MINE -24

 Chapter -24

"Eng buaina hi nge maw min thlen le aw?" a ti leh a. Ka ngaihdan a ni lo ve ta phat. Keia tihbuai pawh a ni lo,ka sawipui chiam avang a kal pawh a ni hek lo. Ṭawngkam mei nei satliah hi chu ka pal zam thei fo,Mahse ka tihsual ni miah lo a min han puh ngawt zel mai hi ka duh bik ṭhak tawh lo.

'Ka sawipui a ni hleinem. Amah zawkin a kal duh thu leh Remsanga bula sawisak turin min dil a. Ka sawisak animaia. Kal tir ngei turin ka ngen hleinem" ka ti ve piap mai. Rempuii nena an ṭawngkam ngeiawm leh mi khei zet hi ka la chhang let chiam ngai lo bawka mak a tithlu ngang aniang. A ang phuau a, Remsanga a en a," Mama.. " chhan beisei zetin a ti a. Engtin nge a tih dawn hriat tumin Remsanga ka melh zawka, kekawr ipte zen chungin ka hnung lawkah a dinga,a hmel tak ngul maiah chuan eng mah sawi tum hmel a pu lo. Nutei lam ka hawi leha, a beisei anga a thlavang hauhna a hmuh tak lohah chuan min melh hlum tum niawm takin min melha. A mitmenga min huatna langchhuak chu hai rual awm lo mah se ka mit ka la sawn duh bik lo. Ka hlau anga an hriat chhung chuan min namnul an bang dawn lo.Tumah ṭawng tawh loin reilote chhung chu khuavang kal lai ang maiin a reh tlawk tlawka. Motor thawm kan hriat hma chuan kan che lo a,kan tawng hek lo.

Gate-ah motor a rawn tlan lut a, Nutei a hawi sawn ta hram. Kawngkhar aṭangin a dakchhuak a.. Kei erawh ka dinna ngaiah ka la ding a, ka kawchhunga thinrim inmun mek control tumin ka insehruh nasa viau.

Ka darah Remsanga'n a rawn kuaha, a lo kal hnaih lai ka hre bawk si lo nen ka phu deuh zawk mai. 

"Ka thin a rim ve em a" ka ti ringawt. Nutei ka ṭawngkhum danah khan inchhirna ka la nei miah lo a,Mahse Remsanga lakah erawh ka inthlahrung ru deuh duk thung. Hman aṭangin an tan chuan nu ang maia dinhmun pawimawh lo luah tu a ni a, ka thinrim vanga chhang inti mah ila an tan chuan zah lohna lantir ka ni ve thei tlata.

"Um,ka hria alawm. A pawi lo ania" a ti sup a. Ka thawveng nghal hawk mai. Nutei'n chhan beisei taka a koh lai khan eng mah a sawi loh avangin min khak dawn lo aniang tih chu ka lo ngaihtuah daih tawh tho a. Min khak pawh nise amah chawpin ka chhang let duh ngei ngei dawn tih pawh ka hriaa. Mahse,a ngawih tlat avang khan inrawlh a tum lo tih ka hria. Engtin minti dawn lo tih hre lawk deuh roh mah ila Inthlahrunna erawh a bo mai thei lo.

"Hahdam rawh. I thiam loh a ni hleinem" a ti leh a. Ṭawng ka tum laiin Zothana leh Nutei an lo luh takah chuan ka chip leh nghal hmak mai.

"Pengah sawn accident an lo awma,min dang rei phian a" a rawn ti lut bawrh bawrha. A hmel leh mitmengah ruih nei hmel a pu lo.

"I phone i theihnghilh emaw kan tia sin" Remsanga'n pangngai takin a ti a. 

"Maw? Ehe !! ka hawsan a mawni le?" Tih pahin a indap nghala. 

"A awm miah lo mai. Eeee, ni tak. Sentei khan a hmang tak a. Ka duh aiin a tlai tawh sia,hmanhmawh deuhin ka rawn tlan alawm" a ti leh mawlh mawlh a. A rui eih lo tih achiang vek. Amah vangin a nu nen kan lo inkhak tih hria se nuam a ti viau lo khawp ang.

"Va la leh la" Remsanga'n a ti dam duai.

"Nia,Mahse ka va han peih tawh lo tak. Nu,khawi i phone ka lo hmang. Benji-an lo hawn mai rawhse. Anih loh pawhin min rawn pe nghal mai se" a ti leh zung zunga. Ngawirengin Nutei'n phone a pe a, Zothana'n a ṭhiante a be zui mawlh mawlha,  eng mah sawi loin inchunglam ka pan a. Nidang anga han biak lum lam chiam pawh chakna ka nei rih tlat lo.

Ka mut hnu lawkah Remsanga a rawn mu ve a. Eng mah sawi loin ngawirengin kan mu duna. Nichin ang em em khan ka thinrim tawh lo nangin ka la lungawi chuang lo. Ṭhat chhuah theihtawpa inhriat pawha ho te te a min khei ziah mai hi ka lawm ngang lo.

"Muthilh tum la,anih loh chuan i lu a na leh vak ang" Remsanga'n a ti a. Tihharh hlau in dim tein ka inlet ve bawka,a lo harh tho mai.

"Ka mut a chhuak lo" ka ti tawi tak ringawt. A rawn tawlhhnaia, ka kawr a rawn zena. Ka hnute a rawn hum nghal chat.

"I thinrim hian thil dang ka lo Ngaihtuah daih zela" a ti supa. Eng nge a ngaihtuah zawh angai lo. A chet zui danah a chiang vek. Mahse,a moodah ka awm hlawl lo a, ka inlahrang ta zawk.

"Nutei ka chhang kha i rilru a natpui em?" ka ti a.

"A pawi lo ka tih tawh kha" 

"A pawi lo tih leh rilru natpui kha a Danglam alawm" ka ti leh hmak.

"A pawi lo ka tih chuan a na lem lo animai ang chu"

"Nutei khan chhan a beisei a,i chhan lo a" ka ti leh a.

"Nia,ani kha chhan ta ila ka nupui lamah ka ṭang lo tihna a ni dawn a" a ti ṭha leh mai.

"Ka lamah i ṭang reng anih chuan kan la buai nasa dawn ania"

"Ka ṭang reng dawn hleinem. I dik lohnaah chuan ka chhan dawn lo che. Mahse,zanin thleng khan i dik lohna ka la hmu ngai hleinem. Chuan,i dik lohna pawh nise midang awm laia khak che ka duh ngai dawn lo" a ti duah. A sawi ang ngei hian a ti ang tih ka hriaa. Ka awm ve ṭan tirh atangin a naute pawh hi ka hriat laiin a hau mang mang lo a. Thil min hrilh ve an hlau aniang tiin ka vui viau ṭhin nangin a rukin a lo zilh reng zawk maitheia. Keimah ang bawkin a naute pawh a tizahawm ve tho tihna animai.

"A ṭha alawm" ka ngawih rauh rauh hnuah ka ti a.

"Um, tha mai zel. I awm hi chuan..." A nui a. Ka thin a rim lehnghal phat mai. Atir aṭang khan a nui chak hrim hrim niin ka hre tlat. Ka thinrim a,mut pawh ka muhil thei lo a,Mahse eng mah a la thutak lo niin ka hre leh hnuhnawh tlat. 

"I nuih ala za tlat thei a,a lawmawm" ka ti hmak.

"A va mak e aw..."  tihngaihna hre lo hmel deuhin a ti fan ruih ringawt. Chung tak te chuan min ti thinrim zual sauh.

"Mak e,mak deuh asin. Engkim maiah hian mihrang ber tan chuan a nawm loh zia chu..."  ka ti leh hmawk hmawk.

Ngawirengin a phone a la a,a hmet eng a." Ni engzat nge? Uh, a dik anih hi" a ti a. Ka thilsawi nen inzawmna reng reng a nei lo.

"Nangpawh hian min hre thiam tak tak ngai lo. Ka hre ve vek"

"Ok.. Ka pawm vek e,i period a lo hnai leh tawh em anih hi" 

Eng mah sawi tawh loin ka ngawi ta hle hle.

Phak zetin ka harha, nidang ang bawkin Remsanga a lo tho leh daih tawh. Zosangi mutna lam ka va en a,a lo la muhil bem a. Thla thar maiah kum a tling ve tawh dawna. A lawmna tur vel pawh Remsanga nen kan sawi dun nel nual tawha. Hmundanga kal loin kan Inah lawm mai ila, a chei vel tu tur ruai ila,naupang an pawimawh ber dawn avangin naupang tana nuam thei zawnga buatsaih nise kan ti a. Ka fanu en reng chungin ka ngaihtuahna ka kawma,nizan lama thil thleng duhawm lo zet kha ka hre chhuak leha. Inchhang nasa leh inhau buai chiam kan ni lo nangin kan inbe tui lo ve ve dawn tih ka hria. Mahse,ka haw lo bawka, biak chhiat zui emaw hriat reng tumna pawh ka nei chuang lo.

Ka rin ang ngeiin Nutei'n min be miah lo. Ka biakna pawh a hre lo der tuk pum ṭhak. A rei hnuah phei chuan biak ka tum buai peih ta bik lo law law.

"Khawnge Bawihtei?" Ka ṭhutna bula rawn ṭhut ve pahin Zothana'n a rawn ti a.

"Thlungi nen an inpua a. I kal chhuak dawn leh si na nge?" ka ti a. Ka mitmeiin ka thil ei lai a duh ve em tih ka zawta,a bu nghat.

"Kal dawn leh lo. Mama khan hna kal turin min ti zet nangin vawiin chu ka nu check -up angai leh dawn sia. Ka kalpui loh chuan...Chuvangin thildanga kal chhuah loh law law ka duh" a ti a. 

"Eng nge check-up tur? "

"A lungphu a dik lo a tiin ka hria. E, nizan ka lo haw tlai deuh kha engtin nge inlo ngaiha? In lo awm dan teh ṭhapah khan min nghak in ang ka tia" a ti leh duah.

"Ka rawn call che a, Sentei khan phone i kalsan a rawn tia" ka ti ringawt.

"Dik vak lo a awm tih ka man thiam alawm" amah zawkin a ti leha.

"Nia..." Ka ti leh ringawt.

"Midang hian nangmah ang hian min ringngam vek se chuan a hahdamthlak mai tur ania" a ti bul deuh hmak.

"Mambawihi'n vawi tam min rawn calla,ka nu lah chuti bawk. Min ngaihtuah tih ka hre tho nangin a ninawm lamah a kala. Bakah,inrin loh lutuk hi chu sual khum vak mai te a chakawm a. Nizan a ka lo haw lah khan nangmah khan mi lo be miah lo a, thil thleng a awm anih ka ring nghal maia" amah bawkin a ti leh siam siama.

"Um, ka rawn call che a,I ṭhianten nangmah an hmu si lo che kha an ngaihtuah che a" ka ti leh ringawt. A nu nen kan inbat deuh tih sawi ka tum nangin a nu ania,a ṭawngkamah ṭan lo mah se a ṭan ru dawn tho tih ka hre thiam ve tlat.

"Anih chuan ka nuin ṭawngkam mawi vak lo a hmang leh pek anih chiah chu" a ti hul hak.

"Engpawhnise,ka'n kalpui phawt ange" tih pahin a tho a. 

Nutei te chhuah hnu lawkah Duatpuii a lo lang hlawl mai. An hna lamah an buai thei em em a,ka lo thawh reng tawhna anih avangin a buaina ka hriatthiam pui ve a. A lo leng khat viau pawh ka dem hran lo.

Nidang ang bawkin a ti ti bawrh bawrh a,achang leh kan nui bawk bawka, ka mood fuh lo ru zet a rawn thlak danglam vek. Bawihtei lahin a hmuh khat tehreng nen a duh em em a, hmeichhe naupang harh ber mai a ni nangin Duatpuii malchungah a thu hle hle thei tlat.

"Enteh...." a ti hluai.

"Eng maw ka en ang?" nui chungin ka ti a. Min chhang mai loin a hawi kual leh te te.

"Tumah an awm lo tiraw?" a ti a.

"Awi,amak thei. I lo thlen tirh aṭangin an awm lo tih ka hrilh reng che kha. Khawi Bawihtei kha ka lo pawm ang. Muthilh a tum anih kha" ka tih zawma.  Ka laksaka,a hnute ka hnektir a, a meng mang lo zui nghal chu animai. 

"Tuna a mut khan a lai laklawh dawn em?"

"Dawn Chiang..Mahse,a pawi lo.Naute te chu kan mutpui lui nawk nawka,an muhil leh mai" nui chungin ka ti awlsam mai.

"Hnute tui neih loh hi a hrehawm em?" a ti leh a.

"Hrehawm em em lo e. Mahse, hna chu a ti tam deuha" 

"Um,aniang ka ring. Zan velah te a buaithlak anga" a ti leh a. 

"Niang chu. Mi buai loh naah kan buai kan buaia,Mahse Remsanga hi a fel ve em a" ka ti leh a. 

"Um,fel ngawt mai. Enteh.." a ti leh hluai.

"Ninawm si tak... Eng nge a?" ka ti hlak. Ṭawng loin a rawn tho a,ka bulah a rawn ṭhu thlaa.

"Hmanniah Rempuii Officeah a lo kala. Becky a rawn hmu a. Min rawn be luam a, a hnuah inhnuai lamah ka chhuksana. Chuan,ka chhoh leh khan Balconyah an lo ding duna,min hmu lo a..An lo sawi chu Ruata bialnu nei tih vel ania" a ti duah. Ka beisei loh lam daih a sawi avangin phawk zetin ka melh a. 

"A bialnu an tih lah chu model an tia. Lalpuii an ti bawka. I Cousin kha niin ka hre bawk si" a ti leh sar sar.

"Um,anih dawn chu. Tunhnaia inkawp angin ami an sawia?" ka ti a.

"Ka hre chiah lo. Becky khan Remsanga ka lo bia ang te kha a tia. A hrim hrimin Remsanga ṭhiannu emaw ka tia,Rempuii nen hian an lo inkawm nasa zawk mah emawni ka ti" a ti leh a. 

"An inkawm vel vek.Sangzuala nen pawh an inkawm tho a. Chhungkaw ṭhian ania,tupawh hian an kawm vek mai" ka ti a, ner nang chungin a thle bak.

"Kei chu he nu hi ka mil thei lo. A hmel nui sawng phenah hian rul ang maia tur hlauhawm a pai hian ka hria" a ti leh hmak. Nia, hei hi chu ka hre sa tawh. Atir phat aṭangin Duatpuii hian a mil lo. Keipawh hian chhungril takin ka pawh thei bik hek lo. Remsanga ṭhian leh family friend anih ang hian ka be ve satliah ang lek a ni.

"Aaa,a hrim hrimin tuna ngaihzawng lo neih chu a mak ka tia. An Inneihna pawh kum em ala tling lo a. A hmain an lo inkawp reng tawh zawk a ni lo maw?" a ti leh daih.

"An inzui ve ṭhin a..." Ka ti ban chap.

"Maw?" Rang zetin a ti a,a mengphawk hra mai.

"Um,. Zui ve e. Becky te pawh chuan hman lai thil an sawi anih ka ring" ka ti a. A thaw deuh halh a, "Nia,chutiang pawh chu ni maithei. Kei hi kal tawh ila a ṭha ang" a tih zawm leh hluai.

"Chaw i ei duh bawk si lo. I lo kal khat tehreng nen" ka ti a.A hman loh thu a sawi leh ṭeuh.

Bawihtei ka paw ṭhaa, pawnah kan inzui chhuaka, Nutei te an rawn tlan lut ve chiaha. Kan boruak dik chiah lo a hriat hlauin ka ṭang ru nghal ṭeuh mai.Mahse,beisei loh deuhin Nutei nen an inbe hluta, Zothana nen pawh an inbe luama. Kei nen erawh a hranpa taka inbiak a awm lo.

"I nutei ka hmuh apiang hian Dawithiam pitar ka hre chhuak ziah" a ti sawr sawra,tur zetin ka en a. "Hey,nang pawn tiang tho khan ngai ve teh. A mitmeng vawt leh thip zet te hi a dik lo" inti fing zetin a ti zui leh zat zat.

Inchhunga ka luhin Nutei living Roomah a lo thu a, Thlungi hnenah " Mambawihi'n chaw a rawn ei dawna, chaw chhum belh rawh. Sangha kan rawn lei kha fry turin lo siam la" a lo ti mek. Eirawngbawl hmain chaw a rawn ei dawn tih an hre lawk lo nge mawni..Mahse, pawi tawp lo. Nutei thu loin eng mah kan siam ngai pawh ni hlei lo. A awm lo te anih ngawt loh chuan ama duhdan leh ṭha a tih ang veka eirawngbawl kan nia. Kum khat lai ka awm ve tawh chung hian ka thu a chawhmeh siam tur ka sawi hi a tam lo viau.

"Engtin nge an lo tih che a?" ka ti a. 

"Ka ṭha, thil thinṭhawng deuh ka tawn vang anih hmel" a ti a. Nizana Zothana lo haw har,a ngaihtuah lutuk effect anih ka ring ve tawp.

"Anih chu mawle.. " ka ti a."Ka ṭha leh mai ang, Bawihtei chu a va mu laklawh ve" a tih zawma.

"Nia, Duatpuii kha a duh vel lutuka,a lo phawklek ve deuh aniang. Ka han mut lawk ange" ka ti a.

Inchungah ka chho a, Bawihtei ka mut a, Harhvang viau e ti lo hian a mut a tui laklawh hi chuan ri deuh bur bur mah ila a harh leh chuang  miah lo.. Amah hi nau chum deuh ni si lo hian a sa a ṭha a,a rit angreng viau bawk nen puak deuh hi chuan dar a kham hman deuh zel maia. Thlan ngah chi ka lo ni nen thlan a tla hman zel bawk.

Ka inbual a, muangchanga inbual hi nau pawm chuan a theih ta meuh lo. Nau awmtu awm tho mah se rilru a thlamuang tak tak thei chuang lo.

Ka inbual zawhin Bawihtei a lo la muhil a, khua a thim titih tawha, nidangah chuan Remsanga hi a lo haw tlai ngai meuh lo. Ka phone ka lakanga, Remsanga msg a lo awm vang.

"Kan laklawh lutuka,ka rawn tlai hret ang. Chaw pawh duh leh min lo ei san la" ka chhiar pahin ka nui a, a tlai dawn apiangin chawei San turin min ti ve ziaha. Vawikhat ka eisan a,a titau deuh bura. Ka titau lo tiin a ṭang tlata,Mahse khata ṭang khan ka ei san leh tawh ngai lo.

Vawiin lama Bawihtei toys thehdarh ho chhar khawm tumin inchung zawla inleng kawmna lam ka pan a, Mahse, Kawngkhar  a ka pen luh rualin ka ding leh chat. Nutei leh Rempuii an lo ṭhu duna, mak deuhin keima chungchang an sawi anih rinna ka nei ve tawpa.Mahse,tiang a miin min sawi ni a hriat chang hi ka lo nei zauh zauh tawha,ka tisual khat viau zui bawka. A mawi lem lo tih hre reng chungin ka ngaithla ru duh tlat tho. Ka tawlh let zal zal a, an hmuh theih lohna lai tur kawngkhar sirah ka ding fel ta than. 

'Chutianga a tih che chuan ka u chu a ngawi reng thei a maw?" Rempui'n a ti ta chiah. Ka ring sual lo lehpek.

"Ti lo, a ngawi reng" Nutei'n a ti a.Rempuii a chek nghal tlak mai.

"Ka awih thei lo zawk. Zah lo lutuk hian tuman kan chhang let ngai lo che tih hrilhfiah angai anih chu. Keiman ka hrilh ang,anih loh chuan i lung ṭha lo sa hi a ti khaw lo zo vek ang" a ti leh hlawk hlawka. Nizana ka chhan let vang khan a lung ṭha lo a lo chhuak anih chu!! Hahthlak hian a...

"Eng mah sawi angai lo. I u hian a ṭan nasa ania. Nu tak tak ka ni lo tih hi Lani hian a hai miah lo a. Min nekchhuah mai loh nan ngawih ka chuh angai animai" a ti veleha. Ka va ṭawng ve mai ang tih hlauin ka insehruh ngat ngat mai.

Thawm awm lo in a reh deuh ṭhapa, ka va bih leha.Rempuii ṭhu tawh loin a lo ding a,a hmelah thinrimna alang chiang ngang mai. Nutei a en a,

"He nu vang hian ka u hi a a zo tawh. Eng emaw tal kan tih angai ang. A lo awm aṭang hian ka u hian amah bak buaipui a nei lo. A lamah a ṭang a,sawisel hlek pawh a duh lo zuia.. Teremi kha lo nei zawk se kan chhungkua kan hlim dawn nen" thinrim zetin a ti ta bawrh bawrh. Teremi hi Remsanga nen reife an inzuia,mahse an inṭhen a,an inṭhen chhan tak ka hre lo nangin Teremi hian control a tum lutuka, Remsanga'n a ngaithei lo anih hmel. 

"Ka haw ngawih ngawih he nu hi chu" Rempui'n a ti leh a. Ka hmui ka pet a. Ka mo tirh aṭang khan min lawm lo tih hi ka hai ngai lova,Mahse tiang em em hian min hua tih erawh ka lo hre ngai lo.

"Tihngaihna a vang anih hi. Kan Chhungkaw tan chuan  Becky tluka tha an awm thei ngai lo vang. Mama'n a lo nei lo hi pawi kan la ti vawng vawng zel mai dawn anih hi " Nutei'n a ti a. Mak ti em em in ka ding khawng lah mai.

PS : Story ziah laklawh lai nei reng chunga ka'n chawl vang vang zel mai hi chu ka inhmeh tawh lutuka, MAENGI RALTE hi ka ni ngawih ngawih zel😆