MINE-25

 Chapter -25

"Becky te chu Mama nen an inngaizawng hleinem" Rempui'n a ti a. Ka rilru a zawhna awm a rawn chhang a ni ber. 

"Ngaizawng lo mah se Becky'n a duh em em tih i hre reng alawm. Keini thlengin min zah thiam em em a, kan Lani ngawt ai hi chuan lo nei se kan hlim zawk hle tur ania" a ti leh a. Ka dinnaah ka insehruh ngar ngar mai. Engvangin nge Bekcy ka pawh tak tak theih loh ka hre chiang ta vek. Ka pasal a lo duh ve em em anih chuan chhungril a lo inpawh chu thil har tak tur a lo ni.

"Bawihtei a tho tawh ngem le?" Rempui'n a ti a,thildang an sawi zui a. Thawm nei mang loin ka kalsawn zal zala. Room chhung ka luh fel veleh kawngkhar nghengin ka dinga,thawk ka la nghek nghek a. Ka chhungril na ngut ngut chuan a kher hian min kher nimaiin ka hriaa. Lo ngaithla Malek ila tha tur ania. Mi hian min hua pawh nise kan hriat loh chuan rilru dam takin kan awm thei zawk a. Tunah chuan ka chhungrilah min huatna kha a bo thei tawh dawn lo tih ka chianga, engtikahmah ka pawh leh tak tak thei pawhin ka ring tawh hek lo. Mahse an thilsawi kha ka ngaithla duh miau sia. Ka na ta hle chu anih hi. Huizzz,hriat vek law law hi that pawh a lo tha mahna le.

Bawihtei a rawn tapa, rang zetin ka pan pheia. Min hmuh veleh a tap bang ve mai bawka. A hnute hnek tur siamsak pahin ka be mawlh mawlha, a sen tet lai atang khan a hrethiam lo tih hre reng mah ila biak nuam ka tih avangin ka be nasa thei hrim hrim. Achang leh ka lampui a,achang leh naupang Lehkhabu ka enpui bawka. Hna dang nei lo, inchhung chet pawh tih chiam ngai lo ka ni a,ka hman bawk a, a hranpaa inawm tleina pek a ngai lo a. Phone ka la khawih tir ngai lo. Nu tamtak,an fate naupang te te phone khawihtir an awm thina,an han dem viau hi keichuan ka dem ve chuang lo. Inchhunga buai lutuk chuan an tleina tur a phone han pek mai kha thil tih awm lo a ni ka ti ve tlat lo.

"Au Lan.." pawn atangin Thlungi'n a rawn ti a. 

Lut turin ka ko a, a rawn tek lut nghal nalh.

"Awi, a harh tawh law?" Tih pahin khumah a rawn thu kaia, Bawihtei nena in awm reng anni bawka kan nula te zingah Thlungi a duh fal nalh.

"Chaw ei turin min nghak em?" Thlungi hnenah ka ti a.

"Aih, nghak lo. U Mama a lo haw tlai dawn sia an tia. Pi leh u Mambawihi'n an ei tawh" ati awlsam mai. Remsanga a lo haw tlai dawn tih an lo hre ve tih ka hre lo. Mahse,ka thawveng hawk tho.Anni nena chawei rual chakna ka nei eih lo. Ei ho ta pawh ni ila ka ei thei pawhin ka ring lo.

"Bawihtei hi ka pawm thla dawn aw..U Mambawihi 'n a hmu duh a" a ti leha. 

"A kawr kha ka lo thlak ang. Chuan,i pawm thla dawn nia" ka ti a. Diktak chuan "angai lo" ti a chhan ka chak zek zek. Mahse,Kei min huatna leh keimah lam pawhin ka ngaitheih bik lohna vang mai maia Bawihtei tan kak siam ka duh lo. Bawihtei tan chuan a ni neihchhun a ni tlata. A than len zel na tur atan a pawi thei engmah tih ka duh lo bur.

Bawihtei ber an pawm thla miau sia,peih lo zetin inhnuaiah ka chhuk thlaa, Rempui'n a lo pawma, Nutei'n a lo chhaih mek.

"Engtin nge Birthday lawmna vel kha intih tak a?" Rempui'n min hmuh veleh a lo ti a. A tawng dan leh awmdan velah chuan nichin lawka min haw em em tu kha chu a ang tawh lo. A tha, lemchan an thiam anih chuan keipawhin ka thiam ve angai animai.

"Remsanga khan a be fel tawhin ka hria" ka ti mar at.

"Inah hian ami intih dawn tak? Huan kal a chakawm ka tia. Huanah lawm ila tha tur, tiraw Ante" a ti leh a.

"Nia,a nuam khawp ang. Mahse, Mama hian duhdan a nei thina. Awi,Mambawih, kartawp chu chawlh kan va hmang dawn em ni? Kan kohhranah Camping an buatsaih lai ania. Follow up ala ni dawna. Inkhawm an tha thin sia. Mi ken hun lai tak a ni" a tihzawm leh duah. Kohhran hmeichhia a inhmang tak, peih loh chuan chawhnu inkhawm ngaipawimawh leh miah lo, Rawngbawlpuite tlin tawk lohna hmu thei em em a ni a. "An fel em em a,an active a,Mahse..." Tiin a Rawngbawlpuite chanchin a sawi ve ziah zui.

"Ruata a zin dawna. Mama nen niin ka hria,a ni em Lani" min rawn en a.

"Ni lo aniang. Eng mah ala sawi lo" ka ti nghauh. Diktak chuan a sawi reng,hna thilah Ruata a tirhchhuah dawn thu leh a rintlak loh leh tlat thin dan a sawi vek tawha. Chuvangin amaha kal loin Jacinta-i, leh Matlana te an kal tel ve dawn tih pawh a sawi tel nghal vek tawh.

"Ah, Mama nena kal tur angin a insawia. Mama chuan ala hrilh lo che anih dawn chu" a ti leh kher.

"E, ka hre leh si. Jacinta-i nen an kal dawn a ti. Remsanga chu a kal ve dawn lo leh si" ka ti a. Matlana hming ka sawi tel duh der lo.

Ka sawi zawh ruala Rempuii meng tal tawp chu ka hmuh veleh hlawhtling ka inti ru veng veng mai. Jacinta-i hi Remsanga hnena thawk rei tawh, nula fel leh hmeltha angreng tak,harhvang em em mai a ni a. Ruata nen an inngaizawng miah lo ang tih ka hriaa,Mahse Rempuii hian hmeichhia tu pawh a thik vek tih ka hre ru ve kara. Han tih Mangan hlak ka chak ve tlat.

"In pa a awm dawn loh chuan i kal thei zawk ang chu" Nutei'n a mood hre thiam lo zetin a ti a. 

"Ka hre lo le. A zinna lamah khan kal ve tur te khan min tia" a ti leh lawi. Ka nuihza lutuk chu min hmuh hlauin lehlam ka hawi ta ngawt.

"Rawn tichiang la. Vawiin Nilai chauh ania,inbuatsaihna hun ala tam alawm" a ti leh a.

"Nia,kal ve tura min tihluih tlat loh chuan ka lo kal ang. Huana va riah thawven pawh a chakawm alawm" a ti a. A thilsawi leh a mood inrem lo lutuk chuan ka nuih a tiza zual sauh. Haw vat vata, Jacinta-i kal ve dawn leh dawn loh zawh a duh ngei ang. Sual chu ka inti ve reng nangin nuam ka tihna a sang rih zawk tlat.

Dar 9 velah Remsanga a rawn haw a. Room a a rawn luh rualin dik vak lo a awm tih ka hre thiam nghal chat. Bawihtei a rawn pan nghala, Bawihtei lah a pa a hmuh veleh phur zetin a khek ve raih raih bawk.

"A va mengrei ve" min en loin a ti a.Bawihtei lolipop a khehsak zui nghal mawlh mawlha.

"Duatpuii a lo lenga, a lo phusa ve vaka.A mut hun a lai laklawh veka" 

"Tehhlawl chuan.." a ti bung vuta, Bawihtei lolipop a barh zuia.

"Pe ziah lo teh,a intiberh vek zela" ka ti nang nang mai.

"A ho em mai. A intiberh pawhin tui a tam alawm" a ti liam puat.

"I inbual hmasa dawn nge chaw kan ei hmasa dawn?" ka ti a.

"I ril a tam tawh em? Tam chuan inbual hmain ei ila" 

"Ah,inbual hmasa zawk rawh. Inbual har chuan khua a vawt tawh si,a peihawm lo mai mai" ka ti leh a. Bathroomah ka luhsana, tui lum ka on nghala, ka chhuak leha. 

"Tui lum ka on a,nghak hret la.." ka ti a.

"Eng nge?" a ti hu.

"Eng maw?"

"Tui lum ka hmang ngai reng reng emawni le" a ti hluk. "Ee" ka ti ringawt. Englaimahin tui lum inbual nan a hmang ngai lo. Eng chu nge maw ka hriat ni??

A inbual zawhah chaw kan ei a, nidang ang thoin a mizia a lang pangngai thlupa,Mahse nupui na na na chuan eng emaw dik lo awm ka feel thei tlat tho.

Khumah a bawkkhup zawngin a mu a,Bawihtei tihmut tumin ka awi lauh lauh thung.A mut dan ngaia mu chungin phone a khawih pah a, a inlet thuka,min rawn en a.

"Mambawihi hnenah Jacinta-i kal ve tur kha ilo hrilh tiraw?" a ti a. Ka bu nghat. Bawihtei muhil turin ka bengbeh a khala, ka tawng rik leh chuan a harh leh ka hlau a, a muhil tur intham vel lai hi fimkhur angai ngawih ngawih zel.

"Ruata nen chauh an kal dawn emaw a tia" a rawn ti leh a.

Chhang loin Bawihtei khumah ka mut a, zaizirin tawlhsawn turin ka ti a,a tho nghal vuta. A chhuak zui nghal daih.

Eng eng emaw ka tihfel leh hnuah ka mu a, ka mut a chhuak ngang aniang Remsanga lo mut lai pawh ka hre tawh lo. 

Khum che deuh datah ka harha, ka inleta, khua a lo var tawha, Mahse curtain chhah zet zet avangin room a la thim deuh ruai thung. Remsanga a tho daih tawh emaw ka tih laiin min rawn kuah a, min khan zui nghal zat.

"I inkhel dawn lo mi?" Mut la chhuak zetin ka ham zui a.

"Kal ka tum a, ruah a tla a" a ti sup. Ka kawr a rawn zen zui nghala.

"Motorin kal mai la..Hall-ah tho alawm in inkhelh dawn" ka ti leh a. Ka hnute hmur a kut zungtang a a cheh hrual rualin ka thaw nghal hak mai.

"Ka peih lo tukin chu" a ti leh supa. A tawlhhniam zui a,ka hnute a lei lum ham hamin a rawn sik rualin ka mu mar nghal awk mai. 

Khua a vawt vur tawha, Mahse kan thlan dun dap tho mai. A awmah ka kut ka nghata, a lungphu nghawr dat dat chu lungawi takin ka ngaithla a, ka kut a rawn hum a. A hmer zui nghal vaka,ka te that mai.

"I bengchheng sia" thatchhe hmel zetin a ti sup.

"A na alawm" tih pahin ka inlahranga, min rawn hnaih chilh leha. Rang zetin ka tawlhsawn leha, ka inkhuhna puan a rawn pawtthlaa, hneh zetin min rawn mana, min pawt hnai nghal rawk.

"Inbual ang" a ti zuia. Ka tal laih laih nangin engahmah angai lo. Bathroomah min pawm luta, bath tub-ah min dah luta, a nghawngah ka uai a, nui hawk hawk chungin tap a on a..Tui vawtin ka taksa a rawn sik rualin ka te thawt mai. Nui chungin a rawn lut ve a..

Remsanga leh Bawihtei khuma an inchhaih chu ka thil tih lai thulh meuhin ka thlira, mo nih hi a namai lo lutuka,achang hi chuan inthen mai a chakawm thin a. Mahni in lam ngaih chang lah a tam.Mahse,pasal min hre thiam fo tu neih hi chuan thinrim rei theih a ni tak tak lo. Niminah namen loin ka thin a rima. Mahse,tunah chuan vawmbo ang duak a ni leh tawh. Chutihrualin ka laka an rilru put dan erawh ka theihnghilh ngai tawh dawn lo tih ka chianga,ka thinrim avanga Rik buan buan ka chakna kha a bo ta tih mai chauh a ni. Nimin lam ka ngaihtuah thlen leh takah chuan Nizana a mood fuh zat lo kha ka hre chhuak leh chiah.

"Papa..." 

"Um.." min en loin a ti sup.

"Nizan khan Rempuii khan a lo call che mi?"

"Um.." a ti leh ringawt.

"I zin ve dawn leh dawn loh kha min zawta, Ruata leh Jacinta-i an kal dawn tih ka lo sawia..Thil pawi ka sawi em?" ka ti leh a. Rempuii khei tur khera ka sawi ni mah se hei hi chu keima thuruk ve liau liau a ni tlat.

"Sawi hran lo e.."

"Nizan khan i mood kha a off hmel bawk sia, thil dik lo a awm emawni ka lo tia" ka ti leh a.

"Aih, chutiang a awm lo" a ti leh a. 

"Um..A that nasat chu. Nutei khan kartawp chawlh huan lama hman a rawta" ka ti leh a.

"I kal ve duh mi?" 

"Duh hran nang. Khaw vawt intan tawh nen,Bawihtei tih hritlan ka hlau"

"Nia,kal loh a pawi lo" a ti awlsam ve mai.

"Insiam tawh la.. I chhuak tlai lutuk ange" 

"Um..Mahse,Anu ...Hmeichhe dang nen hian min ringhlel ve ngai em?" a tihzawm leh daih. Mak ti deuhin ka en a,chik zetin min lo en reng.

"Ringhlel ngai lo"

"Ok..Nia, rinhlelh tur pawhin ka awm ngai lo bawk anga" a ti dam thlup.

"Tinge chutiang te i sawia?" 

"Mambawihi hi ka hre thiam thin lo. A pasal hi a ring lo leh lutuka.Chutihrualin Ruata hi a lerh ve lulai em mai bawka" a ti duah. 

'An Inneihna ala rei loh nen,amak e" ka ti hap mai.

"Nia.." a ti ve sup.

Thursday a ni a. Zing lamah Bawihtei khua a rawn sik hluai a, Remsanga'n damdawiin kal mai a rawta,Mahse Damdawi ka pek hnuah a zia leh tak avangin Damdawi kan kal ta lo a. Patling tak, mahni inringtawk leh luhlul bawk si a ni a.Mahse,Bawihtei lakah hi chuan a thlaphang hma em em lawi. Amah hi Phili leh virbuai vak angin alang ngai miah lo a,Mahse Damdawi In kal hi a rawt vat zel a. Na a neih hlek tawh chuan a chhuahsan anih pawhin a chhuak rei ngai lo. Vawiin pawh hna pawimawh a nei a, thulh mai a duh lehpek a,Mahse ka nawr luia,hreh zetin a kal ta hram chauh..

"Naktuk chu inlo kal ve lovang maw?" Nutei'n Bawihtei awi darh darh chungin min ti a. An mizia hi mak ka tia,ka awt letling fo. Min haw em em a,min ngaithei lo a. Mahse,min biak dan a pangngai reng thei a, ka tana tha ber duh ang hian an awm thei tlat zel.

"Kal ve lo mai ang..Chak chu a chakawm reng mai" ka ngaihtuahna tilang loin tha takin ka ti a.

"Boruak a vawt lam lek lek tawh nangin a nawm zual hun lai ania. Kei chu kartin mai hian va kal mai hi ka duh a" a ti leh a. Ka mitthlaah huan a lo langa, Swimming pool lian vak lo,nalh zet leh a sira Saron par nalh tak tak te, tree house nuam te, ni e..Tun hun hi a nawm zual hun lai ber tur a ni.

Pari'n Nutei phone a rawn pe a. 

"Mama chu chhun chhunah te min rawn calla, eng chu nge mawni?" Tih pahin phone a pick a.

"Aw,Mama.." a tihzawm zat.

"Enga? Engtizia nge?" Mangang awin a ti a. Remsanga tawng a ngaithlaa, min rawn en paha. A hmai a dang vek thei.

PS: Regular hleithei bawk si lo,Tihtawp mai ka chak si zia chu a🤥 No edit..vawiin chu ka lirthei an lo riska, office banah thawhpuite nen kan zawng leh zak zaka, a manganthlak thin khawp e. Chuvangin ziah ang ang hi a remchan dan dana rawn bilh luh nawk nawk a ni e..