MINE -26

 Chapter -26

"Amah tunah engtin nge a awm?" a ti leha. Angaihna hre lo em emin Pari nen kan ding a. Nutei kan en dun reng ringawt.

"Ka lo kal nghal ang. Damdawi in-ah ka rawn tlang anga" a ti leh thuai thuaia. Phone a off a,min rawn en a. 

"Mambawihi a ṭha lo thut anih chu. Damdawiinah ka kal nghal angaia. Saka kha a awm em? Lo insiam nghal rawhse" a ti a. Bawihtei ka laksak vata.

"Ava zia lo ve. Engtin nge tunah a awm?" ka ti a.

"A biak theih rih lo niawm tak a ni" a ti a. A hmai dang lap maiah chuan a hlauthawng tih hairual a ni lo.

"Ka lo kal ve ang.Bawihtei chu Thlungi nen lo inawi mai se. Thil a ei vek tawh tho a" ka ti a. 

"Aih,angai lo ang. Inah lo awm zawk la, ka awm nghal te a ṭul maithei a" a ti leh zung zunga. A sawi dik tih ka hriaa, kal lo tum luih ṭalh chi a ni lo.

Nutei leh Saka hmanhmawhin an kalchhuak a,an chhuah hnu lawkah Remsanga'n min rawn call a. Chanchin min rawn hrilha.Mahse, a nawm loh dan a sawi chiang lo a. Roomah Ruata nauin a lo tlu reng a han hmu tih zawng a sawi.

"Tunah eng nge a an?" ka ti a.

"A harh tawh e..Mahse,Naute erawh an chhan hman ta lo a" a rawn ti zuai ruih. Ka  thaw hapa,nau a pai tih ka hriat leh a chhiat a inrual reng !! Mak lutukin ka ngaihtuah naah Lalpuii nau chhiat kha a rawn lang nghal zawk bawka. Mahse, ngaihtuahna sawichhuah hun lo ber zinga mi anih zia ka hai lo.

"Nau a lo pai reng a nimaw" ka ti halha.Zawhna lo neih chiam hun a ni lo tih ka hai lo a,Mahse ka insum thei ngang lo.

"A lo pai anih hi..." a ti bung vut a. A mood a fuh chiam lo tih ka hre thei mai.

"A zia lo mange aw. Engtin nge i awm ang? I lo haw dawn nge hnaah i let leh ang?' ka ti leh a.

"Nutei hi a riak anga. Kei chu ka rawn haw ang. Mahse,haw pahin mi hmuh lawk tur ka nei a" a rawn ti leh a. 

"Um, amah a harh tawh chuan a lawmawm..Nutei chu engmah keng lo a chhuak kha ania. Mamawh a nei angem le?" ka ti nghala.

"Ka hre lo le. Mamawh a neih chuan a rawn be mai turah che ka ngaia.Haw  hmain an awmna room tur vel kan tihfel pui leh lawk ang" a ti leh nghuta.

"Ok...Hahdam hram hram tum la aw. Chuan,Naute chu pawi ka tihpui em mai" ka ti leh vang vanga. Ka lakah rilru pu chhe em em mah se nau pai a harsat ve em em bawk si nen,rilru takin ka tuarpui.

"Ni e, Mahse kan thu lo em anih hi..Ka dah aw' a ti zui a.

Rilru nuam lo ru ṭunin ka awm a, Nutei'n min rawn biak mai ka ringa,Mahse tlai thlengin min rawn be ta lo a. Keimah zawkin ka va biaa. Mamawh a neih leh neih loh ka zawta, "Tea kha ka chah a,a rawn thleng ṭep ang. I buai loh chuan lo siamfel pui mai la. A chhuah hma chu ka awmpui ka ringa" a rawn ti a. Kan inbiak aṭanga reiloteah Sangzuala a rawn thleng ve nghala. Nutei mamawh tur kan siam duna,pe turin a chhuak lehnghala. An farnu neihchhun a ni bawka. Phili chuk angin lang lo mah se an ngaihtuah em em vek tih ka hre thiam vek tho.

Verandaah keimahin ka ṭhu a, thil eng eng emaw ka ngaihtuaha. Fa han chan chu a na dawn lutuk.Mahse ,Rempuii leh Ruata ka khawngaih em em rualin Lalpuii zawkin ka ngaihtuahna a luah tam tlat lawi.Lalpuii fa kha Ruata fa lo ni tak tak lo pawh nise fa a chan miau tho a. A chân chhanah lah khan Rempuii a puh fel hmak a,tun thlengin a rilru ala thlak ka ring hek lo. Rempuii khan thil pawi a lo ti ngei em tih hre lo mah ila tunah fa a chan ve ta chu ania. Mipa tan pawh a na lo ni loin nu leh fa inzawmna ril lutuk hi a maka. Lalpuii natna ang kha a tuar ve mek a.. Lalpuii a ngaihtuah chhuah chu ka ring lo a. Mahse, a nat zia erawh a hre chiang ve tawh ngawt ang.

Remsanga lo haw veleh Bawihtei'n a lo ban vata, Rempuii lo ṭha lo nen a chauh ringin bawihbuai lo se ka duha. Mahse, a pawm nghal hlu hlu a. Bawihtei lahin a pa nghawngah a kuaha. Lungawi hmel takin a nui var var mai bawk. 

"Muthilh tum la.. I chau ang" ka ti a. 

"Chau lo e" a ti nangin a hmelah chau hmel alang thei a. Nutei awm tho mah se a nau-te tan hian nu leh pa nih a fawmkem takmeuh a. A nau-te hi puitling vek ni tawh mah se Remsanga bulah chuan an no a, an u ni satliah loin pa ang maiin an en a, a bulah an thlamuang ṭhin a,an pangchang bawka. Vawiinah pawh khan engkimah amah vek a buai leh ang tih ka hriaa. Nau chhiat satliah lo a thih leh dam inkar anih avangin rilru a hah zual bik lo thei lo. A dinhmun ka ngaihtuah a,ka khawngaih ru ngawih ngawih.

Khumah ka lawna, amah si chetin ka mu a,min rawn kuaha, ka awmah a hmai a rawn phum a. A samah ka fawp nghal vang vang a. A muthilh thlengin eng mah kan sawi lo a,Mahse kan taksa a inhnaih ang bawkin kan rilru pawh a inhnaih a. Hahdam hmel takin a muhil a, a muhil chu ka en a,a muthilh hian a hahdam ve ber lai a ni ang tih ka ngaihtuaha. Khawngaihna leh Hmangaihna inkawpin ka thlir vang vang mai.

Rempuii ni 3 damdawiin a awm hnuah a rawn chhuaka,an in lama awm loin kan in lamah a rawn chhuak a. Duh hun huna lo kala,riak mai ṭhin anih avangin helama a lo chhuak hi mak ka ti lo. Mahse,Mak deuhin Ruata chhungte tumah an lo kal lo a,rawn ngaihven an awm pawh ka hre hek lo. Amah Ruata tak pawh a lo kal bawk lo a. Dik lo ber ka hre lo nangin thil fel lo awm in ka hre ru ve tawpa. Mahse, ngawih hi a ṭha fo tih ka hriat avangin eng mah ka zawt lo a. Ka tihtur chin ni a ka hriat ka ti mawp mawp ringawt.

"I hman dawn tawh em?" room a rawn luh pahin Remsanga'n a rawn ti a.

"Hman ṭep..Bawihtei kha lo en zuai la" ka ti a.

Ka nu chhangtu nizanah stroke vangin a boral thut a, zanah Remsanga a va kal tawh a. Amah hi pa kawm nuam tak, rilru tluang em em mai a ni a. Kan chhungte zingah Remsanga hian a ngaina fal nalh. Kei erawh nau pawm ka ni bawk nen ka kal ve ta lo a. Vawiin vuina lam erawh kal lo thei ka ni lo. Bawihtei a hritlan deuh avangin Nutei'n hruai lo mai turin min ti a. Bawihtei tel lo a chhuah ka hreh deuh viau nangin mi zinga han awmpui chi a ni lo a. Chhiat tawhna lam ala ni zui bawk si nen..

Thlanmual lamah Remsanga te an kala,keini kal ve loin in lamah kan lo awm a. Ruang ber a awm tak loah chuan thil dang dang kan sawi khawm mam mama. Chhiat tawhna lam mah nise kan inhmuhkhawm khat deuh bawk nen sawi tur kan ngah tlang ngang mai.

"Lan.." ka bula rawn ṭhutthlak pahin Lalpui-in a rawn ti a. Ka melh vata, kan inhmu lo rei tawha,min blocked vek bawk si avangin kan inbe ngai miah lo bawk.

"I dam maw?" ka ti vat.

"Dam alawm..In dam zawk maw?" pangngai takin a ti a. Hmana ka hriat ṭhin Lalpuii, lu zo leh induhtawk tak kha a lo ni leh tawh tih ka hre thei mai.

"Um, Bawihtei a Hritlang deuh a" ka ti a.A thle bak..

"Rempuii nau chhiat kha ka lo hriaa" a ti leh sap. Khawi aṭangin nge a hriat ka hre lo a. Mahse,a hria tih ka hriat avangin mak erawh ka ti hran lo. Lalpuii ka en a.

"Nia.. " ka ti tawi tak ringawt.

"A pawi ka lo tia.." a ti ve nghat.

"Um, nia..Pawi tak tak a ni" ka ti ve leh ringawt. Han sawi thui viau tur a vang ngang mai.

"Amak ngawt mai, ngaih loh lamah lo ngai lo la.. Karma hi chu a lo awm chiang ka tia" a ti leh sap. Chhan dan tur hre loin ka bu ringawt. Nau a chhiat tih ka hriat rual khan hetiang tho hian ka ngaihtuah ve a,Mahse Lalpuii hrilh kher hi ka pasal chhungte ka ti zahawm lo mai mai dawn tih ka hriaa. Eng mah sawi loh law law a him ka ti zawk.

"In pa a lo kal ve em?" a ti leh a.

"Um, thlanmual lamah a kal ve a" 

"Makpa fel nge nge" a nui a. Kan cousin zinga phunglung zet, Remfela a rawn ṭhu ve a. A hranpa taka titi na hun a awm ta lo a.Mahse,kan inbiak hun chhung reilote kha hlu ka ti em em tho. Min hua ni a ka hriatna kha a bo ta duaka. Inbia leh inkawm reng ni lo mah ila min hua anga ngaih kha thil nuam a ni chuang lo a.Tunah chuan ka hahdam ta huai. Mahse,ka ngaihtuahna kil khatah erawh Duatpuii min hrilh kha a cham ru reng a, inrawlh buai leh hi ka duh tawh loh em avangin zawhfiah tumna pakhatmah ka nei chuang lo.

In kan thlenin Ruata a lo awm a. Rempuii Damdawi lo chhuah atangin ni 4 na a ni tawha. A Vawikhat lo kalna chauh ala ni a. A nu leh a nau erawh a lo chhuak tukah an lo kal thunga. A lo kal miah lo mak ka tih thu Remsanga hnenah ka sawia. "Tukinah loh theih lohin a zin a" a ti awlsam et a. Nupui te damdawiin awm lai laia zin ngei ngei ngai chu mak ka ti viau nangin ka zawt nawn leh ta miah lo.

Remsanga nen an inbiaa, "I riak nghal dawn tho tiraw? Ka han inbual law law ang" Remsanga'n a ti a. Ruata a bu nghata, hna thil pawimawh sawi tur annei anih hmel.

A inbual zuaia,a inbual zawh aṭangin Ruata nen an bo ta vang vanga. Chawei dawnah an lo lang leh ta chauh.

Zanah Remsanga khawhar in lamah a kal leha. Kal tawh lo mah se pawi ka ti lo a,Mahse, "Naktuk thlan hungna lamah ka kal hman dawn si lo a. Ka va lang leh law law ang" a ti a. Ka hnial duh ta lem lo.Bawihtei ka mut fel chiah tihin Duatpuii'n min lo call a, Bawihtei hi a mut ngheh tawh chuan thawm satliahah a harh mai mai ngai lo a,Mahse a mu fel awrh chauh anih avangin a harh leh palh hlauin pawnah ka chhuaka,bakah kan inbe rei leh dawn tih ka chianga, a rawn ri leh chul dawn tih pawh ka hre lawk vek. Kan room awmna floor pawn lama inleng kawmna ka pana. Thli-in min rawn chhem a,a vawt nghal var mai.

Rinlawk ang ngeiin a rawn ri nghal chel chul mai. Kan dah meuh chuan darkar chanve aia tam mah a liam hman a. Lut mai loin ka ding vang vanga, kan in awmna hi tlang chung zawlah anih avangin thui tak alang thei a. Aizawl khawpui lang thei chin eng pe tuar mai chu ka thlir vang vanga, a mawi takzet. Chhun lama a landan nen chuan a letling thawk a ni ber. Awih pangah,kham chhengchhia,in sakna atan pawha hman awm loh pui puiah te building lian pui pui a awm fer fur a,hmuhnawm lamah a kal ngai lo. Zanah erawh awihawm loh khawpin a mawia,a hmuhnawm tham em em bawk.

"Lan.." ka phu zawka,ka hawi nghal vata. Ka hnung maiah Ruattluanga a lo ding reng tawh. A lo kal thawm reng reng ka hre lo.

"Ka va tiphu nasa si che ve" nui chungin a ti a.Ka nui ve ringawt.

"Boruak a nuam hle mai" a ti leha. Ṭhutthlenga ṭhu loin ka dinna bulah a lo kal hnai zela. A lo kal hnaih tak viauah  chuan zu rim a nam nghal hak a,ka ner ru nawk mai. Ka sirah a dinga, kan inkarah eng mah awm lo mah se kan pahnih chauha han din dun ran mai chu a nuam ka ti lem lo.

"Tunlai hna lam inbuai em?" A langah erawh ṭha takin ka ti 

"Buai ve tho mai. Zin ka ngai deuh reng maia" a ti 

"Nia, Rempuii a lo dam lo bawk si nen, rilru a phir duh ngawt ang. Ee, naute in chân a,pawi ka tihpui lutuk che u" ka tihzawm 

"Um, a pawi khawp mai" a ti hmuk. A kekawr ipte a zena,hma lam a thlir vung vunga. A ngaihtuah muk hmel ngang ma

"Bawihtei a harh palh takin ka va lut ange. Mangṭha le" ka ti a. Min chhanna pawh nghak chuang loin ka inher nghala. Mahse,min koh leh avangin ka ding leh a

"Eng nge ?" Ka ti nghau

"Biak lawk che ka duh a,chuvang ania ka lo kal" ka beisei loh zetin a ti a

"Inchhungah inbia ila,vawt ka ti deuha

"Khawngaihin, hetah hian inbia ang. A rei lo ang" a ti leh tlat. Nutei emaw Rempuii zawk pawhin min lo hmu ta se Lalpuii chungchangah awm ang lo lutukin ngaihdan an siam leh ngei dawna. Chu chu ka duh bau lo. Mahse,han hnial teh tlat ka hreh lawi bawk si. A rei em lo'ng chu tiin ka bu ta ngha

"Lalpuii chungchangah khan eng mah demna tur a awm lo.." a ngawih deuh vang vang hnuah a ti ban cha

"Chuan.." ka ti ringawt

"A thiam loh a awm lo. Diktak chuan... Rempuii hi" tih pahin a ban a phar hluaia. Sawi zawm loin a ngawi leh daih. Eng mah sawi loin a ṭawng hun ka nghaka,a hmelah chuan a inngaihtuah buai hle tih ka hre theia. A sawi belh leh tur ka nghak ve taw

"Ka tihsual ka tuar a.. " beidawn hmel zetin a ti chhuak leh hrawk. A rui lutuk pawhin ka hre si lo a,Mahse a awmdan a mumal lo tla

"Mu tawh la a ṭha in ka hria" ka ti a. Ka tawngkam a nem lem lo nangin pawi ka ti chuang l

"Naute kan chana, a ropui asin. A nu ngei khuan ka lakah a lungawi loh vangin zuk han ti tla lui duha" a ti leh a.

"Maw?!" Mak ti lutukin ka ti thei hram. A sawi ka hre sual zawk nge pawh ka hre l

"Ka fa hmasa ber tur kha a that tawha,tunah pawh amah bawkin a that leh a" a ti leh a. Ka ṭawng thei lo.. ka khawng vek nimaiin ka hria..

PS : Zanin chu a ho angreng a,a ngaihnawm lo zual viau in ka ring.Min ngaidam tawp mai ru🤭 Chuan, naktuk hi chhungkaw hun pawimawh hman tur kan nei a. Ka chawl leh zauh dawn tih ka sawi lawk e aw.