Bibi

Bibi

Ziaktu - Maengi Ralte

Charter - 1

Ka kutah ka thil ken ka hmet chhuaka, ka ner nghal nak mai. No bula pack dang ka dah ka en a, hei pawh Shampoo ni loin conditioner tho, a va hahthlak thin tak. Bathroomah hian hman mai theih turin shampoo leh conditioner, a pack chi hi ka khai hrang ve ve thina, tukinah ka lei thar a. Pawhthlak sa ka duh thin avangin ka hman tur chauh pakhat ve ve ka pawtthlaa. A hran ve ve emaw ka pawhthlak ka tia. A lo ni lo nasa mai.

"Ante, shampoo kha min lo pe lawk mai teh" Bathroom kawngkhar atangin ka ti lang lang a. A la hre thei lawk lo zui. Vawi thum ka kohnaah a hre thei ta hram a. Apron a a kut lehlam hru mawlh mawlh pahin a rawn kal phei a. Ka lu chauh langa Bathroom kawngkaa ka dak chu min rawn en a, " Fel awm te si hi inbual apianga thil theihnghilh nei ta mai. Nakinah chuan nangmah pawh hi ila intheihnghilh ang"  nui chungin a rawn ti a. "Nangmah ka hriat reng dawn tho che chuan a tawk mai alawm. Ni lo mi? " Ka ti let ve vat.

"Inbual thuai thuai la anih mai chu a. A reng rengah ngatinge saw zat zat conditioner i lei ni? I hmang ziah lah ni hek lo" a ti leh a.

Cheng 5 man chi pack, tlawn khat ve ve ka lei a. Nidanga ka lei dan tho ania. Lei teuh han tih tur a ni tawp si lo.

"Ka lei teuh hleinem, shampoo nen tlawn khat ve ve chauh anih kha"  ka ti a.

"Awihawm loh loh, conditioner vek anih saw" a ti hlur. Hmp, ka thil ken luh dan atangin ka hre thiam nghal kuar. Shampoo ni loin conditioner ve ve ka lei lek anih chu a. Dawr nghaktu, mit lerh leh nghal zet khan min pe sual tih a chiang reng. Huizz, keipawh chuan ka endik leh bik chuang lo a. Han puh ngawt thei pawh ka ni bik lo.

Ka tawng leh hmain a kal sawna, kal pahin inbual thuai thuai turin min hrilh leh hram.

"Dar 10 hmain thlen hman i ngai a ni lawm ni? " Chaw kan ei laiin Patea'n min ti a.

"Um, kan inbiak dan chu ania. An nu ber kha hna kal tur in dar 10 velah a chhuak dawna. A chhuah hmain min hmu duh aniang" ka ti a.

"I nu Biaksangi sawi dan kha chuan an fanu kum 5 mi bak naupang dang an awm lo a tia. Mahse nau awmtu chu midang an nei anih hmel a. Nau enkawl tel angai dawn anih chuan i thawk thei lo tih hrilh nghal law law ang che. Chiang nial lo deuh in engmah tih loh reng reng tur" Nutei'n a lo ti ve duah.

"Aw, nau pawh enkawl a peih phawt chuan eng nge maw pawi le? " Patea zawkin a lo ti boh.

"Pawi eee, a tlin teuh lo em mai. Hetiang khawpa nau ngaina lo. Nau a pawm tak pawh hi ka la hmu lo e a" Uar fein nutei'n a ti leh a. Lawmi nen kan inmelh a, kan nui ringawt.

"Nui vel lo ula animai. Fa te hi nei ula engtia awm nge maw in tum ni? " Nutei'n a ti leh hmawk hmawka. Patea'n nui chungin " Ei vat vat ula, insiam thuai ang che u. Nang pawh ei teh, kha i chaw bar tur pawh i hai let nasa lutuka awmngaihna an hriat loh kha" a ti a. Kan nui zo ta vek.

Lalbiakdiki ka ni a, ka hmelhriat hnai vai deuh leh kan chhungte chuan " Bibi" tiin min ko vek thung. Mahse, hmelhriat satliah leh thian hla deuh te chuan 'Bd' tiin min ko a. Keipawhin ka insawi dan a ni bawka. Ka nu boral hnuah ka pa nen kan awmdun a, ka pa-in nupui dang a neih atanga kum 2 naah tuna ka awmna, ka nu laizawn neihchhun te bulah hian ka cheng tan a. Ka awmhlen chu a ni ta. Ka pa hi ka tlawh nawn leh ngai ta lo a. Ani pawhin min rawn ngaihven zui bik lo. Ka pi boral a kan inhmuh kha kan inhmuh tawpna a ni ta riha, a kum angzawng phei chuan kum 15 dawn a ni tawh.  Ka pa unaute an awm a, an fate pawh. Chuvangin chhungte nei lo ka ni hauh lo. Mahse, ka nutei te chhungkua chauh hi ka thinlung hi chuan chhungkua tak takin angin a pawm thung.

B.A ka zawh hnuah zirzawm tawh loin ka thawh theih tawk hna ka zawng lauh lauha. Thawmhnaw zawrhna dawrah te ka inhlawh a. Mahse, Patea'n health worker training turin min ti a. Ka aia naupang fe te bulah ka training ve leh a. Vanneihthlak takin ka pass tha ve viau mai bawka.Ka zir zawh hnuah hna dil theih apiang ka dil kuala, ka ti tha ve hle a ka hriat pawhin ka lo la ti tha tawk lo thin aniang , ka tling thei tlat lo. Mi ai te ka kal lawp lawp a, a changin mi inah damlo ka enkawl a. A chang leh damlo, damdawiina an chhungte awmpui thei an awm loh vanga thla khat dawn dawn awmpui te ka nei a. Mihring hi kan lo buai tawh zia leh kan inhmangaihna nep sawt zia ka ngaihtuah ngun phah ngang mai. Vawiin lama ka kalna tur pawh hi chutiang lam tho chu a ni a. Ka nutei thiannu, Nu Biaksangi te hmelhriat a ni a. Nu Biaksangi hnenah an nu ber enkawltu an mamawh thu an lo hrilha, Nutei hnenah a lo sawia. Vawiin hian thawk nghal tur ni loin hna chungchang leh hlawh vel sawifel turin ka kal anga. Ka thawk thei dawn anih chuan naktuk atangin ka thawk ang.

Mission veng kan thleng a, kawng lun lutuk lai pensanin tlema kawng te zawk kan zawha. Ka kalna tur in hi chiang fakin ka hre lo nangin a awm ang tur lai erawh ka rin hriat thei a. Kawng lun lai atanga kawi hnih vel kan thlen hnuah kan hmaah building lian angreng tak, coffee rawng leh a var inpawlh lo lang ka hmu a, a kawta ding turin Taxi Driver ka hrilh a. Pawisa kan inpek fel hnuah gate lam ka pana, lut mai loin ka bih hmasa dak dak a. An in hi Kawng an chiah niin mahse kawng erawh a rawn hnaih lo viau. Uluk taka kawtzawl an cheiah chuan Car 1 leh Scorpio var a awm a, a sir kilah Bike pakhat a inhung tel bawk. An kawt sir kual chhuaka pangpar dah naah chuan Saron kung nalh leh uluk taka a shape siamsa an par vul chuk bawk a. Engtin emaw tak mi a hip zar mai. Thir Gate tlema kau sa ka pawh kau belha, ka inzep lut a. Ui an neih loh hram ka beisei. Ran ngaina lo em em ka ni a, ui leh lek phei chu ka hlau em em ringawt mai.

Gate chhung ka lut fel chiah tihin kawngkhar lian leh hnum hlurh mai chu a rawn inhawng ve chiah a. Mipa pakhat hi a rawn chhuaka, zin bag lian vak lo a ak a, lukhum hmathlawk a khum a, a kut lehlamin zin bag tho,tlema lian deuh zawk a khai a. Pa lian lam niin, a ngo tehchiam lo. Gate bula ka lo ding reng chu min rawn hmu a, a mitmeng a thip angreng bawk si nen ka ip deuh chawih mai.

"Eng nge i duh? " a hmel en aia aw ki nelawmin a rawn ti a.
"Pi Maduhi ka rawn hmu dawna" ka ti ve vat.
"Anih chu, va hmu rawh" kawtsir a Motor inhung lam pana kal pahin a ti leh a. Melh deuh zak zak chungin Kawngkhar lam ka pana. Kal pahin eng chhungkua nge annih ang tih ka ngaihtuaha. In lama Damlo enkawl hi chu hlawh a chhe lo viau thin nangin thil nuam erawh a ni ngai lo tih te ka ngaihtuah paha. In lama enkawl tak hi chu ka vawihnih na tur chauh a ni a. Damdawiin a enkawl erawh ka nei ve nual tawh thung. In lama enkawl a nilenga in awmchilh hi chu an sual leh fel lam pawh ni loin hna hi a nuam thei tak tak lo niin ka hriaa. A nawm loh thin em vang hian aniang hlawh pawh a that reng thin ni.

Hmeichhe pakhat, kum 16 vel bawrin min lo dawngsawnga, Pi Maduhi hmu tura kal ka nih thu ka hrilha, a insiam mek thu leh nghak lawk turin min hrilh a. Thutthlenga thu chungin an inchhung ka melh kual dan dana, tunlaiah inchhung chei hi kan uluk tlangpui tawha. Tuna ka awm mekna pawh hi an inchhung chei veltu kut hnu nalh zia leh a design simple leh changkan zia alang reng mai.

Minute 10 vel ka nghah hnuah inchung step atangin a rawn chhuk a. Pi Maduhi ka ti nangin ka aia a upatna a tam lo tawp ang tih alang thei a. Kum 30 leh 35 inkar  vel anih ka ringa. Kum 35 a pel tawh anih pawhin a pelhna ala tam lo viauin ka ring.A incheina felfai leh smart em em mai chuan a hmel tha zet chu a ti lang zahawm zuala. A sam a dum tha hle a, a dar chen vel niin a ngil tha hle bawka.  Eng hna nge a thawh ka hre lo nangin hna chhe tak chu a chelh ka ring lo ve nghal tawp.

"Min lo nghak rei tawh em? Tukin chu kan naute a  school kal tur a huaibak a, u Mama zin tur nen ka buai leh lutuk a. Nidang ang chu nise ka kal a hun daih tawh a" a rawn ti nghal bawrh bawrh a. Ka luh dawna ka hmuh kha u Mama a tih chu ni ngei tur a ni. A pasal pawh a ni mahna le.

Ka nghah rei loh thu ka hrilha, Thingpui ka in leh in loh min zawt a. Ka bu ringawt.

" I enkawl tur ber hi ka pi ania. Stroke anih bakah tlemin a rilru lam hi a chiang zan lo bawka. Damdawiin awm reng ringawt kha a theih loh bakah a lainatawm a. Tihian in lamah nurse te la in inenkawl mai ila kan tia. Niminah Nu Biaksangi te nen kan inhmu hlauha, chanchinbuah nurse kan zawng mai dawn mawni ka tih laiin nangmah hi a sawichhuak ta hlauha. A tihzia tak tak a ni. E, chuan kan chhungkua hi kan nupa leh kan naute bakah nula 2 kan nei a. Driver kan nei a, ka pi leh kan pa u mipa a awm a. Driver hi chu langa lo kal ania. Kan pa u hi chu kartawpah bak a lo haw meuh lo" a ti duah.

Hna chungchang kan sawi zui a, Zing dar 8 atanga kala tlai dar 5 thleng awm tur leh, a tul chuan zan lam chu tlai zeuh pawh a ngaih chang a awm arin thu te a sawia. Inchhung chet leh thildang chu engmah khawih angai lo a. Naute pawh awmtu hran a nei a, school a kal ve tan tawh vangin buaipui angai lo a. Damlo enkawl ngawr ngawr angai pawimawh tih a sawi nawn ngun hman viau. A tawp berah Hlawh min pek tur zat a sawi  a,  ka meng deuh kawk mai. Ka beisei aiin a tam fe tlat.

"I pawm theih chuan lehkha te tifel ila. Ka duhdan tak phei chuan vawiinah hian tan thei nghal la ka duh a" nui sangin a ti a. Ka rilruah ka Nutei a lo langa. Kan inbiakna engmah hrilh lova lo "aw" nghal ngawt chu dik theiin ka hre lo.

"Ka chhungte nen kan lo inbe rawn ve anga.. " tim angreng takin ka ti a.

"Ni e, lo sawi ula. Mahse tlaiah tal i thu tlukna min rawn hrilh thei la. I thei lo anih chuan midang kan zawn angai dawna" a ti tha ve mai.

Sana a en zauha, a tho chhuak zui a. Ka tho  ve nghal vat bawk.

"Na-i, ka tiffin min rawn pe teh"  Choka lam hawiin a ti nghal a. Ka luh hlima min lo be tu nula kha hmanhmawh fein tiffin box nen a rawn phei a. A la naupan deuh vang nge ka hre lo a, a landanah chuan ui ei ru ang maiin a tim dai mai.

In ka thlen veleh Nutei hnenah kan inbiak dan ka hrilha, "a felfai viau chu a. Naupang lah awmtu hran a lo nei lehzel bawka" a ti a. Phone in Patea ka hrilh bawka. Ka thawh duh leh duh loh chu ka duhthlan naah an nupain an dah ve ve a.Pi Maduhi ka call a, ka remtih thu ka hrilh a. Zing lama kan inbiak laia a awki zangkhai vah ang bawk khan zangkhai takin lawmthu min rawn hrilh a. Nu sual leh tawhkhirh tak a ni lo chek ang chu.

Tukverh bulah ka thu a, veranda thlang lama Nutei pangpar hun tlar thap chu ka thlek dan dana, mahse ka rilruah erawh ka nu bak alang lo. La damse tun aia tha hi chuan min enkawl ka ring chuang hauh lo a. Ka Nutei te nupa hian an fate nena danglamna awm map loin min enkawla,sawiselna tur pakhatmah ka hre lo. Mahse ka nu kha la dam se tih ruk vang vang chang erawh ka nei thin tho a. Tunah pawh hian la dam se tih bak ka rilruah a leng lo.

Nutei'n Nu Biaksangi hnen atanga a hriat, ka thawhna tur te chhungkaw chanchin a hriat ang ang min hrilh a. Pi Maduhi pasal u kha sawrkara hnasang tak chelh niin tunah District pakhat a dinhmun pawimawh tak chelh mek a ni a. Pi Maduhi erawh Collegeah a thawka. A pasal hian computer lam zawrhna dawr a enkawl a. A pasal nu leh pa an boral tawha, ka va enkawl tur ber kha a pasal pi a ni a. Tin, ka beng verh em em tu zawk chu an Naute kha an nupa fa ni loin, a pasal u fa daih a ni a, Mak takin a cousin laka a fa a ni teh tlat!!! Chuta karah aman enkawl loin a nau te nupain an enkawl a, a ngaihven lo viau a, pa ang pawhin a awm lo ala ti lehzel. Eng mipa nge maw ni?? Tukin a ka mipa hmuh kha anih chuan a pangngai hmel viau kha ania. Chutah hna tha tak ala thawk zui bawk a. Mahni fa hlamchhiah mai mai tur chu a ni lo asin mawle. Mahse, eng nge mak ka tih viau? Ka pa ang bawk mipa an lo awm ve tihna animai.

Engpawhnise, ka hlawh min pek tur a tha tawka. Ka hlawh phu ang ngeia tha taka thawh ka duh ber. Damlo enkawl tur ka ni a, an mimal nun lam ka buaipui tur zingah a tel lo. Chutiang bawkin anni pawh ka mimal nun buaipui tur anni hek lo.

KAR THAR LAMAH ZAWM KAN TUM DAWN NIA AW U☘☘