Bibi - 2

 Chapter - 2

Phur ru angreng tak, huphurh ru bawk siin ka insiam a. A hranpa tak chuan ka zam em em hran lo. Mahse hna thar chan tehchawk a chang a, hetiang hunah hi chuan danglamna eng emaw tak hi a awm lo thei thin lo.

"Chu Pi Maduhi chu pi a lo ni leh vak si lo tihna mi? " Lawmi'n a ti a. Ka khumah bawp khawkherh in a thu a. Tui tih hmel em em in kuhva a tep chap chap bawk.

"A va han tui hmel thei tak' a zawhna chhang loin nui chungin ka ti a. A hnar a ti vang a, " Tui ve em a ni. Mahse, thla tharah ka nghei ang. Nui suh, ka nghei dawn chiang lutuk " ka nui nasa zual sauha, ani pawh tihngaihna hre loin a nui ve ta ngawt. Amah hi ka Nutei fa upa ber dawt a ni a. Kei aiin kum khatin a upa a, kan veng primary schoolah nikum atangin a thawk tan a. Nu te fel at mai, tawng duh leh nui peih tak, kuhva hmuam reng emaw tihmai tura heh a ni a. Nghei a tum ngun lutuk a, nghei a tum tih a sawi hi chuan kan nui tawp zel tawh.

"Tukin chu keipawh dar 8 hmaa thlen ngai ka ni ve tho a. Min thlah la, Mama hi a tlan lohni ania, pakhat a keng veleh duh bawk sia, Scooty ka keng lo mai ang" thawh pahin a ti a.

"Aa, ka nileng dawn bawk si. Nangman min thlah zawk rawh" ka ti ve thung.

"Ho lutuk, i lo haw tlai palh takin. A hla ve bawk sia, keng zawk rawh. A hrim hrimin Mama te chu tlan loh niah chuan Bus pawn kal ve mai tur ania. Hnathawk kan pawimawh fe zawk" a ti zui leh nang nang a.

"Aa, tlangval ania. Nitin Bike in a kala, laklawh deuha Bus han chan leh thin kha a peihawm loh ve ang" nui chungin ka ti a. A phun zui nang nang a, mahse engtinmah ka chhang lem lo. Scooty pahnih leh bike pakhat kan nei a. Patea hian Maruti 800,hlui tawh tak,  enkawl that vanga la chak tha em em si a nei bawka. Hna kalna atan a hmang thina, Scooty pakhat zawk hi Lawmi'n hna a neih hnu lawkah ama ta tura a lei a ni a. Pakhat zawk hi scooty chhuak hmasa pawl kha niin a hlui tawh deuh avangin khalh a nuam lo angreng a, in lama mamawh naah kan hmang thin a. Bike erawh Mama ta liau liau a ni tawp. Scooty hi ka mamawhnaah chuan ka keng chhuak ve fo tho nangin ka pual bik a neih han tihtur ka nei ve lem lo a. Ka nutei te nupa hian an fate aia min en hran zawkna sawi tur ka hre miah lo a, scooty pawh keima hminga awm ni lo mah se ka khalchhuah vangin buai na a awm ngai lo. Mahse, an fate zawkin an mamawh anih chuan ka kian thei veka, tawngkam hriat nuam lo an nei ngai miah lo nangin keima lamah hian fa tak ka ni ve lo tih hi ka inhai ngai lo.

Lawmi'n min thlah a, lo lut ve loin a tlan let lehnghal a. Pi Maduhi nen nimin lama kan tihfel tak loh, inremna lehkha te kan ziak fel a. Nimin lam ang bawkin a inchei fel thlap a, alang zahawm lehpek. Zangkhai takin a tawng bawrh bawrh a, ala upa bik viau lo hmel bawk nen, ka nel vat ka ring ve tawp. Tihfel ngai ang ang kan tihfel hnuah ka enkawl tur ber awmna roomah kan lut dun a. Tukverh bul wheelchair a pitar, kum 80 bawr vel, mitmeng fing leh melh na zet ka va hmuh rualin engvangin nge hna ka zawm hmaa ka enkawl tur hmuh hmasak nachang ka hriat loh tih ka ngaihtuah nghal vang vang. Nimin lamah pawh khan hmu nghal thei reng ka ni sia. Engin nge maw min mawlh tehreng ni?? Diktak chuan a mitmeng atangin enkawl a hautak nasa hian ka ring lutuk. Hna nuam tak chu ka thawk dawn lo tawp.

"Pi, hei hi nimin a ka hrilh che Bdi chu ania. Vawiin atangin a enkawl thei dawn hlauh che a" Dam thlapin Pi Maduhi'n a ti a.  Nui chungin ka en a, mahse nui miah lo leh min zirchiang niawm takin min melh reng ringawt.

Pi Maduhi'n damdawi dahna min entir a, a pi duh zawng leh Doctorin a enkawl dan tlangpui min hrilh hnuah min chhuahsan a.A kal hnuah tih mai tur hre loin ka thu deuh ren rawna. Ka luhtirh atang khan kan Pi-i lahin min melh run reng a, a tawng miah bawk si lo nen, ar ngam thei lo an sawi ang maiin ka kanglang tlat a, ka bet hlawl lo.

"Tu maw i hming kha? " a rawn ti thut a. Ka phu nasa ngang mai.
"Lalbiakdiki ka nia. Bd min ti" rang zetin ka ti vat.
"Misualnu khan eng titurin nge a tih che? In tang dun em ni? " a ti leh a. A awki a huatna langchhuak chu hai rual a ni lo. Mahse, chu aiin a thilsawi chuan min tibuai zawk fe mai. Pi Maduhi kha misual a tihna nge amah hi a fim zat lo zawk? Ee, a rilru lam a chiang zan lo a ti leh si tak e.

"Eng nge ka roomah i tih reng? Kal tawh rawh. Mamawh ka nei lo" a ti fiak leh thak a. Angaihna hre lo in mar auhin ka thu a.A ngaihtuahna a fim lo tih kha hre ru kar tho mah ila a tawngkam chu dawnsawn a nuam chuang miah lo. A sawi awihin ka chhuak ang nge ka la awm zawk dawn ni?

Room kawngkhar a ri raka, a rawn inhawnga. Nimin a ka hmuh mipa kha a rawn lut a, min rawn melh zawka. Pitar lam a en zui nghala. Pitari lam ka hawi ve a, a hmel landan lo danglam vek chuan a hma aia nasa zawk mahin min ti hamhaih lehpek.

"I lo haw tawh maw? Chaw i ei em? " aw dam takin mipa lo lut hnenah a ti a. A tawng danah chuan nu in a fapa duat em em a bia a ang ber.

"Aw, ka eikham chiah. Eng nge i an? Damdawi i ei em? " a ti ve vata, a aw a dam hle bawk.

"Ka tha vek. Pawnah min nawrchhuak la, ni lum ai pahin pawn lam boruak te hip ka duh" Pangchang aw takin a ti a. An inbiak danah chuan ka awm ve tih hre lo ang mai anni.

"Bd, ka ko dik che em? " min rawn en pahin a ti a.

"Aw, dik e" ka ti a. Ka tho chhuaka, kalsawn loin ka ding mar at ringawt.

"Mambawih, Duhawmi hian mi a emaw min ti niin ka hria. Amah kaltlanga helaia lo awm tur tumah ka duh lo tih ka hrilh chiang a. Min pawisa hlek lo. Nula hi haw tir la, midang nangman ka bula awm reng tur zawng rawh. Hetiang nula mitmu lian hi ka duhzawng pawh a ni lo" a ti zui nek. Ka mitmu lian chuan a engamah hmain a pawi a sawi nghal ringawt anih hmel. Ani pawh a mitmeng a nelawm bik hlek si lo a. A inhre lo chu a ni phawt anga.

"Pi, hahdam rawh. Bdi hi keima rawn kal tir alawm. Niminah zin ngei ngei ka ngaih vang khan Maduhi ka buaipui tir a. A tha em? " a ti dam thluam.

Ka din ngaiin ka ding a, pitar leh a bula mipa ding chu ka melh tawn a. Eng buainaah nge maw ka intahluh tak hrep tih ka ngaihtuah a, min lo ngei nghal em em ringawt chuan min ti thinrim hlur mai bawk. "Ka thawk leh lo mai ang" Tih tumin ka ang zuau a, mahse a tupa in min rawn tawng khalh leh avangin ka chip zui leh daih.

"Ka pi hi pawnah nilum kan ai pui lawk ange. I duh leh choka lamah thingpui te lo va siamtir la. E, Saitluanga ka nia" zangkhai takin a ti a. A piin ka chungchang a sawi kha ngaipawimawh awm pawn a awm hek lo.

"Min hre thiam la ka pu... '

" Pu loin min u zawk la" a ti leh hmiah.

"Thingpui chu va in rawh. Nakin deuhah kan inbe lawk dawn nia" a ti leh a. A hmelah nui hmel alang nangin a mitmengah chuan engmah sawi lo tur in min duh niin ka hre thung.

Choka lamah ka lut phei a, nimin lama ka hmuh tawh Na-i kha amahin a lo awm a. Ka lut thawm hria-in a lo hawi vat a. Ka hmuh hmasak tum ang bawk khan a hmel chu hlauh nei ang maiin a ti leh dek tho.

"I buai em? " ka ti ringawt.
"Buai lo e. Lo thu rawh, Thingpui i duh em? Ka siamsak ang che aw" a ti nghal zung zung.

"A pawi miah lo. Mahse i sil laklawh sia, ka lo insiam mai dawn mi? Thil dahna min hrilh la" ka ti a. A hmelah chuan hlauhthawnna niawm tak alang leh zawka. Mahse, a reh leh vat. Eng hi nge maw a hlauh zozai tehreng ni???

Thil dahna min kawhhmuh a, ka in tur leh ama in tur ka siam a. Dawhkan kilin ka thu a. Choka chhung chu ka thlek kual dan dan a. Room dang ang bawkin a chhung chei dan a dik thlap a. Bang rawng te, furniture chi hrang hrang bakah parda rawng zawng zawng nen chuan a lang cool ngawih ngawih.

"I awmna a rei tawh em? " ngawihreng nuam ka tih loh vangin Na-i hnenah ka ti a.

"Rei lutuk lo. Kum chanve vel aniang" a ti a. A awphawi hi tlemin a zal deuha, pai ni si lo in a lam kat deuha, ngaihthlak a nuam angreng phian mai.

"Pi i rawn enkawl tur chu ka huphurh pui che e" a ti a. A sawi zawh rualin sawi sual inti hmel a pu zui nghal zat.

"Ti maw? " ka ti vat.

"Aaa, engmah ni lo e" a ti leh tlat lawi.

"A thinchhe ve deuh tihna mi? " Ka ti leh talh a. Ka zawh pawh ni lo a amah zawkin min kamkeu anih avangin ka hriat duh chu hriat ngei ka tum khawp mai.

"Um, a thinchhe ve lutuk. Mi hauh a ching a. U Saitluanga a awm loh phei chuan a hrehawm" hawi zak zak chungin a ti a. A thaw deuh halh bawk.

"Tar hi chu an buaithlak ve alawm. An phunchiar a, bakah kan pi phei hi chu a dam lo a, a che thei bawk si lo a" ka ti a. Engmah sawi lo in a bu nghet ringawt.

Kan tawng zawm leh hmain Saitluanga a rawn lut a, rang fein Nai'n thingpui a duh leh duh loh a zawt a. A bu nghut a, min rawn en a. "Dinning roomah min rawn zui lawk mai ta che' a ti a. Rang fein ka tho a, Na-i hmanhmawh taka thingpui siama che rawk rawk chu ka khawngaih ve ringawt. A la naupang lutuk vangin eng thilah mah a confi lo ni berin ka hria.

Choka nena inzawmin Dinning room zau lutuk lo a awm a. Dawhkan sei tha tak, hnum hluau mai a awm a. Chair nalh leh simple tak in a hual thap bawk.

Chair a pawtchhuaka, zaizirin thu turin min ti a. Amah ep zawngin ka thu a. Na-i thingpui rawn dah a chhuah leh hma chu eng mah a sawi lo. Nichin khan a nelawm lo hmel vak si loh a, tunah chuan pa nelawm tak hmel a pu ta miah lo. A lang zahawm ru riaua, mi a uap deuh run mai hian ka hria.

"Maduhi nen in inbiak dan ka hre ve chiah lo a. Hriat pawh ngai ka ti lem lo a. In inbiak fel theih khan a tha a. Ka biak duh chhan zawk che chu ka pi chungchangah a ni a. Ka pi hi mi thil duhtui tak, engkim mai a hun thlap thlapa ti chi a ni a. Mahse, che thei lo a a awm takah hian a nun a inthlak thawk maia. Nu harhvang tak, buaipui ngai a ni ta hi a hre thiam thei meuh lo a. Chuvangin a tawngkam te hriat a lo nuam lo viau maithei a. Kut thawh chin pawh a nei maithei bawk a. Ti let mai lo va dawh hram hram turin ka ngen duh che" a ti duah. A tawng danah chuan a inrintawk zia a lang thei a. Hriatthiamna min dil angin lang mah se keimah ka zam zawk mah mai.

"Mamawh i neih chuan sawi hreh lo la, harsatna i tawk anih pawhin min hrilh hreh lo bawk la" a ti leh a. Tawng loin ka bu leh ringawt.

"Khatianga tawng lo a buk ngheuh ngheuh kha ka pi hian a haw teh ania" a ti leh a. Ka kut ka hum ruh vak a, sawi mai tur hre loin ka en a, a hmela nuihzatna lang ka hmuh takah chuan ka thaw huai a. Ka nui ve ta hak ringawt.

Dar 12 pelh hnu lawkah an Naute school bang a rawn haw a. Kawngka bula ka din lai tak a ni a. Motor bulah Saitluanga leh mi pakhat  an awm bawka. Mahse, an Naute school lo bang chu Saitluanga chuan ngaihven hmel a pu lo. Hmeichhe naupang pawh chuan a awm  ve tih a ngaihven bik hlei lo a. An inngaina lo hle a ni chek anga. Mak phei chu ka ti tehvak lo. Pa, mahni fa pawm lo tu kha a ni miau maia. Min pawm lo tu ngainat harsat zia hre chiang tu ka ni ve tlat.

A rawn tlan phei a, Veranda a thu, Pitar-in a lo ko vat a. Pitari thutna lam a pan phei a. A mal chungah a lawn nghal a. Mahse, Gate lama Pi Maduhi tawng ri a hriat rualin rang mangkhengin a zuangthla nghal vat mai. Pi-in a koh lawm lawm pawhin hre lo ang maiin Pi Maduhi lo kal phei mek chu a rawn pan ding nalh mai.

An rawn inzui lut a, Kawngka bula ka ding chu Pi Maduhi'n min rawn bia a."Vawiin chu ka nuam lo riaua, ka lo haw hma ta mai. I lo buai em? " min rawn ti nghal bawrh bawrh a, ka buai loh thu ka hrilh a. Na-i lo zawk nula awm vein hmeichhe naupang te chu a rawn ngaihven nghal thuai a. A thawmhnaw thlaksak tura an inkai dat dat chu ka en a. A pa a len tehreng nen, ani erawh a rualpui te zingah a te pawl a ni ngei ang. A ria thal a, a ruhrel a te bawk a,sam buang thing theng niin, amah nena inmil lo khawpa mitmeng lian zet a nei lawia. A hmai tereuhte nen chuan a la inmil lo bawk nen a rapawm lek lek mai.

"Nula, min rawn nawr lut teh" Piber-in a tih riah chuan naupang ka ngaihven na lak atangin ka ngaihtuahna a la peng ta a. Pi thutna lam ka pan phei a. Mut chhuah hmel takin a lo meng ngui lap mai.

Roomah ka nawr lut a, khuma dah tura min tih angin ka dah a, kum upa tak ni tawh mah se, amah a lian a, ka dahfel chuan ka thaw a sa phat thei.

"Ei tur i duh em? " ka ti a. Min chhan hmain naupang tap thawm ring zet ka hria a. A tah dan chu hlauh nei tap a an em avangin ka hawi phawk nghal hra mai.

"Angela-i chu kut a tuar leh ta maw" a ti zuai raih a. Rang zetin khuma a mu chu ka en a. Min en loin ding takin chung lam a en a, tuna a thilsawi kha min bia ni loin amah leh amah a inbia anih hmel.

"Ei tur chu ka va lak dawn che em? " ka ti leh a. Min rawn en vut a, a mitmeng a huatna lang chu mak ti lutukin ka en a. Hetiang khawpa huatna mitmeng hi ka nu hrawn min haw em em tu mitah pawh khan ka la hmu ngai lo.

"Eng ei tur mah ka duh lo. Chhuak rawh, chhuak thuai thuai la. Kawngkhar kha phui takin khar ang che" a ti khur khur a. Hamhaih em em in ka petek chhuak nawk nawk a ni ber mai.


PS : Zanin chu hei ka rawn dah veleh lauh lauh a. Phone atanga ziak ka ni roha. Ziah thui viau a harsa riau maia. Min lo hre thiam hram hram mai teh u. Tin, typing mistake a awm nual maithei aw. Dah zawm hun hi sawi lawk lutuk loin, mihlim tawngkam takin "a rau thawh danin"  kan dah zel dawn nia😃