MINE- 16
Chapter -16
"Lalrema Pawisa i pe ami?" Room kan luh rual rualin ka ti nghal tawp. Kan inentir chhung zawng khan ka rilruah a awm renga. Zawhna hun a ni ngang lo a. Ka insum hram hram a ni ber.
"Tu maw? E, Rema maw? Pe nang"
"I pe.."
"Amak... Ka pe lo ka tih chu" a ti nghut. A kawrlum hak a phelh a,kei erawh thutthlengah kawisawi angreng takin ka thu a. Ka nak a inkalh deuh tlata,mar deuha thut a harsa.
"Vawiinah ka nuin min hrilh alawm. Ka niin a lo hrilh a, buaina awm thei i hre reng sia" ka ti leh a. Ka awah ka lawm lo tih alang chiang ngang mai bawk.
"Ka pe lo.. Mahse,a eizawnna tur erawh ka siamsak" a ti nghut.
"Ka sawi kha..Eng mah pe lo la ka duh a..."
"Tun bak ka pe dawn lo. Hmasawn a duha, chumi tur chuan ka pui. Tihsual ka nei em ni?" A ti mar ut.
"Rempuii ngaihdan...' ka ti hman a.Mahse min rawn tawng khalh leh hmiah.
"Theihnghilh rawh.A duh emaw duh lo emaw a unaupa a ni a. Ka pui duha ka pui anih chuan tuman an sawisel ka duh lo. Midang tanpui tur in mi phalna ka lak angai lo.Rempuii a ni emaw nang pawh ni la" hnial chi loh khawpa khauhin a ti leh a.
"Pui duh lo ka ni bik lo. Ka unaute annia ka duhsak ve tho..Mahse, chhungkua a buai chuan ka tan a hrehawm ber. I hre thiam lo anih kha" ka ti leha. Ka tawndanah tanpui ka duh lo emaw a ti ang tih ka hlau leh hnuhnawh a. Ani pawh khan chutiang lam hawi chuan min hmuin ka hre tlat bawk.
"Ka hria.. Tanpui I duh reng. I hlauthawng anih kha. A hmain ka hrilh tawh che kha..I pawimawh bera i pawimawh ber fo vang. Mahse, I ni Fate chungchangah hi chuan lo inrawlh lo mai la a pawi lo zawk. Inchhungah buaina a awm anih pawhin keiman ka chingfel mai ang. A tha em?" A ti leh a. A tawngdan chu thupek pawh a ni hran lo. Mahse, mi a nileng lo tan chuan "ok" tih mai a tha tih hai rual a ni lo.
A thawmhnaw hak lai a hlip zui a.Min hnungchhawn zawnga a ding chu ka en a. Ka inthiam lo thut, kan inneih hnuah hian min duatna a tilang mawlh mawlha. Ka ngaihtuah phak loh thlengin ka himna tur angaihtuah a. Kei lahin a thil tih sawisel loh ka nei mang lo.
Ka tho tham thama, ka pan pheia. Hnung lam atangin ka va kuaha. Ka kal thawm a hre lo a ni ngei ang. A phu deuh zawk. A hnungah ka hmaiin ka nawr a.Ka dul puar ve lah tawh avangin duh angin ka kuah hnai thei lo thung.
"Ka tihpalh aw' Tim angreng takin ka ti sap.Ka kut a rawn vuana,ka kuah a phelha. A rawn inhera, ka kut a vawn erawh a thlah Chuang lo.
"Tihsual i nei em ni?" A ti dam thlup.
"Ka hre chiah lo..Mahse, ho mai maiah ka sawisel nasa thei che em a.Ka inthlahrunawm alawm" ka ti halh. A mitmeng thim leh fiah zet si chu ka en kar avangin tlema a Danglam zauh pawh ka hmuh hmaih lo.
"Min hau anga,I phun anga,min sawisel bawk anga. Kha kha alawm hmeichhia i nihna tichiang tu" a ti leha. Ka beisei loh lam a sawi avangin sawi leh mai tur ka hre lo. Mahse, ka rilruah zawhna a rawn piang zui leh zat lawia..
"Ka Hauh che hian i Ning lo tihna mi?" ka ti leh sap.
"A chang chuan Ning ve thin tho e. Mahse, ka tihdik loh min hrilh chuan nuam ka ti thina.Chuvangin ka hriat reng pawh ka tidik lo lui a..' a nui zui a..
"I ngeiawm e a" ka ti hlak. Ka inthiam lohna erawh a bo nghal duak thung.
"I pawimawh ber ka tih khan ka sawi satliah hleinem..Nang inih chhung chuan min sawisel theia,min hau thei. Midang erawh chuan min sawisel dawn anih chuan a chhan a that tawk angai. Nang erawh chuan min hau tur leh sawisel turin chhan neih I mamawh lo" a ti leh duah.
A hmel nelawm vak lo leh tak deuh run thin kha awm loin alang dam thlup a, a mitah chuan duatna alang Chiang em em bawk.
Engmah sawi loin ka pen hnai hret a,ka dingdihlip a,ka kawngah a rawn vuana, a hmui ka han si de de a. A thaw nghal hawk..
"Kan ti thei em?" aw khur deuh chunga a tih chuan ka nui a. Tawng loin ka bu leh nghat.
Ka hah deuh tihmai loah chuan thil thleng zuiin hlimna min pe nasa a. Kei ang bawkin ani pawh a ni ve tho tih ka hai lo. Hurherh vang ni loin,nupaah hi chuan Sex hian kawngro a su em em tih hi ka man thiam ve tial tiala. Hmalam hun chu ka sawithei loa,Mahse tumna ringawt chuan ka pasal hi a theih phawt chuan beidawnga dah ka tum lo ve bur tawp.
"Lan, Mama Roomah a awm mi?" Ka bula rawn thutthlak pahin Rempui'n a rawn ti a.
"Aih, inkhel turin a kala..I chhuak dawn maw ka tia" ka ti a.
"Um,chhuak ang. Mahse,chhuah hmain ka be duh che a" a ti a. Phawk angreng takin ka en a. Ka rilruah eng emaw buaina kan nei dawn aniang tih a lo lang vat. A awmdanah inbiak satliah a ang lo.
"Eng thil nge?' alangah erawh pangngai takin ka ti a.
"Ih...Mama hi biak ka duha.Mahse,ka hreh deuha" a ti leh a. A hmel buai deuh nak chu ka hmu ru kar. Tunhnai a dam tha mang lo a. Chhuah pawh a chhuak tlem a,a taksa lamah dik lo lian tham a lo awm zawk nge mawni?
"Sawi la..." ka ti leha.
"Eng lo...Aaa,ngai leh lo mai" a ti leh daih. A tho zui nghal a.."Ui hi vawiinah entir an ngai tak asin le. Zothana nen kal ila a tha ang" a tihzawm leh daih. Tun lawka awmdan nen kha chuan a inang leh tawh lo.
Thla a liama, ka naupai pawh thla 7 hmel a hmu lek lek tawha. Nei mai thei turin kan inringlawk nasa viau tawh.
"I ngaihtuahawm lovang maw?" Remsanga'n min ti a. Ka thil tih lai dahin ka va en a. Bag ak uaih chungin a dinga.
"Ngaihtuahawm lo ang. Rilru nuam deuhin kal rawh" ka ti ve vat.
Vawiinah ka inentir dawna, Remsanga langa zin angaih avangin a tuka kal turin min ti a,Mahse thil dang mamawh lei ngai ka neih tho avangin Duatpuii ka sawm a. Duatpuii nen kan ni dawn tih a hriat hnuah a remti thei hram.Scooty khalh hrim hrim a phal tawh loh avangin tum pawh ka tum lui tawh lo a.Achang chuan ka himna tur leh Naute himna tur atan atih nimahse phal loh a Ngah lutuk hi ka Ning thina. Mahse, a rilru nawm lohna thlensak ai chuan tiin ka inhnema,ka lungawi chawp veleh mai zel bawka.
Min rawn pan pheia, min kuah loin ka chhip samah a rawn fawp vang vang.
"Fimkhur em em ang che" a ti zui sup a.
"Nangpawh fimkhur la" ka ti ve sap.
Muangchangin a kal hnuah ka insiam a, ka dul kawh luah vangin eng thawmhnaw mah ka inhmeh lo. Ka naupai vang a ni chek ang,ka hmel landan lah a danga,ka hnar lah a lian zual riau a. Ka hmelthat loh sa nak laiin ka lang tha lo zuala. Ka confi hleithei thin lo.In hnuaiah ka chhukthlaa, Nutei ka zawnga,ka hmu mai lo. Thlungi hnenah Nutei awmna ka zawta," Inchungah a awmin ka hria" a ti a. Inchung atih hi inchung ber, inleng kawm mai theihna tura siam leh Nutei Pangpar thenkhat dahna hmun a ni a. Ama pual bik deuh a ni bawka,a awm tam viau.
Stepah ka chho a, ka rit ve ta deuh bawk nen ka hah hma ta viau a. Step laklawkah ka chawl leh rih thina. He step bik hian rai hi a namai lo tih min ngaihtuah tir fo mai.
Kawngkhar lo inhawng sa ka nem kau belha,Mahse Nutei tawngri vangin ka ding dat.
"Chutiang te chu a va tha lo ve. Mahse, chutiang buaina chu theihnghilh tum la a tha. Innei fel phawt ula, thil a fel duak mai ang. Chutianga lungngaih na tur a awm lo.Palai chu zaninah maw an lo kal dawn? I u kal hma khan hrilh tur che alawm" Nutei'n a lo ti meka. Ka dinna atangin ka va bih dak daka, thutthlengah kawngka lam hawi lo zawngin Rempuii nen an lo thu dun a. Rempuiin pasal neih a tum hnai tih ka hre thiam nghal mai.
Ka aw ka thian kharha, ka chhuak zui nghala. An titi an thlak nghal daih chu ka nuih a zat rualin ho erawh ka ti ru viau lawi. Chhungkua kan nia,pasal a neih dawnah palai te an lo kal anga, an lo kal rualin ka hre vek dawn tho a. Han zep deuh titih chu tul ka tih loh zawng tak a ni.
Nutei hnenah a thil min chah tur ka zawt a, "Aaa,hei Mambawihi chhuah a lo tum tho a,Ani hian rawn lei mai rawhse. Inchhung thil mamawh a ni nuai maia. A tam tham si a, In kalna tur nen pawh a inmil vak lovang" a ti bawrh bawrh.
"A harsa Chuang lo ang" ka ti ngial nangin min chah ta chuang lo. Pawi erawh ka ti lo nasa. Naute thil en in kan kual nual anga,inchhung mamawh han lei leh vel chu a peihawm tawh vak tlat lo.
Duatpuii nen kan bazar nileng deuhthaw a. Aizawla thil lo that tawh zia leh to si zia erawh mak tak a ni. Ka duh si,ka lei ngam tak ngang lo pawh a awm nual. Bakah, ila mamawh ang tiin Rempuii leh Nutei'n thil min leisak nasa tawha. Naute pawh hmeichhia anih ringin thawmhnaw pink lam hlir a awm rei rui tawh a. Thawmhnaw lam chu lei tehchiam pawh ka tum hran lo. Nau puan lah ka nu leh u Sini'n an lo ngaihtuah fel vek tawh bawk si.
In lam pana kan tlan laiin ka cousin Lalpui-in min rawn call hlawl. Ka pu Birthday a kan inhmuh bak kha kan la inhmuh leh pawh ka hre lo.
"Hello... Tehhlawl che chuan" ka tihzawm nghal zat.
"I buai em?" a rawn ti ve thung.
"Buai lo e. Hei ka chhuaka,ka haw meka" ka ti leh a.
"Ka be duh tawp che a"
"Hei min biak hi" tih pahin ka nui zui hak haka. A nui ve nghal ar ar bawk.
"I nghal ngaiin ila nghal reng chu ania. Tak takin ka biak duh chhan che chu thildang daih ania" a rawn ti leh a.
"Um, han sawi la"
"Phone a sawi chi pawh a ni chiah lo a. Naktukah i chhuak leh thei angem?" a rawn ti leh a.
"Awi,ka van hre lo tak. Vawiin ka chhuaka,bakah keimah hi ka rit tawh roh lutuka.Inah lo kal mai la,I hreh em?" ka ti a.
"Ih, zep loah chuan hreh" a ti zawi sap.
"Ok..Ka hre thiam che. Mahse, Remsanga ka lo hrilh anga. Ka chhuak thei ngut ange maw?"
"Um...Awi, thei hram la,ka hmu duh tawp che a. Thei hram teh. Kan Inah pawh ilo kal khat em kha" ngengawl zetin a rawn ti leha. Inbiak khat nak laia chuti taka min hmu duh ta chu mak ka ti ta viau.
"Ok,ka lo tum dawn nia. Mahse,ka tiam thei lo che a" ka ti ta nge nge.
In ka thlenga, Nutei'n leh Ruati'n pangpar tui an lo pe a. Inchhung ka luh hmain Sangzuala leh Rempuii an rawn tlan lut ve chiah bawk.
"Lani, Mama nen in inbia em? A lo thleng dawn tawh em?" Nutei'n rawn luh pahin a rawn ti lut lang langa.
"Um, dar 6 velah lo thlen hman a inring a" ka ti a.
"A that chu. Zanin chu inleng kan nei dawna. A awm ngei ngei angaia" a ti leh a. Rempuii palai te an lo kal dawn tih ka hre thiam mai. Mahse,eng mah ka sawi zui lem lo.
š¤
ReplyDeleteNgaihnawm vawng vawng į¹hin
ReplyDelete