MINE - 7

 MINE-7

Buaina zawng zawng a kianga, a fel ta duak. A nutei leh a nau-in min rawn hmu a.."I hre lo anga,a hnuah dik lo a awm palh ka hlaua. Mama hi nupui nei turin ka tur ka tura,a ngaipawimawh ngai lo va. Nang ilo langa, Inah a rawn hruai che ka hmuh khan a duh tak a tawng tih ka lo hre thiam a. Achhan chu Inah tumah hmeichhia ala rawn hruai haw ngai lo va. Mahse,I nu leh pa hming ka hriat khan ka awm a nuam lo em em a. Hman thil anih tawh avangin i hriat ka ring lo va. Hre ta la buaina a awm ang tih ka lo hlau em a ni" tiin inthiam lo em emin min hrilha, a rilru tur ka ngaihtuaha,ka lo khawngaih em em zawk.

Ka nu hnenah thil thlen dan ka hrilha, Ani pawhin engtia sawi tur nge a lo hre lo tih a sawia. Min hrilh chu a lo tum tho tih a sawia. Chhungkuain eng kim kan han inhriat pawh takah chuan ka thaw huai huai mai.

"Zaninah Palai chu an lo kal dawn ania" Remsanga'n a ti sup.

"Ka zam deuh e a" ka ti ve hap.

Ka bengah a rawn khawiha..."Lo sawifel nghal vek se a tha ang. Nghah leh ngai kha ka peih lo ania" a ti leh a. 

"Inbuatsaih ve te pawh angai ang chu. Chutia hmanhmawh chi pawh a ni lo a.Bakah, kan lo rem nghal vek te chuan thil mawi pawh a ni lo a" ka ti duah.

"Mawi leh mawi lo a pawimawh lo em mai" a ti hluk.Ka beng hmawrah na lo tein a sik zui zauh.

"Inneih ka peih leh lo deuh e" 

"I zak lo anih chu a" a ti hmuka,ka nui ve nghal hak thung. A tawng dan naupangchhia lutuk khan minti nui lo thei lo.

"Zahthlak pawh ka ti lo Mahse,peihawm loh leh si e lawm" nui chungin ka ti a. Min chhang loin a rawn kun hnai thuta,ka bengah a rawn seha. Ka te nghal that mai.

"Tum chhin lo la i vannei animai" a ri supa. Ka dar leh nghawng inkarah a hmui lum ham hamin a rawn tisi nghal dun duna,ka taksaa danglamna rawn thleng ve nghal chu ka hai lo.

"Duhtawk la..."

"He tawngkam hi ka ning" a ti hluk.

Mipa tawng tam lo, nui khat tak leh mi dip na lutuk a ni a. Sumdawnna kawnga elpui atana huphurhawm lutuk, a duh nei tura pawisak nei tlem em em a ni tih pawh ka hriaa.Mahse,achang chuan a naupangchhia leh tlat thina,a thil tih laklawh lai tihtawpsak phei chu ngaithei lo tak a ni a. A mize pakhat hi Mipa naupang ang maia mize lawmawm a nei tih ka hre tel tho bawk.

Palai an rawn kala, ka nu leh ka u te bakah ka Patea ten tha takin an lo dawngsawnga. Mizo dan pangngai angin "kan lo inrawnkhawm ange" tiin an inthlaha. Diktak chuan eng kim sawi lawk sa ka nih avangin rem lohna tur leh inrawnkhawm ngai tur a ni lo. Mahse, Natna emaw inneih hmanhmawh phahna tur thil a awm lem lo bawka,leng nawn tura tih kha a tur ve reng a ni zawk.

 

Leng nawn tura an tih hun a thlenga,an rawn leng nawn leh ta ngeia. Engkim an ruat fel nghal veka. Keini chhung lam pawh kan theih ang angin kan inbuatsaih nghala. Pasal han neih dawn meuh chuan hmeichhe lam tana tihtur lo tamzia ka hre thiam ve ta chauh.

"Eng nge?" phone ka pick veleh ka ti nghal tawng.

"Eheu...Kan va thinrim ve" Remsanga'n dam thluamin a rawn ti a. 

"Thinrim pawh awm lo. Eng nge?" ka ti leh a. Ka thil chhawm tur kan lei ho ka room chhuat a thal phung mai chu ka en a,Nitin Bazar buaiin kan buaia, ka chau nen ka period hnai bawk nen ka mood a fuh hlawl lo.

"A rim chu anih kha..."  a rawn ti leh a.

"Ka buai ania. A pawimawh loh chuan ka dah dawn" ka ti hmak. Ka awki pawh a nem fahran lo viau.

"In haw tawh em? Chuan i thil duh chu in hmu em?" Ka awki chang fak mai chu ngaipawimawh ang pawhin a awm lo.

"Haw tawh..Ka Ning,thulh leh daih mai ka duh" ka ti hlak hlaka. Bag zipper zip ka tum lah ka zip thei lo a. Ka pawt sawka,a tla nghal daih zuia. Thinrim tihngaihna hre bawk si loin ka melh nghek ringawt.

"Eng mah lei vak suh ka ti che a,I awih lo a" a rawn ti leh a,ka thin a khei nghal zak mai.

Lei loh ngawt theih a ni ami? Theih se ka lei lo tawp ang. Ka lei peih lo" ka ti hlawk hlawka, a ngaihdan tur ka ngaihven peih rih eih lo.

"Ok..ok, tun atangin ka ngam lo nghal che chu anih hi a" a ti hluk. Ka ngei zual sauh.

"Ngam leh ngam loh lam a ni lo' ka ti ram hmak. Ka bag zipper tichhe bawk nen ka mood a chhe satliah pawh a ni tawh lo.La tah a chhuak tel tawh.

"Ok,anih chuan ngam leh ngam loh lam ka sawi leh lo" zawite a a nui ri ka hre zui a.

"Ninawm" insum hman loin ka ti vak.

"Thinchhe si..Chawlh hahdam i mamawh anih kha" nui hawk hawk chungin a ti leh a. Ka chhan let hmain a off zui nghal daih bawk.

Thinrim zetin ka phone khumah ka vawm pheia, mahni inkhawngaihnain ka khat a,ka tah a chhuak lutuk ringawt. Huizz,period tur mood zet hi chu a...Inhre reng mah ila a thlak danglam theih ngawt si loh, nidanga thinrimna tura ka ngaih lohah pawh a rim em em zel mai a. Tunah phei hi chuan inneih inbuatsaihna nen,tihtur tam si, ka tawt up up a, ka thin a rim nitin hi a a ni ringawt.

Man hlan niah kan chhungkaw lam tan ruai siam an rawta. Inneih niah ruai an siam leh dawn tho nangin man eitu an kim a rinawm tawh lo deuha.Chuvanga man hlanni a ruai siam anni pakhat bawka.Keima duh danah chuan inneih leh a behbawm hi simple tak nise ka duha,Mahse Fanu mal ka ni a, ka chhungten tih mai mai an duh ve der lo. Eng kim kan theih chinah a tha thei ang ber an duh zela. Ka thilchhawm tur pawh ka thlan aiin u Sini te nupain an thlan a tam zawk.Keiin ni mai mai se ka tih laiin anni chuan an duh ve lo. 

Kan vaiin kan buai em em vek nangin keimah bik phei chu ka Mimal thilah bak ka buai hman eih lo hrim hrim. Ka best tur Duatpuii'n a tlin hrim hrim a,eng kimah min thlawp zo em em a, ka hriat loh tamtak ama remhriatna a a lo tihte pawh a awm a. Thian nih a tlin takzet. Man hlanni bak erawh chu Hmeichhe lam tan chuan tih vak tur a a tawh lo a. Man eitute thil rawn ken tur kan hriat lawk loh avangin eng eng emaw lei loh kan nei a. Man hlan hnuah an rawn ken loh ho leiin kan chhuak leh a,abak chu in lam buai a ni ta thung.

Inneih hma niah keimahin ka thil pawimawh lam turin ka chhuak a. Millenium centreah ka thiannu thil min pek tur lam turin hmanhmawh fein a hnuai Parkingah ka tlan lut a. Scooty ka hung fela,inchung panna lam step ka pan nghala, ka chho tan chiah tihin Remsanga leh hmeichhe pakhat rawn inzui thla mek ka han hmu ve chiah. Dar 2 thleng Meeting nei tur khan a insawi si,tunah dar 1:30 vel ania. Meeting a zo tawh tih pawh min rawn hrilh miah si lo...

"I kal dawn chiah mi?" a rawn ti nghala. Zinga min rawn Biakin ka tihtur ka hrilh lawk sa a. Chuvangin ka kalna tur a hre sa tih ka hria. A bul hmeichhe nalh zet ding chu ka hmuh hnu a ni tih ka hriaa,Mahse ka hmuhna ka hre chhuak zo tawh lo.

"Aw, in Meeting zo tawh mi?" ka ti ve a.

"Um, zo tawh e. E, Becky hi ila hria tiraw?" a bula ding lama thlek zauh pahin a ti a. 

"Party naah i hmuh tawh kha" amah bawkin a rawn ti leh a,ka hawi buai deuh tih a hre thiam a ni ngei ang.A hming leh kan inhmuhna hmun a sawi takah chuan Keipawhin ka hre chhuak zui ve nghal mai bawk.

Ka cousin leh thiante bakah, Remsanga lam atangin mi 20 vel bawr nen Party Remsanga'n a siama. Khami tum khan ka hmu a, a hmain ka la hre ngai lo a. Remsanga hnen atang emaw midang hnen atang pawhin a hming hrim hrim hi ka la hre ngai lo. 

"Hei hi Becky ania. Ka naupanlai thian leh tun thlenga ka thian la ni zel" kan inhmelhriat laia a Remsanga'n min hrilh kha ka hre chhuak a. Remsanga naupanlai thian anih chuan keimah aiin a upa zawk ang tih a rinhriat theih a. Mahse,a hmeltha lutuk leh vun nung sar maiah khan kum 30 tling hmel ala pu lo.

"Aw, Ni dawn tak. I tha maw?" Ka ti nghal a.

"Tha lawm..Achangtupa tur hi vawiin chu kan vah kual pui nek ange" nui var var chungin a ti a. A thawmhnaw hak nalh leh smart tak nen chuan alang nalh zuala. Kei, jeasn kekawr lian hnek hnuk leh T-shirt satliah ha nen chuan innalh hleih tak kan ni.

"Lo kual pui hrep rawh" nui chungin ka ti a. Remsanga ka en leha,'Ka kal mai dawn. B-in min nghak rei lutuk ang" ka ti a. 

"Ok, I let veleh min lo bia la aw" a ti a, tawng loin ka bu nghat ringawt.

Ka thil tur ka lam zawh veleh ka haw tlang nghala, zanah Duatpuii a rawn riaka,kan hmai facial tir tur kan koh a rawn thlenga. Ka thil ken tur kan siam a,Ka nu Roomah kan zi nuai nuai hi a ni ringawt.

"I thawmhnaw keng teuh lo la. Lo len chhuanlam atan ila hmang duh dawn a. I lo kal pahin i Hawn zeuh zeuh ang" u Sini'n min ti a. Ka cousin dang pasal nei tawh hoin phur em emin an lo sawi zawma. Kan nui dar dar reng mai. A thenin inneih zan boruak tur inti fing em emin min lo hrilh a,a thenin ka period leh period loh ngawt an lo buaipui thung. 

Ka bula ding mek,darkar tlemte liamtaa ka Pasal ni ta, ZOREMSANGA chu ka en a, Suit thui nalh zet a haa. A lang nalh thlawt. Ka chau em ema,ka ke ruh a naa. Thlalak chhung khan tluk mai ka hlau rum rum hmana,Mahse vanneihthlak takin ka tlu ta em lo.

"I nalh takzet.." ka beng bulah a rawn ti supa. Tur zetin ka melh let ve thung. A nui a,a best  Sangmama lam a hawi zui nghal daih. Kan tihtur pawimawh zual kan zo vek tawha. Lawi chiah kan hmabak tawha. Lawi kawr kan thui hi a tir khan a fu viau sia,vawiin erawh min phuar deuh tlata. Min ti hah zualin ka hriaa. Awmze nei loin ka thinrim ru teuh ringawt.

Mualpho em em loin hun ka hmang tluan thei ta hram. Hetiang em em hian ka chau ang tin ka lo hre lo a. Mahse,chau tak hi ka ni ringawt. Zah pawh dawn loin khumah ka let thla tawpa. Duatpuii pawh abang bik chuang lo. Kan pahnih-in kahthlak ang der kan ni mai.

Midang an haw fel meuh chuan a tlai tawh viau. Ka thawmhnaw chi hrang hrang room a let rum mai chu ka en a, ka mamawh nghal tur ka dahna ka hmu lo. 

"Dah mai mai rawh. Naktukah I buaipui dawn nia" Bag ho ka en kual dan dan laiin Remsanga'n a rawn ti a. Ka melh zawka, towelin a lu a lo hru mawlh mawlh. 

"Ka underwear dahna ka hmu lo alawm. An la kim vek awm sia,amak e" ka ti hap. 

"Ho lutuk,I ha rei hman chuan lo ang" a ti sup. Atthlak zetin ka ip chawiha,thil thleng tur chiangsa nimahse ka huphurhna leh thleng se ka tihna a inzat reng.

"Bathrobe i mamawh chuan a awm sa a. Abak chu naktuk zingah i en dawn nia. I chau lutuk tih ka hria a,mu hma la ka duh" amah bawkin a ti leha. 

"Ka mu hma chiah ang maw?" ka zah lohna zawng zawng sawmkhawmin ka ti a. A mitmeng thim khap mai chu ka en lui ngar bawk.

"Yes,I mu hma anga. Zingah erawh i harh hma viau ang" a nui a,ngeiawm zetin a mit a siai zauh bawk. Tihngaihna hre loin ka lei ka chhuah khum zauha, za zetin a nui zui hawk hawka. A nui ri ngaihthlak nuam zet chuan min ti nui ve sang bawk.

Rin lawk ang ngeiin ka mut atanga reiloteah ka muhil ta tak tak. A darah ka lu ka nghata,a lungphu nghawr dat dat hre thei turin a awmah ka kut ka nghata, ka thlamuang ngawih ngawih bawk.

Chiang zetin ka harha, ka hawi kuala,ka awmna ka hai thelh. Ka inleta, ka bula mu tura ka ngaih laiin a lo ruak veka. Toilet lamah a awm turah ka ngai ve tawp.

Muthilh leh mai ka tum laiin ka muhil thei lo. Remsanga lah a lo la let ta miah lo a. Chu chen chen Toiletah eng nge maw a tih ni?

Ka tho chhuaka, Toilet lam ka pan pheia. Kawngkhar si chetin ka beng ka dawha, thawm eng mah a awm lo. Kawngkhar kik mai tur nge tih ka ngaihtuaha, Mahse room pawn lama thawm ka hriat takah chuan rang zetin khum lam ka pan leh ta zawk. 

Dimtein Kawngkhar a rawn inhawnga,ka mit ka chhing nghal hmak. Pen thawm a rawn ri a,Mahse pakhat pen thawm ni loin pahnih pen thawm a ni tlat!!!! Eng nge a awmzia? Tun ang zing lam dar 2 velah hian Remsanga a lo lut anih pawhin engvangin nge midang an lo luh ve kher ang?

PS : No Edit takmeuh meuh...Ka lo intifel ve laklawh tawh si, regular loh leh vel kha ka hreh ve tawh sia. Hmanhmawh phelengin ka ziaka, ka ziah ang ang ka rawn bilh lut nawk nawk mai a. Lo chhiar mam lam kha chu inhna ni tehse aw..Hmeltha ho☺️