Chapter -29(Last chapter)

 Chapter -29(Last)

"Ka ngaithei lo tih ka sawi em ni? Vawikhat pawh ka sawi i hria em?" ka ti hmak. 

"I sawi loh vang tak khan ka zawt reng che. In buaina hi ka hre lo der zing tawha, Mambawihi hi chu ka bulah a vui fo a,nang lah hian i sawi ngai lo a,chuvangin nangma sawi ka hre ve duh" a ti leh a. Ka rin loh lam zawnga min chhan takah chuan hamhaih angreng takin ka en ha ringawt.

Bawihtei a pawm a, a chhaih zui nghala, han sawi mai tur hre loin ka hmui ka pet nauh nauh a. Min biak danah khan vawiin chhun a Rempuii nen kan inkhak deuh kha a hria anga, Rempuii thlavang a rawn hauh emaw ka tia. Mahse, tuna a sawi leh dan kha a dang ta daih. Ka rilruah tun hi duh duh sawina hun aniang tih a lo langa. Ni e, sawi ila,a ngaihdan a ni ta lo anih leh a ni lo animai. Ka aw ka thian a, a rawn hawi vut a. A mitmeiin zawhna min rawn zawt a, ṭawng loin khumah ka ṭhu thla te te a. Sawi hmasak ber tur ka ngaihtuah pah bawk.

"Diktak chuan ka ngaithei lo lam a ni lo. Ka in anih hmain a in a lo ni daih tawha,ka lo nin tur pawh a ni lo.Mahse, min khak fek fek reng te hi ka ning ve a. Ṭha taka thilsawi theih reng, mei nei zawng hlira inṭawngkhum te hi ka hne. Min hmusit niber hian ka hre tawh. Ṭhen vang vang duh chang che pawh ka ngah mai" ka ti chhuak ta pawp. 

"Ok.. a dang?" a ti hul huk.

"Nutei nena min huat zia hi ka hai lo. An sawi lai ngei pawh ka hria. Mahse,i rilru a nat ka hlauh avangin ka sawi lang ngai lo. Ka control che angin an ngaia,ka lo awm ve hnuah i mizia i thlak vek an tih pawh ka hria. Zothana kut i thlak pawh keimah vangah an puha, a hmain tumah kut i thlak ngai lo tih pawh min sawi khum fawk fawk.Nutei pawhin a lung ṭha lo chhuak kha amah ka chhan let vangah angai asin. Ka awm reng chuan keimah vanga lungphuchawla thih te an hlau a. I Nutei leh i nau annia, zah hram hram ka duh avangin ka chhang lo fo zawk. Mahse,Bawihtei chungchangah hi chuan ka chhang lo thei bik lo. Vawikhat pawh tlaivarpui peih lo hian eng mah an lo sawi ka duh lo. Thil awmzia hre rual anih hunah a ṭhatna tura an sawisel anih chuan ka haw lo ang. Mahse, ngeiawm zawnga an sawisel apiangin ka chhang let zel tawh dawn. Chuan,i mizia a danglam anih pawhin i duha i thlak danglam a nimai. Kei hian engahmah ka control loh zia che chu nang aia hre chiang an awm lo" ka ti leh piap. A chhungte chungchang tim miah lo a ka sawichhuah na hmasaber a ni bawka. Chawplehchilhin ka thawl nghal hawkin ka hre thei hial mai.

"Min control alawm" a ti tawi tuk. A la nui zuia, ka thinrim em em laia a lo nui chuan ka thusawi a ngai ho tih a tilang a. Vawm pawp mai ka chak.

"Min vawm suh..Bawihtei ka pawm hi aw" ka rilru hria niawm takin a ti leha. Ngei lutukin ka melh a, a mitah tak ka en a, min en ve bawka. A nuihza insum hmel chuan vawilehkhatah ka nuih a tiza thuta,insum hman loin ka nui chhuak nghal thuta. Ani pawh a rawn nui ve nghal hawk hawk bawk. 

Mittui tla phungin ka nui a, tun lawka ka thinrim zia kha ngaihtuaha,nuih loh hram hram ka tum pawhin ka thei ngang lo.

Ka bulah Bawihtei pawm chungin a rawn ṭhu thla ve a. A ban lehlamin min rawn kuaha, ka ngheng nghal a. 

"Sorry aw...Sorry em em aw" a ti sup. Ka en chho a, a hmel thutak lutukah chuan a inthiam lo em em tih ka hmu theia.

"I lo ipik lutuk ṭhin tih ka lo hre lo a,ka tihpalh takzet. I thlavang ka hauh ṭhin a ka hriat avangin ka lo duhtawk a. Hrehawm i tihzia ka lo hre phak lo atin ni" ati leh a. Ngawirengin a kawngah ka kuaha,a awmah ka hmai ka phuma,Bawihtei ka kuah tel a. Kan pahnih in kan ṭawng zawm tawh lo. Sawi zui miah lo mah ila kan chhungril a inzawm tih ka chianga. Ṭawngkam thlum leh induat zui chiam ka mamawh rih lo.

"Ruata hi engtik nge In kha a en leh ang?" Living room a kan ṭhut khawm ṭhap laiin Remsanga'n a ti a. Ruata a awm lo a,midang zawng chu kan awm kim ṭhap. Rempuii a zawhna chu a awmzia ka hre chiah lo. Indan an tum tidawn ila Ruata fapa mal ania. Indan awm loh tak a nia. Mahse,kan in lamah an awm rei tawha. Indan tlang an tum pawh a nimahna.

"Niminah a en a,naktukah a va en leh ang. Ti nge?' Rempui'n a ti a.

"Venghlui a kan In saw a luahtu te khan in an sa zo ve tawha. Thla thar aṭangin an chhuak dawna, tah sawn in duh chuan in awm thei a.In saw i hminga dah ka tum hrim hrim bawka" Remsanga'n a ti a. 

"Ṭhenkhat ten min ning a ni maw" Rempui'n a u tawng zawh rualin a ti a daih. Ngeiawm zetin a nui zui a,min sawichhan lehpek tih ka hai lo. A u thilsawi dan kha mi rilru tluang pangngai tan ngaihkawih tur a awm eih lo a. Mahse,Mihring rilru kawi lutuk hian a hre kawi leh tlat anih hmel. Ka sa ve nghal zak a,Mahse ka ṭawng hmain Remsanga'n ka kutah a rawn vuana,ka en vata. Min en ve loin a nau a en a, keia lo ṭawng angai dawn lo tih ka hmuthiam nghal mai. 

Rempuii ka va en a,huatna langchhuak chungin min lo en a. He nu bulah hi chuan englaimahin ka dik thei ngai lo ang. Ka hming pawh hi chiang takin hrilh ila "Dawt" a ti duh tho ang.Mi kawi laklawh lutuk hi chuan eng mah an hre dik tak tak thei ngai lo a. Mi dik erawh chuan kan diklohna pawh min hmu ngil zel thei.

"Ṭhenkhat chu tu te nge? Mei nei deuh deuh hian ṭawng ṭhin suh.In lei tur in en tho a, chuvangin In ka pe ang che ka ti zawk anih kha" a ti vawt ruih.

"Mei nei a ka ṭawng pawh ka hre lo. I ngaihthlak dan a dik lo zawk anih kha" zahpah lo zetin a ti a. Pasal a neih hnu hian a mizia diktak a chhuak ka ti mai. A u hi a hlau lem lo ta viau. Hei hi chu Nutei thiam lohah ka ngai ve tlata, an in nufa em em a, a sawi apiang Rempuii hian a ngaipawimawh ṭhina.Mahse a u te zah pah lo deuha a chhan pawh hian Nutei hian a khak ngai tlat lo.

"I ṭawng fo mai, Ngaithlatu tana ngaihbel theih si hian i sawia. I mizia hi a ṭha lo tawp" a ti leh hmuk.

"Ka mizia ala ngai reng. Nangmah kha i danglam zawk anih kha" a ti bak leh hlar mai. 

"Venghluiah chuan in awm duh chuan awm ula,in duh loh pawhin in thu ania. Mahse, kum thar atang chuan inbawlhrang rawh u. Ruata nu leh pa tan pawh a tha natthlak a, amah Ruata tan pawh a hrehawm ang" khauh zetin a ti leh a. Rempuii eng emaw sawi tuma a ang zuau hman tihin Nutei'n a rawn ṭawngkhalha.

"Ni e,Mambawih.. I u sawi hi a dik ania. Ruata tan pawh makpa chhungkhung nih chu thil nuam a ni dawn lo. I u in In a pe thei che u a, inbawlhran a ṭha" a ti a. Nu fing tih takah ṭawng hun a hai miah lo tih ka lo ngaihtuah daih.

"Chuti taka chhuak tura min duh te chuan kan chhuak em em ang. Mahse,ka rilru a na ve. Mahni in ti in ka lo thlamuang ve em em a. Min hnawtchhuak chu a ni mai sia" ṭah awin a ti a. 

"Tu man kan hnawtchhuak lo che. I haider lui mai mai anih kha" Sangzuala'n a ti vat.

"Nupui a neih hnu a tiang em em a Mama a danglam hi ka hre thiam lo. Ka nu ka ngai" tih leh insut a rual leh a. Ka tawt up up a,awmngaihna ka hre lo. Ka hlau chu a ni lo.Mahse ka hah a,ka lungphu a rang em em bawk.

"Ka nupui neih vanga danglamna ka nei anih pawhin a ṭha zawngin a ni ang. Ka nupui thlavang hi ka hauh khat viauin ka hriaa. Nangin vawi tamtak i vui thu ka bula i rawn thlen tawh laiin ani hian vawikhat pawh kan inchhung hrehawm a tihna ala sawi ngai lo. Pasal i neih hnu-ah i pasal chhungte laka hrehawm i tih thu kan hre awl lo a. I lo kal tama,i riak thul. Ka farnu neihchhun, ka duat em em i nih avang hian i dik lo tih hre reng chungin ka haider sak thin che a. Mahse, ngaihtuah ve la.I awm ang hian Lani hi awm ve se eng angin nge i ngaih ang?" Remsanga'n a ti dam thlup. A awki a dam hle nangin nek luih loh a him zia alang thei tho.

"I nupui dikna bak i hmu lo. Sawi pawh ni ila awmzia a awm lo" Rempui'n ṭap chungin a ti a. Remsanga a thawk hawk mai. A duat zia hre chiang tu ka ni a. A ṭap han hmuh chu nuam a tih ka ring lo. Engtin nge a tih ang tih ka ngaihtuah laiin ka rin loh lam daihin a nau a chhang leh ta tlat.

"Ṭawngkam ngeiawm tak taka i tih te hi ka hre lo emaw i ti aniang e. Ka hre ve bawk ania. Inngeih tlan zawk nan tiin ka ngawi mai mai zela. A thlavang hauh taka ka awm pawh hi i hre tam lo ang. Amah hi a vui ngai lo bawka ka hre lo der hram hram zela. A dik na chauh ka hmuh leh hmuh loh chu in hria ang chu" a ti nghut. A nem zawnga a ṭawng mai ka rin nen,zanin chu a dang ta daih mai.

Innuai chawt chawt chungin Rempuii a rawn hawichhuak a, a u en loin min rawn en a. A mitmeng a lian bawk si nen ka ip chawih thei.

"Anih chuan i nupui khan unau tak tak kan nih loh vanga min en hran zia hi i hria em? Hre miah lo ang"

"Zorempui, ngawi tawh rawh" Remsanga'n a ti ṭhawt. Ka phu zawka,amah Rempuii pawh a phu ve zawk tho. A hming puma a koh ka hriat vawi khatna a ni a. Hetianga thinrim awrawl hian ala be ngai miah lo bawka.Eng mah sawi zui tawh lo tura Remsanga khap ka duha. Mahse,ka rilru lo lutuk min han puh chu ka duh bik lo.

"I hre sual anih chu. Chutiang lam ka ngaihtuah ngai lo. I u hian pa hran hrin inni tih hi a sawi ngai lo a. A hmangaih zia che ka hriaa, keiin lo sawi ngam tur ka ni lo. Chuan,i u hnenah hian i laka ka lawm lohna pawh ka sawi ngai hek lo" ka ti ve hmak. Ka hming sawi si loin keimah inhnial nan min hmang a. Ka ngawi rei tawh lutuk.

"Lo ṭawng ve suh. Kan unauin kan inbia tih i hmu lo mi?" Min rawn ti let a. Ka ṭawng hmain Remsanga a tho nghal hluaia. Min pawt tho ve nghala,ka darah a rawn kuaha.

"Hei hi ka nupui a ni a. Pasal ka ni satliah lo a,nupui pawh a ni satliah ngawt lo. Ka ta a ni a,a ta pawh ka ni. Zah pah lo lutuka an biak ka duh ngai lo ang. A be tu chu tu pawh nise ka ngaipawimawh lo. Ka nupui zah lo tu chuan min zah lo tihna a ni. Tun hi he inchhungah hian hetiang lam hawi kan sawi tawpna ni rawhse. Vawiin a ka sawi hi thutawp a ni a. Ka thusawi pawm lo tur chu in awm lo thei. In tana eizawnna ka lo dahsa erawh in chhuahpui thei ang.Chuan, in chhuahsan duh in awm a inchhuak anih pawhin Lani thiam loh a ni lo tih inhre veka. Tu man amah puh zawnga insawi ka duh lo. Ka hre leh anih chuan a pawi viau in ka ring" hnial rual loha khauhin a ti a. Min rawn en a, "Roomah chho ila" a ti dam thlup.

Bawihtei laklawh em emin a harha,ka awi a. Ka tihmut leh meuh chuan Remsanga a lo muhil hman tawh. Kan boruak kha a hahthlak lutuka,Ani phei chuan a chhungte then na tluk hiala thupawi a sawi a,atan chuan a hrehawm zual ngawt ang.

Room a kan awm khan thildang a sawi zui ta daiha. Kan buaina kha sawizui a duh lo tih ka hre thiam a. Sawipui luih ṭalh ka tum bik lo. Chhungkaw boruak a rit zual dawn tih chu ka hriaa,Mahse khati taka ka thlavang a hauh khan min ti lawm vawng vawng.

Chiang zetin ka harh a, khum bula sana inhung ka en a. Zing lam dar 3 a lo pel hret a. Ka inleta, Remsanga mutna a lo ruaka. Toiletah a kal anih ka ringa. Mahse,reife hnuah pawh a lo la let ta lo. Ka tho a, Bathroom lam ka pan pheia,pawn lamah a lo inkalha. Kan room Balcony lam ka en leha. A lo awm chuang lo..

Inhnuai lamah eng emaw a thleng anih ka ring thut a,hmanhmawh zetin ka chhuaka, inhnuai lam ka zuk en a,a lo thim thap tho. Kan room awmna floor a inleng kawmna lam Kawngkhar inhawng ka va hmu a. Ka pan pheia, railing nghengin Remsanga a lo dinga,mei zu chungin van lam a lo thir vung vung. 

Ka chhuak pheia,ka thawm hriain a rawn hawi nghal a. Ka pan phei a,a bulah ka va dinga.

"I muhil thei na nge?" Ka ti sap.

"Thei e..Ka harh laklawha, meizial ka zu chak a" a ti a. Roomah meizial zuk ka phal loh avangin a zu ngai lo.

"A vawt sia...." ka ti leh a.

"Um, min lo kuah la" nui suk chungin a ti a.

A kawngah ka kuaha,a cardigan hak laiin min rawn tuama,min kuah nghal a.A lungphu ri dat dat ka ngaithla a. Nun hi a kim bik ngawih ngawih in ka hria.

"Papa.."

"Um..." 

"A hrehawm iti ang tiraw?" ka ti sep.

"Engvang chuan?" a ti zawi sup.

"Ka lamah i ṭang thina,ka lawm tih hrilh che ka duha. Mahse,i tan chuan a hrehawm dawn si" 

"Hrehawm lo tawp chu a ni lo a. Mahse,I lawmna tura dawtsawi mai mai ka ni lo. Kan ṭhat tlanna tura sawi ka nih kha" a ti dam thlup.

"Ka hria alawm..Mahse,ka inthlahrung em a ni" ka ti leh sap.

"Enge ilo inthlahrun a? Min en teh" a tih zawma. Thuawih takin ka en chho nghal..

A kut lehlamin ka khabe a rawn dawma...

"Ka sawi kha i hria em? Ka nupui leh ka fa min paisaktu i ni ringawt lo. Ka ta,ka engkim i ni a. Keipawh chutiang bawkin i ta ka ni a. Ka theih phawt chuan i lamah ka ṭang zel ang.." a ti nghet churh.

"Ka hmangaih che" thil dang sawi loin ka ti a. 

"Keipawh ka Hmangaih che" a ti dam leh thlup.

Hlimnaa khatin ngawirengin inkuah chungin kan ding duna. Ka ngaihtuahna erawh thildangin a luah thung.

Mizo Society ah hian Mo hi a bo mai mai dawn tawh lo. Mo nih hrehawmna paltlang tu hmeichhia bawk hian Mo neih an thiam lo leh fo a. Mi chhungkua va zawm kan nih hian Insiamrem a ṭul ṭhin a, chutihrualin mo chauh ni loin lawina te chhung pawh an lo Insiamrem a ṭul ve bawk ang.Khawiah pawh mo ila ṭhatna lai inhmuhsak tawn hian a hlimawm mai dawn a lo ni. Insawisel dawn chuan sawi tur nei ṭheuh kan ni a. "Kan Inah chuan" tih ṭawngkam hman fo hian buaina a thlen duh chawka. Kan kalsan tak chhungkaw tihdan chhawm luh ṭalh tum aiin kan awmna te mizia zir fo a fuh. Mahse,ṭhat chhuah chiam pawha en hrang lui tlat tu bulah chuan fel reng a harsa fo tho ang. Tunah pawh hian ka thiamna lam keiin ka hmu a,Nutei leh Rempuii tan chuan Mo sual ka ni kumkhua tawh tho ang. An ngaihdan ka dem thei lo.An thlirna aṭang chuan a dik ve dawn tho si a..

Mahse,kei chu mi vannei ber zinga mi ka ni tlat. Ka Pasal, ZOREMSANGA hi ka TA a ni a,a TA ka ni bawk a.Buaina a awm pawhin ka nghenchhan hi ka hre chiang a. Ka hlauthawng leh tawh ngai lo ang.

A TAWP TA🧡🤎

PS: TAWPNA THA BER SIAM HI KA CHAK THINA,MAHSE KA THIAM THEI NGANG LO. HE STORY PUMPUI HI KA THIANNU @ELTY TAN KA HLAN A. CHUAN, KA DUH BER CHU READER TEN HLAWKPUINA PAKHAT TAL NEI ILA TIH HI A NI E.

KA HMANGAIH VEK CHE U A. IN ZARA MAWI VE,HLUTNA NEI VE CHAUH KA NI E