MINE -18

 Chapter -18

"A puhtu kha i unau nu mah nise nangpawhin i hai lo anga. Nula nungchang ṭha a ni hran lo. Model tihvel hi chu an thlen chin hi hriatthiam sak pawh an ngaia.Lar emaw hi an inti thuai zel lehnghal a" Nutei'n dik inti em em in a ti leh a. 

A ṭawngkam ngeiawm lutuk leh hmuhsitnaa khat chuan a denin min deng dawt dawt a ni ber. Model pawh chu lo ni se engvangin nge a thlen chin hriatthiam angaih bik ang? Mi nawlpui ai chuan lar pawh an lar zawk daih.Anni chhungkua pawh hian an dawr fakna turin Model tho alawm an hman. 

"Nula fel tak chu a ni lo maitheia. Mahse,mahni fa paina ni lo puh duh tur khawpa hniam chu a ni bik lo ang" ka theihtawpa incontrol chungin ka ti a. Mahse,ka aw a khur dar dar tho mai.

"A ni chu anih hi. Enteh, ka sawi dan kha a mawi lo deuh pawh a ni ang. Tihian ka'n sawi ṭha leh ange. Nang nen indanglam a,nang chu nun zahawm tak i neia. I unaunu hi chuan a nei ve lo a. A lo che khaw lo ve deuh tihna ania" a ti leh duaha.  Lalpuii mize sawifiah nana kei min han fak vel chu ka ten lutuka,ka luak a chhuak zawk. Mize harhvang tak, kohhran lam bel lem lo tak a ni a. Mahse chuvang chuan misual leh tenawm a ni tihna erawh a ni chuang lo.

"Lo hrilh la.. Ama tan pawh a zahthlak mai mai a. Hmeichhia ve tho ka nia, Ruata fa lo ni tak tak se chuan Ruata hi neih tumna ka nei miah lovang" Rempuii zawkin a rawn ti veleha. Ka va melha, a hmelṭha zetah chuan a rilru tak tak a sawi leh sawi loh hriattheihna tur eng mah a awm lo. 

"A,kan han sawi hi chhungkaw titi ania. I lo la na palh hlauh ange. Mama khan a sawia, I hriatfiah loh hrilhfiah che kan duh a. Ngaih huat theih zawnga kan sawi chuan pawi ka tia. Mahse,nangpawh kan Chhungkaw zinga mi tho i nia. Kan rilru i hre thiam ang" Nutei'n inringtawk zetin a ti leh a. Ṭawng loin ka bu ringawt. Ka hre thiam em ka hre lo. Diktak chuan ka thluak a buai vek a. Eng mah mumal takin ka ngaihtuah thei rih lo.

Roomah muangchangin ka chho a. Khumah ka ṭhu a, ka kawchhung let but but mai control tumin ka mit ka chhing vang vanga.Nutei leh Rempuii awmdan,an ṭawng dan zawng zawng khan min ti zaka. Chhungkua kan ni han ti ngial mah se min lo en hran zia erawh vawiin hian ka hre chiang lehzual. Mahse,an thil sawi zawng zawng kha ka ngaihtuah let pawhin awih tur nge awih loh tur ka hre lo. Mahse thil pakhat erawh ka ngaihtuahna luah ngut ngut tu a awm a "Mama pawhin a hre saa. Ngaihpawimawh ngai turah kan dah lo" tih lai tak kha a sawi lai ang mai khan ka bengah a la chiang a, a hre sa anih si chuan engvangin nge a sawi loh? Ka rilru hah zia hre rengin engtin nge min thlir mai mai theih? He Inah hian an vai mai hian min ei zawh tumtu hlir an cheng nimaiin ka hria. Eng chhungkua nge maw inzawmna ka lo neihpui chiah hi ni le?

Ka phone a nghawr dar dara, min rawn call tu ka en a. Lalpuii ala ni zui. Engtia biak tur nge tih ka ngaihtuah chhungin a tawpa. Msg thawn tumin whatsapp-ah ka lut a, Mahse ka thawn hmain a rawn call leh a. Ṭha taka biak theih ka inring ngang lo va ka reject ta ngawt. " Ka buai lawka,ka hman veleh ka rawn call ang che" tih ka thawn a. Khumah ka phone ka dahthlaa. Ka chawmawlh huih mai a zia deuh takin inbual ka duh.

Tuiah ka inchiah vang vanga, ka taksa sahal ni a ka hriat kha a reh huaia,Mahse ka chhungril sahal erawh a tireh zo ve lo. Chung lam enin ka mu a, tih hmasak ber tur ka ngaihtuaha. Lalpuii hmu ila ṭha taka sawipui ka mamawh. Phone a sawi ka duh hek lo. Dawt min hrilh ka ring lo a,Mahse dawt a ni lo ngei tih ka chian ang. Chumi hnuah chuan tihtur a lo lang mai ang.

"I chhuak dawn em ni?" Step a ka chhukthla min lo hmuh rualin Nutei'n min lo ti nghal vata. Nichin lawka thil thleng kha amahah engmah danglamna hmuh tur a awm lo.

"Aw, ka nu a nuam vak lo a. Ka va kal lawk dawn emawni ka tia" pangngai thei ang berin ka ti let a. Chhuan lam atana hman em tur chu ni lo mah se Hritlang khawsikin a mana, ni 2 chu School pawh a kal lo ve ngei tawh. Mahse, nuam lo ti a phili pui tur erawh a ni lo.

"Chutia law? A eng nge? A BP em ni?" A ti leh zung zung. 

"A khua a sik a. Mahse, ngaihtuahawm over chu a ni lo" ka ti ṭha leh mai.

"Anih tak chu. Va kal rawh, nawm loh hi chuan fa te an ngaihawm duh ania" a ti leh a. 

"Mahse, Motor an va chhuak vek awm ve" ka kalsawn hmain a ti leha.

"A pawi lo, taxi ka hmang mai ang" 

"Mambawiha kha a chhuak dawn tak e. Thlah kual che rawhse" a ti leh a. 

"A la chhuak lo mi?" Ka ti satliah. Tunlai chu Zothana hi zan lamah chhuah a ching a, zing a tho tlai thei viau tih ka hre ru kar a. Midang hriat hlau deuha Nutei'n a hau lai pawh tum 2 ka hre tawha. Mahse,ka zawt lui chak ve hrim hrim.

"Aw, nizan a ṭhianpa accident an buaipuia,a lo haw tlai lutuk a" hum tum ranin a ti a.

"Chaw a ei kham chiaha. A insiam zo mai ang. Mipa chu an rang alawm" amah bawkin a ti leh zung zunga. Chhang lo in ka bu ringawt. Pawnah ka chhuak a, Verandaah ka ṭhu a. Kawtzawl a ui 2 infiam chu ka thlir vang vanga. An nun zalen bik lutuk chu ka thik lek lek mai.

Minute 20 vel ka nghah hnuah a rawn chhuaka, nidang ang bawkin min rawn be nghal bawrh bawrh. 

Ka nu tein kal kawng tluanin a titi a. Hmeichhe lam chungchang a sawi mawlh mawlha. Ka ngaihtuah naah nimin tlaia Sangzuala thil min request a lo lang zawk. Sana ka en a, dar 3ah chuan let leh mai ka inring a. Chawhmeh siam moodah ka awm miah lo nangin a thil min request ve chhun ania. Tihsak loh ka duh lo.

Ka nu teinah min drop a, ka kal hmaa ka biak lawk vek tawh avangin Inah ka lut thla zuaia. Ruata nen Lalpuii tein lam kan pan nghala. Ruata erawh tihtur a neih avangin a lo lut kawi ve lo. 

Lalpuii chhungte tumah an lo awm lo. Amahin a lo awm a, kan inhmuh aṭangin ni tam ala liam lo. Mahse,hmuh theih khawpin a lo danglam hman tho.

"I va nawm loh hmel ve" ka ti a. A thle bak..

'Chaw ei a harsa..Ka muhil mumal lo bawka" a ti zuai raih. A dinhmun tur ka ngaihtuaha, pasal tel lo a naupai pawh a hrehawm dawn nen ani phei chu a Dinhmun a khirh lehzuala,a tla rawk rawk pawh a mak lo.

"In entir la ka duh ngawt mai" ka ti a. Ka sawi tur tak ka sawi mai ngam lo.

"Nia, entir ang. Bakah,zep reng theih pawh a ni dawn lo a. Eng nge min biak duhna chu ni reng reng a? Rempuii i hrilh ta mi?" a ti leha.

"Um, hrilh ti ila Remsanga'n a hrilha. Mahse,a lo hre lawk tawha" ka ti a.A hmela mak tihna lang chu ka en a, ka thaw zui nghal hak mai

"A hre sa maw? Anih chuan engtin nge neih ala tum theih le?" mak ti lutukin ati a. Ka sawi tur sawi ngam thei turin ka infuih ru mawlh mawlh a,Mahse ka zam lutuka, kutphah a thlan dap dap tho.

"Chu chu ania sawipui ka duh che..." Ka ti fan raih.

"Um..A ṭha alawm. Mahse, eng nge sawi tur awm?" Beidawng tawpkhawk tawng a ni tih ka hai lo.

"An sawi dan chuan Ruattluanga fa a ni lo a. I puh hmingchhe mai mai an ti a"

"Maw?" A ti tuar.

"Ruattluanga fa ni loin i puh an ti a. Buaina thamah an ngai lo a ni deuh ber mai" ka ti tlang ta rawt. Ka sawi chhuah tak law lawah chuan ka thawl huai in ka hriaa. Mahse,Lalpuii hmai dang lap mai ka en chuan lo sawi lo ila ka ti leh hnuhnawh tho. Ka sawi vek tawha,inchhir leh awmzia a awm lo a,anih ang anga hmachhawn a tha ber.

"Chumi chu min zawtfiah turin ilo kal ami?" a ti lawi rat.

"Um, dawt min hrilh ka ring lo a. Mahse, engtiang chiahin nge kalpui an tum ka hre lo a. Chiang takin ka hre duh" ka ti leh tawl.

"Anih leh nih loh chu kei leh Ruattluanga'n kan hre chiang ber. Mahse,a ni lo an tih theih danah a hrilhtu lamin an hrilh chiang animai.Anni chu dem tur an awm lo" a ti chang fak. A insut zui hraiha,a mittui khap kir tum niawm tain a khap sek sek bawk.

"I tan a harsa ang tih chu ka hria.Mahse, theihtawp kan chhuah tawha. Tunah chuan rilru thar pu la ka ti" ka ti dam thlap. Min rawn melh zawka, hmun dang a melh lehnghal a. 

"Ni e, tih leh tur a awm lo. Zanah ka nu ka hrilh anga,ka nih nih ka ni tawh mai ang" a ti zawi sap. A kutah ka vuana, "min mamawh phawt chuan ka awm reng ania. Lungngai reng reng suh. Nang aia tuar nasa pawh an awm ania aw. I chak em kha" ka ti leh a. Min chhang loin a bu nghat a. A hmel dawldang lap maiah chuan a thil tawrh nat zia hai rual a ni lo. Amah nih loh chuan a tuar nat dan sawifiah sak thiam chi lah a ni hek lo.

Ka nu teinah reilote ka awm a,Nutei hnena ka chhuan lam ber Ka nu lah a lo zia viau tawha. A khawsik pawh a awm tawh lo. 

"Eng nge Lalpuii teinah chuan i tih a? Ka hmu khat ngei mai" ka nuin a ti a. 

"Ka tlawh zuai. Eng emaw bik a awm anih loh chuan inhmuh a har alawm" ka ti awlsam mai. Anihna tak hrilh theih ni hek lo le.

Office ban hun pangngai aia hmaah Sangzuala a lo haw a,a sawi lawk ang ngeiin hmeichhe pakhat a rawn hruai haw a. Nu te lam,ngo em em lo,vun nung sar lawi si a ni a. Kum 25-30 inkar vel tur a ni a. Hmelṭha viau tihtur a ni lo nangin a hmel leh hawiher a changkang viau a. A hmel nui sang reng mai chuan engahmah hmain min ngainat tir nghal thlap.

Nutei'n hlim zetin a lo lawma. Helaia ka kal hmasak ber ṭum kha ka mitthlaah a lo leh iar iar a. Keipawh kha tun ang bawk hian hlim takin min lo lawma,Mahse thil thleng zui zel erawh hriatreng atana duhawm lo fe fe a awm ta thung a. Sangzuala hian a nei anih chuan kan mo dun dawna, kei ang khan harsatna a tawk ve dawn lo a. Atan chuan Chhungkaw tha leh lawi luh chakawm tak a ni ang. Keipawh hi ka ni te chhungkua leh Lalpuii vanga ka buaina hi tawk lo ila chuan nupui leh mo vannei ber ka ni hial ang.Mahse,tunah hi chuan Jail zauah ka tang nimaiin ka inhriaa,ka thawpik a,mikhual niin ka inhriaa,ka bet lo ngawih ngawih bawk.

Remsanga leh Rempuii an lo haw ruala, zan dang ang bawkin Zothana erawh chuan chhuan lam a rawn nei leh a. Nutei'n Remsanga hnenah a sawi mam sak mawlh mawlh.

"I siam zo tawh em?" Remsanga'n a rawn ti a. Kitchenah a rawn lut zui ve nghal a. Ka biak chak loh zia chu hria se min hlat thei ang berah a awm ang.

"La zo lo deuh" ka chhungril nena inpersan khawpa damin ka ti a.  A rawn kal hnaia,ka chawhmeh chhuan lai a rawn en a.

"A va rimtui ve.. " a ti a. A chawk zui a, eng mah ka sawi lo.

"Ṭhu chungin vil la, khatia din reng chu i ke a kham lo mi?" a ti leh a. Ka lu ka thing nak. Chawhmeh ka siam reng rengin vil deuh chawt chi ka ni a. A hmin hma chu gas bulah ka ding a,ka chawk char char tawp zel.

"Ka han inbual lawk ange" a ti leh a. Ka chhan let pawh nghak Chuang loin a chhuak zui a. A chhuah veleh Pari a nui  zui kar kar.

"Eng nge a?" ka ti a.

"Ka awm tirh atangin u Mama kitchenah a lo luh ka hriat vawikhatna ania. Chawhmeh chungchang a sawi phei chu ka la hre ngai lo hrim hrim" nui hak hak chungin a ti a. Pari hi kei aiin kum 2 laiin a awm hma zawka, inchhunga chengte mizia pawh a hre hneh thawkhata.Thlungi leh Ruati erawh hi chuan an la man thiam tawk lo deuha,an kum ala tlem deuh bawk nen, hauh pawh an tawk zing viau.

Kan chawei boruak a zangkhai viau.Mahse, chhungrila vei nei run ka nih avangin Room a awm ka chak ru zek zek thung. Remsanga sawipui ka duh tut tut a, chumai bakah Nutei leh Rempuii thawveng taka an nui hmuh chuan ka luak an tichhuak. Ruattluanga'n an thluak a lo su hneh viau pawh a ni theia. Mahse,Lalpuii an sawi dan kha ka natpui a, kan chhungkua ang tawpin min hmusit ka ti lo thei lo.

Sangzuala a bialnu thlah tura a chhuak fel hman awrh tihin room lam ka pan ve nghala. Room ka thlen veleh khumah ka thu mu a,ka kawng a kham ngang mai.

Reivakloah Remsanga a rawn lut ve a. "I chau em?" a rawn ti nghal a. Nidang ang chu nise ka kawng kham zia ka hrilh ang. Mahse,vawiin chu chutiang lam a lang lo.

"I lo hre lawk vek a" ka ti mawl tawp. 

"Eng chu?" mak tih hmel deuhin a ti hu.

"Hriat loh der angai lo" ka ti leh hmak. Angaihna hre lo hmel zetin a dar a ti sang uk a. A thaw deuh huai bawk.

"Sawi mai la" a ti leh a. 

"Lalpuii rai thu bak eng nge ni se i tih? Khati khawp khan ka rilru a haha, I hre sa a, midang pawn an hre vek tiin min hrilh mai ta che" ka ti leh a. Ka aw ngaihno a bei lo viau.

"Eng nge sawi i tum a? Kha thil kha ka hre renga,ka hre lo der tih sawi i tum ami?" a ti nghut. 

"Aw,chutiang chu.. Bakah,in mak ka ti lutuk inchhungkua hi" ka ti leh a. A hmel landan inthlak Danglam nghal chu ka hmuh hmaih hauh lo.

"I awih emaw awih lo emaw ka hrilh che kha thudik anih kha. Ka hre sa reng reng lo. Nizanah Rempuii ka hrilha, tukinah Nutei ka hrilh leh bawka. Min chhan letna erawh ka la hrilh hman lo che" ati nghet churh.

"Min hrilh tawh. Ruattluanga fa ni loin Lalpui-in a puh mai maia, ngaihpawimawh tlakah an ngai lo tih te ka hre vek tawh. Mahse,Lalpuii hian dawt a sawi lo" ka ti duah. Ka sawi zawh rualin a thaw deuh huai ri ka hre zawm nghal zat.

Min chhang dawn emaw ka tih laiin eng mah sawi loin a rawn kal pheia. Khumah a rawn thu ve a.

"Lalpuii emaw Ruata zawk pawh tu nge dik leh dik lo lam kha kan buaina tur niin ka hre lo. Rempuii pawn a hriaa, Ruata a ringngam a,neih a tum animaia. Ruata pawhin a fa a ni emaw ni lo emaw Rempuii neih a tuma. Chutah chuan tawk mai se keichuan ka duh. Lalpuii ka tan loh vang ni loin he buainaah hian lo tel ve loh ka duh. Nang emaw keipawh lo inrawlh ve ka duh lo"  a ti dam thlup. A awki a dam hle nangin inrawlh a duh loh zia Haider rual a ni lo.

"Ka unau nu a ni a"

"Keipawh ka farnu a ni ve bawk a" ka sawi zawh hmain a ti leh hmiah.

"I lainat tih ka hria. I rilru tur ka hre thiam che. Mahse,engkim hre veka inneih an tum lui anih chuan lo dan tum kha awmzia vak a awm lo. Ka sawi tum i man em?" a ti leh a. Ka chhang tawh lo. Lalpuii ka khawngaih em em rualin Remsanga sawi hi a dik tih ka hai lo.

"I rin anga engkim hre lawk saa hrilh lo che kha chu ka ni lo. I rilru hrehawm lai kha ngawirenga thlir mai mai tur chein min ngai suh" a ti leh a. 

"Nutei sawi dan chuan..." ka ti hman uk a,Mahse ka chip leh hmak. A chal a tichuar a,a mitmeng dum fiah zetah chuan thinrimna niawm tak alang zawka,Mahse a reh lehnghal mai.

"Nutei'n engtin maw a sawi?" a ti ta chat. A hmel leh awki atangin sawi zui chi a ni lo tih ka man thiam nghal vek

"Eng mah... Sawi zui tawh lo ang" ka ti ta zawk. Eng nge ka hlauh chu ka hre lo a,Mahse Nutei hmelmaa siam ka peih rih lo. Tunah pawh ka chau tawk tawh lutuk.

Ni a liama, inchhungah thil thleng Danglam eng mah a awm lo. Keimah hian ngai ka awh hleithei lo a, ka nun a nguaia, inchhungah ka ipik a, kan in lam ka ngai zual em em bawk. A khat tawkin Lalpuii ka be renga,a that thu min hrilh reng mah se a that loh tur zia erawh ka hai lo.

Ruattluanga pu a boral thut avangin palai lo kal hun turah an lo kal ta lo a. Karthar lama lo kal leh tho an tum thung. 

Ka inbual zo room a ka lut chiah tihin ka phone a ri tawp lam ka hre hman a. Ka pan hnaia,min rawn call tu ka en a. Lalpuii a lo ni a. Vawiinah in entir tura chhuah a tum thu kha zingah min rawn hrilha. A inentirna vel min rawn hrilh duh anih ka ring mai.

"Hello" zuai raih hian a rawn ti a.

"Ka lo inbual laklawh lutuka, eng nge ni ta? I inentir ta em?" Ka ti duah. Mahse,a reh zui vang vang.

"Hello...I hre thei em?" ka ti nawn leh a, insut ri ka hre nghal zat.

"Puii, ti nge? I tha em?" hlauthawng lutukin ka ti a.

"A tawp tawh,a awm tawh lo. Naute a awm tawh lo" 

Ṭap riin a zui nghala, kei erawh ka ding khawng lah mai. Mahse,ka inthing harh a. 

"Enge a awmzia?" Ka ti thei hram.

"Kha Ramhuai nu khan min laksak tawh" ṭap chungin a rawn ti leh a.

"Tu maw?" ka ti that. Ka bo em em lutuk.

"Zorempuii kha, min hmuh a duha. Thil min sawipui a duh a...Ka haw hnuah ka pum a na vaka. A awm tawh lo.." a ti leh nawk nawka a,a ṭap zui hlawp hlawp bawk.

PS: Naktuk zan ka chawl maithei aw..