MINE -22

 Chapter -22

Thawk ka la vaka,ka thaw tha thei chuang lo,ka awm ka chuma,ka lungphu lah a thlawkchhuak dawn emaw tih mai tur khawpin a phu hlawp hlawpa, ka thlan a sa nghal vek.

Ka awmdan pangngaia awm tuma ka buai laiin ka phone a rawn ri thuta, ka phu nasa lutuka ka phone ka paih dawrh mai. Ka zia deuh tan tawh emaw tih laiin ka lungphu a rawn rang lehnghal vaka. Khum sira ka phone tla chu ka va en a, ka awm dawm chungin ka bawkvak phei titiha. Hlau em emin min rawn call tu ka zuk en a. Remsanga a ni tih ka hriat veleh ka lakang nghal vat.

"Hello" aw khur hlak hlakin ka ti a. Ka insum thei ngang lo.

"Anu,keimah...Ka tha ania" Remsanga awin a rawn ti a. Ka mu thla nghal thlawp mai. 

"Eng nge thleng a?" ka ti a. Ka lungphu su nasa lutuk a la pangngai thei lo.

"Ka tha... ka lo thleng har lo vang. Ka dah phawt aw" a rawn ti leh a. A awah engmah dik lo a awm lo. Mahse,ka hlauhthawnna a reh thei chuang lo. 

Room a rawn luh rualin na a neih leh neih loh ka zawt nghala, a nui ringawt.

"A nuihzatthlak loh ania" ka ti hmak. Min rawn kuaha, "Thinrim suh. Ka tha vek alawm" a ti leh a. Kuah duh loin ka talchhuaka, ka hmaa a ding chu a mitah tak ka en a. 

"Ka hlauhthawn tehreng nen,ila nui theia.I accident emaw ka ti lawm" ka ti vin leh hlar mai. Ka hlauhthawn zia ka ngaihtuahin a awmdan chuan minti thinrim tlat.

"Addict pakhat a rawn inbarh alawm mawle.Mahse,ka su lo hlauh" a ti zangkhai leh vuha. Vawilehkhatah zu rim ka hre thuta,Sinus nei ka nih avangin tun ang thlasik tantir atang hi chuan zan lamah rim hi ka hre mumal vak lo a. Chuvang a ni ngei ang a lo luh veleh a zu in rim ka hriat loh ni.

"Zu te i in a" ka ti nghauh. Ka ngaihdan a ni thak lo mai.

"Um,Mahse tlem" a ti leh a. 

"Tam deuh in law law ta che" ka ti leh hmaka,ka kalsawn a. Mahse,ka kalsawn hlat hmain ka kawngah a rawn kuaha,hneh zetin amah si chetin min pawt bet nghal rawka. Ka tal nghal vaka,Mahse min kuah nghet lutuka ka talchhuak thei lo.

Ka darah a rawn fawpa, "thichhe si,sual si" a ti zui nghal sup.

"Zu ka ngaithei lo em em tih I hre renga,i in tho anih chuan tam deuh in law law tur che ania" ka ti leh a.

"I ngaithei lo a,in pawh ka inngai lo reng alawm" a ti ve tlat. Dawt a sawi lo tih ka hriaa,Mahse ka la lungawi chuang lo. 

"I accident emaw tiin ka ngaihtuah em em che a,nang ilo rui mai maia" ka ti nawn leh nghat.

"Sorry, min ngaihtuah tih ka hria alawm,ka in tawh lovang. Ka ti tak tak" thutak zetin a ti leh a. Chhang duh loin ka ngawi reng.

"Mawh, ka in tawh lovang" beidawn hm zetin amah bawkin a ti leha. Ka lungawi lo teh nangin ka chhungril erawh chuan a ngaidam leh thlap tawh. Miin an sawi thin,nupa hi chu kan danglam a,kan inhrethiam em em zel an lo ti thina,a dik zia hi ka hmu in ka tawng ve ta malh malh mai.

Min kuahna ka phelhsaka,"Inbual rawh, Mut a hun tawh ania" tha takin ka ti a. 

"I thinrim tawh lo tak tak em?" ngaihngam chiah lo niawm takin a ti leh sup. Tawng loin ka bu nghata, bathroom lam ka kawk zui a," Yes,Boss" nui chungin a ti a. Insum hman loin ka nui ve hak mai.

Rempuii pasal neih atangin kar a liama, thla a vei leha. Atir lamah a lo kal zing em em a,a rei deuh anga a zia mai ang chu k tia,a zia ta lem lo. Nutei lahin a khak ngai lo a,khak chu sawi loh leng tur leh chawei turin a ko awl lo zawk. Remsanga ten an khak ka rin laiin an khak chuang lo. Kei kha ka tuman min sawisel lo nangin ka inthlahrung thina, ka lo inthlahrung thlawn mai mai niin ka hre leh hnuhnawh a.Mahse ka nu hian kal fo lo tura min tih a avangin ka kal tam lem lo. 

Nau han pawm meuh chu kan khawvel a zim ta viau. A zia a thlak ve renga,a sen laia a fel tehreng nen tah vak vakte a ching chho a. Tlang hrileng eng emaw hlek a man thei em em a. Mihring mangang leh chiai lo vek tak, lawm pawha lawm over lo, lungngaih lai pawha lungngai over anga lang ngai lo ni khan ka lo inhre thina. Fa han neih meuh chuan ka lo nih loh zia ka hre chiang ta ngang mai. A khawsik hlekah pawh ka hlauthawng hma em em a, tun hnaiah na nei si lo a tah vak vak te a chinga, ka mangang thina. Kei ai mahin Remsanga a fanu chungchangah chuan ala mangang hma zawk zui a. Thla 9 chauh ala ni chungin a harh lutuk avangin a inti pem reng mai bawka. Hmeichhe naupang tiang em em hian an harh thei ang tih pawh ka lo ngaihtuah phak ngai lo. Nutei lah chuan "A pa a chhun anih hi, a pa sen lai pawhin tiang chiah hi alawm" a ti awlsam mai. "A dam tha tihna animai" te a ti thul. Eng mah a khawih phakah dah chi a ni lo,a khawih phak chin chu an thal rem rum zel maia. Achang hi chuan ka tah te a chhuak rum rum thei. Remsanga lahin a atchilh thawthang a nimaia,a duat lutuk hi achang chuan ka ninga,ka khak thina. Mahse,a pi leh a Patea te pahnihin an duat em em mai bawk si nen, a len hunah pawh enkawl dan turah kan inhau buai fo ang tih a rin thiam theih ruak. Kan in lama ka u fanu kan duat over thin zia ka ngaihtuaha, u Sini lo mangan tur zia ka hrethiam ta uar uar mai.

"Eng em em nge ken i tum a? Awm nghal tur ang maia" Remsanga'n min ti a.  Vawiin ka nu te in lama len phei kan tum a,Zosangi mamawh eng eng emaw ka khung khawm tuna, Keng tam min ti ngang aniang.

"Awm te pawh kan awm nghal ang chu" tih pahin ka nui a.

"I zak lo anih mai chu" a ti hluk. 

"Achang chuan zak ve e" ka ti leh a. Throw pillow a rawn thlawk phei nghala, ka mawngah a rawn vawma,ka nuih a za zual sauh thung.

"Nghal lutuk mai. Inhnuaiah ka lo nghak ang che, dar 11ah meeting ka nei dawn tih theihnghilh lo la aw" a ti leha. Khuma ka thil ken tur en chungin ka bu ringawt. Kan leng khat em em a,len ve chhunah ka thawkrip viau dawn a ni ber mai.

Inhnuaiah ka chhuk thlaa, kan rualin Thlungi a lo kal ve dawna, a leng chhuak khat ve tho bawka,a phur ngang mai. Nau awmtu tur Remsanga'n a laa,Mahse a lak berkher khan nau a awm peih tlat lo. Inchhung chet nuam a ti zawka,Thlungi lahin nau awm nuam a lo ti veleh tlat bawk nen Thlungi hi Bawihtei bulah a awm deuh chawt a nimai.

Kan Inah min daha, reilote a rawn lut ve zuaia,a kal lehnghala.Tlaiah chaw kan ei nghal dawna, Remsanga pawh a rawn ei ve dawn tho bawk.

Bawihtei'n Zosangi a lawm ve ngang mai. Mahse, a harh lutuka,ani lah ze zawi chi a lo ni sia, a rei deuh hnuah phei chuan a awm peih ta vak lo.

"A bual theih aw.. Keiman ka lo bual dawn em ni?" U Sini'n a ti a. 

"Pawi miah lo.. Mahse,a harh lutuka, ka huh vek zel" nui chungin ka ti a. 

"Um,a u nen chuan Danglam tak anni" nui chungin a ti ve a. Kan sawi lai reng pawhin Zosangi a lo phe vawt vawt reng a, kan nui kan nui ringawt.

Kan bual zawh veleh thil ka eitira, ei zawhah u Sini'n a paw mu a. Khuma kan muttir hnuah thil kan ei ve ta chauh.

"Kan Lalzoi chu a hahthlak dawn anih kha..Thla a tisa ve phat phat mai" a ti a. 

"Hahthlak thei lutuka,achang chuan Thlungi nen kan tap lo chauh zel ania" ka ti a. Thlungi nuih a za ngang mai.

"E,ka hrilh ang che ka tia.. Zothana hi damdawi a khawih a ni lo maw?" Zawi tein a ti a.  Ka thingpui inlai ka tem hlaka,ka ringhlelh reng,Mahse ka hriatchian theih si loh a ni a. Engtin nge maw a lo hriat ve ni? An inhmu ngai pawh a ni awm der si lo.

"Ti nge a?" Alangah erawh chuan ka ti a.

"Pu Duha fapa Zakhuma khi i hria em? An inkawm thina,Zakhuma khi number 4 addict ania. Van tlang chuan an hre lo ang.I u hian a lo hriaa,a sawichhuak ve tehmiala" a ti a. Ka u hi YMA lamah a inhmang nasaa, tiang lam hi chu a hre thei viaua. Mahse,a sawi ngai mang lo.

"Aa,an inkawm vangin a ti ve ang tihna pawh a ni kher nang. An lo inkawm sa reng pawh a ni theia" ka ti leh a. Mahse,Zothana mize danglam hi ka hai lo a. Ka ringhlel sa hrim hrima,ka sawi duh lo mai zawk.

"Ngaihven deuh ula chu a tha. Damdawi kher kher hi chu a pawi em mai" a ti leh. Ka nu a lo haw tak avangin thildang sawiin kan phul ta hlut.

Chawei kham hnuah reilote kan thu muang leha, kan haw tur Bawihtei'n min ngena,kan inthlem leh fe phawt a. In kan thlen meuh chuan dar 9 a hnai kuar tawh. Rin loh deuhin Rempuii car a lo awm a, chaw an rawn ei nge zanah an lo leng zawk ka hre lo. Nidangah pawh sawi lawk loin chaw a rawn ei fo thin miau a. A duh dan dana a rawn tal hi kan Inah thil thar a ni lo.

"Mambawihi a lo kal a ni maw" Kan luh veleh Remsanga'n biak bik pawh nei loin a ti a. 

"Aw, lo kal.. A muhil elaw?" tih pahin Zosangi a rawn pan hnaia, tui zeta a muhil chu a rawn khawiha, a harh ang tih ka hlau ru zek zek mai.Mahse, vanneihthlak lutukin a harh ta lo hlauh.

"Kan rei ta phiana, Bawihtei'n min ngen kual leh vel bawk si nen. Ka han mut ange" ka ti a. Remsanga min rawn zui ve nghal chu Nutei'n a ko ding leh a. "Lo chhuk leh lawk teh aw. Ka be duh che ania" a ti a. An inbiak duh thu an han sawi deuh thlap thlap thin hi ka awmtirh phei kha chuan ka hre thiam vak lo. Kan Inah kha chuan chawei laiin thil pawimawh kan sawi ho mai thina. A hranpa taka inbiak duh deuh kher hi kan nei ngai lo. Mahse, ka awm rei tial tiala, an mizia ka man thiam ve tial tial a, mimal tin hi an zalenna an inngaipawimawh sak em em a. Chaw ei Laia thil pawimawh sawi ho tih vel chu hnai lo tak a ni. Sawi duh pawimawh nei chu roomah te an inbe mai zela,ka hre thiam ve viau tawh nangin achang hi chuan chhungkua hi kan ang lo ka ti thin.

Zosangi ka mut a,Remsanga erawh kan thil ken ho a rawn daha,inthlak pawh inthlak loin a chhuak zui lehnghal mai. Ka intifel sawk sawka,ka intihfel zawh veleh ka inbual zuaia, Remsanga a lo la let si lo nen Zosangi a harh ka hlaua, hmanhmawh angreng fein ka intleuh zuai zuai a,ka inbual zawh pawhin Remsanga a lo la let ta Chuang lo cheu. Eng chu an sawi chu ni maw a??

Inhnuaiah ka chhuk thlaa, Rempuii ka la hmu ta chuan lo. Pari hnenah "Khawnge Rempuii? A haw leh tawh em ni?" ka ti a. "Aih,Roomah U Mama te nen an awm" a ti awlsam mai. Atthlak angreng takin ka chhungril a na zawka, Chhungkaw zinga telve lo anga inngaihna ka nei thuta. Mahse, ngaihtuah thui loh ka duh avangin Pari hnenah thil dang ka sawi zui ta daih.

Mut ka tum laiin a rawn lut a, "I va rei leh angreng si ve. Eng nge ni a?" Ka ti a. Nichina ka lawm chiah lohna kha a rawn lang leh zawka. Mahse, tihlan erawh ka tum lo.

"Mawmbawihi mawle,an inhau deuh aniang. Haw rih loh a tuma" a ti bung vut. Mak ti deuhin ka en a, Kum khat em pawh inneih hmaa tlan han tum ngawt mai chu a mak angreng.

"Khai aw,a va zia lo ve. Ruata zu a in nasa deuh mi?" ka ti vat.

"In bawk ang. Ka hre thiam chiah lo. Amah Ruata biak phawt loh chuan Mambawihi sawi ringawt chu awih chin neih te a tul a" a ti leh mai.

"Um,a dik ve tho. Anih chuan a riak dawn mi?" ka ti leha.

"Aw,riak se ka tia. Mahse, Ruata nu kha Nutei khan a biaa. Thil awmzia kha a hrilh nel nual bawka. Naktukah a haw leh mai ang chu" a ti leh duah.

"A tha alawm" ka ti sap ringawt. Dik tak chuan tha ka ti em ka hre lo. Mahse,tha ka ti lo anih pawhin sawi tur ka nei chuang lo a. Hetianga sawi hi a awlsam ber.

Kan mut hnuah u Sini'n Zothana chungchang a sawi ka hre chhuak a, Rempuii rawn tlan titih bawk nen Remsanga hrilh loh mai ka duh a, Mahse a serious em a hria se a dik ka ring leh ta zawk.

"Zothana hi a awmdan a danglam ka tia. Vawiin khan u Sini'n kan veng Addict nen an inkawm thu min hrilh leh a. Ngaihven deuh a tha lo maw?" ka ti a. 

"Um, nia a awmdan hi hman deuh atang khan a dik vak lo a. En zui angai anih chu" a ti tha ve mai. Min rawn kuaha, "Ka ril a tam" a ti teh daih.

"Chaw kan ei hma deuh em a... Eitur ka zuk siam dawn mi?" ka ti vat. 

"Aih, chaw lam pawh a ni lo" a ti leh lawi.

"Chaw lam ni lo chu fruits lam nge...' ka sawi zawh hmain ka pyjama kawng a rawn zen a. A sawi awmzia ka man thiam ve nghal zat...

Zing a inhnuai ka chhuk thlak vein Rempuii a lo haw daih tawha. Ka hamhaih letling angreng. A lungawi lo viau emaw tih laia a haw leh ta mai chu nuih te pawh a ti za lek lek mai.Mahse Nutei'n Ruata pi tluksual thu a sawi takah chuan a haw a tul tih ka hre thiam veleh mai.

"Khawnge Zothana hi?"  Chawei tura kan thut fel hnuah Remsanga'n a ti a. A chungchang kan sawi atang khan ni 2 a liam leh tawh.

"A la tho lo aniang. Nizan kha a lo haw tlai khawpa" Nutei'n a ti vat. Nizan chang lo pawh a lo tlaia,a lo haw hma hi sawi tham lek a ni zawk tih ka lo ngaihtuah daih.

 

Eng mah sawi zawm loin chaw kan ei zuia. Kan eikham fel tihin a rawn tho ve chiah. Mahse,tho chiah pawh a rui nghal nimaiin ka lo hmu thung.

"Motor chahbi min pe rawh" Remsanga'n a ti hmuk. Remsanga awki chu a vin hran lo nangin nek luih chi a ni lem lo.

"Maw? Ti nge?" ka rin loh lutukin Zothana'n a ti a. Hmai thal deuh hain Remsanga a la en zui. A awmdan chu a ngeiawm ngawih ngawih ma.

"I kawl tawh rih dawn lo" awki Danglam map loin Remsanga'n a ti leh a.

"Engvangin maw? Ka lei ni loa i lei anih vangin maw?" Zothana'n ala ti leh ta.. Hlauthawnga lutukin Remsanga ka en a, a insehruh nasat zia ka hmu thei. Nia,a naute hian hetiang hian an la chhang ngai lo.

"I roomah lut rawh" khauh zetin a ti hmuk. A beng dawn emaw ka lo ti zawk. Nutei'n a room a kaih luh a tuma, a duh thak lo. Sangzuala tal awm se a zia tur ania.

"Hetianga i awm chhan hi ka hre vek. I nupui hian min sawi tih pawh ka hria. Nizanah an venga ka thianpa an mana, chuvangin min ringhlel anih kha. Ka hre vek alawm. Mahse, Mama, an sawi ang kha a ni lo. I nupui te hi ring suh,an chhungkua rintlak an awm..." 

Remsanga kut a phe zawka, Zothana biangah ri thuai khawpin a benga,a thle nghal lawng mai. Inring hman loin kei leh Nutei kan te nghal thawt bawk.

PS: No edit leh ngar ngar. Tin,naktuk zan hi chawl thut thei reng ka ni e aw.