Bibi -14

Chapter - 14

Reife ka ngaihtuah a, ka type sa ka delete ngun hle hnuah "In tluang em? " tih ringawt ka thawn let a.

"Tluang e.. Chaw kan ei dawn a" tih hi rang zetin a rawn thawn let leh a. Keimaha phurna mak angreng tak lo awm chu eng emaw tak hian a nuam angreng phian maia,thil thar kan duh deuh nei ang mai hian ka awm a. A nawmdan hian phurna mak deuh a keng tel ka timai. Mahse, Pi Maduhi bula ka thilsawi a lo sawi vek kha ka hrechhuak leh thut a. Ka phurna a bo nghal duak mai. Lo nel a, mimal taka kawmngeih lo tum hi a finthlak miah loh. Mi thenkhat angin ka ngaihdan ka thup ve thiam lo a, ka duh duh ka sawi tawp tawp tihna ni loin, kan innel deuh ni a ka hriat chuan ka tum loh tawpin an chhungkaw chungchang thlengin ka sawi veleh mai ang tih ka hlau tawha. Thian han ni thei tur chi lah kan ni tak tak hek lo a. Chuvangin hetianga a bialnu nen an inbiak loh vanga rawn filrt nghal ngawt a tum hi ka lo inven angai.

Ka phone ka dah a, muthilh ka tum a. Keima nun ka ngaihtuah let neuh neuh a, thian siam thiam lo leh nelawm lo tak ka ni chunga Pi-in min ngai na em em mai te hi mak tih loh theih pawh a ni lo a. Chumai pawh ni lo a Saitluanga'n min hnaih a tum deuh tlat mai pawh hi mak ka ti tho. Pi Maduhi sawi dan takah ani nena sawi zawm pawh thilawm lo anih tawh laia min hnaih a tum tlat hi a mak lamah a kal ve riaua. Pi vanga min bia chu nise a dik lohna a awm lo. Mahse, tunah hi chuan Pi lam ni loin mimal thil angin a kal tlat lawi si..Ka hmeltha lo a, ka pian lah mi aia nalh a ni hek lo.Keimaha ka chhuan ve ber chu engmah hi tih theih loh ka duh lo bur a, midang mamawh leh rinchhan ka tum lo lai hi animai. Mahse, ka mizia induhtawk ve tak vang ringawt hian Saitluanga nen chuan sawizawm chi kan ni tih na a ni chuang lo. Thiamna lamah ka sang lo a, office lama kan Boss tal nise a ziaa, mahse an mimal hna ka thawk a. An tan hnathawktu ang baka en tur ka ni lo. Min ngaizawng ta se atan hlawkna engmah a awm lo..Huizzz, ngaihtuah chiam lo hian thleng tur chu hun hian ala rawn herchhuahpui mai ang.

"Tunlai hi i tho hma thei mang e. I tho a deuh reng mai chu nih hi a" Nutei rawn thoin min rawn ti a.

"Ti ve ziah, ka thawhhma theih em hi? " ka ti hlak.

"I la tho hma rei lo em mai ka ti a. Gas a awl chuan thingpui min lo chhuan teh, ka mu fuh lo aniang, ka ring hi a nuam lo. Ka herh deuh emawni" a ti zui duaha.

"I herh chuan herh let pawp rawh"

"Chutia tih chi a ni hleinem maw, I at viau reng le" a ti hmuk a. Za fein ka nui zui kar kar a. Nui ve duh loin a thu tum buaua, a phone a en pah mual mual bawk.

Saitluanga zin atangin ni 5 a liam tawha, an chhungkuaah thil danglam em em thleng a awm lem lo. Mahse, thil pakhat danglam ta erawh a awm..A zin ni atang khan min be lo in nikhat pawh ala awm lo..Chhun lamah min biak chuan pi that leh that loh, hna chungchang a ni thin a. Zanah min rawn call ngei ngei a, msg in kan inbe zui leh ziah bawka. Ka be hmasa ngai lo a, msg pawh a rul tawk bakin ka chhang lo a. Phone call-ah pawh mahni inveng tih hriat takin, tawngkam bul angreng takin ka be thin a, chutichung chuan min biak a tawpsan duh der lo. Min biak dan a polite em em a. Zan lama min biak chuan hna vawikhatmah a rawn sawi ngai lo, thil ho mai mai kan sawi a, kan titi a, chhun lama an kalna te min hrilh thin a. An chhungkaw chungchang ka sawi leh palh ka hlauh avang leh ka nel anga, ka rilru tak takin ka pawh mai hlau hian ka inveng ru viaua. Pi Maduhi tawngkam na zet zet kha hriat leh ka hlau bawka. Mahse, zantin inbe ta ziah chu zantin min be tura ngaihna ka nei ru tan der tawha. Ka ngaihtuah chang hi chuan nakinah min biak loh hunah hrehawm ka ti ngei ngei dawna, chuvangin tuna min biak ang hian min be lo se ka ti thina. Mahse, min rawn call hi chuan ka pick lo thei chuang miah lo.

"Naktukah ka lo haw dawna" a rawn ti dut dut.

"Sundayah maw? "

"Um, haw lam chu flight -in... " a ti leh a, thianho chawlh hmang, mipa hlang, sum lama harsatna nei lem lo anni bawka. An duh duhin an khawsa a, an tan chuan khawvel hi a nuam ngawt ang.

"Hello... I la awm em? " a rawn ti leh a.

"Um" ka ti ringawt.

"Khawvel dang daihah hian min chensan zel a" Tih pahin a nui a. Ka nui ve hak hak mai.

"Dar 1 hmain kan lo thlen fel hman ka ring a,zanah i inkhawm angem? " a ti leh daih.

"Harsatna a awm anih loh chuan inkhawm ang. Tinge? "

"Zawhna hi zawhna bawk hian min chhang let ve ziah" a ti mar ut.

"Chaw kan ei chhuak dawna, Rodinga'n min rawn call sek tawh. Ka kal dawn, lo muhil lo la" Amah bawkin a ti leh a.

"Enge muthilh loh pawh chu? "

"Zawhna ngah si, muhil lo la nimai. Ka dah ania" a ti leh a.

Tukverh bulah ka dinga, pawn lama ruah tla seng seng chu light engah chuan a lang  nalh phian zui a. Fur lai tihtakah ruah a sur nitin a, nileng lenga sur chang a neia, achang erawh chuan chawhma lam zawng ni a sa a,mahse tlai lamah a sur leh nghek zel tho. Saitluanga ka ngaihtuaha, an lo haw tur khawchhia vanga an buai loh ka beisei rilru ve tawp.

Thenawmte inchung ruah sur in a nan ri ngaihnawm ti zetin ka ngaithla kar a, ka muthilh lai pawh hre lo in ka lo muhil a, ka harh leh chuan khua a lo var tawha. Ka phone ka en nghala, Saitluanga msg a lo awm a. Ka nui ringawt.

"Muhil suh ka tih kha, thuawih lo reuh lutuk" tih leh min mangtha na a ni a. Tukin a min rawn wishna a lo awm tel bawka. A zin tuk atang khan ala pelh ta miah lo chu ania. Zingkar mood a thlak hi a ni hawt zel e.

Nilengin a msg ka nghak a, mahse eng msg mah a rawn thleng lo. An chhuak dawn tih emaw a lo thleng tawh tih tal a rawn sawi ka ring a, engmah a rawn sawi ta si lo chuan min ti thinrim ru teuh a. Mahse, ka inngaihtuah chianga, lo thinrim ve ngawt turin a engmah ka ni lo tih ka inhriaa, ka awmdan chu atthlak ka ti leh hnuhnawh a, engkim rawn report tura ka lo beisei ve ngawt pawh a ka inti viau.

"Inkhawm i tum lo mi? " Lawmi'n min ti a. Ani pawh a la insiam bik chuang lo.

"Tum a tum loh pawh a awm lo. Ruah a sur leh ka hlaua, thawmhnaw hak tur ka ngaihtuah mek"

"A sur peih leh lutuk a, a vawt leh zo vek. Keichu khawlum hi ka duh ber" a ti leh a.

"A awihawm loh em maia. Khawlum pawh i tuar theih tawp loh kha" ka ti ve thung.

"Khawvawt ai thlawt chuan ka duh fe.. Kan Department ho room lah chu thli a dawng sia, vawiin pawh Vanrami nen kan khur kan khur maia. Hit vak lo" a ti leh bai bai.

"Kan room pawh a vawt ve tho e a. In over ve hrim hrim anih chu"

"Over lo nasa a ni. Chutia over min tih chuan room inthleng turin kohhran committee ho dil ila a tha ang' a ti leh a. A tang na lutuk chu ka nuih a ti za a, ka nui ta vak vaka. A tum vei hman hman nangin rei phei chu a tum lem hlei lo.

" Eng nge in la nuih vak vak reng a? Insiam ta che u" Nutei'n vin angreng takin a rawn ti a. Kan chhanna pawh nghak chuang loin kan insiamrei theih zia leh kan muan thu a sawi zui leh teuh.

"Ka'n insiam ange. Zanin chu scooty keng mai ang. Ka ke a na, step a kal ka peih lo. Mahse, nangman khalh ang che" a ti lehnghal zat zat.

"Nangman ken i duh a, khalh turin thu min la pe zui a. Rorelliani hi chu a" ka ti hlak.

"Phun lo mai teh aw, Pathlawi chhe lo uchuak bialnu nih tak vang mai hian i phunchiar sawt riau. I bialpa a upa tawh lutuka, I upa emaw i inti mi? " a ti leh duah.

"I va han chhe tak" Tihngaihna hre loin ka ti ringawt.

"Tha min tih em kha a. A reng rengah nang hi i lo tunlai ka ti ta. Thawnthu han chhiar ila Pathlawi star tur hi an awm ngei zel a. Atak ngeiin Pathlawi hausa in a ngaizawng mek che a, i mizia zawng zawng nen, i future a bright riau" a ti leh zat zat a. Tawng ngaihna hre loin ngei em em-in ka melh a, engahmah ngai lo zet hian a nui chhuak awr awr thunga. Amah chauh hi Saitluanga nena kan chungchang hre tu a ni a. Ka kal tirh atang a inngaihzawn tir min tum ngar ngar kha ania, tuna kan han inbe ta hi keimah ai hian nuam a ti zawk emaw tihmai tur a ni.

Inkhawm ban veleh kan haw a, ka inthlak laiin Nutei'n tu emaw a be thawm ka hriaa, ka room hi a phui deuh avangin pawn lama tawng hriat a har deuh thina, Mama leh Patea an la haw bawk si lo a, Nutei nena inbia pawh chu Lawmi niturah ka ngai mai.

"Bibi, inleng i nei ania" ka room kawngkhar bul atangin a rawn ti a.

"Tu nge? " ka ti let a. Kawngkhar a rawn hawng a, " Tu nge a? " ka ti nawn leh a.

"A hming ka zawt lo. Rawn en la, I hre mai ang chu" a ti a. Ka rilruah Saitluanga a lo lang zawka. Ni lo, vawiinah a lo haw chauh sia,a lo leng lo tawp ang. Bakah, han inrim em tur kan ni pawhin ka la hre lo.

Living room a ka va phei chu Saitluanga a lo thu reng tak tak. Ka ngaihtuah naah awm reng mah se ataka a lo thu han hmuh takah chuan ka hamhaih tho mai.

"I lo leng alaw? " Tha tak chuan ka ti ta tho. An zinnaah ni sa an tuar nasa bawk aniang, a lang thu deuh a, a T-shirt var hak pawh alang sar angreng viau. Mahse, a chungah Cardigan pawl duk a haa, chu chuan a tilang nalh thlup tho.

Nutei hnenah ka thawhna te chhungkaw zinga mi a nih tih ka hrilha, a hming ka sawi tur chu ka tim deuh nangin "Saia"  ka ti ta tho.

"Awww, nangmah hi maw Saitluanga chu? ' Nutei'n a ti chiam pek. Saitluanga ka melh zawka, min en loin Nutei a en a, Nutei tawng mawlh mawlh chu uluk hmel zetin angaithla a. Nutei titi mek chu thilpawi a sawi hlauin ka en ve reng a, ka rin ang ngei ngeiin " I hming hi chu ka hre ngun tawha, an sawi ve fo che a" a ti ta chiah, a sual vang ni miah lo hian a sawi tur hi ngaihtuah chiang lo a sawi liam mai mai a ching a, zanin ngat phei chu a huat hian ka haw hlur mai.

Lawmi room atangin a rawn chhuak ve a, a nghal viau thin nangin ani hi chu a hun leh hmun hre tak thin a ni bawka. Ka thawveng nghal huai mai.

"B, thingpui ka lum dawn. In duh ve em? " a rawn ti nghala, ka beisei ang ngeiin ahmuh tirh khan a hmel a buai nak nangin a buai zui lo tih alang reng. A hre reng tih ka hre tho chungin ka hnathawhna te chhungkaw zing ami Saitluanga anih tih ka hrilh a, nel takin a be nghal thei mai.

Darkar khat zen zawn a thut hnuah a haw a, a haw tur Gate thleng ka thlaha. Kal ta mai loin a ding khawmuang a, min rawn en a.

"I hming kha nalh ka ti riau" Nui chung hian a ti a.

"Maw? " ka ti ringawt.

"Bibi tih kha mawle, ka koh duhdan tak che. I hmel nen a inhmeh reuh lutuk" a ti a, a nui zui leh a. Nutei min ko ri kha a lo hria tih ka hre mai.

Inchhung ka luh veleh "Eng nge khatia i tih kher? " Nutei hnenah ka ti nghal a.

"Eng maw? " Angaihna hre lo hmel zetin a ti ha.

"Saitluanga bulah khan an sawi fo che tih kher angai hleinem. Zahthlak lutuk" ka ti hlak hlak.

"A ho e, in sawi ziah alawm mawle. Dawt pawh ka sawi hleinem" a ti ve tlat. Nia, dawt pawh a ni lo, Lawmi vang vek.

"Ka nu hi chu hetia lo tawng hi i ching ve hrim hrim" Lawmi'n a lo ti ve a.

"Ka ching emawni a? Bibi inleng phei chu pangngai taka kan neih hmasak ber aniang chu. Nanga bialpa, naupang enkawl ngai ang kha a ni lo hmel riaua. A fel ang" a ti zui leh teuh.

"Naupang enkawl ngai a ni lo e" Thinrim deuhin Lawmi'n a ti a. A room-ah a lut a, kawngkhar na zetin a khar thuaia, Nutei a ang zui bawrh bawrh. Patea hian kan ngaihzawng te-ah lo inrawlh lo turin a ti ziaha, mahse tuna Lawmi bialpa hi zawng a duh ngang lo chu a ni e.

Nutei'n a bialpa a sawisel sak kha a thinrimpui bawka Saitluanga lo leng thut min rawn chhaih tur pawhin Lawmi a lo kal lo. Mu chungin phone ka khawiha, Saitluanga'n in a thleng tih min rawn hrilh a. "Naktuk atangin hna ka tan dawna, zanin chu muthilh tam ka mamawh riaua. Ka muhil ang" a rawn ti a. Chawlh hmanga zin mah nise an kal kual nasa em a, a chauhthlak hle ka ring sa hrim hrim.

"Mangtha le" Thildang sawi loin ka ti a.

"Mangtha ti ziah suh. Muttui ti rawh ka tih kha, Mangtha tih chu a tawp em mai" a rawn ti a. Ka nui nghal hak mai. A duh lo tih ka hre reng a, mahse tihluih hi nuam ka ti ve tlat.

"Um,  Muttui"

"Min lo call la.. " a rawn ti leh a.

"Ti nge? "

"I titi anga, thil kan sawi pah anga"

"I muhil thei nang"

"Thei dawn e, i aw ngaithla chungin ka muhil duh "  Ka nui leh hak mai.

Ka phone nghawr dar dar-in min tiharh a,khua a lo eng uar tawha, Ka phone ka bana, min rawn call tu ka en a. Saitluanga a lo ni a. Ka pick hmain dar zat ka en a, dar 7:30 a lo ri tawh. Thawh ka hai chiang viau..Mahse, Tun ang zingkarah min rawn call ngai lo, min rawn wish pawhin msg in a ni ziah.

"Hello.. " thawh chhuah pahin ka ti a.

"Morning... I mu tha em? " a rawn ti zangkhai vuh.

"Um, mu tha.. Nang zawk? " ka ti let ve nghal a.

"I hnar ri khan min awi mu a, ka mu tha chuan ka hria" a ti a, a nui zui a. Nizan khan keimah zawk ka muhil hmasa daih a. Mahse, ka hnar ka ring kher lo.

"Ka hnar awm lo" ka ti nghat.

"Hnar bawk..."

"Ka awih lo e a. Ti nge min va rawn call hma ve? " Ka ti a.

"Nia, ka pi hi tukin chu a tho nuam vak lo a, Damdawiinah kan kala, hei an lo admit a" a rawn ti ta daih. Ka beisei loh lutuk a rawn sawi takah chuan ka thaw nghal hak mai.

"Khawi damdawiinah? Ka lo kal nghal ang" ka ti nghal a.

Damdawiin hming a rawn sawia, "Hmanhmawh suh, amah hi chu a tha vek. Tlemin a chau deuh ringawt a. Mahse, I theih chuan hetah lo kal zawk la. I awmpui a duh a" a rawn ti a.

"Aw, chaw ka ei lawk anga. Ka lo kal  a nimai"

Nutei'n eirawng a lo bawl peih vek tawha. Pi damdawiinah an dah tih ka hrilha, " Intifai la, chawei vat vat la, kal thuai rawh" a ti a. Ka inbual zuai a, chaw ka ei lehnghala, ka hmanhmawh tawh sa nak laiin Nutei'n hmanhmawh tura min lo tur leh a lo phili ve chung chuan min ti buai zo vek.

Mama'n Damdawiinah min daha, vanneihthlak takin jam a la awm lo hlauh. Saitluanga ka call a, an awmna room a rawn sawia. Cabin-ah an indah lut fel deuh chiah a lo ni a. Piin min hmuh veleh chau chung chungin min lo biaa. "Pi, tawng duh suh. Hahdam deuhin awm la, I zia leh vat mai ang" ka ti a. A kut cher thiak mai chu ka humsak vang vang a, kan la inenkawl rei loh zia leh ka lo ngainat hman si zia ka inhrechiang ngang mai.

"Office kal ngei ngei ka ngai a, ka va haw phawt anga, Maduhi ten mamawh tur ho an rawn dah ang" Saitluanga'n a ti a. Ka bu ringawt.

"Pawimawh a awm chuan min lo call la aw" a ti leh a, ka darah a rawn vuana. Ka thu mar nghal auh a, ka insangmar nghal teuh bawk. Mahse, min vuan rei loin a kal sawn ta hlauha, ka thaw nghal huai mai.

Saitluanga a kal liam deuh chauh tihin Pi Maduhi a rawn thlenga, Driver nen an rawn inkeng bawr luka, an thil lo ken ho ka lo buaipui ve nghal a. Pi Maduhi hmel tum bur maiah chuan lawm lohna a nei anih ka ring ve tawp.

"Hetah ilo va kal tlang daiha, in lamah ken tur a tam sia, I keng nghal ang chu ka ti ania" a ti hmaka, a lawm loh chhan chu ka hre chawpchilh nghal chu animai.

"U Mama, khan helam kal turin min rawn tia" ka ti a. Ngaihdan ni lo hmel zetin a ner nawk.

"Keiman ka ti hleinem che, a tul chuan ka hrilh mai ang che chu. I thu thu hian i ti leh tlat zela..." Min ti leh fak fak.

Saitluanga'n kal turin min ti miau a, chutia a lawm loh vanga min han thiam lo ringawt chu ka ngaihdan a ni bau lo. Chhan leh tumin ka ang zuaua, mahse kawngkhar a rawn inhawnga, Saitluanga a rawn lut a, tawng loin ka chip lehnghal daih.

"Maduh, Bdi kha helama kal turin ka ti anih kha, i lo sawisel mekin ka hriaa" a rawn ti nghal a. A awki dam ang aiin a nelawm lem lo viau. Pi Maduhi makti hmel chu ka va melh zawka, Saitluanga ka en leh a. A lo let lehchhan ka hre lo a, engpawh chu a lo let leh chhan ni rawhse, min tan zawnga a rawn tawng tlat avangin ka lawm tawk em em animai.

NOTE : KA LA HMELCHHE CHAK LUTUK🤣mahse kar tluan tluana han hmelchhiat kha dik theiin ka hre lo a, eng eng emaw ka rawn thaikawi e... Ka mood lo em em a, achangtupa pawh hi duh angin ala PA hleithei lo🤣

Ka la tlin mang lo a, eye drop te nen ka la ni nuai maia, min beisei sang rih lo tluang zel phawt ru aw☺