MINE - 9

 Chapter - 9

"Eng nge? Tu nge hetah hian Marble dah?" Remsanga'n a ti tuar. Ka kawngah a rawn kuaha, hlauthawng lutukin ka khur zawih zawiha. Invuan hman lo ila chuan Stepah ka lum anga,anih loh pawhin step vawnban bawh liamin inhnuai chhuatah ka tlathla dawn tih a chiang.

"I tha tiraw? Na i nei em?" a rawn ti a. A hmelpa zetah chuan thinrimna alang chiang ngang mai bawk.

"Tha..tha ang"  ka ti buh nuai.

"Ehe!!! Thlungi lo tlan teh, enge hei hi a awm zia?" Nutei'n a ti a. Rapthlak tih hmel zetin stepa Marble awm nuai mai chu a en a,a chek tlak tlaka,min rawn en a " I inti na lo maw? Tlema tlemah i rawn tlathla lo chauh anih hi" a ti zawm mawlh mawlh.

"Hei hi tu dah nge?" Remsanga'n Thlungi hnenah a ti a. A aw a vin tawh lo nangin a hlauhawm lutuk ringawt. Inthlahrung deka Thlungi ding chu ka en a,ka lainat.

"Ka hre lo...Nichinah ka chhuk thla renga,eng mah a awm si lo a" ti dekin a ti a. A kawr tlang a sik niap niapa, Remsanga emaw keimah zawk pawh min  melh ngam lo. 

"Keipawh tun lawk khan ka rawn kala, ka hmu mang si lo a. Enge maw a awmzia le?" Nutei'n a lo ti ve vata.

"I kal kaia a awm lo hlauh chu a vanneihthlak lehzual anih chu" Nelawm lo zetin Remsanga'n a ti leh hmuk. A chhan dan teh hmuk vangin ka lo ip chawih thung.

Mahse, Nutei hmelah danglam a awm lo.."Nia, vanneihthlak. Nangpawh ilo chhuka,a awm lo a. Tunah a awm leh lawia,pahnih khat lek lah a ni mang bawk si lo" tha takin a ti zui leh bawrh bawrh a.

"Thlungi, I tibua chu a ni lo maw?' a ti leh a.

"Aih, Marble ka khawih ngai lo" Rang zetin Thlungi'n a ti ve vat.

"Anih chuan amahin alo awm tawp tihna mi? Amak awm hle mai" Remsanga'n a ti leh hmuk. Chhan ngaihna hre lo a Thlungi ding reng chu ka en a,a tihsual pawh ni hlei lo a hau titih chu ka lainat tlat.

"Hau tawh suh, a hre bik lo anih kha. Ka tha vek a. Phili vak pawh angai lo ania" ka ti a.Remsanga'n min rawn melh zawka, a thinrim hmel tur ngun kha a zia ta deuh.

"Chhar fai la, a hla thei ang berah paih rawh. Inchhungah ka hmu nawn tawh tur a ni lo"  a ti leh a. A aw ki pawh hriat a nuam ta deuh.

Nilengin Officeah ka buaia, Remsanga kal leh lai pawh ka hre lo. Lunch timeah a msg ka en hman chauha, darkar chanve vel a awm tih ka hre ve chiah.

"Ka ngaihtuaha, tinge Honeymoon inhman loh?" thil kan ei laiin Duatpuii'n a ti thut.

"Kan hman lo..." Awlsam zetin ka ti liam puata. Chicken Mushroom soup ka chah belh zui nghala.

"Reilote chawlh vangin in thi awm lo e. Tunlaiah a thei chu honeymoon hmangin an kal deuh zel tawha" a ti leh talh.

" A thei an kala,kan thei ve lo a. Kan kal lo a nimaia. A tha em?" nui chungin ka ti a, a ner nang mai.

"Tak takin,a hma pawn ka hrilh che kha. Remsanga a buai over a. Kal ka duh leh duh loh min zawt veka. Ka duh kha chuan karkhat tal chu hun a insiam theih a ringa. Mahse,a buai zia ka hriaa,kal ka rawt lui duh lo alawm" ka ti ta duah.

"Hmmm..I van over,kei chu kal ka duh dawn hrim hrim. Nangni angin hmun nuam thlang thei lo mah ila ka van kal awm tak" uar zetin a ti leh a.

"Nia,kal ngei ngei ru. Hmun lam a pawimawh hleinem. Kal dun turte kan pawimawh zawk" ka ti a. 

"Eeee,nangni hi ka hre thiam chiah" a ti leh hluai. 

"Eng chu?' mak ti deuhin ka en paha.

"Passport i neih loh vang zawk a ni em?" a ti leh a. Sawi nawi peih loin ka bu nghat. Diktak chuan kan inneih hma atangin honeymoon kal chungchang hi kan sawifel veka. Kal ka duhna hmun pawh min zawta,thlan vak tur ka hre lo a. Hna vang hian ka zin ve nasaa, India ramah hi chuan han kal chak em emna ka nei tlat lo. Ka kal vek tawh tihna lam erawh a ni chuang lo a. Ka kal chak lo ve tawp zawk. Remsanga hnenah pawh tlang takin ka sawia. A lo hman lo ve tho bawk nen kan kal lo ta kha a ni renga. Mahse, passport kan buaipui nghala. Hmelhriat angah bawka, ka nei fel thuak chu a ni leh tawh mai. 

Soup an rawn daha, kan chawlh ziahna hmun anih avangin ka duhdan an hre tawha. Thick tak, arsa lian deuh taka chan leh Tomato...Tui ti zetin ka hawp nghal a,a sa tha ngang mai.

"I va han duh ve tak.." a ti hlak.

"Duh lutuk hi buaithlak..Inah lah chuan Rempui'n pa a ei thei lo a. Kan indang emaw a awm lo anih loh chuan kan ei lo khawp ang" awlsam zetin ka ti liam puat.

"A ho e, ani ei theih loh vanga midangin lo ei loh kher?" a ti hmaka.Ka melh zawka,a hmelah chuan ka thil sawi kha a ngaihdan a ni lo tih alang thei vek. 

'Mo ka nih hi...kum 1 tal liam se siam pawh ka siam ve ngam mahna" ka nui a. A nui ve duh der lo.

"Mo nih hi a hrehawm em?" a ti leh daih.

"Ala rei lo em a,a hrehawm leh hrehawm loh pawh ka la hre lo" ka ti tha ve mai.

"I strong em mai,hrehawm i ti lo ang" a ti leh a.

"Aaa,strong chuang nang. Diktak chuan mahni seilenna hmun lo hi chu a lo nuam chiah lo hrim hrim a" 

"Aniang... Nangni chu inzia hmel ka tia.Bakah, I Nutei pawh Remsanga nu a ni lo a. A nutei daih ania. In pa hi Inah a lal hmel sia, ani kha lo sual vak ngam tur a ni lo va" a ti kual leha.

"Um,Mahse an zah lutuk. A nu boral hnuah Nutei hian a awmpui a, nu ber chanchang a nimai. A sual lo hrim hrim bawka" 

"I sawi kha,ala rei lo em mai"

"Nia,ala rei lo" nui chungin ka ti ve a.

Dik tak chuan tumah an insawisel ngai lo nangin eng emaw chang chuan an tawngkam pakhat lek vanga inthlahrun ngawih ngawih chang ka nei zauh zauh tawha. Keimah minti nimiah lo mah se,Tawngkam eng emaw hriat nuam vak lo an sawi hian mo ber leh mihrang ber na na na chuan hrehawm ka lo ti hman zel.

Ban hun dawnah Remsanga'n min rawn call a, "Ka laklawh lutuka, ka rawn lam tir mai ang che" a rawn ti a. 

"Ngai lo...Thil lei kawi lawk tur ka neia,Taxi-in ka lo haw mai ang" 

"Rawn lam che pawh nise i kal thei tho ang chu" ati leh nghut.

"Thei tho a,Mahse dinna vel a buaithlak ang. A pawi lo,Taxi nimai" ka ti leh a.

"Ok, I tih tlat chuan le.." 

Haw pahin ka thil mamawh leitur ka lei kuala, kal pah a remchang bawka tiin ka nu te in lamah ka kal kawi zuaia. Ka ni  leh a fanu Seni an lo awm a. Thil an dil anih ka ring nghal ngawt pek. Duh an neih loh chuan lo kal ngai hek lo le.Bawihtei'n min hmuh veleh min rawn bawh nghal chang changa, a infiam nasa bawk aniang a thlan huh hliam mai.

"Awi,Lan..Ka be duh tawp che a" Seni'n a ti a. Ka thingpui inna bulah a rawn thu ve nghala. A perfume rimna uchuak lutukin ka hnar a verh zawka,ka luak a chhuak nghal hlui a. Mahse, uak erawh ka uak em lo.

"Eng thil nge? A pawimawh hmel bawk sia" tha takin ka ti a.

"Tunlai chu kan harsa tawpa. Lalrema lah a hna atangin a bang leh tawha" a ti a,sawi zawm loin a ngawi leh daih. Thil min dil turah ka ngai ve tawp bawk.

"Chuan?" a langah erawh chuan tha tak bawkin ka ti leh a.

"In pa hian hnathawh tur a nei angem?" Thil min dil ka ring saa,Mahse ka rin loh lam min dil ta daih.

"Awi,ka van hre ve lo tak..Tu tan nge i tih hrim hrim a?" nui chungin ka ti a. Ka hre lo tak taka, chu bakah engtin nge an hnuaiah hnathawh a inbeisei ka hre thiam lo. Kha lehchen biak pawh inbe pawp lo anni a. Keimah nen inzawmna kan neih tak vanga beiseina an nei nghal hi mak ka ti lo thei lo.

"Keima tan ka duha..Ka hna kha ka bang daiha, kan pi hrawn a har lutuka" a tawng riah ka ngaihtuahna atangin ka harh zawk.

"Anih chu mawle..Mahse,ka sawi ang khan ka hre ve lo tawpa. Hna dang ka thawka,ka buaipui lo hrim hrim a. Bakah, sumdawnna hi sawi ve an duh vak loa. Mo thar tan chuan sawi ngam chi a ni lehzual..I hrethiam em?" zat vang niloin ka nui zui a. Mahse,dawt eng mah ka sawi lo. "Ka lo be dawn nia" tiin tul lo a beiseina awmze nei lo siamsak ka duh lo.

"Ani ve tho mai. Mahse, midang a ni loa,I pasal ania..Eng emaw tal chu i hre awm em mai"  a ti leh a.

"Ka lo zawt anga,Mahse eng mah ka hre ve lo ka tih kha. Ka zawh vangin a awm dawn tihna ni lo a" mahni inveng ranin ka ti leh vat.Beiseina siamsak ka duh lo hle nangin zawh pawh zawhsak duh lo nih kha nuam ka ti leh lawi si lo.

In ka thlenin Nutei leh Rempuii pangpar ho buaipuiin an lo awm duna, kawt hual velin pangpar leh plant nalh pui pui a awm dul a. Heng ho buaipui hi Nutei hna ber a ni a, achang chuan Farm lamah te riak turin a kal thin bawka. 

"Lani, he plant hi i nu min pek ania. Hei a nung tha reuh lutuk" Nutei'n a lo ti chul a. A ke bul lawka pot chu a kawka, hnah hring leh var inpawlh a ni a.Mahse,ka nuin a nei tih pawh ka lo hre lo.

"A nalh reuh tak ve.." ka ti a. A ruk tak chuan nalh ka ti em pawh ka hre chuang lo.Pangpar leh plant tih vel hi ka tuipui hlawl lo a. Pangpar hi an par vul chukin nalh ka ti ve a,chu zawng chu animai.

"Nia, a nalh ka ti tawp keipawh. E, Lan, kartawp chawlh hi Farmah riah kan tum a. Lo kal ve ula" Rempui'n a rawn ti ve a.

"Chuti law? A nuam ngawt ang. Mahse keini chu i u hi naktukah langa zin a tumin ka hria" ka ti a. 

"Um,anih chuan a rem dawn lo nih chu" 

"Nia, remchang ala awm leh mai ang"

Farm ka mitthlaah a lo langa,nuam tawlna hmun satliah ni loin thei leh thlai tamtak a awma. Chhungkuaa hman tur Swimming pool lian vak lo a awma. Tree house 2 a awm bawka. Pool bulah pangpar an awm tlar put bawk.

Hla deuh feah ran vulhna hmun a awm a. Vawk leh ar tihtham zet mai an awm a. Vawkpui ringawt pawh 15-20 bawr vel an awma. Ar in lianpui pui an sa a, hralhchhuah tur a awm reng.A enkawltu Chhungkua an awma. An awmna tur, in dang ang bawk a sak, Thing in a awm a. A hmun pawh nuam tak a ni. Mahse,huan pumpui leh hnathawktu zawng zawng enkawltu chu Pa Dika a ni a. Pa Dikate hi an Chhungkua-in an Cheng a, an mamawh lam khana tur leh an fate School kal thlahna turin Gypsy an kawla. Scooter pakhat an nei bawka. Huan mah nise khua atanga hla over a ni lo a. Current a lut tha a, Generator a awm tel bawka,an awmna In a nuam bawk si nen, mamawh tur pawimawh zual a awm vek. Khawchhung a ni lo tih mai loh chu hrehawmna tur a awm lo.

Ka thawmhnaw ka hlip sawk sawka, ka inbual zuaia,ka inbual zo deuh chiah tihin Remsanga'n min rawn call ve nghal chiah.

"Um" hello pawh ti loin ka ti a.

"I thleng tawh em?" a rawn ti dam thlup.

"Um, ka inbual zo chiaha, ilo la haw dawn lo mi?"  

"Um, buaina chhete a awma. Ka rawn tlai dawna. Chaw min lo eisan la..Zanah pawh min lo nghak duh suh" a rawn ti leh sup.

"Eng buaina nge?"  

"Driver pakhat hian buaina min thlen deuha. Mahse,ngaihtuah suh.A fel mai ang" a rawn ti leh a. Ka zawt zui duh lem lo. Kan inneih tirh atangin hna thilah inrawlh lo turin min duh tih ka hriaa, kei chauh ni loin a Nutei leh Rempuii pawh anni tho. Rempuii hi Sangzuala nen an thawk duna, Nitin Office lamah an kala, Mahse,staff enkawl bak eng mah a hranpa an khawih tir ngai lo. Sawi miah lo mah se kan inneih atanga rei lo teah inchhung leh hna lam an enkawl dan a hrang hlak tih ka hre thiam vek tawh.

"Hello..ka sawi i hria em?' a rawn ti leh duta. 

"Aw,aw..Hria e" ka ti bah nak mai. Ngaihtuahnaa thil lo lang ngaihtuah zui vak ka ching hi ka sim thei der lo.

"Anih chuan eng nge ka sawi?" a ti nghut.

"Buaina kha.." 

"Ha... I hre lo chu anih kha" a nui zui hawka. Tihngaihna hre loin ka nui ve ta ngawt.

"Ok...Daw heh reuh lutuk mai.Ka nutei hnenah khan lo hrilh mai la,naktuk an kalna tur kha Davida ka hrilh tawha,zingah a lo phei anga, aman a rawn buaipui ang" a rawn ti leh duah. Davida hi Remsanga Driver 4 te zinga Senior ber leh a rinrawl a ni a. Driver leh a chhawrtu aiin thian dun an ang mah zawk.

Inhnuaiah ka chhukthlaa,Thlungi chauh a lo awma. BTS fans a ni a, tunah pawh BTS ho zai a lo zaipui leh nasa tawh mai. 

"Thlungi, Khawnge Nutei?" a bula van din hnaih pahin ka ti a. Phawk zetin min rawn en hu.

"Awi,ilo kal lai ka hre lo reng reng" a ti nghal vak.

"Khaia, au vak Suh. I Piiin a hau leh ang che,I thil play kha off phawt teh" ka ti leh a. Rang fein a off nghal vat. Nutei hi Kum upa lam tihtakah tleirawl zia a man pha chiah tawh lo a. Thlungi BTS atchilh pawh hi a sawisel nasa thei viau. Mahse,keipawh tleirawl Laia boyband ho atchilh thang ka ni a, ka tan chuan a awmdan hi hriatthiam loh chi a ni lo.

Nutei awmna zawh leh ka tum lai takin kitchenah a rawn lut a. Remsanga'n hrilh tura min tih kha ka hrilh nghal vat. A lo haw hma dawn loh thu ka sawi nghal bawka. Eng mah sawi loin a bu nghata,Thlungi hnenah chawei siam turin a hrilh a,a kalchhuak zui leh mai.

"Khawnge Mama hi?" Rempui'n dawhkan rawn kil ve pahin a rawn ti a.

"Hnaah buaina an nei a. A rawn tlai deuh dawna" ka ti vat.

"Anih chuan naktuk tu nge min hruai dawn le? Nute,a rawn bia che em?' a tih zawm leha.

"Be lo, Lani a rawn hrilh kha" Nutei'n a ti hmak. A sawi danah dik lo a awm hran lo,Mahse mak deuhin ka awm a nuam lo nghal vek.

"Eng maw in sawi?" Sangzuala'n a rawn ti lut a. Dawhkan a rawn kil ve nghala, Tlai lamah Roti a ei thina,Thlungi'n a rawn chhawp sak nghal vat vat bawk.

"Mama mawle,a tlai dawn tih a sawi lo va. Naktuk kan kal dan tur zanah kan sawi ang kan lo tia" Rempui'n a ti a. Nutei erawh ngawi rengin a chaw ei lai a ei zawm mawlh mawlh thung.

"Problem chhete a awm a. A rawn tlai ang. Bakah, Lani hnenah a hrilh kha, David-an a rawn hruai ang che u.Amah hi chu keimah nen kan kal anga" Sangzuala'n a ti nghal bawrh bawrh.

"A that chu. Anih chuan zing chhuah kan thei dawn nih chu" Rempuiin zangkhai takin a ti veleha. Nutei erawh ala ngawi ta reng. Midangin an ngaipawimawh em ka hre lo. Mahse,ka awm a nuam thei tawh lo. Eng nge anih chu ka hre lo nangin Nutei awmdanah dik lo a awm tih ka chhungril hian a hre thei tlat.

Remsanga lo nghah chhuah hram ka tum nangnin ka mut a chhuak lutuk ringawt. A lo haw dawn tawh em tih zawt turin call ka tum zeta,Mahse hnathawh Laia biak sek a duh lo tih ka hre chhuak leh a, Msg ka thawn ta zawk. 

Khum a cher dat rualin ka harha. Ka hnung lam atangin ka kawngah rawn kuah zui nghala,a taksa hnawng deuh chapah chuan a inbual zo hlim hlawt tih ka hre thei.

"I lo haw na a rei tawh em?" ka ti sep. A kut ka vuana,ka kut zungtang karah a kut zungtang sei thlurh a rawn rawlh ve nghal zat.

"Rei lo e.. ka ti harh hram che ni maw" a ti sup. 

"Pawi lo... Chaw i ei em?"

"Um ei e.."

"I tifel thei em?" Ka ti leh sep.

"Um..." mutchhuah hmel zetin a ti sup.

Tawng tawh loin ka mit ka chhing zui lehnghala, ani pawh a che zui lo. Muthilh leh mai ka inrin laiin ka muhil leh thei lawi lo. Ka rilru nawm lohna bawk a rawn lang leha,Remsanga hrilh mai tur a ni em tih ka ngaihtuaha,Mahse engtin nge ka sawi ang? Amah be lo a keimah zawk an kal dan tur min hrilh kha a lo lawm lo anih ka ring ber a. Mahse,sawi ringawt ila a awih kher lo theia. A Nutei rel chan ka chang daih thei.

A che deuh hrut a, ka hnute a rawn khawiha "I muhil thei tawh na nge?" a ti sup.

"Um...Mahse,nang chu muhil rawh. Naktuk inzin dawna, muthilh a tha"

Tawng loin ka hnute a khal zui a. Ka kawrin a khuh loh chin ka nghwng bul lam a fawp nghal dun dun bawk. 

Khawvar tirhah Remsanga insiam thawmin min tiharha. Ka tho ve nghal vat. Engvakmah ken tur a nei hran lo va. A hranpaa insiam pui ngai a nei lo. Mahse,pasalte zintur pawh thlah liam hman lo a mut bo ka duh lo bur.

Remsanga te kal hnu lawkah Nutei leh Rempuii an chhuak ve nghala. An kal pahin Remsanga Putea fate pahnih,Lawmi leh Sam-a an lam phei leh dawn a. Nizana lama Nutei mood off kha a awm tawh lo. Min be bawrh bawrha,ka rilru nawm lohna a bo deuh huai bawk.

Kar bul kan tana, a tum lawk angin Remsanga Guwahati ah a thlawk thlaa,a rualin Zothana a rawn haw ve nghal dawn bawk. 

Office bang inchhung ka luh veleh Rempuii awki sang zet ka hre nghala. Tukverh bulah min hnungchhawn zawngin a dinga. Phone a lo hmang mek chu niin. Hetianga a tawng hi ka la hre ngai lo. Makti fein Nutei ka en a. Min rawn en ve a,mahse min en Dan a dik lo. Thilsual lian deuh ti ang maiin min melh nimaiin ka hria.

"Ka duh lo. Ka duh lo bur. Lani ni fanu a ni emaw a pa u fa pawh nise ka duh lo. Kan bul hnaiah awm lo se a tawk" Rempuiin a ti leh vak. 

A awmzia ka hre lo nangin keimah kaihhnawih a ni dawn tih a sawi danah alang theia. Achhan hre lo mah ila nuam lo ka ti nghal a, hlauhthawn vangin ka lungphu a rang nghal dawt dawt bawk.

THUNAWI : NIZAN ENGMAH KA SAWI LO A, ZAN HMASAA KA CHAWL MAITHEI KA TIH KHA KA RING TLANG NGHALA🤭 CHUAN, NAKTUK ZAN PAWH HI KA CHIANG LO LEHPEK AW. TIN, EDIT HMAN LO LEHPEK AW.