Bibi - 12

Chapter - 12

 

"A la ei zo na nge? " Saihminga'n rawn luh pahin a rawn ti a. Pi Maduhi tawngkam ngeiawm zet zet ka hre zawm rih dawn lo tih ka hriaa. Ka thaw deuh huai mai. 

"Ei zo tep. I hmanhmawh tawh mi? " Pi Maduhi'n a ti vat a. 

"Hmanhmawh lam pawh a ni lo. Jam tur nen hisab angai alawm. Ruah a tla reng bawk si a, motor ken ngei ngei angai dawn ania" a ti leh hluk hluk a. A tho fuh vak lo aniang, a tum bur mai. 

"A insiamsa vek tawha, hei a ei zo dawn alawm.. Ei vat vat rawh, i ei muang thin em mai" a ti zui bawrh bawrh a. 

Alu kan vel zo a, sil turin tui khawihna lamah ka keng phei a. Ka sil pah-in ei hmanhmawh tur a an intur thawm chu ka ngaithla paha, a nu in a hauh danah dik lo a awm hran lo. 

Chhuatah no a tla keh ni ngei tur a ni, a ri chhuai a. Pi Maduhi thinrim thawmin a zui nghal zat. 

"Awi, he nu hi chu aw.. No pawh hi i keng nghet zo ngang lo chu ania. Thawhhlim atangin kan in vin a, a hne hian ka hne lutuk. Ka vaw zawk dawn che mawni le" a ti bawrh bawrh mai. 

"Na-i, lo phiat nghal teh. Amah bawk hian ania rap leh dawn. Awi, Santi awm bawk si lo. Pa-a, Santi kha biak lo tum teh a. Kan let leh lamah kan rualin lo haw se. Duh leh hlawh pawh up mai tur" a ti leh teuh. 

"A awm duh tawh lo emaw tia" Saihminga'n a ti hmuk. 

"Duh loh a awm em ni?" Awki sang fein Pi Maduhi'n a ti a. Mahse, a tawng zawm leh erawh awki pangngai a ni leh nghal a. A insum hman zel mai hi a fakawm thin. 

"Thil a kal fuh lo laklawh atin nih hi. I hria alawm, Santi hi chu keimah hian ka mamawh em a, a rintlak bawk nen" a ti a. 

"A tlai dawn" Saihminga'n a tihsan daih. Kan awm laia sawi a duh lo anih ka ring. Pi Maduhi pawh hi hmeichhe fing leh lu zo veh vawh tak mai a ni bawka. A insum thei em em mai hi a fakawm ka ti angreng thina, mahse hmeichhia tih takah ani hi chuan rik leh phat chang a nei leh zauh zel thung.

Hmahmawh phelengin Angela-i school kal thlah turin an nupa in an chhuaka. An kal fel meuh chuan inchhung a reh nghal huai thei. Angela-i a bengchheng pawh a ni lo, Pi Maduhi phili nasa chingcheng lutuk kha a hneawm thlawt. Santi awm loh vanga buai angin insawi mah se nidangah pawh phili hi chu a phili chung ziah hrim hrim. Amah maia phili a ni thin bawk si lo a, midang min tibuai tel vek zel bawk nen an school kal tur hi chu hahthlak thei tak a ni. 

Na-i tih tur zualpui ka tihpui zawhah Pi a harh leh harh loh en turin ka kalsan a. A lo harh tawha, "i lo thleng chauh em ni? " a lo ti nghal a. Nimin lam ang bawk khan a la ngui tih a aw ki atangin ka man thiam nghal mai. 

"Thleng chauh lo e. I la mutui sia, choka lamah ka va pui a. Eng nge i an? " ka ti a. 

"Ka mu tha. Min tung tho teh" a tih zawm a. A khum hi adjust theih anih avangin a awlsam a, ka herh sang a, thu mu titih hian a awm a. A hmai ka hrukfai sak nghal a. 

"Tu nge awm?" a ti a. 

"Na-i nimai. Angela-i an thlaha" 

"Misualnu a kal ve em ni? Ngahnge naupang thlah tur mai maia chu zat zat an kal a? " a ti bak hlak. 

"Pi Maduhi te nupa an nimai. Santi hi haw a tum an tiin ka hria. Nizan pawh a riakchhuak niawm tak ania " ka ti a. 

"A haw dawn e a, a that chu. Haw rawhse. A fel thin nen tunah chuan Duhawmi ang maia hlauhawm a ni tawha. Min hnaih tur pawhin ka duh lo ania" a ti duah. A khuh zui bawh bawrh a, tui intur ka thlitsak a, ka pe a. Muangchangin a in a. Tun hmain a lo TB hrep tawha, a khuh hian a khuh satliah ve mang mang lo. A khuh nasa thei em em maia, achang phei chuan a khuh luak lek lek zel mai. 

"I lo TB leh maithei a.. Test leh ila a tha iti em? " ka ti a. 

"Thla thar se, in check -up hun a ni leh dawn tho a. Tah chuan le.. Aaa, dam rei pawh ka tum tawh lo a. In check -up tih pawh hi tul ka ti lo' a ti zuai leh raih mai. 

" I dam reng ang chu.. I tute hian an mamawh em mai che" ka ti vat. 

"Mamawh tawh lo. Nu leh pa tel lo ang tluk a ka enkawl, ka pawm seilen anni a. An engkim ka ni thina, tunah chuan an puitling a, an eizawnna kawng tur an thlang fel a, an hlawhtling bawka. Min mamawh tawh lo. Phurrit mai ka ni tawh chu anih hi" a ti leh charh charh a. Han chhan mai dan tur ka hre lo a. Diktak chuan hei hi mihring nunphung pakhat a ni ve tlat a. Mi tamtak chu an kum a upa tial tiala, nu leh pa an ngaihlu tual tual a, a then erawh an chhungten an hlutna hre lo khawpa tar hnawksak an awm ve bawka. Pi leh pu hlutna hre lo nu valai leh pa valai, thalai chenin an pung tual tual bawk. Kei ngei pawh hi ka pa la damreng mah se pa Ngaihlu miah lo ka ni a. Midang sawisel thei dinhmunah ka ding bik lo. Mahse, Ka pa khan pa nih a tlin ngang lo a. A nupui thusawi zawng zawng awihin kei kha thiamthu sawina hun min pe ngai lo a. A nupuiin min vaw mai pawh a ni lo a, a nupui tlawn nana min vaw thin kha ka theihnghilh ka ring tawh lo. 

"Ei tur min va lak la. Tukin chu ka ril a tam riau ania" a tih riah ka ngaihtuahna atangin ka harh zawk mai. 

Chokaah ka phei a. Thingpui ka siam sak a. Ka siam laiin Saitluanga a rawn lut a, Nizana Lawmi thilsawi kha ka ngaihtuah chhuak zawka. Tul lo zetin ka lai deuh ngawt pek. 

"Thingpui i siam alaw? Min lo siamsak ve nghal la.. " a rawn ti nghal a. A awmdanah chuan a lai ve hlek lo tih a chiang. Huiham... Eng nge maw lai tura ka rin ve ngawt le? Lawmi sawi kha nise ka lo ti ve tak tak anih chuan mi a ka ni ringawt ang. Hahthlak leh lutuk mai a. 

Thingpui ka siamsaka, ka siamsak laiin Saihminga te nupa an rawn let chiaha. Ka rin ang ngeiin Santi a rawn let ve a. An rawn tawng lut bawrh bawrh a. Saitluanga ka melh zawka,  ding chungin dawhkana Vanglaini chanchinbu awm chu a zuk bih a. Saihminga te lo haw leh Santi lo haw tel ve tih lam chu ngaihven hmel a pu lo. A haw tih a hre lo hrim hrim pawh a nimahna le. 

"Hei aw" tih pahin dawhkanah ka dahsaka. 

"Ka lawm e" a ti liam vut. Ka kaltirh phat atanga an chhungkaw mizia tha ka tih em em chu thil te tham te pawh tihsak ila lawmthu min hrilh lo ngai lo. Kei chauh ni loin an Driver te leh an awmpuite pahnih bulah pawh Lawmthu an sawi lo ngai lo. 

"E, U Mama chu ilo haw tawh maw? Bd, ka pi a tho harh em? "Pi Maduhi'n a rawn ti lut nghal lawng lawng a. 

" A tha e" Pangngai thei ang berin ka ti a. Nichina a tawngkam ngeiawm lutuk kha a hre veleh tawh miah lo a ang. Keiin ka theihnghilh loh vei nen.. 

"Pi thingpui ka va pe ange' biak bik pawh nei chuang loin ka ti a. Min chhang lem hlei lo a. 

" Mki khan phone a pick thei lo a ti che a. In inbe tawh em? " Pi Maduhi'n Saitluanga hnena a tih ri chu ka chhuah hmain ka hre hman a.Min hmu thei an awm lo bawka ka ner vaka, a tawngdan hmui phunin ka zir a. Ka awmdan naupangchhia lutuk chu keimah leh keimah ka innuih leh rih a. Hemi te chhungkua hian a hran hranin buaina min thlen chu anih ber hi a.. 

Pi chawei tur ka va laksak zawk tih loh chu room ka chhuahsan ta meuh lo. Saitluanga te ho kalchhuah lai pawh ka hre lo hrim hrim. 

Chhun thingpui ka pek zawh hnu lawkah inleng kan nei a. Kum 30 leh 40 inkar vel anih ka ring a. Pa lian over ni lo, mizoah chuan pa vantlang zinga mi a ni a. Mahse, a hmel erawh tha tak a ni. A sam chhip lam buk deuh bik chu uluk lutukin a khuih pial thana, a incheina smart lutuk nen chuan alang zahawm ngang mai. Hmeichhe thenkhat chuan an star khawp ang.Mahse ka  star chi a ni ve lem lo. Eng nge a duh ka lo zawt vat a. Pi hmu tura lo kal a nih thu a sawi a, "Zothana ka nia" atih takah chuan nimina a biak kha a ni tih ka hre chhuak chiah. 

Pi ka hrilh vat a, Room a hruai lut turin min ti a. Ka hruai lut a, pi -in a lo be nghal sawt sawt a. Ani pawh chuan tlangnel takin a be ve nghala. A dam tha zel em tih te a zawt a. Chu bakah a tum aia rei a zin thu te a sawi tel luam bawk. 

"Bd, hei hi Dan lam hre mi a ni a.  Zothana anih ni. Chuan, Bdi hi min enkawltu ania. Ka kut leh ke ber anih hi. Nidangah zel pawh ani hian a rawn be zauh zauh maithei che ania" Pi-in a ti a. 

"Ka thurochhiah siam kha thlak danglam duh ka nei a' Pi bawkin a ti leh a. Zothana chuan min rawn en a, awm ve lo se min duh tih ka hrethiam. 

" Thingpui ka lo va siam ang. Pi i in leh duh em? " ka ti a. 

"Duh lo e..Zothana hian a in duh ang" a ti a. Rang fein ka chhuak a, Choka lamah ka lut phei nghala. Na-i leh Santi an lo awm a. "Na, Thingpui lum sa a awm em? " ka ti lut a. "Kan lo in zo deuh chiaha. Siam mai theih in a la lum vek ang. Ka lo siam dawn mi?" Santi zawkin a ti a. Nidanga biak pawh min be duh lo, en pawh min en tha peih lo ania. Mak ka ti ngang mai. 

Ka chhang mai lo bawk nen a tho a, a siam nghal rawk rawka. Na-i'n mak tih hmel zetin min rawn en a, angaihna hre loin ka dar ka tichhing ak ringawt. 

Thingpui chawiin ka lut a, khunkhan zet hian thil an lo sawi dun a. Thingpui ka pe a, Pi hnenah mamawh a nei angem tih ka zawt a. 

"Mamawh ka neih leh neih loh pawh ka hre rih lo. Mahse, tikhan lo thu la" Piin min ti a. 

"Kan thilsawi lai kan sawizawm angai dawn a. Dar 3ah client hmuh tur ka nei a" Zothana'n a ti a. Ka awm ve a duh lo tih chu pehhel deuh tak hian a sawi a. 

" Sawi zawm dawn e, Bdi awm pawh a pawi lo. Ani hi Mama tih lohah chuan ka ring ber" a ti ta tlat. 

"Ok... Mahse, ro hi chu chhungkaw chungchang ania. Bdi hi chu chhungkaw member a ni lo a" nghet charh hian a ti a. Keimah inthiarfihlim a hun tih ka hria. 

"Pi,Choka lamah ka lo va awm ang.. Na-i a buai reuh lutuk a,ka lo va pui anga. Mamawh inneih chuan kawngkhar atangin min rawn ko vak mai dawn nia" nui chungin ka ti a. Pi pawn a hnial zui lem lo. 

Darkar khat zen zawn an inkhung dun a, min rawn ko lem lo bawka, Mamawh an nei lo aniang. Na-i nen thil ho mai mai kan sawi dun a, Santi leh Angela-i erawh ka hmu lo. 

"Eng nge api hian u Santi hi a hlu a tihziah bik le? " Na-i'n a ti thut a. 

"Achang hi chuan ka ngei thei tawp. Ka tangkai ve lo hmel thei si, u Santi lah hi a phakar si,keimah vekin inchhung tihfai pawh ka ti a. Api te awm lai chauhin min pui a. A awm peih tawh lo a, a haw duh a. Hlawh up ang an ti leh a. Ka haw daih dawn mawni? " A ti leh a, a lungawi lo hmel ngang mai bawk. 

"Nang te chu i fel em a, an haw tir phal teuh lo mai che" thildang sawi loin ka ti ringawt. 

" Awmna tur te chu a tam e.. Hetah pawh hrehawm ka ti em em chuang lo a. Mahse, u Santi chiah an fak reng a, keima tan a nuam lo ve alawm. Ho te teah min hau reng bawk si" a ti leh hlak hlak a. 

"A ho lutuk, i fel tho tho a. Fak lo che mah se an mahni hian i fel tih an hre vek alawm" Ka ti leh ringawt. 

"Midang an fak reng chuan a ninawm ve e. Awiha, Jungkook-a hmelthat zia hi en ve mah teh" a tih zawm a. Phur fahran hian ka hmai bulah a phone a rawn lek hnaia. Korean tlangval hmeltha fe mai hi a lo lang a. A chanchin a sawi zui ta teuh. A lungawi lohna kha hre awm pawhin a awm zui leh tawh lo. 

Choka-ah Zothana a rawn daka, "Bd, ka kal dawn" a rawn ti a. Ka tho vat. 

"Thingpui in leh la, i hmanhmawh tawh mi? " ka ti ve a. 

"Aih, in lo ang. Miin min nghaka, ka lo kal leh veleh ka in zawk dawn nia" Nui chungin a ti a. 

Pawn thleng ka thlaha, ka vawikhat hmuhna chauh mah nise ka nel nghal sarh mai. 

Pi Roomah ka lut tlang nghal a, "A kal tawh em ni? " a lo ti nghal vat. 

"Aw, kal tawh e. In sawifel thei em? " ka ti ve a. 

"Fel vek e. Khalai file kha safe-ah va dah teh aw. I kalh nghal dawn nia" a ti a. A lukham hnuai atangin chahbi bawr a rawn la chhuaka. Ka laa, ka dahfel sak hnuah Chahbi ka pe a. 

"Zothana lo kal chungchang an zawt che anih chuan ka hre ve lo iti dawn nia. Duhawmi hian a lo kal tih a hre leh ngei ngei dawn a, Santi chu a lo haw leh em? " a tih zawm a. 

"Um, Angela-i an thlah haw khan an lo haw rual" 

"Ka rin ang chiah anih chu" a ti nghat. 

"Ngaihzawng i nei em? " Min ti leh thut a. 

"Aih... " ka ti ringawt. Min zawh dan teh tawp chu ka nuih a ti za angreng viau. 

"Anih chuan Mama hi pasal atan rawn nei la, i haw sek te angai tawh lo anga. Inah Mama a awm loh chang pawhin ka thlamuang thei anga" a ti leh duaha. 

"Awi, a awm ang lo em mai. Nupui neih a tum hnai ve tawh ang ka ring. A bialnu lah a hmeltha sia" Nui chungin ka ti a. 

"Hmeltha hi rilru a that tel loh chuan a tangkai lo teh ania. Inneih ni ah chuan in monu chu a hmeltha em an tia, inneih tuk atangin a fel em an ti nghal zel ania" a ti leh a. Ka nui ringawt. Mki hi ka hmu ve ta zauh zauha, a lo kal chang hi chuan biak pawh kan inbe fo thin a. Misual tak anih ka ring lo ve tawp. 

"Achang hi chuan ka ngaihtuah thin a. I lo kalna la rei loh zia leh ka rin zia che hi mak ka ti deuh thina. Kan chhungkaw thil pawimawh ber ber thlengin ka hrilh che a. Kum upa tak,engmah ti thei lo nih hnuah pawh hian Pathian hian kan nunah thil tha a lo la thlen tir zel anih hi ka ti leh mai thin a. Ka tan chuan Tu nu ang mai i ni a. Ka kawm thei che a, ka hau fo bawk che a. Ka hauh hrep che pawh hian i lo kal leh ang tih hi ka ring tlat zel a" a ti dap dap a. Sawi ve tur hre lo in ka ngawi rauh rauh a. Hetiang taka Pitar nun khawhar hi ka enkawl tur liau liau a Pathian min pek a lo nih dawn hi tiin ka ngaihtuah a. Khuma a thu mu chu ka en a, ka lainat zual sauh mai. 

Verandaa ka thut laiin Mki a rawn kala, "Bd, Saia a lo haw tawh em? " a rawn ti a. 

"Haw pawh ka va hre lo. Room a ka awm laia a lo haw anih loh chuan " ka ti a. A thaw deuh hak a, a hmeltha tak maiah chuan manganna niawm tak alang thei a. Eng nge maw a awmzia ni dawn ni? 

"Anih chuan ka kal lehnghal mai ang. A lo haw veleh ka lo kal tih lo hrilh mai aw" a ti a. Ka bu nghat a, hmanhmawh hmel taka a kal chhuak chu ka en a. Saitluanga a accident emawni tih ka ngaihtuah zawka. Mahse, chutiang anih ka ring lo. Ni se chuan kan hre daih tawh ang. 

Ka haw tur leh Saitluanga lo haw chiah Gate-ah kan intawka. Motor luh na tur in Gate ka hawn saka, a rawn tlan lut a. Kal mai ka tum laiin Mki lo kal kha ka hrechhuak leh zawk. 

Motor atanga a lo chhuah veleh ka pan phei a. 

"I haw dawn mi? " Amah zawkin min lo ti nghal a. 

"Um, thil ka hre chhuak a. Ka lo let leh lawk. Nichin khan u Mki a lo kala, a lo kal tih lo hrilh rawh min tia" ka ti a. 

"Anih chu.. " a ti ringawt. 

Zanah Lawmi nen KTP hla zir naah kan kala, ka phone Battery a low avangin ka charge a. Kan haw veleh pawimawh a awm takin tiin ka khawih nghala. Ka rin loh takin Saitluanga msg a lo awm teh tlat. 

"Naktukah ka zin dawna. Kar khat vel a ni dawna. Harsatna i neih chuan min rawn call dawn nia" Tih hi a lo ni a. Helamah hna a zawm chauh sia, eng zin nge maw ni? Hna thil anih ka ring lo ve deuh ngawt. 

"Aw le" Tih ka thawn let a. A seen nghal a, engmah phei chu a rawn sawi tawh lem lo. Pi in nei tura min tih kha thutak ni lo mah se Lawmi ka hrilh ta tho a. Ngeiawm khawpin a hlimpui lehpek. 

"Bd, ka be duh lawk che" Pi te In ka thlen veleh Pi Maduhi'n min lo ti nghal a. A tawngkam lah chu hriat a nuam fahran lo khawp mai. 

Inchung lam pana a kal chu ka zui chho a. Inchung zawlah a chhuak chho a. Pangpar dahna bulah a dinga, a bulah ka ding ve a. A tawng hun ka nghak a. A hmel thutak leh ngeng ngalh mai chuan ka awm a tinuam lo. 

"Niminah Zothana a lo kal tiraw? ' a ti hmak. Pi khan a sawi dik. Thil tha lo hre mai tura inring ka ni a, a zawhna ho angreng tak avang chuan ka thawveng deuh huai thung. 

" Um, kal e.. " Tha takin ka ti a. 

"Eng chungchang nge an sawi? " A ti leh a. 

"Ka hre miah lo mai. Roomah ka awm ve lo a" ka ti a. A hnar a tum dat. 

"Anih tak chu. Thil dang ka biak duhna che ala awm. U Mama hnenah min lo hek deuh thin tih ka hriaa. Ka lawm lo ania. Chhungkua kan nia, nang chu hnathawka chhawr inia. Kan chanchin lo sawi fo hi i tihtur a ni lo. Min hrilh leh vek zel tih hria la, ka pi hian a lo ngai na deuh che anih pawhin in tithei suh. Chhungkaw chungchang sawi theihna i nei lo ania" awki mar pat in a ti ta fak fak. 

"Ka fanu chungchang te ilo sawi a, lo sawi tawh suh. I thiannu Nurse mawl zet lah khan a duh duh a lo hrilh che a. Hetianga khawsak hi a mawlthlak em mai. Tha takin hna thawk la a tawk reng ania" a ti leh chat chat a. Sawi ve tur reng reng ka hre lo. 

"Ka huat vang che a ni lo a. Tha takin ka warning che anih chu" Nui chungin a ti leh a. A nui hmel chuan ka kawchhung a fana, ka tiril  khur dar dar mai. 

Note : Hman leh hman loin ka ziaka, edit pawh ka edit lehpek lo a. Mahse,internet a lo muan kual vel vangin ka post leh hleithei lo a. 

Chuan, naktuk zan hi ka Hmelchhe dawn 😝 achhan chu Story post zan hian hmeltha min ti thin sia, ka post ka ring lo a. Ka hmelchhe dawn tihna nih chu😆😆😆

Thiannu Akimi tihdan takah, Love story nisi, chapter 12ah pawh la inngaizawng lo hi awmzia a nei lo😝😆 Lungngai su, an inngaizawng tep tawh. Keipawn achangtupa hi ka star tan tawh ania😄