Bibi - 3

 Chapter - 3

Kawngkhar nghengin ka ding a, ka lungphu ri dut dut mai chu ka bulah midang awm hnai se an hre thei hialin ka ring. 

"Bd.. " 

Ka rak thawta, ka zuang deuh dawrh mai bawk. Mak tih hmel zeta min en tu Saitluanga chu ka va en a. Mi ang lo hmuh takin min hmu nimaiin ka hria. 

"Eng nge ni ta? Ka pi a tha lo em ni? " a ti hu. 

Ka lu ka thing a, ka phu nasa lutuk khan pangngai taka tawngchhuah min la ti harsa lutuk. 

"Anih chuan eng nge thleng a? Room kawngkhar nghengin mangan hmel deuhin ilo ding a. Ka ko chiah che a, i per leh lawp maia" a ti leh duah a.  Ka awm ka dawm a, engtin nge ka sawi ang tih ka ngaihtuah paha. A piin min vin dan kha hrilh ta ila ani tan hian thil serious tak a ni kher lo thei a. Uchuak deuhin sawi duh mah ila a awki leh min en dan kha anihna angin ka sawichhuak thei dawn teuh bawk si lo. 

"Ka pi mood a fuh lutuk lo a" ka ti ta tawp. A mit a tizim a. Chik zetin min en a. 

"Mood fuh lo satliah nge thil dang a awm tel? " a ti bul hmuk. 

"Eng mah chutiang a awm lo. A muhil duh a, ka rawn kalsan rih mai" ka ti leh a. 

"Ok, anih chuan a that chu. Ka sawi ang khan tlema a mood a fuh loh deuh chuan a thinchhe thin a. Ka sawi hmaih pakhat chu a tawngkam a uluk lutuk lo thin ania" a ti leh duaha. A pi mizia sawifiah ni mah se keimah lam atanga vui awka chhuah ngamna tur in a sawi ri lo hrim hrim. Ka ni khat kalna chauh ania, han vui nghal ngawt thei lah ka ni hek lo. 

Min kalsan hnuah pawnah ka chhuak a, pot an hunnaah ka va thu ta ngawt. Thlifim a thaw heuh heuh a, ka sam chhawlleng ka bengah ka zep a. Ka hmaa in lian tha tak chu ka en vang vang a. Ka sawifiah thiam chiah si lohin dik lo a awm tlat. Mahse, dik lo chu eng nge anih ka hre lawi si lo. Ka pi danglam thut kha Angela-i tap ri vang kha a ni angem? Angela-i khan a lo haw tirh khan a pi mal chung a chuh nghal a, mahse a nu tawng ri a hriat rualin rang takin a chhuk lehnghal a. A nu a lo kal hnaih hnuah phei kha chuan a pi kha ngaihven awmin a awm lo hrim hrim a. Kha kha thil mak niin lang lo mah se thil pangngai a ni in ka hre thei lo. A tap ri lah kha hlauhlawpa tap a ni tih a chiang renga. Mahse, tumah han phili deuh pawh ka hmu leh miah si lo!!!  Saitluanga pawh khan a fa angin en lo mah se a fa a ni tho a. Khatiang khawpa naupang tap chu ngaihven awm tak ania. Ani lah khan a fanu aiin a pi lam a ngaihven hmel zawk daih bawk si.. 

Reife pawna ka thut hnuah inchhungah ka lut a. Pi room ka pan ding nghala. Dimtein kawngkhar ka hawng a, a mut dan ngaiin a lo la mu a. Ka lut thawm hria-in a rawn hawi a. A mitmeng rapthlak lutuk kha hmuh ka inrin laiin chutiang reng reng a awm tawh lo. Pitar chauh hmel tak, tanpui ngai ngawih ngawih hmel a pu ta tlat. 

"I tho duh em? " ka ti vat a. 

"Duh lo mai. Mut rih ka duh, I duh leh min hawsan rawh. Vawiinah mamawh ka nei lo vang" a ti dam thliam. A awmdan lo inthlak danglam leh ta daih chuan min ti hrilhhai angrenga, mahse ka hahdam huai huai tho. 

Sana ka en a. Dar 2 chauh ala ni a. Haw nan chuan ala hma mah mah bakah tlaiah damdawi ei ala ngai dawn a. Chawei hmain Jection angai dawn bawk. Room chhung ka en kual a, engmah hnawk han then fai ngai a awm lo va. Titurin min phut lem lo nangin choka lamah Na-i pui turin ka phei a. Thil eina silin a lo virbuai leh viau tawh. 

"Eirawng i bawl dawn tawh em? Ka lo tihpui ang che" ka ti a. 

"Bawl tan tep tawha. Mahse, tihpui ka ngai lo. A harsa lo lutuk" a ti vat. 

"Tihtur ka nei chuang hleinem. Tihtur  chu min hrilh la, ka lo ti ang" ka ti leh a. Min hnial leh tho nangin ka nawr ve tlat bawk a. Hreh hmel takin behlawi hnah bai tur a rawn lachhuaka. Lawm zetin ka mal nghal mawlh mawlh a. Eng emaw chang hi chuan awm mai mai hi nuam thin mah se hna kal naah chuan hman leh lutuk chu a nuam miah lo. Chu pawh tlangnel hma leh lek phei chuan a nuam lo lehzual. 

"Na, nichin khan Angela-i kha  tap nasa sia. A inti na a mi a? ' satliah hmel takin ka ti a. Mahse, Na-i hmel ka en uluk ngang mai thung.

" Na lo ang. Ka hre bik lo e a" a ti liam puat. 

"Ka lo mangang hman alawm. A tah dan kha a hlauh hmel lutuk a" ka ti leh a. 

"Kha kha a tah rik chuan a tah dan hrim hrim" a ti bung nghet. 

"Um.. " ka ti halh ringawt. 

"A ri hian a tap mai mai lo a" a ti leh a. A aw a zawi viau mai bawk. 

"School a kal ve tan tawha. Tah zahthlak a ti ve tan aniang" nui chungin ka ti a. Min chhang loin a hmui a pet a.. Thil thui tak ngaihtuah te pawh a ang lek lek. 

Thleng sil tur a sil zawhah a rawn thu ve a. Alu vel tur a inchhawp a. "Pi te zawk hi a strict lutuk a, Angela-i hi thil pakhat lek a tihsual pawhin a hrem nasa thin a. Nichin pawh khan tihsual a nei aniang" zawi tein a ti a. Ka thu mar nghal auh mai. Khatiang khawpa hlau aw rawl a tap kha thik tihsual vang pawh lo ni se a hrem na lutuk nge mawni dawn ni? 

"An kum ang rualah hi chuan thil hrilh awmzia an la nei lo maithei a. Hriat chu an hrethiam tawh anga" ka ti ringawt. 

"Nia, Pi Lian zawk hian a dam loh hma chuan a duat thei lutuka. An inhauh phah thin alawm. Mahse, tunah chuan a damlo ta sia. Angela-i hi pi roomah pawh a kal vak ngai lo" a ti leh a. Nichin thil thleng kha ka hre thiam ta kuar mai. Pi damlo kha bawhbuai lo tur in a duh a ni ngei ang. 

Pangngai taka kan inhmuhna hmasaber nimahse tleirawl tih takah a tawng duh bawka. Min nel rang phian maia. A titi barh barh a, an khaw lam chanchin te ka zawt a. A sawi tui ngang maia. Mahse, ka hriat duh tak zawk ka thawhna te chhungkaw chanchin erawh a sawi tam lo.  Angela-i chungchang tlem a sawi bak kha eng mah a sawi zui lo. Ka la thawk dawn chauh bawka lo hriat tum nghal chiam pawh tul ka ti lem chuang lo. 

Eirawngbawlin kan buai dun ta zak zaka. Nula pakhat zawk khan min rawn pui veleh bawka. Ani kha Santi a ni a. Chhim lam ramri hrul khaw pakhat atanga lo kal niin zirna lamah pawh pawl 12 a zo a. Kum 23 na a hmang meka, Na-i ai chuan a puitling fe zawk a. Thil pawh a duh uluk angreng viaua. Nau awmtu anih rualin inchhung chet pawh a tul tul a tihpui vek thin tih a sawia. Darkar tam pawh kan awm ho hmain Na-i thil a hrilhfiah peih zia chu mak tak a ni. Nau tak tak enin a en niberin ka hria. 

Ka haw dawn thlengin an chhungkaw member tumah ka hmu leh ta lo a. Pi lah awihawm loh khawpin a zia a zawi a. Ka tih ang angin a awm a ni ber. Zing lama a mizia kha chu bo hneh tak hi a ni ringawt mai. 

Chawei laiin ka hna kal chanchin min zawt laih laih a, ka thil tawn ho ka sawi a. Pi mize mak lutuk kha chu ka sawi vek lem lo. 

"An tlangval senior oh Pathlawi chu a chhe lo em? A hming kha nalh ka tia, ka lo chhinchhiah nghal nalh" meizial pak hlat hlat pahin Lawmi'n a ti a. 

"I va han ninawm tak, hetah meizial rawn zu ziah lo teh. A rimchhe si" ka ti hlak. Thildangah a sual pawh nisi lo hian zuk leh hmuam hi a duh em em vek maia, zantin hian ka roomah meizial a rawn zu ru a. Keilah meizial rimchhe ti lutuk chi ka lo ni bawk si. Ka phun ziaha, engahmah angai lem hlei lo a. A zuk loh phah eih lo. 

"I ninawm fe zawk. Nula thianghlim thaw uih nih tum suh ka tih ziah che kha" ngaihsam zetin min ti duh lek chauh. 

"Chutiang lam a ni lo. A rimchhe lutuk" ka ti leh hlaka. Ngaipawimawh lo zetin a khu ala hnar khuchhuah  ham ham. 

"Saitluanga chu... " a ti leh a. 

"Eng nge? " 

"Eng ang hmel pu nge? " 

"A hmel a pu lo"

"Eksek, nghal hle lo la anih chu a. A hming atangin a chhe lo chiang sa. A lian em? " a tihzawm zat. 

"Lian tho a. Mizoah chuan a Lian ve pangngai ang ka ring. A feet zat ka hre lo. A hang deuha, a hmeltha lo. A nelawm vak lo a. Mahse, tha deuh in min bia. A tawk em?" ka ti nghauh a. A kut a beng thak mai. 

"Eng nge? " Tur zetin ka en a. 

"I sawi kim tha hle nangin i sawithiam lo em maia. Fb emaw IG lam kan umzui ange" a ti a. Nui awr awr chungin a phone a lekchhuaka, ka rin ang ngeiin a meizia bung tukverhah a vawm chhuak a. Ka thaw hap ringawt. 

"Hei hi mi? " Tih pahin a rawn lek hnaia. A phone a lo lang chu ka zuk en a. S-a Sailo tih a ni a. A lang chiang over lo nangin amah kha a ni tih ka hre thei tho.

"Anih kha" tih pahin ka kalsawna. Eng vanga han buaipui em em nge anih ka hre lo. A buaipui hah thlawn vel mai mai dawn tih alang reng. Saitluanga ka mitthlaah a lo lang a,ka tha tihchi a ni lem lo. Bakah a fa a hlamchhiah tlat avangin keimah lam atang hi chuan a tla sa ve hrim hrim. Huh, ka tha tih chi pawh lo ni tehreng se eng nge maw han danglam tehvak tur awm ni a? Lawmi ang thoin keipawn ka buaipui thlawn ve dawn tho. 

Lawmi a phul hlut a, Saitluanga ngawt a buaipui a, ka thawmhnaw dahna ka remfel san avangin ka aw liam vel mai mai. Thian dang chu kawm ve thin tho mah ila kan pahnih hian kan inkawm nasa em em a. Thuruk kan inshare a, kan ngaihzawng pawh kan inhriatsak nasa. Kei hi ka hmelthat loh bakah zei lo tak mai ka ni a. Lawmi phei hi chuan " Pi Ninawm" Min ti deuh kher zel a. Keipawh hian ka mize tak deuh riau hi ka hai bik lo nangin ka thlak ngawt thei lo. Ngaihzawng ka nei ve diah tawh tho nangin tumah hi ka la serious ngai lo a. Lawmi hi chu a harhvang a, thian siam a awlsam bawk a. A hmeltha lutuk lo nangin a luck viau. Ngaihzawng a thlak kual zut reng a. Tunah pawh amah aia kum 5 laia naupang nen an inzui leh tawh a. Rei a buaipui peih ka rin loh laiin a la thutak ta phiana. A la nau deuh bawk nen mi hriat a duh lo a. A bialpa leh kan pahnih bak hria pawh an la awm lo. 

"Kha pa ngawt kha i buaipui chuan i naute Lian ka hrilh ngei ngei ang" Thawh chhuah pahin ka ti a. A hnar a sut ri nghal hraih mai. 

"Chhe zit zet e a. Saitluanga te hi chu nangma tan alawm ka stalk le a" a ti ta daih. 

"Eng a? I a mi? Eng nge ka tan ilo ngaihven kual vel a. Awm lo leh lutuk" uar fahranin ka ti a. Ka nui zui hawk hawk a. Mahse, a hmel a thutak vei tlat. 

"Cinderella hi thil thleng tak tak thei ania aw"

Engmah sawi lo in ka nui vak ringawt. Ngaihdan ni lo hmel fe hian a chal a ti chuar a. 

"Nang hi kei aia hre chiang che an awm lo aw. Hre chiang lo tu che chuan an ei lo fo che a. I thutak leh lutuk an ti thin a. Induh pawh an ti che a, mahse i nihna chhungril pawh pha tu tan chuan nang aia mi tha hi an awm lo. Chuvangin nitin in khatah in awm ho dawn a. A ngaina ngei ngei ang che" Dik inti em em in a ti charh charh a. Ka mizia a sawi zawng zawng chu a dik tih ka pawm thlap. Mahse, Saitluanga nen min hmehbel a tum erawh ka nuih a za lutuka, sawi pawh ka sawi zui peih ta lo law law. 

Ka mutui lai ka phone nghawr dar dar in min tiharh a. Mit lehlam siai deuh titihin ka en a. Pi Maduhi a lo ni a. Ka harh chiang nghal kawk mai. 

"Hello, eng nge ni ta? " ka ti nghal tawp. 

"Bd, zing kar karah ka rawn ko tawp mai che. Nizan lamah u Saitluanga a accident a, tlemin kan buai deuh a. I lo kal hma thei angem? " a rawn ti a. Ka thuchhuak nghal a. 

"Eh, a va zia lo ve. A na em? "  Tih pahin khum atangin ka chhuk a, parda ka pawt kaua. Chhum a lo zing chuai mai. Zing kar kar atanga chhum han zin pawh chu a. 

"Na viau lo e. Admit pawh angai lo a. Mahse, hei kan buai ta nuai a" a rawn ti leh lang lang a. 

Ka kal hma tur thu ka hrilh a. Phone kan dah veleh choka lam ka pan a. Nutei hi a tho hma thin a, tukin pawh dar 7 chauh ala ni nangin chaw ei a lo peih leh vek tawh. 

Hmanhmawh fein ka inbual a, chaw ka ei sawk sawk a. Mama'n min thlah a. Dar sarih leh a chanve pelh hretah ka thleng hman tawh. 

"Ka pi engmah kan hrilh lo a. Ani hi chu U Saia pi bik ania" Nui chungin a ti a. Nimin lama an inbiak dan atang khan ka hre thiam sa hrim hrim. 

Pi ka buaipui hnuah choka lam ka pui leh a. Pi Maduhi pasal pawh tukin chu ka hmu ve a. Saitluanga nen an in ang angreng a, mahse a thau a, a ngo zawk bawk. 

Thleng silsa ka dahfel laiin Santi a rawn lut a. Ka thlen hnuah ka vawikhat hmuhna a ni a. Angela-i school kal a thlah anih ka ring ve ngawt. 

Insuk zar turin inchungah ka chho a. Inchung zawl hi ka vawikhat kalna a ni a. Assam type angreng, nalh zet hian an sak zawma. Inhnuai lam ang bawkin Saron kung nalh zet zet a inhung tlar dul mai bawk. 

A kil lam ka pan phei a. Ka thlen phei rualin far an dahna pot Lian zet bula Angela-i lo thu chu ka hmu nghal chat. School a kal daih tawh ang chu ka tih laiin helaiah eng nge maw a tih ni? 

"Hetah ilo awm alaw? School i kal emaw ka tia" Nelawm thei ang ber turin ka ti a. Mahse, min melh kiau a. Tawng tum awmin a awm lo. 

Ka pan phei a. A bulah ka thu hniam a. Rang zetin a tawlhsawn nghal dawrh mai. Min la hmu ngai lo a, min hlau anih ka ring a. Keimah nena inhmeh lo khawpa zaidamin a pi enkawltu tur ka nih thu ka hrilh a. Mahse, ala che chuang lo. 

Khuh kharh ri ka hriaa, a rawn rikna lam ka hawi vat a. Bang nghengin Saitluanga a lo ding reng tawh. A ban dinglam a awrh a, a chal an hreng bur bawk. Kawr a hak loh avangin a pian nalh zet chu hmuh hmaih theih a ni lo. Ka rilruah vai film a achangtupa a lo lang zawk a. Chal a hreng bawk nen, eng film ber emaw a a changtupa,accident vanga intuam vel niawm tak a ni. 

Ka ngaihtuahna atthlak zet dah boin "I zia deuh em? " ka ti vat. Mahse, min en loin ka bula Angela-i zawk a en a. A hmelah engmah a ngaihtuahna alang lo nangin a landan chu naupang tan chuan a hlauhawm hian ka ring khawp mai. 

"Thu i awih lo lehpek a ni maw? " a ti vawt ruih. A tawng dan leh a hmel landan zawng zawng chu naupang han biakna tur aw ki leh hmel hi a ni hlawl lo. 

Note : ka dah veleh tlat mai😀 zan zawna han dah vel chu ka inhmeh lo angreng mang e🤣 ka en nawn hman ta lo a. Ziah sual a awm nual ka ring e.