MINE- 20

 Chapter -20

Ka hamhaih deuh titih nangin ka hamhaih chhung erawh a rei lo. A mitah tak ka en a.

"Khawiah nge kal se min tih a?" ka ti chang fak. A mit a chhing sawk a,a rawn tho chhuak zui nghala. Ka lam panin a rawn kal pheia,ka hmaah tak kekawr ipte zen chungin a rawn dinga,nelawmna pakhatmah tel loin min melh runa,ka hawisawn duh bik map lo.

"Chu chu ka zawt che a. Ṭha taka ka zawh lai che hian min chhang ṭha mai la a ṭhat ka ring" a ti leh hmuk. 

"Vanduaithlak takin khawiahmah kan kal lo" ka ti hmaka,kal miau hek lo i.

"Hmu lo che ila chuan ka awih ang" a ti khauh leh fur. Kan din dun chhung reilote khan min lo hmu hman anih hrep chu.Rilru chhe zet ala pu zui.

"I hmuh apiang i awih zel chuan i va buai dawn ve" elsen zetin ka ti leh a. A thaw hawk ri ka hre zui nghal zat. Min rawn beng dawn emaw ka ti hmana.Mahse, a din ngaiin a ding ngur a, na zetin min en run bawk.

"Ka hmuh apiang hi ka awih nghal khat viau. Vawiin bikah erawh tihtur i neih vangin i chhuak hmaa, vawiinah hian hna thilah tihtur pawimawh kan neia. Ruattluanga tel ve ngai a ni a. Mahse,ani pawhin i sawi ang tho kha a sawi dan a ni a. Tihpalh thil nge ni, ka rawn hmu dun teh tlat che u a. Tlem chuan mak iti ve lo maw?" a ti leh duaha. A hma ai chuan a ṭawngkam hriat a nuam ta deuha. Mahse, Ruattluanga nena min hmuh dun vanga intiamrual anga min ngai tih ka hriatna chuan ka nuih a ti za tlata. Insum hman loin ka nui chhuak zui nghal hak mai.

"I la nui thei amaw?" a ti vawt leh ruih a. Ka nui tawp ve nghal hmak. Dak deuh vah chungin a mitah tak ka en leh a.

"Ruattluanga nen berkher chuan enge tise min tih a?" ka ti dam thlap.

"Chu chu ka zawt che" 

"Eng mah kan ti dun lo. Kan inhmufuh satliah mai zawk" ka ti leh nghat.

"Ka unaute buainaah hian tel ve lo la ka duh ka tih kha. Chuvang takin Ruattluanga hi a ṭul hle anih loh chuan biak pawh be lo la ka duh" thupe aw zetin a ti leh a. Ka ner deuh nawk mai. Ka biak peih loh zia hria se chuan hetiang hi a sawi lo khawp ang le.

"Ka lo hre dawn nia" ka ngaihtuahna nena inmil miah loin ka ti daih.

"Hre ringawt loin tlansan rawh. He in hi ka ta a ni a. A tawp thlenga ka ta tur a ni a, chumi awmzia chu he in Neitu hi ini tihna a ni a. Ka naute hi nakin lawka kal chhuak mai tur anni veka.Ka nutei pawh a fapa a la zui duh zawk hun pawh ala thleng ang. An awmchhung reilote hi chuan boruak duhawm siam hram hram rawh" a ti duaha. Ka rin loh lam daih a sawi takah chuan sawi mai tur ka haihchham tlat pek. Hetiang zawng hian ka lo ngaihtuah ngai miah lo a, ka hrehawmna bak ka ngaihtuah ngai lo a. He Inah hian chanvo nei angin ka inhre ngai hek lo.

Eng mah sawi tawh loin a kalsawn a, keipawh ka thawmhnaw hak tur lak tumin ka kalsawn ve nghala. Ka en lo nangin room atangin a chhuak tih ka hre thei. Mak deuhin a thilsawi khan min fan tlata,eng mah ka tisual lo tih inhre mah ila,a hmaa ka neih ngai loh inthiam lohna ka nei ta tlat. Mahse,biak that hmasak erawh ka hreh lutuka,ka ngaihtuah ngial pawhin engtia bul han tan tur nge ka hre thiam lo.

Chawei laiin Nutei'n ka inentirna vel min zawta, ka that thu ka hrilha. Vawiin emaw nidangah pawh ka inentir hrim hrim hian ka chanchin ngaihven tu chu Nutei hi a ni ziah. Remsanga hi chu sawi ngai lo a ni a. A tifuh viau te anih loh chuan Rempuii hian min zawt ngai lo.Sangzuala hian min zawt leh khut thina. Mahse, Rempuii hian naute thawmhnaw a it zawng a hmuh chuan a rawn lei leh vak mai zel thunga. A pian hma hauhin hak sen loh a awm der tawh.

Dar 7 velah Ruattluanga Palai te an lo kala, Room lamah ka inthiarfihlim sana. Zan dang ang lo takin mut chhuakin min zem a, ka meng hleithei der lo.

Ka pumna lutuk vangin ka harh a, ka thlan fimin min lo bual huh vek tawh. Ka tho mai dawna,ka tho mai thei lo.Light on chungin ka muhil thei lo thina,Mahse ka rai len tak hnuah hian Remsanga'n light off veka mut a duh lo tawha.Pakhat tal kan on ngei ngei. Mahse,zanin chu Room a thim vek. Current awm lo pawh nise solar plate hlai pui pui inchungah a awm tlar dula, current awm loh rualin  a eng nghal zel a ni thin sia. Eng nge maw a awmzia ni?

Ka pum a rawn na leh vaka, inring hman loin ka rum nghal kawk a. Harsa ti zetin Remsanga mutna lamah ka tawlh pheia, Remsanga ka ko paha. A inlet thawm niawm tak ka hria a, light a rawn eng nghal pup bawk.

"Ehe!! Tinge? " Hlauthawng awin Remsanga'n a rawn ti nghal a. Na ti lutukin khum tlang ka vuana, ka tawng mai thei lo.

Min rawn kuaha, ka pumah a rawn dawma. Ka pum nat dan mak leh na lutuk chu ka thi mai dawnin ka hriaa. Remsanga tawlhhrang tur a banah ka vuan vata,a kawr tlangah ka kut lehlamin ka mana. Ka pum rawn na leh vak vangin a kawr ka pawt nghal nghek bawk.

"Nute,lo chho teh..Lani awmdan a dik lo" a tihri ka hriaa. Phone a khawih tih pawh ka hre lo.

Reiloteah Nutei a rawn tlan lut a, "Ekhai, a dik lo tawp mai. Tea te kan ko ange" tih leh tlanchhuah a rual lehnghala. Minute tam pawh a liam hmain Chhungkaw member pangngai chu an rawn thleng kim nghal vek.

Kan ri ta rum ruma. Vawiin nilenga nau vei tur ang pawha awm chhin eih lo kha nau ka lo vei a, chu pawh thla 8ah lehnghal. Nutei'n ro a rel zung zunga, Damdawiin panin kan tlan nghala, kei erawh ka harh tirh atang khan ka pumna ala chawl lo tluk a ni a. Ka mit a vaia,ka khawhmuh a phe ruaia, Nutei'n ka nu a be mawlh mawlh ri pawh ka hre hla du mai.

Engkim rin loh danin a kal ta vek. Nau vei satliah niloin zai nghal ka ngai tih an sawia. An vai maiin an phili a, kei lah pumna lutuk vangin awm ngaihna ka hre mumal tawh lo. Remsanga chhuak tura an tih thawm ka hriaa.Mahse a kutah ka vuan bet tlat. A bulah lo chuan ka thlamuang thei hlawl lo a, harhchhuak thei tawh loin ka muhil hlen ang tih ka hlau a. Remsanga a awm ve loh chuan ka duh lo.

"Ka awm ve thei mai em?" Remsanga'n a ti a. An chhanna erawh "aih" tih a ni tawp. Hreh em emin a chhuaka, mi aia uchuak nih hi ka thil hlauh ber a ni thina,Mahse tunah chuan chutiang ka ngaihtuah thei tawh lo. Ka mittui a tlaa, Remsanga chhuak tur hreh lutuk chu a lan theih chhung ka thlir tawk tawk ringawt.

Naute tap ri ka hriaa. Ka bulah an rawn pawm hnaia," fanu i nei e" nurse-in a rawn ti a. A naute pawm chu ka en a,a mit a chhing a,a tap hlak hlaka. Eng mah sawi loin ka mittui a rawn tla a. "Mi vannei bik tlemte zinga mi inni. Naute hi thla 8 nau nisiin a dam tha e" Doctor-in dam thlap maia a tih ri chuan min velh belhchhah leh hi a ni ringawt.

Khuma thu mu chungin Remsanga leh Zosangi in awi ka thlir a, vawiin hi thla a tlinni chiah a ni a. Beisei phak bakin a tleia, a mu duh em em lehzel bawk.Zai ka nih avangin duh ang angin ka che mai thei lo a. Mahse,naute ber a fel em avangin buaina kan tawk hran lo. Remsanga pawh a tul ngawih ngawih anih loh chuan a chhuak ngai lo tluk a ni a. Damdawiin kan awm lai leh kan chhuah hnuah pawh pasal tha ber a ni ringawt. Abak a awm leh thei chuangin ka ring lo hial zawk. Naute ka neih zan atang khan kan nupa inkara inrem lohna awm reng kha a bo nghal hmaka,midang nen pawh kan inpawh ta sawt a. Keimah ngei pawhin nasa takin ka chhungte zawm ka tuma, Mihring nih chhung chuan lungawi lohna te chu a awm lo thei lo anga.Mahse, thih hlauhawma ka awm laia  min enkawlna khan buaina lo thleng pawh buaina liamtham niloah a siam zel theih ka beisei takzet.

Ka tho a, tukverh bula Remsanga ding ka pan pheia, a sira ding chungin naute ka zuk en a, a lo muhil tawh.

"Mut ila" tihharh hlau em emin ka ti se se a. Remsanga a rawn hawia, a hmui phunin thil a sawia. Hmui phun bawkin ka chhang ve a. Nui ri ngam si loin ka nui dun a..Ka insum nasat poh leh a za ting mai a, Balconyah ka chhuak ta ngawt.

Roomah ka lut leh a, an lo inmut fel tawha, hmuhnawm tih hmel deuhin kawng dawm meuhin Remsanga'n a lo thlir thla vung vunga. Mahse,ka pen thawm hriaiin a rawn hawi nghal vut.

"I kal dawn lo mi?" ka ti a.

"Ka hre lo.." tih pahin a kalsawna,thutthlengah a thu thlaa, zaizirin a bula kal turin min ti a. Nui chungin ka pan hnai ve mai bawk.

Thutthlengah thut ka tuma,Mahse a mal chungah min pawt thu a,ka lawn zui ve mai. A nghawngah ka ban pahnihin ka kuaha,ka awmah a hmai a rawn phuma, ka kawngah a kuah ve thung.

"A rei tawh hle mai tiraw" a ti zui supa. Ka hawichhuaka,hre thiam chiah loin ka en a.A mitthim raih maiah chuan a sawi awmzia ka man thiam nghal chat. Fa hial kan nei tawh chungin ka zah loh phah chuang lo.

"Kawlh hle si hian zakzum reuh lutuk mai" a ti leh supa. Ka hnarah a rawn tuaia. Duh loin ka thle sawn ve vat thung.

Min pawt beta,ka nghawngah a hmuiin a rawn nawr a, a liak zui a. Ka mur nghal ar ar mai. Min pawmkanga, thutthlengah min muttira,min rawn delh bet zui nghala. Muangchang pawn a che thei lo, a che buan buana,pawi erawh ka ti miah lo thung. Ngawirengin a chetdan ka lo zawm ve zel bawk.

"A pawi lo ang maw?" a ti a. A awah chuan a inrintawkna a hloh tih ka hre thiam.

"Pawi lo ang ka ring. Thla a tling tawha,bakah min zai kha" ka nui a. Za zetin a nui ve huk huk. 

Naute thla a tlin atanga reiloteah a mizia a thlak ta tlat. Zanah tap pawh nisi loin a meng ker renga. Chhunah erawh a muhil duh leh em em lawi si. Indim tura min duh luatah ka chet ve hlekin Remsanga'n kan nula te hauh a chinga. Nuam ka ti lo thina,Remsanga a rukin ka hauh phah ve fo thung. Mahse,a ngaipawimawh chuang lo a, ngaihpawimawh chu sawi loh nau awm tur a la ta deuh deuh. 

"Lan, I kawr tur kha an thui zo ania. Ka rawn lam sak nghal dawn che em?" Rempuii chhuak turin min ti a. Karthar hi an inneih hun a ni der tawh. Rilru put dan ka thlak tak deuh avangin an innei tur pawh ka la urhsun ta vak lo a. Lalpuii nen pawh kan inbe tam lutuk tawh lo a. A khattawkin a that leh that loh ka zawt a,Ani pawhin naute a en chak thu ngawt a rawn sawi ve thin thung. A naupai kha tuman an hre hman lo bawka, a lehlam zawnga ngaihtuah chuan a Zia letling phian mai.

"Lan..." Ka hmai bulah a kut a rawn vaia.Chhaw hmel deuhin ka melh ha mai.

"I van ngaihtuah muk em em ve,ka zawhna min chhang dawn maw tih lai chein" a ti leh a. 

"Lo lam mai rawh.Chhuah a peihawm loh em mai" ka ti vat.

"Um,ka lo la ang. Mahse, siamthat ngaite lo awm se a buaithlak dawn a" a ti leh a. 

"Ngai lo turah ngai ang. A lo ngai ta anih leh ka kal ve tawh mai ang chu" 

"Nia,chutiang chuan nimai rawhse. Mambawih, I hman dawn tawh em?' a ti zui lang lang.

Zothana a rawn chhuaka, a hmel a dik tlat lo. A dawldang a, a mitkhur a thuk deuh dak bawka. Naute hian buaina tawk min thlen ve em avang hian ka lo chik ngai lem lo a. Tukin bik hi ka hmu dik lo mai mai nge chu ka hre lo.

Rempui'n ka kawr tur a rawn hawn thlen veleh ka ha chhin nghala. Ka lo tawk thlap mai. Siamthat ngai eng mah a awm lo. Tlemin ka dul ala puar deuh a,Mahse mawi lo khawp chu a ni lo. Ka vannei em em a, dul rang lah ka nei hek lo.

Chaw kan ei laiin Zothana bawkin ka mit ala leh chat. A awmdan pangngai renga lang siin a sik lo tlat. Ka cousin, no 4 addict tantir awmdan leh Zothana awmdan hi a inang ka ti tlat.

"Tunlai Zothana awmdan hi a dik lo iti ve em?" Room a kan awm hnuah Remsanga hnenah ka ti a. 

"Engtia dik loin maw?" a ti liam puat. Zosangi  mu meng kar mai bak ngaihtuah nei hmel a pu lo.

"Ka sawithiam chiah lo.. A dik lo ka timai" ka ngaihdan diktak sawi ngam loin ka ti a.

"I ngaihdan mai mai aniang. A party life zo lo anih khu" a ti duh lek. Nih pawh chu a lo ni mahna. Zanah rei tak tak a menga,zingah a mu rei leha. A chang chuan chawei loin hna a kala. A mizia Danglam em em lo mah se a harhvang lo riau a. Mahse,hei hi chu a zan men rei leh zu in nasat vang te pawh a ni ang e.

Inneih inbuatsaihna a kal zela. An farnu neihchhun a ni a. Sum lamah buaina a awm lem lo bawka a pui dawn viau mai. Mak deuhin Rempui'n Lalrema te unau a hrilh teh tlata. Amah ngeiin phone in a be lehnghala. Zah hre lo tihtakah Lalrema chu a rawn lawr zui nghal mai renga. Mahse,Seni erawh a lo lang chuang lo a. Inneih niah te chuan a lo kal ve mahna.

Man hlanni a lo thlenga, man hlanna hmun tur an thlan fel saah engkim felfai taka kalpui a ni a. Chhung leh khat an kim tha ngang mai. Mahse,Remsanga nu te unau lam leh Rempuii pa te lam an kim thawkhat viau.

Chawei kham veleh Inah Remsanga'n min dah a. Ani erawh a let leh thung. Zosangi muthilh lai chuhin hmanhmawh fein ka inbuala. Fa han neih zet chu rilru thlamuang a inbual theih pawh a ni tawh lo. Nau awmtu nei mah ila a kutah ka dah ngai meuh lo a. Ka ngaihdanah chuan a la te lutuka midang enkawl tura dah chi ala ni lo. Mahse,a len hnuah pawh ka dah ka ring chuang lo.

Ka inbual zo deuh chiah tihin ka phone a rawn ri a. Naute a harh hlau lutukin ka pick nghal vat.

"Hello" ka ti a. A ri deuh rawk rawka,tawng a awm lo. Min rawn call tu ka en nawn leh a. Number hlang ringawt a ni a. Call sual pawh a ni mahna.

"Hello" ka ti nawn leh a. 

"Lan, keimah Lalpuii..Awi, Ruattluanga hi ka bulah a awm tlata. Engtin nge ka tih dawn?" Mangan hmel zetin a rawn ti a. Mak ti zetin ka thaw nghal halh mai.

Engtin nge tun ang hunah Lalpuii bulah a awm ngawt theih ni?!

"Eng maw? Engtin nge I bulah a awm theiha? Vawiin man hlanni ania. Ka haw dawn pawn Hallah ala awm reng sia" ka ti duah.

"Ka hre bik lo.. A thianpa Dinpuia khan min lo call a, thil min pek tur a neih thu a sawia. Ka lo nghaka,ka rin loh deuhin Ruattluanga hi a lo tel ve renga" a rawn ti leh hlawp hlawp.

"Engatan nge a tih che?A hrim hrimah hmu duh che pawh nise hmuh kher angai em ni?" ka ti hmak. Dinpuia kha Ruattluanga thianpa a ni tih a hre renga,ani nena inhmuh lo duh kha a awm ang lo lutuk.

"A sawi dan khan a pawimawh sia lawm.."

"Tunah khan kalsan la.." ka ti leh hmiah.

"Roomah a awm a. Bathroom atangin ka lo bia che. Awi,Lan..Eng emaw tal ti teh. Intihhlumah te min vau ania" a rawn ti leh ṭuau.

"Lawk, ka hre thiam lo. Khawiah nge Dinpuia?' 

"A awm lo. Min bum alawm...Roomah hian min kalh hnan a"

Beidawng thinrim lutukin ka thaw hawk ringawt..

PS: Ka dah ang tih ka lo sawi lawk tawh si a, dah loh leh ai chuan tiin ka hman dan danin ka ziaka. Thu inkal thelh nuai pawh a awm maithei a,Chhiar a nuam lo viau maithei e. Tin, ka mit hian a tlin lo lek lek zel maia. Duh ai hmaa tihtawp emaw chawlhsan lailawk zawk emaw a ngai maithei a. Ka lo sawi lawk ve hrim hrim e.