MINE- 15

 Chapter - 15

Bath tub-ah ka inchiaha, Duatpuii thil rawn sawi bawk kha ka ngaihtuah let a. Kan inneih hmain Becky ka hre tawha. Kan inneih hnuah pawh kan Inah a lo kal zeuh zeuh a. Remsanga chang lo, Nutei leh midang ho pawhin an hre tha vek. Nula naupang tawh lo tak,thil chinchang hria, midang mize mila Insiamrem zung zung thei,hmeltha leh zangkhai tak,a bula awm nuam zet mai a ni a. Kan in a a lo kal chang pawhin kan inkawm bawrh bawrha, a hranpa taka Remsanga nen an awmdanah mit khamna tur chi a awm ngai lo. Mahse,ka hna ka chawlhsanah a lut ve a, Officeah lehnghal a ban lo vawn sak chawt kha thil nihphung a ni lo bur.

"Anu...I inbual ami?" Bathroom Kawngkhar rawn kik pahin Remsanga'n a rawn ti a. Ka rai tih a hriat atangin hetiang hian min ko a. Atirah ka zak a,Mahse a hnuah erawh kan inhnaih sawtin min hriattir ta zawk.

"Um,ka zo tep" 

"Hmanhmawh suh" a rawn ti leh a. A kalsawn thawm ka hre zui a. Hmanhmawh suh minti nangin ka hmanhmawh phah tho mai.

Kawr ha loin Boxer nen a lo awm a. Ka chhuak thawm hriain a rawn hawi vut.

"Rempuii khan a rawn bia che em? A thiante dil sahna lamah riah an tuma.Phone i pick thei atia.Msg chu a dah tho aniang" ka ti nghal a.

"Um, inleng ka neih lai ania.. Ka call tawh.. Eng nge ilo an a?khawsik a awm leh em?" a tihzawm leh zat.

"Tlem a awm a. Mahse,nuam lo em em pawh a ni lo" 

"Anih si chuan tunah i inbual a. Chawhma lamah inbual tur alawm" a ti hluk.

"A, khawsik awm chhan ka hre tho a. A hlauhawm hranpa lo em mai. Bakah,ka inbual dawnah te chuan ka khua a sik tawh hleinem" thiamchan tum zetin ka ti a. A kawng dawmin a dinga, chik zetin min en a. Eng mah sawi loin a then suk.

"A ni lo pawh ti ila a ni iti leh dawn tho sia. Anih tak chu timai ang" a sawi zawh rualin a nui zui huk huk a. Min hre chiang lutuk chu tihngaihna hre loin ka nui ve ringawt.

"Ka inkhel dawn mawni ka tia" a ti leh a. A inher a, a inkhelh thawmhnaw ho ka dahna a hawng nghala. A pian inkhaithli thlurh mai chu ka en a. A kawng a fek a,a dar a hlai a. Taksa uluk chi a lo ni bawk nen thau chhia,tlema han hnawk deuh pawh a nei lo. 

"Tunah maw?" ka ti a. Ka lu tuamna ka phelh a,ka sam ka hru nghal nawk nawk.

"Um, Zotea leh Pa Dina'n min cho tlata. Dinner inchawi an tia lawm" 

"A tha alawm..E, kan Officeah Becky a lut ve law?" ka ti leh a.

"Um..Vawiin atangin a zawma. Duatpuii ami rawn hrilh che?" a ti awlsam mai. A inha palh mawlh mawlha.

"Um.. "

"Kal ka ngai tho a, ka rualin a kal nghala" a ti leh a.

"A that chu" ka ti ringawt. Hna zawm tur ve si chawhnu lamah daih han kal te chu a.

"Dik lo a awm ami?" A rawn ti leh thut.

"Eng dik lo maw?"

"I tawng deuh hmak sia" a ti leha. Ka tawng deuh hmak pawh chu ka hre lo e a.

"Awihawm loh e a..Mahse,midang an la dawn tho anih chuan Duatpuii pawh a awm renga. Promote mai awm tak" ka ti duah.

"An duh lo aniang" a ti liam leh puat.

"Duh lohna chhan tur a awm lo em maia.Mi thar lak leh te chu zir chhung a rei mai mai" ka ti leh tlat.

"Ah...Hahdam teh, an duh leh buai se kha chu kan buaina a ni hleinem.Bakah,Becky te chu eng mah zir chiam ngai chi a ni lo" 

"A that chu" ka ti nghauh. Duatpuii lo vuipui rilruk nak laia Becky a fak leh kher chuan min khei ve tlat. 

Ka kalsawna, ka thawmhnaw hak tur lak tumin ka thawmhnaw bawm ka hawnga. Ka T-shirt dahna ka keu kual nghal a. Mahse,ka hnung lam atangin ka kawngah a rawn kuah takah chuan ka thil tih lai ka tawp nghal chat.

"I thinrim a...A chhan sawi la" a ti sup. Ka dar leh nghawng inkarah a hmui lum ham hamin a rawn fawp zui nghal vang vang.

"Mawh...I sawi loh chuan ka hre lo ania" a ti nawn leh a.

"Ka thinrim lo" ka ti nghauh.

"A rim chu nih hi.. Sawi la,anih loh chuan ka siamtha thei dawn lo" a ti nawn leha. A tawngkam leh che zia chuan ka chhungrila thlengin a fana, min hneh ngawih ngawih a ni mai.

"Duatpuii ka khawngaih" alangah erawh ka ti hlak. A thaw ve hawk thung.

"Chu zawng chu mi?" 

"Aw.. Eng mah that bik lohna a nei lo. Hna pawh a thiam veka"

"Ok.. a chungchangah dik lo deuha ka lo sawi anih chuan ka tihpalh. I best friend ania,ka ngaihlut em em ania" a ti dam thlup. Becky tha zawk anga a lantir kha sawi tumin ka ang ziaua, Mahse ka chip leh hmak. A thiannu ania,thian satliah mai pawh ni loin an inpawh em em a. Thil tereuhte avanga inhauhna siam belh ka duh lo.

"A tha alawm.Kal tawh rawh" tih pahin a kut phelhsak ka tuma.Mahse,ka kut a rawn man bet a, hneh zetin a hum kawp nghal hmak.

"I thinrim tawh lo tak tak em?" a ti leh sup.

"Um.."

"Ok,anih chuan ka kal thei. I la thinrim chuan i lungawi hun ka nghah angai dawna. Inkhelh loh pawh pawi ka ti lo" a ti leh a. A awki chuan a ti tak tak ang tih min rintir leh hmiah tawh.

"Engmah thinrimna ka nei tawh lo. Kal tawh rawh,I tlai ang" dam angreng takin ka ti ve ta sap.

Min kuahna a thlaha.Ka inher ve nghala,a kalsawn dawn emaw ka tih laiin a rawn kun hniama,ka biangah a rawn fawp a. A inlahrang zui nghal vut.Thil hriatchhuah ka nei ve chiah...

"Enteh, eng lo...Vawiinah Lalrema a lo kala, amah chu ..." A ban vai zauh avangin ka tawp chat.

"I ni fapa... Eng nge a duh a? A rawn tlawh satliah che nge?" danglamna nei map loin a ti a.

"Pawisa a duh a..Mahse,ka pe lo.." dawtsawi kual vel duh loin a nihna tak ka hrilh tawp. A hming ka sawi ruala ka ni fapa tih a hria anih chuan a mizia tur a hre vek ang tih ka hre thiam a. Bakah,Dawtsawi kher tul ka ti lo.

"Ok...anih tak chu" a ti awlsam leh mai.

"Ih... Nangmah a rawn dil che ka hlaua" ka ti leh a. Nuam ti lo zetin ka che sek bawk.

"Um, pe turin min duh nge duh lo?"

"Pe lo la ka duh. Vawiinah pawh Rempuii khan a rawn hmu a. A rilru a na leh angem ka hre lo. I nupui ka nih vanga ka chhungten i nau rilru an tihnat ka duh lo" ka ti leh duah.

A racquet bag ah lai a dahthla a,min rawn pan hnaia.. Ka biang tawn tawnah a kut in ô pahnihin a rawn vuan leh a,a mitah tak ka en a. A tawng hun thaw dep depin ka nghak mawl tawp. A hmui a pet sawi zauha, a thaw leh hawk.

"Ka tan i pawimawh tih hi ka hrilh fo lo che anih pawhin i pawimawh tih hre reng la. Ka neih hlu ber i ni tih pawh hre reng la. Engpawh i duh anih chuan min hrilh tawp mai rawh. Ka tihtheih zawng anih phawt chuan ka ti vek ang. Midang Care Suh,keimah chauh min en thin la ka duha, Engkimah i rintlak nih ka duh a,ka tum bawk ania" a ti duah. A thilsawi chuan min  hneh lutuka, sawi tur hre loin a mitah tak ka en ngaiin ka en a,a mitmeng thim leh fiah zet siah chuan chiang em emin min duatna ka hmu thei a. A rintlak dawn tih leh a ti mai mai lo ang tih ka chiang em em a.Min ti thlamuang ngawih ngawih bawk.

Hun a kal ve bek bek a, ka naupai pawh thla 5 a pum ve lek lek tawha. Ka taksa lamah harsatna lian tham ka nei lo a. Rinai takin hnathawk lo a in a awm pawh hrehawm ka ti ta lo. Sum lamah harsatna ka nei lo a. Ka ac-ah ka mamawh aia tam Remsanga'n a thun ka timai. In entir tura k dawnin min hruai zat zata,ka inentir hun tur pawh a theihnghilh ngai lo. Zin a ngai chamchi a,Mahse riak lo va kal dan a zawng hram hram a. A loh theih loh chinah riah angai anih pawhin darkar tin deuhthaw min rawn bia a ni hawt zel. 

Nitin in ka nghah theih takah chuan Nutei lawmah a tla a.Farm lamah a thleng phei deuh reng maia.Inchhung enkawl pawh ka kutah a awm tam ta viau. Ka mikhual leh inthlahrung ru dek reng pawh a ni telin a zia ve tial tiala.Mahse, a zawng zawng chuan ka la inthlahdul thei chuang lo. Thil eng emaw hlekah ka hlauthawng nghal vat zel a. Tawngkam eng emaw an hman pawhin ka lo inthlahrung ve nghal zela. Inthlahrun hi a reh hlen tak tak thei pawhin ka ring lo.

Rempuii leh Ruattluanga kha an lo inngaizawng ngei a lo ni a. Ka cousin nen khan inngaizawng han tih em tur ni loin,thla pawh tling lo an lo inzui ve a. Chu pawh Rempuii nen an inthen zuai lai chauh ala ni zui. Lalrema lo kal kha Rempui-in a sawi chhuah ka rin laiin eng mah a sawi ta miah lo a.Remsanga pawhin a sawi zui lo. Amah Lalrema lah a reh zui leh ta hmiah bawk.

"U Lan, Mama hi Khawnge?' Kitchen a ka awm laiin Zothana'n a rawn ti a. Zothana hi kan inneih tirh lam khan a inkiltawih em em a,Mahse tunah chuan kan Chhungkaw zingah ka nel ber leh kawmngeih ber a ni tawha. A mize thawveng leh zangkhai tak hi ka lawm riau bawk.

"A lo haw deuh chiaha,a inbual mek ka ring.I be duh mi?" ka ti a. Ka hmaa Grape inchhawp ka hmawma.

"A inkhel ami? " a ti leha.

"Um" 

"Anih chuan a lo chhuk hunah animai. E, niminah Officeah i Cousin a lo kala' a ti leh a.

"Tu ber?" ka ti vat.

"Rema tiin ka hria, Rina zawk nge mawni? Ka Chiang tawh lo. Mama ai chuan a nau deuh maithei" a ti a. A thle zui bak..

"Anih chu..Ka hria e. Eng nge a rawn tih a?" ka ti a. Diktak chuan a mawiah ka zawt a ni ber. Zothana leh Rempuii office khatah an thu a, Rempui-in eng mah a sawi si lo a. A kal laiin a awm lo zawk nge mawni?

"Kan Bungrua tur a rawn dah. Accessories thenkhat kha an rawn supply dawn niang" a ti awlsam leh mai. 

"Anih tak chu" ka ti ringawt. An unau hming hriat ruala ka tang teuh reng hi a hrehawm thin.Achang chuan ka ngaithei lo lutuk hi ka inthlahrung ru a,sual ka inti thin bawka. Mahse, Inah hian buaina a awm leh aia hlauh zawk ka nei lo.

Tlaiah Doctor hmu turin kal ka ngaia. Thil tih hmasak tur ka neih avangin Remsanga ka biaa. Motor rawn tirh a tum nangin ka hniala, ka kal duh naah motor dahna a awm loh bakah ka nu te tlawh hmasak ka duh a.Chuvangin Taxi a kal a awlsam zawk.. " Badminton Tournament awm turah khan hruaitu ho khan min rawn hmuh an tum a. Dar 2 velah lo kal an tum a" Remsanga'n a rawn ti a. "Ok, min kalpui kher angai lo ania..Check up satliah a ni tih i hriat kha" ka ti a.Ka thusawi hre lo ang maiin " Ka hman veleh clinic-ah ka lo kal ang" khauh zetin a rawn ti a. Hnial awmzia a awm dawn lo tih ka hria.

Kan in ka thlenin u Sini leh ka nu an lo awm a. Bawihtei a lo muhil thung. Ka kal khat deuh bawk nen sawi tur kan ngah tlang bawka,kan titi nawk nawk mai.

"Awi,Mambawih..Ka zawt ang che ka ti taka" ka nuin a ti hluaia. Min zawh tur pawh chu a sawi lem hlei lo a.

"Eng chu maw min zawh dawn?" Nui chungin ka ti a.

"Hman niah i ni a lo kala. In pa a rawn fak khawpa. Lalrema kha eizawnna tur a lo siamsak niawm tak ania. Nang erawh a fak chiam lo che a" a ti a. Ka thu khawng nghal lah mai. 

"Eng eizawnna nge a?"  Ka ti nghauh.

"Ka hre chiah lo. Pawisa a puktir a tia.Tunah rih chuan amah Lalrema pawh a insiamtha a tia. Mahse,nangma chungah a lawm vak lo a..."

Ka nu tawng zawm mawlh mawlh chu ka hre reng nangin ka ngaihven lo. 

SAWI BELH- ZANIN CHU A TAWI ZUAL VIAU MAI. DAH LOH LEH KA HREH NGANG MAI SI A,DAH LOH AIAH TIIN KA ZIAH HMAN ANG ANG KA RAWN BILH LUT NAWK NAWK E.

TIN,KA EDIT HMAN TAWH LO THINA,NIZANAH PAWH AN HMINGTE KA LO ZIAH PAWLH NUAI PEKA🤭 KA ZIAH SUAL KHA INTHLAHRUNG MIAH LOIN MIN LO HRILH ZEL RU AW. KA CHE PHELH PHING PHENG ZEL MAI SI☺️