalh loh a fuh zawk ang..Lawk, khawiah nge Toilet hi le? " a tih zawm leh daih.

Common Toilet awmna ka kawhhmuha,a kal chhungin Choka lamah ka kal phei ve nghala. Thingpui ka thli chhuaka..A hmeh tur nen ka chawi pheia. A lo let leh hmain ka ṭhutna ngaiah ka lo ṭhu fel leh than.

Reipawh ka ṭhut hmain a rawn let a, a ṭhutna ngaia thu tawh loin ka ṭhutnaah a rawn ṭhu ta thung. Atthlak angreng takin ka insangmar nghal ṭeuh mai.

"In la...' ka theih anga zangkhaiin ka ti a.

"Um.. Mahse, in hmain thil dang sawi phawt ka duh" a aw a ring lem lo nangin a chiang viau.

" Sawi la... Eng thil nge ?" ka ti zangkhai vah.

"A hun lo viau maithei..Mahse,I accident hma ni a ka sawi kha sawi zawm ka duh a..."

"Eng nge i sawi le? Ka va hre mai tawh lo" angaihna hre lo zetin ka ti ha mai.

"Um.. Nia,ka nghak rei tawh khawp mai. A Neitu kha an awm lo anih chuan...." 

"Ah..." Insum hman loin ka tichhuak nghal halh ringawt.

"A neitu nih ka duh tihna anih chu..." a ti nghet leh charh mai. 

"Mahse..eng...." Sawi tur hre loin ka riatnawi kual ta vel mai mai. Diktak chuan a sawi dan teh tawp hian min ti hamhaih lutuk tlat.

"I single chuan keipawh ka single a.. ka bialnu atan ka duh che. Ka sawi chiang tawk em?" Mahni inringtawk em emin a ti leh a. 

"Ka... Eng lo......." Sawi zawm tur hlawl ka hre lo.

"Yes nge No ?"

"Ka hre lo..."

"Ok... Yes tihnaah ka ngaia..."

Ka chhan leh hmain dimtein ka khabeah a rawn dawma. Amah en thei turin min kuai daka.. A hmelpa zet mai chu ka en ta ran mai...

Thunawi : Phone atanga hawrawp sing dawn han type zet chu mit hi a phe vel vek chu a ni e🥺..Zanin phei chu a sei viau nangin a ho angreng tawpa🤗 Chuan,naktuk zan hi ka chawl thut maithei aw....