Bibi - 4

 Chapter - 4

"I chhuk pahin hruai thla rawh" a ti leh hmuk a.
A that leh that loh ka zawhna kha min chhang lo ve hranpa. Angela-i ka en a, hlau tih hriat tak hian a lo thu tawm kek a. Ka naupanlai hun ka ngaihtuah naah a lo lang nghal zut zut a. Angela-i chu ka naupanlai angin ka zuk hmu a. Kei ang khan tihduhdahna a tawk ve em ka hre lo. Mahse a hmelah chuan hlauh a nei tih alang vek a. Hrem mek a ni tih pawh a inhrethiam ve a ni maithei. Engvanga hrem ngai nge anih pawh ka hre miah lo a. Mahse, hlau hlawpa zun cheh khawp hiala inhnuai kila ka tawm lai kha ka chan tlat a. Khawngaihna avangin ka mit deuh sulh thei.

Saitluanga lam ka hawi leh a, engtin emaw na deuh taka chhan letna tur ka ngaihtuah a. Mahse, inchung room a a lut tur chiah ka va hmu hmana. Ngei em em in ka melh a. Hetiang naupang kum tlem te laka a khawsak dan kha ka run em em tawp mai a ni.

Angela-i thawm ri deuh sat sat chuan ka ngaihtuahna a la peng a. Ka zuk en chu ka bulah a lo ding al tawh.

"Insuk min zarpui anga inhnuai lamah kan chhukthla dawn nia aw" Ka theihtawka zaidamin ka ti a. Min chhang loin a bu nghet a. Min hlau hmel a pu tawh lo.

Insuk ka zar zo a, inhnuaiah ka chhuk thlak pui a. Santi-in min lo hmu a. A mengphawk nasa mai.

"I va hlauhthawn hmel ve' ka ti a.

" I lo hruaithla maw? Ti nge a? " a ti hu.

"Hruai thla e. U Saitluanga'n hruai thla turin min ti a" Ka ti a.  A hma aia nasa zawkin a mengphawk leh vak.

"A van mak ve" a ti hluaia. A hmelah chuan mak a ti tih hairual a ni hek lo.

"Eng maw mak" Kal pelh pahin ka ti a.

"U Mama hian Angela-i chungchang a sawi ka la hre ngai lo a. Nidangah pawh inchungah te chuan  a awm fo a" ati leh a. A sawi tawp lam erawh a ne ne  ral ta mai mai.

Angela-i hnenah eitur a duh leh duh loh ka zawta, a bu nghat. Santi-in a rawn kai tur  chu duh loin rang zetin ka hnungah a biru nghal a. Nitin an in awm a, ngaina viau awm tak ania. Mahse, Santi-in a koh pawhin a kal duh chuang der lo.

Chokaah kan inkai phei a. Santi-in min rawn zui ve zel bawk. Eng nge a ei duh ka zawt a, "Chaw ka la ei lo a" a ti sin rat mai.

"School kal tur a nuar a. A nuin a hrem anih kha. Chaw ei loin inchunga awm reng turin a tia" Santi-in a lo ti vat. Ka mengphar awk mai. Naupang school kal tur te chuan an peih lo fo a, han nawrh chang pawh an nei anga. Mahse chaw ei han phal sak loh chu a lutuk ka ti.

Na-in chawei a siamsak a. Kei erawh pi damdawi pe turin ka kal a. Damdawi pek mai bakah amah tifai turin min ti a. A che hleithei bawk si lo nen, kan inbuaipui  chawhma ta thak. Chhun thil ei tur ka pek zawhah muthilh a duh tih a sawi a. Khumah ka dah kai a, a thil eina vel silfai turin choka lam pan ka tum a. Ka chhuah hmain min ko leh a.

"Mama phone teh, a thleng tluang em ka hre duh" a rawn ti thut. Pi Maduhi khan Saitluanga accident thu eng mah an hrilh lo kha atia. Bakah, a number ka nei lo hrim hrim.

"A number ka va nei lo ve" ka ti ban chat.

"Ka phoneah khan a awm alawm. Hei, heta hi ka phone a awm. Ka hmu tha thei lo a, han en la nangman an phone teh" a ti leh a.

Ka pan hnaia. A phone min rawn pek ka la a. "Mama tiin a awm kha. Phone ka khawih thiam ve mang lo a. Mi phone nan bak ka hmang tangkai lo teh ania" a ti zui a. Vawiin chu nimin lam ai chuan a mood a zia zawk a. Ka kal ni hnihna chauh ala ni nangin a hrehawm lem lo.

Saitluanga number ka hmuh veleh ka call nghala. A ring chiah tihin pi ka pe a. An inbiak laia lo awm ve a tul lem lo bawk a ka kalsan a. Choka lamah ka thil ken nen ka lut a. Ka sil nghal vek a. Kan inbiak danah khan damlo enkawl bak eng mah ka tih a tul lo tih hre mah ila midang kut a thil ei na sil tura han dah zel chu ka duh dan a ni lo. Bakah, pi a buaipuiawm em em bawk si lo a. Room a tawm reng ai chuan a tul apiang tihpui mai ka duh zawk.

Pi roomah ka lut leh a, a lo muhil fel hman der. Tih tur mai a awm bawk si lo a. Ka la haw thei chuang der bawk si lo. Inchhung lah Na-i leh Santi-in an tifel fai vek a. Tihpui an ngai lo. Pi room a thutthlengah ka thu a, Game khel ila a nimai. Mahse, ka thu fel hman awrh tihin Na-i'n min rawn ko a. " U Mama'n lo chho lawk teh a ti " a rawn ti a. Ka mengphawk deuh nangin a accident na hliam vel kha a nuam lo zual deuh anih ka ring lehnghal mai.

Na-i nen kan inzui chho a, inchung a assam type nawm hmel zet a an sak zawm kha a room a lo ni a. Kawngka bul atangin Na-i'n a ko a." Lo luh tir rawh" a rawn ti dut a. Na-i a lo lut ve dawn emaw ka tih laiin ka luhna turin min kiana, luh ve tum hmel a pu lo.

Kawngkhar ka hawng a, khuma Saitluanga lo thu mu ka hmu nghal a. A hmel thim deuh mak maiah chuan a awm a nuam lo tih alang reng. A room chhung lah chu mahni a awm nan chuan a zau lulai lutuk. A rawng thlan lah chu a neitupa ang maia cool a ni deuh tawp.

"Eng nge ni ta? " ka ti a.
"Min lo jection lawk mai teh" a ti bul hmuk. A khum bula thil dahna awm chu a kawk a, Damdawi eng eng maw a awm nual a. Ka pan phei a. A damdawi ho ka en nghal a. Nachhawkna ka lek chhuaka, "hei hian em ni? " ka ti a. A bu nghut.

Chiu tura ka inbuatsaih laiin a rawn thu mar a. A chet zawnga a ner nawk nawk chu ka hmu ru kar a. Chuti taka nuam lo chu damdawiinah awm mai awm ka ti rilru a. Sawi phei chu ka sawichhuak lem lo.

"I khua a tisik em? " ka chiu hnuah ka ti a.
"A sik ve deuh " a ti tawi tuk.
"I ban hi a ruh a thleng em? " ka ti leh a.
"A tliak"  a ti bul hmuk. Ban ruh tliak hi thil serious over ni lo mah se a ngai awlsam leh lutuk chu mak ti fein ka en a.
"Damdawiinah reilote tal awm la tha tur ania" ka ti a.
"Tha mai thei. Mahse, ka duh lo. Bakah, i awm a" a ti awlsam leh mai. Sawi leh tur hre loin ka dar ka tisang zauh a.
"Ka pi hnenah khan ka nuam vak lo tih hrilh lo la"  Amah bawkin a ti leh a.
"Um.. Nichin khan biak che a duh a. I thleng tluang em a hre duh a" ka ti a.
"Ka hnaah ka kal tih ka hrilh kha"
"Mamawh i la nei angem? " Thildang sawi tawh lo in ka ti a.
"Nei rih lo ang. Mahse, ka khawsik a zia loh chuan chiu ka ngai leh maithei a. Ka rawn call ang che"
"Ka number i nei em? " ka ti hu a.
"Um, nei e" a ti tha ve mai.

Inhnuai lam pana ka chhuk thlak pahin Saitluanga mizia awm ka ngaihtuaha. Pa nelawm tak ni lem lo, sual hmel pawh pu chuang lo, induh ve tak leh luhlul tak niin ka hriaa. A ban ruh tliak leh a chal a tauhna pawh kha zan hnih khat tal damdawiin lama riahpui atan a that nen, a duh lo tih a sawi awlsam et mai chu ania.

"Bibi, Bibi, A va mak he nu koh hre thei lo hi chu a. Biakdik... " Nutei'n ka room kawngka bul atanga a ti lawng lawng ri ka hriaa. Ka room hi kawngkhar kharphui vek chuan pawn lam atanga koh hi hriat a harsa thin a. Tunah pawh hian min ko tih a lo kal hnaih hma chuan ka hre miah lo.

"Eng nge? " ka ti let a. Kawngkhar a rawn hawng a.

"Koh hre thei reng reng lo mai. I phone a ri tih tih pawh a" a ti hmawk hmawka. Nu tawngkam no nei lem lo a ni a. A vin vel hi chu engahmah kan ngai hlawm lo.

"Khaw nge ka phone chu? "

"I charge a ni lawm ni" a ti leh lawia. A rawn keng dawn emaw tih nak laiin.

"Hmmm, lo keng mai tur che lawm" ka ti hlaka. "Ka keng awm lo em mai a" kal sawn pahin a ti duh lek.

Ka phone ka va la a, Pi in min lo call chu niin.. Kar hnih aia tam ka kal ve tawha. Nitin han inhrawn takah chuan rin ai takin hrawn a khirh ta vak lo a. A mood danglam reng mai erawh ngaiah ka la nei thei chiah lo nangin ka kal tirh lam ai kha chuan ka hre thiam ta zawk viau bawk. Pi Maduhi nen pawh kan innel viau tawha. A pasal, U Saihminga nen pawh kan innel ve tana. Ka nel theih loh ber zawk chu Saitluanga a ni a. A tir khan min be luam thin a, tunah chuan min be mang mang tawh lo. Pawi pawh chu ka ti lem hlei lo a.

"Phone i va la thei lo ve" phone a pick veleh a rawn ti chuar chuar a.

"Ka tawng hmain min hre thei ngal alaw? " nui hak hak chungin ka ti a.

"Ngah nge ka hriat loh ang che ni. I lo kal dawn tawh em? " a rawn ti leh a.

"Ka insiam mek a. Hmanhmawhthlak a awm em? " ka ti zui zat.

"Awm hran lo va. I lo kal pahin ka damdawi rawn lam ta che. Niminah a awm lo hnai tur en rawh ka tih che kha i en khan ka hre sia, engmah an rawn dah lo. Rawn lam phei mai rawh. Hospital road a kan naute dawrah khan" a rawn ti a. Damdawi mamawh hi chu ka sawi a. Pi Maduhi hian a lakkhawm tir mai thin avangin a dawr rawn sawi chu ka hre miah lo.

"Khawilaiah ber nge? Ka la hre ve lo a" ka ti a.

"Sailiana dawrah khan. Ka fapa dawr anih kha. Ka pi damdawi tur ti la an lo pe mai ang che" a rawn ti leh a. Angaihna hre lo zetin ka thaw hak ringawt. Satiluanga Patea tihna ania. Sailo hnam anni hi an chhuang bawk aniang. An hmingah "Sai" tih a tel zel mai. Mahse, a sawi hi ka hre ngai chuang lo. Pawi lo, Pi Maduhi ka zawt mai ang.

"Aw le, ka rawn lam dawn nia" ka ti ve ta ngawt. Sawi teuh chuan zing karah a mood ka tichhe dawn tih ka hriaa. Awmzia a awm lo. A sawi awmzia ka hre ruak tho a, Nimin lamah damdawi awm lo mai tur ho list ka siam a. Kha kha anih ka ring a, ka list siam kha Pi Maduhi ka thawn tho avangin ka phoneah ala awm a. An lo siam lawk lo anih pawhin harsatna a awm lo chek ang chu.

Pi Maduhi ka call a, a pick thei lo. Niminah khan Saitluanga'n a hna a zawm tawh dawn avangin an zuk thlah a. Chuvangin ka pi damdawi mamawh ho pawh a mangnghilh a ni ngei ang. Kan veng mi, ka hmelhriat pakhat damdawi dawr nghak a awm a. A thawk rei ve thawkhat tawh bawka a hriat theih mai ka ring a. Ka call a, ka rin ang ngeiin min lo hrilh thei nghal maia. A dawr thawhna piah lawka damdawi dawr lian zet anih thu min hrilh a. A sawifiah takah chuan Medicine Doctor tha tak pakhatin a chungah clinic a nei a. Patea entirin ka kalpui zauh zauh tawha, ka hre thei nghal mai.

An dawr ka thlenin pi damdawi tur anih thu leh ka pi hming ka sawi a. Keimah ang rual vel tur nula pakhat, mize zangkhai tak hian min lo dawngsawng a. Ka pi that leh that loh te min zawt luam a. Saitluanga awmna te min zawt a, a ban ruh tliak eng nge a an zel tihte min zawh pahin a titi luam a. "Ka piin ni khatah vawi engzat nge a hauh thin che? " Nui chungin a ti a. Ka nui ve tawp. A hnu a ka hriat leh danin Saitluanga Patea fanu a lo ni a. An thlah ho hi ngo tak han tih tur an ni hlawm lo aniang. Ka hmuh ho hi chu an ngo hran lo viau hlawm a. Mahse, hang lutuk an ni tihna a ni chuang lo. An hmel fang a tha angreng a, an te lem lo viau hlawm bawk.

In ka thlenin a lo reh thiapa, Pi Roomah ka lut tlang a. "Damdawi chu i rawn la em? " a lo ti vat. A vei tawh chu vei thei tak mai a ni a, thil hi a theihnghilh ngai meuh lo.

"La e. Thil i lo ei tawh em? " ka ti zui a.

"Ei nang mawle, kan misualnu hian Santi a hruai ve daih maia. Na-i chauh a awm a. Zingah Bazar angai bawk si a, a buai aniang. Mama hnathawhna te chu an kal ngai lo pawh a ni hleinem. An chhung chhung a zuk kal ngai pawh a ni lo. Nau lah ka hruai e a tia, enkawl peih leh si loin Santi a hruai leh tho tho a" a ti teu hlur mai.  Nimin khan Santi chu Pi Maduhi khan a hruai ngei a. Mahse, nizanah an lo haw lo aniang. Nge an lo thleng tlai a, an la tho lo zawk ni?

"Nizanah an lo thleng tlai em ni? " ka ti a.

"An lo haw reng reng hleinem. An duh duh hian an khawsa a. Ka che thei lo hi chu pawi tak a ni. Min ngaipawimawh reng reng lo mai a. Na-i nen chauha min riahtir hi pawi an ti lo aniang. Saikima a lo kal remchang a, riak turin ka lo ti ta hlauh zawka. Duhawmi bulah hian Mama pawh a awm tam tawha, a rilru a dik tawh lo. Min ngaihthah riau tawha, a hnathawhna hmuna leng mai mai turin min kalsan duh ania" a ti leh nek. Saitluanga accident kha a hre ta miah lo a. A inkhelh naah a inti na palh tiin a rei hnuah Saitluanga'n a lo hrilh a. A hliam a zia lam a ni tawh bawka, pi pawh a Phi buai hran lo.

"An tlai lutuk dawn vangin an lo haw lo law law aniang" ka ti ringawt.

"Aniang. Saikima lah chu zing exer lak ka duh atia. A zing chhuah lehnghal daih bawk a" a ti leh a.
An chhungkaw thil hi nidangah pawh Pi hian a sawi chiah ngai lo nangin Pi Maduhi lakah erawh hi chuan a lawm thei lo tih ka hai tawh bik lo. A an pui nitin a, a hming thaa koh aiin hming a phuahchawp sak hian a ko hnem zawk. Pi Maduhi lam atang hi chuan chhungkaw thil emaw pi khawsa zia pawh a tha zawng leh tha lo zawng eng mah ka hre ve ngai lo a. Nitin office ban hian "eng nge a an? " Tih erawh min zawt ziah a. Pi Mamawh ka sawi reng reng hi min pe zar zar bawk a. A ngaihsak em em ni maiin ka hria. Mahse, Pi hi a sual hrim hrim niin ka hre bik lo a. Chhungkaw hotu ber lo ni thin, a chet theih tak loh vanga Pi Maduhi kut a thil tamtak awm ta anih hmel a. Hei hi angaithei lo a, chuvanga sawisel reng nimaiin ka hria.

"I tho duh em? " ka ti leh a, a duh lo. Sana ka en a, a damdawi pakhat ei a lo hun tawha. Mahse, kaw ruak laia ei chi a ni lo. "Ei tur ka va siam ange" ka ti a. Min chhang lo in chunglam a melh vang vang ringawt.

Room atanga ka chhuak chu Na-i bazar a rawn haw ve chiaha. A rawn in ak bawr luk mai. A thil ken ka laksak a, choka lamah kan inzui lut a. Khua a nuam lo bawk nen a rawn pawr haw phang mai.

Nilengin eng eng emaw tiin kan buai a. Pi lah a phun chiar em em bawk a. Ka thu hman meuh lo. Pi Maduhi te dar 4 velah an lo thleng a, ka beisei loh takin Saitluanga a rawn let veleh ta tho.

"In tluang em? " ka lo ti a. Angela-i ham bai bai chu ka en a. Motorah a rawn muhil anih hmel. Pi Maduhi'n Santi hnenah Angela-i hruai lut turin  ti a. Saitluanga leh a nau motor bulah an ding a. An bag lakthlak ngai a awm leh awm loh ka dinna atangin ka thlek dak dak a. Mahse, Pi Maduhi tawng ri vangin a lam ka hawi ta zawk.

"Tukinah ka pi Damdawi tur i la mi? " An tluan leh tluan loh ka zawhna kha chhang loin min ti a.

"Aw, pi khan lam nghal turin min tia" ka ti tha ve mai.

"Anih chu. Nidangah chuan ka thu loin lo la tawh suh" a ti chang fak a. Ka hamhaih angreng viau.

"Pi in min tir... "

"Ka hria, I sawi tawh kha. Mahse nidangah chuan ka thu loin la tawh suh. Nangmah vangin kan chawi double hman thelh ania. A reng rengin ka u te dawrah khan i va hawi sang deuh nge ni? Ka u fanu khan lo kal tir tawh suh u a ti che a" a ti leh hmak hmak a.

Sawi tur hre lo in ka din ngaiin ka dinga. Damdawi ka va lam mai bak kha eng mah thil tih ka nei si lo. Tihsual lianpui nei ang maia min lantir tlat chu mak ka ti zawk. Saitluanga ta dinna lam ka va hawi a, a hmel tak ngul maiah chuan Pi Maduhi thil sawi awmzia kha a hre vek anih ka ring a. Ka hmai a sa hum hum a. Ka zak nge ka rilru a na pawh ka hre lo e a.

Note : Chhiat kan tawh avangin ka chawl ta vang vang a. Ka inthlahrung khawp mai. Zanin erawh dah hram ka duh sia, a tlai deuh tawh nangin ka ziak vat vata, ka rawn dah hram e. A thu inmil chiah lo leh ziak sual a awm nual maithei e aw.