Bibi -11

Chapter - 11

"Lala, i pi bulah kal rawh le" a ti dam leh thlup a. Angela-i ka en a, Santi a melh a. Saitluanga a rawn en leh a..
"Anu in min hau angem? " a ti sin rat mai.

"Nope.. Hau lo tur ah ngai ang. Kal rawh le, tunah. Bd, lo zuk hruai la. Santi hi ka be lawk duh" a ti leh a. A aw a dam tawh lo, kan pathum chuan kan tih tur theuh thupek min pe a ni ber.

"Lo kal rawh le, kal ang" nui chungin ka ti a. Hreh hmel zet hian min rawn pan a, ka kai a. Kan kal hmain Santi ka melh leh hram a, a hma ang bawk khan hlauh nei tih hriat takin a hmai a dang lap a. Khawngaih thla a la viau nangin ka la khawngaih ta chuang miah lo.

Inhnuaiah ka kai thlaa. A nu leh Mki lo thu dun a hmuh veleh chuan a kut ka vawnna tal thlak a tum nghala. Ka thlah duh der lo. Kan chhuk thla thawm a hria aniang. A rawn hawia, kan lo inkai chu min rawn en a. Beisei loh takin a nui a, Angela-i tal deuh laih laih chu a melh a.

 
"I pi in angai che a. I zin San rei tawh ati aniang. U Bdi nen khan i pi bulah va kal ru. Thuawih la aw' aw dam leh zangkhai tak hian a rawn ti nghal a. Angela-i hawihai hmel chu ka hmu ru kar a. A nu in ka bula awm a phal loh thu a sawi kha dawt a ni dawn lo tih ka chiang lehzual a. Mahse, tunah ka ruala kal tura a ti leh si chu a hre thiam chiah lo a ni mahna.

"Ma, keiman ka kai lo. Amah hian min kai a" Hlau aw hian a ti a.

'Yes, ka hria alawm. Api chu va hmu vat rawh le" Nui chung bawkin a ti leh a. Angela-in "Ma.. " a ti leh a, engmah sawi loin ka pi Room lam chu Pi Maduhi'n a kawk a. Angela-i tereuh lah chu a ngawi ve hmiah mai bawka. Eng inzawmna tak chu nei nufa ni maw?

Roomah kan inkai lut a, Pi in a lo hmuh veleh a ri nghal hlut mai.
"Khumah hian lo lawn teh, i zin chanchin te ka hre chak tawh ania" a ti a. A tawi deuh hrat hrat nangin Pi-in a ko chul bawk sia, a lawn ta nge nge.
"Zin chu a nuam reng reng em? " a ti leh a.
"Aih, nuam vak lo. Api, ti nge i lo kal ve loh? " a ti a.
"Ka kal thei lo alawm. Eng nge ni min rawn hawn? " a ti leh a.
"Ka hre lo, sweet aniang. Anu bagah a awm ka ring. Nih leh api, engtikah nge i kal theih ang? " a ti leh siam siam a. Naupang rilru thianghlim leh engmah vei ren run la nei rual a ni lo bawka. Atirah khan a ti viau a, mahse tunah chuan engmah chutiang lam a awm tawh lo.

"Ka kal thei tep tawh ang. Ka kal theih veleh kan zin anga" a ti a.

"Mahse, anu in i kal thei tawh dawn lo atia. I thi tep tawh a ti. Api, enge thi chu? " a ti a. A thilsawiin puitling pahnih te min thawn nat zia hre miah loin a pi a be zui siam siama. Pi rilru na lutuk hmel chu ka en rei thei lo. Engatinge Pi Maduhi hian naupang bula sawi miah loh tur a sawi thin le aw??

Kawngkhar a ri raka, ka hawi let a. Saitluanga a rawn lut a, amahin a lo lut emaw ka ti hmana, mahse a hnunga Mki leh Pi Maduhi lo lut ve chu ka va hmu a, Angela-i thilsawiin pi a thawn zia ka hmu zo chiah si, thil tha lo a thlen hlauin ka lungphu a rang nghal zawih zawih mai.

"Pi, eng nge i an a? " Saitluanga'n a ti a. Pi a rawn hawi chhuaka, Saitluanga en loin Pi Maduhi a melh ding nghal ngar mai.

"Ka tha.. " Dam deuhin a ti a.

"Pi, hei Mki hian eitur a rawn ken che a" Pi Maduhi'n a ti a. A thil khai chu pi khum bul cabinet chungah a dah nghal a. Ka rin ang ngeiin pi-in a chhang lo.

"Mama,Chhuak teh u. Ka chau riau maia" a ti dam leh dap mai.

"I nuam lo em ni? " Pi Maduhi zawkin a ti vat a.

"Chhuak ru. Bd-i kha awm se" a zawhna chhang loin a ti leh hmiah.

Saitluanga'n min rawn en a, a mitmeiin zawhna min rawn zawt a. Ka lu ka thing ringawt. Pi Maduhi'n Angela-i a pawm thlaa. Saitluanga chhuak ve mai lo a tlema khawtlai deuh chu Pi-in a hmu a.
"Chhuak rawh u ka ti a ni lawm ni? Eng nge ila din reng? ' a ti vak a. Saitluanga tihngaihna hre lo hmel chu ka lo lainat ve tawp.

An chhuah fel veleh kawngkhar kalh turin min ti a. Ka kalh nghal sawk sawka, rang fein a khum bulah ka let lehnghal a. Che lo hian chunglam melhin a mu a, rilru nuam lo em em in ka en a, a that leh that loh pawh ka zawt ngam lo.

"Ka phone kha en la, Zothana tih kha han phone teh" a rawn ti chhuak thut a.

Lukham bula a phone dah ka la a. Zothana tih ka zawng nghala. Ka hmuh veleh ka call a, rei pawh a ring hmain a pick a. A pick veleh pi ka pe vat.

"Naktukah lo kal ta che. Ka mamawh hmanhmawh hle che ania " tha tak-in a ti a. Nidangah Zothana tih hi a sawi rik ka la hre ngai lo.

"Haw tawh la, i chhuah pahin Mama kha hrilh la. Tumah ka hmu duh lo tih hrilh rawh. Tumah lo lut suh se" a ti a. A tawngkam a vin chuang lo a, mahse thupek a ni. He zia chiah hi anih hi Saitluanga hian a lo chhun ni...

"Riak turin min duh chuan ka riak leh thei reng ania aw" ka ti a. Angela-i thilsawi a hriat hnuah a mizia a thlak nghal vek tih ka hre tho a, mahse a awmdan danglam hneh lutuk chuan ka awm ati nuam thei chuang lo. Thinrim-in phun se, ang leh vak vak sela ka hahdam zawk fe ang.

"Min ngaihtuah suh. Ka tha vek alawm. Inah hahdam deuhin va mu la. Zingah kan inhmu leh anga" a ti dam diai thung. A tawngkam leh awmdan cool lutuk chu a inhmeh hlawl lo.

Room atangin ka chhuaka,Sitting roomah tumah an lo awm lo a. Choka lam ka va en a. Na-i amahin a lo awm a. Saitluanga awmna ka zawt a. "Ka hre miah lo. U Mki kha a thlah aniang" a ti a. "I haw tawh dawn mi? " a tihzawm lehnghal zat.

"Aw, haw dawn chiah" ka ti a. A rawn kal hnaia, midang an awm leh awm loh enkual niawm takin a hawi zak zak a. "U Santi kha u Mama'n a hau ami? Inchungah a lo tap asin" a ti ta sa sa.

"Ka hre bik lo. Ti nge a hauh ngawt anga? " Engmah hre lo niawm takin ka ti a.

"Phone-ah mi a biaa. U Mama'n min hau atiin ka hria" a ti leh a.
"Ka hre ve miah lo. A va zia lo ve" ka ti ringawt. Ka rilruah erawh Saitluanga hmuh bak a lang rih lo.

Verandaah ka ding a, Saitluanga ka call paha, a pick mai thei lo zui. An tlan laklawh anih ka ring a, mahse ka call nawn leh ta tho. A rawn call back hun nghak reng chi ka ni lo. Ruah lah a sur bang hleithei bawk si lo a. Taxi chan chawp leh nen, an in awmna hi main road a ni bawk si lo a. Kawngpui pan leh chhung nen ka tlai dawn lutuk.

"Hello.. " a rawn ti ta hlauh.

"I buai em? " Inthlahrung angreng takin ka ti a.

"Aih, ka lo inbual a.. Eng nge ni ta?'  a ti a. Na-i khan Mki a thlah a ti sia. A hre sual anih hmel.. Pi room atanga an chhuah leh tuna kan inbiak kar hi a rei lo em mai.

" Pi-in tumah a hmu duh lo a. Chimbuai a duh lo a, tumah room-ah lut lo turin a tia. I bula sawi turin min chah a" ka ti a.

"Ok...Chu zawng chu mi? " danglamna engmah awm lo hian a ti dam thlup.

"Um.. " ka ti a. Phone dah ka tum chiah chu a rawn tawng leh a.

"I haw dawn chiah tihna mi? " a rawn ti leh a.

"Aw, haw dawn a. Tihtur a la awm em? " ka ti ve vat.

"Aih, ruah a sur sia. Ka chhuak dawn tho a. Min lo nghak rawh, ka drop nghal ang che" a rawn ti leh a. Ka ip deuh chawih mai.

"Ngai lo ang. Taxi ka lo chah tawha" ka ti vat. Eng Taxi mah pawh chu ka chah chuang lo.

"Cancel mai rawh. Ka kal dawn tho, a harsa lo" a ti awlsam leh mai.

"Aa, a lo thleng tep ang'

" Cancel rawh, i haw dawn chiah chuan i kohna ala rei lo ang. Ka rei lo ang" a ti a. A off nghal daih bawk.

Angaihna hre loin ka dinna ngaiah ka ding ren rawna. A Motor a kan inthleng kal ka duh lo nge amah anih vangin ka hreh zawk pawh ka hre lo. Huiham....Duh ai hi chuan kan inhnaih mah mah chu a ni. Inngaizawng ngai miah lo tur chi kan ni tih hrereng chung hian min ngaihven anga ka ngai teivet hi ka ning.

Reivakloah a rawn chhuaka, a thawmhnaw hak danah chuan chhuahna tur pawimawh deuh nei hmel a pu miah lo. T-shit dum plain leh kekawrbul a haa. Slipper a bun bawka. Huizzz..Pa lian deuh hi chuan an thawmhnaw hak engpawh hi an inhmeh viau zel chu anih hi a. Bakah, Saitluanga ka hmuh apiang hian Mipa hi Lian satliah ni lo, pian nalh an lo awm ve tih ka chiang nawn leh ziah. Hmeichhe pian nalh angin an langsar ve lo mai mai zawk a lo ni.

"Nihliap i keng em?" a ti vut. Ka lu ka thing a. " Pawi lo, motor awmna a hla chuang lo a. I huh hman lo ang" a ti awlsam leh mai.

A hnunga thut ka tuma, mahse a hma lam kawngkhar a rawn nem hawnga. "Lo lut rawh" a rawn ti a. A hnunga luh luih talh thu awm hek lo.

Kan tlanchhuaka, Pi chungchang min zawh ringin chhan dan tur ka ngaihtuah lawk a. Angela-i thilsawi vanga danglam thut a ni tih hrilh nghal turin ka inkau sa thlap bawk.

"Rohminga te nen khan engtin maw in inchhun dan? " a ti ta daih.

"Maw? " Ka hriat loh vang pawh ni loin ka ti a. A sawi nawn veleh mai bawka.

"Ka nutei pasal farnu fa ania" ka ti tawi tak.

"Um, a fel ve khawp mai" a ti leh ringawt.

"Ka sawi tur a ni em ka hre lo a. Mahse, Pi awmdan danglam thut chhan kha ka sawi duh a" ka ti chhuak pawp. Ka sawi ngei ngei angaiin ka hre tlat.

"Sawi la... " a ti a. Kawngpui pangngai kan pawh thlaa, mission veng kawn kan thlenga, Traffic jamah kan tang tan nghal chu animai.

"Angela-i khan a sawia. A nu in Pi kha a thi vat dawn a lo ti aniang"

"Maw? " a ti nghut.

"A kal thei tawh dawn lo a, a thi tep tawh a lo tia. Chu chu Angela-i khan a sawi a. A sawi atang khan pi kha a chau ang hian a awm nghal a" ka ti leh a.

"Anih chu' a ti bung vut a. Abak engmah a sawi zui lo. Tim deuh tak hian ka melh zawka, hmalam ding takin a en a. A kut zungtang in Steering wheel a khawng kauh kauha, a hmelah engmah danglam a awm hek lo.

Pawn lam hawiin ka thu a, ka thil sawi kha ka sawisual nge sawifuh tih ka ngaihtuaha, Saitluanga'n engmah a sawi zawm lo chuan min ti hrilhhai a. Tun hnai hi tlema kan innel tak deuh avangin an chhungkaw thil ka sawi ta zauh zauh a, ka sawi lutuk ta mah mah a ni ngei ang.

Darkar khat aia tam mah kan in thlen nan hun kan hmang a. Kan in awmna min zawt a, ka hrilh a. Abak chu kan tlan chhung khan Mizorama sawrkar hna indaih lohna te a sawi a. Damdawi lam thiamna nei te chu Sawrkar hna hmu kher lo tan pawh chhungkaw tana an tangkai bik zia a sawi luama. A sawi dan zawnga ngaihtuah chuan a fuh thlap mai.

Pi sawi dan takah mahni in han thlen chu kan thlamuan dan a famkim bik thin. Hausak leh hausak loh lam pawh a lo ni ber lo.

Chawei kham felah ka inbuala, ka inbual zawhin Lawmi ka khumah a vang zawngin a lo mu dar dar mai. Zawhna angah leh dawn tih ka hre lawk vek.

"Eng nge thleng a? " a ti a. Chimawm zetin a meng kal rawlh rawlh bawk.

"Engah chuan maw? " ka ti ve thung.

"Ka hre chiah lo. Rohminga'n nimin piah khan Bike a in inphur a hmu che u ania aw" a ti leh zat zat.

"Ho e, damdawi kan lei alawm. Enge ilo ngaihkawih tlat le? Bialnu nghet a nei a. Nei lo tehreng pawh ni se ani ang officer lian, chu pawh chhungkaw ngelnghet sa nei ania. Min hmehbel tum lo teh" ka ti hlur mai. Thil ni thei ngai reng reng lo tur a beiseina lo neih hi ka ning tawh.

"I period dawn ami a? I va han vin tak" Ka thinrim tehreng nen a ti duh lek.

"Chutiang a ni lo. A ninawm alawm"

"I hmel anih chu a. Thleng thei lo a awm lo. A hrim hrimin keini pawh enge chhungkaw ngelnghet lo kan ni bik hleinem" a ti leh hmiah. An chhungkaw zinga mi ka nih loh na hi sawi a duh ngai lo bawka. A sawi tum ka man thiam a, mahse ka ni ve tak tak lo tih ka inhai ngai lo.

Eng eng emaw sawiin a tawng zui teuha. Ka ngaihtuah fe hnuah Saitluanga ka vuak kha ka hrilh a, a ang phuaua. A nui zui ta vak vak a, keipawh ka nuih a za tha leh a, kan chhungte ngaih ti tha lo khawpin kan nui ta vak vak.

"Ih e, eng emaw chu a awm. I hre lo mai thei a, mahse a awm. Hnathawk satliah ang chuan en che sela i ropui lo khawp ang. Mahse, engtinmah a ti lo che ania' inti thupui fun fe hian a ti a. Ka ner khum vak ringawt.

" Ka ti tak tak. I la kal rei loh zia ngaihtuah la, a treat dan atang che hian eng emaw awm chu a awm chiang alawm. A hmangaih leh hmangaih loh lam che ni loin, ngaihzawn chu a ngaizawng che. Pawm mai rawh" a ti leh hmiah.

Saitluanga leh Angela-i ngaihtuah chungin ka mu a, mahse rei ka ngaihtuah hman lo. Ka muhil zui nghal vang vang a, zing dar 6 velah ka harh leh ta chauh.

Pi te in ka thlen in Pi Maduhi chokaah a lo awm a. Angela-i'n chaw a lo ei mek a. Pi roomah ka lut tlanga, a lo la muhil a, tihharh hlauin ka chhuak lehnghal tham tham mai.

"I lo kal tawh maw? " Chokaa ka lut chu Pi Maduhi'n min lo ti a.

"Na-i Santi chu i be thei em? " a ti zawm leh zat. Na-i alu vel chu ka vel pui ve nghal a.

"Be thei miah lo' Na-i'n a ti a. A bazar anih ka ring ve tawp.

" Nizanah a riak chhuaka, haw a duh deuh aniang. Mahse, Santi hi chu a fel em a, hlawh sang zawk hlawh tur pawhin na ka ti lo" a ti leh a. Nimin a Saitluanga'n a hau a tih kha a hau na viau zawk nge mawni le?

"Bd, enge nimin tlai khan thleng reng reng a? Angela-i i han koh khan" a ti leh a.

"Thil thleng em em pawh ka hre lo.. Angela-i kha pi in hruai a phal em a tia. Chu chu u Mama khan a rawn chhang a. Phalna lak angai lo a tia" Awki pangngai takin ka ti a.

"Anih tak chu.. Thil hi a kal fuh lo laklawh a" a ti nghat.

"Hnathawk hi chuan hnathawk anni tih hi hre fo se a tha a. Santi pawh hian ka duh dan a hre chiang a. Hetiang hi ka duh a, ka thiannu te in a kal, a pu enkawltu tura an lak saw chu a mawl ve khawp mai. A damlo enkawl ngaihven thulh thak hian ka thiannu fapa an enkawl dan saw a buaipui a.Chhungkaw thil a lo ngaihven ve em em a, va leng ila kan lenchhan ber emaw a lo intia. A lo tawng ve teuh zel a. A mize hniam thlak hi ka tia. Mahse, keini chu kan vannei a. Chutiang khawpa mi hawi harh lo in ni lo a" a ti leh duah.

Nghet lutukin ka chemte ken lai ka hum a, a thilsawi kha midang chhungkaw chungchang sawi angin lang mah se keimah min sawina tih ka inhai eih lo....




Note : No edit aw.. Zanin chu kan chhungkaw thian hnai deuh pakhat, damlo kan tur kan nei a. Chhun lam hnaah ka buai deuh bawk nen ka type hman ang ang ka type pawp pawp a. A ngaihnawm lua lo khawp ang. Zan dangah pawh ngaihawm tak phei chu a ni law😄 Changtupa pa rum rut lah chu ka mitthla hleithei der lo lehnghal a, chuvangin changtupa hi kan TUAI tir deuh law law mai dawn mawni😆😝😝