Bibi - 13

Chapter - 13

Pi Roomah ka thu tawm kaka, tukverh pawn lam ruahin a rawn theh thawt thawt chu hmuhnawm tih vang ni miah loin ka thlir a. Ka ngaihtuahna erawh Pi Maduhi tawngkam kha leh chiang em em khan a luah khat vek. 

Angela-i ka mitthlaah a lo lang a, a nu a hlauh zia leh inchhunga a ngampat loh em avangin keimah anga seilian turin ka lo dah ve tawp a. Ka tihtur nimiah loin ka lo ngaihven a, ka huang chin ka pel chu a ni ta mai a.Saitluanga ka ngaihtuah leh a, ka haw hluah hluah. Mahse, keimah ka dik lo. Engvangin nge an chhungkaw thil kha ka lo sawi tehreng. An hnathawk ka ni a, hnathawk ka nihna ang takin ka awm mai tur a ni a. Ka buai lohna turah ka buai ve tlat a. A sawi kha a dik lohna pakhatmah a awm lo. Saitluanga lahin tlemin min be tha deuha, ka lo tlangnel nghal ringawt bawka. Mawl min ti ngawt ang chu. Mi a in an at man an chawi seng lo tih zawng zawng ka nei zo chu anih hi. Mahse... Naupang lainatawm Angela, keimah anga tihduhdahna kha a tuar ve lo tiin vawitam ka inhrilh nawn chung hian ka hriatna te hian tihduhdahna a tuar tiin min hrilh sup sup a. Ngaihven tura dikna ka neih loh zia lah chiang taka hrilh nawn ka ni leh tawh si... 

"I va damthat loh hmel ve" Na-i'n min ti a. Ka inthup hle nangin ka mood ka hmelah a lo lang tho anih hmel. 

"Dam e... Ka thu zawi laklawh nih hi" Nui chungin ka ti a. Nuihzat vang a nui erawh ka ni lo. 

"I hmel a da tawp. Hei, Period dawna hmel da bul ang hian i awm "  a ti leh a. A sawithiam angreng lutuk chu ka nuih a ti za a. Ka nui hak hak a, mahse ka thutna atanga lang thei, darthlalang a ka hmel lo lang chu ka va hmu a. Na-i sawi dik zia ka hmu chiang ngang mai. 

"Thingpui ka han pe ange" a ti leh a. 

"Tu maw?' Ka ti ha. Angela-i leh Santi a pe dawn anih loh chuan tumah midang han pek tur an awm si lo. 

" Pi a lo haw tawh alawm. U Mki a lo leng bawk a" a ti liam puat.

Sana ka en a, dar 4 a lo hnai tawh a. Dar 2 vel thleng ruah a sur a, tunah erawh awihawm loh khawpin ni a sa leh tawh. 

Thingpui chawiin Na-i inchung lamah a chho a, pawnah ka chhuak ve thung a. Tlai lam ni sa chuan kawt sir a pangpar ho chu a chhun eng ut a, an lang thar sai mai bawka. Hmuh an nuam ngang mai. 

Na-i a rawn chhuak ve a, "khua a va tha leh tawh em em. Amak zawk e" a rawn ti nghal chul a.

"I haw dawn tawh em? " a ti leh a. 

"Haw hun pangngaiah animai" ka ti ta ve mai. 

"Ni a sa tha leh ta sia, thawmhnaw ka pho leh a. Buai lai laiin u Santi-in zar chhuak rawh min ti sek a. A seng leh peih awm tawp si lo. Eirawngbawl hmain ka han seng fel law law teh ang" a ti leh a. Santi hian eirawngbawl leh inchhung chetah pui vek tho mah se Angela-i enkawl chhuanlam atana hmana Na-i engmah han tihpui vak loh tum hi a ngah ve tih ka hre ru kar a. Chutah Santi an fak ar ek lo chauh reng bawk si nen, Na-i tan chuan a ninawm ve ngawt ang. 

"Ka han seng ang. Tihtur ka nei hleinem" ka ti a. 

"Ngai lo, ka han kal thei lawm" a ti tak nangin ka kal ta tho. Ka hna chiah buaipui tur in min ti nangin engmah ti lo a han awm  nilen ngawt chu taima viau lo mah ila ka thei lo. 

Inchung zawl ka pen chhuak chiah chu tawng thawm ka hriat avangin ka tawp chawt mai. Ka va dak chhuaka, Pi Maduhi leh Mki min hnungchhawn zawnga thu chu ka va hmu a. Pi Maduhi ka hmuh chak loh em avangin chhuk leh mai ka tum a. Mahse, Mki tawng,tah aw deuh chuan ka beng a verh ta zak. Saitluanga hming a lam deuh nuai bawk a. Bang kil nghengin ka ding a,  mi pangngai tih atana mawi lo mah ni se ka ngaithla duh tlat. 

"A awmdan ka hre thiam thlawt lo. Tunah pawh call vawikhatmah a pick lo a, msg a reply bawk lo a. I call a pick vek tho si" Rilru hah hmel zetin a ti a. A sawi awmzia ka man chiah lo nangin Saitluanga nen an inthen anih ka ring ve ringawt. 

"An kalna tur an thlen veleh ka lo bia ang. Mahse, rilru nuam deuhin awm la. Mipa vek an kal ka tih kha" Pi Maduhi'n a ti a. 

"Chu lamah chuan ka ngaihven lo. Kan inkawp hnuah tumah hmeichhia buaipui a nei lo a. Hmeichhe dang vang anih chuan ka hre tawh ang. Mahse, tuna a awmdan hi chu a dik lo. Ni 3 vel chu min be mumal tawh lo. In a ka lo kal pawh khan a mawiah min be lek chauh anih kha" tah aw deuh hian a ti tuau.

"Ka hria lawm. Lawm lohna a nei lo i ti bawk si a, mak ka ti. Hmmm, lungngai lo phawt la, ka lo zawt ang. A fel duak mai ang" Maduhi'n hnem tum takin a ti leh a. 

"In nula hi a lo kawp angem? " Mk-i'n a ti thut a. 

"Tu nula maw? " Maduhi pawhin a ti hu. 

"I pi enkawltu kha,  Tu nge hming kha? Bsi nge Bdi? " a ti leh a. Ka khawng vek lo chauh.

"Awi, I ti awihawm loh em maia. Awmpuite lo kawp duh tur hmuhin i hmu mi? " Nuihza em em in Pi Maduhi'n a ti a. Ka inhumruh tlat. 

"A en dan hi danglam ka ti deuh tlat.. Aaa, ka rilru a kal dik miah lo" a ti leh hluaia. An thutna thir thutthleng chik thawm atang chuan a tho anih ka ring a. A rawn kal phei thui chuan min hmu nghal dawn tih ka hria a, mahse Pi Maduhi chhan letna ka hriat duh avangin ka la ding lui ta tho. 

"A awm ang lo leh lutuk. Hetiang nula satliah nena lo sawikawp mai mai pawh hi hria se a duh lo khawp ang. Awi, chhuk ang. Nang hi thil ni lo lo i ngaihtuah tan ania. I chiang lo, beer in ila, I zia mai ang" a ti zui a. Thawm nei lo thei ang berin ka tawlhsawn zal zal a. Inhnuaiah hmanhmawh zetin ka chhukthlaa. Chokaah ka lut tlang a, Na-i'n phawk fein min lo en a. 

"I thlep fel nghal vek alaw? " a lo ti nghal chat. Engmah ka keng lut bawk si lo a, a zawhna chu zawhna awm tak a ni. 

"Kal leh rih nang. A la hma tho ka tia, pi thil ka va pe leh lawka. Tunah ka han kal ange" Awihawm loh khawpa zangkhaiin ka ti a. Tleirawl ngaihtuah thui lem lo tak a ni bawka. Awih lo hmel pawh a pu lem lo. 

Inchung atanga Pi Maduhi te lo chhuk hun ka nghaka, an rawn inzui thla ka hmuh veleh tui ka in leh te te a, pawn lam an pan hnuah inchungah ka chho ta chauh. 

Insuk seng pahin Gate bula an ding dun chu ka zuk en a. An sawi ka hre pha chiah lo nangin thildang vak an sawi ka ring lo. 

Pi Roomah ka thawmhnaw suk seng ho ka keng lut a, ka thlep fel a. Ka thleh pahin Pi Maduhi thilsawi kha ka ngaihtuah let a. "Beer in ang" kha a ti awlsam et maia. Zu leh hetiang ruihtheih lam hrim hrim hi ka ngaina lo nangin ka haw hran lo a. Ani pawh kha a lo in avangin ka ngaisual viau chuang lo.Mahse, zahawm taka a lanna phenah hian rinai taka nu khawsa pawlawh a lo ni ve thei a. Fa nei bawk si lo nen hian a mizia hi a landan lo lam hi a ni thei tlat. 

Ka lu ka thing nawka, ka buai lohna tura ka buai ziah hi ka sim angai. He tah hian hna ka thawk duh anih chuan mimal thil ka buaipui loh hi a him ber. Diktak chuan hna hi a dang ka hmu leh lo ang tih hlauhna ai chuan, ka enkawl mek Pitar chak tawh lo leh khawhar, mi rin tur mamawh em em,kei a thisen zawmpui pawh ni lo min ring tlat tu hi ka tan a hlu a. Natna lutuk nei rih lo mah se mihring ngaihah chuan rei daih tawh tur a ni lo. Ani hi a dam ve chhung leh enkawl tura min duh chhung chuan hna dang hi dil tur hriaiin lo tling tehreng pawh ni ila ka kalsan theih ka ring lo zawk. 

"Hey..' tih pahin Lawmi'n min rawn nghawk a. Ka en nghal vat a, mitmeng ling hlar hian min en a, a nu lam a mitmei a. Nutei ka en leh vat. 

" Eng nge? ' ka ti ringawt. 

"Chaw i duh belh em ka ti. Inngaihtuah vung vung zel suh ka tih kha. Mak leh lutuk mai" chaw khawrh sa lek vu chungin a ti hmawk hmawk. 

"Nu, an pahnih hian inngaihtuah vung vung khawp chu anni ve tawh alawm" Mama'n a lo ti a. Kan nui ta vak, Nutei pawh a nui veleh nge nge tho. 

Lawmi nen chawei kham hnuah roomah kan awm dun a, tun hnai chu eng emaw hriat beisei hian zantin ka roomah a rawn kal ziaha, keilah hian eng thil pawimawh mah sawi tur ka nei ngai lem hlei lo a. 

Pi Maduhi min tihdan kha ka hrilh a, thinrim deuh hian a ang hlak hlaka. Mahse, a tawpah erawh "A sawi dik tho ka ti, i thiam bik miah lo ania" a ti leh lawia. "mahse, ka haw hrim hrim. A sual dan hi a ril" A ti leh hram. Mki nena an inbiakna kha ka hrilh leha. 

"An inthen aniang a.. Huizzzz, a va tha tak. Ka ring dik dawn e. Zawlnei ka ni chiah chu" Phur em em hian a ti a. Ka nuih ringawt. Saitluanga nena min han sawi zawm thei mai kha mak tak a ni. Pi Maduhi pawn a awih lo ngang chu ania. 

"Pi Maduhi chuan kei leh Saitluanga sawi zawm ringawt pawh kha Saitluanga'n a duh lo ang a ti asin" ka ti leh a. 

"Hmelchhe lutuk. Officer anih avanga a ropui viauna a awm eih lo. He nu hi a thilsawi duh dan atang hian a mizia a hniam tlat. Mihring hlutna hi nihna leh thil neihah an teh chhung chuan tu pawh nise mihring mize hniam berah ka ngai. Mi ang lo tluk lek anni " a ti hlak hlak mai. 

Dar 10 velah ka mu a. Muhil mai thei loin ka let ka let a, engmah ngaihtuah hah em em ka nei pawh chu a ni si lo. 

Muthilh tumin che lo in ka mu a, ka mit ka chhing lui a, ka phone a rawn ri thut a, lukham hnuiah ka dah a, a rawn vibrate thut chu ka phu nasa ngang mai. 

Ka phone ka la a, min rawn call tu ka en a. Ks beisei loh em em in Saitluanga a ni teh tlat. Pi Maduhi bula ka thilsawi a lo hrilh leh vek avang khan ka ngei takzet a. Call pick loh pawh pawi ka ti lo. 

A tawpa, a rawn call nawn leh ka ring lem lo a. Ka rin ang ngeiin a rawn call nawn lo a. Mahse, msg a rawn thawn leh ta tlat. 

Open duh loin Noti atangin ka en a. 

"Kan kalna tur kan thleng chiaha, signal ka nei tha lo a" tih hi a lo ni a. Ka phone ka en vang vanga, eng nge kei min rawn hrilh teh tlat ni.. Mki ka rilruah a lo lang thut a.. 

"U Mki khan biak che a duh a" Tih ringawt ka thawn let a. Ka thilsawi tul loh zia ka ngaihtuah chhuak lehnghala. Delete ka tum a, mahse eng nge pawi? Delete leh a mumal lo deuh nih ai chuan tikhan chhiar mai mai teh se. 

"Ka pi eng nge a an? " a rawn ti ta daih. Thidang si loin khawi lai emaw ber atangin ka harhchhuak zawk hi a ni ber. Min biak vanga mimal thil ka lo ngaihtuah kha mi a ka lo ni... A pi enkawltu ka ni a, a ngaihtuaha, rawn zawt turin min rawn bia animai.

"A tha e" Ka ti tawi hle. Tin, ka zak namen lo hle bawka, ka hnar ka hmu lian hle hi a ni ringawt. 

"Good..i awm a, ka ngaihtuah lo ania. Chuan, Mki ni loin nangmah ka be duh che. Kan tliang em tihte min zawh ka beisei pah ania" Tih a rawn thawn leh a... Hei chu mimal thil angin ka ngai thei ta tlat...... 

Note : Ka chawl dawn chu rawn ti vaih ila chuan thenkhat khan "ka rin dan chiah" Inti leh dawna. Chuvangin ka chawl lo daih aw🤣 

Mahse, zanin chu ka ziak tawi hle a, ka edit lo lehpek bawk. Achangtupa lah hi ka Story pakhat A achangtupa hming SANGKIMA kha emaw ka ti ziaha. Ka ziak sual maithei. Tin, ka ziah tawi chhan chu ka in la regular ve tlat a😆chu chu ka mit-in a zo lo a, uak te, lu na te,tap si lo a mittui tla reng te in hun ka hmang mek aw😏 keimah bo thei si lo hian ka tarmit  a bo bawk a😂