MINE- 23

 Chapter -23

"Tunah i roomah lut rawh. I hria em? Lut nghal rawh" Remsanga'n a ti leh ṭhawt a. 

Mahse, Zothana rui a phuang mai chuan Remsanga sawi hre awmin a awm lo. Nutei'n kaih luh a tuma,Mahse a nem sawka,Nutei a per nghal dawrh a. A rawn zuang phei thut a, ka biang a rik pawp rualin ka pai nawk a,vawn mai tur a awm si lo a,ka sawp thla hnawk a, arsi a leng nghal chum chum mai. Hamhaih em em in ka hawichhuak a, Zothana'n min rawn hnek leh a tum lai tak ka han hmu leh a. Hlau hlawpin ka ṭe vaka, ka hmai ka hup ta ngawt. Mahse, min rawn hnek ta miah lo. Ngam leh ngam loin ka hawichhuak leha, Remsanga'n chhuata  Zothana a lo rek bet ka va hmu a. Zothana thaw thei lo invai vak vak chu ka en a. Eng emaw tal ka tih loh chuan a rek hlum mai dawn tih ka hria, rang lutukin ka tho a, Remsanga hnungah ka va bawha, ka kuah bet a.. "Thlah rawh,mawh, thlah rawh" ka ti mial mial ringawt.

"A tawk e..." inthlahdul pahin a ti a. Mahse Zothana a la nem bet tlata. A rehna erawh a thlah dul tawh. Zothana erawh boruak hip luh tumin a hrawk a dawma,a khuh vak vak bawk.

"Roomah lo han chho la.." a ti dam thlup. A aw a dam em em nangin a mitmengah chuan a thinrim zia hai theih a ni lo.Mahse,ka kalsan ngam lo. Ka kal hnuah a khawih zawm leh ang tih ka hlau ngawih ngawih. Ama inchhir lehna tur ti lo se ka duh ber.

"Chho rawh" a ti nawn leh a. 

"Ka duh lo.. Thil pawi zawk i ti palh theia" ka ti a. A banah ka vuan tlat bawk.

"Aih, ti lo ang. Kal rawh" a ti leh a. A tawp lamah chuan dawhtheih lohna alang theia. Hnial zui chi a ni lo tih ka hre thiam vek.

Roomah ka luta,ka lungphu rang lutuk control tumin ka awm dawm chungin ka ding a, duhthawh lutukin boruak ka hip kawk kawka, tlem chuan a zia deuh nangin ka la hah ngawih ngawih tho. Kan in lamah khan eng emaw chang han inhnial buai ve phat hi chu nei ṭhin mah ila inhauh chiam chiam emaw kut inthlak phei chu kan ti ngai lo tawp. Khatianga chhungkaw buaina kha ka vawikhat tawnna a ni a. Hmeichhe nu dem dem lo tak ka ni chungin kha thil kher kha chu ka tithei ngang lo.

Ka biang a rawn na vang vanga, Zothana'n min hnek tih ka hre chhuak leh chiah. Dressing table ka pan pheia, ka biang na lai ka en a,a la rei loh nen a lo vung ṭan hman tawha. A sen deuh ṭana,ka ang chhina,a na nghal zawk mai. Vurin dep ila a zia anga,Mahse tunah vur la tura chhuk leh chi a ni tawh der si lo. Darthlalanga ka hmel lo lang ka en leh a, ka taksa na mai bakah ka rilru a naa. Ka unaupa te pahnih hian kut min la thlak ngai lo. Tunah ka thiam loh ni miah loah kut ka tuar a,hei hi pasal neihnain a ken tel zel a ni angem tih ka ngaihtuah a.. Mi pasal nei,an chhungte nena buai reng an tama,kei hi ka vanduai ber chu ka ti lo. Remsanga a fel em em a,kawng engkimah ka thlavang a hauha,min ti zahawm em em bawka. Mahse pasal chhungte erawh ka hrawn fuh em em chuan ka hre bik tlat lo.

Bathroomah ka lut a, tuiin ka biang vung lai ka tihuh a, nakinah phei chuan tawng zawngin a na ngei ngei ang tih ka ngaihtuaha, engvanga min rawn hnek ngawt nge maw a nih le? Remsanga khan ka hrilh vanga ti ni se ka hrilh aṭangin ni 2 a liam tawha. A awmdan ka hrilh vang nise a hmain a control tawh ang chu.. E, amah Zothana zawkin a sawi leh si tak kha..Ka u ten a ṭhianpa Damdawi an mansaka,chuvanga Remsanga'n hria angin angai anih tak kha a..Hrep tak hian.. Tuman min hrilh dun dun lo mah se a awmdanah a addict tih a chiang vek a. Ka insehruha,min han puh leh vaih tehse. Mo nih vanga dikna pawh sawi thei lo khawpa dawih ka ni lo tih a hre mai ang.

Room a ka luh rual deuh chiahin Remsanga rawn lut ve a,Room a en kuala.

"Khawnge Bawihtei?" a ti nghala.

"Chawei lai khan Thlungi'n a pua a. Pawnah a la awmpui aniang" ka ti a. A bu nghuta, a chhuak lehnghal vut. Reiloteah a rawn let leha.Ding zetin Dressing table hmaa ka ding min rawn pana, ka hnung lam aṭangin ka kawngah a rawn kuaha.

"Pawnah an la awm ami?" ka ti a. 

"Um, awm rih rawhse. Khatiang boruak kha a hre thiam emaw hre thiam lo emaw a hmuh ka duh lo" a ti vawt ruih.

"Sorry aw.. Vawikhatmah tiang kha a thleng nawn leh ngai tawh lo vang" a ti leh sup.

Ka chhungrila sawi tur rawn inhnawh up up chu sawi hun a ni rih lo tih ka hriaa. Kut min thlak avanga ka thinrimna te, min puh ngawt turin dikna a nei lo tihte sawi phiar phiar ka chaka.Mahse a nau a ni a, eng anga sual pawh  ni se a khawngaih dawn tho a. Ṭan rukna pawh a nei ngei ngei dawn. Tin, khatiang thil kha a lifeah a naute aṭanga a dawn hmasak ber a nih hial ka ringa. Kei lehzelin a rilru hahna lo siamsak tur ka ni lo.

"Engtin nge a awm tak?" ka ti chhuak sap.Min chhang mai loin ka darah a hmai a rawn phum vang vanga. A hnuah min kuahna a thlaha, a kalsawn zui a. Ka inher ve nghala nangin ka dinna ngaiah ka la ding reng.

Ṭhutthlengah a thu thla hnawk a. A hmai a tuai leh pawk. Thatchhe angreng zetin a thu awn a, min rawn en a.." Roomah ka kalh hnan. Tikhuan ngai a awh hma chuan awm rawhse" a ti zuai ruih.

"Lo inti na palh ta se..." rang zetin ka ti a.

"Na lo vang. Nutei pawh a awm tel" a ti leh a. Ka thawveng deuh huai.A rui lutuk ngaihtuahna kal dik lo zelah khan intihhlum pawh a lo tum palh thei tlata. Mahse, Nutei a awm tel chuan eng em a thleng lo chek ang.

"Ngaihtuah hah suh. Eng chen nge a lo tihtawh ka hre lo nangin a lut thuk thawkhat tawh turah ka ngaia. A sim theihna tura kan tan mar pat angai animai" a ti leh nghut.

"I khawih na lutuk ang tih ka hlaua. A harhfim rih si lo a,nakinah tha taka sawipui a that ka ring zawka" ka ti leh a. 

"Min dang lo la chuan thih pawh a thi mahna" a ti hmuk. 

"Khai, chutiang sawi suh.Pasal tel lo a min awmtir i duh te anih loh chuan" nui chungin ka ti a. Ka nuihzat vanga nui erawh ka ni lo.

"Nangmah kha ngai i awh tawh em? I tha hrim hrim em?" ka tihzawm leha.Min rawn en a," Tha e, I awm chhung chuan ka tha nghal zel animai " a ti sup. A kutin a bula thu turin min hui a,ka pan pheia. A bulah ka thu thlaa,ka darah a lu a rawn nghata,ka kut zungtang karah a kut zungtang a rawn rawlha,nghet zetin a hum zui nghal vang vang.

"I biang kha" Hrechhuak thut niawm takin a ti a. A tho nghal vuta, hnai zetah min rawn bih a.

"A vung anih hi" a ti hluk.

"Nia, Mahse a na vak lo ania" ka ti a. Tawng zawng pawhin a na zawk zawk tih hrilh kher ka tum lo. Eng mah sawi tawh loin a rum nghut a, a tho nghala. Hmanhmawh zetin a chhuak zui chu a ni der.

Angaihna hre lo zetin ka tho ve a, ka zui chhuaka, a chhuak tur a hmanhmawh tluk zeta hmanhmawhin a rawn chho leh nghal chu animai. Vur a rawn keng chho a, roomah min kai lut a. Thutthlengah bawk zaizirin thu turin min ti a. Hnial loin ka thu ve mai bawk. Ka hmaah a rawn thingthi a, ka biang na laiah vurin a rawn dep a. A dim ngang mai bawk.

"A na em?" a ti sup.

"A vawt" 

Ka nui zuia,Mahse ka nuih zawngin a na nghal zawka. Ka nui tawp chiang ngang mai.

"I uang vel anih kha" a ti hluka. A hmel tum deuh bur chuan ka nuih a tiza a,Mahse ka nui ngam tawh lo. Uluk zeta ka biang a dep lai chu ka en a, a hmelpa leh thutak zetah chuan lungngai ve thei hmel pawh a pu lo. Mahse,kan chhungkua hi a kutah kan awm vek tluk a ni a. Sumdawnna lah chi hrang tamtak a awma. A enkawl vek ni lo mah se thutawp erawh a siam zel ngai a ni fo zawk a. Lang lo lamah hian thil tamtak ngaihtuahin a hah ve dawn tih a chianga. In lamah lah a nupui leh a chhungte inrem taka kan awm theih nan a laiah a din angai fo zui bawka. Mi Hausa,nun nuam em em anihna phena a hah ve thin tur zia ka lo ngaihtuah ngai loh avangin ka inthiam lo thar a, ka khawngaih ta ngawih ngawih a ni ber.

Eng mah sawi loin a nghawngah ka kuaha, "Hey, a na ami?" hlauthawng awin a ti a. Chhang loin ka kuah nghet zual sauh ringawt.

Remsanga a chhuak lo nileng ta ṭhaka. Eng emaw boruak tha lo a thlen leh mai ka hlau a,Mahse eng mah thleng a awm ta lo. 

Pari nen eirawng kan bawl duna,Remsanga leh Bawihtei an in awm a. Zing lam boruak nuam lo avang khan kan nula te pawh nidang an ang thei lo. An ṭi deuh dak reng maia,ka khawngaih hlawm zawk.

Motor thawm ka hriaa,Tukverh aṭangin ka va en a,Rempuii motor a lo ni a. Nutei'n thil thleng a hrilh anih ka ring ve tawp. Hringtu nu enkawlna dawng mumal lo a ni  a. Nutei hi a ngai em em a,nu leh fa diktak nen an danglam tam lo ang. Kei phei chuan danglamna ka hmu lo hrim hrim.

Kitchenah a rawn lut tlanga,ka lo be nghal vat. Kum upa lama pasal nei a ni a,tun thlenga ala rai lo hi ka lainat ru ṭhin.

"Pari, khawngaihin Kuhva min va leisak lawk la" a ti a. Mi an tirh dawn reng renga an tawngkam hawihhawm em em hi an unau ho ka fakna pakhat a ni ve tlat.

Pari chhuah hnuah a aw a thian kharha, ka rin ang ngeiin zing lama thil thleng min zawt ta chat.

"Nutei sawi dan phei chuan thah mai pawh a hreh lo a ti a. Ka u hi hetiang a ni ngai si lo a" a ti zui a. 

"Tukin kha chu a incontrol thei lo ve aniang" ṭawngsual hlau takin ka ti a.

"Aniang.Mahse Bawiha hi chu a duat zual bik a, chuti khawpa han khawih chu mak ka tia.. A hnek na che em?" a ti zui leha. Ka biang vung deuh al aṭang pawhin a na ang tih zawh kher ka ngai miah si lo.

"Na vak lo e..." alangah erawh ṭha takin ka ti a.

"A khawih vang che aniang. Ka u pawh hi a mizia a danglam zo tawh" a ti leh a. A u danglam chhanah min puh tih ka hre thiam chiah.

"Ka hre thiam bik lo le" ka ti ringawt.

"Kan naupanlai aṭangin thinchhe tak a ni ṭhina.Mahse,a unaute tumah kut min thlak ngai lo. Keiphei chu ka nghal ve em hi,Mahse kut min thlak ngai chuang lo a. Tunah chuan a Danglam ta anih hi" a ti leh duaha. Ka chhang tawh lo,ka bu liam satliah ringawt.

Ka chhungril a na ru ve tlat. Keimah vanga Zothana pawh kutthlak angah angai tih ka hre thiam ve a. Hetiang tho hian Nutei pawhin angai dawn tih hrilh ka ngai lo. Sangzuala leh Remsanga erawh mi in ang anni a, ani chu a danglam deuh mahna.Huizz, eng chu nge maw ka tiha kei min han puh daih chu ni? A tuartu ka ni a, ka thlavang an hauh thei lo anih pawhin min dem kher lo hian an awm thei reng si. Ka hriatthiam theih tura min han sawikhum kher duh te hi a sual thlak ka ti ve lutuk. Ani hi a pasalin a thlavang hauh lo se a haw ber tur a ni tih achiang reng zawk.

"Roomah ka va lut teh ang. Khawiah nge chahbi an dah le?" a ti leh a. 

"Ka hre miah lo..I u hnenah a awm aniang" ka ngaihtuahna nena inmil lo khawpa ṭhain ka ti a. Ka awmdan danglam a hria em ka hre lo a,a hria anih pawhin a ngaipawmawh lo a nimai.

Zothana room a an khung aṭangin kar a liama,thla a tling dawn thuak tawha. Nutei a khat tawka a lo chhuak anih loh chuan a awm ve chawta. Engtin chiah nge an inbuaipui ka hre lo. A suffer nasa viau turah ka ngai ve tawp. Mahse,min hrilh lo va,ka hriat an hlau emaw tihmai turin ka hriat laiin eng mah an sawi lo. Bakah,han sawi tur pawhin Nutei ber roomah a tawm deuh chawta, Remsanga leh Sangzuala hi chu thil sawi em em chi anni lo bawka, an sawi lo pawh a mak hran lo. Rempuii a lo kal zauh zauha,a lo kal chuan ani pawh Zothana roomah zel a awm a. Nutei lah a lo chhuak zawk anih pawhin Zothana chanchin a sawi ngai lo. "Eng nge an?" ti ila a ṭhat thu bak a sawi ngai lo a. Thildang a sawi zui daih zela. Ka zawt lui duh bik lo.

Tukin aṭangin chaw ei turin a rawn chhuak ve a, a hmel a thu thâka, a mitkhur a tla dâk bawk.Ṭha takin ka lo biaa, Ani pawhin ṭha takin min chhang a,Mahse ka mitah erawh vawikhatmah min en lo thung. Amah ka hmuh rualin thil thleng kha ka theihnghilh ngai tawh dawn lo tih ka hriaa,Mahse amah huat zui nan erawh ka hmang dawn lo tih pawh ka chiang tho.

Bawihtei ka mut fel a,inbual zuai ka tum laiin ka phone a rawn ri a. Nutei a lo ni a,mamawh a nei anih ka ring ringawt.

"Aw,Nute" ka ti a.

"Chhuak tur an awm em?" a rawn ti a. 

"Khawiah?" ka ti ringawt. 

"Bazar lamah mawle. Inchhung mamawh hi awm lo a tam em mai. Lei ngai kan ngah lutuka" a rawn ti leh a. Ka ngaihtuah a, neih loh em em kan neih ka hre lo. Mahse,inchhung mamawh engkim ngaihven tu ania, Ani hriat dan leh ka hriat dan a inang thei lo.

"Chhuak tur pahnih hi an chhuak tawha, ka a inbual lawk dawna,inbual zawhah ka va lei mai dawn em ni?" ka ti a.

"Keimah zawk ka va kal mai teh ang. Mamawh a tam em mai,lei kim loh a hlauhawm. Thlungi ka hruai anga" a ti a. Min rintawk loh zia a tilang tih ka hriaa.Mahse ka ngai haw duh lem lo.

"Um,ka lo chhuk ang" inbual ka tum nangin ka ti ta zawk.

"Inbual phawt rawh. A hmanhmawhthlak loh.." a ti a, tihtur dang ala neih a sawi zui mawlh mawlh.

Nutei te kal hnuah Zothana a rawn chhuaka, verandaa ka ṭhutna bulah a rawn ṭhu ve a. Ka lo be nghal vat..

"Hmanni kha chu ka buai lutuka" inthiam chiah lo niawm takin a ti zuai raih.

"Um,Mahse theihnghilh daih rawh. Tunah chuan Bawihtei Patea te zawk diktak kha i ni leh daih tawh alawm" nui chungin ka ti a. 

"A hrehawm khawp mai. Ka ngaihtuah let pawh hian eng mah ka hre mumal lo a. Ka nuin min hrilh lo phei se chuan ka hnek che tih pawh ka hre lo reng reng" a ti leh a. Kha mi ni a buai zia kha ka ngaihtuah leta,a sawi hi ka pawm thlap.

"A ho lutuk, theihnghilh daih rawh ka tih kha" ka ti leh a. Nui var var chungin min rawn en a.

"Mama hi chu a vannei ngawt mai" a ti leh daih. A sawi awmzia ka hre thiam chiah lo nangin Remsanga hi chu a nun a tluang em maia,awhawm tak a ni a. Chuvang chu niturah ka ngai ve hmiah.

"A nupui ilo ni hi a vannei. Engkimah i thlawp ṭha em em bawk si" amah bawkin a rawn ti leh a. Ka rin loh lam daih a ni a sawi.

"Maw?" ka ti hu mai. Ka hriat loh vanga zawt pawh ka ni chuang lo.

"Nupui a nei ṭha ka ti.. A hlawhtlinna phenah hian i awm ka ti tawp mai. Nangmah vang hian a mawi bawka" a ti leh a.

"Awi,a lawmawm nangin a awm lo em mai.Ka lo awm ve hma daiha hlawhtling ania. Keia tihmawi theih pawh a ni lo" ka ti hap mai.

"Sumah ka ti hleinem. A thinthawk na lutuk ṭhinte hi ilo awm hnuah a awm tawh hleinem. A hma te chuan ka ngeng deuh te hi min hrawm na thei lutuk. Tunah te chuan heti khawpa ka mizia ka hloh chung pawhin a inthlahdul theih em hi " a ti ta daih. Rempuii khan ka awm vanga kutthlak ching ang deuhin a sawia. Tuna Zothana sawi dan nen hi chuan inpersan tak a ni.

Thim dawnah Nutei leh Thlungi bawr em emin an rawn haw a,Zothana pawh Room a tawm loin Bawihtei a awm a. Nutei lo haw a ri vel chel chul mai bawk nen thla khat deuhthaw kan inchhung reh ṭhiap thin kha ṭawng inchuh nak nakna inchhung a ni leh ta a. Hetiang boruak han neih leh chu mumang te pawh a ang rum rum mai.

A ni telin Zothana a pangngaiah tial tiala, mahse Remsanga'n chhuah ala phal lo. Ani pawhin chhuah a tum lui lo a. Nun phung pangngai a nei leh mek hi midang tan mai a ni lo,ka tan phei chuan a lawmawm zual bika, kan inchhungah hian ka Pasal tih loah chuan thinlung taka ka ngainat em em awmchhun a ni a. Ka tan a hlu takzet.

"U Lan, vawiin chu Benji Birthday ania. Dine out turin min sawm nasa ve bawk si, u Mama hnenah min lo sawisak la" a ti a. Benji hi kan veng ṭhenawm lawka a thianpa a ni a. Bike ringawt atchilh chi, ruihtheihthilah phei chuan fihlim angreng tak a ni a. Zothana best a ni bawka,kan Inah pawh a lo kal tam viau.

"I nu sawi tir la,kei aiin i nu thusawi a tlang ṭha ang" nui chungin ka ti a.

"No, ka nu phei chu Mama zawkin bia se ka ti" a ti awlsam et.

"Ok, anih chuan ka lo sawi anga. Mahse, a theih ngei ngei dawn em ka hre lo ania aw" ka ti a. Lawm zetin a bu nghat.

Remsanga inkhel lo haw veleh ka hrilha, a chal tichuar tapa. Min hnial dawn anih ka ring nghal mai. Mahse...

"I ring ngam em?" a ti ta daih.

"Keiman maw?" Ka ti a. Ka hre thiam lo.

"Um, nang aia kawmngeih a nei hleinem. A mize inthlak pawh i hre chiang bera,tunah hian mi zinga awm turin a ṭha tawk em ka ti anih chu?" a ti leha. A sawi awmzia ka man thiam chiah.

"Ka sawi chiang ngam lo,Mahse rin ka duh. Inrintawkna aṭang hian thil ṭha zawk a chhuak fo a" ka ti a. Ka rin loh deuhin a nui suka. "Hei vang hi alawm ka duh em em che" a ti supa. Nupa nireng siin ka lai lehpek.

Chawei laiin Remsanga'n Zothana hnenah kalna tur a nei em tih a zawta. Nutei lo mengphawk vak chu ka hmu ru kar. Ka bula a sawi ang bawk khan Zothana'n a u hnenah a hrilh leha.

"Kal la,Mahse tlai lutuk lo la tiraw.Tlangval uaih tawh mah la Chhungkaw tan chuan Naute ila ni reng ania. Kal se a ṭha ang tiraw Nute?" a tihzawma. Nutei hmel buai deuh nak chu kan en ṭhapa. A ngawih ren rawn hnuah a bu ta nghat. A rilru tur ka lo hre thiam ve tawpa,atan chuan rinngam a harsa ve khawp ang.

Tlaiah a chhuaka, a kal tur Bawihtei nen kan bye bye lauh lauha. Ka rilruin thil ṭha lo a thlen loh nan ka Ṭawngtai ru mawlh mawlh bawk.

"Anu.." room kawngkhar rawn nem hawn pahin a rawn ti a.

"Shh... A muhil ania. A harh leh chuan a laklawh vek ang" ka lo ti ve thung.

"Okay... Eng lo, Bawiha hian a lo bia che em? Ka rin aiin a lo haw tlaia" a tia. Ka lu ka thing a,sana ka en nghal a. Dar 9 a pel tawh. Tlem chuan a tlai ve deuh tawh.

"Nutei rilru a nuam lo a..." a ti leh a.

"Um,biak kan tum ange" ka ti a. Ka phone ka zawnga,ka hmu mai lo. 

"Inhnuaiah i kalsan leh a ni lo maw?" a lo ti a. Ka ngaihtuaha, inhnuaiah ka charge tih ka hre chhuak nghal zat.

Inhnuaiah kan inzui thlaa, Nutei'n Zothana'n min lo bia em tih min lo zawt nghal a. "Ka phone ka kalsan a,min lo bia em ka hre miah lo..Ka'n call ange" tih pahin phone ka pan pheia. Ka la kanga,miss call a awm leh awm loh ka checka,a awm lo.

Ka call a,a ring ral rala,a pick lo,ka hlauthawng ve ta viau. Ka call nawn leh a,hmeichhe aw hian min rawn chhang a.

"Hello, u Lan,.Sentei ka nia. Zothana hi nichin deuh aṭangin ka hmu tawh lo a" a rawn ti a. Ka lungphu a rang nghal dawt dawt mai. Mahse,incontrol a tul tih ka hriaa. Engamah hmaa lo phili ka duh lo.

"Ok, min lo call back rawh se aw" ka ti a. 

Phone ka dah rualin Nutei'n " Kal lo se ka duha,dil pawh min dil ngam lo a. Lani bawk hian  ilo sawipui thina, nang chu buaina min thlen reng mai. A buai tak takah i buaipui leh peih pawh nisi lo"  thinrim nisi lo, awki ngeiawm tawpkhawkin min rawn ti a. Ka ding khawng lah mai.

THU NAWI : KA RAWN DAH HRAM A, KA EN NAWN THUAKA,DIK LO LAI CHU A LA TAM VIAU MAITHEI. MIZO KEYBOARD HI KA HMANG ṬHANG LO LUTUKA, "Ṭ" PAWH HI A ṬHENAH KA HMANGA,A ṬHENAH KA HMANG LO AW.

KA REGULAR NGAI CHUANG LO NANGIN🤭 REGULAR TURIN MIN BEISEI LO LEHZUAL RIH RU AW. A REM DAN DANIN KA RAWN DAH ZEL DAWN NIA