MINE - 5

 Chapter - 5

Ka phone nghawr dar dar thawmah ka phu vaka, eng chen nge ka din ngaia ka din ka hre lo. Khuma ka phone awm chu ka zuk en a..Remsanga!!! 

Pick loin ka ring tawp tir a, a rawn ti nawn lehnghal a,ka la che chuang lo. Ka ngaihtuahna buai nuai nuai a fim hma chuan biak ka duh lo hulhual. A tawpa, msg a rawn lut nghala. Thil hlauhawm lutuk khawih tur ang maiin ka phone ka ban de de a, ka lakanga, notification atangin Remsanga msg ka en a.." I muhil tawh nih chuan Muttui aw" tih a lo thawn a. Reply loin ka phone khumah ka dah leha,beidawng tihngaihna hre loin ka thu thla ve nghal hnawk bawk.

Muhil thei loin ka let tawn seka. A tawp atawpah chuan ka thuchhuak ta hlawl. Ka ngaihtuahna a buai vel nuaih nuaiha, atawpah angai bawkah ka lut lehzel tho.

Remsanga hian a nu lantu kha ka ni a ni tih a hriat loh ka ring miah lo. Anih si chuan eng vangin min ngaihzawn si? Phuba lak tumna a ni mai angem? Mahse engvangin keima chungah daih phuba a lak ang? Zawhna hlir,chhanna awm chuang si lo...Ka ni-in mi pasal a chhuhsak tih hi hre ve em em mah ila,ka pian hma thil daih anih avangin tute nge annih ka hre lo hrim hrim a.A pasal fa hmasate tu nge annih lah ka hre hek lo.An Intlawhpawh zui miau loh avang leh kan chhungkaw lam atang pawhin an chanchin sawi a awm ngai lo tlata. Hriat ngaihna a awm lo a. Mahse,zanin khan ka nu khan Remsanga nu hming kha a hre dik tlata,achhan ka lo ngaihtuah kha a nih dan ni loin ka ni pasal nupui hmasa tih a hre zawk a ni ngei ang. Anih chuan a nutei khan kan awmna leh ka nu leh pa hmingte min zawt a, a hre vek a eng mah a sawi lo tihna ania...

Chhum lo chat loin ka ngaihtuahnaah thil chi hrang hrang alang indawt zuta, ka ngaihtuah chhuah hmasak dik loin ka hriaa,adang ka ngaihtuah leha, dik lo in ka hre leh zel bawk si. Huiham, ka tihtur chu Remsanga biaka, kan inkar tihtawp animai. Mahse, phuba lak nan min hmang tih min hrilh ta se ka na hle ang tih ka chianga. Reilote chhunga amah ka rin hman zia hi phat rual a ni bawk si lo.Ka kehchhe vek ang a, Mipa  dang melh leh tur chuan hun ka mamawh rei viau ang tih pawh ka chiang.

Kha number kha tu number nge ni ta ang?  Engvangin nge khatiang min rawn hrilh kher? Ka ngaihtuahna a vir zawka. Kan Company number ni lo mah se Airtel lama ka hmelhriat te ka entir thei tho ang.

"I Gym dawn na nge?" Ka nuin min hmuh veleh a lo ti a. 

"Dawn lo mai.." 

Khawvar dawna darkar chanve vel ka chhing sek bak kha ka muhil ta miah lo a. Eng mah ka ngaihtuah fel chuang der lo. Ka lu a naa, ka mit a thial urh a, ka luak a chhuak deuh hlui bawk.Chuvangin zingkara taksa sawizawi lam pawh alang lo.

"Nu, Remsanga nu kha engtin nge i hriat a?" Thingpui thlit pahin ka ti a.Satliah thei ang ber turin ka aw ka control nasa viaua,Mahse a khur deuh dar dar tho mai.

"Aw....A, ka hria animai" a ti liam puat. Engvanga han zep kher nge anih ka hre thiam lo.

"A hmain i sawi si lo a' ka ti leh a.

"Ka hre hleinem. A nutei hming i sawi khan a ni awm mange ka ti mai maia" a ti leh tlat.

Zawh belh leh tumin ka ang ziaua,Mahse ka chip leh ta zawk. Vawiinah Remsanga ka bia anga,engkim ka sawifel pui mai ang.

Office ka thlen veleh lut mai loin ka number hriat duh min hriatsak thei tur, George-a ka biaa.Thian tih chiam tur kan ni lo nangin nel erawh kan innel viau. 

"Tehhlawl che chuan, eng nge ni ta?" a rawn ti dut duta. Thu nawi eng eng emaw kan sawi hnuah ka mamawhna ka hrilha. Office ala thlen loh thu leh a thlen veleh min lo en sak tur thu a rawn sawia. Ka thaw huai mai.

Kan room chhung ka pen luh rual rualin Duatpuii'n min rawn hmu a, a rawn tho vat. Ka hnungah min rawn zui phei nghala, a hmela thil hriat chakna lang ka hmuh rualin ka chhungrilah ka tang ru ve nghal teuh thung.

"Engtin nge? Nizan khan ka rawn zawt chak lutuk che a" ka dawhkan bawh ar ar pahin a ti sar sar a. 

"An fel lutuk" tih pahin za miah lo in ka nui lui sak bawk.

"Chu zawng chu maw?" a hnar a ti vang a.

"Ni deuh mai e..Eng nge awm se i tih a?' ka then leh sak. Chik zetin min en tih ka hriat avangin ka melh let duh miah lo bawk.

"I va han over tak,eng nge i hriat a? Ka hre chak ve em em a" a ti leh hlak hlak.

"Sawi vak tur a awm lo alawm. A nutei nen kan inhmelhriat a, a naute 2 chu ka hre sa bawka. Chawei kha a ni leh mai" 

"Okheee...Ni rawhse. Thil report thiam lo thei ropui si" tih pahin a ding ngil a. Ka dawhkan a seal ka dahchhuah chiah chu a laa , tul lo zetin paper awlah a chhu zui zat.

"Khatah lo chhu kai suh. Paper i ti hek thei em mai" ka ti bak hlar a. Ngaipawimawh lo zetin a nui sawng duh chauh.

Hnathawh tur tam zet mai ka inchhawp a, thil dang ngaihtuahna hun awm lek lo khawpin ka buai chawhma ta thak. Ka lawm letling zawk phian mai. Lunch timeah thil ei turin Duatpuii'n min sawma,Mahse hna ka ngah chhuanlamin ka zui ta lo.

Kan Room a thu ho zawng thil ei tura an chhuah vek hnuah ka tho ve nghala, Tukverh bulah ka dinga. Ka hnuai lama veng pakhat kawng lang raih chu ka zuk hmu a. A khat tawkin Motor a tlan leh zauh thina, ka kawng kham tihreh tumin ka zi mar pah ar ar bawk.

Ka din deuh vang vang hnuah ka thutnaah bawk ka thu thla leha,hna ka ngah avangin khawih tan lehnghal mai ka tuma. Mahse,ka phone a rawn ri ve chiah..

"Hello..." ka theihtawpa zangkhaiin ka ti a. Nizan atanga tun inkarah hian msg pakhat bak ka la reply lo.Call pawh ka call hek lo.

"I va la buai awm ve?" a rawn ti dam thlup. A aw pa leh hriat nuam zet ka hriat rualin mahni inkhawngaihnain min rawn fana, atthlak zetin ka mittui a hnai kuar mai.

"Buai ve tho mai.." ka ngaihtuahna tilang lo thei ang berin ka ti a. Ka beisei aiin ka aw pawh a mar tha phian.

"Um,I buai anih kha..."

"Maw?" tih pahin ka hawichhuaka, Kawngkhar biang nghenga a lo ding ka va hmu nghal zat. A phone a lekkang zauha,a ha var rual that langin a nui zui suk bawk.

Ka phone ka off a,dawhkanah ka dahthlaa. Ka lam pana a rawn kal phei mek chu ka va en a, ka kut phah thlan nghal dap dap mai chu ka hre theia, nghet zetin ka char ban ka hum zui nghal daih.

"Boss i rawn hmu dawn mi? Nge i hmu tawh zawk?" a thut fel veleh ka ti a. 

A thutna plastic chair hnung lam a nghenga, a mitmeng fing leh fiah tha zetin chik zetin min en a.Ka ngaihtuahna a hmu tlang vek ang tih hlauin ka hawisawn vata,tul lem lo takin Computer Monitor lam ka en ta daih.

"Ka bialnu ka rawn hmu" min chhan a tum lo emaw ka ti hman. Min chhan dan lah ka beisei loh lam daih a ni bawk.Ka melh zawka,min lo la en reng tih ka hmuh veleh ka hawisawn lehnghal daih.

"Over e a...' sawi mai tur hre loin ka ti hlak ringawt. Engkim sawifel turin ka bia ang ka ti kha ania.Tunah ka hmaah a thu meka,Tihsual nei ang maiin ka zam titih ringawt a. Engtin chuan ka sawifel pui dawn chu ni maw???

"Ka bialnu tereuh hian nizan atangin min ignored char chara, achhan hriat ka duh" a ti leh nghut.

"Chuan?" ka ti nghauh.

"A chhan hriat ka duh" a ti tawi leh tuk.

"Eng...nia,biak che ka duh" ka huaisenna zawng zawng sawmkhawmin ka ti ta zawk. Ka hel kual reng anih chuan sawtna a awm lo. 

"Min bia la..." a ti leh sup. Muangchangin a lam ka hawia,a mitah tak ka en a. Ka zam tih alan loh nan ka Tawngtai ru lo chauh!!

"Chutianga awlsam a ni lo alawm" ka ti nghet charh. Awihawm lo khawpin ka aw ah ka inrintawk hmel bawk.

"Anih chuan chinfel theih loh khawpa harsa a ni lo tihna anih chu" a ti leh daih.

"Min hre thiam la,hna ka ngah lutuka" ka ti leh tawp.

"Ok... Tlaiah ka rawn lam ang che.Mahse,hei hi.." tih pahin dawhkanah lehkhathem a rawn nawr pheia. Lak pawh tum chuang loin ka melh ringawt.

"En la, I mamawh tih ka hria ania" a ti leh a. Tim deuh daiin ka bana, phone number a lo inziaka.A hnuaiah a Neitu hming a inziak kalha. A Neitu hming inziak lah chu a Nutei hming ala ni zui!!!!!  Eng nge a awmzia? George-a hnena number ka thawn kha avaiin ka sawi mai thei lo a,Mahse  tawpah 46 a awm tih ka chiang,hei pawh hi chutiang chiah chu a ni a. A awmziaah chuan ka thil dil kha George-an Remsanga hi a lo hrilh leh tihna a ni angem? Mahse, George-a nen engtin nge an inhriat??!! Minute reilote chhungin chhan sen loh khawpa tam zawhna ka thluakah a rawn lut nghal tuk tuk mai..

Ka thil ken ka en a, Remsanga ka en leha, "Ih..Eng lo..." Sawi tur ber hre loin ka ti nawi nak mai. Min chhang loin a tho a, a hawi kual thuak a. Ka inrin hmain dawhkan bawhin a rawn kun hnai leh  thuta, ka mitah tak a rawn en a. Ka thu mar nghal auh a,ka insangmar nghal teuh bawk. Mahse,hawi sawn duh bik loin a mitah tak ka en ve a, min hnaih lutuk chu kan insi lo chauh a ni ber.

Ka beisei loh lutukin a then suka, 

"I zawhna zawng zawng chhanna kha tlaiah ka pek theih che ka ring. Hmun dangah chaw kan ei ang" a aw khauh zet leh a hmel tak run maiah chuan ngenna ni loin thupek zawk a ni tih alang reng.

A che vuta, ka biangah a rawn tuaia, " Ka ta i ni a,talchhuah lo tum tawh hlek suh" a sawi zawh rualin za lo tih hriat tak hian a then leh suk a. Tun tum phei chu a awah vauna a hriat tel theih ta thung. Hamhaih zetin ka thut ngaiin ka thu mar auha. A thaw hawka,na lo tein dawhkan a kik ri kauha,a ding mar zui nghala. Eng mah sawi leh tawh loin a kal zui nghal daih bawk.

Mi a ang maiin Kawngkhar lam pana a kal chu ka en a, tuna kan buaina hi engpawh niin, phuba lak nana min kawp pawh nise amah ka hmuh dan erawh angai reng tho. MIPA tih hi thlak danglam theih a ni rih tlat lo..A bawp sei zeta a pen pawk pawk chu ka thlir a,Blazer vutbuak rawng leh a kekawr thui fuh zet hak chuan a pian nalh zia a tilang chiang lehzuala.Ni e,ani hi chu Mipa tih hian a nihna a sawifiah zo ber. 

 THUNAWI : A Tawi tih ka hria e. Mahse, dah loh ai chuan a tha zawk tiin ka inhnem chawp tawp mai. Hun ka nei mumal ngang lo a. Ka theih ang anga regular ve hi ka duh bawk si a,min hre thiam hram hram teh u🙏🙏