MINE -27

 Chapter -27

"Lan-i,Dam reng si hian hremhmunah a lo awm theih em em mai a lo nia. Mahse,i nun aṭang kha chuan i hre thiam thei ngai lo ang" beidawn hmel lutukin a ti leha. Eng emaw tal sawi ka duha,Mahse hnemna thu emaw hriat belh duhna lam pawh sawi chhuah mai tur ka hre reng reng lo.

"Lalpuii hnenah ngaihdam min lo dilsak dawn nia" a amah bawkin a ti leha.

"Tinge?" Ka ti chhuak hap ringawt.

"Eng chu maw? " Angaihna hre lo hmel zetin a ti hu.

"Ka bulah kher tinge i sawi a?" ka ti leh tawk a. A meng khup nghal deuh lup a. A dar a tikum deuh hlun bawk nen alang khawngaihthlakawm viau zui.

"Lalpuii tan a unau i ni a. Ka sawi dawn anih rau rau chuan i bula sawi hi a hmun dik tak niin ka ngaia. Ka ngai sual lo tawp ang tih pawh ka chiang nghal vek. Hmanah ka hre ṭhin che a, ka hriat ṭhin lai che leh tunah hian i rilru nghet lutuk hi ala pangngai reng. Ṭul lo thil i sawichhuak ve mai mai dawn lo tihte chu ka chiang lutuk. Chuan, Hetah hian kei ang bawka pawn lam mi i ni ve a..Ka harsatna hi hre thiam thei bertu i ni ang. Hrehawm i paltlang nasat dan tur hi ka hai hleinem" a ti ta duah.

Sawi leh mai tur hre loin ka dinna ngaiah ka ding ren rawna, Ruata hmela sawifuh intihna lo lang chu ka en a. Ni e,a sawi sual hauh lo. Mo ka ni a,Ani pawh makpa a ni a. He Chhungkaw tan hian mi hrang,an Chhungkaw zawmtu ve ve kan ni a. Mahse,kan hrehawm tawrh erawh a inang thei ngai lo ang. Ani chu makpa,an fanu lachhuaktu zawk a ni a. Kei erawh mahni Insiamrem tura lut ka ni a. Chutihrualin kei chauh ka insiam rem lo a,anni pawh an Insiamrem nasa ve viau tho ang. Mahse mahni seilenna kalsan a mi va zawm zawk ka nih tlat avangin Insiamrem tihah pawh ka tan a hrehawm ber lo thei lo.

Ka hnung lama thawm ka hriat avangin ka hawilet vata, Remsanga'n Kawngkhar a rawn pel fel chiah chu ka va hmu a. 

"Helamah alaw in awm?" Zangkhai vuhin a rawn ti a. A rawn kal pheia.

"Um, a vawt bawk em?"ka ti ve vata.

"Pawn lam chu a vawt ve reng. Mambawihi a mu tawh mi?" tih pahin min en loin Ruata a en a.

"Mu tawhin ka hria. Keipawh ka zuk chhuk ange" a ti a. Min mangṭha a,a kal liam veleh Remsanga'n min rawn pan hnai a,min rawn kuaha.. A kawngah ka kuah ve nghala,a awmah ka hmai ka phum zui vang vang bawk. Ruata thusawi kha a dik angem ka hre lo a. Mahse, ka chhungril hian a dik tiin a pawm fel thlap lawi a. Remsanga ka en a, hre ta se engtin nge a tih ang? Hre lo law law se a hlim zawk ang. Chuvangin ka hnen aṭang hi chuan a hre ngai lo ang.

Zingah ka phone riin min tiharha, ka u a lo ni a. Kan inbiak zawhah ka tho chhuak nghala, Bawihtei a rawn harh zui veleh bawk nen tuk dang ang bawkin inhnuaia ka chhuk hmain roomah buaina tawk ka hmu lehpek viau.

"Anu..." 

"Eng nge?"  amah pawh en loin ka ti a. Zosangi no tihkeh ka phiat khawm pah mawlh mawlh bawk.

"A va rim ṭhin tak' tih pahin a nui zui huka. Ka ding mar a, ngei zetin ka melh a. A nuihza insum hmel chuan ka thin a tirim zual sauh mai.

"I nuih te ala za ania. Nilengin han awm ve teh, i nui lo ang" ka ti hmak.

"Ok.. Naktukah damchuan ka awm nileng ang" 

"Awm ngei ngei ang che' ka ti leh tawka. Nileng chu sawi loh, zing karah ringawt pawh min tibuai lutuk. Walkerah dah ila a ṭe char char a, ngaihven loh hlek a haw ve tumhrang bawk si nen, ka hah ngawih ngawih. Nutei'n "nau harh lutuk" a lo ti ve sek ringawt pawh hi ka hne. Inthlahrun a tizual ting mai zawk.

"Nizan aṭang khan i dik lo riaua. Eng nge dik lo awm ?" Thutak zetin a ti leh daih. 

"Eng dik lo maw? Chutiang eng mah a awm lo" ka ti leh hlak.

"Ok, i tih tlat chuan a ṭha mai alawm" a ti veleh mai bawka. Diktak chuan nizanah khan muhil thei loin Ruata thilsawi kha ka ngaihtuah a. Mak ka ti zual tulh tulh a, Rempuii ka rap ru riau mai bawka. Haw vat vat se ka duh a,chu erawh ka sawi ngam eih lo.

Chawei dawnah Rempuii a rawn tho a, Ruata erawh zing karah a lo haw phei daih tawh tih an ṭawng danah ka hre theia. Rempuii ka hmuh rualin Ruata thilsawi bawk kha ka ngaihtuah chhuak leha. Rapthlak ka ti ngawih ngawih a ni ber. Pasalte laka lawm loh vang maia mahni fa pai lai han tihtlak duh mai chu rapthlak tak a ni. Thil thleng tak tak ni lo, film vela thleng awm tawk lek niin ka hriaa. Mahse, a thleng miau tho.

"Tinge a ṭe renga. Na a nei ami?" Bawihtei en chungin Rempui-in a ti a. Ka lo ip chawih mai.

"Nimin lam a khawsik kha ala chian loh pui anih hi" Remsanga'n a ti a. A pawm kanga, pawn lam a panpui a.

"A dam emaw dam lo emaw a ṭe peih hrim hrim, harh ropui bawk si" a ti leh kher.

"A harh viau a,Mahse nangni ni loin keimah tho alawm buai le" insum hman loin ka ti ve hmak. 

"I buai ang chu,a nu alawm i nih" a ti leh hmaka. 

"Nia, ka fa hi ka thupui ber" zahpah duh bik loin ka ti ve leh ngat. 

"Naupang chu harh se a ṭha,an hrisel zawk. An harh peih loh chuan a ṭha lo ania..." Rempuii ṭawng leh hmain Nutei'n a rawn ti vata. An mahni en angin ka awm lo nangin Nutei'n Rempuii a mitmeia a khap lai ka hmu ru kar tho.

Chhun lamah pawh Bawihtei a tlei ṭha duh mang lo. Thil a ei ṭha duh lo a, eng emaw hlekah a ṭap reng maia. A khua a sik leh emawni ka ti a,ka check a,a sik bawk si lo. A ṭe peih viau vanga entir ngawt thu a awm si lo. Roomah ka tawmpui nileng deuhthaw animai.

"Naktukah Lawngtlai kal ka ngai thuta. Ruata nen kan kal dawn ania aw" Tlaia a lo hawin Remsanga'n a ti a. 

"Amak teh thut ,hin, in rei dawn em?' Nutei'n a ti a.

"Ni 3 vel aniang.. Chu aia hma pawh chuan kan lo let maitheia" Remsanga'n a ti leh a.

"In pahnih chauhin nge midang an kal ve dawn?" Rempui'n a ti nghauh. 

"Jacinta-i leh Dawnga an kal ve ang"

"Ve ziaha" a sawi zawh rualin Rempui'n a ti hmaka. Mahse,Bawihtei pawm chunga Remsanga kalsawn mek chuan a sawi hre awmin a awm lo. A hre lo ni loin a hre lo der anih ka ring mah zawk.

"Kan In lamah va riah phei ka duh emai.. Ka nu a nuam vak lo a,bakah Bawihtei a harh si,a khawsik hnu aṭang phei hi chuan a ṭe renga. Rempuii dam ṭha lo nen a ninawm duh dawn em mai" Rooma kan luh pahin ka ti a.

"A eng nge na a?" Tih pahin khumah Bawihtei a ṭhuttir a,a chhaih zui nghal zat.

"A chau deuh tawp an tia. A sugar a sang leh aniang. Riah phei chu i phal em?" ka ti leh a.

"Va leng ula, riah kher angai dawn mi?" min rawn en a.

"Ka sawi kha, Bawihtei a ṭe peih lutuka. A-ni dam ṭha lo nen a ninawm duh dawn em mai. I lo haw hunah kan lo haw leh mai ang" ka ti a.

"Sawtah pawh i nu a nuam lo a. A ṭe reng chuan a ninawm an ti ang" a ti sup.

"A ni tho a. Mahse,ka inthlahrung lo zawk ang" ka ti tlang pawp.

"Chhunah enge thlenga?" a ti bung vuta,chik zetin min en a. 

"Eng nge thleng ang?" ka ti ve thung.

"Nizan atangin i dik lo ka tih kha. Tunah phei chuan nasa tawh tak a ni" a ti dam thlap.

"Eng mah chutiang a awm lo. Mahse, Bawihtei a harh em em a,a ṭap bawka. Ka inthlahrung" ka ti leh hmiah.

"Inthlahrung maw? Envangin maw?" a ti vawt ruih. A hmelah eng mah alang lo nangin a mood a inthlak tih ka hre thiam tho.

"Ka inthlahrung a ni mai. Ka sawi thiam lo" ka ti ringawt.

"Hei hi ka In a ni ang bawkin i In pawh ania. Bawihtei a sual anih pawhin a in ah a sual animai. Inthlahrun na tur a awm lo" a ti nghet churh.

"I tan chuan sawi a awlsam alawm" ka ti ve thung. Ka ngaihdan diktak pawh a ni reng bawka. Ani tan chuan a In a ni reng a, engpawh tise a thiang vek. Ka rilru kawih viau vang lam ni loin ka tan erawh tih thiang lo leh inthlahrunna tur hlir a ni ve tlat.

"I tan enge a harsat bik na? A sual a,a ṭap bengchheng an ngaithei lo anih chuan an awm lo thei reng" a ti leh hmuk. Ka ip deuh chawiha, chutiang thleng thleng sawi turin ka beisei lo lutuk.

"Chutiang ringawt..." ka ti hmak ringawt.

"Ania lawm. Mambawihi pawn a ning anih chuan haw mai rawhse.Hetah awm reng a ṭul lem hleinem" a ti leh a.

"Misual ber anga min lan tir i duh tihna ami?Bawihtei vang pawh nise keimah asin min dem ang" ka theihtawpa aw pangngai-in ka ti a.

"Misual anga lan tir che ka tum lo. Ka ngaihdan diktak ka hrilh che anih kha. Mo i nih vangin inthlahrung over suh. I hrehawm thui lutuk ang. I duh zawng chu titawp la,i duh loh zawng pawh peih lo chung chung in tilui duh suh. Mahse, ka tan ka chhungte hi an hlu em em a, a harsa lutuk anih loh chuan chu chu min hriatsak la ka duh.Mahse,ka tana pawimawh ber chu nang leh Bawihtei hi inni a. Puih i ngaihna apiangah i bulah ka ding zel ang. Min mamawhna leh puih i ngaih chang erawh chuan min hrilh ve fo la,anih loh chuan ka hriat loh vangin ilo na palh theia. Chu chu ka duh lo ania " a ti leh duah. "I chhungte an pawimawh tih te chu ka hre ve bawk " ti a chhan mai ka tuma,Mahse ka chip leh ta zawk. Sawi chuan sawi tur kan nei ve ve dawna, kan pahnih tan buaina kan insiam belh mai mai zawk.Bakah, a chhungte lam a ṭang bur pawh a ni lo a. Lungawi lohna zawn talh ka duh bik lo.

Thim dawnah Ruata riak turin a lo phei leha. Rempuii lah a la dam chian loh vang nge ka hre lo. A ṭawngkam a ngaihnawm lo em em a. Ruata pawh a be ṭha chuang lo a. Nizana Ruata'n "Dam reng chungin hremhmunah a awm theih" a tih kha ka ngaihtuah let phah vang vang mai. Engvanga helama la awm ta reng nge annih ka hre thiam lo.

"Tea, naktukah Lani te hi a nu te Inah lo va dah phei la.. A nu a dam ṭha vak lo a,ka zin chhung chu lo va riak phei se ka duh a" chaw kan ei laiin Remsanga'n a ti a. Nutei'n ka nu awmdan min zawt nghal vata. Remsanga hnena ka sawi dan ang thoin ka sawi leh a. 

"Kum tam lamah hi chuan a buaithlak ve anih hi" a ti ṭha ve mai. 

Hun a kal bek beka, Remsanga te zin chhung kan riak pheia. A lo haw tlaiah min rawn lam nghala. Rempuii a lo la awma. Ruata pawh kan in lamah bawk a lo haw veleh mai. 

Naktuk hi Bawihtei Birthday a ni tawha. Mamawh eng eng emaw lam khawmin Remsanga nen kan chhuaka, Lalbuaia Shopping complexah thil lam tur ka neih avangin ka kala.

"Lan,i ni em?" Hmeichhe aw hian ka hnung lam aṭangin a rawn ti a. Thil khai bawr ṭun chungin ka hawi leta, Ruata te unau zinga upa ber Sangzeli ka hmu nghal a. 

"I niin ka hriaa, i sam a danglam a,ka hai ṭhelh che alawm" amah bawkin nui var var chungin a ti leha. 

"Nia, a tla nasa lutuka,tihian ka ti tawp mai" nui chungin ka ti ve a.

"A pawi lo tawp anih kha. I inhmeh zawk..In dam tlang em? Eng nge Rempuii hi a an zel?" A ti leh a. Remsanga'n Parking a min nghah avangin ka hmanhmawh ru viau.

"A ṭha ve zel e... Nangni in ṭha maw?" alangah erawh ṭha takin ka ti a.

"Aw,ṭha e.. A buaithlak anih hi. Rempuii lah a lo haw duh mang si lo a" a ti leh hapa. "Haw duh lo" tih lai chuan ka beng a verha,mahse hre chak lutuk nih erawh ka duh lo.

"A nuam lo rih em maia,a inthlahrung ve bawk atin ni" ka ti ve ringawt.

"Ania lawm. Mahse, koh pawha lo haw duh ta lo chu Mama hi a lo phei deuh reng maia. Awi,kei hi ka phul hlut a.. Naupang lam tur ka nia,min nghak rei tawh ngawt ang" a ti leh zung zunga. Nui hawk hawk chungin kan in kalsana,Mahse ka kalsan rualin ka rilruah thildang a lang nghal zat. "Koh pawha haw duh lo" a ti a,an ko tih ka hre miah lo. Mahse,koh ngai chu a tlan tihna ania...Inah ka awm ve renga,engtin nge ka hriat loh theih ni???

"Sangzeli nen kan inhmu zuaia" kan tlanchhuah hnuah satliah angreng takin ka ti a. 

"Um.." a ti ringawt.

"Rempuii an koh thu vel te a sawia. A tlan pawh ka hre si lo a" ka ti leh kher.

"Ko han tih tur em chu a ni lo ang.. Damdawi aṭanga a lo chhuah tukah a nu leh a nau an lo kal kha" a ti bung vut.

"Thil hi ka va han hre ve lo ṭhin tak. Helamah a rawn awm rih emaw ka lo ti a. Koh ngai chu a tlan tihna a lo ni zawk reng sia" ka ti leh hmaka. Ka ngaihdan a pel ve leh riau tawh tlat.

"Nia... Sawi thiam " a ti hman chauha,a phone a rawn ri a. Min rawn pek pahin "Nutei anih kha,lo be teh" a tih zawm a. 

"Hello" ka ti ve nghal zat.

"Lani,in lo haw mek em?" a rawn ti a. A aw a pangngai viaua,Mahse dik lo awmin ka hre tlat tho.

"Lo haw mek,kan veng kan lo la lut lo deuh. Eng nge ni ta?" 

"In lo haw mek chuan a ṭhat nasat chu. Bawihtei hi a nuam mang lo a,lo hmanhmawh deuh u la..." a rawn ti a,a sawi lai mekin Bawihtei ṭap tuar tuar ka hre theia. Nidanga a ṭap nen a inang tlat lo.

"Enge a rawn sawia?" Remsanga'n ka dah veleh a ti a. 

"Bawihtei a nuam lo atia. Hmanhmawh ang,a ṭap ri ka hre theia. Ṭap pangngai a ni lo" 

Chak zetin a tlan a, vanneihthlak takin Motor tlem lai a ni hlauh bawk. Gate thlen dawnah horn a hmet ri nghala, gate bula duty in a rawn hawng nghal vat nangin Remsanga hmanhmawh lutukin a vin hrep tho.

Inchhungah ka tlan lut a, Nutei'n Bawihtei a lo pawma, a ṭap nasa lutuka a aw a lo chhang titih tawha, hmanhmawh lutukin ka pan pheia,min hmuh veleh a ban tereuhtein min lo ban ve nghal a.. Ka pawm kanga,ka pawm kan rualin a rak ṭhawt a,a ṭap ṭha thei bawk si lo chu a duk titih a...Mangangin Remsanga rawn kal hnai chu ka va en a,min rawn hnaih chilh nghal ruak bawk.

"Ti nge? A va ṭap nasa em em ve" Remsanga'n zawh bik pawh nei loin a ti a.

"Step tawpah hian a lo lum thlaa,a lawn tih kan lo hmu si lo a..." Nutei'n a ti a. 

"Maw? " Remsanga'n a ti vak...